#GroupB #community
حضرت مع الجامعه وخذيت مع د.سند الورفلي الحق نظملي افكاري بكل والكومبينيشن الي درته بينه وبين الجامعه دار نتيجه لان في حاجات واجد تحلهن بشرح الجامعه وبرضو حاجات واجد ركزلنا عليهن دكتور سند فالشرح جن ف الامتحان يعني لولا تركيزاته كان ممكن يفلتن منّا
بالنسبه للامتحان الحق جا صعب بكل بكل وفي حاجات مستواهن اعلى حتى من مستوى شرح الجامعه هذا بالنسبه لل MCQ اما بالنسبه لل T&F جا نسخ لصق من شيتات الجامعه اهااا صح لما تحلو اسئلة القروبات الي قبلكم توقع ان امتحانك يجي ليڤل اعلى بواجد

+ماتعبوش ع سند بس وماتعبوش عالجامعه بس ،خلطوو

#GroupB #community
قروب B كميونتي
نصيحتي الاهم ما تقروش مع دكتور واخذ هرجة و شو عالفاضي بدون ذكر اسماء.. ندمت اني سمعت كلام قروب A اللي اصلا امتحانهم جاي مستواه ساهل بكل مقارنة بامتحاننا اليوم و اوهمونا انه من الدكتور هذا و مكثفاته و مراجعاته و و ..الحق هو تاعب و باذل جهد لكن مش كافي و ماعندش خبرة في توصيل المعلومة ولا في ربط المواضيع ببعضهن و ترتيب المعلومة في راسك
الا فالمواضيع البسيطة اللي مارات علينا من قبل شارحهن كويس ..اي حاجة معقدة تبي تظطر ادور مصدر اخرى ولا جيميناي و تقعد اترجم ف طلاسم المادة لأن هو يترجم بالقطعة مش حرفيا (و هذي مشكلة عانينا منها اليوم فالامتحان الدكتور اللي يشرف يبرم و يترجم )هذا غير طول فيديوهاته و تسجيلاته
و اسئلة واجد اليوم مرن عليا مش عاطيهن او ممكن قايلهن فالفيديوهات الاساسية الطويلة المملة اللي ما قدرتش نكملهن و قريت باقي المنهج من المكثف اللي مفروض شامل لكن مش مذكورات المعلومات فيه
عموما ما ننصحش بيه و هي مادة اصلا مملة و معقدة و تبي شغل اكثر من الدكتور اللي يفكر يعطيها و مجهود من الطالب ف الافضل ان تحضروا مع دكاترة الجامعة و تعتمدوا على ارواحكم و على جيميناي لأن هك هك ح تردوا عليه و كان دورتوا تشتركوا اشتركوا مع حد خبرة

بما ان كملنا اجمل روته🥹 العيون وطلعت حتى النتيجه حنحكيلكم عليها بالتفصيل
اول شي القسم من احسن الاقسام اللى شفتهن فالطب البشري نظام ودكاتره تبارك الرحمن ماشفتش دكتور ما يشرحش كلهم شرحهم تبارك الرحمن وملتزمين بالمواعيد عيبها الوحيد طلعت كل يوم 🤭🤣
حضور اجبارى وينادوا بالاسم🫢
لاكن قاعات فيهن مكيف اطمنو🥹 بالنسبه للمصدر خذيتها مع مُعز تسجيلات من 2020 لاكن فيهن الزبده كلها ووافيات وكافيات
بالنسبه لاى حد بيبدا فرونسك قبل العيون ف نصيحه لوجهه الله ابدا مع الفرونسك عيون لو تبي تاخذ مع معز تسجيلات طويل قريب 70 ساعه لاكن تطلع فاهم وحافظ وحال الغايه تشغل يدك معاه حتلقى روحك مراجع المنهج عشر مرات قبل ما تقراه

النصيحه الثانيه الشيت اللى تكمله نظرى شوف سلايداته مع معز

اما بالنسبه لشيتات السلايدات والشرح ف معتصم تبارك الرحمن مكفى زموفى كشيتات وكشرح نصيحه تابعوا معاه سلايدات

