***

Душанбада сенга бўлмагайман иш,
Душанбада сенга туш бўламан, туш.
Кўрпангга дераза суратин солиб,
Юмушим - эрталаб қуёшни ёқиш.

Сешанбада сенга бўлмайман соғинч,
Сешанбада сенга бўламан овунч.
Илиқ хотиранинг оғушларида
ёруғ дарёларда тинч оқасан, тинч.

Чоршанбада сенга бўламан баҳор.
Сен учун ёмғирим тинади наҳор.
Сен учун гул очгум йўл четида - уз! -
Гул сенинг қўлингда ўлса - бахтиёр.

Эрмак китоб бўлгум пайшанба куни,
"Юракни унут" деб ёзганлар уни.
Умр ўтаверар айрилиқ туни
ўқисанг - кўнгилнинг чиқмагай уни.

Жумада шамолни қўйгум тўхтатиб,
Кўча чиқ - ўзингни ўзинг ўйнатиб.
Кўнглингга оҳиста қўшиқлар солай,
Сайр қилгин - сайрингни эрка кўйлатиб.

Шанбада - кун ўтсин - чақиргин меҳмон!
Азизим, меҳмон ҳам соғинчга довон.
Эсласанг, ёшингни панада артгин,
Эсласанг, идиш юв, тушганида шом.

Якшанбада... Бу кун бўлади ёмон.
Якшанбада сенга бўламан армон.
Якшанбада мени йиғлаб чорлайсан,
Жавоб беролмайди на ер, на осмон.

Якшанбада сени қолдиргум якка,
Энди юракланиш - эту сўнгакда.
Энди зиндон сари аста борасан-
Юзма-юз келгани маҳбус юракка.

Юрак билан қолсанг, касбу кор - ёниш,
Соғинчнинг ортидан дўзахга бориш.
Душанба келдими? Нима қилайин...
Бундан кейин фақат иш бўлайми, иш.

Якшанбада, ахир, жудаям оғир.
Юрак яйдоқликда - бепаноҳ фақир.
Якшанба бўлмайми? Нима қилайин -
Сенинг билан ёлғиз қолсинми тақдир?

✍ Усмон Азим

@sheriylahzalar

OYDINGA

Oriqqinam mening, goʻzal ninachim,
Urushqonim mening, ahilim mening,
Tovushqonim mening, tezkor ginachim,
Kamalak singari, har xilim mening.

Sen mening oyimsan, mening moʻjizam,
Oy kabi hech qachon tutilmaganim,
Sen yolgʻiz kuchlimsan, mening ojizam,
Dafʼatanim mening, kutilmaganim.

Tilimga hech qachon chiqmaydi chipqon
Sen haqda gapirsam, mening moʻjizam,
Sen uchun yashasam uzoq yashayman,
Mening kerakkinam, mening bejizam.

Masrur majnuntolim, mungli toʻrongʻil,
Oydinginam mening, yarim qorongʻim.

© Muhammad Solih, 1979

@sheriylahzalar

Nemis tilini oʻrganuvchilar uchun, men doim kuzatib boradigan kanalni tavsiya qilaman.
🔍 @easy_de 📊 für Anfänger und fortgeschrittene Deutschlerner


🇩🇪 Sie können hier mehrere Kenntnisse finden, um ihr Deutsch auf ein neues Level zu bringen

📚Übung macht den Meister

☆

Bu bedard dilimga dard misol qo‘nib,
Dilingni tig‘lasang, men nima qilay?
Bir bebosh yurakni yig‘latib qo‘yib,
O‘zing ham yig‘lasang, men nima qilay?

Sen meni ko‘tarib osmon-falakka,
Gar o‘zing chiqmasang, men nima qilay?
Bitta tor ko‘ngil deb yashaysan yakka,
Ko‘nglimga sigmasang, men nima qilay?

✍O.Ikrom

@sheriylahzalar

☆

Ketmagan bo‘lsang ham mendan hech qayga
Kel...

D.Ergasheva

@sheriylahzalar

☆ ☆ ☆

Shu kecha hijronning ko'zi yoridi...
Shu kecha hislarga bermadim tizgin,
Nogahon yodimga tushdi,
Og'rinib,
Yurakdan ichkari,
Nedir borligi...

Shu kech sovuq keldi, g'alati birdan
Ismsiz titroqlar jonim ilg'adi,
O'ranib olgancha xotiralarga,
Achchiq-achchiq kuldim
sekin yig'ladim...

Xayolga bas kelib bo'larmi axir
Erkning qanotlari turganda yonib,
Tepkilab o'tdim jim yo'llarni,
Qarimsiq ko'ngilga suyanib...

