.
روحي عطشانه عليك
ضيعت سنين عمري وما نسيتك
دوريت الدنيا كلها وما لكيتك
يا درابين العشك ما مرچن اسمه ؟
هلبت توديني ليك !
يا مدينة تلمني بيك ؟!!
بكل محطات الموادع تارك اسمك
دور اشجار المدينة تلاكي رسمك
جم خريف الفات بس ما فاد هزك
انت وحدك تفتهمني !
كبل المنادة تجيني وكبل المنادة اجيك
.
.
.
.
#شعراء_وذواقين_الشعر_الشعبي
للامانة الشعرية بحثت عن اسم الشاعر فلم اجده والقصيدة بصوت #محمد_الاميري
#ابو_تراب

.
الشعر مو باب رزقي لخاطرك جان
ذهب جوة ايدي اصوغة شلون ماريد
جازفت بسمعتي بعشرتي وياك
هملت اسمي ودست فوك التقاليد
مو نفس العمر بس جنت اداريك
ما حسستك بفرق المواليد
.
.
.
.
#شعراء_وذواقين_الشعر_الشعبي
#نور_اللامي
#ابو_تراب

.
شعجب مشيتلك كبرت راسك ليش
جاملتك هواي وانا ما اجامل
بلساني كلتلك انا قابل بيك
بس بداخلي صدكني ما قابل
وكفت بسوك حبي وهاي الك چم عام
تكلي بيش ؟ غير ابيش ما كايل
كل الرايدة تهواني لو انساك
اذا ما تشتري لا توكف تعامل
بكت مني عمر ما بكت بالميزان
وكفت انت عدل بس بالصدك مايل
اليكسرله گلب يكدر يشيل سلاح !
لا تكلي بحياتك بشر ما كاتل
ردت تصعد علية كتلك انام وياك
طفيت النجم ضليت متجاهل
انا بنومتي باحلامي اصعد ناس
الدرج لمن ينام يصعد النازل
جلد متصيرلي عفتك بجنحك ... طير
لا تكلي قبل بالغيم متراسل
من اهدك من متر ما توصل انت البيت
من تروح فدوة لريشة الزاجل
.
.
.
.
#شعراء_وذواقين_الشعر_الشعبي
#علي_الشمري
#ابو_تراب

.
خليتني ساعة رمل كل الاوقات اتبده
والمشكلة جرح القلب ماله مكان تشده
ذليتني بس انا الك والمثلي مو هسة
ترى بعدين يلا تفقده
تشتاگلي من تغمض وما تغفى
من تكتب اسمي وتجي تنام بصفه
وتذكر ضحكتي وتقترب منك زواية الغرفه
وتبجي لحد ما تيبس وما تطفى
تستاهل تضل وحدك يا الكرهتني بطيبتي
يا الجنت مو من ألتفت كدامي تاخذ غيبتي
مو انا اليرد منكسر منك رجعت بهيبتي
واخر قصيدة اكتبها الك
منا واسد موضوعك
يالشوفتني دمعتي لازم اشوف دموعك
.
.
.
.
#شعراء_وذواقين_الشعر_الشعبي
#احمد_عاشور
#ابو_تراب

.
جبت گلشي وعفت كلشي
ومدري شلون اجيت امشي
اجيتك ردت اكلك شوف
ردنه نعوف كلشي وما كدرنا نعوف
جبت كلشي اليسولف بيك
خيالي وصحوتي وطيوف
جبت دكات گلبي الكطعن گلبي بجفاك سيوف
وجبت صفنات روحي السودنن روحي
مثل جن بمسية وعلى اليتيم يحوف
كون تشوف حالي شكد الك ملهوف
.
.
.
.
#شعراء_وذاوقين_الشعر_الشعبي
#جبار_رشيد
#ابو_تراب

.
كون المفارك حبيبة يرد علية
ونبض گلبة يسولف شصار بجفاه
وكلمن يحب من طرف ولفة يجية
بوجه يترس حيرته وتمطر سماه
حضنه العشاك ما بيها حرام
اليحب من محبوبته يفصل غطاه
كون المسافر نفس ميشم غريب
متاع للغربة لليحب ياخذ هواه
من تراب ولايته شيوصله خير
بروحه ينده كل صبح بالغربة تاه
ولا جفن سهران يبقى يتاني طيف
الليل مالح والجرح وجهه وكفاه
.
.
.
.
#شعراء_وذاوقين_الشعر_الشعبي
#علي_رشم
#ابو_تراب

.
ومدري شبية هالفتره
بشر ما ينعرف امره
الوادم ما تحب وتخون
وانا اتعلق بنظره
ويسألوني شجاك شبيك ؟
بية الوادم الفقره
بية الما لكوا صحبان
بية الما خذوا عبره
بية العاشك المخيون بية المنكسر ظهره
الملح مثل ابليس شابع ملامه
كون اعلى كلمن خان تندك علامه