الاهم من هضا كله حاول بقدر المستطاع انك تكرر سلايدات تكررار نين تعرفه تكرار لان اول مرة حتلقوهن صعبات الثانيه يخفن الثلاثه تلقى روحك تعرفهن بس تبي الكلام اللى عليهن ف ثبتوا سلايدات اهم من اى شي


بالنسبه لشيتات د.معز وتسجيلاته وقناه د.معتصم حنزلهن توا

#موفقين

#GroupC #ophthalmology

#ophthalmology #GroupC
اكبر غلط يديرو فيه طلبة لما يقروا عيون أن يكبر الموضوع وهو اصلا جزئي. يعني عندك سلايدات 5 و شورت نوت وخمسه وصل تمشي تعدي تسمع منهج كامل ومحاضرات 3 ساعات ليش؟
العيون خليك مركز مع السلايدات وعامل السرعه عامل مهم اما مع من تسمع الي أسع لان الفاينل عليه 5 شهور ومزال حتى لو أسبوع تسجيلين تقعد مكمل منهج فاينل. لكن تقعد تضيع في وقتك في جزئي تجري ورا كورسات وهذا كله عشان شورت نوت واحد. فلذالك موضوع غلط وهذا ليش الأغلب يشكي مافش وقت.
موفقين

#GroupC #ophthalmology
بالنسبة ليا قروب C حضرت مع دكتور علي محمد شرح مش طويل وجميل وشارح كل شي مطالبين بيه اللهم بارك وتفهم منه ، وعندك كورس السكوينت حضرته مع مجدي عاليوتيوب لانه استصعبته شوي ، اما الباقي مكفي وموفي لان هي روته شهر وفكرة انك تسمع كورس واحد مدته فوق من عشر ساعات هذي مقدرتش نستوعبها
عندك بعدين post graduate دير اللي تبيه ، اما توا اتكبرها تكبر الموضوع مش مستحق شوف مصلحتك وين ماتمشيش ورا القطيع ، الا لو انت سوبر مان ومنظم وقتك بطريقة ما ،
بالنسبة لطريقة القراية مفروض من بداية الروته تبدا تقرا وتثبت منهجك ، والسبوت يلتمن في يومين كقرايا ، ويفضل آخر اسبوعين تقعد تثبت اللي قريته وتكرر السبوتات لان حتفرق معاك ، بالنسبة للسبوت سمعته مع معتصم ، وكان في سبوتات جن من المراجعه اللي داروها ، عندك محاضرات التوتويال الحق الاستفاده كانت ضعيفه بالنسبة ليا يمكن دكتورين ثلاثه استفدت منهم ، بالنسبة للتيتشينج يفضل تقعد ماشي في المنهج شويا عشان بعد يشرحوا عالpatient تقعد فاهم شنو معنى الكلام اللي يحكوا ، والحق اكثر حد استفدت في التيتشينق دكتورة زهى توريك كل حاجه وتخليك اتشوف بروحك ، وبس ان شاء الله بالتوفيق جميعاً يارب.

#GroupF #gyne
السلام عليكم
بنحكي ع روته القايني

نصيحتي أن كل مجموعه ادير جدول بالمواضيع الي مقررات
بحيث أن بعد تنتهي الروته تقعدوا خطمتوا ع جميع المواضيع
ولما تاخذوا موضوع خلوا الدكتوره تنهيه للآخر فيه معلومات مرات تكون ناسيتهن أسألوهن انتم

من بدايه ماتجي للمستشفى لين تطلع وشنو الادويه الي نعطوهن
والجرعات وبعد العمليه شنو نعطوها
راجعوا الموضوع قبلها بيش توصل المعلومه بشكل أفضل

والهستوري اغلب الحالات PP فلو تبوا موضوع جديد ومش لاقيين حاله
خوذوا هستوري ضروري من أي حاله لأن مرات الدكتوره تقول أن لازم منه وخلوا الشرح ع الموضوع الي تبوه انتم عادي

وبالنسبه لحالات القايني مره ف الاسبوع خوذوا الهستوري من البرج الثالث الدور الثالث

