.
انا ميت شعرك واتوسل الشيطان
يا شيطان شعري انكطعت اخبارك
قبل چنه بجحا وكلساع تدك الباب
ماريدن شعر مر واخذ بسمارك
يا شيطان شعري الشاعر من يموت
يتعطل فرض والكون يتدارك
انا واثق عفتني روح لا رديت
يوم فراك وجهك يوم المبارك
شجنيت من الشعر لو سجن لو طعنات
ساعة اصفى وي ربعي وعمر نتعارك
بس لحظات محتاجك قبل لا تروح
اريد ارثي ( غني ) وروح اكطع ابحارك
يا صاحب ( غني ) ماعفته حد الموت
وكتب اخر قصيدة من وهج نارك
جان القلم شضه والحبر نيران
الشهادة اكبر قصيدة تدوخ افكارك
.
.
.
.
#شعراء_وذاوقين_الشعر_الشعبي
اخر قصيدة وجدت في جيب الشاعر الشهيد #رحيم_المالكي
#ابو_تراب

.
ما رهمت ويانا تكول ما اعيش
بمحكمة القدر طلكنه الافراح
طيور الخير هجن عافن البيت
وغراب الفكر بمچانهن صاح
مسودن بختنه وحضنه مشلول
ومن كثر الحزن منهم على الراح
على الجاهل كبل نتنكب انكاب
هسة يموت ابونه نكول يرتاح
مدام الموت ارحم لليموتون
دمشونا لعد كل احنه نرتاح
الفرج محد يعرفه شجم قفل بي
ابتلى بلوة الصبر من صار مفتاح
.
.
.
.
#شعراء_وذاوقين_الشعر_الشعبي
#جبار_رشيد
#ابو_تراب

.
رجعت الها نهر شاربني الفراك
وانطيت الليالي دموعي كلها
وانا مابية اضوك الموت مرتين
وحجاية الشامت مو حملها
اخذتلها سوالف صوغة وياي
بس ما اعرف من اوصل شكلها
ومقابل صوتها ولحظة هوا وشوك
عن راحة البال اتنازل الها
.
.
.
.
#شعراء_وذاوقين_الشعر_الشعبي
#ايهاب_المالكي
#ابو_تراب

.
علاوي ابني كبر وبصف الاول صار
وشماخذ أول درس منطينه كلمة دار
ردلي وسألني طفل شتعني بابا الدار ؟
جاوبته تعني الوطن عائلة وتسكن بيت
والدور ؟ .... الدور يعني الجار
وغرفتنا بابا وطن ؟
اي بابا هذا وطن بس وطن بالايجار
.
.
.
.
#شعراء_وذاوقين_الشعر_الشعبي
#سمير_صبيح
#ابو_تراب

.
اثنينهن دمعي وضحكتي بلونها
وضايعه الدنيا بخضار عيونها
ابقى حاير بين تعبي وراحتي
روحي يمها تصير ابد مو مالتي
بية اضمها وغيري ميشوفونها
اثنينهن دمعي وضحكتي بلونها
وحدي موجود بكلبها وبالها
الله مدري شحاط فوك خيالها
ترفة تعثر بالضوة وتوكع سهر
النجمة تعرفها ويغازلها الكمر
النسمة بس عشاكها يشمونها
اثنينهن دمعي وضحكتي بلونها
.
.
.
.
#شعراء_وذواقين_الشعر_الشعبي
#علي_رشم
#ابو_تراب

.
عشر مرات حبيني يغثني اليحب بس مرة
تعالي نغير التاريخ ونسوي بالعشك طفرة
ونودي بالرسالة گلوب حقيقيات مو حمرة
خل نبچي لحد ما نموت بلكت تطلع الحسرة
بلكت للفرح عنوان نلكى بديرة الفقرة
واحجيلج حجي منكال واكولة بنبرتي السمرة
انا بية الشعر مسكون هيج احجية على الفطرة
انا مجنون حب مجنون صرنا ابواب للحضرة
لا حتى الشعر ماريد طيبات الشعر مرة
.
.
.
.
#شعراء_وذواقين_الشعر_الشعبي
#ميثم_فالح
#ابو_تراب

