🧭تغيُّر البوصلة، لما تحس إنك ماشي لكن ما عارف على وين...

في لحظة كدا بتمُر على كُلّ زول فينا:
ما شغال، ما مُرتاح، ما تعب، بس في داخلك في شي ضايع.
كُلّ مرة تبدأ تخصُص، حلم، طريق، وتكتشف بعد شوية إنك في غيرو.

السؤال ما: "ليه أنا مشتّت؟"
السؤال الحقيقي: "هل الطريق دا كان من جوّاي؟"


🔁أحيانًا بتبدأ بهدف ما من داخلك

زي زول ماسك خريطة زول تاني…
طريق اِختارتو عشان (الناس بتحبّو) أو (ماشي مع السوق)
لكن قلبك ما كان معاه.

🔄وأحيانًا داير تلحق الإنجاز… قبل ما تفهم الرحلة

بتجري ورا صورة، نتيجة، خطوة…
لكن من غير ما توقف تسأل نفسك: "أنا داير أصل لشنو؟"


تشتُّتك ما عيب، بلّ هو رسالة...

مُشكلتنا؟
إننا بنلوم نفسنا بدل ما نسمعها.

لكن لو سألت تشتُّتك:
“بتتشتّت ليه؟ بتخاف من شنو؟”
ممكن تكتشف حاجات جواك… ما كنت منتبه ليها.

🧠 البوصلة ما ضاعت، بس اتغطّت بالغبار...

الصوت الجواك ما اختفى، بس اتخبى وسط زحمة الصور، الناس، المقارنات...

إنت مُحتاج ترجّع البوصلة لنقطة البدء:
نقطة الصدق.

🎯 كيف ترجع لبوصلة صادقة؟
1-اسأل نفسك "ليه؟"
قبل "شنو؟"
2-دوّن حيرتك عشان تشوف نمطها.
3-أمشي ببطء لكن بوعي.
4-اربط كل هدف صغير بسبب كبير.

💥 الرسالة الآخيرة:
أنت ما ضايع، أنت بس مُحتاج توقف وتسمع روحك.

تغيُّر البوصلة ما فشل، لكن فُرصة حقيقية تبدأ من جديد، من جوّاك.

"أنا مستعد أسمع وأبدأ بجدّ، المرة دي من نفسي"

#تجمع_طلاب_صناع_المستقبل
#FMSG

كلمة شكر وعرفان

من أعماق القلب تتقدم أسرة تجمع طلاب صناع المستقبل بأجمل عبارات الشكر والتقدير لكل من ساهم في برنامج الحصص الختامية FMSG Spottinga.

هذا التمييز لم يكن ليبلغ هذا المنال لولا جهودكم المباركة، وإخلاصكم، وهمتكم.


•إلى الأساتذة الرائعين:

كنتم اليد الممتدة والمُرشدة وروح هذا المشروع.

كل كلمة، وكل جهد، وكل دقيقة وهبتموها كانت محل تقدير واحترام كبير.

•أ.علاء الدين يوسف - مادة التربية الإسلامية.
•أ.الآء عوض طه مادة الحاسوب.
•أ. إبراهيم أحمد الرضيّ - مادتيّ الكيمياء والأحياء
•هويدا عبدالمنعم- مادة الجفرافيا.
•أ. سعاد بامنت - مادة الدراسات الإسلامية.
•أ. معز صديق -مادة اللغة العربية.
•أ.محمد أحمد عوض- مادة التاريخ.
•أ.سحر عبدالله - مادة الفيزياء.
•م. عبدالرحمن محمد الحسن - مادة الرياضيات.
•د.أبوبكر حمزة - مادة اللغة الإنجليزية.



وباقي الأساتذة الذين همّوا بالإيجاب على المشروع لكن الظروف لم توفقهم، جميلكم ومبادرتكم محفوظة لدينا.

إن ثمرات هذا البرنامج في ما حققه من أثر في قلوبنا وفي طريق الطلاب الممتحنين.


"وهذه ليست سوا البداية".

