سبحان الله انا ايام الامتحانات عموما ما بكون متوترة خالص وبكون باردة شديد السبب انو انا عارفة اني قريت وربنا معاي وطالما قريت وتعبت ف اكيد ربنا حيكتب لي كل الخير ..
اما بالنسبة للإحساس بتاع انو مهما عملت ما كفاية ف انا صراحة كنت حاسه بيهو طول السنة لكن في النهاية قعدت مع نفسي واتذكرت قدر شنو انا قريت وتعبت والحاجه دي بتحسس الزول بالرضا

انا بمتحن السنه ولاول مره امتحن وناطه من اولى لثالث دي ومني عارفه كيف اذاكر الطريقه الصحيحه

طريقة القراية دي زي ما قلت بتختلف من زول لزول
بما انك فطيتي تانية وما قريتيها ف انا بشوف ضروري تقري الحاجات الفي تانية ومتعلقه بي تالتة ما اعتقد انها كتيرة خاصه لو انتي ادبي وحتى لو علمي بس ركزيها كويس وبعداك اقري درس اليوم باليوم وركزي في الحصة شديد واستغلي الوقت بتاع الصبح لحاجات الحفظ او الحاجات الصعبة

كنتي بتقري من مذكرات ولا من الكتب؟

كيف كنتي بتوزعي الزمن بين المواد

كنتي بتحمسي نفسك ب شنو لمن تتعبي من القرايه؟

كنتي بتقري الرياضيات والكيمياء كيف ؟؟

قول ليها كنتي بتقري كم ساعه في اليوم؟؟

وكنتي بتوزعي الزمن كيف بين مدرستك وحياتك الاجتماعيه

الكتب الكتب اهم حاجه وحتى ما كان عندي مذكرات قراية كتيرة بس عندي مذكرات امتحانات..
لكن لو حسيتو انو في مذكرة مفيدة وبتصيغ المعلومة بطريقة واضحة ممكن تقرو منها لكن طبعا بعد ما تقرو من الكتاب

كنت بصحى بدري شديد ف بخلي مواد الحفظ للوقت دا ومواد الفهم المسا ومرات في المدرسة في وقت الفسحة وكدا بحل مسائل رياضيات

كان عندي علبة صغيرة كدا فيها ورق كاتبة فيهو عبارات تحفيزية وايجابية كنت لمن ازهج بفتح العلبة وبقرا العبارات دي
وممكن تتخيلو يوم النتيجة لمن تجيبو نسبة كبيرة واحساس الفرحة اليوم داك الحاجه دي بتحمس شديد

الرياضيات اكتر حاجه كنت بعملها اني بحل مسائل كتيرة شديد ولمن ازهج من القراية بفتح المريح احل مسائل
بالنسبة للكيمياء ف انا ادبية ما حاقدر افيدك

في صعوبات كتيرة في السنه دي بالزات انو كانت سنه استثنائية ورينا كيف قدرتي ببساطة تجتازي كل شي بعيدا عن الزهج طبيعة يومك اسبوعك شهرك كانت بتكون كيف وكيف كنتي بتتعاملي مع امتحانات المدرسة وبتنظري ليها باي نظرة بالنسبة للامتحانات الشهادة؟

ما عندي عدد ساعات محدد لانو زي ما قلت ليكم عدد الساعات ما مهم المهم انكم تقرو بتركيز شديد عشان تكونو استفدتو

كنت خاته الأولوية للقراية لكن طبعا دا ما بمنع من الحياة الاجتماعية ف مرة مرة لمن الزول يزهج من القراية شديد ممكن يطلع ويغير جو شوية ويزور اهلو وكدا

والله انا شخصيا اكتر حاجه ساعدتني أتجاوز الزهج دا علاقتي بصحباتي وبنات الفصل كنا بنشجع بعض شديد ولمن نزهج بنتونس او نعمل اي حاجه تغير لينا من جو القراية
اما بالنسبة لي امتحانات المدرسة ف كنت مرات بجيب فيها درجات ما حلوة لكن ما بخليها تأثر علي سلبيا بالعكس كدا انا انتبهت انو في تقصير في المادة دي وببدأ اركز فيها واقراها اكتر

كيف تتعامل مع مواد الحفظ ذي التربية الإسلامية والاحياء بالاخص

تنصحينا كيف نقرا الفيزياء و الاحياء عشان نجيب فيها درجات فوق ٩٠

مواد الحفظ اقروها الصباح بدري شديد والتكرار مهم وسمعوا بالورقة والقلم عشان المعلومة تثبت

انا ادبي ف للأسف ما حاقدر أفيدكم في النقطة دي