من مذكرات شاعر ... الحلقة ( الثانية )

شاب لفظ انفاسه الاخيرة وطاح على احد ارصفة شوارع العاصمة الأردنية عمان.
بعد ان تجمهرت مجموعة من الناس حول الجثة . عرفو من جوازه انه ( عراقي ) ..وجاي يدور على شغل ايام الحصار ..
الله اعلم كم مرة خلص من قبضة الموت خلال المعارك الشارك بيهه ايام ما جان جندي بالجيش .
ولكن يبدو ان معركته الاخيرة معركة شلون يدبر خبزته وخبزة عائلته اشد من كل الحروب الخاضهه...
هذه الحادثة صادفت الشاعر الكبير الشهيد رحيم المالكي اثناء رجوعه من الاردن الى العراق... الشارك بمبلغ من المال بعد ان شاف العراقيين يتبروعون لارجاع جثة الشاب لأرض الوطن وتأثر حيل الى درجة انه
كدر يترجم الحادثة الى قصيدة اطلق عليهه ( موت في الغربة ) سنة ١٩٩٨

(( موت في الغربة ))

ليش الوحدك من غير جناز
وياهو لغسلك ويغمض لعيون
غريب بنص محطة أوادم اجناب
وهلك عنك بعيد شلون يدرون
ليموت بنص هلة تتهدل اهدال
وعليه امه وخواته تطيح لمتون
وشوفك وحدك وانته الگبل چان
الجبل والساتر بسدك يلوذون

ملك موتك استعجل لو توانيت
ترد لديرتك چا هسه مدفون
ددليني بجوازك رايد اقراه
واشوف شصارلك بالغربة مسجون
من وحشة الغربة لوحشة الموت
وشربت الوحشتين بفرد ماعون

عليك أمك تعاين بلچن تعود
وضعنك ما رجع من دون الاضعون

عدمن ودعتهة او جيت ليجاي
وعليك تناشد ال يرحون ويجون

تريدك عون الها لتالي الشيب
وهسه انته ضعت وتريدلك عون
وحدك تنعي روحك چنك تگول
هلي يا من ضيعوني شلون ينسون
المثلك ما يموت وناسه تنساه
العراق انتة العزيز وتنسي اشلون

يالحنة اجرورحك حنة الفاو
يالمدفي بقميصك حقل مجنون
يال بالهور دمك لسة موجود
ولهسه بنهر جاسم بيك يحچون
المثلك ما يضل من غير جناز
النخل يطلع وراك وي اليشيعون
المن جابتك للغربه رجليك
ومتت لا ناعية ولا ناس يبچون

تكلي الجوع اكلك انتة غلطان
العراق بخير بعده ولسة مامون
صحيح الجوع كافر من يمر بيك
وانا مجربة واعرفه شلون ملعون
حافي وساوموني وكلت ما بيع
وشلت غيرة هلي العشرين مليون
اثبت لا تهزك رعشة العوز
الشدايد صم صبر واتعدي وتهون

العراقي شما تلم بيه الملمات
جلد على النايبة وبالصبر مدهون
اذا ذيب الوكت ما ننگلب شاة
ونتانيهة شوكت تگطعنة السنون
غدر طبع الذيابة وهذا معروف
ومثل هاي النهاية المرة يردون
انا يا صاحبي راجع للعراق
اسولف قصتك للي ياشرون

واگلهم نهر ذلة ورا طريبيل
وانا خايف عليكم لا تغرگون
الوطن هذا الوطن كل شبر محراب
كعبة ودنگوا يمة ال يصلون
عراق ومنهو غيرك يرهم وياي
وانا مطلگ الدنية وعايف الكون
.
.
.
#شعراء_وذواقين_الشعر_الشعبي
#ابو_تراب

.
من تشوفني تعرفني ؟ لا و الله
مو ذاك الغشيم المن كبل شفته
كبالك غير واحد بي شبه من ذاك
ما يشبه هذاك البي جرح عفته
مره التجربة المريت بيها وياك
مره وعلمتني وحنضلك ضكته
ولان ما ردت منك شي يضل تذكار
ما ردته بحياتي وعلى الخلگ سمته
منو الياخذ حلم ؟ منو ينطي زايد بي ؟
حلم كلش جديد وما استعملته
عفتني ويا الجكارة اثنينه مورثين
محد طفى الاخر وانطفيت انت
.
.
.
.
#شعراء_وذواقين_الشعر_الشعبي
#ايهاب_المالكي
#ابو_تراب