Shu kecha jon berdim
(Qay bir ma'noda)
Ko'zimga isyonning suvi lim keldi,
Xudoyim rahmimni yegan dunyoda,
Kimningdir umrini yashagim keldi...

✍Umidabonu

@sheriylahzalar

Гулзор — чаман.
Юр боғларга
Элтай етаклаб.
Бинафшалар териб берай
Сенга этаклаб...

Чаккангга тақ!
Тўлиб турсин
Ойдек юзларинг.
Кундай ёруғ, тундай қора
Экан кўзларинг.

Тингла, эркам, ўртоғимсан,
Кўнглимни очай,
Қоним шеър бўлиб оқсин-да,
Мен қайта ичай.

Истайманки, оқар қоним
Тамом бўлмасин,
Истайманки, севар ёрим
Ташлаб кетмасин.

Чунки, дўстлик меҳри билан
Шодлигим ўсар.
У ҳар қачон ёнбошимда
Соямдай юрар.

У сен, қўзим.
Юр, боғларга
Элтай етаклаб.
Бинафшалар териб берай
Сенга этаклаб.

Бу шоир, - деб, - бу енгил, - деб
Асти ўйлама!
Ўпган ўпичларим ҳаққи
Инонтираман.

Агар, даркор бўлса ҳар чоқ,
Чорласа Ватан,
Қўлёзмаларимни ташлаб,
Шинел кияман.

Уддасидан чиқолмасам
Аҳдимни, унда —
Браунингни қўлимга бер, Қоп-қора тунда.

Ўз жазомни ўзим берай,
Азоб-ла ўлай...
Йўқ!..
Ҳамдам бўл, қўлимдан тут,
Жангларга кирай!

Усмон Носир

https://youtu.be/h4WZCsbsTJ0?si=xB7fw5vRy4b1yFwh

#kitob_give_away #tanlov

🗓 5-oktyabr ​​— oʻzimga gʻoyibona ustoz deb biladigan tarjimon va sevimli shoirim Faxriyor tavallud topgan kun!

💣 Shu munosabat bilan obunachilarimdan uchtasiga Faxriyorning maqolalar, esselar, intervyular va tarjimalaridan iborat “Metahikoyalar oralab” nomli kitobini sovgʻa qilmoqchiman.

✅ Shartlar quyidagicha:

1. @usmonosphere va @sanduvoch_uz ga obuna boʻling;

2. mazkur postni 3 ta kitobxon doʻstingizga yuboring yoki kanalingizda ulashing;

3. skrinshotni izohlar qismiga yuboring.

❇️ Shartni bajargan har bir ishtirokchiga raqam beraman va 5-oktyabr kuni 21:00 da 3 nafar omadli kitobxonni random bor orqali aniqlayman.

Barchaga omad, doʻstlar!

@usmonosphere

Oybek - Xastamen.mp3

☆ ☆


Соғинтириб борар табаррук дийдор, Соғинтириб борар латиф суҳбатлар.
Тушкун хаёлимнинг бўсағасидан
Сукунат ҳатлар.

Олам бўшаб қолар, ҳувиллар хонам,
Қудуққа тушгандек дунё ҳам жим-жит.
Тонг қадар кўзларим ухлаганнамо,
Тонг қадар
Сен ― борлиқ,
мен ― унут.

Жизғанак бўлади тоқат беқарор,
Орзулар потирлар қаноти куюк.
Исмингни ёдлаган телефон қўлда
Табаррук...

Аммо қўнғироқ йўқ на сен, на мендан,
Яралаб кетади дилга ботган ўқ.
Фақат йўқламоққа сенда эҳтиёж,
Менда юрак йўқ!

✍ Шоира Шамс

@sheriylahzalar

#ajoyib_tarona

Sen yozgin, biz aytgan qo‘shiq omonmi?
Yo ketdimi u ham xotirdek nurab?


@sheriylahzalar

☆☆

Биздан осонгина кечиб бўлмайди,
Жимгина риштани узолмайсан ҳам,
Индамай кетгани дилинг қўймайди,
Йиғлайсан сувратим қучганча маҳкам...

Қуввати тугайди ҳижронингни ҳам,
Сўзларим етказар дайди саболар,
Кўзингни юмсанг, мен билан келар,
Ўзим туҳфа этган саррин хаёллар...

Капалаклар қўнган ўшал ғунчалар,
Титраб сўз айтади сенга тунлари,
Сен юрмоқ истаган ҳув сўқмоқчалар,
Сени чорлайверар, кетганинг сари...

Биздан осонгина кечиб бўлмайди,
Видолар айтмоққа шошмагин бир зум,
Келасан дилларда улоқиб, дайдиб,
Билиб қўй, шу ерда кутаман Ўзим...
                  
