📢إعلان حصريّ:

عشانكم
وتلبيةً لطلبكم..

تُعلن مبادرة تجمع طلاب صنّاع المستقبل عن فتحها لباب التقديم للعضوية مرة تانية ولمدة 24 ساعة..

التقديم مُتاح في المكاتب التالية:
-مكتب الموارد البشرية.
-مكتب الإعلام.
-مكتب العلاقات الخارجية.
-مكتب شؤون الطلاب.
-مكتب المشاريع والبرامج.
-الإدارة السكرتارية.

بسُرعة ولا تفوّت اللحظة؛ لأن أُسرتنا تكتمل بك.

فورم التقديم:
https://docs.google.com/forms/d/e/1FAIpQLSda_A8gtlzX3XPsKpsEb9YTLrdiDTc6WgbyPG7mHJNjQ1teiA/viewform?usp=header

#تجمع_طلاب_صناع_المستقبل
#FMSG

📢تم إغلاق استمارة التقديم..

لكلِّ المُتقدمين، ستبدأ مرحلة الفرز ثم سيتم التواصل معكم لإخطاركم بالخُطوة القادمة، لذا نرجوا من الجميع مُتابعة أرقام التواصل الخاصة بهم باستمرار..

مع خالص أمنياتنا بالتوفيق للجميع..

#تجمع_طلاب_صناع_المستقبل
#FMSG

*أشياء تمنيتُ لو أني عرفتها قبل الجامعة.*🤫

كنت فاكر أنو الجامعه هي نفسها المدرسة؟!
دخلت وأنت مخطط للجامعة خطط معينة، مبنية على كلام الناس القبلك والوضع أختلف!؟🤦‍♀️

*طيب خليني أوضح ليك:*

1️⃣ في الجامعة يا عزيزي الدرجات م كل حاجة، محتاج تفهم، تركز، وتحفظ وحتى طريقتك في المذاكرة بتفرق،
ممكن تذاكر أطول مده ممكنة بس من غير فايدة وممكن العكس. 💁‍♀️


2️⃣ العلاقات أهم من الكتاب!
هنا يا عزيزي بنقصد ليك علاقتك بالدكتور، دفعتك، قروب الدفعة، ديل كلهم لازم تكون بتعرفهم وبعرفوك.


3️⃣ إدارة زمنك وقروشك مسؤوليتك برااااك،
هنا أنت إنسان مسؤول تماماً، مافي زول حيقول ليك قوم أقرأ، أستعد أمشي الجامعه، أو م تهدر قروشك في الفاضي...


4️⃣ ما تخاف تغير رأيك،
*كيف؟!*
إذا دخلت تخصص واكتشفت أنك م بتحبه أو م عندك ميول ليهو، عادي ممكن تغير وتدرس رغبتك ومجالك، عشان في المستقبل تكون راضي عن شغلك، مش كأنك مجبور.

5️⃣ هنا يا عزيزي صحتك النفسية والجسدية خط أحمر!
السهر، والأكل السريع وأحياناً أكل غير مفيد، والضغط النفسي، كل الحاجات دي بتأثر.


6️⃣ المهارات:
ودي حاجه مهمة جداً جداً، لازم تتعلم أولاً اللغة الإنجليزية مثلاً؛ لأنها لغة العصر ومطلوبة في أي مكان،
والحاجه التانية تحاول تحصل على عدد من الشهادات، زي أستخدام الحاسوب والكمبيوتر، وتعرف تواجه وتتكلم قدام الجمهور.😌

7️⃣ عادي الإنسان بفشل، بس ال م عادي أنك تقيف وم تكمل!


*ختاماً:*
*.* الجامعة م زي المدرسة، الاتنين مؤسسات تعليمية بس الجامعة مرحلة مختلفة، وفيها كتير من التحديات، وبرضو م مجرد شهادة بتاخدها بعد التخرج.
هي فترة بنتعلم فيها كيف نتعامل مع الفشل، وكيف تشيل نفسك ومسؤوليتك، وكيف تضع أهدافك وتطور نفسك، وكيف تتعامل مع مختلف الشخصيات، وتطلع بشخصية متمكنة.💪👌


#تجمع_طلاب_صناع_المستقبل
#FMSG

لا تتذمر من الضغط، اجعله السر الخفي للتغيير❗

معظمنا بيشوف الضغط كسبب بعطلنا، وبوقف باقي مهامنا، وبنستخدمه كوسيلة للمماطلة والتأجيل...