#تطوع
#الشهادة_السودانية
#تجمع_طلاب_صناع_المستقبل
#FMSG

"هل هاتفك سبب فشلك الدراسي أم أنت هو السبب الحقيقي؟"👀

إذا كُنت طول اليوم بتقلب في السوشيال ميديا، ومن ريلز لريلز، ومن فيس لإنستا...
طبيعي التلفون يأثر على تركيزك في الدراسة، ومجهودك، وأسوأ حاجة أنه حيضيع وقتك!

التلفون عبارة عن أداة وبس، زي أي أداة تانية، أنت البتختار تستخدمه في مصلحتك أو ضدك.

📊في دراسة ميدانية اتعملت في باليوم (برازيليا):
قاموا بتتبُّع 43 طالباً باِستخدام تطبيقات لمُراقبة الاِستخدام، كل 100 دقيقة إضافية يومياً قضوها على التلفون أدّت لتراجع في الترتيب الأكاديمي بمقدار 6.3 نقاط من أصل 100.

يعني في اِرتباط مُباشر بين زيادة وقت اِستخدام الهاتف، واِنخفاض الأداء الدراسي!

بس زي ما وضحّت فوق أن التلفون دا أداة زي غيره من الأدوات..

💡عشان كده دي شوية نصائح عشان يكون وسيلة لتفوقك:
📍وقت القراية أبعد التلفون منك خالص!
📍حدد وقت معين لاِستخدام التلفون.
📍اِستغل التلفون في تطبيقات مُفيدة، وبتساعدك على الدراسة.
📍إذا بتدرُس من التلفون، لمن تبدأ تقرأ، اِتأكد إنك قفلت الإشعارات من أي تطبيق مُمكن يشتتك.
📍حاول تخلي التلفون زي مُكافأة بعد إنجاز المهام، والدراسة.

🎯في الآخِر:
التلفون ذات نفسه ما السبب، لكن طريقة اِستخدامك ليه هي البتحدد!
خليك واعي، واِستخدمه في الحاجات المُفيدة.👌🏻✨

شاركنا كيف بتقدر تستفيد من التلفون، وتحوله لأداة فعالة للدراسة؟✨

#تجمع_طلاب_صناع_المستقبل
#FMSG

شنو هي خُطة الـ21 يوم لإعادة ضبط الدِماغ؟🤔

في لحظات كتيرة بتحس إنه راسك زحمة أكتر من أي شارع في الدنيا...

زحمة أفكــــار...
زحمة مشــــاعر...
زحمة قـــرارات...

وتلقى روحك تايهة...
وتسأل نفسك:
أنا لي بقيت كدا؟
ليه ما بقدر أركّز؟
ليه كل شي بقى تقيل؟
وأنا وين وسط الزحمة دي كُلها؟

القصة يا عزيزي، إنه عقلنا بيتعب من التفكير الزائد، وأحيانًا بيضيع وسط الضغوط والمُشتتات، ومرات بيعلّق كُلو كُلو.😂

لكن هنا بتجي فكرة بسيطة وعميقة في نفس الوقت والهي ما تُسمى "بإعادة الضبط"

عشان نعيد ترتيب أفكارنا، ونفكك الخيوط المُتشابكة في ذهننا، ونبني عادات جديدة تكون صحية ومُفيدة.

عقلنا البشري خارِق...
عِنده القُدرة يتشكّل ويتبرمج من جديد، ويكسر العادات البتستهلكه...
بس دا ما بيحصل في يوم وليلة.

بيحصل متين؟
لما الحاجة تتكرر لفترة معينة، والعلم بقول: 21 يوم كفاية تغيّر طريقة تفكيرك، ردود أفعالك، وعاداتك القديمة.💯

فلو التزمت بخُطة الـ21 يوم:

🎯 حتقلل الضغوط والقلق.
🎯 حيتحسن تركيزك وانتباهك.
🎯 حتقوي نظرتك الإيجابية.
🎯 حتبني عادات صحية.
🎯 والأهم: حترجع تحس بالسلام والوضوح الذِهني.

