أظن بالنهاية الصادمة اللي حصلت للحلقة الرابعة من لوكي الموسم الثاني، فإحنا شوفنا حلقة تقيلة، وقدامنا حلقتين أتقل وأتقل من كل اللي فات!!
بس الحلقة نفسها بعيدًا عن نهايتها، كان فيها حاجات مهمة بردو..طب إيه اللي كان مستخبي وحصل، وإيه اللي مستخبي وهيحصل وممكن يحصل؟ تعالوا نشوف 💚👇🏻

01- مشهد عرض مس مينتس لذكريات ريفونا مع "he who remains" قبل مسح ذاكرتها، بتورينا لقطة فيها بعض المشاعر الدافئة بينه وبين ريفونا، أينعم مش بقوة علاقتهم الرومانسية المليئة بالصراعات في الكومكس اللي نشأت بينها وبينه بعد ما مملكتها سقطت أمام غزو كانج، لكنها إشارة من بعيد لكده، أو يمكن مجرد البداية دلوقتي لحاجات أكبر بعدين.
بالإضافة كمان لمعلومتين، الأولى إنها كانت قائدة جيوشه في حرب المالتيفرس اللي نجح بعدها في إنه يخلي الTVA هي المسيطرة على خطوط الزمن كلها، والمعلومة الثانية إن شعار المنظمة اللي هو "for all time, always" نشأ من جملة قالوها الاتنين ما بينهم.

02- إشارة تانية ذكية في موضوع البروتوكول 42، اللي بيمسح ذاكرة موظفين الTVA، فبنلاقي رقم 42 بيتكرر كتير في عالم مارفل ، زي ما شوفنا إنه رقم أرض العنكبوت المشع اللي قرص مايلز موراليس في سبايدرفيرس، وكذلك في "السجن 42" اللي هو سجن المنطقة السلبية اللي اخترعه مستر فانتاستك/ رييد ريتشاردز بمساعدة هانك بيم وتوني ستارك في الكومكس. ودا لإنه كان رقم الإجابة عن السؤال العظيم عن الحياة والكون وكل شيء في فيلم الخيال العلمي "The Hitchhiker’s guide to the galaxy"، فهي إشارة تكريمية من صناع الأعمال للرواية والفيلم دا اللي يعتبروا من علامات الخيال العلمي الكلاسيكية.

03- دخول فيكتور تايملي لأول مرة جوا منظمة الTVA كان مشهد هايل، ووقوفه أمام لوحة تاريخ حروبه، بنلاحظ هنا المرة دي صورة أوضح ليها ووسط نسخ كانج فيه سفينة ضخمة على شكل سيف، تشبه قاعدته الحربية الفضائية في الكومكس.

04- فكرة إن أوبي هو مؤلف دليل الTVA اللي وصل لفيكتور في طفولته، وبسببه جت له أفكار السفر في الزمن وابتكار اختراعاته، اللي انتهت بصنعه للـTVA اللي بقى فيها أوبي وعمل دليلها، كلها بتأكد نفس فكرة اسم أوبي وانطباقها على أحداث المسلسل، إن الاحداث بتدور في دائرة مفرغة كله مشارك فيها، والحل الوحيد للنجاة هو كسر الدائرة دي.

05- لما اكتشفت الصيادة B-15 والباقيين إن مس مينتس عزلتهم من السيستم، بنلاقي صورة لمس مينتس بتحرك صباعها وبتقول "لا لا، ممنوع الدخول."
وهي تقليد وإشارة لفيلم Jurassic Park الأول، لما اتحط فيروس في النظام عشان الخاين يسرق بيضة ديناصور، كان فيه صورة هو حاططها ف السيستم لنفسه وهو بيعمل نفس الحركة. وشخصية مس مينتس نفسها كان اتقال من صناع الموسم الأول للوكي إنها مقتبسة جزءيًا من شخصية Mr. DNA اللي كان في فيلم الديناصورات، لما هاموند عرض للضيوف فيلم انيميشن بيوضح طريقة استخراج الحمض النووي للديناصورات واستنساخها.