لكن لو كُنا صادقين مع نفسنا، ح نلقى إن فترات الضغط هي أكتر الأوقات البتعلّمنا كيف ننظم حياتنا، نعرف أولوياتنا، ونكتشف قدرات ما كنا عارفينها. ✅️

ما لازم تستنى الظروف تكون مثالية عشان تبدأ،
ولا تستنى إن كل المشاكل تختفي عشان تتطور.

حتى في الأيام المليانة، ممكن تستغل دقائق بسيطة تسمع فيها قرآن أو تتعلم حاجة جديدة، ومع الوقت ح تلاحظ الفرق.🎧

وحتى وسط ضغط الدراسة أو العمل، لو خصصت جزء صغير يوميًا لتطوير مهارة، ح تندهش من النتيجة البتوصل ليها.🆕️

وحتى لحظات التعب، لو استخدمتها لمراجعة أخطائك وترتيب خطواتك، ح تكون بداية لتغيير كبير.📝

الحقيقة إن الضغط ما دائمًا عدو...
أحيانًا هو الوسيلة البتدفعنا عشان نتحرك ونتعلم.

الضغط محتاج زول يشوف التحديات كفرص،
ويبدأ حتى لو الطريق صعب،
ويواصل حتى لو الخطوات صغيرة.✨


📌وتذكّر دائمًا:
"مشوار الألف ميل ببدأ بخطوة."

وأنت، كيف بتتعامل مع الضغط؟! بتخليه دافع للتطور؟! 🎯
ولا سبب للتوقف؟! 🚫



#تجمع_طلاب_صناع_المستقبل
#FMSG

🚀 الفرق بين الإنتاجية والانشغال.

في ناس يومهم مليان رسائل، اجتماعات، ومهام ما بتنتهي…
ولما يجي آخر اليوم يحسوا إنهم تعبوا شديد لكن السؤال المهم:
شنو الحاجة الحقيقية الاتقدمت فيها اليوم؟

⚡ الفرق بسيط:
الانشغال يعني أنو تكون في حركة طول اليوم.

الإنتاجية يعني تكون بتحرك حياتك أو شغلك فعلاً لقدام.

📌 الشخص المنتج بسأل نفسه:
“شنو أهم مهمة لو أنجزتها اليوم حتعمل فرق حقيقي؟”
أما الشخص المنشغل فبجري وراء كل إشعار، وكل طلب، وكل مقاطعة.

🎯 المشكلة إنو كتير مننا بنخلط بين التعب والإنجاز.

ممكن تشتغل 10 ساعات وما تحقق حاجة مؤثرة،
وممكن ساعة أو ساعتين من التركيز العميق تعمل ليك نتائج أكبر من يوم كامل من التشتت.

💡 قبل ما تبدأ يومك بكرة، اسأل نفسك:
شنو المهمة الواحدة البتستحق أفضل وقت، وأفضل طاقة عندي؟

لأنو في النهاية…
الانشغال بصنع ضوضاء، 🔊
لكن الإنتاجية بتصنع أثر حقيقي. 🌱

#الإنتاجية
#إدارة_الوقت
#تجمع_طلاب_صناع_المستقبل
#FMSG

كم مرة قعدت قدام كتابك أو محاضرتك لساعات، بعد داك اكتشفت أن أكثر ما استهلكته هو الوقت لا الفهم؟😔

في الآوانة الأخيرة أصبحت أدوات الذكاء الاصطناعي جزءًا من الحياة الدراسية لكثير من الطلاب، ما لأنها بتقوم بالدراسة بدلاً عنهم، بل لأنها بتساعدهم على التعلم بصورة أسهل وأكثر كفاءة.

🔵 ChatGPT
يساعدك على فهم الدروس، تبسيط المفاهيم المعقدة، وتلخيص الموضوعات الطويلة بأسلوب يناسب مستواك.

🔵 Google Gemini
بيوفر ليك طريقة سريعة للوصول إلى المعلومات، والبحث عن شروحات إضافية، من غير ما تضيع وقت طويل في التنقل بين المصادر.

🔵 Quizlet
لمن تقرب الامتحانات، بيساعدك عشان تخلي المراجعة أكثر فعالية من خلال البطاقات التعليمية والأسئلة التفاعلية التي تساعد على تثبيت المعلومات.

🔵 Notion AI
بيساعدك على تنظيم ملاحظاتك وخططك الدراسية في مكان واحد، عشان يكون تركيزك على التعلم، لا على البحث عن الملفات، والملاحظات المبعثرة.

📌التكنولوجيا ما بتصنع النجاح، لكنها بتمنحك أدوات أفضل للوصول إليه. وفي زمن تتسارع فيه المعرفة كل يوم، قد يكون تعلمك لكيفية استخدام هذه الأدوات مهارة لا تقل أهمية عن المعلومات التي تتعلمها.

