مسلسل Secret Invasion ربما كانت الايستر إيجز فيه قليلة، لكنها مهمة، ومبشرة بتفاصيل حلوة ف القصص السابقة واحتمالات للقصص القادمة..
ف من غير رغي وتطويل، دي الإيستر إيجز القليلة للحلقة الرابعة اللي كانت على قدر كبير من الأهمية بأحداثها...
🧐👇👱‍♂️👽

*بنشوف فلاش باك لنك فيوري ف باريس بعد فيلم أفينجرز 2012، وطبعًا استخدموا تقنية تصغير السن بالجرافيك عشان يظهر صامويل جاكسون بهيئته وقتها من حوالي عشر سنين، بس لو دققنا ف النظر، هنلاحظ إن شكل خربشة جرح عينه اتعمل بالشكل الحالي اللي هو 3 خطوط متوازية، مش بالشكل اللي كان تحسه متشعب زي ما ظهر زمان ف بدايات أفلام مارفل.

*شوفنا ازاي فارا بقت زوجة فيوري وبقى اسمها بريسيلا، وعرفنا انها أستاذة في العلوم، رغم إننا مش عارفين أنهي مجال علمي بالظبط، بس غالبًا هو مجال الأحياء، لأن على حائط من حوائط منزلها، بيظهر كتاب من تأليفها اسمه "فك شفرة الجين الخارق Decoding the superhuman gene".
حتى الآن ف عالم مارفل السينمائي، أغلب الخارقين نتيجة تجارب علمية أو حوادث غير مقصودة، أو جايين من كوكب تاني أصلًا. فلفظ الجين الخارق دا يرتبط أكتر بعالم إكس مين، والانهيومانز. ف غالبًا دا معناه أن كامالا خان مش الشخصية الوحيدة اللي جيناتها سبب قدراتها الخارقة حاليًا، وإن الدراسات العلمية اللي زي دي شغالة بقالها فترة ف عالم مارفل السينمائي.

*تأكدت كل الشكوك اللي ناقشناها من أول حلقة، رودي الحالي هو سكرول فعلًا، وقدر يوصل لترقيات كبيرة في الإدارة الأمريكية لدرجة إنه بقى مستشار شخصي لرئيس أمريكا نفسه. هل التحول دا حصل بعد ايندجيم؟ ولا قبله؟ لسه هنعرف بعد كده أكيد، خصوصًا إن رودي له فيلم خاص بعد كده هو armor wars بيكملوا فيه قصته الشخصية بعد وفاة توني ستارك، وتعرض شركة ستارك وتقنيات آيرون مان لمحاولات سرقة من أعداء توني القدامى زي شركة هامر وغيرهم

*جرافك اظهر لنا حتى الآن قدرتين من قدراته الخارقة كسوبر سكرول، وهي استخدامه لجينات جرووت في تمديد أطرافه وتحويلها لسيقان نباتية، واستخدامه لمصل إكستريمس لتجديد الخلايا الميتة والمصابة وعلاج أي جروح بشكل فوري.
المفروض لسه فيه قدرات تانية المفروض هنشوفها في الحلقتين الأخيرتين.