.
تدري شيسوي القهر ؟
ما بجيتك
مدري من هو بصدري يبچي
مدري من هو يشكك بگلبي الكواغد
مدري من هو يريد اسافر
مدري من هو يجرني بيدر للمطر
ما بجيتك
درت عيني للبحر
ابجي المسافات الهمتها وياك
انت تجذب انت تجذب
ما بجيتك
جزت من بلوة سفينة وتيهتها وعاتبتها
يا ولك فزاعة ولا فزاعة عندك
ولا مطر لا ليل
تفتر تفتل بالمطر
ما بجيتك
انا جايبلك من دموعي بحر
.
.
.
.
#شعراء_وذاوقين_الشعر_الشعبي
#مظفر_النواب
#ابو_تراب

.
من اجيبك ع السلف تسوه السلف كله..
والمفارگ عيونك بالسلف شله؟!
اريد اصفن بوجهك صفنة الميتين!!
ما ارمش لون شچيتني بسلة..
انا الماتيهت..تيهني وجهك ذاك!!
بدوي ودرب الصحاري اشتمه واندله...
قفل خليتلك خيط اعلى طول الروح
حتى منين ماتشتاگلي تفلة
ويشذرة محبس المومن ومن تطيح
بعلامات الموامن تعتبر خلة
اليحب من طرف واحد بوجهة يبان..
على دفنة عزيز يعامل الدفان!!
من نظرة عيونه يبين المعيوف
من يشرب جكارة ويبطي بالدخان

شايف سنون الذيب من تلزم الشاة
اقوى بعشر مرات حب الغريبات
.
.
.
.
#شعراء_وذاوقين_الشعر_الشعبي
#حسين_العميدي
#ابو_تراب

.
كتلي من تعطش ترويك الجفوف
وهذا انا عطشان وين جفوفك ؟
وكتلي اذا شح النظر بعيوني شوف
شفت كل الناس بس ما اشوفك !
وكتلي اذا جرحك كبر برموشي روف
شو كبر جرحي وزغر معروفك
انا ادري رموشك اقوى من السيوف
شجاب گلبي وحطة بين سيوفك
.
.
.
.
#شعراء_وذاوقين_الشعر_الشعبي
ل الشاعر #مهدي_عبود_السوداني
#ابو_تراب

.
ياريتهم عدهم علم يومية اشب بنارهم
وكل طير يستاهل قفص جي ما يجيب اخبارهم
دلوني لو ريحة خبر بأخر الدنيا امشيلهم
متخوصر بروحي الحجي ومن عدهم ارد اشكيلهم
حنت هذيج الي حلفت لو طاحوا كبالي المشوا لا افزع ولا اشيلهم
ويا گلبي خل جدمك بعد لا يمشي خطوة بكاعهم
من صارت عيونك سفن غركوا حتى شراعهم
صوجك يا گلبي انت السبب صرتلهم مراية بوكت ما مرة كلت بعيبهم
مادام غيرك رافكوا .... لا تنتظر شيجيبهم
.
.
.
.
#شعراء_وذاوقين_الشعر_الشعبي
#علي_نافع
#ابو_تراب

.
العشك عند الاغلبية كذوبه صار
والصدك كلش قليل وقايسة
عمي يا حب جاي تحجيلي انت بي
وداعتك ما بي درب ما دايسة
حب كبل طاهر وبي قدسية جان
وغير جف المستحى ما جايسة
وهسة حب هالوكت من اول كلام
دزي صورة وخل اشوف شلابسة
.
.
.
.
#شعراء_وذواقين_الشعر_الشعبي
#ساجد_المحنا
#ابو_تراب

.
خل يروح كلمن مشتهي فراك
واتلكى الذي مشتهي الملكه
ادين هواي اكو تشتهي الشبكات
بس ياهو ال يستاهل تشبكه
التشبكه كون روحه التشبك عليك
وكون تطيح ادية ساعة الشبگه
ولو مو عيب يطلع ثوب موزين
بس عيب اليلبسه ما يشگه
يومية الك صاحب يا بذات
ويومية وي واحد الك دكه
جيره بفركه كلمن يمشي وياك
وبخيت ال يلكى فد جيره اعلى فركه
انت شما عليت انت ذاك انت
النخل مهما علا يخضع لعركه
وشنفع علوا النخل خل يعلى قاطات
اذا حتى الجهال تلوح عثكه
.
.
.
.
#شعراء_وذواقين_الشعر_الشعبي
#عبدالحسين_الحلفي
#ابو_تراب