✍Мансур Хўжаев

@sheriylahzalar

☆ ☆ ☆

Ёмғирлар қайтдилар сени эслатиб,
хазонрез либосга бурканди борлиқ.
Сарғайган боғларни юм-юм йиғлатиб,
куз фасли қайтдим деб осганда ёрлиқ,
қайтмадинг.

Тўзонлар тўзғиди юрагим аро,
бўш хона саҳнида рақс этди шамол.
Азадор булутлар кийганда қаро,
тўлин ой эврилиб топганда завол
қайтмадинг.

Турналар кетдилар мени ёлғизлаб,
жанубий жаннатга қайтдилар қушлар.
Баҳорда қолдирган изингни излаб,
ўнгидан келгандай ранго-ранг тушлар,
қайтмадинг.

Кимсасиз ҳовлидай ҳувиллар кўнглим,
хаёл масканлари бўлди харобот.
Худодан жонимга сўрайман тўзим,
харобот кўнглимни қилгани обод
қайтмадинг.

Ёмғирлар қайтдилар сени эслатиб,
хазонрез либосга бурканди борлиқ.
Сарғайган боғларни юм-юм йиғлатиб,
куз фасли қайтдим деб осганда ёрлиқ
қайтмадинг...

2022
✍️ Орифжон Комил

@sheriylahzalar

Яхши кино экан, бир мазза қилингсизлар дам олиш кунида. https://youtu.be/e_DWHujqMYc?si=PkJTvx-9UQA5qSFh

☆

Kuzgi kurtaklarga sham tutib ko'rgum,
yog'duda sollanar
           bir gul soyasi
va
billur
       shahar-chun
                   poydevor
                          qurgum --
kaftimda ezilar sabr qoyasi.
Kulging sadosini berkitgum hushyor
taqvim yaproqlarin ich-ichlariga.
Bo'lsa, sendan faqat bir so'rorim bor:
ishonma xazonning o'tinchlariga.
Ruhlar majlis qurgan qadim mehroblar
sukunat domida qaqshab yiqilsa
va jomni qafas deb bilgan sharoblar
qushga do'nib uchsa,
ko'kda siqilsa...
Jom sahniga qo'ngan hudhud patini
parvona olov deb
                        o'ylaydi bexos
va uni oshufta kunlar ro'yosi
bir kun hiskishandan aylagay halos.
Bir kun
oxir topar qadim asotir,
Mening ham barg kabi titragay soyam
ammo, davom etar hayo-yu iymon
va
    sen haqingdagi
                 horg'in hikoyam.
Daryolar kuzakka oqmog'i tayin,
men esa ketaman aytmay bir og'iz.
Sog'inch isinajak ismim-la,
ketgum
Xudodek besado,
Xudodek yolg'iz...
Mening ham barg kabi titragay soyam...

✍M.Muzaffar

@sheriylahzalar

Furugʻdan mazza qilib sheʼr eshitishga nima deysizlar.
Maromiga yetkazib oʻqigan ekan.

https://youtu.be/tcMCiXUh55I?si=19q2HrScYGH_UADt

Layk, kommentariyalarni avaylamay bosib, yozib tashlaylik

БЕИСЁН ҚЎШИҚ.

Сўндими ичимда гурлаган олов,
Синдими ханжарим,
битдими исён?
Қайдан илакишди бу чиркин бало,
Сокинман,
танимда совигандай қон.

Қалбимга чангалин ботирган қўрқув
Ўликнинг юзидай оқартмиш бетим.
Шиддатим
зиндонга ташланган кўр қул
Каби қимир этмас,
ётгайдир бетил.

Қандай етиб келдим шашти юлинган
Музтар бу ҳолимга,
қаерда масдар?
Ё айтган сўзимга,
юрган йўлимга
Хиёнат қилдимми билиб-билмасдан?

Майдонда талотум авж олган маҳал
Номардман —
қайрилган бўлсам ярамга!
Илтифот кутмоқдан ўлим, деб афзал
Турарди қулоғим узра жаранглаб...

Наҳотки, ҳақ бўлса қўлингдан ҳеч не
Келмас деб бекураш бўлганлар таслим?!
Бир дунё қуришга етгулик кучни
Бир дунё хурушга сарфласам, наслим —

Кечирарми мени,
абадулабад
Гирифтор этгайдир тавқи лаънатга!?
Ё меҳрибон Тангри, қабул эт тавбам,
Ул ўчкор руҳимни келтир қоматга.

Ўзимни ўзимга қилма шармисор,
Журъатимни қайтар.
Исёним сабаб
Тарқалиб кетганман яничар мисол
Ҳали янчилмасдан улкан салтанат.

Сўндими ичимда гурлаган олов...

6.10.2023

Нурмуҳаммад Абдузоир

@Nurmuhammad_Abduzoir