.
.
.
.
#شعراء_وذاوقين_الشعر_الشعبي
#علي_البديري
#ابو_تراب

.
حط كلشي اعلى متني ونام
ورجف گلبي هوا برايه
من كد ما ترف لو باوعتله يفز
اباوعله بالمرايه
اول مرة اشوفن هيل من ينام
ما عبالي تتنفس الهيلايه
وفز من نومته وبست الصبح والليل
وطحت لوما لزمني وصار تچايه
حلو من ينفتح من راسه للرجلين
ابد ما بي تعب جكليت الولايه
.
.
.
.
#شعراء_وذاوقين_الشعر_الشعبي
#احمد_الصالحي
#ابو_تراب

.
ماكو اشكال شرعي بحبي وياك
وشنو يعني اذا اكو اشكال شرعي
وشنو يعني اذا كرهوني الناس
و شنو يعني اذا كرهوني ربعي
وشنو يعني اذا طبيت للنار
اذا انت وياي كلش زين وضعي
وشنو يعني اذا كالوا دخت بيك
اكثر من دخت غير انت ضلعي
طبع بية وانا مغمض دخت بيك
وخذاني الشيب جا شيغيرة طبعي
وشنو يعني اذا بجيتني شبيك
جا ربك عليمن سوة دمعي
وشنو يعني اذا قاسي انت وياي
نعمة من الله من تصير قاسي
وشنو يعني اذا تنساني فد يوم
وي الناسين احسبك احلى ناسي
وشنو يعني اذا انا خسرت ناس
هم يعني ربحت غير انت ناسي
وشنو يعني اذا طخيتلك راس
اذا طخيته الك ينرفع راسي

.
.
.
.
#شعراء_وذواقين_الشعر_الشعبي
#عبدالحسين_الحلفي
#ابو_تراب

.
واذا ماشيت غيرك ناس
واذا ب احضانهم كاعد
انا بس حاولت ليش انحسب خوان
ما دام الله يدري بگلبي بس واحد
وصنت زرعك وانا بروحي مواسم جوع
ومن سنبل ودادك كرصة ما حاصد
انا غراني فيك من جنت حطاب
والمهيوبة امددها
لمن جنت اخلي بكل جذع نيشان
اختاريتك الشجرة الاكعد بسدها
يا الماخذني دولاب وهوا اترجاك
بوجهي الدنيا لا تسدها
هاي الروح طفلة ودللتها بيوت
وادم خبزة ما عدها
لتيها وك تكسر هواي گلوب من يضيع معضدها
والي يمك گلب من تبتعد رجعة
والك بية حنين امام طيورة يفزن بسرعة
دنطيني مجال اتفاهم وي الناس
كلما اريد اذكرك تزل الدمعة
.
.
.
.
#شعراء_وذواقين_الشعر_الشعبي
#رائد_ابو_فتيان
#ابو_تراب

.
طايحلك نشد يعقوب بالذيب
ولا بير الحجى وكال انا سداد
انا ( اخ ) وحجوني بغرف تعذيب
ما هزيت شعرة براس جلاد
انا مصيوب مو مثل المصاويب
حرب والصاحي يرجع بس الزناد
المصيبة البال بيك يودي ويجيب
اكثر من هلي وحتى من الضماد
٣ سنين طيفك لو ادري يغيب
جا ما خيطت راسي وي المخاد
.
.
.
.
#شعراء_وذواقين_الشعر_الشعبي
#حسين_البهادلي
#ابو_تراب

.
.
من بعد التجارب والخسارات
عرفتلها وبعد ما اصاحب احد
عرفتلها وبعد مو على اليموتون
على العدلين البسه الثوب الاسود
شايف من تضل تنعاد الايام
نفسها وماكو شي بيها يتجدد
يجي شجم باجر وما يختلف شي
نفس البارحة بس عمرك ازيد
ساعتها العمر مستعمل يصير
واحلامك شوية شوية تنهد
صح ينكتب عايش بالسجلات
بس انت مجرد رقم ينعد
ي مثل الهوة ال بالمگبرة يدور
لا تخنك ولا يشتمك احد
.
.
.
.
#شعراء_وذاوقين_الشعر_الشعبي
#احمد_عاشور
#ابو_تراب

.
من هو بحالنه احنا المساكين ؟
احنا المحد النا ومدري منين ؟
خلصنه عمرنا بالمحطات
سفر وبيوتنه سطوح الفراكين
مرسومة بجلدنا ذيج الانياب
الجرح لو طاب هم يترك نياشين
وين اهلي علية ما دكوا الباب !
ترى صحتي عليلة وگلبي مو زين
خسارتنه جبيرة وغشمة على السوك
بعنه عقولنا بسوك المجانين
تمنينه نموت بغير تعذيب
وعلى المذبح نطرنا صارنه سنين
يوصلنه السرة ويتأجل الموت
يم اركابنه وتعمى السجاجين
.
.
.
.
#شعراء_وذواقين_الشعر_الشعبي
#الكاطع
#ابو_تراب