.
( ينشق جوفي ثم يدخل قاتلي
كدخول ابراهيم للاصنام )


شعجب جدمك لدرب جفاي ... ساعه
بوكت بي صدري كوة النفس ... ساعه
مدولغ صافن اربع وعشرين ... ساعه
صنم ويخوزر ابراهيم بية
.
.
.
.
#شعراء_وذواقين_الشعر_الشعبي
#احمد_عاشور
#ابو_تراب

.
مو ذنبك حلاتك كل ذنب مابيك
و لكن صوج كلبي الماعرف يصبر
شكد ردت اكتفي بالنظره الاولى وياك
اغمض و الفصوص من الجفن تطفر
يانظره براءه تضل براءه وياك
اذا نظراتي جانت بالجلد تحفر
قست دكات نبضك من لمحتك عين
و احتكيت بيك بدون ما تشعر
مغير لونهن بس شفت لو شفاك
اخذلك هيج واحد من بعد يخزر
اليسمع دفو صوتك يوكع ب شده
وما اصدك وراها يضل صبر عنده
اكو قبلي نبي كالوا مكلم الطير
وانا أول انسان يكلم الورده
.
.
.
.
#شعراء_وذاوقين_الشعر_الشعبي
#ايهاب_المالكي
#ابو_تراب

.
شته فراك الاحبهم ... يمداني
ولا فد يوم حظي ... يمداني
حتى من اغم كصتي ... يمداني
احس بكصتي تتبعد علية
مدلل ما تهيد انت ... وانا اهد
وتكضني حيل متهدني ... واناهد
وعلية تهد واكومنلك ... وانا اهد
واصير وياك حتى نهد علية
على روحي شبيها تنشد ... مر شبيها
العشك مر بيها يسعر ... مرشبيها
انا التانيته ما مر ... مر شبيها
وكمت حسبالي هو شصار بية
عسل وبحلكي وكتي ... مر جعلكم
ومرجعكم ل گلبي ... مرجعة الكم
صرت اية بهواكم ... مرجع الكم
اخذتوا منين فتوة وخنتوا بية
.
.
.
.
#شعراء_وذواقين_الشعر_الشعبي
#عبدالحسين_الحلفي
#ابو_تراب

.
يم ناسي وتضل بخير ما اضنها
انا عافيتي واعرفها مثل زيادة الميزان
لازم ينوخذ منها
عبرتهن ما اخذن مني
الكسرني جفاك مو ذني
رجعت مدنك بكل درب بي ماشين
بلكت حلم ضاع هنا
مثل ثلاجة الموتى ادوره وما اريد الكاه
وكت وبعيد عايفني وارد خايب
وانا متعود ادنى اذن شايب
يجن غصبآ على عيونك لو طاريي لو انا
كبل جفك علگ بعيون ذرعاني
هسة جفوف زار جفوفك يكولون
يهدهن واحد ويلزمهن الثاني
.
.
.
.
#شعراء_وذواقين_الشعر_الشعبي
#باهر_الجنديل
#ابو_تراب

.
احترك مهجومنه وحسنك ... الوياه
لحد وجهك فدى يرحن ... الوياه
اذا منك حرمني الله ... الي وياه
عتب عبدآ لربه وغيض بية
.
.
.
.
#شعراء_وذواقين_الشعر_الشعبي
#اياد_عبدالله
#ابو_تراب

.
عز الله احبج من صدگ
يالطولج ايبس الحلگ
من بعيد اباوعلج واضل مخطوف لوني ومختنگ
ياللي امتلكتي الروح ابد ما املك بدونج خلگ
يالما تصدگين الحچي
هم لا تصدكين الحچي
بس باوعي بعيني شكثر شايلچ سوالف عشگ
وخليها تحجيلج عليه شبون بجفاچ احترگ
صدگيني ما شايل گلب ينفتح بابه وينطبگ
صدكيني مو ثوبي اللعب
لو كلت احبن يعني احب
يالمن وراج تخبلت دعو عليج اهلي شكثر
يالشگرة وعيونج شگر
يالخصرج مرجف الكلب ستر الله لو بس ع خصر
يا طعم البريم بعثك مستفحل بروحه الحر
يمغورة نسوان السلف مو حقي بيج من انغر
لميني مليت العمر خلصته واني مطشر
واصل وياج المرحلة مدري بشني تتفسر
بشوفتج موش بمشيتي حتى بگعدتي اتعثر
.
.
.
.
#شعراء_وذواقين_الشعر_الشعبي
#فهد_عادل
#ابو_تراب

