عقلك .. ماكينة إقتراحات !

اعتبر كل فكرة أو أي حاجه بتخطر على بالك إنها مجرد إقتراح دماغك بتقترحه عليك وليس أمر واجب التنفيذ !

وانت بتذاكر مثلاً هتلاقي دماغك بتقترح عليك إنك تعبان دلوقتي إيه رأيك ما تقوم تريح شوية .. بعدها تقترح عليك انك مش هتقدر تخلص اللي وراك ده كله النهاردة مش هيحصل حاجه لو أجلته لبكره !

لو انتظرت ثواني كمان وانت لسه على المكتب .. هتلاقي دماغك بتقترح عليك إقتراحات تانية جديدة .. بس لو خلصت اللي وراك النهاردة هتكون مرتاح جداً بعدها .. هتقترح عليك إنك هتكون فخور بنفسك لو التزمت بالجدول اللي انت حطيته .. هتقترح عليك إنك تقدر تخلص اللي انت خططت انك تخلصه !

الفكرة كلها إن كل اللي جه في بالك وهيجي في بالك وقتها مجرد إقتراحات دماغك بتقترحها عليك وليست أوامر واجبة التنفيذ (والدليل إنك هتلاقي تناقض كبير بينهم .. شوية تقدر وشوية مش هتقدر) .. إذن هي مجرد إقتراحات قدامك وانت عندك القدرة الكاملة وقتها في إختيار الإقتراح اللي هتمشي عليه !

ناس كتير بتتعامل مع دماغها إنها ماكينة أوامر .. أي حاجه تيجي في بالها في الوقت ده بتعمله (وبالذات في أوقات الالتزام والمهمات المملة بعض الشئ زي المذاكرة مثلاً) .. شكلك تعبان قوم ريح يقوم مريح .. ما تمسك الموبايل شوف إيه الجديد يقوم جري على الموبايل .. ما تكلم صاحبك وارغي معاه شوية يقوم يكلمه .. وهكذا !

هذا الشخص بيفقد السيطرة بالتدريج على حياته .. إنجازه بيكون قليل جداً لإنه مغرق نفسه في بحر من المشتتات اللي بتستهلك طاقته وذهنه وتركيزه لإنه بيتعامل مع ماكينة الإقتراحات على إنها ماكينة أوامر !

أنا معاك إن السيطرة الكاملة صعبة (صعبة علينا كلنا)
ولكن البداية إنك تبدأ تشوف من النهاردة كل اللي يجي على بالك انه مجرد إقتراح مش أمر واجب التنفيذ .. ويبقى الاختيار بينهم في النهاية هو اختيارك !

🌀الخوف من المستقبل والفقد🌀

حقق ذاتك بكل ما أوتيت من قوة👌🏼