الحلقة الأولى: ماذا لو انضمت نيبولا لفرقة نوفا؟
في الحلقة دي بنلاقي نيبولا فقدت أختها جامورا وثانوس اللي اتقتلوا على يد رونان، فكملت حياتها بإنها انضمت لفرقة نوفا الفضائية لمواجهة الأشرار. وتبدأ الحلقة بالعثور على يوندو مقتول، وبتحقق في سبب وفاته الغامضة.

01- تتر بداية المسلسل زي ما هو تقريبًا، بيظهر في البداية الأبطال الرئيسيين لعالم مارفل زي بلاك ويدو، كابتن أميركا، آيرون مان، بعدها لقطة تقسيم الواقع لأبعاد مختلفة، فبنشوف صور شخصيات الموسم الأول زي جامورا، كابتن كارتر، لوكي عملاق الجليد، دكتور سترينج، آلترون، واندا الزومبي، وآيرون مان. بعد كده بتتقسم الأبعاد تاني، ونشوف الشخصيات الجديدة للموسم التاني.

02- ستايل الحلقة وأجوائها الديستوبية وأضواء النيون ولقطات كتيرة من الحلقة فيها تأثر كبير بفيلم The Blade Runner القديم من بطولة الممثل هاريسون فورد

03- كوكب زاندار محمي من رونان وشعب الكري بإستخدام درع فضائي ضخم هيعزل الكوكب عن الأخطار لمدة 50 سنة، دا معناه إن مفيش فرقة guardians of galaxy اتكونت ف العالم دا، خاصة بعد وفاة جامورا قبل ما الفرقة تتكون، وغالبًا بيتر كويل مبقاش ستار لورد، وروكيت يا إما اتقتل أو لسه محبوس ف سجن الhigh evolutionary زي ما شفنا ف فيلم الجزء التالت.

04- شعار منظمة نوفا المكون من 3 دوائر مضيئة تربطها خطوط، هو إشارة للشموس التلاتة لكوكب زاندار مقر المنظمة.

05- تصميم مركبة نيبولا فيه تشابه كبير مع مركبات الشرطة في فيلم The Blade Runner

06- نيبولا بتقابل يون-روج في سجن زاندار، اللي كان ظهر كشرير في فيلم كابتن مارفل قبل كده.

07- حركة كورج في ضرب أعضاء فرقة نوفا، زي اللي عملها هالك ف لوكي ف فيلم الأفنجرز.

08- نيبولا بتلبس زعنفة راس يوندو، وبتبقى هي المسؤولة عن تكوين فرقة الجارديانز ف العالم دا، وبدل أعضاء الفرقة المعروفين بالنسبة لنا، هنا بيبقوا نيبولا، البطة هوارد، جروت، كورج ومايك.

الحلقة الثانية: ماذا لو هاجم بيتر كويل أبطال الأرض؟
هنا بنشوف إيه اللي ممكن يحصل لو كان بيتر كويل هاجم الأرض في 1988، فتتكون فرقة الأفنجرز بالأبطال الموجودين وقتها، قبل معاد تكوينهم المعروف ف عالمنا في 2012.

09- المركبة الصغيرة اللي بتهبط على الأرض شبه مركبة إيجو اللي شوفناها ف فيلم جارديانز الجزء التاني.

10- ملابس الطفل بيتر كويل في الحلقة هي نفس الملابس اللي ظهر بيها في فلاش باك فيلم جارديانز الاول وقت وفاة أمه، قبل ما يتم اختطافه على يد يوندو.

11- لقطة عرض إيجو للكواكب على الطفل بيتر كويل، هي بالظبط لقطة عرضه للكواكب على بيتر كويل الشاب في فيلم جارديانز الجزء التاني.

12- بالرغم إن بيتر كويل مبقاش ستارلورد بالشكل اللي احنا عارفينه، لأن يوندو سلمه لإيجو، ولا كوّن فرقة الجارديانز، لكنه ما زال بيحب حيوان الراكون حتى لو مكانش روكيت، عشان كده اختار دميته من محل الملاهي على شكل الراكون.

13- أفنجرز عام 1988 هم: الملك تشاكا/ بلاك بانثر، باكي بارنز/جندي الشتاء، دكتور هانك بيم/ آنت-مان، بيل فوستر/جاينت-مان، ويندي لارسون/ مار-فيل أو كابتن مارفل، مع إنضمام ثور في النهاية بنفس شخصيته لأن عمره طويل مقارنة بأبطال الأرض، تحت إشراف هوارد ستارك وبيجي كارتر.

14- الملك تشاكا اللي ظهر في الحلقة، بيقوم بأدائه الصوتي نفس الممثل اللي قام بالشخصية في فلاش باك فيلم بلاك بانثر.