🔴 الهستوري خوذوه قبل مايجوا الدكاتره لأن فيه دكاتره يهزبوا لما يلقوكم مش واخذين

#GroupC #ophthalmology
السلام عليكم
Group C
Ophthalmology
العيون مهما شفت من دكاتره مفيش اقوى من دكتور معز
اساس وفهم وحفظ
اشتركت معاه منصه وكتابه فقط
ونظام شرحه يشرح ع سلايد
ف مكنش عندي مشكله ف سلايدات بكل
ننصحكم بيه
بس يبي وقت ف افضل تبدو بيه مع فرونسك
من اقوى دكاتره والله الله يبارك ف علمه🤎.
في دكاتره اقل وقت
بس اللي يبي اساس وفهم ويجاوب صح معز
اغلب قروب كان نادم انه م خذش معاه من الاول
وامتحان كان نزيك الحق🤎.

#GroupC #ophthalmology
السلام عليكم انا روتة c كاين عندي عيون

الروتة كمجمل نزيكة و سمحة و معلومات تستمتع و انت تقرأ فيهن بس متعبة الحق و التعب يكمن في حاجتين ، الحضور 4 ايام و انك لازم ما تزر نفسك و تقرأ،
نصيحتي ما تهملوهاش و حاولو تخشوا للتيتشينق و عندكم اكبر كمية من المنهج بيش تفهموا الكلام اللي ينقال و يكون نظام مراجعة لكم ، ننصح بحضور المستشفى جدا جدا جدا اولا لانه المكان مريح و ثانيا أغلبية الدكاترة يعرفوا يشرحوا بس ردبالكم تفوتو شرح د.رحاب و د.مجدي الشحومي و يقولو راه شن المهم و شن اللي خاش، بنسبة ليا قريت مع معز صح يشرح في ساعات واجد بس يأسسك صاح و يخليك فاهم ليش النملة دبت كراعها ، بس اعتقد في شوية تغيرات لانه الجامعة شارحة شيت التروما و مختلف عن شيته، بنسبة للامتحان ف كان واضح بس سؤال الشورت نوت كان مش متوقع مع انه جاي من قبل مرتين 😭 الخلاصة اقروا الامتحان بذكاء اضمنوا السلايد و الشورت نوت و الوصل حتى بالفهم صاحبي ماقرش منهج و جاب 18 و موفقين جميعا

#gyne
السلام عليكم انا اول روتة قايني طبعا شهرين حضرو اجباري + عندك برزنتيشن و 5 cbl الروتة طويلة و الحضور متعب بس لازم قراية من الاول و تعرف تاخذ هيستوري اهم شي و تكون فاهم لما الدكاترة يشرحو عشانهم يشرحو كأنك فاهم طبعا في دكاترة واجد في القسم شرحهم خيالي من ضمنهم محمد رافع و ميلاد القهواجي و مريم التواتي و حنان الشكري و زينب ساطي و نهى مخلوف و نجلاء العقوري و اغلب دكاترة القسم شرحهم جميل جدا حاولو تدربو حتى ع الاكزامنيشن خلال الروتة بالنسبالي اشتركت مع دكتورة انتصار شرحها فوق من الخيال و شيتاتها حلوة بكل و عندها شيتات اوسكي لمن الدنيا قبل الامتحان و اخر اسبوعين قبل الامتحان دارتلنا تدريب ع الهستوري لايفات يوم بعد يوم + جابتنا معهد ادربنا اكزامنيشن و صراحة دكتورة اكتف معانا ع التلي و ترد ديما في اغلب الاوقات و اي حاجة مش فاهمتيها تشرحه بقلب و رب صراحة مقصرتش بالنسبة للامتحان الجزئي اوسكي خمس لجان اسئلة مباشرة و المهم المهم
لجنة هستوري جتني abdominal pain in late pregnancy
لجنة اكزامنيشن
لجنة emergency كانت ع ال eclampsia
لجنة ال labour كانت اغلب الاسئلة cs
لجنة ال management كانت ع ال ectopic pregnancy

#GroupB #community
قروب B كميونتي
بنسبه لمادة الكميوتني ح تقدرو تقروها وتراجعوها بأذن الله، ماكنتش متوقعه ان الوقت يسدني بس سد الحمدالله
القصه كلها ف ان القسم يركز ع تفاصيل التفاصيل من اول حرف لأخر حرف في الشيت لان يبو يحاولو مايكرروش الاسئله 🙂ماتسيبوش شي حتى اسماء العلماء والتجارب 🤣
ك مصدر قريت مع دكتور سند الورفلي من محاضراته الاساسيات وتبارك الرحمن ع شرحه مبسط بكل ويوصل المعلومه

