.
انا بغربه وهلي عني بعيدين
شعجب من دونهم ع البال مريت ؟
انا مفتح ابوابي وما يطبون
وانت بلايا باب بعيني طبيت
بعيد وجنت اشوفك مثل العيون
وأقرب من سواد العين حسيت
تنكل صورتك تدري العصافير
ويصفطنك بعيني لون حنيت
طرت حد ما تلاشه صورة الكاع
وشفت وجهك سما وكباله صليت
بس كلي شكطع خاطر انساك
دشوف شكم گلب من صدري جريت
اخلي بخاطرك من جنت احاجيك
وانت بخاطري ما يوم خليت
كلي الخالقك جم نسخة سواك؟
اشو يا بيت اطب الكاك بالبيت
ترى انا من كثر متولعت بيك
جن وتلبست بعظاي شكيت
جابولي اليطلع يعرف الجان
غلط طلعني انا وانت ضليت
.
.
.
.
#شعراء_وذاوقين_الشعر_الشعبي
#ميثم_فالح
#ابو_تراب

.
الماي شال تراب لو مر بالتراب
ولو جره بين الصخر كلش يطيب
احنه مثل الماي صفانا العذاب
ولو شرب من ماينه معلعل يطيب
امتحنه سنينه مية امتحان
وماعرفنه شتمتحنه سنينه
نغطها ساعه والعقل عند العنان
وساعه بظهور الليالي تغيرنه
مدري احنه ندير دولاب الزمان
مدري دولاب الزمان يديرنه
.
.
.
.
#شعراء_وذاوقين_الشعر_الشعبي
القصيدة ل #صاحب_الضويري
#ابو_تراب

.
اخنك مشتهاتك حط ملح للراي
المصخ طبعه بعد ميفيد لا تملحه
عبر راي عمرك خاف يركض بيك
بيد ابليس بالك تنحسب سبحه
كاروك الوكت بالك تأمن بي
واذا مجبور نام عيونك مفتحه
.
.
.
.
#شعراء_وذاوقين_الشعر_الشعبي
#عبدالله_الشاوي
#ابو_تراب

.
انتهينا
وانتهى الما ينتهي وخلَّص حجينه
انتهينا
وبقت كَطرات الوفه المذبوح تتناثر علينه
وبقت للمجفين كوم اسرار عد روحي الامينه
وكون ندري بالعتاب يفيد بيهم عاتبينا
وكون يسوون البجي جا بثنعش ناظر
.
.
.
.
#شعراء_وذاوقين_الشعر_الشعبي
#الكاطع
#ابو_تراب

.
ما متوازي احب بس شو توازيت
غصب بية الوداد يطول ويزود
شما افردك وابعدك ضال وياي
مثل فرده ابهام من ايد مفقود
على ترابي كتبتك جانت عياي
كلام الله يمين وشاهد العود
وصلت بية اغارن منك اعليك
لحدر ضلعي يخفك وعليك ممرود
اذا نفرض مخير انت لو عين
انا ارضى انعمي بس جفك يكود
احبك من الى وانطيك تفسير
يعني من الجدم للراس مريود
علية عيون سود يمرن هواي
مثل ذني البوجهك ما شفت سود
.
.
.
.
#شعراء_وذاوقين_الشعر_الشعبي
#اياد_عبدالله
#ابو_تراب

.
بعد طابت جروحي عليمن احجيلك
ولا تلتفت خاف دموعي توميلك
هاك الما مردهن غير طاري جفاك
اخاف تموت وتدور اليبچيلك
غير الما يكسرن خاطري شخليت
وغير الما تحبهن ما مخليلك
النهر مو شك واكولن على الكناطر خيط
الجرح جازي العذر لمهن تواسيلك
شلونك لا تكلي شلوني بيا حال
ناقص عافية وبالعافية ادعيلك
.
.
.
.
#شعراء_وذاوقين_الشعر_الشعبي
#عقيل_العرد
#ابو_تراب

