"اعزم وكد فإن مضيت فلا تقف
واصبر وثابر فالنجاح محقق
ليس الموفق من تواتيه المنى
لكن من رزق الثبات موفق"

اليوم ال20 من التحدي✨

لماذا تدرس؟!

يا لطيف...👀
لقيت الإجابة؟
حددت دوافعك ومحفزاتك؟
استحضرت النوايا واستعدت شغفك زي ما اتفقنا؟

حسيت بالفرق؟

لو ما أنجزت، يلا ننجز لأنه فوائد مهمة اليوم جمّة، ولو فاتتك فإنت كدا فايتك كتير...👀🔥

قوم قوم يلا🔥🔥

#اليوم_20
#تحدي
#تطوير_الذات
#30_days_better_learner_challenge
#تجمع_طلاب_صُنَّاع_المستقبل
#FMSG

اليوم 21 من "تحدي 30 يوم متعلّم أفضل–FMSG"

🎯عنوان المهمة: "ذاكرتك في الميزان"

بعد ما مشيت خطوات حلوة في التحدي جاء وقت التقييم الحقيقي.✨

اليوم حنرجع ورا شويّة، نفتح باب قديم، ونشوف:

هل المعلومات لسة في دماغنا ولا راحت مع الزحمة؟🤔

🎯المهمة:
اختبر نفسك في مادة درستها من مدة بعيدة.
ولو ما لقيت امتحان جاهز، خلي الذكاء الإصطناعي يساعدك.

أكيد في مواد قريناها وتعبنا فيها، وحفظنا كل حرف، لكن بعدها جات مواد جديدة، وضغط المذاكرة غطّى على القديم...

ومهما كان إحساسك بالنسيان، اتذكر إنه المعلومة ما بتتمسح، بس بتحتاج لنفض الغبار عنها.✨

الاختبار دا حيساعدك في:

📍كشف الفجوات ونقاط الضعف.

📍إنعاش الذاكرة وزيادة التركيز.

📍تقوية الاسترجاع وزيادة الوعي بتطورك.

عشان كدا جربه وما تستهون فيه🔥

💡تنويرة:
شاركنا: قررت تختبر نفسك في أي مادة؟
وطلعت متذكر ولا كُله اتبخر؟

وما تنسى، خليك معانا…
عشان الجاي أقوى وأمتع بإذن الله🔥🔥

#اليوم_21
#تحدي
#تطوير_الذات
#30_days_better_learner_challenge
#تجمع_طلاب_صُناع_المستقبل
#FMSG

انتهيت من اليوم 21؟

جبت الاختبار، وبديت تحل في الأسئلة، لكن حاسي إنك نسيت كل شيء؟

حاسي إن مجهودك راح "هباءً منثورًا"؟ 😕
لا يا عزيزي الطالب، أبداً!

تعال نعاين للجانب المليان من الكوب ♥️:

-اكتشفت بالضبط وين محتاج تركز في المادة دي.
-عرفت طرق مذاكرة ما كانت فعالة، وده حيساعدك تتجنبها مستقبلاً.
-قدرت تقيّم مستواك الحقيقي، وده أهم خطوة عشان تبدأ من جديد وبطريقة أفضل.

شاركنا الآن:

نقطة كانت رايحة ليك؟
كيف حليت الاختبار؟
وخطوتك الجاية شنو؟

#تحدي_30_يوم
#اليوم_21
#تجمع_طلاب_صناع_المستقبل

اليوم 22 من "تحدي 30 يوم متعلّم أفضل–FMSG"

🎯عنوان المهمة: "غير مكانك، يتفعّل تركيزك"

في أحيان كتيرة ما بيكون الملل من المادة نفسها…
بيكون من المكان أو التوقيت أو الروتين المكرر!

أبسط تغيير في الجو ممكن يحرّك فيك رغبة جديدة للمذاكرة، وكأنك بتبدأ من أول وجديد.✨

🎯المهمة:
اقرأ اليوم في مكان جديد أو وقت غير المعتاد: سطح البيت، تحت شجرة، جنب الشباك أو حتى لو في المطبخ.🤣
الفكرة بس في إنك تكسر النمط وتدي دماغك نفس جديد...

