تجمع المهندسين السوريين

الأسئلة الأكثر شيوعاً حول (الشهادات التدريبية)
لازم كل طالب يقرأ المنشور ويستوعب محتواه بهدوء.
1) يعني لما ناخد شهادة من منصات مثل كورسيرا وإدراك ورواق وغيرهم هي الشهادة معترف بها؟
الإجابة: الشهادة موثقة من المنصات بتأثبت حضور الطالب لهالدورات ومشاهدة المحتوى كامل وحل التمارين إذا كان في تمارين.
بالنسبة لبعض المنصات مثل Coursera بالذات بعض دوراتها بتأهل الطالب للإعفاء من مقررات بالجامعات الأمريكية والبريطانية، مثلاً شهادة Google IT Support بتأهل الطالب لحذف 4 مقررات بالجامعات الأمريكية وجزء من فصل دراسي بالجامعات البريطانية.
2) طيب يعني مو كل شهادات كورسيرا معتمدة؟
لا، فقط بعض الشهادات بتكون معتمدة والبقية موثقة من المنصة وكل الشهادات سواء كانت معتمدة أو فقط موثقة توثيق عادي بنقدر نستخدمها بالسيرة الذاتية بشكل طبيعي وكلها ممتازة ومقبولة.
3) معناها شهادات الدورات يلي بالمعاهد بسورية أحسن من شهادات المنصات الدولية، صح هالكلام؟
لا، لأن كمان شهادات المراكز التدريبية هي شهادات إتمام محتوى، يعني كمان الطالب بيقدر يقعد بالمعهد ويهز رأسه أثناء الدروس وبالنهاية بيعطوه شهادة تدريب.
4) دورة ICDL يلي بمنصة إدراك هي شهادة رسمية؟
لا، منصة إدراك عاملة تدريب أونلاين للحصول على كامل منهاج ICDL ولكن الشهادة الرسمية رسومها غالية، لذلك المنصة بتعطيك شهادة حضور دورة تدريبية وبالمناسبة هي جيدة وبتقدر كمان تستخدمها بالـ CV وغالباً بأوروبا وأمريكا ما بينطلب منك شهادة ICDL ومو كتير دارجة عندهم.
يعني دورة ICDL بتكفي وزيادة لأن هي بالنهاية شوية وورد وإكسل وبوربوينت وويندوز وهيك شغلات بسيطة.
5) مالي حاسس أن الشهادات الإلكترونية بقوة الشهادات الورقية العادية، برأيك تفكيري صح؟
الإجابة: تفكيرك خطأ، لأن بعض الشهادات الإلكترونية صارت بتعادل مقررات جامعية متل شهادات Google IT Support و IBM Data Science وغيرهم عدة شهادات. مافي دورة تدريبية بالمعاهد بتعمل الشيء نفسه.
6) شو رأيك بالمراكز يلي داخل سورية ويلي بتكتب بالإعلانات: شهادة دولية معتمدة ومصدقة من الخارجية؟
الإجابة: أي ورقة أو فاتورة بتقدر تصدقها من الخارجية، تصديق الخارجية لا يعني أي قيمة علمية بالواقع وهو تصديق قانوني فقط. يعني بتقدر تصدق أي عقد أو وثيقة بالخارجية.
شرحت لكم فوق ماذا يعني كلمة معتمدة، معناها باختصار أنها بتعادل مقررات جامعية يعني بتعطيك Credit لحتى تحذف مقررات من الجامعة. أما كلمة (دولية) فهي كلمة بتستخدمها المعاهد ومالها أي ستين لازمة يعني للتسويق والهيبة. 😁
7) يعني أنا لو رحت على معهد داخل سورية وعملت دورة إكسل مثلاً وبعدين ما اشتريت الشهادة منهم، واكتفيت بشهادة Coursera فهل هذا شيء جيد؟
الإجابة: هاد أحسن تصرف بتعمله بحياتك.

🔻منقول من صفحة الأستاذ حسام الخوجه.

986 viewsedited 16:58