15- هوارد ستارك بيقترح لو يخبوا بذرة إيجو اللي على كوكب الأرض، ويرموها ف الزبالة. وهي إشارة لجملة مشابهة قالها توني ستارك في فيلم إيندجيم، أثناء نقاشه مع دكتور سترينج بخصوص وصول ثانوس للأرض عشان يستولي على الأحجار اللانهائية، فاقترح توني إنهم يرموا حجر الزمن في الزبالة.

16- لقطة وصول ثور وإفقاده للطفل بيتر كويل وعيه، بيقول بيتر جملة "افتكرتك الرجل اللي ظهر في فان هيلين"، وهنا يقصد تشابه هيئته مع المغني الأمريكي ديفيد لي روث David Lee Roth في فترة شبابه بالثمانينات ضمن فرقة فان هيلين.

الحلقة الثالثة: ماذا لو أنقذ هابي هوجان عيد الكريسماس؟
الحلقة التالتة كان معاد عرضها متوافق مع ليلة الكريسماس "25 ديسمبر"، فكانت أحداثها بتدور ف نفس الليلة، وبنشوف هابي هوجان مساعد توني ستارك مسؤول عن حماية مقر الأفنجرز من هجوم "جاستن هامر" الخطير.

17- بداية الحلقة بلقطة برج الأفنجرز ودمجه بالبرج جوا كرة التلج الزجاجية الصغيرة، فيه تشابه كبير مع اللقطة الأخيرة لفيلم الكريسماس الكوميدي Elf اللي بتندمج فيه لقطة الامباير ستيت مع نسختها المصغرة جوا كرة التلج الزجاجية.
اللطيف إن فيلم Elf من إخراج جون فافرو، نفس مخرج فيلم آيرون مان، ونفس ممثل شخصية هابي هوجان، اللي بيعتبر هو بطل الحلقة دي. إشارة لطيفة فعلًا.

18- لقطة اتصال هابي بأعضاء الأفنجرز على موبايله لطلب النجدة، بنلاقي قائمة الأسماء فيها أسامي شخصيات ليها علاقة بأفلام آيرون مان، زي بيبر بوتس، جيمس رودز، الجنرال روس، سام ويلسون، نك فيوري، ماريا هيل، ناتاشا رومانوف، ستيف روجرز، المذيعة كريستين إيفرهارت، الطفل هارلي كينر اللي ظهر في الجزء التالت، بجانب أسماء تانية منها عدد كبير من مؤلفين المسلسل، بل وشخصيات عاملين بشركة مارفل فعلًا، منهم حتى ستان لي

19- في عالمنا، بدأ توني ستارك إستخدام نظام الذكاء الاصطناعي "فرايداي" بعد ما جارفيس بقى فيجن في فيلم Age of Ultron، لكن في العالم دا، كان عنده فرايداي كنظام احتياطي حتى من قبل خسارته لجارفيس.

20- سقوط جاستن هامر من الشباك المكسور بالحركة البطيئة ووفاته شبه مشهد سقوط الممثل آلان ريكمان بشخصية "هانز جروبر" في فيلم Die Hard، اللي احداثه كانت في الكريسماس بردو. وفي مشاهد كتيرة ف الحلقة، كان فيه تشابه بين جمل جاستن هامر مع جمل هانز جروبر، وحتى أحداث الحلقة فيها كتير من فيلم Die Hard، زي تسلل هابي جوا أنفاق التهوية، أو قفزه من الشباك بالقماش يشبه قفز بروس ويلس بخرطوم المطافي.

الحلقة الرابعة: ماذا لو واجه آيرون مان الجراندماستر؟
الحلقة دي كان من المفترض بيها تظهر في الموسم الأول، لكن اتأجلت بسبب التأخر في انتاجها خلال فترة جائحة كورونا، ف بنفهم هنا ازاي جامورا بقت بطلة بسبب توني ستارك اللي معرفش يرجع للأرض بعد توقيفه لغزو الشيتوري في 2012، وسبب انضمامها للفرقة في الموسم الأول.
الحلقة تعتبر تقليد لفيلم ثور راجناروك، لكن بوجود توني ستارك وجامورا بدلًا من ثور وهالك، ودخولهم في سباقات مركبات فضائية تشبه أجواء فيلم ماد ماكس، بدلًا من منافسات مصارعة.
21- الخمرة اللي بتشربها فالكيري قبل السباق هي نفس النوع اللي شربته نسختها الحقيقية في فيلم ثور راجناروك، بالإضافة لتفاصيل وشخصيات كتيرة شفناهم ف الفيلم ظهروا هنا ف الحلقة بردو.