#GroupA #radiology
نصيحة زميلتي قروب A أشعة :
نصيحه اقرو الاهم كورسات الكبار من بدايه ابدو فيهم ماتهزوش
Respiratory وًGit و bone و cns
كانو 5 سبوتات من كل كورس
تقريبا cns 4 هو و رينال
‏أما كورسات يعتبرن متوسطات زي nuclear medcine و orbit و vascular مابين 2 ل سبوت واحد
Breast واحد

و دكاتره الجامعه لي شرحهم كويس زي د محمد الوافي شرحه نزيك
د امنيه بن شتوان و د ناديه بن جويرف ماتسيبوهش محاضرتها
د وفاء كورس قايني
د طه حيعطي spine
د حواء هوله حتعطي كورس Git كويس شرحها

و الاهم اخر اسبوع خلوه للحفظ وًتكرار تكرار عشان تتعودو عليهن

بالنسبة للي سألوا عن كتاب معز

الكميونتي اهم شي التزمو بالهدوء و تعانو معاهم زي قروب A
عشان ميصيرلكمش زي قروب B ✨️

عن نفسي مصدري من الخاص استفدت منه ممكن في 3 مواضيع بس
بعدها لقيت الوقت الي خذاه نقدر نقرا فيه

محسيتش ان زادني حاجة بما ان نحضر فالجامعة
في مواضيع معينة تحتاج شيت اخر منهم اتابع بيه بس كشرح لا

كملتها مع Gemini اشرح و وضح و بسط و تحملني الحق
مع ان كنت نقول ميف يقرو فيها هك بس مشت
و شوف mcq قبل يوريك شن يبو منك فالشيت بعدها خش فيه
الدكاترة غالبا يقولو شن يبو منك و اقل شي نقطة مهمة
اغلب الدكاترة كويسين بس طبيعي تطلع في كلام مبهم تجتهد فيه بروحك
اهم شي تعاونو معاهم

#community #GroupB

#GroupC #ophthalmology
عيون قروب c
روته صعوبتها هى كميه المنهج في وقت يعتبر قصير عليها
بذات ان اغلب النظري عطوه في شهر ثمانيه
الافضل ان تبدي سلايد ع شان وقت الكلينك يقعد عندك فكره على الي ح تشوفه لو بديتوا كلينك الافضل تقروا قبلها ع شان تفهموا وتستفيدوا من الشرح

الدكاتره الاغلب كويسين كلينك في دكتور صحبان كويس مجدي شحومي ممتااز والبرغثي حتى هو و دكتوره اميره شرحها كويس الدكاتره الي يشرحوا سلايد وتتوريال حتى هم الاغلبيه كويسين

في الامتحان
اهمم حاجه ان تقرا سلاايد ويثبت كويس والاحسن تبدوا فيه بدري معتصم الورفلي كان شرحه ممتاز فيهن والشورت نوت السابقات متاع معتصم ومختار و الوصل متاع علي محمد

بالنسبه للشورت نوت شوفوا القروب الي زيكم الدفعه الي فاتت شنو الموضوع متاعم واقروه لان نحن قروب cدفعه 49 جاهم definition of amblyopia ونحن جانه الtype of amblyopia


نفس الفكره في قروب Bوكان الموضوع ptosis
ف ممكن تصدف حتى مع قروبكم

الوصل كان على الglucoms

السلايد واضحات
وقت الامتحان كان نص ساعه وكان كافي جدا والسلايدات لما يكملوهم يعاودوهن من جديد ع شان تراجعوا والقاعه مكيفه

قرايه المنهج واجد يشكروا معز بس مشكلته الوقت
دكتور مجدي على اليوتيوب شارح كم موضوع وشرحه ممتاز بس لازم لما تكمل معاه تقرا حتى شيت الجامعه
دكتور محمد علي المكثف متاعه كويس بكل ويلم
في دكتور على اليوتيوب مصري اسم القناه brufen