.
طلعلي المارد المضموم بالمصباح
كال أمرني كول ومستعد شفته
وخلصهن علية شبيك ما لبيك
عبدك بين اديك ويا أمر ردته
انا ترددت بس كلت ما خسران
اخيك كتله فدوة من الفكر عته
ردت فرصة عمل كتله الوضع تعبان
ضل صافن علية وعلى الحجي الكلته
وجهه تغير ويفرك ب أدية محتار
خوفني بصراحه اتندمت جبته
كال انا اخذ من الناس عشر اوراق
بس قدرت ضرفك واكتفي ب سته
.
.
.
.
#شعراء_وذواقين_الشعر_الشعبي
#ايهاب_المالكي
#ابو_تراب

.
كوة امشي واكضي الليل مهموم
متيه بيتنا وبيدي الخرايط
اذا ما يمي حايط والله ما اكوم
لان ينرادلي اتوجى اعلى حايط
.
.
.
.
#شعراء_وذواقين_الشعر_الشعبي
#اياد_عبدالله
#ابو_تراب

.
رحتلها وشفتها وروح حضنت روح
الحقيقة ويا الحلم واثنينهن طبگن
العيون استراحن هودن بالشوف
والكلوب التقن وبشوكنا احترگن
بس اشجار يمنه وخفنا بيها عيون
خاف تشوفنا ولحظاتنة يغرگن
.
.
.
.
#شعراء_وذواقين_الشعر_الشعبي
#سمير_صبيح
#ابو_تراب

.
جاي تكلي اسف ؟ .... ضحكتني
ولا جنك بدم بارد بعتني
تضحك جاي ؟ يابة شوكحه عينك !
عاد امسح رسوم الحاضنينك
رخيص شكثر عندك حسستني
لا والنوب جاي وكلك اخلاق
ناعم وبترافة تلكي مشتاق
اش لا تحجي عن الشوك كلمة
و وخر عطرك انغث من اشمة
بقساوة اتعامل ؟! ... انت العلمتني
جاي تكلي اسف .... ضحكتني
دمعي وسهر ليلي وغربة الكأس
هاي الاسف ليا لچمة منهن
العفتهن وحيدات بوحشة الناس
ثمنهن هذا لو كفارة عنهن ؟
حلم ترجع بعد تغفى اعلى متني
جاي تكلي اسف ضحكتني
.
.
.
.
#شعراء_وذواقين_الشعر_الشعبي
#صفاء_الصمت
#ابو_تراب

.
انا من اشرب جكارة اشهك سنين
وارد وانفخ بوجه الوكت دخان
خاناني الوكت والصحبة والحيل
وباكيت الجكاير عمرة ما خان
اذكر وكفته بساعات الوداع
يدورلي صبر لو وين ما جان
بعت روحي وشريته بساعة العوز
وحرگ روحه وشراني بنص الاحزان
.
.
.
.
#شعراء_وذاوقين_الشعر_الشعبي
#عباس_اللامي
#ابو_تراب

.
فد مرة صدفت بالشقا مدري شكلت غثيتها
جريت حسرة من بجت لا روحي احس جريتها
من صدري مدري شطلعت فد شي حلو ورضيتها
والصبح يم راس السنة واكف تجي تانيتها
ماشة شعرها ضيعت سألتني امس ملكيتها ؟
كلتلها ما شايفها ابد وانا جذب ضميتها
.
.
.
.
#شعراء_وذاوقين_الشعر_الشعبي
#ميثم_فالح
#ابو_تراب

.
دللول يا دنيا غريبة
تخلص مصيبة تطك مصيبة
والصبر من يا صوب اجيبة
دللول يا دنيا يا أللام
بيج الفلوس تطول الهام
والخلص جيبة غم نصيبة
.
.
.
.
#شعراء_وذاوقين_الشعر_الشعبي
#جبار_الفرطوسي
#ابو_تراب

.
ما تعلى بملك طبعك حلو يعليك
الي صاحب نزل من صعدت احوالة
نفس عود الشلب ما يعلى وشكد ماي
عكس جذع النخل يصعد بالوشالة
.
.
.
.
#شعراء_وذاوقين_الشعر_الشعبي
#سمير_صبيح
#ابو_تراب

