الحلقة الثالثة: ماذا لو أنقذ هابي هوجان عيد الكريسماس؟
الحلقة التالتة كان معاد عرضها متوافق مع ليلة الكريسماس "25 ديسمبر"، فكانت أحداثها بتدور ف نفس الليلة، وبنشوف هابي هوجان مساعد توني ستارك مسؤول عن حماية مقر الأفنجرز من هجوم "جاستن هامر" الخطير.

17- بداية الحلقة بلقطة برج الأفنجرز ودمجه بالبرج جوا كرة التلج الزجاجية الصغيرة، فيه تشابه كبير مع اللقطة الأخيرة لفيلم الكريسماس الكوميدي Elf اللي بتندمج فيه لقطة الامباير ستيت مع نسختها المصغرة جوا كرة التلج الزجاجية.
اللطيف إن فيلم Elf من إخراج جون فافرو، نفس مخرج فيلم آيرون مان، ونفس ممثل شخصية هابي هوجان، اللي بيعتبر هو بطل الحلقة دي. إشارة لطيفة فعلًا.

18- لقطة اتصال هابي بأعضاء الأفنجرز على موبايله لطلب النجدة، بنلاقي قائمة الأسماء فيها أسامي شخصيات ليها علاقة بأفلام آيرون مان، زي بيبر بوتس، جيمس رودز، الجنرال روس، سام ويلسون، نك فيوري، ماريا هيل، ناتاشا رومانوف، ستيف روجرز، المذيعة كريستين إيفرهارت، الطفل هارلي كينر اللي ظهر في الجزء التالت، بجانب أسماء تانية منها عدد كبير من مؤلفين المسلسل، بل وشخصيات عاملين بشركة مارفل فعلًا، منهم حتى ستان لي

19- في عالمنا، بدأ توني ستارك إستخدام نظام الذكاء الاصطناعي "فرايداي" بعد ما جارفيس بقى فيجن في فيلم Age of Ultron، لكن في العالم دا، كان عنده فرايداي كنظام احتياطي حتى من قبل خسارته لجارفيس.

20- سقوط جاستن هامر من الشباك المكسور بالحركة البطيئة ووفاته شبه مشهد سقوط الممثل آلان ريكمان بشخصية "هانز جروبر" في فيلم Die Hard، اللي احداثه كانت في الكريسماس بردو. وفي مشاهد كتيرة ف الحلقة، كان فيه تشابه بين جمل جاستن هامر مع جمل هانز جروبر، وحتى أحداث الحلقة فيها كتير من فيلم Die Hard، زي تسلل هابي جوا أنفاق التهوية، أو قفزه من الشباك بالقماش يشبه قفز بروس ويلس بخرطوم المطافي.

الحلقة الرابعة: ماذا لو واجه آيرون مان الجراندماستر؟
الحلقة دي كان من المفترض بيها تظهر في الموسم الأول، لكن اتأجلت بسبب التأخر في انتاجها خلال فترة جائحة كورونا، ف بنفهم هنا ازاي جامورا بقت بطلة بسبب توني ستارك اللي معرفش يرجع للأرض بعد توقيفه لغزو الشيتوري في 2012، وسبب انضمامها للفرقة في الموسم الأول.
الحلقة تعتبر تقليد لفيلم ثور راجناروك، لكن بوجود توني ستارك وجامورا بدلًا من ثور وهالك، ودخولهم في سباقات مركبات فضائية تشبه أجواء فيلم ماد ماكس، بدلًا من منافسات مصارعة.
21- الخمرة اللي بتشربها فالكيري قبل السباق هي نفس النوع اللي شربته نسختها الحقيقية في فيلم ثور راجناروك، بالإضافة لتفاصيل وشخصيات كتيرة شفناهم ف الفيلم ظهروا هنا ف الحلقة بردو.

22- كورج بيكرر حركة الحلقة الأولى من الموسم التاني، وبيضرب حراس الجراندماستر بطريقة ضرب هالك للوكي في فيلم الأفنجرز 2012.

23- جامورا بتستعمل نفس المدفع اللي استعمله ثور وقت هروبه مع لوكي في فيلم ثور راجناروك.

24- آيرون مان بيعمل بدلة زي الترانفسورمرز، بتتحول من سيارة لبدلة متحركة والعكس.

25- جامورا بتستخدم عصا الإذابة اللي كانت عند الجراندماستر على ثانوس، ورغم إنه مظهرش إنه مات، إلا إن دا يفكرنا بالموسم الأول في اللقطة اللي انتقلت فيها جامورا من عالمها لتجمع أبطال المالتيفرس، كانت بتسيح قفاز ثانوس في الحمم مع توني ستارك، ف يبدو إنها نجحت فعلًا في القضاء على ثانوس

الحلقة الخامسة: ماذا لو واجهت كابتن أميركا جندي الهايدرا الآلي؟
26- في إستكمال لأحداث حلقة كابتن كارتر بالموسم الأول، بنشوف أحداث مشابهة لفيلم الأفنجرز 2012، لكن بوجود كابتن كارتر بدل ستيف روجرز، ومنها وقفة الأفنجرز المشهورة أمام جيش الشيتوري.

