لظروف خارجة عن الإرداة سيتأجل اللقاء إلى الغد بمشيئة الله.

جزاكم الله خير على حضوركم وحماسكم.❤️

"الفيزياء والرياضيات: لما تبني عقول الناس بدل ما تسليهم"

"أها يا زول، رياضيات؟
فيزياء؟
دا تخصُص ولا تعذيب؟"🙂

من زمان والناس بتتعامل مع الرياضيات كأنها مادة غريبة، بعيدة، مالها دخل بالحياة.

لكن لو وقفت لحظة وسألت نفسك:

شنو الما فيه رياضيات اليوم؟
من التطبيقات الفي موبايلك…📱
للذكاء الاصطناعي…🤖
للشبكة البتحوّل صوتك لرسالة...📡

ومن ورا الرياضيات؟
الفيزياء...

القوانين البتحكُم حركة الأشياء، الضوء، الحرارة، الكهرباء، وحتى الكون...

تخيل معاي: كل فكرة عظيمة في الهندسة، الطب، الإقتصاد…
وراها نمُوذج رياضي أو معادلة فيزيائية قدرت تشرح أو تتنبأ أو تحلّ مشكلة.

لكن للأسف، المجتمع بيشوفك طالب مادة صعبة ساي...🫠
ويسألك: “دا ح يفيدك في شنو؟”

والحقيقة؟
الفيزياء والرياضيات ما بس تخصُصات…
دي طُرق تفكير، وعتاد ذِهني يخليك تحلّ المشاكل بمنهجية،
حتى لو المشكلة ما ليها علاقة بالأرقام...

العقل الرياضي ما بدرُس معادلات، بدرّب عضلة التفكير...🧠

والزول البيقدر يفكر، ما بحتار كتير في خياراته في سوق العمل.

وأنت كطالب رياضيات وفيزياء فأنت إنسان مُميز بكُلّ معنى الكلمة، لي؟
عشان ما كل زول بقدر يكون طالب رياضيات وفيزياء✅🔥

لو أنت بتحب الرياضيات والفيزياء ومهووس بيهم فدا مجال تقدر تخته في قائمة خياراتك، من غير تفكير كتير✅

#تجمع_طلاب_صناع_المستقبل
#FMSG

تعفُن الدِماغ (Brain rot):🧠📱

يعني شنو؟
وجا من وين المُصطلح دا؟

قاموس أكسفورد اِختار الكلمة دي على إنها تكون كلمة السنة لعام ٢٠٢٤!

وباِختصار هي ما بتعني التعفُن الحرفي بل هو "مُصطلح مجازي"
حاجة بتعبِّر عن "التأثير السلبي لاِستهلاك المحتوى التافه" الممكن حضرتك تكون بتعمله...👌🏻

يعني الـscrolling
في مقاطع التيكتوك والـreels والـshorts ما بس ممكن تكسبك ذنوب و بتضيع نتك ووقتك، بل كمان عقلك!😯

وزي ما عرّفها قاموس جامعة أكسفورد: "التدهور المُفترض للحالة الذهنية أو الفِكرية للشخص، خاصةً كنتيجة للإفراط في اِستهلاك مواد (وتحديداً الآن المُحتوى المنشور على الإنترنت) تُعتبر تافهة أو غير مُحفِّزة للتفكير" جاك العلم؟🫣

نقعُد براحة ونفهم الحاصل...👨🏻‍🦼

يعني المُحتوى عديم الفائدة، التافه والقصير جدًا والمُمكن من خلاله في ١٠ دقائق بس تمُر على أكتر من ٢٠ مقطع مُضر للدرجة دي!

📌كيف ما مُضر وفي ناس بقت تشوف الفيديو الخمسة دقائق طويل...

📌غير التركيز المُنخفض وإنه بقى في مهرب جديد من المهام...

📌دا غير الشعور بالذنب والضيق لما الزول يدرك قدر شنو ضيع من وقته، على مقاطع إن ما كانت مُضرة فقد لا تكون نافعة...

جرب أسأل نفسك بعد الجلسة الطويلة وأنت بتحضر: اِستفدت شنو؟
وهل هي اِستفادة حقيقية ولا بس معلومة عرفتها؟🫥

وورينا قرارك الجديد بهذا الخصوص🫡

#تجمع_طلاب_صناع_المستقبل
#FMSG

صندوق الأسئلة والتعليقات:

شاركونا اراءكم🔥🔥
https://forms.gle/4ZHFZPbrBgnoGdck7

تكملة اللقاء

📌 فعِّل الرادي الجواك، ذاكر بصوت عالي...

بتقرأ بصوت عالي ولا بِتفضِّل الهدوء والسكون؟! 🤔
كُل واحد وليه الطريقة المُعتمد عليها، وشايفها ظابطة ومُنجزة، بس في نفس الوقت لا يضُر تجربة طُرق جديدة قد تكون أفضل "بس ما تكون وقت الامتحانات طبعًا 😉".

