* * *

Лабим шивирлади тилло балдоққа,
Балдоғинг имлади қулоқларингга;
Лабим шивирлади момиқ қулоққа,
Қулоғинг имлади қароқларингга;

Лабим шивирлади олов қароққа,
Қароғинг имлади ёноқларингга;
Лабим шивирлади олма ёноққа,
Ёноғинг имлади дудоқларингга;

Шивирлай деганда лабингга лабим,
Ногаҳон бир титраб ўзин йўқотди,
Ўттиз йил асраган сўзин йўқотди.

Беш йил, ўн йил, ўн беш!.. Мана, ё Раббим,
Лабларим ҳар туни лабингни "сиз" лар, –
Йўқотган сўзини ялиниб излар.

Ялта
1990

Абдулла ШЕР

@sheriylahzalar

* * *

Қўполликлар, аччиқ зардалар
Унитилар мисли йўлакай сайл.
Бир умр қалбингни, аммо, бурдалар -
Майингина айтилган хайр!

Ёпиқ деразалар чақирар, судрар,
Таниш, тор кўчага кираман секин.
Намгарчилик. куз кечаси мудрар
қалб шўрлик бегона, етим.

Бу хотира эски куй чалар,
Олисларда эса янграйди чақ-чақ.
Ўша ёмғирли тун, ўша кўчалар,
Ёшлик ҳамон ҳақ!

Асқад Мухтор

@sheriylahzalar

📹 ABDULLA ORIPOV — she'rlar. АБДУЛЛА ОРИПОВ — шеърлар.

@sheriylahzalar

АЛДОВ

Масалан мен "бахт" дея туриб,
Бахтсизликни назарда тутдим.
"Томонингиз ҳақ" дея туриб,
Ҳақсизликни назарда тутдим.

Сиз "тўғри" деб танлаган йўлда,
Оёқ тираб турибман, ўжар.
Чунки мени сизлардек, қўллаб,
Бағрига босмади бу кўча.

Кузатаркан, қайтар ҳансираб,
Ўзига-да қараркан обдон —
Фикр қилар: "Муздай қасрда,
Ёлғиз қолдим — демак Озодман!"

30.05.2020


Раҳмиддин АБРАЕВ

@sheriylahzalar

🌹🌹

СЕНИ СОҒИНМАЙМАН

Сени соғинмайман. Қарорим қатъий.
Сабрим ҳали етар сенсиз яшашга.
Сенда ҳам зорлик йўқ, кўзингдан сездим
Мен томон бир бора кулиб қарашга.

Ўртада севги йўқ.
Юраклар бўм-бўш.
Кўзларим сендан ҳам бошқани кўрар.
Юракми...
Юрак ҳам эмас безовта,
Исмингни айтмай ҳам тинчгина урар.

Сенинг ҳам қалбингда менга ўрин йўқ
Юрагингдан ўзга бошпанам бисёр.
Ахир ҳар томони ҳувуллаб ётган
Қақроқ юрагингда менга нима бор?

Битта гап тилимда...
Сукут айлагин
Осмонга бир зум сайр этдиму қайтдим.
Нега кўзларингда ҳалқаланди ёш
Ёлғонни қанчалар чиройли айтдим?...

✍X. Abdurashid


@sheriylahzalar

#ajoyib_tarona

Oshiqi zeboyi man, tu kiro mejoʻyi?

@sheriylahzalar

Эврил Туроннинг "Гулим" шеърини қўшиқ қилишибди.

Қўшиқ муаллифи Баҳодир Хайдаров.


Бир кезлари ташна қалб ила,
Сени, гулим, қаттиқ севардим.
Жонимдан ҳам ортиқ кўрардим.
Мен учун сен эдинг маъбуда.

Сени гулим қаттиқ севардим,
Жонимдан ҳам ортиқ кўрардим.

Қарши турди ўрта бузарлар,
Курашларда кучсиз эканмиз:
Ўтолмадик... баланд тўсиқлар...
Шундан бери айро йўлимиз.

Сени гулим қаттиқ севардим,
Жонимдан ҳам ортиқ кўрардим.

Кетдинг қўлдан учган қуш мисол,
Кетдинг гўё тотли туш мисол,
Кетдинг, гўё изсиз бир шамол.
Энди, менга сен етмас ҳилол,

Сени гулим қаттиқ севардим,
Жонимдан ҳам ортиқ кўрардим.
        Эврил Турон.
24.01.2006 йил.

@sheriylahzalar

😊 “Mutolaa” loyihasi taqdimotiga bir necha soat qoldi!

❗️Ushbu tadbirda faqat taklif etilgan mehmonlar ishtirok eta oladi.

Biroq, sizlar uchun tadbirni YouTube sahifamizda jonli efirda taqdim etamiz!

TAQDIMOT SOAT 18:00 da BOSHLANADI.

Jonli efirga qo‘shiling: https://youtube.com/@mutolaafilms?si=aWI_rt6F22u_R2ot

Bizni qo‘llab-quvvatlaganingizdan juda mamnunmiz.