يمكن حصل معاك إنه كُنت عامل مُنبه، ويوم من الأيام ما اِشتغل، بس أنت صحيت!
ليه؟
لأنه دماغك اِتبرمج على كدا...
ودي نُقطة في صالحك، لو عرفت كيف تستغلها صح.👍

وكمان لو عايز تسهّل على نفسك جرب الخطوات دي:

📍 جيب ورقة وقلم، واكتب خُططك وهدفك بوضوح.
📍 أعمل مُنبه يومي يذكرك.
📍 شوف صديق يشاركك الرحلة.
📍 ولو فاتك يوم كمّل عادي، ما توقف!

وفي النهاية، ما حنوعدك إنك بعد الـ21 يوم حتتغير 180 درجة وحتبقى سوبر مان...
لكن حتحس إنك شايف العالم بنظرة جديدة، وفهم مختلف لكل الحولك.✨

🎯 ما تنتظر اللحظة المثالية، ولا وقت يكون فيه عقلك فاضي تمامًا؛ لأنه البداية الحقيقية بتجي وسط الزحمة، لما تقرر تطنش صوت العالم، وتسمع لنفسك.👌🏻✨

#تجمع_طلاب_صناع_المستقبل
#FMSG

شنو الحاجة المهمة الأنت مأجلها ليك كم يوم؟

العلاج النفسي بالفن.....
كيف يمكن للفن المساعدة في العلاج النفسي؟

يمكن للفن أن يلعب دورًا هامًا في العلاج النفسي من خلال توفير وسيلة للتعبير عن المشاعر والأفكار والمساعدة في تحسين الصحة النفسية وتعزيز الوعي الذاتي وتطوير مهارات التأقلم. ويمكن استخدام أنواع مختلفة من الفن في العلاج النفسي، بما في ذلك الرسم والنحت والكتابة الإبداعية والرقص.ويساعد الفن في:-

- التعبير عن المشاعر: يمكن للفن أن يساعد الأفراد على التعبير عن مشاعرهم وأفكارهم بطريقة إبداعية.
- التنفيس عن التوتر: يمكن للفن أن يساعد في التنفيس عن التوتر والضغوط النفسية.
- تعزيز الوعي الذاتي: يمكن للفن أن يساعد الأفراد على فهم أنفسهم بشكل أفضل.
- تطوير مهارات التأقلم: يمكن للفن أن يساعد الأفراد على تطوير مهارات التأقلم مع التحديات النفسية.

فوائد استخدام الفن في العلاج النفسي
- تحسين الصحة النفسية للأفراد.
- تعزيز الوعي الذاتي ومساعدة الأفراد على فهم أنفسهم بشكل أفضل.
- مساعدة الأفراد على تطوير مهارات التأقلم مع التحديات النفسية.

#تجمع_طلاب_صناع_المستقبل
#FMSG

التعب الذهني وأثر تراكم المعلومات:🧠

في العصر الرقمي يا عزيزي ، بنتعرّض يومياً لكم هائل من المعلومات ، سواء كان من وسائل التواصل، الدراسة، والعمل.

و التدفّق المستمر للمعلومات دي بسبب تعب ذهني، وهو شعور بالإرهاق العقلي، فقدان التركيز، وضعف القدرة على اتخاذ القرار.🥴

أثر تراكم المعلومات:🧐

- تشتيت الانتباه: كثرة المعلومات تُضعف التركيز وتشتّت الذهن.
- بطء الفهم والمعالجة: الدماغ بحتاج وقت عشان يقدر يستوعب كل معلومة، ف بالتالي تراكمها بتسبب في تعطّله.
- القلق والتوتر: خاصة عند الشعور بالعجز عن اللحاق أو الفهم.
- ضعف الإنتاجية: بسبب الإرهاق الذهني، بتقل كفاءة الدراسة أو العمل.

