04- شخصية "أو بي" الجميل اللي بيؤديه الممثل كي هيو كوان، واللي اسمه ف المسلسل اختصار لكلمة أوروبوروس Ouroboros واللي كانت عنوان الحلقة، وهي الرسم القديم المعروف للأفعى اللي بتاكل ديلها ف دايرة مغلقة واللي ظهر في البدايات أيام الحضارة المصرية القديمة وانتشر لباقي حضارات العالم، كإشارة للبعث بعد الموت ولنظريات دوران الزمن والحياة ف حلقة مستمرة بتتكرر فيها الأحداث، واللي بالمناسبة بيشاركه "موبيوس" في إن اسمه بردو إشارة علمية لفكرة اللانهائية والاستمرارية بدون نقطة بداية أو نهاية.
وبالمناسبة بردو، الأوروبوروس ليه نسخة مشابهة في الاساطير النوردية اللي بينتمي ليها لوكي وثور، وبيتمثل في يورمنجاندر "ثعبان العالم"، اللي ضخم كفاية لأنه يحيط بالعالم كله. والأسطورة بتقول إنه بمجرد ما يسيب ديله من بوءه، بتبدأ الراجناروك. وفي نفس الأساطير دي، يورمنجاندر أحد أبناء لوكي نفسه.

05- شخصية القاضية جامبل متشابهة ف الاسم مع شخصية البروفيسور العبقري جاستن ألفونس جامبل ف كومكس مارفل، اللي كان واحد من موظفين هيئة الTVA، وكان اعترض على روتينهم في إتخاذ القرارات ضد روبوتات الهيئة، فاستقال من الهيئة، وسرق آلة زمن من كبسولاتهم الزمنية، علشان يوقف الروبوتات بنفسه.

06- إشارة لئيمة من صناع المسلسل ف إنهم يعملوا شكل الباب المؤدي للمغزل الزمني وطريقة فتحه زي شكل وطريقة الباب المؤدي لجهاز سريبرو الخاص بالبروفيسور إكزافير، اللي بيستخدمه للبحث عن المتحولين.

07- في مشهد ما بعد التتر "شوفوه لو مشوفتهوش"، بنلاقي سيلفي اللي بتنتقل لخط زمني في مدينة بروكستون بولاية أوكلاهوما سنة 1982، وبتدخل مطعم ماكدونالدز هناك.
في الكومكس، مدينة بروكستون هي المدينة اللي أسس فيها ثور مدينة نيو أسجارد بعد ما اتدمرت في حرب الراجناروك. ودا طبعًا بعكس اللي حصل ف أفلام مارفل لما بقت ف النرويج.

الموسم الثاني من مسلسل لوكي مستمر، ورجع لوكي من تاني لأداء المهمات مع منظمة TVA لحل كل المشاكل الجديدة ف خطوط الزمن وتفرعاته..
الحلقة التانية قد تبدو هادية ف التفاصيل، وأغلبها أكشن وحوارات شخصيات، لكن تعالوا نشوف إيه اللي كان مستخبي وحصل، وإيه اللي مستخبي وهيحصل وممكن يحصل ^_^

#lokis02_eastereggs

01- بنلاقي إن الصياد X-5 اتخلى عن وظيفته ف المنظمة، وبقى عايش كنجم سينمائي اسمه براد وولف في الخط الزمني الأصلي. وفي 1977، لوكي وموبيوس بيروحوا له أثناء إفتتاح فيلمه الجديد “The Zaniac” واللي بالمناسبة ظهر ف الكومكس قبل كده.
في العدد Thor #319 الصادر في 1982، براد وولف هو ممثل سينمائي أثناء تصويره لفيلم The Zaniac بيتعرض لحادث انفجار فيه إشعاع نووي. ونتيجة لكده بيتحول لكائن وحشي بقدرات خارقة، وبسبب مشاكل نفسية عانى منها ف طفولته وشوية جنون أصابه بعد الحادث، بقى مقتنع إنه شخصية وحش الزانياك اللي في الفيلم. هل دا هيحصل ف المسلسل؟ مظنش، بس كل شيء ممكن.
بالمناسبة بردو، 1977 هي سنة إصدار أول جزء في سلسلة أفلام ستار وورز، المملوكة لشركة ديزني التابع ليها مارفل.