27- بتظهر واسب/ الدبورة ضمن فرقة الأفنجرز، لكن ببذلة تصميمها مشابه لبذلة آنت مان مش بذلتها المعروفة.

28- لقطة مساعدة بيجي كارتر لناتاشا في القفز على الدرع للوصول لمركبة الشيتوري، نفس اللي حصل في فيلم الأفنجرز بين ستيف روجرز وناتاشا.

29- بعد كده بتبدأ الأحداث تتشابه مع فيلم Captain America: Winter Soldier، لكن ستيف روجرز ببدلة الهايدرا الآلية بدل باكي بارنز بشخصية جندي الشتاء.

30- رقم 88 المرسوم على بدلة الهايدرا الآلية هو إشارة محتملة للعدد Tales of suspense #88، اللي فيه بتظهر نسخة روبوت من باكي بارنز بيواجه كابتن أميركا. وبالمناسبة، السلسلة دي هي اللي شهدت الظهور الأول لبيجي كارتر في الكومكس، وبالتحديد في العدد 75.

31- لقطة إطلاق بدلة الهايدرا الآلية للصواريخ على بيجي وناتاشا مع وجود القمر في الخلفية وراه، تخليه شبه شعار الهايدرا شوية.

32- طيارة شيلد اللي ركبوها كان مكتوب عليها رقم 42، وهي إشارة محتملة ل3 حاجات:
* العدد Nick Fury: Agent of S.H.I.E.L.D. #42، اللي بيواجه فيه نك فيوري أعضاء من منظمة الهيدرا.
* السجن 42 اللي ظهر ف انيميشن Earth’s mightiest heroes، واللي يشبه الغرفة الحمراء اللي ظهرت في الحلقة هنا.
* رقم 42 هو الإجابة عن سؤال الكون في رواية وفيلم الخيال العلمي hitchhiker's guide to the galaxy.

33- إعادة ظهور لشخصية ميلينا فوستوكوف اللي قامت بيها الممثلة ريتشل ويز في فيلم بلاك ويدو الأصلي. وهنا هي بتظهر كالقائدة الجديدة لمنظمة الغرفة الحمراء المسؤولة عن صناعة عميلات البلاك ويدو.

الحلقة السادسة: ماذا لو أعادت كاهورتي تشكيل العالم؟
34- بتدور أحداث الحلقة في عالم حصلت فيه الراجناروك قبل ما يوصل التيسراكت للأرض، وبنشوف شخصية "كاهورتي" اللي تم ابتكارها جديد مخصوص للمسلسل، بس بعد نجاحها في المسلسل ممكن جدًا نشوف لها قريب ظهور في العالم السينمائي الحقيقي.
*أحداث الحلقة أغلبها بلغة الموهوك، إحدى قبائل السكان الأصليين لأمريكا الشمالية، أو اللي احنا بنسميهم بالخطأ "الهنود الحمر"، وبتظهر الإبادات اللي عملها المستعمر الإسباني في القبائل دي، في منطقة تعتبر دلوقتي هي نيويورك.
اسم كاهورتي هو اسم حقيقي نابع من قبيلة الذئاب، معناه "محركة الغابة" أو اللي بتحفز اللي حواليها على الحركة والعمل، ودا مشابه جدًا للي عملته خلال الحلقة فعلًا من تحفيز وجمع المقاتلين لمواجهة المستعمر، وتغيير التاريخ.
ولأن الشخصية وعالمها جديد علينا، فهي ملهاش إيستر إيجز متصلة بالكومكس بصراحة.

الحلقة السابعة: ماذا لو عثرت هيلا على الحلقات العشر؟
حلقة مشابهة لأحداث فيلم ثور، لكن بتطبيقها على هيلا، الإبنة الأولى لأودن قبل إنجاب ثور، مع مزجها بفيلم شانج شي، لتقديم شخصية وين وو/ الماندارين وحلقاته العشرة.

35- في رسمة معركة غزو أودن وهيلا لبقية العوالم التسعة، بنشوف رموز العوالم دي مرسومين حوالين الدايرة، اللي هم: أزجارد، ميدجارد (كوكب الأرض)، يوتنهايم، سفارتلفهايم (العالم المظلم)، فاناهايم، نيدافيلير، نيفلهايم، موسبلهايم، ألفهايم (موطن جن الضوء).

36- مشهد تحطيم أودن للمطرقة ميولنير، بيتطابق بالظبط مع مشهد تحطيم هيلا للمطرقة في فيلم ثور راجناروك.

37- أودن بيتعامل مع تاج هيلا نفس معاملته للمطرقة ميولنير في فيلم ثور، بس بشوية تعديلات، زي إن التاج دا تلبسه واحدة ست بس، وإن معيار الجدارة هو إن يبقى في قلبها الرحمة.