الحلقة الرابعة اللي كنا فاكرينها حلقة عظيمة، اكتشفنا إنها عادية بالمقارنة مع الحلقة الخامسة من مسلسل لوكي الموسم الثاني، بعد ما لوكي اتولى مهمة إعادة كل حاجة لوضعها السابق، وامتلاكه لقدرات جديدة هتبقى هي حل الإصلاح الوحيد...وطبعًا انتهت الحلقة بنهاية تخلينا على أعصابنا لحد الحلقة الجاية الأخيرة..
طب إيه اللي كان مستخبي وحصل، وإيه اللي مستخبي وهيحصل وممكن يحصل؟ تعالوا نشوف
💚👇🏻

01- من البداية، شعار مسلسل لوكي اللي حروفه بتتغير كالعادة، المرة دي كمان كانت حروفه بتختفي واحد ورا التاني، وبعدها تظهر تاني، في إشارة لاختفاء لوكي وظهوره عبر الزمن.

02- ملاحظة مش مهمة شوية، بس لما لوكي بيكتشف فراغ الTVA من كل أصدقائه، ويدور في كل مكان جواها عنهم، بنلاقي إنه حتى لما يروح المطعم، مفيش أي قطعة كيك موجودة من اللي كان موبيوس بيحب ياكلها.

03- مشهد ظهور نسخة كايسي باسم "فرانك" ضمن مساجين بيهربوا من سجن ألكاتراز هو استغلال لقصة حقيقية، وهي حادثة الهروب الناجحة الوحيدة في تاريخ السجن، لتلاتة من المساجين هربوا ومنهم سجين اسمه "فرانك موريس" اللي هنا كايسي بيقوم بدوره، لكن تعذر إيجادهم بعد كده وافترضوا إنهم غرقوا في خليج سان فرانسيسكو.
واللي عملوا شخصيتين الأخوين كلارينس أنجلين وجون أنجلين، اللي هربوا مع فرانك موريس في الحقيقة، هم "جاستن بينسون" و"آرون مورهيد" اللي أخرجوا بعض حلقات الموسم دا من لوكي، ومنها الحلقة الخامسة دي.
وإظهار حادثة الهروب دي هو تكرار لإستغلال مارفل لأحداث حقيقية زي ما حصل في الموسم الأول لما لوكي طلع هو د.ب. كوبر اللي سرق فلوس وهرب من طيارة بباراشوت.

04- جملة تانية اتقالت في مشهد كايسي وقت الهروب، لما قال لزمايله خلال سماعهم صوت الإنذار وقت تجهيز القارب إنهم لو اتمسكوا، هيفرغوا أحشاءهم زي السمك. وهي إشارة ذكية لجملة اتقالت في لقاء لوكي بكايسي لأول مرة في الحلقة الأولى بالموسم الأول، لما لوكي قال لكايسي إنه هيفرغ أحشاءه زي السمكة، فجاوبه كايسي: "إيه هي السمكة؟"

05- الزمن والمكان اللي كانت فيه الصيادة B-15 بنسختها كطبيبة، كان نيويورك 2012، ودا بيشير لإحتمالية كبيرة إن لوكي خرجها من المكان قبل ما كانت هتموت ضمن انهيارات وانفجارات أحداث معركة الأفنجرز ضد لوكي وجيش الشيتوري في نيويورك زي ما شفنا في فيلمهم زمان.
وبالمناسبة، هنا هي اسمها د.ويليس شغالة في مستشفى باسم روجر ويليس للأطفال اللي هو غالبًا والدها. وهي إشارة لكومكس مارفل وبالتحديد في عدد THOR #345، اللي ظهر فيه روجر ويليس كجندي سابق في الحرب مبقاش يتأثر بعوامل السن والشيخوخة بسبب التأثير السحري لصندوق الشتاء القديم.
ماليكيث حاول يسرق الصندوق دا، ويستخدمه لإستدعاء سارتور ويدمر بيه العالم. لكن ثور واجهه وانتصر، ومنح ثور الصندوق لروجر ويلس عشان يخبيه عنده في أمان، فنتيجة لتعرضه لتأثيره، بقى منيع ضد آثار الكبر في السن.
وممكن بردو تبقى إشارة لشخصية فيريتي ويليس اللي ف كومكس مارفل هي إحدى صديقات لوكي، واللي عندها قدرة على كشف أي أكاذيب قدامها.