• .
ياهو ما مشتاگ خل ينطيني ليل
ومني خل ياخذ صبح بعيونه صحرة
وين ما اروح التفت و الكاج يمي
بالوجوة الما تعرفج عفتي ذكرى
بية يومية الجرح ياخذلة سفرة
ياهو مثلي .... ؟ وجه فارغ من حنينه
وتارس الدخان صدرة
.
.
.
.
#شعراء_وذاوقين_الشعر_الشعبي
#علي_رشم
#ابو_تراب

.
الغابة ما تكضيها سله
وشجرة من تخسر ثمرها اتاني موسم ثاني جاي
شما غفت سدت حلمهم
كلها جدم السيل جاي
الخناجر ما ترد صدر اليهد وسلاحه جرحه البير كلما غمكت جرحه المساحي يزيد ماي
.
.
.
.
#شعراء_وذاوقين_الشعر_الشعبي
#الكاطع
#ابو_تراب

.
تعال اتمرجح بروحي
اجيبن خلك ما متعوب اناغيك بطواريه
واصوغن من ثكل اهي
ضحكة تعادل اه الناس تكتل كل نواعيه
وملحه حجاية البطران
والما لاح عبرة بضيج وحدة بكل لياليه
وامد شعري على اجتافك
اطرز سوالفي بعينك واحجيها بدفو النيه
تعال وگلبي الك محتام
اغنيلك دفو النواب من تصيدة ترجيه
واغفي مسودنات الضيم
واكابل وجهك المتعوب الولي بمستحه بنيه
واتيهك بين الحجايات
اسمعلك الما مسموع بس بنيتك جيه
اكسر خاطر الوهواس
واموت بية جلمة ليش بس ماكو اثر نيه
تعال الماي يلوحك شوف
ما وجد حلاه الضيم ما يعرف يتيه ب اه ويعثر بيك تاليه
.
.
.
.
#شعراء_وذواقين_الشعر_الشعبي
#وجدان_النقيب
#ابو_تراب

من مذكرات شاعر ... الحلقة ( الثالثة )

(( نافذة تسلط الضوء على ظروف كتابة قصيدة ما ..لشاعر ما ))

نص شعري غنائي انكتب بالسجن وتلحن بالمقبرة !
وتگدر ان تتخيل كمية الاسى والوجع ..والحرمان
اذن مو مصادفة تكون اولى كلمات هذا النص ( ياحريمة )...
في كثير من الاوقات يفترش الارض ويگعد لوحده في احدى زوايا القاعة 10 لسجن نگرة السلمان حتى يتحاشى نظرات جماعته السجناء السياسين ايضا..
بعد ان اصبح سالوفة بحلگ الجميع
الكل عرف ان حبيبته الچان
يحچيلهم عنهه.. الي راح يرتبط بيهه بمجرد ان يخرج من السجن
.. بكل بساطة دارت ظهرهه وارتبطت بشخص اخر ...المهم
بعد ان هزت هاي الحادثة كيانه
كتب..(( ياحريمه لا ولك لاله اعله بختك مانه سالوفه صرت بين الطوايف ! ))
مرت الايام سريعة واطلقت الحكومة سراحه
و بعد ان وصل النص للملحن محمد جواد اموري بقى يدندن وي نفسه بالكلمات بكل مكان حتى وهو يبچي
في المرسيدس ال 18 راكب الي تحمل جنازة زوجته ومتجهه الى المقبرة
همس بأذن صديقه الشاعر بعد ان بح صوته من البكاء : اللحن اكتمل !!!
الجدير بالذكر ان الفنان حسين نعمة غنه هذا النص ليصبح من اهم الاغاني السبعينية
هذه هي حكاية ياحريمه وشاعرهه الكبير ناظم السماوي


