#tafakkur

Кулдирган ҳам, йиғлатган ҳам Унинг ўзидир

“Албатта, кулдирган ҳам, йиғлатган ҳам Унинг ўзидир” (Нажм сураси, 43-оят).
Кўпчилик бу оятни яхшилаб тафаккур қилиб кўрмаймиз. Лекин бу оятда энг катта мўъжизалардан бири айтилган. Аллоҳ таоло “Албатта, кулдирган ҳам, йиғлатган ҳам Унинг ўзидир” демоқда. Яъни, йиғи ҳам, кулгу ҳам аслида Аллоҳдан бўлади.
Аллоҳ таоло кулиш ва йиғлаш сифатини ҳаммага берган. Берганда ҳам бир хил қилиб берган. Дунёда “инглизча кулгу” ёки “африкача кулгу” деган нарса йўқ. Ҳамма бир хил кулади ва йиғлайди.
Агар йиғи ёки кулгуни ҳар ким ўзи пайдо қилиб олганида ҳамманинг кулгуси ёки йиғиси ҳар хил бўларди.
Кимдир: “Ҳамма ҳам бирдек кулмаслиги ёки йиғламаслиги мумкин-ку? Баъзилар кулса, айримлар умуман кулмаслиги мумкин” деб айтиши мумкин. Ундай инсон оятни яхши англамаган бўлади. Оятда “Албатта, кулдирган ҳам, йиғлатган ҳам Унинг ўзидир” дейилмоқда. Ҳаммани кулдиради, ҳаммани йиғлатади деган маъно йўқ. Аксинча инсон йиғлаганда ҳам, кулганда ҳам ўз ихтиёри билан эмас, балки Аллоҳнинг изни ила йиғлайди ёки кулади. Бу масалага инсон ихтиёрининг алоқаси йўқ. Ҳеч ким “мен ҳозир табиий кулиб бераман” ёки “таббиий йиғлаб бераман” демайди, бундай қила олмайди ҳам. Балки шунчаки ёлғондан кўрсатиб бериши мумкин.

Шайх Муҳаммад Мутавалли Шаъровийнинг
“Аллоҳнинг борлигига ақлий далиллар” номли китобидан олинди.

🌐 https://t.me/+ZgkOZopwJwc3ZWEy

#tafakkur

Барча яхшилик Сенинг қўлингда

Инсон ҳаёти Аллоҳнинг измидадир. Ўзи нимани хоҳласа шуни қилади. Аллоҳ Ўзининг борлигини ҳамма ерда, ҳар соҳада кўрсатган. Уларга бироз эътибор қаратсак кифоя. “Ўзимга ўзим хўжайинман” дейдиган инсон нега касаллик келганда “мен ўзимга ўзим хўжайинман, шунинг учун касал бўлиш ёки бўлмаслик ўзимнинг қўлимда” дея олмайди?! Нега ўлим келганида “мен ўзимга ўзим хўжайинман, шунинг учун ўлиш ёки ўлмасликни ўзим ҳал қиламан” дея олмайди?!
Шундай экан, ўзимизга ўзимиз хўжайин бўла олмаслигимизни яхшилаб англаб олишимиз керак. “Бундай қиламан, ундай қилмайман” деб айтмаслик керак. Чунки пешонамизга битилгандан бошқа ишни қила олмаймиз ва бизга бундай имконият берилмаган. Хоҳлаймизми йўқми Аллоҳ нимани ёзган бўлса шу бўлади. Айримлар: “Кучли инсон ўз тақдирини ўзи яратади” дейди. Лекин Аллоҳ таоло уларга қуйидагича раддия беради: “Сен “Эй барча мулкнинг эгаси Роббим! Хоҳлаган бандангга мулк берурсан ва хоҳлаганингдан мулкни тортиб олурсан, хоҳлаган кишингни азиз қилурсан, хоҳлаган кишингни ҳор қилурсан. Барча яхшилик Сенинг қўлингда. Албатта, Сен ҳар бир нарсага қодирсан” деб айт” (Оли Имрон сураси, 26-оят).
Яъни, ҳеч ким ўз хоҳиши билан мулкидан ажраб қолмайди, балки ундан тортиб олинади. Қанчадан-қанча дунёга устун бўлишни орзу қилган бойлар ўтган. Бойликларини ўз қўлларида деб ҳисоблашган. Мулкларини ўзлари хоҳлаганча тасарруф қиламиз деб ўйлаганлар. Бироқ Аллоҳнинг тақдири бўлиб ўзлари хоҳламасалар ҳам мулкларидан, бойликларидан айрилиб қолишган. Дунёга устун бўламан деганлар, бутун бойлигини сарфлашга рози бўлсалар ҳам жонларини ўлимдан қутқариб қола олмаганлар. Қутқара олмайдилар ҳам.

Шайх Муҳаммад Мутавалли Шаъровийнинг
“Аллоҳнинг борлигига ақлий далиллар” номли китобидан олинди.