06- لما لوكي انتقل لحياة شخصية أوبي كمؤلف لقصص الخيال العلمي، بنلاقي إن من كتاباته رواية اسمها "The Zartan Contingent" وهي إشارة لأكتر من حاجة، أولًا: زارتان دا إشارة لشخصية شريرة في كومكس G.I.Joe وبيمتاز ببراعته في التنكر، زي ما لوكي بيعمل كده. وفيه فصيلة فضائية صنعها السيليستيالز اسمها الزارتانز Xartans في كومكس ايترنالز، وقدراتهم هي التحول في الشكل زي السكرولز، ودا بردو زي اللي لوكي بيعمله لما بيتحول بقدراته السحرية.
وبالمناسبة، اللي هيتفرج على تتر النهاية في كل حلقة، بنلاقي إن الرواية دي محطوطة على مكتب أوبي جنب اسم الممثل كي هوي كوان اللي عمل الشخصية.

07- بنلاحظ كمان إن ورشة المؤلف أ.د. دو، نسخة أوبي، شكلها متطابق مع قسم الإصلاحات والتطويرات الخاص بأوبي في منظمة الTVA، وفيها كمان تصميم متعلق نازل من السقف شبه النول الزمني.

08- رواية "The Sons of Yoren" اللي مألفها نسخة أوبي، غلافها وغالبًا أحداثها مقتبسين عن مغامرة لوكي وسيلفي، خصوصًا المشهد اللي حصل ف الحلقة الرابعة من الموسم الأول وقت انهيار المكان، عشان كده نسخة أوبي قالت للوكي لما قابله وحكى له حكايته، إنه كأنه بيقابل شخصية من شخصيات رواياته.

09- منح لوكي دليل الTVA لنسخة أوبي، بتزود من حلاوة وتعقيد فكرة الأوروبوروس "الأفعى اللي بتاكل نفسها من ديلها"، كإشارة للحلقة المفرغة اللي بتتكرر فيها الأحداث، ومنبقاش عارفين بدايتها كانت فين.
دليل الTVA اللي كتبه أوبي، واتنقل ف الزمن مع ريفونا رينسلاير، وسلمته لفيكتور تايملي عشان يستخدم تعليماته في تكوين آلات الزمن، بنلاقيه هنا كمان راح لنسخة أوبي في الخط الزمني المقدس، عشان يتعلم منها تكوين جهاز الانتقال الزمني...

10- في زيارة لوكي لنسخة موبيوس، بنتأكد أخيرًا من افتراضات الموسم الأول إن موبيوس في نسخته الأصلية كان له علاقة بزلاجات المياة "جيت سكي" من كتر كلامه عنها قبل كده، ولما بيروح لبيته، بنلاقي إن بيته بيحمل رقم 1049، وهي إشارة محتملة للأرض 1049 في كومكس مارفل، وهي العالم الافتراضي اللي صنعه فرانكلين ريتشاردز، ابن رييد ريتشاردز وسو ستورم في الفانتاستك فور.

11- الحلقة الخامسة مستمرة بالإشارة لشخصية زانياك، اللي شفنا إشاره ليها لأول مرة في الحلقة التانية من الموسم التاني، كشخصية خيالية في فيلم من بطولة الصياد X-5 بهوية براد وولف في الخط الزمني المقدس.
هنا بنلاقيها في ماكينة ألعاب قديمة لشخصية نفس الفيلم في البار اللي قعدت فيه سيلفي مع لوكي. وبتستمر نفس الإشارة في نهاية الحلقة خالص بعد نهاية التتر، لما نسمع جملة “You died, insert a coin, LOSER!” بصوت براد وولف كإشارة لفشل لوكي وإعادته للتجربة من تاني، كأنه هنا بيحط عملة في الماكينة عشان يلعب دور تاني.

12- مشهد زوال كل شخص وكل حاجة من حوالين لوكي، اكيد افتكرنا بيه مشهد تفتت الافنجرز في نهاية انفنتي وور

13- في نهاية الحلقة، لوكي بيكتشف قدرته الجديدة على التنقل في الزمن، وبيقول إنه يقدر يعيد كتابة الحكاية من تاني.
ودي إشارة لكومكس لوكي من كام سنة قريبة فاتت، لما أخد لقب "إله الحكايات God of Stories" (استغفر الله)، فيمكن نشوف دا هنا ف نهاية المسلسل.

مارفل نزلت كتاب جديد لعالمها السينمائي، بالترتيب الصحيح وكل التفاصيل والحاجات الخاصة بالأفلام والشخصيات...
مسم...اوعدنا يا رب <3 نستنى النسخة الpdf لما تنزل ع النت بقى، وساعتها هتنزل هنا ف القناة إن شاء الله ❤️❤️...

البوست دا كان من شهور، نسخة الPDF نزلت فعلًا، وجاري رفعها على القناة فورًا 😎❤️

أحدث كتب مارفل في 2023، الكتاب الرسمي للخط الزمني الكامل لعالم مارفل حتى مسلسل لوكي 2، بالترتيب التاريخي الصحيح لكل أحداث أفلام ومسلسلات عالم مارفل السينمائي ❤️

وكما قال الحكيم موبيوس:
لا وجود للراحة. اختر عبئك وحسب.