وكما قال الحكيم موبيوس:
لا وجود للراحة. اختر عبئك وحسب.

انتهى الموسم الثاني من لوكي، بحلقة أقل ما يقال عنها إنها عظيمة، أفضل نهاية لأفضل مسلسل عملته مارفل في شبكة ديزني بلس، وبالتأكيد أفضل أعمال مارفل من ساعة إيندجيم...
الحلقة حصل فيها أحداث كتيرة، واتقفلت قصص أكتر، واتفتحت قصص جديدة هنعرف تفاصيلها وأسرارها في أعمال مارفل الجاية، وطبعًا كالعادة كان فيها إيستر إيجز هايلة...
طب إيه اللي كان مستخبي وحصل، وإيه اللي مستخبي وهيحصل وممكن يحصل؟ تعالوا نشوف 👇🏻💚😈

01- من البداية، مقدمة مارفل المعهودة بتتلعب بالعكس، من نهايتها لأولها، كإشارة للتلاعب الزمني اللي بيحصل طول المسلسل.

02- عنوان الحلقة السادسة الأخيرة كان "Glorious Purpose"، بمعنى هدف مجيد، وهو بالمناسبة نفس عنوان الحلقة الأولى من لوكي الموسم الأول، كنوع من إستمرار فكرة الدايرة المغلقة اللي شفناها كتير طول الموسمين...أوبي/ أوروبوروس بيسلم عليكم ^_^

03- النص الأول من الحلقة بحوار تكرار الأحداث عشان يوصل للحل، فكرني باللي شفناه في فيلم 1000 مبروك لأحمد حلمي، وفيلم Groundhog day ، وEdge of Tomorrow ونهاية دكتور سترينج، اللي قصصهم مبنية على نفس الفكرة بردو زي أعمال كتيرة تخص السفر في الزمن.

04- جملة لوكي اللي قالها لسيلفي for you, for all of us، هي تكرار لجملة لوكي في فيلم ثور الأول، لما قالها لأودن في نهاية الفيلم. هنا لوكي بيقول الجملة بعد ما فهم معناها الحقيقي.

05- لوكي بيتقدم نحو النول الزمني بدل فيكتور تايملي، وبيتعرض للإشعاع الزمني، اللي بيحرق لبس الTVA من عليه، عشان ينسلخ عنه زي الجلد القديم للتعبان، ويظهر لوكي بجلده الجديد الأصلي وهويته الحقيقية الجديدة، لوكي سيد الحكايات، برداء كلاسيكي يشبه ملابس الأساطير النوردية وملابسه في الكومكس، وقرونه المميزة الطويلة.

06- بنشوف مشهد مؤثر جدًا، وواحد من أفضل مشاهد الجرافيك في تاريخ مارفل، لما يجمع لوكي خيوط الزمن المبعثرة بعد انفجار النول الزمني، ويوحدهم بطريقته ورؤيته كخطوط زمنية جديدة في هيئة شجرة، استنادًا لأصوله الأزجاردية وكإشارة مباشرة وواضحة لشجرة يجدراسيل Yggdrasil، شجرة الحياة والعوالم التسعة في الحضارة والأساطير النوردية، اللي ظهرت في الكومكس لأول مرة في العدد journey into mystery vol.1 #97 ، واللي شفناها في عالم مارفل لما اتكلم عنها أودن وثور، واتنقل ثور عبر عوالمها في فيلم Thor: Dark World.
بس بصراحة حتى الآن مش واضح هل تأثر بيها وخلى الخط الزمني شبهها، ولا هو بقى ف الشجرة نفسها ودمج بيها الخط الزمني.

07- شكل شجرة الخطوط الزمنية بقى مشابه لشكل شجرة المالتيفرس اللي ظهر في فيلم Spider-Man: Into the spider-verse

08- من اللطيف إن الشجرة بشكلها الحالي كفروع وجذور، بيشبه بردو شكل الساعة الزمنية، اللي هو شعار منظمة الTVA، ولوكي في قلب الشجرة، في منتصف الساعة الزمنية، الزمن بيمر من خلاله زي ما بتمر حبات الرمل من عنق الساعة.
بنشوف الشجرة بتتفرع لفروع كتيرة ومتماسكة، بعد ما كان الهدف القديم هو تقليم كل الفروع الجديدة والحفاظ على الخط الزمني المقدس، هنا لوكي بيسمح بوجود التفرعات الزمنية وبيحافظ على وجودها وتشابكها بشكل متناسق، مما هيسمح بوجود عالم جديد هنشوف فيه تداخلات ونسخ جديدة وغريبة علينا.