02- في لقطة أثناء سير لوكي وموبيوس في شارع جانبي، بنلاحظ وجود بوستر على حائط صالة السينما لشخصية كينجو من الإيترنالز، واللي كانت شخصيته العلنية كممثل سينمائي هندي مشهور، ومنعًا للشك في عمره الطويل، تظاهر إنه أجيال عائلته كلها ممثلين على مر السنين. فغالبًا اللي ف البوستر هو أثناء تظاهره بإنه أبو شخصية كينجو الحالية.

03- من الشخصيات التانية اللي ظهرت على بوسترات الأفلام أمام صالة السينما، بنشوف شخصية اسمها The Phone Ranger، وهو شخص لابس تليفون أرضي أحمر قديم على راسه. ظهر لأول مرة في العدد Marvel Age Annual #1 الصادر في 1985، وكان عبارة عن فني تصليح تليفونات كان بيصلح تليفون فيه تكنولوجيا فضائية دقيقة الحجم. بعد اكتشافه دا، بيستخدم التكنولوجيا دي عشان يبتكر جهازه الخاص اللي بيخليه قادر على التلاعب بالإتصالات التليفونية في أي مكان بالعالم، واعتراضها وقت ما يحب. والشخصية مظهرتش خالص ف الكومكس غير 3 مرات بس، في 1985، و2006 و2019.

04- بعد تقليم الجنرال دوكس لتفرعات الخطوط الزمنية، وفشل لوكي وسيلفي في منعها من دا بشكل كامل، هل كده فيه حاجات مهمة ف المالتيفرس اتمسحت؟ هل سبايدرمان توبي ماجواير راح؟ هل هيحصل توضيح للحاجات دي بعدين؟ ولا هيبقى مجرد حاجة توضيحية على الشاشة وخلاص؟

05- في نهاية الحلقة بنلاحظ إن سيلفي محتفظة بأداة الانتقال الزمني الخاصة بHe who remains، واللي حصلت عليها بعد ما قـــتلته ف نهاية الموسم الأول. الأداة ليها إستخدامات وقدرات زمنية هايلة، فأكيد هنشوف سيلفي بتستخدمها كتير ف بقية المسلسل.

الحلقة التالتة من مسلسلات مارفل ف ديزني بتبقى دايمًا حلقة محورية، وبعدها بتبقى الدنيا مش زي الأول خالص، ودا اللي حصل فعلًا ف الموسم التاني من مسلسل لوكي، مع الظهور الرهيب لنسخة من نسخ كانج ف الحلقة دي...
طب إيه اللي كان مستخبي وحصل، وإيه اللي مستخبي وهيحصل وممكن يحصل؟ تعالوا نشوف ف إيستر إيجز الحلقة الثالثة لمسلسل لوكي الموسم الثاني 💚

01- لوكي وموبيوس بيزوروا معرض شيكاغو الكولومبي العالمي في 1893 اللي اتعمل كإحتفال بالعام ال400 على وصول كريستوفر كولومبس لأرض أمريكا في 1492، وفي الحقيقة ساعتها بالمعرض، كان نيكولا تيسلا المخترع العبقري بيقدم عرض لإختراعاته الكهربائية، زي اللي فيكتور تايملي عمله ف الحلقة.
في المعرض بيشوفوا ضمن المعروضات مكان فيه تماثيل لثلاثي الآلهة النوردية: أودن، وأبناءه ثور وبالدر. في الأساطير النوردية، لوكي لم يتم اعتباره أخ لثور إلا في إعادات السرد اللاحقة. لكن في البداية، كان أبناء أودن وفريجا هم ثور وبالدر، وبالدر ظهر في قصص مارفل المصورة وله تواجد مهم ف قصص ثور.
تعليق لوكي في المشهد لما قال: "ليه حطوا بالدر؟ محدش سمع بيه" كإشارة ساخرة لأن لوكي اتحط محل بالدر كأخ لثور في عالم مارفل السينمائي، وكان فيه إشاعات إن بالدر كان هيظهر في فيلم دكتور سترينج2 ضمن فرقة الإيلوميناتي، وكان هيقوم بدوره الممثل دانييل كريج الشهير بشخصية جيمس بوند، لكن تغاضوا عن الفكرة دي في النسخة النهائية.