ياحريمه أنباگت الچلمات
..من فوكَـ الشفايف
ياحريمه ياحريمه


ياحريمه أسنينك العشرين.مامرها العشكَـ والعشكَـ خايف
ياحريمه ياحريمه
لا ولك ..لالاعلى بختك ماني سالوفه صرت بين الطوايف
ياحريمه ياحريمه
يازلف يتغاوى ويه الليل بطراف الكَصيبه
هاك روحي الما غفت والطيف مامره حبيبه
هاك جرحي الما تعطب وانت عطابه ولهيبه
هاك عمري الظآكَـ حنضل وانت برحي
ياحريمه ياحريمه
ياعضد يلي شتالك عايش أبفي النخل
ياثلج وفراك طبعك ياطبع كلك زعل
وآنه ووعودك صفيت بلايه وعدك
وآنه دمعات الحزن شاتلها ظليت على خدك
وآنه سجت درب سواني زماني
ياحريمه ياحريمه
.
.
#شعراء_وذواقين_الشعر_الشعبي
#ناظم_السماوي
#ابو_تراب

.
هدايا الشوك يمك ... يابه ردها
وعلية سيوف هجرك ... يا هو بردها ؟
ايا ليلة وداعك ... يا بردها
متت لو ما لحك حضنك علية
.
.
.
.
#شعراء_وذواقين_الشعر_الشعبي
ابوذية للاهواز
#ابو_تراب

.
نست روحي المرار المار على الكيف
وهواك يعيل بيها وعيب تنساه
شيصير اعلى الترف لو ينحسب ضيف
اعلى غفله وعيد وصل الزين محلاه
انا بعازة الموت وحاجبك سيف
اموت بغير هذا السيف ماريد
الك جانت يحلو الطول جيات
شعجب تبخل علينا بجية العيد
احن لمسامرك والكاك شلكاك ؟
شري المعشر حلاوة شوك ما بيك
ويمر صيفك صبر واتنطر شتاك
تبيعك عزتك وبروحي اشريك
تراك وي النفس يا الما تجي اشراك
وبالدم اليدور تدور احس بيك
ابد ما سامرتني الاه لولاك
ولا عمري انطفى بلليل المواعيد
الك جانت يحلو الطول جيات
شعجب تبخل علينا بجية العيد
.
.
.
.
#شعراء_وذواقين_الشعر_الشعبي
#عريان_السيد_خلف
#ابو_تراب

.
كلبوني على الصفاح وعلى البطن وعلى الظهر
كالوا نشبعك قهر
كلت اموت اعلى القهر
كالوا انت وين رايح ؟ ولك والجنة بعيدة !
وانت صارتلك جهنم مستقر
كلت اسافر ... ها تسافر ؟ يا سفر ؟!!
قبل لا انت تسافر جيب السنين العشتهن يا بشر
هاكم سنيني العشتهن قسموهن
قسموهن ما طلع بيهن شهر !
.
.
.
.
#شعراء_وذاوقين_الشعر_الشعبي
#عبدالحسين_الحلفي
#ابو_تراب

.
من كل گلبي احبها وما مجاملها
حبيبتي وانا رجالها وخلها
صح ما نتفق مثل الحجر والجام
بس ما نفترك بالعركة اغازلها
مزلجيين والبيناتنا بكل يوم
يوصل للنهاية وربك يحلها
وضلينا سوة مو لان متصافين
العلاقة التستمر تقوى بمشاكلها
بعد شيفضها اذا مغرور حب مغرور
التحرمها كمت اعناد احللها
واخبصها ( احبج حيل احبج موت )
ومن تطلبها مني اعناد ما اكلها
هي الصحته زينة المرض عنده فراك
وما مهتم ابين من ازعلها
وانا عندي نقص لمن علية تغيب
جن كاتب قصيدة وما مكملها
وهاي الروح مو ياخذها ملك الموت
سبحان الله ترجعلي برسايلها
.
.
.
.
#شعراء_وذاوقين_الشعر_الشعبي
#رائد_ابو_فتيان
#ابو_تراب