.
شد عصبة ابوها وياي ولغيري فلها
وصب استكان الچاي بيدة لرجلها

مسورة لمن خاط چاية وخطبها
دنيتي افترت هيج بية وگلبها

لو ما ابوها وياي ينزع كبرته
جا هسة عدنا وليد توجع ضربته

الما اخذ واختار ولفة اليريدة
من يمشي خل يشيل كافورة ب أيدة

خلها امها ما تنطيش خلني بسريري
وشيلوني من يشيل بركعها غيري

مو جنه متفقين لو عرس لو موت
بچرباية تالي تنام وتگلي تابوت

من درت وجهي عليك والويت الاصفاح
لو ما هلك صاحوك فص عيني جا طاح

.
.
.
.
#شعراء_وذاوقين_الشعر_الشعبي
#حسين_العميدي
#حسين_العجيلي
#حسام_الحمزاوي
#ابو_تراب

• .
حالف اسوي وياك وحدة بوحدة
حالف اوصلك مرحلة المطلوب دم تحسدة
ذليتني بس انا الك والمثلي مو هسة ترى
بعدين يلا تفكدة
تشتاكلي من تغمض وما تغفى
من تكتب اسمي وتجي تنام بصفة
.
.
.
.
#شعراء_وذاوقين_الشعر_الشعبي
#احمد_عاشور
#ابو_تراب

• .
انا شكد جذبت على الناس اكلهم زين
اذا سألوا شلونك تزرك الشفه
قصة منتحر تعرفني كلها تريد
من يمي اليشبهك لو عبر صدفه
ام جندي بحرب موعد نزوله اليوم
واتأخر واجاها .... تخيل اللهفه
والله لو ترد هيج اطلع اتلكاك
انا المشتاكلك يا عيب يا عفه
صيف جفاك اجى ونشفن البيهن ماي
بس جفني المبلل جيتك تنشفه
.
.
.
.
#شعراء_وذاوقين_الشعر_الشعبي
#حسين_المرياني
#ابو_تراب

• .
كالوا بالعرس طشيتي جكليت
فرحانه وترستي بركصج البيت
المهم بعدج بجينه
انجرحنا وما حجينه
اخاف احجي وتكول الناس مليت
كالوا بالعرس طشيتي جكليت
كالوا بالعرس لبست تراجي
الهي بيا ذنب يومية باجي
احب الما يحبون
عليهم تبجي العيون
اخاف احجي وتكول الناس مليت
كالوا بالعرس طشيتي جكليت
.
.
.
.
#شعراء_وذاوقين_الشعر_الشعبي
#علي_البديري
#ابو_تراب

.
خلي شوية عندك ذرة احساس
ورفقآ من تمر مرة علينه
بعد ما راوي عودك .... شيب الراس
وكضينه من الفرك راحات أدينه
مصيبة بهالعمر ومدوخ الناس
اذا تكبر سنة شتسوي بينه
.
.
.
.
#شعراء_وذواقين_الشعر_الشعبي
#عماد_العكيلي
#ابو_تراب

• • .
الما حطيتهن حطن على البال
مدري منين اجن وصلن بلا ريش
وسفينة تكول طيرة بغير جنحان
تركض على الجرف جن رايدة تعيش
وانا بنص هذا كله تمرني ذكراك
واحس العاصفة يسكن زعلها
وانسى حبال ب أيدي وانسى الشراع
وربك جنت افز والا انا احلها
اضن من صورتك ضل چلبت بي
بس جانت ضلام شلون ضلها
وارد انوب اشوفك مو مثل ذيج
الشوفه الگبل لحظة لا مثلها
لا ثلث القصايد تنكتب بيك
لا نص القصايد والله كلها
.
.
.
.
#شعراء_وذاوقين_الشعر_الشعبي
#ميثم_فالح
#ابو_تراب

.
دربين صار الدرب
والعين تفزع دمع كون الخشم ينطك
المطلوب دين و وفي
جف اعلى صدره يدك على الباب من يندك
وبركان عندي الحجي
بلساني اذا ينفجر ابقى احجي طك بطك
.
.
.
.
#شعراء_وذاوقين_الشعر_الشعبي
#سمير_صبيح
#ابو_تراب