#GroupB #community
🌸 بالنسبة للحضور احضروا، أغلب الدكاترة كويسين وحتلقوا جزء كبير من الشيت انفهم غادي

استغلوا حماس البدايات في شيتات الاونلاين وشيتات الأمراض قبل ما تخشوا جزئية family medicine وما يتبعها حتلقوهن مملات شوي. ف ما تبدوش فيهن ترقالكم من المادة وتكتشفوا أنهن ما يحتاجنش هذك المجهود مقارنة بالأمراض
والأمراض هنا نقصد اللي حتلقوهن اونلاين + endemic in Libya: plague , TB
- - -

🌸 بالنسبة لشيتات التطعيمات
- Vaccination (online)
- EPI and cold chain
- Under 5 clinic
حاولوا تقروهن في وقت متقارب لبعضهن عشان حتلقوا في شوي اختلافات بحكم جدول التطعيمات الليبي تغير في السنوات اللي فاتن، وبرضو حاولوا توصلوا لحل نهائي فيهن بين الدكتورتين رشا الهواري وأسماء بورويص في بداية السنة.
- - -

🌸 عندكم شيتات فيهن إحصاء وشيتات مسائل الابيديميولوجي،
بالنسبة للإحصاء
Descriptive statistics هذا تافه حرفيا قاعد زيادة عدد

Inferential statistics
Bivariate analysis
هذينا يدوخن وفي اللي ما قراهنش من قبل ولا سمع بيهن في الإعداد والثانوي حيعطيهن السنوسي ، بالنسبة لنا جانا في ضي مقطوع وحمو ف ما عرفتش نركز معاه وما استفدتش

Analytical epidemiology حتعطيه دكتورة منيرة متوسط إلى حد ما بس حاولوا تجوا وانتوا فاهمين شن انواع الريسيرش أساسا زي كوهورت وكيس كنترول عشان ما تحوسوش في المحاضرة

Epidemiological Frequency measures حيعطيه السنوسي مع شيت الاحصاء متاعه ويعتبر سهل ونصيحة احضروا معاه وافهموه معاه

ويا ريت شيتات السنوسي تقروهن طول بعد المحاضرة بيش تتذكروا شرحه وما تقعدوش تدوروا في مصدر آخر ، لأن أغلب المصادر الأخرى يا شارحين أكثر من المطلوب يا أقل من المطلوب
- - -

🌸 فيه واجدين قروا من ال AI ، بس لو عابيين عليه معناها أول بأول لأن زي ما عارفين فيه daily limit وما تقدروش تلموه كله في ليلة الامتحان بيه وإلا حينقلكم على model أضعف ويقعد يدير في أخطاء

ال AI عندكم تشات جي بي تي أو جيميناي تسألوه عالنقطة اللي مش واضحة، وعندكم Notebook Lm هذا يدير فيديوهات وأسئلة وملخصات تستفيدوا منهن بس ما يقدرش يgenerate أكثر من 3 ملفات في اليوم.

- - -
🌸 الحاجة الأخيرة وقالوها قروب A قبلنا: حلوا أسئلة قد ما تقدروا طبعا لأن فيه حاجات فعلا تكررن

🌸 شفت Osmosis لبعض شيتات
Inferential statistics
Epidemiological Frequency Measures
Analytical epidemiology
Vaccines
خاطيها كله جامعة و AI

#GroupB #community
هنقولكم على ملخص روته الكميونتي بالنسبه ليا شخصيا وكل حد وتجربته
وبالنسبة اللي صار في إمتحان ✨

الحق هيا مادة متفهمش شن مغزاها وشن تبي وتحس روحك تبحت في كورسات والشيت وتقول شن نقرأ وشن نخلي تنحفظ ولا تنفهم نا كملت روتتها ومش عارفه كنها هك 😕،