.
كافي انتظرته عمر ! هيج انت مساهل ؟
كتلهم ابقى أنتظر مو طعمه بس يختلف
المنتظرة يستاهل
هذا البنص البحر والمي يطب مركبه
تضل روحه بالساحل
ووزع ادواره الزمن
اختاريت دور انكتل ما ادبر الكاتل
وشيبت ما عيدت يفصل بقميصي الزمن
ول هسة ما كامل
وميهمني اذا ما كمل ما دام صارن سوة
اتشائمت متفائل
.
.
.
.
#شعراء_وذاوقين_الشعر_الشعبي
#سمير_صبيح
#ابو_تراب

.
نباوع على وجوه الجزتنه
وما ندري عن ياهي متنه
ما ضل ولف يفزع بمتنه
اعزاز ونسونه بفاتحتنه
جربها مرة ونام ملچوم
وشوف شثكلها عليك الهدوم
شبعداتكم بس هو الاغرب
ليش الدرب من يمكم اقرب
كون اليرد للبيت لو غاب
جفوف التحبه التفتح الباب
.
.
.
.
#شعراء_وذواقين_الشعر_الشعبي
#مثنى_كامل
#ابو_تراب

.
بوسلي روحك يمين الله عليك
واعتذرلي خاف ما اكدر اجيك
بيني وبينك مسافات وحدود
وانت عندي احلى من كل الوجود
وحلم بالنسبة الي لمسة اديك
بوسلي عيونك وهن مغمضات
ولا تفزز اي دمع بيهن يبات
خاف مني يفز دمع بعيونك
يسيل على الخد ويغير لونك
وما اسامح نفسي لو شي صار بيك
بوسلي روحك يمين الله عليك
.
.
.
.
#شعراء_وذاوقين_الشعر_الشعبي
#جبار_المياحي
#ابو_تراب

من مذكرات شاعر ...الحلقة ( الرابعة )

بعد ان ربطتهم علاقة حب قوية في سوريا ...البنيه طلع قبول طلبهه ( الهجرة ) الى امريكا عن طريق منظمة الهجرة العالمية ال ( un ) ..ولذلك قررت ان تسافر دون ان تفكر على اقل تقدير تودعه
شاعرنه گعد الصبح واتصل بيهه ولكن جهازهه مغلق
ولمن زاد قلقه وراح الى محل سكنهه لگه الابواب ايضا مغلقة.
اتصل بصديقتهه وكانت الصدمة ..بقى فترة طويلة مامستوعب الموضوع لدرجة في احد الايام وبدون وعي راح وگف اگبال اطلال شرفة الشقة الجانت ساكنه بيهه وفي لحظة ضعف نسى او تناسى هي اصبحت بعيدة عنه بمسافات طويلة وطويلة جدا
هاي القصة ساهمت بولادة نص غنائي انكتب عام ( ٢٠٠٨ ) لكنه فعليآ ينتمي الى حقبة الاغاني السبعينية
نص رصين جدا كتبه الشاعر المرحوم علي الفريداوي صاحب قصة اليوم ...

حبيبي انه البارحه اشتاگيتلك
وبلا وعي لحد بابك اتعنيتلك
مدري شجاني انسيت انت مسافر
واگف ابابك واكسر انه الخاطر

مو دمع دم من الجفن هليتلك
حبيبي انه البارحه اشتاگيتلك

اتذكرت يم بابك احلى ايامي
وشلون خلصت بالوعود احلامي
منين اجيبك حتى اشوفك همي
سافرت مني وضل حنينك يمي

مدري شجاني انسيت انت مسافر
واگف ابابك واكسر انه الخاطر
مو دمع دم من الجفن هليتلك
حبيبي انه البارحه اشتاگيتلك

عندي سوالف ضامهن لو اشوفك
تنزل دموعي تبوس حتى جفوفك
وياك راحت سافرتلك روحي
ولن منك انته محتفظ بجروحي

اتذكرت ايامك وحنيتلك
حبيبي انه البارحه اشتاگيتلك

ضليت واگف منكسر يم بابك
معقوله ناسي وماذكرت احبابك
منين اجيبك حتى اشوفك همي
سافرت مني وضل حنينك يمي

مدري شجاني انسيت انته مسافر
واگف ابابك واكسر اني الخاطر
مو دمع دم من الجفن هليتلك
حبيبي انه البارحه اشتاگيتلك
.
.
.
.
#شعراء_وذواقين_الشعر_الشعبي
#علي_الفريداوي
#ابو_تراب