.
نباوع على وجوه الجزتنه
وما ندري عن ياهي متنه
ما ضل ولف يفزع بمتنه
اعزاز ونسونه بفاتحتنه
جربها مرة ونام ملچوم
وشوف شثكلها عليك الهدوم
شبعداتكم بس هو الاغرب
ليش الدرب من يمكم اقرب
كون اليرد للبيت لو غاب
جفوف التحبه التفتح الباب
.
.
.
.
#شعراء_وذواقين_الشعر_الشعبي
#مثنى_كامل
#ابو_تراب

.
الف مبروك والباقي بحياتك
باجر راح تسمعهن سوية
تبجي احبابك وتفرح شماتك
ويزفونك واموت بفد مسية
دشوف شكد محبتك
يشيعوني وي زفتك
الجفن الابيض لبسته انا لغلاتك
والاسود لا تلبسه انت علية
يا الكتلي انا احبك موت واحسك تجري وي دمي
طلب عندي اذا مرخوص سمي ابنك مثل اسمي
ومن بسمه ينادونك
بأيامي يذكرونك
واذا احس روحي عايش وي ذاتك
تصير وداعتك سهلة المنية
.
.
.
.
#شعراء_وذاوقين_الشعر_الشعبي
#رائد_ابو_فتيان
#ابو_تراب

.
مخدتنه عصافير
ونفانيفك حمام من امد ايدي يطير
وعلى صدرك مري ينثن عطر ويلمن المكتوم
وابدكلك وانا المالوم
واريد اشبع حسن متلحك عيوني
من اسولف وي طولك تتعب ضنوني
و حلو خبالي عليك يشيب الراس
اذا وسواس يتعب ينخى وسواس
.
.
.
.
#شعراء_وذاوقين_الشعر_الشعبي
#موفق_محمد
#ابو_تراب

.
يا صاحبتها يا الوصلتي لدارها
احجيلي عنها شلونها وشخبارها
شدار الكلام ال بينج وما بينهة
شجانت تكلج هية نظرة عينهة
وشكالت وما كالت من اسرارها
يا صاحبتها عيوني ما ينسنها
خليني اشوف عيونج الشافنها
انطيني اديج اللامسن جفينها
ولمساتها الضلت بجفج وينها
محتاجهن بلكن يطفن نارها
شكالت علية شلمحت وشذكرت
ما وصتج ما سلمت معتذرت
هواي ضل من السوالف عدها
روحي الخذتها وياها يمتى تردها
لو خيروني اختار هم اختارها
.
.
.
.
#شعراء_وذواقين_الشعر_الشعبي
#جبار_رشيد
#ابو_تراب

.
توكل بالله روح وعوفني بحالي
وعلي خلصان گلبي وكل خلگ مالي
كاع اعلى النهر يا عشرتك وياي
وعلى هيج ارض ما تنبني آمالي
ما انكر عشت ايام حلوة وياك
وعلية سم طلعتها فراكك احلالي
فطن ومن البداية عرفت نيتك بيع
من انطب مزاد تصيحلي الغالي
ولك يا عنب انا الشالك الصوباط
عليتك علية وانت مو عالي
جنت كلش سهل وتلولحت جواي
بس رديت منك فارغة اسلالي
وانا اكدر امنعك ما تجي برجليك
المصيبة شلون امنعك ما تجي ابالي
.
.
.
.
#شعراء_وذواقين_الشعر_الشعبي
#مهيمن_الامين
#ابو_تراب

.
عامان مرن قد اخفيت احساسي
على اهلي على صحبي على ناسي
اصير كبالهم اسكت وما يدرون
شنو هاي المصيبة الضامها براسي
تناديني جموع الناس يا ثملآ
وما بصروا نزول الخمر في كاسي
تاليها وعرفت الزين للموزين
وكلمن گلبه طيب يوكع بقاسي
مرت عليه من الايام اصعبها
بها ندمي وخذلاني و وسواسي
راح ومن وكت هالجفن ممغمضه
ولحد الان حاير بيمن اتوضى
اضم بصورته وخايف عليها تضيع
ومدري شلون ذب كلادة الفضه
من فاركني علمني المحبة حظوظ
مو كلمن وحبه كلمن وحظه
.
.
.
.
#شعراء_وذاوقين_الشعر_الشعبي
#مهند_العزاوي
#ابو_تراب

.
حتى انساك لازم ينلغي الليل
اذا بالليل اذكرك جا شسويت ؟
واحتار من اضل بين رأيين
اذا عن رأي منهن ما استغنيت
بما انك عفتني بكل الاحوال
ما تفرق نسيتك لو تناسيت
.
.
.
.
#شعراء_وذاوقين_الشعر_الشعبي
#ايهاب_المالكي
#ابو_تراب