.
حسين هذا الجيش مو من مستواي
كلهم تبوشوا من شافوني جاي
شفت بس نسوان تركض كمت اصيح
طاب بسوك العبي لو حرب هاي ؟
كبالي خيرهم لبس بركع عروس
غيرتي تفرع ويعرض مستحاي
ركضتهم وصلتهم مدري وين ؟
جني ست ايام عفت الطف وراي !
كمت اطش روس بثواب ام البنين
امشي واسمع حرمله يصيح بكفاي
يا شمر فتحوا التطوع من جديد
جيشنا شوية وابو فاضل هواي !!!
.
.
.
.
#شعراء_وذواقين_الشعر_الشعبي
#رفعت_الصافي
#ابو_تراب

.
ادك اباب مدحك والجفوف كصار
ما توصل وادك وتكبر الهمة
مدحك مو سهل مثل اليريد الماي
رايح للنهر بالمنخل يلمة
نصك من علي ونصك رسول الله
وحجرك فاطمة وما تنولد قمة ؟!!
.
.
.
.
#شعراء_وذواقين_الشعر_الشعبي
#سمير_صبيح
#ابو_تراب

.
طلب من الله ابو فاضل بالصلاة
ربي تأمرلي ملك ينزل الي
اني عديت المخطط للهجوم
وارد اودي للسما يقرأ علي
أولا :
راح افيي اعلى الخيم مثل الغمام
وراح اعجج كل تراب الطف حمام
راح اشيل ايدي واسلم على الخيام
كون أوشل ايدي وراها من السلام

ثانيآ :
بروح كل عطشان راح امطر برد
نسوا طعم الماي اليحلمون ارد
اطفال تعطش تذبل الموت يحصد
للسما من الطف شفت يصعد ورد

ثالثآ :
غايتي اثبت مستحيل المستحيل
وارد اشيل من الحرب حمل الثجيل
ارد اعالج فكرة الكم القليل
واوكف بطولي واخلي الطف يميل
.
.
.
.
#شعراء_وذواقين_الشعر_الشعبي
#ايهاب_المالكي
#ابو_تراب

.
نقلوا سالفة من كبر طالع ضي
هنيئا كالوا الميت مقدم شي ؟
ومن سألوا لكوا هذا البشر مسكين
زلمة بريف كاعد جان عربي الزي
بس لمن يزورك رغم ما معتاز
لطيور الضريح يجيب حنطة شوي
زين الواسه زينب هذا كبره شلون ؟
يمكن لو نخاك ترده سالم حي
علي ما ندري شنكلك
حيرة ومدري شنكلك
اسمك بالاذان نفكدة وحشة تصير
الله يعين زينب فكدتك كلك
.
.
.
.
#شعراء_وذواقين_الشعر_الشعبي
#سعد_شميل
#ابو_تراب

.
يا ابو عبدالله ننساك محال
الا يتبرأ لحمنه من العظم
وعلى اللطم يا حسينه نعلم الجهال
اخاف مرة صدورنا تمل اللطم
.
.
.
.
#شعراء_وذواقين_الشعر_الشعبي
#سمير_صبيح
#ابو_تراب

.
منو مثلي اعلى نيته شلون طير الهور
اجى بلهفة وحنين وما حضى بهوره
ومنو مثلي سكت شاف الزرع مبيوك
ودرى البوكات كلها بيت ناطوره
ولو روحي بنفسها تريد كلشي تكول
اعض شفتي واكلها الكاع محضوره
على بختج يا روحي مالي حيل الروج
وشراعي تعب والدفه مكسوره
ولا ساحل بقى وادري الصخر ميطوف
حتى اتعب وادور صخرة مشموره
.
.
.
.
#شعراء_وذواقين_الشعر_الشعبي
#سمير_صبيح
#ابو_تراب

تلاكينه بعزا والناس يبجون
وبحجة المات شكد بجينه
فشل ما نحجي بس معاتب عيون
وحجالي اعلى الزمان شعمل بينه
.
.
.
.
#شعراء_وذواقين_الشعر_الشعبي
#منقول
#ابو_تراب

.
كون اعلى صدري الليلة اخليك
وبعيني اشوف شبيك ما بيك
مغيرك فراكي لو محليك
يا الغيرك شكد وادم لكيت
ودنوني لكن ما تدنيت
لا گلبي رف ولا تمنيت
فارغ مكانك يمتى ما اجيت
.
.
.
.
#شعراء_وذواقين_الشعر_الشعبي
#عمار_سالم
#ابو_تراب