.
يا هم احنا ؟ منين اجينا ؟ ليا نهاية احنا ابتدينا
تضيع بين شفافنه حروف السؤال
وتهنا وسط بيوت اهلنا ولا تصح كلمة تعال
وصاحت الوادم علينا مسودنيين وشككينا ثيابنه

#محمد_الغريب

منو اليندل يتيم يداين عيون
خلص دمعي واريد ابچي ابداله
واعلمه اعلى اليتامة شلون يبچون
واشوفه البچي الما مر اعلى باله

#رحيم_المالكي

تسألني الشوارع وين الاحباب
و وين اليوكفون بعتبة الباب
ابشرك سلموني بحلگ الذياب
نسوا انا جنت في يوم خلهم
ما ضلي اهل حتى ارجع الهم

#خضير_هادي
.
.
.
.
#شعراء_وذواقين_الشعر_الشعبي
#ابو_تراب

.
دارت سنتك وما مقتنع ميت
تجي بالطيف افز اتخيلك واسكت
غم الرمل ما يدري شيطم
جان بعباته خيوط يلضم
موت البساع بساع يهضم
.
.
.
.
#شعراء_وذواقين_الشعر_الشعبي
#حسين_المرياني
#ابو_تراب

.
سنة شفافج على شفافي ؟
بصراحة الوكت مو كافي
اريد الشتا يصير اربع مواسم يا حضن دافي
واريد الليل سبع سنين و الله يموت الغافي
من كال تعبت ؟ مليت ؟
لو طال السفر وياج من روحي الخدر ينزل على الجتفين
وامشي اعلى الجمر حافي
ولو ميت وامر بشارع مشيناه انسى جنازتي وتتحرك اطرافي
.
.
.
.
#شعراء_وذواقين_الشعر_الشعبي
#الكاطع
#ابو_تراب

.
يا فكة عيون الگلب يا ميزتي البيها انغر
مو رايدك واتنفسك لا يا نفس شي اكبر
يا روح ما تطلع مثل روحي التموت من اكبر
انا اعرف بزعلك گبل ما تزعل وياي اكدر
والنوم يتركني وقت ما تنوي عينك تسهر
يا ريت كل هذا الحجي من اكعد كبالك يحضر
ومن التهي بعينك بعد تهمسلي حتى اتذكر
وياك اذا ما سولفت من الصمت لا تحذر
مرات مو كل الحجي يلم المشاعر يكدر
انا أمن التهوا صدك تتنخى بي من تعثر
روحك علية تتكدر
تنشف لحد ما يخضر
لو برد ملكاه تشتعل ورماد خلك ينذر
وانت اعرف شلون اختنك من نسمتك تتأخر
.
.
.
.
#شعراء_وذواقين_الشعر_الشعبي
#ايهاب_المالكي
#ابو_تراب

.
اجاني يكلي مو قصدي
واضح تعب من بعدي
اجى متوقع اغفرلة
ضحكت بوجهه بس كتلة
شلون تكلي مو قصدي الاذية
جنت تعرف شجاي تسوي بية
جاي والتفاهم داك الباب
خلص وكت الحلول المنطقية
ترى الخلص محبته وياي تمثيل
مو صعبة علية دور الضحية
و لا تتوقع كره بس من الاكيك
ما عندي لمحبتك قابلية
قبل جنت انا واضح وي اليريد
يجيني وناوي يتعرف علية
بسبب غدرك حدود هواي خليت
حتى ويا العلاقات القوية
.
.
.
.
#شعراء_وذواقين_الشعر_الشعبي
#حسين_السعيدي
#ابو_تراب

.
حبيتك كبل من شحوا الحبوك !
ومن كثرت احبابك نستك خلك ؟
تصعد للنجم مو بس ردتلك هاي
ردت انا النجم للكاع ينزلك
شح مايك علية وانت تعرفني شلون ؟
لو اموتن عطش عطشان ما اكلك
يا الما ميزت بين الورد والشوك
ما مجبور اجيبن ورد واشتلك
جفوف الزمتك لازم تحلك يوم
وهم ترجع والزمك وابد ما احلك !
شديتك نذر خيط بضريح امام
ما عندي بخت يرجعلك يفلك
.
.
.
.
#شعراء_وذاوقين_الشعر_الشعبي
#ناظم_الحاشي
#ابو_تراب