09- لوكي بيفضل جوا الشجرة كأساس وجودها وتماسكها وكبديل لhe who remains على عرش نهاية الزمن، بعد ما أدرك إنه عشان ينقذ المالتيفرس إنه يواجه أسوأ مخاوفه، بإنه يفضل لوحده، ويقرر أنه يضحي تضحيته الأعظم ويحمل العبء الأثقل على الإطلاق، مقابل إنه يحقق رغبته القديمة بالجلوس على عرش العالم كله ويحقق جملة أودن إن ثور ولوكي مقدر لهم إنهم يجلسوا على العرش، ورغبته الجديدة بإنه يحقق الأفضل للجميع ويحافظ على وجود أحبابه وأصدقائه ويكتفي بمشاهدتهم والإطمئنان عليهم من موقعه عن بعد.
الممثل توم هيدلستون صرح إن دي نهاية رحلته مع شخصية لوكي ومفيش موسم ثالث، وأظن إننا هنستنى كام سنة عقبال ما نشوفه تاني في فيلم أفنجرز سيكرت وورز، وحتى لو استمر بقاؤه جوا شجرة التايملاين، ومش هنشوفه تاني، فأظن دا كان أفضل وداع ممكن للشخصية في عالم مارفل.

10- فيه تأثر واضح لمنظمة الTVA بعد تضحية لوكي وتوليه إدارتها بعد he who remains، فمبقتش وظيفتها الأساسية تقليم الخطوط الزمنية، بالعكس بنشوف بوستر بيقول "دعنا ننمو معًا!" في إشارة لشجرة الخط الزمني وتفرع الخطوط،والشاشة اللي كان عليها الخط الزمني بالعرض، بقى الخط الزمني على هيئة الشجرة الحالية.
دلوقتي وظيفة TVA الأهم هي متابعة نسخ كانج وملاحقة النسخ اللي بتسبب أي مخاطر زمنية. وموبيوس بيذكر في كلامه إن حصل مشكلة مع نسخة كانج في العالم الكمي في الأرض 616، لكنها اتحلت، وهنا يقصد اللي حصل مع نسخة كانج في فيلم أنت مان 3، وبكده غالبًا أحداث الموسم التاني كانت قبل ومع أنت مان3، بعيدًا عن إن الTVA خارج النطاق الزمني، فممكن كل حاجة تحصل في أي وقت وف نفس الوقت، وأحداث كتيرة تحصل فيها تساوي ثواني في عالمنا إحنا.

11- موبيوس في مكتبه في الTVA قبل ما يسيب المنظمة ويروح يشوف حياته على الأرض، بنلاقي فيه ملف على مكتبه عليه الكود M-FF353، هنا حرف الM كإشارة لاسم موبيوس، والرقم إشارة لعدد Fantasic Four #353، أول عدد ظهر فيه شخصية موبيوس في الكومكس.

12- بنشوف إن دلوقتي خلاص محدش سافر للماضي ودليل الTVA موصلش لفيكتور تايملي الطفل، فبالتالي مش هيبقى نسخة كانج بعد كده، عشان نبقى اتخلصنا من المشكلة دي، ولو إن مفيش حاجة أكيدة بردو. كل شيء ممكن بعدين.

13- ريفونا رينسلاير بعد تعرضها للتقليم على يد براد اللي استحوذت سيلفي على عقله، بنلاقي إن ريفونا اتنقلت لأرض العدم void اللي شفناها في نهاية الموسم الأول، زي أي حاجة بتتقلم بعصا التقليم الزمني.
بتكتشف ريفونا تحت أقدامها أرضية الTVA بشعارهم المعروف، مما يثبت إن الTVA انهارت قبل كده كتير، واتبنت من تاني زي ما He who remains قال في حواره مع لوكي، إنه من السهل إعادة بنائها مهما اتدمرت.
مشهد الهرم اللي وراها دا احتمال يكون إشارة لنسخة كانج في مصر القديمة، المسمى بـ"راما توت"، واللي شفناه في مشهد نهاية فيلم أنت مان 3. فهل راما توت هناك؟ هل هينقذها من الوحش ألايوث الضخم اللي بيلتهم كل النسخ اللي بتيجي أرض العدم؟ ولا اللي هينقذها نسخة كانج الغازي بتاع فيلم أنت مان 3، وبكده تقدر تشارك كانج في حربه ضد الأفنجرز بعد كده؟ ولا دي نهايتها خلاص؟ هنعرف خلال الأعمال الجاية...

في أكتوبر 2023، صدر كتاب MCU: The reign of Marvel Studios، اللي بيحكي عن قصة صعود استديوهات مارفل ورحلة صنع أفلام عالمها السينمائي، من خلال قصص الكواليس وحوارات مع شخصيات كتيرة شاركت في المشروع الضخم دا، منهم ممثلين ومخرجين ومؤلفين ورسامين ومصممين وغيرهم...
كتاب توثيقي مهم مليان قصص منها اللي ممكن مكناش نعرف عنه حاجة أبدًا...

كتاب MCU: عصر استوديوهات مارفل بإذن الله هنزل منه ترجمات أسبوعية "كل يوم أحد وأربعاء" لمقتطفات لأهم الأحداث والقصص اللي موجودة فيه...
الكتاب نزل في أكتوبر 2023، وبيتكلم عن كواليس رحلة صناعة أفلام عالم مارفل السينمائي، من خلال مقابلات مع أغلب العاملين بالمشروع من بدايته لحد دلوقتي...
...
ودي ترجمة صغيرة لجزء من المقدمة، ومن بكرة إن شاء الله الحلقة الأولى...
👇🏻👇🏻👇🏻