• • .
يا صاحبتها يا الوصلتي لدارها
احجيلي عنها شلونها وشخبارها
شدار الكلام ال بينج وما بينهة
شجانت تكلج هية نظرة عينهة
وشكالت وما كالت من اسرارها
يا صاحبتها عيوني ما ينسنها
خليني اشوف عيونج الشافنها
انطيني اديج اللامسن جفينها
ولمساتها الضلت بجفج وينها
محتاجهن بلكن يطفن نارها
شكالت علية شلمحت وشذكرت
ما وصتج ما سلمت معتذرت
هواي ضل من السوالف عدها
روحي الخذتها وياها يمتى تردها
لو خيروني اختار هم اختارها
.
.
.
.
#شعراء_وذواقين_الشعر_الشعبي
#جبار_رشيد
#ابو_تراب

.
اشلع ما اسد والغيهن الفتحات
الجانن بوب أمس ما اسدهن ابنيهن
والزمهن سره باب العدل والطيب
التسامح والصلح اولهن الغيهن
الحصلته شنو من جانن مشرعات ؟
يكثرن بالهلا وينطعن راعيهن
ملح ما دنكله عيونهم وكحات
شبية و وين وجهي الكهوة تثنيهن
الزمله الدرب لحد ما يجي الدوار
الكمكم والدلال كباله اخليهن
وما ألزم سعر شراي مو شراي
ابد ما اعامله شينطيني انطيهن
.
.
.
.
#شعراء_وذاوقين_الشعر_الشعبي
#سمير_صبيح
#ابو_تراب

.
اش وانتهى الموضوع ما راح اموت خلافك
يا ناكر المعروف شوفنه عرض اجتافك
كل عقلك امشي وياك هو انت ضلك عافك
كلشي انتهى ومن هالوكت ما عاش كلمن شافك
اي يا گلبي شحصلت حزنك رسالة
اي بعد من هالعشك ذب استقالة
ليش الوفي بهذا الوكت تنشر سمعته اعلى الحبل
يرتاح ابو گلب الصخر والگلبه ابيض ينوكل
المنك وبيك يخون عايش بين ذيابه
تنطعن بس تندار مثل اليعيش بغابه
كل واحد ب وجهين والله بشر جذابه
ياهو التحط ايدك علية بوجهك يسد بابه



#شعراء_وذاوقين_الشعر_الشعبي
#رفعت_الصافي
#ابو_تراب

.
.
شلون انا رضيت تسافر بعيد
وودعتك امس مدري شجاني
هداني الله وكلتلك الله وياك
انا ياريت ربك ما هداني
مابية بعد اتحمل فراك
ولا بية بعد اصبر واتاني
احس عمري بغيابك جثة تنشال
على جتاف الدقايق والثواني
يطشرني القلق بجفوف الضنون
وألم الروح بجفوف الاماني
شعجب العين ما طاحت على الكاع
لمن شافتك ب أحضان ثاني
اذا انت تحس بالغربة معذور
اليعوف ارض الوطن لازم يعاني
بس انا غريب بكل الاحوال
اذا اسافر واذا اضل بمكاني
.
.
#شعراء_وذاوقين_الشعر_الشعبي
#فاضل_كريم
#ابو_تراب

.
شكلك انا احبك والله غلطان
لان حتى ال احبك ناقصة حروف
وصل حبي الك حد ما هو معقول
بحيث وياي انت واني مشتاك
تشابكني وتشاقيني واشاقيك
واكول الله اكبر بسك فراك
ملك امشي اعلى طولي وانت وياي
ومن تبعد ادنك واخذ الراك
وبس انت عليك تشخص الناس
من كد ما حلو من بعيد تنضاك
وصاير بوك بالحب هاي الايام
لذالك ما اعوفك خاف تنباك
.
.
.
.
#شعراء_وذاوقين_الشعر_الشعبي
#عبدالحسين_الحلفي
#ابو_تراب

.
عفتوني
اعله يا سجه
انشري و انباع و اتعثر
يكون بعودي ماكو سنين
خاطر ما انبت و اثمر
افه
اتبدل
حجيكم ليش
معقوله العمر أثر
هلي
خلوا الحجي مدثر
انه شبيدي
العمر ركضه
هلي لو بيدي ما اكبر
مثل حال العراق وياي
عشت وياكم بغربه
الماي الما تحظنه جروف
ما يندل بعد دربه
اهل روحي شبلاكم
مو ابنكم طاح
لو ما ينحظن صعبه
هلي
الماله عرف بالكاع
يضل ياهو اليجي ايشربه
.
.
.
.
#شعراء_وذواقين_الشعر_الشعبي
#احمد_العبيدي
#ابو_تراب