06- في الحلقة دي عرفنا إن مشهد الحلقة الأولى لما لوكي سافر للمستقبل، هو نفس المشهد اللي حصل دلوقتي، أجهزة الإنذار اشتغلت، ولوكي راح ناحية المصعد اللي لقى جواه سيلفي، ونسخته اللي جت من الماضي كانت واقفة قدامها، وبعدها حد مجهول ظهر من وراه وضربه بعصا التقليم الزمني. دلوقتي عرفنا إن لوكي هو اللي عمل كده. وبعدها قدر أوبي إنه يعيد تشغيل النظام، عشان يسمح للوكي بإستعمال السحر داخل الTVA، فاختفت مس مينتس، واستحوذت سيلفي عقليًا على براد وخلته ينفي ريفونا، ووصلوا للنول الزمني وهناك اتطوع فيكتور تايملي بإنه يلبس البذلة ويدخل لإصلاح النول، لكن أول ما خرج من الباب اتبخر بسبب الاشعاع الزمني. وبعدها حصل انفجار الخط الزمني المقدس اللي نهى كل شيء.

07- انفجار الخط الزمني المقدس ممكن يبقى بداية للسماح بمزيد من الإصلاحات في زمن ومالتيفرس عالم مارفل السينمائي، أو دخول عناصر وشخصيات جديدة من الأفلام القديمة السابقة للـMCU، بالتزامن مع الاخبار إللى سمعناها مؤخرًا إن فيلم Secret Wars وديدبول 3 بعد نهاية المرحلة السادسة، هيعملوا ريستارت لعالم مارفل بشكل جديد تنضم فيه كل الشخصيات والعوالم في عالم واحد جديد وهنشوف فيه ممثلين جدد لشخصيات قديمة أو ماتت.

الحلقة الرابعة اللي كنا فاكرينها حلقة عظيمة، اكتشفنا إنها عادية بالمقارنة مع الحلقة الخامسة من مسلسل لوكي الموسم الثاني، بعد ما لوكي اتولى مهمة إعادة كل حاجة لوضعها السابق، وامتلاكه لقدرات جديدة هتبقى هي حل الإصلاح الوحيد...وطبعًا انتهت الحلقة بنهاية تخلينا على أعصابنا لحد الحلقة الجاية الأخيرة..
طب إيه اللي كان مستخبي وحصل، وإيه اللي مستخبي وهيحصل وممكن يحصل؟ تعالوا نشوف
💚👇🏻

01- من البداية، شعار مسلسل لوكي اللي حروفه بتتغير كالعادة، المرة دي كمان كانت حروفه بتختفي واحد ورا التاني، وبعدها تظهر تاني، في إشارة لاختفاء لوكي وظهوره عبر الزمن.

02- ملاحظة مش مهمة شوية، بس لما لوكي بيكتشف فراغ الTVA من كل أصدقائه، ويدور في كل مكان جواها عنهم، بنلاقي إنه حتى لما يروح المطعم، مفيش أي قطعة كيك موجودة من اللي كان موبيوس بيحب ياكلها.

03- مشهد ظهور نسخة كايسي باسم "فرانك" ضمن مساجين بيهربوا من سجن ألكاتراز هو استغلال لقصة حقيقية، وهي حادثة الهروب الناجحة الوحيدة في تاريخ السجن، لتلاتة من المساجين هربوا ومنهم سجين اسمه "فرانك موريس" اللي هنا كايسي بيقوم بدوره، لكن تعذر إيجادهم بعد كده وافترضوا إنهم غرقوا في خليج سان فرانسيسكو.
واللي عملوا شخصيتين الأخوين كلارينس أنجلين وجون أنجلين، اللي هربوا مع فرانك موريس في الحقيقة، هم "جاستن بينسون" و"آرون مورهيد" اللي أخرجوا بعض حلقات الموسم دا من لوكي، ومنها الحلقة الخامسة دي.
وإظهار حادثة الهروب دي هو تكرار لإستغلال مارفل لأحداث حقيقية زي ما حصل في الموسم الأول لما لوكي طلع هو د.ب. كوبر اللي سرق فلوس وهرب من طيارة بباراشوت.