.
يا حبيب لو ردت باجر تشيل
ما تصيرش بس نكول احنا ولوا
جنت احشم كل عمامي اعلى الرحيل
وما يهمني الي اجوا والما اجوا
يا حبيب لو جنت انت زعلان
جا زعلت اعلى الهوا لو زعلاك
وما يمر بريتي وهذا المچان
الي گبل ما اشم هوا اشتم هواك
وجفي لكطى لكاك بدروب الزمان
وكيفيت بين ضلعيني ازرعاك
الدنيا مدري شلون فرشتلي الشليل
وفرهديتك يوم عذالي التهوا
وانا جبت الغانمة وانا الدليل
وكورت واهل الهوا ما حصلوا
.
.
.
.
#شعراء_وذاوقين_الشعر_الشعبي
#صاحب_الضويري
#ابو_تراب

.
حلو مثل الخميس بين الايام
وترف مثل المطر لو باوس الجام
حساس ودمعتك تترس العين
من ليغاد اشوف بگلبك شضام
هلة يا فرحة الما نام مرتاح
بوكت مابي وفى حسيتك امام
.
.
.
.
#شعراء_وذاوقين_الشعر_الشعبي
#رائد_ابو_فتيان
#ابو_تراب

.
ليش اجيتي ؟ وفززيتي جروح جانت غافية ؟
وليش ترضين اعلى غيمي يمر سماج الصافية ؟
و ليش فززتي الهوا وجبتي الحنين وبگلب ميت ندهتي العافية
وليه نفختي ارماد روحي وجمريتي اشواك جانت طافية
انا گبلج گبر منسي بلا ورد لا ذكريات ولا حلم وردي وليالي الدافية
وانا گبلج جنت ترس عيوني انام وعلى العشك قدمت ( لا ) النافية
.
.
.
.
#شعراء_وذاوقين_الشعر_الشعبي
#محمد_الغريب
#ابو_تراب

.
بعدت طيوف حبك من الاطياف
وشلت لمسات شعرك من الجفوف
شضمن بيك سري ؟ وانت شفاف
وشجلب بيك وانت الرايد تعوف
ابد ميصير تين الاصلة صفصاف
وجذب ماي النهر ميجازي الجروف
مو صعبة اذا بستان ينحاف
بس صعبة الينطره وهو اليحوف
يا الكلك جرح ومنين تنراف ؟
اذا خيط اليروفك رايد الروف
ليل شما اضمك نار تنشاف
وعيون الشماته مغمضة وتشوف
نعم انا اعترفلك صرت خواف
شفت الخوف يرجف كاتله الخوف
ودرب حبك ضياع وامشي والتاف
ترى اليسمع سمع مو مثل اليشوف
.
.
.
.
#شعراء_وذاوقين_الشعر_الشعبي
#سمير_صبيح
#ابو_تراب

• .
أول مرة اكول لروحي هنيالي
من شفتج كعدتي بصفي وكبالي
من كلتيلي جا وينك
اريد اتغطى بسنينك
من عدها وعرفت الكمر مو عالي
ما ندري النحبهم ليش يرحون
بينه الصوج ؟ بيهم ؟ باليحسدون ؟
حلم مروا علينه
بوكتها شكد بجينه
ما ضلت بعد بوجوهنه عيون
حسبالي الرسايل تنقري بساع
اثاري تضل شهر مشمورة بالكاع
كوم اقرى الرسايل
شوف شبيها كايل
تعال تمنتك رصعات المتون
.
.
.
.
#شعراء_وذواقين_الشعر_الشعبي
#علي_البديري
#ابو_تراب

.
اثنين جانو الك وماكو بحياتك فقط
اني ونظر عينك..
وعينك درتها ورحت وﻻجني منك جنت
وبكل سهوله خسرت واحد من اثنينك!!
ومن رحت طاح الكلب وصحيته كوه وكعد وبأول حجاية انحجت!
عنك سأل وينك ..
ضنيت ساعه زعل ..وخلصن ايامي شكثر ساعة زعل ماكضت !
يازين من زينك..
وجم طيف الك ودعت حملته شوك وعتب وزتيته اجه لعينك..
وكل هذا باقي بأمل ﻻزم يجيب تعب ذيج السنين المضت مابينه وبينك..
وماايست ماتجي بس اني ﻻزم اجي ابحجة ارد دينك..
شديت عين الجرح وجبته واجيت اعتذر
يم باب سجينك
.
.
.
.
#شعراء_وذاوقين_الشعر_الشعبي
#جبار_رشيد
#ابو_تراب