• .
اثنينهن دمعي وضحكتي بلونها
وضايعه الدنيا بخضار عيونها
ابقى حاير بين تعبي وراحتي
روحي يمها تصير ابد مو مالتي
بية اضمها وغيري ميشوفونها
اثنينهن دمعي وضحكتي بلونها
وحدي موجود بكلبها وبالها
الله مدري شحاط فوك خيالها
ترفة تعثر بالضوة وتوكع سهر
النجمة تعرفها ويغازلها الكمر
النسمة بس عشاكها يشمونها
اثنينهن دمعي وضحكتي بلونها
.
.
.
.
#شعراء_وذواقين_الشعر_الشعبي
#علي_رشم
#ابو_تراب

.
المثلي بجنحه كون يصاحب الغيم
مو يلتهي بجرحه شلون معيوب
منين الكى ستر ما يفضح البير
وانا شفته الحجاب يفرع الثوب
اليكرهني شحلاته يغثني بالطيف
ولا يوكفلي عثرة بنص الدروب
اريد اندفن شاعر حتى ما اموت
وبگلب الاحبهم ابقى محبوب
بعين العنده كلشي شبية محسود
وانا ما عندي وامشي بطرك الاسلوب
.
.
.
.
#شعراء_وذواقين_الشعر_الشعبي
#حيدر_حطاب
#ابو_تراب

.
يوفقك الله ادعيلك بكل نفس
واتخيل انت بخير حتى اطمئن
من اشتاكلك تنعصر روحي عصر
ومدري شطلع صوت لمن أون
دربك كزاز وحافي ماكو وجع
شو غيرك اتوجع ودربه كطن !
علمني يا شباج ما بي الك
دمعة ودعاء وعصرت ايد وحزن
علمني اشوفك حتى ابطل العمى
علمني انام وما تجيني بحضن
كلما ابطل ارجع ل رحلتك
وارسب بحبك ثم ارد امتحن
بلكت بعالم ثاني من ننخلق
اختار غيرك بس اضن ... ما اضن
.
.
.
.
#شعراء_وذاوقين_الشعر_الشعبي
#ميثم_فالح
#ابو_تراب

.
ما تسوون واحد يتعب الكم
ولا جن بالشدايد واكف الكم
طحت عفتوني وحدي
وكلكم صرتوا ضدي
وانا ب اصعب ضرف ما فاركتكم
ما تسوون كل تعب التعبته
من مال الحمل عدكم عدلته
اخوكم وانتوا اخوتي
وبلوتكم بلوتي
ليش المال بدل كل طبعكم
ما تسوون اسكت ما اعاتب
واذب الصوج واصبر على المصايب
منكم كاطع اليأس
تمشون بحجي الناس
ضيم المر علية بي غربلتكم
.
.
#شعراء_وذواقين_الشعر_الشعبي
#سمير_صبيح
#ابو_تراب

ليش اسأل بعد شلي بسؤالي
بعيوني شفت محد حجالي
شفتك وكت الغروب
يمشي وياك محبوب
وتضحكون جنتوا بصوت عالي
بعيوني شفت شيصبر العيون
وغركن بالدمع مادام تمشون
ضلم لو شخص ثاني
يجي وياخذ مكاني
وكباله ضحكتك مو كبالي
ليش اسأل بعد شلي بسؤالي
.
.
.
.
#شعراء_وذاوقين_الشعر_الشعبي
#منقول
#ابو_تراب

.
لون لوحتك وردي الحياة ألوان
خلص عمرك لوحتك ملت الداكن
ولا ترسم جبل ارسم نهر بي روح
وارسم ريح بلكي تحرك الساكن
بلكي من النهر يطفح ركاد الغيض
ويطك زود ويهدم سدة ال لكن
وعلك على الوجه ضحكة وأمل بالروح
بزواية العين كافي شجم حزن راكن
وفك باب القفص خلي الاحلام تطير
وانت من الطفولة شجم حلم ساجن
ووخرها الستارة الشمس خل تفوت
ولا تخلي الجروح تبين الباطن
كلها تموت صفرة الموت هم بي لون
عاجبني الكطن للموت ميهادن
.
.
.
.
#شعراء_وذاوقين_الشعر_الشعبي
#سمير_صبيح
#ابو_تراب