04- جملة تانية اتقالت في مشهد كايسي وقت الهروب، لما قال لزمايله خلال سماعهم صوت الإنذار وقت تجهيز القارب إنهم لو اتمسكوا، هيفرغوا أحشاءهم زي السمك. وهي إشارة ذكية لجملة اتقالت في لقاء لوكي بكايسي لأول مرة في الحلقة الأولى بالموسم الأول، لما لوكي قال لكايسي إنه هيفرغ أحشاءه زي السمكة، فجاوبه كايسي: "إيه هي السمكة؟"

05- الزمن والمكان اللي كانت فيه الصيادة B-15 بنسختها كطبيبة، كان نيويورك 2012، ودا بيشير لإحتمالية كبيرة إن لوكي خرجها من المكان قبل ما كانت هتموت ضمن انهيارات وانفجارات أحداث معركة الأفنجرز ضد لوكي وجيش الشيتوري في نيويورك زي ما شفنا في فيلمهم زمان.
وبالمناسبة، هنا هي اسمها د.ويليس شغالة في مستشفى باسم روجر ويليس للأطفال اللي هو غالبًا والدها. وهي إشارة لكومكس مارفل وبالتحديد في عدد THOR #345، اللي ظهر فيه روجر ويليس كجندي سابق في الحرب مبقاش يتأثر بعوامل السن والشيخوخة بسبب التأثير السحري لصندوق الشتاء القديم.
ماليكيث حاول يسرق الصندوق دا، ويستخدمه لإستدعاء سارتور ويدمر بيه العالم. لكن ثور واجهه وانتصر، ومنح ثور الصندوق لروجر ويلس عشان يخبيه عنده في أمان، فنتيجة لتعرضه لتأثيره، بقى منيع ضد آثار الكبر في السن.
وممكن بردو تبقى إشارة لشخصية فيريتي ويليس اللي ف كومكس مارفل هي إحدى صديقات لوكي، واللي عندها قدرة على كشف أي أكاذيب قدامها.

06- لما لوكي انتقل لحياة شخصية أوبي كمؤلف لقصص الخيال العلمي، بنلاقي إن من كتاباته رواية اسمها "The Zartan Contingent" وهي إشارة لأكتر من حاجة، أولًا: زارتان دا إشارة لشخصية شريرة في كومكس G.I.Joe وبيمتاز ببراعته في التنكر، زي ما لوكي بيعمل كده. وفيه فصيلة فضائية صنعها السيليستيالز اسمها الزارتانز Xartans في كومكس ايترنالز، وقدراتهم هي التحول في الشكل زي السكرولز، ودا بردو زي اللي لوكي بيعمله لما بيتحول بقدراته السحرية.
وبالمناسبة، اللي هيتفرج على تتر النهاية في كل حلقة، بنلاقي إن الرواية دي محطوطة على مكتب أوبي جنب اسم الممثل كي هوي كوان اللي عمل الشخصية.

07- بنلاحظ كمان إن ورشة المؤلف أ.د. دو، نسخة أوبي، شكلها متطابق مع قسم الإصلاحات والتطويرات الخاص بأوبي في منظمة الTVA، وفيها كمان تصميم متعلق نازل من السقف شبه النول الزمني.

08- رواية "The Sons of Yoren" اللي مألفها نسخة أوبي، غلافها وغالبًا أحداثها مقتبسين عن مغامرة لوكي وسيلفي، خصوصًا المشهد اللي حصل ف الحلقة الرابعة من الموسم الأول وقت انهيار المكان، عشان كده نسخة أوبي قالت للوكي لما قابله وحكى له حكايته، إنه كأنه بيقابل شخصية من شخصيات رواياته.

09- منح لوكي دليل الTVA لنسخة أوبي، بتزود من حلاوة وتعقيد فكرة الأوروبوروس "الأفعى اللي بتاكل نفسها من ديلها"، كإشارة للحلقة المفرغة اللي بتتكرر فيها الأحداث، ومنبقاش عارفين بدايتها كانت فين.
دليل الTVA اللي كتبه أوبي، واتنقل ف الزمن مع ريفونا رينسلاير، وسلمته لفيكتور تايملي عشان يستخدم تعليماته في تكوين آلات الزمن، بنلاقيه هنا كمان راح لنسخة أوبي في الخط الزمني المقدس، عشان يتعلم منها تكوين جهاز الانتقال الزمني...

10- في زيارة لوكي لنسخة موبيوس، بنتأكد أخيرًا من افتراضات الموسم الأول إن موبيوس في نسخته الأصلية كان له علاقة بزلاجات المياة "جيت سكي" من كتر كلامه عنها قبل كده، ولما بيروح لبيته، بنلاقي إن بيته بيحمل رقم 1049، وهي إشارة محتملة للأرض 1049 في كومكس مارفل، وهي العالم الافتراضي اللي صنعه فرانكلين ريتشاردز، ابن رييد ريتشاردز وسو ستورم في الفانتاستك فور.