🎯لي دا مهم؟

📍لأن التغيير البسيط بينشط التركيز.

📍بيحسّن المزاج ويقلل التشتت.

📍بيدي إحساس بالبدايات الجديدة.

💡تنويرة:
شاركنا وين حتقرأ اليوم؟
وبعدين ورينا هل حسيّت بفرق فعلاً في استيعابك؟

خليك متابع...
تحدياتنا لسة مستمرة ومُكملين معاكم بقوة.🔥

#اليوم_22
#تحدي
#تطوير_الذات
#30_days_better_learner_challenge
#تجمع_طلاب_صُناع_المستقبل
#FMSG

مساء الرمان يا برلوم يا فرحان 🎉
النتائج ظهرت خلاص، ونتيجة التقديم تم إعلانها رسميًا ✨

اكتبو لينا يا أبطال اتقبلتوا في أي كلية؟

#تجمع_طلاب_صناع_المستقبل

اليوم الـ23 من التحدي✨

أها يا عزيزي!
بعد المشي لعشرة دقائق حسيت إنه عندك طاقة زيادة ومزاجك أحسن؟
ولا ما في فرق؟👀

أكتب لينا تعليق سريع:
طاقة زيادة.🔥
ما في فرق.😞

الكسلانين ولسة ما أنجزوا المُهمة شايفنكم👀

اتذكروا: عشرة دقائق ما كتيرة بس تأثيرها كبير.✨️🔥

قوم جرب وحتحس جسمك وعقلك بشكروك.🤍

وخلونا نكمل بكل قوة وحماس.💪🔥🔥

#اليوم_23
#تحدي
#تطوير_الذات
#30_days_better_learner_challenge
#تجمع_طلاب_صُنَّاع_المستقبل
#FMSG

اليوم 24 من "تحدي 30 يوم متعلم أفضل–FMSG"

🎯عنوان اليوم: "اِشرح درساً"

🎯المهمة:
اِشرح درساً بصوتك وكأنك قاعد تدرسه لشخص آخر، يمكن تسجيل بصوتك أو حتى ممكن تشرح للمراية الفي بيتكم.🤣🔥

طيب ليه؟👀
لأنك كدا حتفهم الدرس أكتر وتتذكره أسرع، حيساعدك الشرح لشخص آخر إنك تنمي من مهارات التواصل عندك ودا كله حيزيد من ثقتك.

كذلك تسجيل الصوت أو الشرح للمراية حيحسن أداءك، يطور مهاراتك، ويزيد ثقتك.✨

💡تنويرة:
فكرة الشرح فكرة ظابطة، بتثبت المعلومة وتظبط ليك حاجتك دي وتنجضها ليك كويييس🤣🔥

بعد دا كله حتعمل التحدي ولا لا؟👀

#اليوم_24
#تحدي
#تطوير_الذات
#30_days_better_learner_challenge
#تجمع_طلاب_صُنَّاع_المستقبل
#FMSG

اليوم الـ24 من التحدي✨

بعد ما شرحتوا الدرس بصوتكم أو قدام المراية، كيف كان الإحساس؟
هل حسيتوا إنه المعلومة ثبتت أكتر؟
ولا لسة في صعوبة؟🥲💔

اكتب لينا:
✅️ثبتت أكثر.
🔄محتاجة مراجعة.

لو لسة ما جربت، الحق جرب لأنه الشرح بصوتك أفضل طريقة عشان تفهم وتحفظ أسرع.🔥

شاركونا تجربتكم وإحساسكم وخلونا نواصل بقوة.💪🔥

#اليوم_24
#تحدي
#تطوير_الذات
#30_days_better_learner_challenge
#تجمع_طلاب_صُنَّاع_المستقبل
#FMSG

🔵 اليوم 25:

🎯 «خطّة على مقاسك» – مو كل الطرق بتنفعك… اختار طريقتك

أحيانًا بنكون منضبطين، بنشتغل، بنذاكر… لكن بنحس إنو ما في نتيجة.
ليه؟
لأنك ما ماشِي بخطة واضحة، أو يمكن ما اخترت الخطة المناسبة ليك.