📍المُذاكرة بصوت عالي خيار مُمتاز للأغلبية، وإن كانت لا تخلو من بعض الآثار الجانبية، زي إحساسك بأنو صوتك راح وحلقك نشف، ودي ح نعرف كيف نتجنبها، بس تعال نشوف فوائدها أول...

▪️بنستخدم أكتر من حاسة: البصر، السمع والنُطق، وده بِنشِّط الذاكرة البصرية والسمعية، وبتستفيد أقصى استفادة مُمكنة من جلسة مُذاكرتك.
▪️بتزيد تركيزك وتقلل من سرحانك، لأنو أكيد ما ممكن تكون بتقرأ بصوت وتسرح في حاجة تانية.
▪️بتساعد على الحفظ والتثبيت، والسماع المُتكرر لصوتك بقوي الذاكرة، ويساعد في تذكر المعلومات لفترة أطول، والامتحانات بتبقى أسهل.
▪️برضو بتساعد على الفهم، لأنها أقرب لأنك بتشرح لنفسك، والشرح بِثبِّت الفهم.
▪️والأهم بتكون جاهز للأسئلة والنقاشات، وعقلك واثق من أنو شاف المعلومة وسمعها وقراها وأكيد قادر على إجابتها.

🎙️ويا سلام لو سجَّلت ريكورد بصوتك وسِمعتوا في الوقت اللي ما قادر تذاكر فيه، كده ح تضرب عصفورين بحجر، تستفيد من زمنك، وتركِّز الفات...

📍وبالنسبة لشوية الآثار القُلناها، لو حسيت صوتك تعب، أو حلقك نشف، خُد بريك قصير، واشرب موية كفاية، ودي برضو مُهمة للتركيز، لأنو جسمك وعقلك محتاجين للترطيب🧊.

أكيد في فوائد تانية كتيرة، مُنتظرنكم تشاركونا بيها 🫡.

#تجمع_طلاب_صناع_المستقبل
#FMSG

قصة نجاح :
منو فينا الما سمع بدكتور التجاني الماحي!
اخد ليك دقائق روّق من القراية وهم الامتحانات وتعال ☕️🫢.

ما كان دكتور عادي ،بل -ماشاءالله-حقق إنجازات رائعة ما بس على مستوى السودان بل على مستوى إفريقيا!

•"دكتور التجاني الماحي طبيب نفسيّ،ورائد الطب النفسي في إفريقيا".

•وكمان من المؤسسين لجمعية الطب النفسيّ في إفريقيا.

•وبالنسبة للدراسة،اتخرج في كلية كتشنر الطبية ،التابعة لكلية غردون المعروفة حاليًا بـجامعة الخرطوم.

•دبلوم عالي في الطب النفسيّ من إنجلترا.

•أول إفريقي يتخصص في الطب النفسيّ.

•انضم للخدمة الطبيّة السودانية.

•كان مستشار إقليميّ في منظمة الصحة العالمية حول الصحة النفسيّة.

•عمل قسم الطب النفسيّ في جامعة الخرطوم.

•ما يقارب العشرين ألف مجلد!

غير انه كان رئيس مجلس السيادة ,دكتور ورئيس🫡.

وغيرها !

النجاح جميل ومبهر ومبهج لكن هل انت مستعد تدفع الثمن؟

#تجمع_طلاب_صناع_المستقبل.
#FMSG

شايفاك يا العندك مُهمة وعامل رايح وشغال بعدين، بُكرة، هسي ما فاضي...🌚

حصل سمعت بمُصطلح التسويف؟🤔

التسويف يا عزيزي، هو تأجيل المهام أو تأخير البدء فيها، رُغم معرفتك بأهميتها، وغالباً بيكون بسبب الكسل، التردُد، أو الخوف من الفشل.🚶‍♀️

نحل المُشكلة دي كيف؟!

في بعض الناس بتستخدم حاجه اِسمها "مُؤقِت" في تقليل أو قتل التسويف، أرح قدام عشان نفهم أكتر.👌🏻

📍أولاً: علاقة المُؤقِت بالتسويف شنو؟

التسويف بجي من الإحساس بإنه المُهمة كبيرة، أو مُملة، أو ما ليها وقت مُحدد.

والمُؤقت دا بيدي إحساس بوضوح البداية والنهاية، فالعقل كدا بيقبل يشتغل.🧠✅

📍ثانياً: كيف المُؤقِت بساعد في تقليل التسويف؟

المُؤقِت بقلل رهبة البداية:
لما تقول مثلاً: (بس 15 دقيقة) العقل بتجاوب أكتر بدل ما يشوف المُهمة صعبة.