بالنسبه للشيتات ف تحسهن معاش بيكملن بس يلتمن ودكاترة الجامعة في منهم المممتاز والكويس وهكذا
في دكتورة نادية الدروقي هذي دكتورة متتفوتش بكل بكل والآخرين بروضوا الحق ف اي شيء يقولوه مهم اكتبوه وركزوا عليه 🥹💗
بالنسبه للحظور ف ركزوا عليه وكانوا يسجلوا ودققين لكن هل حد انحرم من إمتحان ف لا.
وفي زيارات ميدانيه في مستشفيات آخر أيام احضروهن حلوات،
أما بالنسبه للمصادر الخاصة ف في د. خليل وفي د. البرعصي وفي د.سند؛ كل حد ومع من ينسجم ويتريح
أنا شخصيا اشتركت مع د.سند ولا انزهيه ع الدكاترة الآخرين ولكن كان مصدر يشرح من شيتات الجامعه ويترجم ويعاود ويفهمك وبعدين دار مراجعه للقروب في آخر آيام واحتي هيا لا يعلى عليها من ناحية المهم كله عطاه فيها وحجات واجد جن والحمدلله وبرضوا كل حد وين ينسجم زي ما قلنا💗.

أما أخيرًا وليس آخرا إمتحان اليوم أعوذ بالله منه كان صدمة بصراحة لنا قروب B كنا خاشين متوقعين شيء وطلع شيء آخر في أسأله ينحلن ساهلات وفي أفكار واجد واحصاء واخذه وضعها بشكللل ومصطلحات المادة هنا لي يتعبنك ف حاول اترجم وتكرر وتحل اسأله واجد بحيث تتعرض لأكبر قدر منهن لأن نحن اليوم كم كلمه ونحن نسألوا في دكتور عليها وبارك الله فيه الحق مقصرش،

ف بس مادة تبي قراية من بداية روته وحفظ بشكل أكبر وان شاء الله موفقين ويكون امتحان القروبات الجايه أحسن 💗✨


ولي يبي أي سؤال يتفضل 🥹🦋

Community نصائح
السلام عليكم ورحمة الله وبركاته
بالنسبة لتجربتي في الكوميونتي حنحكي عليها كمادة ، و المحاضرات شن جوهن ومن أحسن دكاترة ، مع من تاخذوا؟ وكيف تقروها
كم تغيبوا وأي محاضرات؟، شن جو الامتحان ؟


🛑طبعا أول شي كالعادة هذينا نصائحي الخاصة لأن في الكوميونتي بالذات كل حد يعطي في راي فيها مختلف عالآخر.

🔸️فهي كمادة حسيتها نزيكة وخفيفة بالمجمل إلا بعض المواضيع، والحق تعلمت فيها واجد خذيت نظرة اوسع عالطب وعالمنظومة الصحية لي مفروض تكون،
ميزتها إنها مليانة بديهيات وفي كم شي مكرر من سنوات سابقة ، مجرد تعرفوا المصطلحات الاساسية الجديدة والفكرة العامة تسهل عليكم ولو كانت انجليزتكم كويسة ماتتعبوش واجد ، والحق منهجها العملي لي هو الخاش في الجزئي يسد في شهره وبزيادة يعني جديات لو واظبتوا تقدروا تديروا معاها شي اخر شخصيا كانت ربيع طب بالنسبة ليا شديتها اخر ايام بس لكن كنت نحضر في محاضرات الجامعة ولوطة حنفصّل أكثر..

🔸️هي تنقسم لثلاث أقسام بس طبعا يعطوهن لكم مع بعضهن غير تقسيمة لأفكاركم بس ، جزء الكوميونتي والفاميلي ميدسن وجزء مايكرو وبارا ( هذينا مهم بكل تعرفوا إنه اغلبهن ماعدا الTB و الendemic disease نازلات اونلاين تقريبا سبع محاضرات مهم بكل تحطوهن في جدولكم ماتسهوش عليهن)
و جزء إحصاء و طبعا في الزيارات والواجبات

🔹️جزء هذا فيه صحة المجتمع كيف لازم تكون والمنظومة الصحية و نظام التطعيمات و نظام حمايتهن، صحة المدارس، الصحة المهنية ، اعادة التأهيل ، مهارات التواصل، التغذية، رعاية الحوامل ، عيادة الاطفال تحت 5 سنوات ... حاولوا تركزوا في المحاضرات وحنحكي عليهن لوطة ، بس حرفيا نظامهن فهم ، عندكم شيتين الريهابليتيشن والاوكيبوبيشن حاولوا تقروهن من شيت النظري عشان يجيبوا في معلومات من النظري مش الشيت لي ينزلوا فيه الديسكشن