اليوم دا مصمم عشان تعمل نقلة حقيقية:
من العشوائية → للوضوح.
من التراكم → للتدرّج المنطقي.

📌 المهمة:
ابحث اليوم عن طريقة تخطيط تناسب نمط حياتك ومهامك.
ممكن تختار:
• مصفوفة أيزنهاور (لو عندك مهام كتيرة ما عارف تبدأ من وين)
• التخطيط الأسبوعي (لو عندك مشروع أو هدف كبير عايز تقسّمو على أيام)

✍️ كيف تطبّق؟
• خُذ 30 دقيقة الليلة، وقسّم مهامك على حسب الطريقة البتناسبك
• اكتب خطتك الأسبوعية – يوم بيوم، ولو حتى أول 3 أيام
• التزم بالخطة لمدة يومين بس كبداية… بعدين قرر تعدّل شنو

🔑 النتيجة:
بترتاح نفسياً، وبتبدأ تشتغل بعقل مرتب بدل تفكير مشتّت.

💬 سؤال اليوم:
شنو أكتر شي بتتوقّع تتغير فيك لو مشيت بخطة واضحة لأسبوع كامل؟

#اليوم_25
#تحدي
‏#30_days_better_learner_challenge
#تطوير_الذات
#تجمع_طلاب_صُناع_المستقبل
‏#FMSG

اليوم ال25 من التحدي✨

يا بطل🔥
خلصنا مهمة تخطيط المهام ولا لسة؟
ولو خلصت استخدمت أي طريقة؟🤔

ما بديت لسة؟
ابدأ اليوم، وخليها عادة، حتتفاجأ بعد فترة بالتغيير الحصل في شغلك وحياتك.🔥🔥

يلا منتظر شنو؟

#اليوم_25
#تحدي
#تطوير _الذات
#30_days_better_learner_challenge
#تجمع_طلاب_صناع_المستقبل
#FMSG

اليوم 26 من "تحدي 30 يوم متعلم أفضل-FMSG"

🎯عنوان المهمة: "اِقطع التسريب الخفي"
تلفونك هو العدو الناعم...

هل سبق حسبت كم ساعة بتروح يومياً على السوشيال ميديا؟
المُشكلة ما في إنك تتونس شوية، المشكلة إنك تتسرّق بدون ما تحس.

اليوم دا جاي عشان ترجّع السيطرة.
عشان تتذكّر إنه وقتك دا مشاع لو ما حميتُه، أي حاجة ممكن تاخده.

🎯المهمة:
1. اِفتح إعدادات جهازك.
2. شوف كم ساعة قضيت على كُلّ تطبيق خلال اليوم/الإسبوع.
3. اجمع الوقت الكلي واقسمه على 2.
4. الزمن الناتج هو الزمن المسموح ليك اليوم تستخدم فيه التلفون.
5. باقي الوقت؟
اقفله بعيد عنك.

كيف تساعد نفسك؟
📍نزّل تطبيق زَيّ Forest أو OneHour
📍فعّل "وضع التركيز" أثناء المُذاكرة أو المهام الأساسية
📍ابعد التلفون عن مكان جلوسك أو اقفله مؤقتاً.

✨النتيجة:
حتتفاجأ بكمية الوقت الفاضي الكنت ممكن تستثمرها في قرايتك، أو في النوم، أو في صحتك.

💡تنويرة:
بعد ما شفت عدد ساعاتك، شنو أول إحساس جاك؟ صدمة؟
حماس؟
رغبة في التغيير؟
احكي لينا.👀🔥

#اليوم_26
#تحدي
#تطوير_الذات
#30_days_better_learner_challenge
#تجمع_طلاب_صُناع_المستقبل
#FMSG

اليوم ال26 من التحدي✨

مهمة اليوم شكلها صعبة، بس أنت قدها مش ولا ما مش؟😔

أكيد ما حتخلي شوية تلفون يضيع يومك كله ويشتت تفكيرك....