.
رحتلها وشفتها وروح حضنت روح
الحقيقة ويا الحلم واثنينهن طبگن
العيون استراحن هودن بالشوف
والكلوب التقن وبشوكنا احترگن
بس اشجار يمنه وخفنا بيها عيون
خاف تشوفنا ولحظاتنة يغرگن
.
.
.
.
#شعراء_وذواقين_الشعر_الشعبي
#سمير_صبيح
#ابو_تراب

.
صاير ما تحن كلش هالايام
وحيل تغيرت بيك المودة
تجر گلبي وتحبسه بطرف الرموش
لا عينك تشبكه ولا تهدة
رد كلمن يحبك جنحه مكسور
بس مكسور خاطر لا تردة
.
.
.
.
#شعراء_وذاوقين_الشعر_الشعبي
#جبار_رشيد
#نائل_المظفر
#ابو_تراب

.
افا تبدل حجيكم ليش ؟
معقولة العمر اثر ؟
هلي خلوا الحجي مدثر
انا شبيدي ؟! العمر ركضة
هلي لو بيدي ما اكبر
مثل حال العراق وياي
عشت وياكم بغربة
الماي الما تحضنه جروف ما يندل بعد دربة
.
.
.
.
#شعراء_وذاوقين_الشعر_الشعبي
قصيدة ل #احمد_العبيدي
#ابو_تراب

.
منهو الكالك ناسيك ؟ هم ينسى الكمر وكته ؟
لو نبض الگلب يتنكر ل دكته
بس عشكك عشك مفضوح
وعشك الناس كلها مساتر وسكته
صرت انت سبت وبركبة يهودي
هم شايف يهودي يجوز من سبته ؟!
.
.
.
.
#شعراء_وذواقين_الشعر_الشعبي
#عباس_چيچان
#ابو_تراب

.
امه تشوفه جا وانا ... لشامه
تعبت هم كربت رية ... لشامه
الشلع گلبي ارد اوصفنه
عسى من الله و انصفنه
من اديته تستحي الحنه
سنه يغار من سنه
الشامه مكابله الشامه
يمشي وهن جدامه
يتلثم فضحن الثامه
زعل وتكربن شامه ... لشامه
ابتسم واتفاركن من صد علية
.
.
.
.
#شعراء_وذاوقين_الشعر_الشعبي
#اياد_عبدالله
#ابو_تراب

.
جمالك بالگلب والروح ... طرفاي
شعرك في جبينك نور ... طرفاي
احذرك لا تدوس بيوم ... طرفاي
اوچ گلي وطرف ما يضل بية

دحوك بثوب حسنك ... وانسجه النا
بجهنم حبك ارضى ... وانسى جنه
انحبسنا بقفص عينك ... وانسجنه
وتحط رمشك گلبچات ب أدية

ها دك الگلب بجفاك ؟ ... ها رف ؟
هاك اخذ الجروح وياك ... ها روف
مثل خزلة غنم وتشوف ... هارف
شتن مشن كل وحدة بنوية

الوكت من عش حزنه ... ما نقلنه
وحجي الوادم ل وادم ... ما نقلنه
الوكت من امتحنه ... ما نقلنه
واخذنا بكل درس اخلاق مية
.
.
.
.
#شعراء_وذاوقين_الشعر_الشعبي
#سعد_محمد_الحسن
#رحيم_المالكي
#ابو_تراب

.
شوف اكلك بالله حاجيني تعال
تكدر تفهمني بالسويته
تضحك كبالي الضحك يعني يصير
كبال واحد انت هاجم بيته
على الاقل اخجل اذا تلاكيني
وهاي عينك لا تحطها بعيني
جرحك فتحت الگلب خليته بي
وجرحي شلته وبالملح خليته
.
.
.
.

#شعراء_وذاوقين_الشعر_الشعبي
#علي_الفريداوي
#ابو_تراب

.
اجيت الله اكبر مو جنت ناسيك
بية شذكرك ؟ يمعود شجابك
اذا تعتب علية جي ما ادك الباب
خل گلبك يدك بعدين ادك بابك
جنت اشتاك ل امي وانت ما موجود
اشمن ريحة امي بريحة ثيابك
اشمن شيلة امي بطولك من اشتاك
وعلى هذا الحساب شحاسب حسابك
.
.
.
.
#شعراء_وذاوقين_الشعر_الشعبي
#احمد_الصالحي
#ابو_تراب