طيب يا عزيزي والحل شنو؟؟ 🤔

- تنظيم مصادر المعلومات.
- أخذ فترات راحة ذهنية.
- استخدام تقنيات مثل تدوين الملاحظات أو خرائط ذهنية.
- تحديد أولويات التعلم وعدم استقبال كل شيء دفعة واحدة.

التعب الذهني في الحياة اليوميه، زي طالب بحاول يذاكر كل المواد وينجز في وقت قصير ، حصلت كتير صح ؟
ف أنت عشان تنجز كل المواد ، نظم ، ورتب وشوف الأولى ، عشان تتجنب التعب الذهني. 👌

ختاماً:
التعب الذهني يا عزيزي غير أنه برهق عقلك ، ممكن يتسبب ليك في فشل كل حاجاتك، لأنه تفكيرك مشتت ومعلوماتك م منظمة ، ف حاول تتجنبه.
و لازم نختار بعناية العايزين نسمعه ، ونقراهو، عشان نحمي عقولنا من الإرهاق العقلي.🫶🤍

#تجمع_طلاب_صناع_المستقبل
#FMSG

✨ لماذا ندرس مواد ليس لها علاقة بتخصصنا؟
▪️ يا ترى إنتو زاتكم يوم قعدتو وسألتو نفسكم السؤال ده؟
▪️ ليه نحنا بنقرا مواد «ما ليها أي علاقة» بالتخصص الأكاديمي البندرسو؟
▪️ وهل ده فعلاً مهم؟ ولا بس كده ساي ملاحق زايدة في المنهج؟

الحقيقة يا أحباب، كتير مننا بنشوف المواد دي عبء، وبنقول في نفسنا: «ياخي أنا جاي أقرأ قانون (ولا إدارة، ولا هندسة)، مالو يدخلوني فلسفة، ولا علم نفس، ولا حتى إحصاء؟»
لكن صدقوني، الحكاية أعمق من كده.

💭 ليه بندرس مواد خارج التخصص؟

أولًا: المواد دي بتساعدنا نكوِّن عقلية واسعة، يعني ما نبقى ناس محدودين في حتة ضيّقة. مثلًا زول بدرس هندسة، لمن يقرأ شوية اقتصاد أو إدارة، ح يتعلّم كيف يدير مشروعو مستقبلاً.
وتخيل طالب آداب بدرس إحصاء، ده بيخليهو يقدر يحلل بيانات ويدرس ظواهر اجتماعية بطريقة علمية.

ثانيًا: المواد دي بتنمِّي فينا مهارات خفية. زي التفكير النقدي، وطرق البحث، والقدرة على النقاش والتعبير. يعني تلقاك بعد كورس صغير في الفلسفة ولا في اللغة، بقيت تناقش وتدافع عن أفكارك بثقة، وكلامك بقى مرتب وحِلو.

ثالثًا: مرات المواد دي بتكشف لينا ميول جديدة كنا ما عارفينه. يعني ممكن تدخل قاعة مادة عامة وانت زاهد فيها، تطلع منها بتحبها حب شديد 😅، ويمكن حتى تفكر تتخصص فيها بعدين.

🌸 وما ننسى كمان..
الجامعة ما بس شهادات وكورسات. الجامعة مصنع عقول، ومختبر أفكار، وساحة تلاقح ثقافات. والمواد الخارجة عن تخصصك دي جزء من «التشكيلة الجميلة» البتخلّيك تتخرج زول مختلف تمامًا .

📌 الخلاصة:
نحن بندرس المواد دي عشان نكون أشخاص متكاملين، نقدر نفهم العالم من زوايا مختلفة، ونتعامل مع تحدياتو بعقلية مرنة، ولسان فصيح، وأسلوب راقي.