التحدي كان بسيط جداً: أقفل التلفون أو أبعد عنه.
النتيجة؟
حتلقى معاك وقت أكتر تعمل فيه حاجات كُنت مُأجلها، تقرأ، تتعلّم، ترتّب أمورك، أو حتى ترتاح وتصفّي ذهنك.✨

فخلي بالك، نص الوقت البتوفّره اليوم ممكن يكون بداية لتغيير عاداتك مع السوشيال ميديا، وتلاقي نفسك بعد فترة أكثر تركيزًا وأقل تشتت.🔥✨

الزمن أغلى من إنك تضيّعوا ساي، عشان كدا جرب التحدي وشوف الفرق.🔥🔥

#اليوم_26
#تحدي
#تطوير_الذات
#30_days_better_learner_challenge
#تجمع_طلاب_صناع_المستقبل
#FMSG

اليوم 27 من "تحدي 30 يوم متعلم أفضل_FMSG"

🎯عنوان المهمة: "شاهد مُحاضرة أو فيديو عن الـSMART STUDY"

تحدينا لليوم حلو ومختلف وعوائده علينا جميلة لدرجة ممكن يخلي نتيجتنا كلهاA+. 🤭

🎯المُهمة: الدراسة الفعّالة أو Smart Study قد سبق واتكلمنا عنها، لكن الليلة عايزنك أنت تبحث وتتوسع أكتر وتعرف طُرق جديدة فعّالة ممكن تناسبك.

أنا كيف أبحث؟
ووين؟
وحأستفيد شنو أساساً؟👀

أكيد جا السؤال دا في بالك صح؟
طيب تعال نجاوب عليه مع بعض، الطُرق للبحث عن الدراسة الفعّالة كتيرة فإذا أنت كنت محدد تكنيك مُعين مثلاً زي تقنية البومودور أو التكرار المُتباعد تقدر تبحث عنها مباشرة، ولكن الأفضل إنك تبحث بشكل عام وتتعلم طُرق جديدة عشان تعرف كيف تطبقها وتستفيد منها بقدر الإمكان.✨✅

وين تبحث؟
إذا كنت من النوع الما بحب الفيديوهات الطويلة وبتمل بسرعة ابحث في الريلز بتظهر ليك فيديوهات كافية جداً، وانتبه عند البحث كتابة (من غير موسيقى) نحنا عايزين نستفيد كمان دنيا وآخرة ما عايزين ذنوب...👀🔥

والطريقة التانية ألا وهي اليوتيوب في محاضرات كتيرة جداً عن الـSmart Study تقدر تختار بينهم وتشوف البناسبك.

اقترح عليك ملخص كتاب ادرس بذكاء وليس بجهد.✨

أها حضرت الفيديو أعمل شنو؟
دوِّن أفضل فائدة أنت طلعت بيها وطبقها في دراستك وما تنسى تشارك التحدي مع أصحابك وتشجعوا بعض.🔥

💡تنويرة:
حاول وجرب وافشل وتاني حاول وجرب وتاني افشل عادي
عااادي بالزبااادي
نحن نسعى وإنما النجاح بيد منو؟
بيد الله الواحد الأحد.🔥💙

#اليوم_27
#تحدي
#تطوير_الذات
#30_DAYS_BETTER_LEARNER_CHALLENGE
#تجمع_طلاب_صناع_المستقبل
#FMSG

"عليكَ بالجِدِّ إنِّي لم أجدْ أحداً
حَوى نصيبَ العُلا من غيرِ ما نَصَبِ"

اليوم 27 من التحدي✨

المهمة قد تبدو
صعبة لكن هي في الحقيقة ساهلة وظريفة شديد✨🔥

موضوع الدراسة الفعّالة دا موضوع يلزمنا كلنا من غير اِستثناء
عشان كدا لو ما بحثت امشي ابحث حتخفف على نفسك تعب وزمن🔥🔥

ونحن محتاجين لشنو؟
محتاجين لطاقتنا وزمنا ديل✨

#اليوم_27
#تحدي
#تطوير_الذات
#30_days_better_learner_challenge
#تجمع_طلاب_صُنَّاع_المستقبل
#FMSG