Hurmat bilan,
Mutolaa jamoasi

Juda baxtli yashar beg‘am odamlar
Qorni to‘q, usti but, qo‘lida aqcha.
Yurak-bag‘rin o‘yib olmaydi g‘amlar
Kimdan foyda keldi, o‘ldirdi maqtab.

Boshliqqa sanosi o‘qilar har tong
Xudoga shukurmas, shukur o‘shanga.
Raqamdan ortig‘in o‘ylolmagan ong
hattoki pul solib yotdi to‘shakka.

Juda baxtli yashab unutdi o‘zni,
Kimnidir sog‘inmoq yo‘q, endi malol.
Abadiy yopig‘liq bir hayrat ko‘zi,
Yuragi nafsiga o‘lguncha hammol.

Juda baxtsiz yashar beg‘am odamlar!!

✍️Elyor
🎙️Mulkijahon

@kongil_tomonlarda

ИСТАК

Шундайин севсангиз…
Айтганингиз чоғ
Исмим куйдиролса лабларингизни…
Юлдузнинг тушига бахт кирган тунлар
Ой менга етказса гапларингизни…
Ёдим ёдингиздан ўтганда чатнаб,
Кўзингиздан сизиб кетса қайғунгиз…
Нигоҳимни эслаб, энтиксангиз жим,
Майсалар титроғин кийса руҳингиз…
Гулга ўхшатсангиз,
Кейин ўзингиз
Гулдан қизғонсангиз рафторларимни…
Дайди шамоллармас, сизнинг қўлингиз
Варақласа кўнгил дафтарларимни…
Гулнинг кўзёшлари – шабнам мисоли
Томсам субҳидамнинг ёноқларидан…
Сингдирсангиз мени, қуёшдай балқиб
Осмоннинг муаззам равоқларидан…
Агар келар бўлсам ҳузурингизга,
Шулъага бўялса каҳкашонингиз…
Агар кетар бўлсам…
Бундан аввалроқ
Жисмингизни ечиб кетса жонингиз…
Шундайин севсангиз…
Гўзал севсангиз…

✍️ Ирода Умарова

  @sheriylahzalar

НУР

Хаёлларим ҳилолнинг
шуъласига чалкашди,
Бу кўҳна дун ичинда
кўнглим ҳамон саркашдир.
Сукут ичра кимлигим
очиб қўйди жимлигим,
Кўзларимни алдаб, сўнг
сўзларимни алқашди.

Аслида мен дунёнинг
ҳайратига харидор,
Ичимга жин қамалган
ёнида бир пари бор.
Ғафлатдаман гўёки
Хаёлларим ва ёки
Пари ухлатмас, ажаб,
Жин уйғотмас, дариғо.

Сочини йиғиб ҳилол
Хаёлотга чўмгай. Сиз
наҳот, бўшлиқ ичинда
нурсизликка кўнгайсиз?
Чўкиб кетар кўзларнинг
Гавҳарига қаро тун,
Мен зулматни зиё деб
шеър айтишим ўнғайсиз.

Жимдирман-у ичимда
асов тулпор пишқирар.
Тушимга сайраб турган
парвоздаги қуш кирар.
Сархушлигим тарқалиб
уйғонсам, ағёр қолиб
Кўз очиб кўрганларим
кўнглимни тафтиш қилар.

Қўл узатсам гулларга,
очмас менга пинжини,
Забоним булбулларга
қиёс эди, инчунун.
Отам илк ва сўнгги дам
уйғонмаган субҳидам
Чинқириб бу дунёнинг
бузиб қўйдим тинчини.

Энди билдим: шоирлар
ўз кўнглига ўзи ёв,
Босмаган одим — армон,
босиб қўйган изи ёв.
Кўкка боқсам негадир
юзимга нур тегадир,
Падаримнинг бу ҳилол
очмаган бир кўзи-ёв?!

Шундан бери талатўп
чалиб келар оёқдан,
Хотирам жонланади
қувват сўриб маёқдан.
Ёритгайдир шамчироқ
ўтмишимнинг тасмасин:
Кунларим гўзал бироқ,
ўсмирлигим қаёқда?

Ҳа, эсладим: кўзимга
Бир шавқи комрон берди.
Бир кун ўша ҳайратим
майга чўкиб жон берди.
Дунёни маст кузатдим.
Тиланчи қўл узатди.
У тағин берди ҳайрат
Мен гадога нон бердим.

Ризқим кетти гадодан
оғзим юмуқ жилмайдим,
Унда нега хатолар
ёнимдан ҳеч жилмайдир?
Дунёга тик боқиб ман
битта сирдан воқифман.
Кўзидан нур қочган, лек
дунё ўзи билмайдир.

Бу борлиқнинг хилқати
бунча чигал, мураккаб.
Худо, сендан бир қатим
нур тиларман юракка.
Бу тун аро нурга ўч
икки кафтим бир ҳовуч
Кўксимга ин қурган қуш
токи сайраб тураркан:
Худо, сендан бир қатим
нур тиларман юракка!
Худо, сендан бир қатим
нур тиларман юракка!