💬 إنتو زاتكم شنو رأيكم؟
شنو أكتر مادة خارج تخصصكم حسيتوها أضافت ليكم؟ ولا لسه شايفينها «وجع راس» ساي؟ 😄👇

#تجمع_طلاب_صناع_المستقبل
#FMSG

"ستٌّ من أفضل العادات الدينية التي ستُغيّر حياتك"

فإنّ لله نفحات، وإنّ لهذه العادات آثارًا تُبهج القلب وتُنير الطريق:

الإستغفار:

هو المُفتاح الأول لكل الأبواب المِغلقة، والدواء المُستحيل يخطئ طريقه للعافية، وكل إنسان يُكثر منه حيشوف البركة في يومه والتيسير في كل شؤنه والفرج بعد الضيق.
زي ما قال ربنا تعالى في سورة نوح:
﴿ فَقُلْتُ ٱسْتَغْفِرُوا۟ رَبَّكُمْ إِنَّهُۥ كَانَ غَفَّارًۭا ‎۝١٠ يُرْسِلِ ٱلسَّمَآءَ عَلَيْكُم مِّدْرَارًۭا ‎۝١١ وَيُمْدِدْكُم بِأَمْوَٰلٍۢ وَبَنِينَ وَيَجْعَل لَّكُمْ جَنَّـٰتٍۢ وَيَجْعَل لَّكُمْ أَنْهَـٰرًۭا ‎۝١٢ ﴾

صلاة الوتر:

ركعة واحدة في آخر الليل، لكنها أعظم من ساعاتٍ طويلةٍ من غير خشوع، يودّع بيها المؤمن يومه، ويودع فيها همّه بين يدي ربه، ويُغلق بيها كتاب يومه بختم من نور.
قال النبي ﷺ:
"اجعلوا آخرَ صلاتكم بالليل وترًا"

تلاوة القرآن بتدبُّر:

هو الكنز الما بينفد، والماء الما بيأسن، والنور الذي لا يُطفأ، آية واحدة ممكن تغيّر قلبك، وتردّك إلى الله ردًا جميلاً، القرآن هو غذاء الأرواح وشفاء القلوب، ورفيق الطريق لمن كان في قلبه ذوق للحق.
قال تعالى:
﴿أَفَلَا يَتَدَبَّرُونَ ٱلْقُرْآنَ أَمْ عَلَىٰ قُلُوبٍ أَقْفَالُهَا﴾


أذكار الصباح والمساء:

هي ما عبارة عن كلمات تُتلى وخلاص، بل هي سياجٌ يبيحيط بيك، وطمأنينة بتلازمك، وبركة ترافق خطواتك، والبواظب عليها، حيعرف إنّ الله ما بيخذل إنسان ذكره.
قال ﷺ:
"من قال: بسم الله الذي لا يضر مع اسمه شيء في الأرض ولا في السماء وهو السميع العليم، ثلاث مرات، لم يضره شيء"

الصلاة على النبيﷺ:

هي عبادة ما بتحتاج لطهارة ولا عندها زمان ولا مكان محدد، لكنها بتفتح للعبد أبواااب من الرحمة، وتقرّبه من محبوبهﷺ، وبتزيل عنه الهموم وتُنور قلبه بالحُبّ الصادق.
قالﷺ:
"من صلّى عليّ واحدة، صلى الله عليه بها عشرًا"

برّ الوالدين:

هو السرّ الأعظم في التوفيق، والبركة ورضا الله، الزول البيحسن لوالديه فقد نال دعاءً لا يُرد، ومحبّة لا تزول، وتوفيقًا يتبعه توفيق.
قال النبيﷺ:
"رِضا الله في رِضا الوالد، وسخط الله في سخط الوالد"


خِتاماً..
العادات دي ما حتكون تقيلة على من صدق، ولا بعيدة على من أراد...

دي ستّ عادات، لكنها بتحمل من الخير ما يكفي قلبك، ويهذب حياتك، ويقودك برفقٍ لجنان الله ورضوانه.