• .
شكد جنت محتاجك ردت بس تسأل
من جنت ادور بالصور صورة حل
راجعلي متأخر بعد وكتك راح
بذاك الوكت لو جاي كتال اقبل
تموتني بيدك مرة وحدة وارتاح
احسن ولا كل يوم اموت واعدل
من كتلي رايح طحت وي دمعي الطاح
مبتسم بس بگلبي جنت اتوسل
ويومية جاي بجرح وانا اتحمل
واربع مواسم وانا وياك اذبل
بجيتني لحد ما طحت من عيني
أذيتني وما عاش الي يأذيني
بس انت كتلك روح انت وربك
وهواي اجوني توسطوا رادوني ارجع حبك
جا هو اعز منك منو ؟ ولخاطرة اغفر ذنبك
.
.
.
.
#شعراء_وذواقين_الشعر_الشعبي
#عصام_كريم
#ابو_تراب

.
جنت بالروح هسة اطلع الروح
كرهتك كد معزتك كبل واكثـــر
خط كحلة جنت من عيني لليل
قبل من جنت بالراس تفتــــــر
رجلك بالرمل شحة نخل بيك
اذا تمشي بحديقة الورد يحتـر
صوجك صوفرت بجيت فلاح
لو تشرب نهر ماترجع اخضــــر
مبلل بالزعل متحلف انساك
دمعك ع الكلب لتضنة اثـــــــر
وفة العباس بية ناوي اشلعك
مثل ماشلع حيدر باب خيبــــر
كلتلك خلي خلي بظهري حملين
وانتة بلا حمل خليك على البــر
خليت الحمل رديتة بالكاع
نكتت ايدك كمت خليت خنجـــر
.
.
.
.
#شعراء_وذواقين_الشعر_الشعبي
#علي_الشمري
#ابو_تراب

.
دليتك اعلى الفرح يا العلمتني البچي
لو تدري يا صاحبي صدري شكثر بي حچي
من كثر ما مبتلي لساني بسكوته اكتفى
ومشكور ما قصرت فضلك بيش انصفه ؟!
بصدري غرزت الرمح
وتحطلي سم على الجرح وتكلي بيه الشفى
بكل هذا ما يقتنع گلبي ويحسبك وفي
شكد غشيم الگلب يترجى منك وفى
.
.
.
.
#شعراء_وذواقين_الشعر_الشعبي
#شاكر_التميمي
#ابو_تراب

.
الحفظ ماي الوجه رديت عطشان
و الا جان بمكاني اشرب البير
القفص طيب گلب ضم عبه عصفور
بحيث ضلوعة اذا طكيتها يطير
لحد هسة وحياتك حسرة بالروح
ما احجيها اخاف اعلى العصافير
بحيث دموعي اذا تلضمهن بخيط
علية اعتب اذا مو مسبحه تصير
اذا ناوي اعلى غيري تروح مبخوت
الله وياك روح بدون تبرير
ما متوازي الزمك بس اوصيك
لا تختار واحد مو وجه خير
.
.
.
.
#شعراء_وذواقين_الشعر_الشعبي
#سيف_زبون
#ابو_تراب

.
يا حلوة الزعل طول ... صاحبينه
وبهجرج ما ضل عظم ... صاحي بينه
چنه برضا وجانت ... صحة بينه
وزعلتي وزعلت الصحة علية
.
.
.
.
#شعراء_وذاوقين_الشعر_الشعبي
#صباح_الهلالي
#ابو_تراب

.
خناجرهم عكل وبظهري جم ديوان
وملكاية هلا وملوحة المعدان
يتلوى ترى ما يركص الفنجان
جبروا على الفركة ويتلوة
ما احب الجرس جة يحجي من ينطك
وعشك شايب جرحي بعمرة ما يعتك
كضى عمرة ركض بس هو ما يلحك
الميل شمالة يذل روحة
صحباني لسنهم وي ظهري رموش
وانا ظهري عصب مو زرع حتى تحوش
طحت مامش ايدهم والعيون تروش
على الكاع وكالوا شيلوحة
.
.
.
.
#شعراء_وذاوقين_الشعر_الشعبي
#علي_خلف_الدريساوي
#ابو_تراب

.
شفت عصفور ميت كل جرح مابي
كلت هذا المنية شلون واصلته ؟
شلت راسي وشفت على الشجرة عش محروك
كلت هذا السبب والحركه كاتلته
.
.
.
.
#شعراء_وذاوقين_الشعر_الشعبي
#سمير_صبيح
#ابو_تراب