02- أي حاجة تخص كاملة خان من ملابس أو أدوات أو أوضة نوم، هتلاقيها غرقانة بالإيستر إيجز اللي تخص كابتن مارفل وبعض شخصيات مارفل التانية، من رسومات مأخوذة من أغلفة الكومكس، لمشاهد من الكومكس، لحاجات تانية كتير. كاملة خان هي الكومكس نيرد الأفضل ف عالم مارفل حتى الآن.

03- فكرة تبادل المواقع بين كارول، كاملة، ومونيكا، مأخوذة من السلسلة الأصلية القديمة لكومكس كابتن مارفل بشخصية Mar-Vell، اللي في أحد أعدادها بيستخدم أساور الكوانتم أو اللي اسمها في الكومكس "Nega-Bands" عشان يتحول بتبادل المكان مع ريك جونز.

04- في مشهد اقتراح كاملة لألقاب لمونيكا رامبو، بتقترح عليها أسامي: فيجن، ومونيكا كانت قابلته في مسلسل واندا فيجن، وبعدها اسم نوفا على اسم الفرقة الفضائية اللي ثانوس قضى عليها، واسم بروفسور مارفل، ودا إشارة لاسم الساحر في قصة "ساحر أوز"، كذلك قالت اسماء "بولسار" و"سبيكتروم"، ودي ألقاب حقيقية لمونيكا رامبو في الكومكس.

05- الكري أطلقوا اسم المبيدة Annihilator على كارول دانفرز، وفي الكومكس هنلاقي إن فيه فرقة كاملة اسمها The Annihilators، بتتكون من أبطال فضائيين خارقين زي سيلفر سرفر، بيتا راي بل، جلاديتور، آيكون ورونان المعاقب.

06- الشريرة دار- بن لما واجهت الأمير يان، أمرته إنه يركع kneel. الممثلة زوي أشتون اللي قامت بالدور، هي في الحقيقة زوجة الممثل تيم هيدلستون اللي عامل دور لوكي، ف واضح إنها عاملة زي جوزها أيام ما كان لوكي شرير زمان.

07- رغم غرابة كوكب ألادنا والأمير يان اللي شوفناهم ولغتهم هي الغناء والموسيقى، إلا أنهم موجودين في الكومكس فعلًا. بس مفيش إشارة ف الكومكس لإن لغتهم هي الغنا، والأمير يان اتجوز واحدة تانية خالص بدل كارول دانفرز.

08- الأزياء الجديدة اللي حصل عليها الثلاثي في كوكب ألادنا، كان فيها نسخة شديدة الشبه بلبس مونيكا رامبو في الكومكس، إن كان هيبقى فيه عباءة بيضا على ضهرها ضمن الزي، لكن مونيكا شالتها في الفيلم وتخلصت منها.

09- في مشهد وصول المركبة الفضائية للأرض، بيوصلوا عند تمثال الحرية، اللي بقى تمثال أفنجر الحرية، كنصب تذكاري لكابتن أميركا زي ما شفنا إنه كان لسه بيتجهز في فيلم Spider-Man: No Way Home، دلوقتي كإستمرار للأحداث بعد مرور السنين، بقى التمثال مكتمل خلاص.

10- كارول دانفرز بتقرر تنتقل لمنزل آل رامبو، عشان تحرسه في غياب أصحابه، ويمكن تقرر تستقر على الأرض وتوقف رحلاتها الفضائية مؤقتًا.

11- كاملة خان بتعمل زيارة مفاجأة لكيت بيشوب/هوك آي، واللي واضح إنها مش هتكتفي بيها بس، لما قالت إن أنت-مان عنده ابنة، فهتضمها ليهم وتضم شخصيات مراهقة تانية، ممكن زي ريري ويليامز "آيرون هارت"؟ أو آميركا تشافيز؟ كبداية لتأسيس فرقة اليانج أفنجرز زي ما ظهروا في الكومكس.

12- مشهد ما بعد التتر المفاجأة، بنلاقي إن مونيكا رامبو انتقلت للعالم الموازي، وهناك بتقابل نسخة من والدتها ماريا رامبو، اللي بتظهر هناك بهوية "بيناري". وهي شخصية موجودة ف الكومكس كنسخة من كارول دانفرز، لكن هنا ف الفيلم ظاهرة بشخصية نسخة لماريا رامبو، كأنها كابتن مارفل العالم الموازي دا.

13- بيظهر كمان مع شخصية بيناري، شخصية هانك ماكوي/ بيست من عالم الإكس مين، بالأداء الصوتي لنفس ممثله القديم كيسلي جرامر، كاستكمال لظهور شخصياتهم في عالم مارفل، مع الإشارة في كلامهم للبروفيسور إكزافير، وسماعنا لموسيقى فيلم X2 وDays of Future Past، وظهور باب الغرفة اللي على شكل شعار الإكس مين، كتوضيح إنها داخل مقرهم الخاص، بس دا بردو مش معناه إنه عالم الإكس مين القديم اللي عارفينه، يبدو إنه عالم جديد للإكس مين في عالم مارفل السينمائي، لأن العالم القديم غالبًا هينتهي على يد ديدبول في فيلم ديدبول 3.

في 2023، حاولت أركز أكتر مع الكتب اللي بتتكلم عن الكومكس والسوبرهيروز بشكل تحليلي أو فلسفي، للتعمق في عالم دراسات الكومكس اللي بقيت حابب أخوض فيه أكتر..
..
الكتب دي كانت مفيدة ليا بشكل شخصي في الموضوع دا، وبإذن الله ناوي في 2024 أستزيد من النوع دا في القراءات بجانب قراءاتي المعتادة 😊