🔹️وجزء فيه شيتات المايكرو والبارا لكن الجميل انه المرض ياخذوا فيه من ناحية كيف تحمي الناس منه اكثر من البكتيريا شن نوعها وشن شكلها والجو هذا
🔸️ شي مهم ولي هوVaccination حتلقوا جدول التطعيم قاعد في ثلاث شيتات ، انتو اقروه من شيت EPI and cold chain. لدكتورة اسماء، شيت الفاكسنيشين لي نازل اونلاين اقروب منه من التطعيمات لي live attenuated ومن لي killed وهكذا بس تقروش منه الجدول

🔹️جزئية الاحصاء ،
عندكم جزئية الanalytical نازلة قبلها محاضرة اونلاين حاولوا تشوفوها بش تستوعبوا اسرع المحاضرة لي في المدرج عشان محاضرة المدرج حسابات بس ، الحق انا ماسمعتهش وطولت بش استوعبت بس لأنه جديد عليا بس الدكتورة نزيكة وتعاود
عندكم الdescriptive ساهل جدا ولو تركزوا مع الدكتورة تفهموه باذن الله وتعرفوا المهم خاصة لو قاريين احصاء كويس من قبل
في الجزئية الأخرى الinferential الحق دكتورها ممتاز لكن تبي فهم لأن في حاجات واجد جديدة علينا والحق كامتحان جت فيها افكار

🔹️ الزيارات صح تمشوا مستشفيات بس نظام محاضرات يعني يقعمزوكم في قاعة ويشرحوا
أنا حضرت antenatal, Under 5 ,مركز الأمل ، اما عيادة التغذية في عيادة السكري مامشيتش كانت في اخر الايام غبت ،
بشكل عام استفدت من اول اثنين جدا ويركزن عالمهم ويجيبن فيه ، اما مركز الأمل فللأسف الشرح كان بعيد عن محتوى الشيتات واغلبيته هدرزة ، اما عيادة السكري فيشكروا في زيارتها الطلبة لي مشوا..

🔹️ الواجبات 3 واجبات بالمجمل عليهن 20

◽️ واجب الfamily genogram تافه بكل وممتع وتحسوها حصة رسم 🤣 ترسموا شجرة عائلتكم وماتخافوش مش لازم توتولها بدري توا تفهمكم الدكتورة خطوة بخطوة عليه 5 درجات بالحضور لو ماحضرتوش تنقصلكم

◽️واجب الريسرش
قبل كل شي هي الدكتورة حتعطيكم محاضرة بس لا نحن لا قروب A جابولنا منه سؤال في الامتحان
لكن الواجب عليه 10 درجات لو كان عندكم خلفية على اساسات الريسرش حتسهل واجد عليكم ولو لا فعادي برضو الدكتورة موضحة شن تبي بالضبط وتبي كيف ماركزتلكم هي ، عادي تستعينوا بالai يفهمكم لكن ماتاخذوش نسخ لصق لأنه قالت تعطي في أصفار للAi ,
ركزوا عالحاجات لي قالتهن مثلا العنوان مايفوتش 20 كلمة وهك كم شي ، شي مهم بكل انه تحاولوا تبدوا فيه بدري، مش لازم تدزوه بدري تأنوا شوية بلكي تغيروا شي ودزوه بعد يقرب الديدلاين ، انا الحق طولت مادزيته بس كنت مشتغلة عليه قبلها لأنه يبي شوي عصر دماغ لو بتديره بروحك فحطوها في بالكم ماتجوش تديروه اخر لحظة

◽️اخر شي واجب الCv الدكتورة كويسة بكل حتشرحلكم شن تبي بالضبط وميزته مفتوح لعند الفاينلز تقدروا تدزولها على ايميلها قاعد في شيت المحاضرة متاع الCV

👇🏻 التكملة

🔸️بالنسبة لمحاضرات الجامعة ومع من تقروا الحق الغالبية ممتازين ويركزوا على حاجات يجيبوا فيهن، وحتى الجزئيات لي يفوتوا فيهن في الغالب ينفهمن عادي
وفي طبعا لي شرحهم مش اوي كالعادة بس حاولوا مادامكم حضرتوا تركزوا وتكتبوا ملاحظات عشان حرفيا من كثر بديهياتها المادة مرات ماتركزوش على حاجات وتلقوهن في الاسئلة