02- لوكي وموبيوس بيشوفوا بوستر معروض عليه إعلان عن اختراعات فيكتور تايملي. فوق اسمه باللون الأحمر بنشوف اسم المغني "فيرديناند لانج"، ربما يكون أحد أجداد سكوت لانج/ أنت-مان، اللي شوفنا في فيلمه التالت شخصية كانج الغازي لأول مرة ف عالم مارفل السينمائي. وغالبًا حب سكوت لانج للعب الدرامز طلع ليه أصول ف عائلته من زمان.

03- قبل عرض فيكتور تايملي، وأثناء إنتظار لوكي وموبيوس وريفونا لظهوره، بنلاقي فرقة موسيقية بتلعب موسيقى ترفيهية للحاضرين، لو ركزنا في اللحن اللي بيلعبوه، هنلاقيه نسخة بالستايل القديم ساعتها للحن green theme أحد أشهر ألحان الموسم الأول من لوكي، تقدروا تسمعوه هنا ف يوتيوب:
https://www.youtube.com/watch?v=yV_76cm2BWU

04- رؤيتنا لنسخة كانج اللي اسمه "فيكتور تايملي" ف الحلقة كان متاخد منها لقطة ف المشهد التاني بعد التتر في فيلم Ant-Man: Quantumania، وفيها اتعرف لوكي وموبيوس على نسخة "فيكتور تايملي Victor Timely" اللي كان ف الكومكس هو كانج الأصلي، كانج الغازي اللي راح للسنوات الأولى من القرن العشرين (1900 وما بعدها)، واستخدم معرفته بالمستقبل في إنه يبقى من أكبر المخترعين وضمن أهم شخصيات المجتمع في الفترة دي.
وبالمناسبة، الشخصية اتسمت Timely ف الكومكس، كإشارة لاسم Timely Comics، الاسم القديم لدار نشر مارفل كومكس.

05- خلال مشاهد الهروب من المعرض، بيختبئ فيكتور تايملي ورا مكان لعرض التحف المصرية القديمة، في إشارة سرية محتملة لشخصية راما-توت، نسخة كانج اللي سافر لزمن مصر القديمة واستغل امكانياته التكنولوجية وبقى حاكم للبلاد، واللي كان ظهر ضمن نسخ كانج اللي شفناها ف المشهد بعد التتر ف فيلم أنت-مان 3.

06- في معمل فيكتور تايملي، بنشوف رموز آسيوية مرسومة على جدران المكان. ورغم عدم وضوح أصل الرموز دي تبع أنهي لغة، بس ممكن تكون إشارة لعالم شانج شي والحلقات العشرة، اللي اتقال عنها نظرية إن التكنولوجيا المستخدمة في الحلقات العشرة ليها علاقة بتكنولوجيا كانج وأدواته الزمنية.
وبالمناسبة، المعمل كان في ولاية ويسكونسن، زي ما ف الكومكس بالظبط، لما كانج سافر ف الزمن ليوم 1 يناير عام 1902، وأسس مدينة تايملي في ولاية ويسكونسن وبنى فيها المعمل بتاعه.

07- ف معمل فيكتور، بنلاقيه ماسك نموذج مصغر متحرك لإختراع بيوصفه بأهم وأفضل إختراعاته، واللي لو ركزنا فيه شوية هنلاقيه نموذج مصغر لكرسي الزمن الخاص به اللي بيسافر بيه للماضي والمستقبل، بالإضافة للاختراع السابق اللي وراه لريفونا عبارة عن كرسي فيه وسائل إضافية وإختراعات، ف واضح إن فكرة الكرسي المميز بالإختراعات ف عقله من زمان.

08- خلال هروب ريفونا رينسلاير مع فيكتور تايملي من معمل فيكتور، بيركبوا سفينة اسمها SS Herron، في إشارة تكريمية لـ Kate Herron المنتجة المنفذة اللي اخرجت كل حلقات الموسم الأول من لوكي، لكنها مش موجودة ف الموسم الثاني.

كتاب Understanding Comics المهم عن فن الكومكس وتاريخه وطريقة تنفيذ قصص الكومكس ورسمها، لكاتب ورسام الكومكس سكوت ماكلاود