فابدأ اليوم، ولو بخطوة، فمن سار إلى الله، وجده أرحم به من أمّه، وأقرب إليه من نفسه.
واعلم أن السعادة ليست أمنية تُنتظر، بل طاعة تُصنَع، وقربٌ يُعاش.
ففي الركعة الخاشعة، والذكر الصادق، والدعاء في جوف الليل… تُولد حياةٌ جديدة لقلبك.
ولا تزال طُرق النور مفتوحة، والله يُحبّ المُقبلين.💙

#تجمع_طلاب_صناع_المستقبل
#FMSG

عايز تستفيد من الذكاء الإصطناعي في كتابة بحثك العلمي، لكن مُتردد؟👀

ما تخاف وتعال لي في النص دا حوريك خطوة بخطوة كيف تستخدام أدوات الذكاء الإصطناعي بطريقة ذكية، ترفع من مستوى بحثك وتخلي الدكتور يقول: "الطالب دا شغال صاح!"💯🔥

نقول بسم الله ونخش في الموضوع طوالي💪🏻

📍اِختيار الموضوع المناسب:

معظم الطلاب بواجهوا صعوبة في اِختيار موضوع البحث؛ عشان كدا أنا حاديك خُطوات كتكوتة كدا حتخليك تلقى فِكرة عبقرية تثير إعجاب الدكتور:

📌الخطوة الأولى: اطلب المُساعدة من الذكاء الإصطناعي.
اسأل أدوات الذكاء الإصطناعي (زي ChatGPT) عن أفكار بحوث علمية في المجال الأنت عايزه.

📌الخطوة الثانية: اِستخدم Google Scholar بذكاء.👌🏻
اكتب داخل الموقع فكرة عامة عن المجال الأنت مُهتم بيه وبعدين حتظهر ليك عدد كبير من الأبحاث والمقالات الأكاديمية.

مُهمتك إنك تقرأ العناوين والمُلخصات بسرعة، وإذا لقيت فكرة غريبة شوية
أو مُشكلة ما واضح حلها
أو حاجة جذبت اِنتباهك وخلتك تتساءل عنها، فهنا دي نُقطة الاِنطلاق لبحثك.🔥🎯

📍جمع المعلومات وتحليلها:
1. اعرض فكرتك على موقع Research Rabbit الهو عبارة عن منصة بتساعدك في اِكتشاف أبحاث علمية مرتبطة بموضوعك.👌🏻

2. استخدم Hypernote داخل منصة Taskade.
أداة رائعة لتسجيل الملاحظات بطريقة منظمة، مع إمكانية ربط الأفكار والمفاهيم ببعضها داخل الملاحظات.
مفيدة جدًا لو بتحب تشتغل بأسلوب بصري ومنظم.✨

3. بعد كتابة البحث:
استخدم موقع Paperpal أو موقع صحّحلي العربي.

📍التأكد من الأصالة وترتيب وتنسيق المراجع:

عندك أداة "Mendeley"
بتساعدك في تنظيم المصادر، وإدراجها تلقائياً بصيغة APA أو MLA وغيرها.

خلي الذكاء الإصطناعي مُساعدك الذكي، لكن خليك أنت الباحث الحقيقي البيعرف يربط بين الأفكار، ويصيغها بأسلوبه، ويضيف لمسته الخاصة.👌🏻✨

الدكتور ما بنبهر بس باللغة المُرتبة أو المصادر الكثيرة…

الدكتور بنبهر بباحث فاهم الفكرة، عارف يشرحها، وقدر يستخدم الذكاء الاصطناعي بطريقة ذكية وفعّالة.🔥💪🏻

الذكاء الإصطناعي فعّال لو عرفنا نستخدمه بالطريقة الصح.💯👌🏻

#تجمع_طلاب_صناع_المستقبل
#FMSG

-هوي ها ااا عباس.
="..."
-عبااااس.
="..."

-عوووووك يا إنسااان.
=ياخ مالك يا عبدو، ياخ ما تكرهنا.
-ياخ كدي أكرهك ولا ما أكرهك لي ساعة بتكلم معاك.
=ما سامعك.

-مالك أنت يا زول؟🤔
=ياخ والله يا عبدو، ملاحظ لنفسي الأيام دي بقيت ماا بركز وبسرح كتير وأصلو ما عندي مزاج أقوم من سريري دا، ما عارف نفسي داير أموت ولا مالي.