بيركز الاِنتباه:
لما يكون عندك زمن مُحدد، بخليك تنجز بدون تشتُت أو مُماطلة.

بيخلق ليك اِلتزام نفسي:
تشغيل المُؤقِت بشبه لينا "إتفاق داخلي" يعني تبدأ وتخلص.

المُؤقِت بربُط الإنجاز بالإحساس بالإنجاز السريع:
كُلّ خطوه بتخلصها عشان تنجز مهامك بتشعرك بالتقدُم، ودا بقلل التسويف مع الوقت.

طيب أنا استخدم المُؤقِت دا كيف؟🤔

📍أولاً: عندنا تقنية بومودورو(Pomodoro):
مثلاً: 25 دقيقة شُغل+5 دقائق راحة، تتكرر 4 مرات، بعدها راحة أطول.

📍ثانياً: تقسيم المُهمة لأجزاء صغيرة بوقت مُحدد:
مثلاً: 10 دقائق بحث، 10 دقائق كتابة، 5 دقائق مُراجعة.

📍ثالثاً: تحدي الزمن:
تحدي الزمن بمعنى إنك تخلص الجُزء المُحدد قبل ما المُؤقِت يرن.

النتائج المُتوقعة:
-تقليل التردد.
-تنظيم الوقت.
_زيادة الإنجاز اليومي.
-تقليل التوتر المُصاحب للتراكُم.

خِتاماً:
حاول تبطل كسل وتأجيل، وحاول تنجز مهامك وشغلك في وقته المُحدد؛ عشان تكون مُرتاح نفسياً وعقلياً من التفكير، وعشان تكون نشيط دائماً ومُتميز.👌🤍

#تجمع_طلاب_صناع_المستقبل
#FMSG

🔴 عاجل | إعلان حالة الطوارئ القصوى 🔴

تحذير رسميّ من السلطات العليا لتجمع طلاب صناع المستقبل:

تم إعلان حالة الطوارئ في التجمع ابتداءً من الساعة 12:00 منتصف الليل وحتى إشعار آخر.

جميع المؤشرات تؤكد أن الساعات القادمة حاسمة.

الكتائب المعنيّة ترفع استعدادتها للتدخل السريع لتكون معكم في ميدان امتحانات الشهادة السودانية الدفعة 2024:


📌مراجعات نهائية مكثفة.
📌دعم أكاديمي ونفسيّ.
📌 نصائح ذكية للمذاكرة.
📌جلسات مباشرة وأسئلة متوقعة.

تم تعليق الأنشطة الغير مرتبطة بالامتحانات.

تمت تعبئة طواقم الدعم النفسيّ والأكاديميّ.


📡 تابعونا على قنواتنا الرسمية:

📍تليجرام:
https://t.me/sdfmsg

📍فيسبوك:
https://www.facebook.com/FMSGsd?mibextid=ZbWKwL

📍واتساب:
https://whatsapp.com/channel/0029Vb6CnKQFnSz2HPnrSe0h


#الشهادة_السودانية_2024
#المراجعات_النهائية
#تجمع_طلاب_صناع_المستقبل
#FMSG

🎓🔥 لكل طلاب الشهادة السودانية–دفعة 24-جاهزين للفاينل راوند؟😎

📣 مكتب الإنتاج الفكري جاييكم بأقوى اِنطلاقة لسنة 2025. 🔥

🎯 مشروع الحصص الختامية لدُفعة 24...

🚀 آخر مُراجعة وأقوى اِنطلاقة نحو خط النهاية!

شنو بتلقى في الحصص؟
📌توقعات ذكية ومبنية على تحليل الإمتحانات السابقة.
📌أهم النقاط الراجحة في الورقة، مش أي مُراجعة والسلام.
📌شرح بسيط وعميق من أساتذة تقيلين بالحيل.
📌مُراجعة سريعة، مركزة، تسهل ليك لمّ المنهج قبل الإمتحان.

دي ما مُراجعة…دي خطوة إستراتيجية قبل السباق الآخير.👌🏻

📌 بتراجع بسُرعة.
📌 بتلم أهم النقاط.
📌 وبتدخل الإمتحان بثقة.

الحصص دي معمولة ليك، بأسلُوب مباشر، محتوى بدون حشو...💯🔥
وهدفنا: تضمن أكبر اِستفادة في أقل وقت مُمكن...

📆 تابعنا عشان تعرف الجدول، وتكون أول الحاضرين؛ لأن النجاح في اللحظة دي بيبدأ من قرار بسيط: تلحق الحصة أو تفوِّتها! ✅🔥


#الحصص_الختامية
#دفعة24
#نهاية_صح_لبداية_كبرى
#تجمع_طلاب_صناع_المستقبل.
#مكتب_الإنتاج_الفكري