كنت بشوف كل الأوائل الفي السنين الفاتت قدوة لي ولمن اشوف فيديوهاتهم وهم بتكلمو بتحمس شديد وبجتهد عشان ابقى زيهم في يوم

من المُسلّم به ان القرآن مصدر الطمأنينة، هل كان في سورة معينة كل ماتقريها بتحسي بالراحة؟

سورة طه ومريم❤️

هل زول فاقد الثقه فى نفسي و عندو مشكله فى الانجليزي ح يجيب كم و 90

طبعا اكيد بيقدر يجيب كم و90
وليه ما واثق في نفسو؟ طالما انت بتعمل العليك وبتجتهد ربنا حيعوضك اكيد وخت في بالك انو لكل مجتهد نصيب ومافي زول احسن من زول والناس الجابو كم و٩٠ ديل ما احسن منك في حاجه وادعي ربنا كتييير وخليك واثق انو حيستجيب ليك
بالنسبة للانجليزي ابدا شوف مشكلتك شنو وبإذن الله حتقدر تحلها

أسأل لينا دي قول ليها لو طالب بدأ القرايه الليله دا وعندو مشكله في اللغه الانجليزيه بقدر يجي اول السودان أو في الميه الأوائل ولو داير يجي في الميه الأوائل يقرأ كم ساعه في اليوم ويقرأ اي ماده كيف؟

اعرف مشكلتك شنو تحديدا في الانجليزي سواء summary او grammar او غيرو وابدا حلها..ونصيحة ليك حل امتحانات كتيييرة وخلي الاستاذ يصححها ليك لانو الامتحانات بتساعد شديد
مافي عدد ساعات محدد مفروض تقراهو لانو ممكن تقرأ ١٠ ساعات لكن تكون سرحان وزهجان ف بالتالي ما حتستفيد وممكن تقرأ ٤ ساعات بتركيز شديد وبالتالي حتستفيد ف عدد الساعات ما مهم المهم انك تقرأ بتركيز شديد وتكون حقيقي مستفيد من قرايتك

القلق والتوتر، كيف قدرتي تتخلصي منه ايام الامتحانات؟
الهلع الزايد للقراية وانو بتتخيل نفسك مهما قريت كأنو ماسويت شي، كيف قدرتي تتغلبي على الحاجة دي وتخلي نفسك ريلاكس؟

سبحان الله انا ايام الامتحانات عموما ما بكون متوترة خالص وبكون باردة شديد السبب انو انا عارفة اني قريت وربنا معاي وطالما قريت وتعبت ف اكيد ربنا حيكتب لي كل الخير ..
اما بالنسبة للإحساس بتاع انو مهما عملت ما كفاية ف انا صراحة كنت حاسه بيهو طول السنة لكن في النهاية قعدت مع نفسي واتذكرت قدر شنو انا قريت وتعبت والحاجه دي بتحسس الزول بالرضا

انا بمتحن السنه ولاول مره امتحن وناطه من اولى لثالث دي ومني عارفه كيف اذاكر الطريقه الصحيحه

طريقة القراية دي زي ما قلت بتختلف من زول لزول
بما انك فطيتي تانية وما قريتيها ف انا بشوف ضروري تقري الحاجات الفي تانية ومتعلقه بي تالتة ما اعتقد انها كتيرة خاصه لو انتي ادبي وحتى لو علمي بس ركزيها كويس وبعداك اقري درس اليوم باليوم وركزي في الحصة شديد واستغلي الوقت بتاع الصبح لحاجات الحفظ او الحاجات الصعبة

كنتي بتقري من مذكرات ولا من الكتب؟

كيف كنتي بتوزعي الزمن بين المواد

كنتي بتحمسي نفسك ب شنو لمن تتعبي من القرايه؟

كنتي بتقري الرياضيات والكيمياء كيف ؟؟

قول ليها كنتي بتقري كم ساعه في اليوم؟؟

وكنتي بتوزعي الزمن كيف بين مدرستك وحياتك الاجتماعيه

الكتب الكتب اهم حاجه وحتى ما كان عندي مذكرات قراية كتيرة بس عندي مذكرات امتحانات..
لكن لو حسيتو انو في مذكرة مفيدة وبتصيغ المعلومة بطريقة واضحة ممكن تقرو منها لكن طبعا بعد ما تقرو من الكتاب

كنت بصحى بدري شديد ف بخلي مواد الحفظ للوقت دا ومواد الفهم المسا ومرات في المدرسة في وقت الفسحة وكدا بحل مسائل رياضيات

كان عندي علبة صغيرة كدا فيها ورق كاتبة فيهو عبارات تحفيزية وايجابية كنت لمن ازهج بفتح العلبة وبقرا العبارات دي
وممكن تتخيلو يوم النتيجة لمن تجيبو نسبة كبيرة واحساس الفرحة اليوم داك الحاجه دي بتحمس شديد

الرياضيات اكتر حاجه كنت بعملها اني بحل مسائل كتيرة شديد ولمن ازهج من القراية بفتح المريح احل مسائل
بالنسبة للكيمياء ف انا ادبية ما حاقدر افيدك