🔹️حنقوللكم من التوب عندي
د.نادية الدروقي عطتنا infection control مع انه محاضرتها اغلبيتها قصص بس تهزوش عليهن تجيب فيهن وتتذكروا شرحها في الامتحان
School health, antenatal,
Preventive measures of endemic disease & plague د.نيروز
communication skills, U5C, descriptive د.سعاد
Epi measures د.السنوسي
Analytical studies
هذينا كلهن مااعتمدتش فيهن على حد الا الجامعة واغلبهن جن أسئلتهن واضحة

🔹️عندكم محاضرة الinferential الحق قريت لي ركز عليه بس ولكن جاب اعمق منه في الامتحان كم سؤال

🔹️محاضرات قريتهن مع د.خليل ( اشتركت معاه اكثر شي لمنهج نظري الفاينل بحكم مانحضرش في محاضرات النظري بس استفدت منه في المحاضرات الاونلاين ولجبر اي نقص في الجامعة)
خليل الحق يشرح بامثلة وكويس بكل لكن لي فوق اكتفيت بالجامعة ، لي قريتهن معاه كانن لي قلتلكم نزلن اونلاين + occupation + rehabilitation
وفي جزئية من U5C الدكتورة ماطقتش تشرحها كلها شفتها منه وطبعا لو مايشرحش من شيت الجامعة نعاود عليه بروحي
+الاثنين لي غبت فيهن كانن اخر محاضرتين النيوترشن والcold chain وكان شارحهن من شيت الجامعة وكويس شرحه ويسمع للي يقولوا عليه مهم


🔸️كم تقدروا تغيبوا؟
هذي لتوا للأسف مش معروف، خذوا حضورنا في كل الايام في مرات ورقة مطبوعة وفي مرات نكتبوا بيدينا ، لكن قالوا انها بعدد الساعات لان في ايام ساعاتهن اكثر من ايام اخرى، عالعموم أنا غبت اخر يومين القريبات للامتحان كانن مجمل 5 ساعات بس مافش شي اكيد ومااعتقدش حرموا حد برضو، فتقدروا تغيبوا اخر يومين او بحكم اغلبيتهم شرحهم كويس غيبوا المحاضرات لي الاستفادة فيهن قليلة..

🛑بالنسبة للامتحان ، مهم جدا تحلوا أسئلة الحق في تكرار بوجهن وفي تكرار افكار بس وفي حاجات جديدة ، بس الاسئلة كويسات بكل يثبتن والحق اغلب الاسئلة السابقة ياكدنلك ان شرحهم مهم لأن نفس لي يركزوا عليه بالضبط في اسئلة واجد وحنزللكم قنوات تحت

اما بالنسبة لامتحاننا فهنا 100 سؤال ، 60 mcq و 40 صح وخطأ
شخصيا أكثر من 80 سؤال حليتهن بدون شك يعني المعلومة واضحة وقاعدة أما البقية يعني في لي فيهن افكار وفي لي غريبات تشك فيهن بالذات في الاكيوبيشن والريهابليتيشن و الانفرنشيل تقريبا اغلاطي كانن فيهن ..
شخصيا نعتبر لميتها كقراية جديات في آخر اسبوع لكن شرط مهم انه كنت نحضر ونفهم في المحاضرات ونكتب في النوتس عالشيتات ، ولي كانن يبن سماع من خليل حاولت نبدا فيهن قبل عشان السماع ياخذ مني في وقت ،🛑🛑 يعني مش تجوا على بياض اخر اسبوع او عشر ايام وتقولوا الكوميونتي مش مفهومة راهن مية درجة تهزوش عليهن😭🤣

🔸️و حاولت ندير ملخصات للامراض المعدية لي هنا البارا والمايكرو + لو في اي قوانين او نقاط في الاحصاء ، الحق سهلن عليا واجد يوم لي قبل الامتحان يكون اسرع تقرا من الملخصات ..

وايوه لازم التفاصيل، ربي يوفقكم ويفتح عليكم وإن شاء الله تكون مادة نزيكة و تطلعوا منها بأحسن درجات🤍🤍