🌐 https://t.me/+ZgkOZopwJwc3ZWEy

#tafakkur

Бир сония олдинга ҳам, ортга ҳам суриб бўлмайди

Инсон ўз хоҳиши билан умрини бир сонияга ҳам узайтира олмайди. Гарчи табиблар унга соғлом деган ташхисни қўйишган бўлса ҳам Аллоҳ тақдирига битган умрнигина яшайди. Ҳаётда соғлом дейилган одамга тўсатдан ўлим келади-ю кейин “мияга қон қуйилиши оқибатида ўлибди”, “юрак хуружи бўлибди” деган гапларни кўп эшитамиз. Лекин булар сабаблар холос. Ҳақиқий сабабчи эса тақдирга битилган ажал бўлади. Аллоҳ таоло бундай марҳамат қилади:
﴿فَإِذَا جَاءَ أَجَلُهُمْ لَا يَسْتَأْخِرُونَ سَاعَةً وَلَا يَسْتَقْدِمُونَ﴾
“Агар ажаллари келса бир муддат орқага ҳам, олдинга ҳам сура олмаслар” (Аъроф сураси, 34-оят).
Демак, кимнинг вақти соати етган бўлса, вафот этади ва уни вафот эттирган эса фақатгина ёлғиз Аллоҳдир.

Шайх Муҳаммад Мутавалли Шаъровийнинг
“Аллоҳнинг борлигига ақлий далиллар” номли китобидан олинди.

🌐 https://t.me/+ZgkOZopwJwc3ZWEy

#tabrik
🌙 АССАЛОМУ АЛАЙКУМ, ЖУМА МУБОРАК!

🌐 https://t.me/+ZgkOZopwJwc3ZWEy

#tafakkur

Вақтни бошқара олмайсиз!

Атрофимиз ажойиботларга тўла. Энг катта юрак шифокори бирдан юрак хуружидан вафот этади. Инсон миясини даволовчи энг катта табиблардан бири айнан миядаги касаллик туфайли ҳаётдан кўз юмади. Сиз ўзингиз яшаётган замонга эгаман деб ўйлайсиз. Ҳатто бошлаган ишингизни битиришга шак-шубҳа қилмайсиз, лекин нимадир бўлади-ю ишингиз чала бўлиб қолаверади. Ҳатто ўша ишнинг устаси бўлсангиз ҳам.
Энди вақт ҳақида гаплашсак. Вақтни бошқариш қўлимизда эмас. Аксинча биз замоннинг измида юрамиз. Чунки баъзан ишимизни бошлаганимизда нимадир бўлиб охирига етмай қолади. Яъни, режалаган ишимиз биз истаган вақтда бўлмайди.
Дейлик, яқин қариндошингиздан кимдир тўсатдан вафот этди. Ёки бирдан шошилинч сафарингиз чиқиб қолади. Шундай қилиб, хоҳлаган ишимизни хоҳлаган вақтда бажара олмаслигимиз ойдинлашди. Бу эса замон бизнинг бошқарувимизда эмаслигини билдиради.

Шайх Муҳаммад Мутавалли Шаъровийнинг
“Аллоҳнинг борлигига ақлий далиллар” номли китобидан олинди.

🌐 https://t.me/+ZgkOZopwJwc3ZWEy

#tafakkur

Роббингизни эсланг!

Ер ҳам бизники эмас аслида. Мисол учун, бир ерни танлаб у ерга бино қуришни бошладингиз. Кейин бирданига у ернинг ҳақиқий эгаси чиқиб қолади ёки бошқа бировга ўтиб кетади. Ё бўлмаса ер остида намлик аниқланади-ю, ўша ер бино қуриш учун салоҳиятсиз дея баҳоланади ва сиз ният қилган биноингизни битира олмайсиз.
Баъзида ҳаммаси яхши бўлади-ю ўртадаги воситачилар панд беради ёки ёрдам бериши керак бўлган одамлар ўз вақтида топилмай қолади. Топилса ҳам нимадир сабаб бўлиб вазифасини бажармайди. Бундан маълум бўладики, инсон бир ишни қила олишида ҳеч нарса, ҳатто ўзи ҳам ўзининг измида бўлмайди, ўша иш юзага чиқадиган муҳитда барча нарса унинг хоҳишига боғлиқ бўлмайди. Шунинг учун ҳам, Аллоҳ таоло бизга бу масалада ҳам одоб бериш учун қуйидагича марҳамат қилади:
﴿وَلَا تَقُولَنَّ لِشَيْءٍ إِنِّي فَاعِلٌ ذَلِكَ غَدًا إِلَّا أَنْ يَشَاءَ اللَّهُ وَاذْكُرْ رَبَّكَ إِذَا نَسِيتَ وَقُلْ عَسَى أَنْ يَهْدِيَنِ رَبِّي لِأَقْرَبَ مِنْ هَذَا رَشَدًا﴾
“Бир нарса ҳақида “Мен албатта ўша нарсани эртага қиламан” демагин. Балки “Аллоҳ хоҳласагина (қила оламан)” дегин. Ёдингдан кўтарилса Роббингни эслагин ва “Шояд Роббим бундан ҳам тўғрироғига яқинлашишим учун мени ҳидоят қилса” дегин” (Каҳф сураси, 23-24-оятлар).
Яъни, агар шайтон ҳамма нарсанинг ҳақиқий эгаси ким эканлигини унуттирса сен Роббингни эслагин.

Шайх Муҳаммад Мутавалли Шаъровийнинг
“Аллоҳнинг борлигига ақлий далиллар” номли китобидан олинди.

🌐 https://t.me/+ZgkOZopwJwc3ZWEy