-يعني هسي الزول لما يكون حاسي بكلامك القلتو دا معناها داير يموت؟
والله أنت ما داير تموت لكن شكلك كدا جنيت بس.🤩👨🏻‍🦼

=يا زول، أنت داير تواسيني ولا داير تزيدها علي عليك الله قوم اتخارج من جمبي بفنك بالتربيزة دي هسي.
-خلاس خلاس ااا عباس بهظر معاك ساي.🤣🤣
اسمعني حصل سمعت بمبادرة تجمع طلاب صناع المستقبل؟

=ديل منو كمان، عليك الله صناع مستقبل شنو اختاني ياخ.
-أنت بس أسمع كلامي دا، دي مبادرة شغالة شغل جميل خالص أي موضوع دايرو بتلقاهم اتكلموا ليك عنو تحلف تقول بحسوا بيك بس.✨🚶‍♀️

=طيب أها وبعدين أنا أسوي ليهم شنو يعني.
-ياخ زول سجمان خلاس، أنت ما حتسوي ليهم هم الحيسوا ليك.

=وحيسوا لي شنو نان؟
–شفت يوم الخمس البكرة دا عاملين لينا جلسة اِسمها "نُقطة تحول" بتكلموا فيها عن الموضوع المتعبك دا زاتو.

=عليك الله، حلفتك كان ما بتهظر.
-ياخ أهظر شنو جادي معاك يا زول، وهسي كمان دي الجلسة التالتة حيتكلموا فيها عن التشتت وإنك كيف تزيد تركيزك يا أبو تركيز أنت.
وغير دا كلووو حيتكلموا فيه عن موضوع الحماس والفتور، وإنك كيف تكون متحمس طوااالي كدا.🔥

=ياخ والله يا عبدو، إنت أحسن صاحب في الدنيا دي، كدي تعالي جاي.✨
-يا زول بلا جاي معاك، يلا قوم فكفك من هنا وجهز نفسك للايف بُكرة.

=قلت لي يوم الخميس لكن الساعة كم كدي؟
-الساعة 8:00 بالمسا بتوقيت بلدنا دي.

=قداااام بس يا زولي.🔥

"نُقطة تحول" اتعمل عشانك أنت فيا تحضر يا تحضر ما عندك أيي خيار تاني.✨🔥

#تجمع_طلاب_صناع_المستقبل
#FMSG

"تجمع طلاب صُناع المستقبل عشانك أنت عزيزي المُشاهد🔥"

حصل مرة سألت نفسك إنه هل الشاطر أكاديمياً يعني ذكي؟🤔📚

السؤال قد يكون بسيط، بس إجابته عميقه شديد.

ما بالضرورة الشاطر أكاديمياً يكون ذكي، في ناس كتيرة بتربُط التفوق الأكاديمي بالذكاء.

في ناس بتتفوق دراسياً ما عشان الذكاء، بس لأنها مُجتهدة، ومُنظمة، أو عندها قُدرة على الحفظ ومهارات التركيز، وما ضروري تكون اذكى من غيرها.🧠👌

الذكاء الحقيقي أوسع من كدا

وحسب عالم النفس "هوارد غاردنر" القال إنه أنواع الذكاء مُختلفة، منها:

📌ذكاء لغوي.
📌ذكاء رياضي.
📌ذكاء إجتماعي.
📌ذكاء حركي.
📌ذكاء فني.

يا عزيزي مُمكن الطالب ما يكون مُمتاز في الدراسة، ولا الأول على فصله، بس عبقري في المهارات اليدوية والإبداع، ومهارات التواصل والحياة.✨👌🏻

خِتاماً:
التفوق الأكاديمي جانب من الذكاء، ولكن الذكاء الحقيقي أوسع وأشمل من إنه يكون مُجرد درجات في المدرسة.

عشان كدا يا عزيزي، لازم نقّيم الناس بنظرة أوسع، مش بس من كراساتهم ودرجاتهم، كل زول عنده لمعة مختلفة.🤍✨

#تجمع_طلاب_صناع_المستقبل
#FMSG