اليوم 28 من "تحدي 30 يوم متعلّم أفضل–FMSG"

🎯عنوان المهمة: "أُدرس لمدة ساعة بعد صلاة الفجر"

يا عزيزي، كونك تقوم لصلاة الفجر دا في حد ذاته تحدي وإنجاز صح؟
يعني الشيطان يقول ليك لالا ياخ لسه عندك زمن قبل شروق الشمس كدي نوم ليك نص ساعة وقوم صلي وايىييشك شالتك نومة لما الساعة بقت 7 صباحاً، تقوم تلعن شيطانك ألف مرة.

طيب جربت شعور إنك تقاوم نزعة الرجوع لسريرك بعد تصلي الفجر، عشان بس تقعد لمدة ساعة تقرأ؟
تمام، دا تحدي جديد، هيا بنا🔥

🎯المهمة: مرحباً بك أيها الساموراي، جهز عتادك فلديك مهمة صعبة اليوم، ستحارب اليوم نزعتك الداخلية للعودة إلى النوم بعد آداء فريضة الفجر ولمدة ساعة كاملة دون تشتيت أو انقطاع؛ لتقرأ فيها شيئاً من اختيارك "أي حاجة مفيدة حتى لو مقال في جريدة المهم تستفيد منو"✅

وقفة معاك يا جميل، هل تعلم أيها الساموراي أن دماغك يكون في أفضل حالاته ليستقبل المعلومات عند الإستيقاظ من نوم عميق وراحة كافية وخاصة بعد الفجر، مما يساهم في رسوخها؟

ما تعلم صح؟
كويس هسي علمت، يلا ورينا شطارتك واستقبل أكبر قدر من المعلومات.

و ود البدري مالو...؟
"سميييين" يا سلام عليك👏🏽👏🏽*

💡تنويرة:
حصل جربت تخصص ورد قرآني معين تقراه بعد الفجر؟

وإذا عملت كدا، شفت تغيير في يومك ولا لا؟
ورينا في التعليقات عشان كل الناس تستفيد معاك.🩵🔥

#اليوم_28
#تحدي
#تطوير_الذات
#30_days_better_learner_challenge
#تجمع_طلاب_صُناع_المستقبل
#FMSG

وما الناسُ إلا اثنانِ: ذلكَ عاملٌ
ينالُ الذي يرجو وذلكَ خاملُ

اليوم 28 من التحدي✨

كونك قمت صليت الصبح وبعدها بديت تقرا فأنت كدا نلت البركة، في يومك وفي حاجتك العايز تقراها.✨

دي عادة جميلة
صحية
وما أي زول بيعملها
فلو أنت عملتها فإنت كدا سوبر
وما في حاجة حتغلبك🔥

حتصحى كل يوم وما حتكسل صح كدا؟
أكيد أكيد حتصحى🔥

#اليوم_28
#تحدي
#تطوير_الذات
#30_days_better_learner_challenge
#تجمع_طلاب_صُنَّاع_المستقبل_FMGS

اليوم 29 من "تحدي 30 يوم متعلّم أفضل–FMSG"

🎯عنوان المهمة: "اصنع تحديًا خاصًا لنفسك ليوم الغد"

🎯المهمة: اليوم دورك إنك تعمل تحدي لبكرة، تحدي تختاره براك، وبالطريقة البتناسبك!

في عادة عايز تبنيها، زي إنك تصحى قبل صلاة الفجر مثلًا، ابدأها بكرة، يمكن تكون دي الخطوة الأولى في طريق التزامك!

عندك مهارة عايز تتعلمها زي الرسم، وبالضبط رسم الأشجار مثلًا، جهز خُطتك، وخلي بكرة يكون أول خطوة في مشوارك.

ما تنسى تحدد هدف بسيط، وواقعي، تقدر تنجزه في يوم واحد.

واختار المصادر العايز تتعلم منها، والجزء العايز تتعلمه.

وفي نهاية اليوم، بعد ما تخلص التحدي، كافئ نفسك على الأنجزته، حتى لو بحاجة بسيطة.

