*حُسن الظن❤️‍🩹*

من الحاجات اللي هتفرق معاك اوي فكرة إن ( ده رزقي أو مكنش رزقي ) !

يسيطر على تفكيرك في ابسط الأمور ، يعني في مرة سافرت مشوار مكنش له اي لازمة فـ بحكي لحد قالي : كان مكتوب لك هناك شوية ماية هتشربيهم و اكله معينة تاكليها، كان رزقك و روحتي له.

و في قصة يوسف عليه السلام ايام ما كنت بحضّرها علشان اشرحها قرأت لواحد كاتب إن يوسف عليه السلام كان له شربة ماء في السجن كان لازم يشربها فيه.

كل عزومة جت لك فجأة ( رزقك )

كل مرة حد لغى معاد معاك بعد ما كنت حضرت حلو و حادق و اتضايقت و حقك طبعًا بس ( مكنش رزقه الاكل ده )

كل مرة جهزت حاجة و فجأة راحت لحد تاني خالص ( رزقه)

كل مرة اشتريت حاجة لنفسك و بعدين مطلعتش مناسبة و ادتها لحد تاني هي من الاساس كانت ( رزقه ) و انت كنت سبب .

حتى المعلومة اللي سمعتها بالصدفة كانت رزقك ..

افتكر كان لي معلمة لمّا يقف عليا معنى مش فهماه تقولي ادعي الرزاق يرزقك فهمها، كله بأوان !

فـ المعلومة رزق ..

حتى الود و الحب رزق، لمّا تلاقيهم من حد احمد الرزاق قبل ما تشكر اللي اداك الحب ده .. 

قيس على كده كل تفاصيل الحياة ..

النبي صلى الله عليه وسلم قال ( أنَّ نفسًا لَن تموتَ حتَّى تستكمِلَ أجلَها، وتستوعِبَ رزقَها )

هتاخد كل رزق و لو كان شوية ماية في اخر الدنيا ، ثق إن تفاصيل الحياة ماشية بمعادلة الرزق ، فـ تعلق بالرزاق وحده لإنها بتتقسم فوق و بتتسلم تحت.

ــــــــــــــ
بنفكركم بالدعاء لأهلنا في غزة ولكل المستضعفين في كل بلاد العالم 🍃

وقت ضيقك الشديد ، بيكون وقع ( الله آكبر ) في الصلاة على قلبك مختلفة .

بتكون الآيات اللي انت عارفها و حافظها، كأنك أول مرة تسمعها .

بتكون التسبيحة لها إحساس تاني .

بيكون أقل كلام تسمعه عن ربنا بياخد في قلبك حتة تانية مع إنك ممكن تكون عارفه .

مرة سمعت جملة بتقول :

( لن تذوق المعاني حتى تُعاني )

فعلًا كل واحد فينا وقت شدته بيدوق معاني في علاقته بربه مختلفة، و يكأن من أكبر فوايد الشدائد إنها بتيجي تعيد تعريف علاقتك بربك ، و بتخلي القلب بيتعامل بشكل مختلف تمامًا .

<< فـ اللهم لك الحمد على كل حال يُقربنا منك >>

ــــــــــــــ
بنفكركم بالدعاء لأهلنا في غزة ولكل المستضعفين في كل بلاد العالم 🍃