Ислом Али

https://t.me/IslomAli_shoir

ILINJ

"Tutga yetgan odamlar tirik"
Islom Ali

Gulkosadan simirib shabnam
Sano aytib tanglay xoʻllaymiz.
Qadrdonim, mana ko‘hna tam
Tutga yetdik endi oʻlmaymiz!

Yashab qoling koʻngilni xushlab,
Bu qish nima boʻlar bilmaymiz.
Suyunchisin bering, ey qushlar,
Tutga yetdik endi oʻlmaymiz.

Chumoli-yu ahli hashorat
Yuring, birga oʻynab kulgaymiz.
Tangri bergan oliy bir ne'mat,
Tutga yetdik endi oʻlmaymiz

Odam ahli, sayyoramizda
Keling boshqa urush qilmaymiz
Oʻldirmasak bir-birimizni,
Tutga yetdik endi oʻlmaymiz!

Ravshan HAQMUROD

@sheriylahzalar

☆ ☆ ☆

Менинг қалбим ― нозик ўйинчоқ,
Ўйнаяпсан,
Авайлаб ўйна.
Керак бўлар, балки, кейинроқ,
Эҳтиёт бўл,
Синдириб қўйма!

Ғижимлайсан, кўзлари мунчоқ,
Ушоқланар,
Букланмайди у.
Менинг қалбим ― нозик ўйинчоқ,
Шикастланса,
Тикланмайди у!

✍ Алишер Сабрий
🎙 Гулрух Пирназарова

@sheriylahzalar

ФАРОСАТ

...тушунишингиз керак.
Эрнест Хемингуэй

Ҳамма-ҳаммасини тушуниш мумкин,
Жазоирда ёққан қалин қорни ҳам.
Йўқни ҳам тушуниш мумкин ўйласанг,
Ўйласанг, тушуниш мумкин борни ҳам.

«Салбий муҳит» ёки «ёмон тарбия»
Ўғрини тушуниш мумкин бир куни.
Ўғрини тушуниб бўлгач, албатта,
Тўғрини тушуниш мумкин бир куни.

Аблаҳнинг қалбида ногоҳ уйғонган
Диёнат, тушунсанг, ҳайрон қолдирмас.
Ўзингни бахш этган бир инсон қилган
Хиёнат, тушунсанг, ҳайрон қолдирмас.

Фаҳм этсанг, сотқин хом сут эмган жон,
Англасанг қотил ҳам эмас ҳеч эриш.
Тушунсанг, тушунсанг, тушунаверсанг,
Ҳамма-ҳаммасини зарур кечириш.

Тушуна олди дунё. Лекин бунинг-чун
Ким уқубат чекар, ким тортар азоб.
Хоинлар, сотқинлар қилмиши учун
Ким олади, ахир, олий бир жазо!

Тушунсанг, кўзларинг олдига келар
Ҳам дўзах, ҳам жаннат, ҳамда аросат,
Оёғи шоҳсупа, бўйни сиртмоқда,
Манглайин милтиққа тутган Фаросат!..

✍ Матназар АБДУЛҲАКИМ

@sheriylahzalar

Husan Maqsud — betoblikdagi oʻylar.

Sifatliroq variantini koʻrish uchun:
https://www.instagram.com/reel/C7UIt8-tK59/?igsh=cHY1dnBsY3lhd2h1

Yurak – oʻz yoʻliga…
Yurak yoʻlida
Turtinib-surtinib tentirar shamol.
Qoʻy, yolgʻiz yigʻlasin qismat goʻrida
Ikkimizini koʻmib yuborgan xayol.

Yurak – oʻz yoʻliga…
Biz ham qolmadik
Oʻsha yoʻlimizdan, oʻsha turbatdan.
Biz yurak-yurakdan ayrilolmadik,
Ayrilib ketmoqda Yurak Yurakdan.

Yurak – oʻz yoʻliga…
Kezib yurakni,
Xayollar murdasin oʻtarmiz bosib.
Biz birga yashaymiz ezib yurakni,
Agar birga oʻlmoq etmasa nasib.

Odil Ikrom

@sheriylahzalar

Bugun mushoira qilamiz-a!
Maktabni eslab, bayram qilamiz.
Hamma soat 21:00 ga tayyor tursin.

@sheriylahzalar

***
Bir kuni eng uzun tush ko‘rsang,
Ko‘z yumsang borining bariga.
Osmonning ortida yo‘l tursa,
Yel essa zaminning qa’ridan.

Daraxtlar seskansa olqishning
Qahraton zahridek qahridan.
Kechmishni tosh(d)irsa sarxushlik,
O‘tolmay qiynalsang bahridan.

Dunyoning tashvishi bir dunyo!
Tupursang qismatning kasriga.
Ko‘nglingdan tashqari g‘am – bir yon,
Ko‘nglingdan toshgani – asliyat.

Kelmasa qo‘lingdan hech vaqo
Izlansang to‘rt tomon yugurib.
Ko‘zingni ochsang va nogahon
Vaqt ketsa sendan yuz o‘girib...

Goʻzal Sharipova

https://t.me/sheriylahzalar