💡تنويرة:
شاركنا شنو التحدي العايز تنجزه بكرة؟
يمكن تلقي زول مهتم بنفس الحاجة.✨🔥

حماسك كم من عشرة لليوم الختامي.🤩

#اليوم_29
#تحدي
#تطوير الذات
#30_days_better_learner_challenge
#تجمع_طلاب_صناع_المستقبل
#FMSG

اليوم 29 من التحدي✨

الناس الفوق الناجحين ديل ما ساي فتحوا يوم لقوا نفسهم فوق
سعوا
وعملوا
وهدموا عادات سلبية وبنوا بدلها عادات إيجابية

عشان كدا دائمًا خليك في حالة تقدم
واصنع لنفسك تحديات وافشل فيها واصنع تاني لحدي ما تنجح✨🔥

#اليوم_29
#تحدي
#تطوير_الذات
#30_days_better_learner_challenge
#تجمع_طلاب_صُناع_المستقبل
#FMSG

اليوم 30 من "تحدي 30 يوم متعلّم أفضل–FMSG"

🎯عنوان المهمة: "حتمًا النهاية ستصنعُ بدايةً جديدة دومًا"

🎯المهمة: خُذ وقتك الليلة وجاوب على الأسئلة دي في ورقة أو بصوت عالي أو حتى في بوست لو داير تشارك:

📍شنو أكتر عادة خلتك فخور بنفسك؟

📍شنو أصعب يوم مرّ عليك في التحدي؟ وليه؟

📍لو حترجع لأول يوم حتنصح نفسك بشنو؟

📍هل ح تواصل؟
ولو حتواصل، حتبدأ بشنو؟

نصيحة اليوم:
ما تحكم على التحدي من كم مرة قصّرت، لكن من كم مرة رجعت.

الاِنتصار الحقيقي ما في الكمال، الانتصار في التِكرار، في المُحاولة، في إنك ما سلّمت.

🎯الرسالة الآخيرة:
لو وصلت اليوم الـ30 أنت ما بس خلّيت ورقة فيها✅
أنت بنيت عادة.
أنت اِنتصرت على نفسك القديمة.
وأنت بديت تعرّف منو أنت فعليًا مش بس منو المفروض تكون.

الرحلة دي ما انتهت…
هي لسه بتبدأ، بس المرة دي بنُسخة أقوى، أوعى، وأصدق منك.🔥

💡تنويرة:
شنو خلاك تستمر لحد اليوم 30؟
وشنو حيكون أول تحدي شخصي تعملو بعد دا؟

#اليوم_30
#تحدي
#تطوير_الذات
#30_days_better_learner_challenge
#تجمع_طلاب_صُناع_المستقبل
‏#FMSG

اليوم 30 من التحدي✨

🎯ثلاثون يومًا من التطور والانضباط.
🎯ثلاثون يومًا من فهم الذات والارتقاء.
🎯ثلاثون يومًا من الإصرار والعزيمة.

والليلة وصلتَ لخط النهاية، وأنت نُسخة أقوى وأفضل من نفسك.🔥

قد تكون الأيام مضت بسرعة، لكن أثرها حيبقى طويلًا في حياتك.

شاركنا تجربتك:
شنو الشيء الغيّرك أكثر شي؟

أفضل عادة اكتسبتها شنو؟

وأصعب يوم مرّ عليك شنو؟


مهما كانت النتيجة خليك فخور بنفسك لأنك حاولت، اجتهدت، وسعيت نحو الأفضل.💙

واتذكر حتى أصغر العادات البنيتها اليوم حتصنع فارق كبير في مستقبلك، وحتشكر نفسك عليها لاحقًا.💙

#اليوم_30
#تحدي
#تطوير_الذات
#30_days_better_learner_challenge
#تجمع_طلاب_صناع_المستقبل
#FMSG

يتم الآن المؤتمر الصحفي لإعلان نتيجة الشهادة السودانية للدفعة 2024م المؤجلة.


مع خالص امنياتنا لطلاب بالتفوق والتميز والدرجات العالية.❤️

#تجمع_طلاب_صناع_المستقبل