شەو دەخەویت و دەڵێیت: وەعد بەیانی خۆم دەگۆڕم، پلان دادەنێم؛ سەیری پۆڕن ناکەم، خواردنی چەور و شیرین ناخۆم، ئاگام لە ڕەفتار و کردارەکانم دەبێت، باوکێکی باش دەبم، مێردێکی باش دەبم،خیانەت ناکەم، هەموو ئەو کچانەی یان ئەو کوڕانەی لە ناو مۆبایلەکەم هەن، بلۆکیان دەکەم و چیتر قسە لەگەڵ کەس ناکەم و خۆم گوناهبار ناکەم. دوعا دەکەیت کە خودا هیدایەتت بدات؟ بە دایک و باوکت دەڵێیت دوعات بۆ بکەن تا ساڵح بیت؟ دەزانیت چی؟ خواش چاکت ناکات و فریات ناکەوێت! دەزانیت بۆ؟
خودا کاتێک بە فریای مرۆڤێک دەکەوێت و دەستی دەگرێت کە ئەو مرۆڤە هەنگاوێک بەرەو باشبوون بنێت؛ لانی کەم یەک هەنگاو،سەرنج بدە؛خودا بە موسا (علیه السلام) دەفەرمێت: ئەی موسا، گۆچانەکەت بدە بە ڕووبارەکەدا تا ئاوەکەت بۆ شەق بکەم. بە محەمەد (د.خ) دەفەرمێت: کۆچ بکە تا ئیسلام سەربخەم بۆت، بە ئیبراهیم (علیه السلام) دەفەرمێت: کەعبە دروست بکە تا خەڵک بێن و پەرستش بکەن. بە ئەیوب (علیه السلام) دەفەرمێت: بچۆ لەو ئاوە خۆت بشۆ تا چاک ببیتەوە. بە مەریەمیش دەفەرمێت:بکێشە بە دار خورماکەدا تا خورما بکەوێتە خوارەوە و بیخۆیت.
سەیری بکە، هەتا تۆ جوڵەیەک نەکەیت خوداش هاوکارت نابێت؛ بۆیە هەر ئێستا بڕیار بدە و دەست پێ بکە، تەنها یەک هەنگاو بنێ بۆ چاکبوون بۆ دوور کەوتنەوە لە خراپە
وەک خودا لە سورەتی (العنكبوت) دەفەرمێت: {وَالَّذِينَ جَاهَدُوا فِينَا لَنَهْدِيَنَّهُمْ سُبُلَنَا} (واتە: ئەوانەی لە پێناوی ئێمەدا تێدەکۆشن، بەڕاستی ئێمە ڕێگاکانی خۆمانیان بۆ ڕوون دەکەینەوە و سەرکەوتوویان دەکەین). واتە هەتا تۆ تێنەکۆشیت ئێمە سەرت ناخەین
کەواتە؛ ئێستا دەست پێ دەکەیت ؟؟

بڕواجەزا