وأنت، أي أداة جربتها أو ناوي تجربها؟ 👀


تجمع_طلاب_صناع_المستقبل
#FMSG

الاستمرار أهم من الشغف: كيف تلتزم بخططك عندما يختفي الحماس؟

في لحظات البداية، الحماس بيكون عالي والأهداف بتكون واضحة، لكن مع مرور الأيام الحماس بيبدأ يقل، والتعب والملل بيظهرو في الطريق؛ ودي مرحلة طبيعية بيمر بيها أي زول عندو هدف.

بس انت عارف الفرق شنو ما بين الزول اللي بيوصل والزول اللي بيقيف هو ما في كمية الحماس اللي بدأ بيها الزول اللي وصل لكن في قدرته إنه يكمل حتى في الأيام الما عندو فيها رغبة.

خليك عارف إنك ما كل يوم حتكون عندك طاقة كبيرة، وما كل يوم حتكون متحمس. لكن العادة والالتزام بخطوات بسيطة وثابتة هي البتراكم وتصنع النتيجة الكبيرة.

فخلي شغلك مرتبط بهدفك، ما بمزاجك. لأن الشغف ممكن يكون بداية الطريق، لكن الاستمرار والانضباط هم البوصلوك للنهاية.

امشِ خطوة خطوة، وما تستعجل الثمرة؛ فالأشياء العظيمة بتكبر بهدوء، يوم بعد يوم. و اتذكر دايماً أن كل تقدم و إن كان بطيئاً يظل تقدماً.

#تجمع_طلاب_صناع_المستقبل
#FMSG

لو حلمك تسافر، وتقرا برا السودان...🌍
دي فرصتك الذهبية!✨

منحة الحكومة المغربية الممولة بالكامــــل!🇲🇦

وعشان تلحق وتقدم، مجهزين ليكم لايف مع زول خاض التجربة شخصياً، ووصل لمقاعد الدراسة...🔥

🎤د. وضاح إبراهيم حسب الرسول:
- أحد الطلاب المئة الأوائل للعام 2023 بنسبة 94.7%.
- يجيد اللغة الإنجليزية، والفرنسية.
- نائب مسؤول قسم البرامج الميدانية منصة قمم.
- طالب بكلية الطب جامعة الخرطوم سابقاً.
- حائز على منحة الحكومة المغربية لعام 2025.
- طالب بكلية الطب جامعة كازابلانكا.

🔥انتظرونا يوم الجمعة 17/ يوليو
الساعة 8 مساءً بتوقيت الخرطوم
على قناتنا على التليجرام
[https://t.me/sdfmsg]

​🔗 ما تفوت الفرصة!
يمكن تفتح ليك باب لثقافة جديدة، وتجربة مختلفة.✨

#منحة_الحكومة_المغربية
#تجمع_طلاب_صناع_المستقبل
#FMSG

*3 مواقع لازم تعرفها!* 🤔

في الدراسة، الشغل، والحياة اليوميه محتاجين مرجع عشان نستفيد منه، أو حتى موقع يوفر لينا معلومات موثوقة نقدر نستدل بيها.

*ف خلينا نشوف..* 👈

*1_ Khan Academy-خان أكاديمي*
عبارة عن مدرسة مجانية، أهميته بتتمثل لينا في أنه بشرح ليك رياضيات، فيزياء، كيمياء، برمجة، اقتصاد...
أي حاجة من الصفر، وبطريقة بسيطة جداً.
والكلام دا كلو مجاني ومن غير أي إعلانات مزعجة.👌

*2_ Google Scholar-الباحث العلمي*
ودا عبارة عن محرك بحث متخصص في الأبحاث، الكتب، والرسائل الجامعية فقط .
ف لمن يكون عندك بحث، مشروع تخرج، أو حتى تقرير صغير، بدل م تضيع وقتك م عليك إلا تدخل الموقع دا، وبتجيك معلومات من مصادر موثوقة تقدر تستشهد بيها.👍

*3_Canva*
*كانفا:* موقع تصميم ساهل جداً، حتى لو ما بتعرف فوتوشوب، بتعمل بيهو عروض تقديمية، سير ذاتية، بوسترات، بوستات سوشيال ميديا، وشهادات.
الموقع دا الحوجة بتكون ليهو أكتر في الجامعة للعروض والأنشطة، وبعد التخرج *للCV* ، والشغل الحر.
بالإضافة لأنو عندو قوالب جاهزة، بتعدل عليها حسب رغبتك.🫶🤍


#تجمع_طلاب_صناع_المستقبل
#FMSG