🚀جاهز تكتشف أسرار الهندسة المدنية؟
طيب… حصل سألت نفسك الجسر ده لما كان بيتبني، كيف ما وقع في البحر؟!🌉😂
كيف بيحولوا أفكار ورسومات على ورق، لحاجات واقفة وثابتة وسط الطبيعة والعوامل دي كلها؟!

اللقاء الجاي ما بس تعريف، ده كشف أسرار!
حنغوص سوا في أعماق الهندسة المدنية ونعرف شنو الخطر، شنو الإبداع، وشنو الحاصل خلف الكواليس.

لو عندك شغف تبني، تخطط، تصمّم، أو حتى بس عندك فضول…
طالب ثانوي؟ جامعة؟ خريج؟ تعال علينا جاي وجيب أصحابك معاك!

وخلونا نكتشف…حقيقة الجملة دي!
"نحن مهندسين مُش بشر زيكم"؟ 🤡

ما تفوت الفرصة! اللقاء ده ممكن يغيّر نظرتك للهندسة تمامًا.

#صناع_المستقبل
#فك_الشفرات
#FMSG

السلام عليكم ورحمة الله وبركاته، لو بتسأل أقبلت العشر فماذا أفعل؟
تابع معانا عندنا ليك معلومات عظمة على عظمة😌💗

"ما من أيام العمل الصالح فيهن أحب إلى الله من هذه الأيام
ولا الجهاد في سبيل الله إلا رجل ذهب بأهله وماله فلم يرجع من ذلك بشيء!"

🌿قال النبي صلى الله عليه وسلم "اِحرص على ما ينفعك واِستعن بالله ولا تعجز"

🔻أوصيك أول شي طبعًا بإنك تبعد عن أي شي ممكن يضيع وقتك في حاجة ما مفيدة، يعني شنو؟
يعني تلفونك يا سيد، الونسة، الطلعات الكتيرة، الكسل ،وما تعرفه أنت🚶

"أيامًا معدودات" فإما إنك تستغلها صح في طاعة الله والسعي في رضاه، وإما تضيعها زي ما ضاع الفات من عمرك!🫠

🔻ما تيأس من رحمة الله أبدًا
وابدأ بتوبة وندم وإقلاع عن المعصية وعزم على عدم العودة.

🔻اِحرص كل الحرص إنك تصلي الفرائض الخمس في أوقاتها وبخشوع، والزم أذكار بعد الصلاة تلاوة القرآن ومن صام يومًا في سبيل الله بعّدَ الله وجهه عن النار سبعين خريفًا، فكيف يكون الفضل في الأيام دي!
فاِحرص إنك تصومها من الأول إلى التاسع.

🌿"أيها الناس، أفشوا السلام، وأطعموا الطعام، وصِلُوا الأرحام، وصلُّوا بالليل والناس نِيام؛ تدخلوا الجنة بسلامٍ"

🔻يوم عرفة نعمل فيه شنو!؟
تعال أوريك يوم عرفة بعمل شنو بيكفر الله فيه السنة التي قبله والسنة التي بعده، بشرط إنك تجتنب الكبائر.🚶

🔻أما الدعاء في يوم عرفة
فقال النبي صلى الله عليه وسلم: "خير الدعاء دعاء يوم عرفة، وخير ما قلت أنا والنبيّون من قبلي: لا إله إلا الله وحده لا شريك له، له الملك، وله الحمد، وهو على كل شيء قدير"

لما نجي ندعي نبدأ كيف؟
بالثناء على الله والصلاة على النبي صلى الله عليه وسلم، وأهم شي ما تكون قلوبنا لاهية، ما نعجل أو نقول دعينا وما استجاب سبحانه!

تحري أوقات الإجابة:
ومنها: بين الآذان والإقامة وفي السجود.

🔻وما ننسى الأذكار بتاعاتنا بدايةً من أذكار الصباح والمساء وأذكار النوم وأذكار الاِستيقاظ من النوم...
لحدي الذكر المطلق خلال اليوم والليلة، حتى خلال شغلك في البيت، اِستراحتك سريرك، أوقات اِنتظارك، أو في مشاويرك.

من تسبيح وتكبير وتهليل وتحميد وغيرها

🔻طيب بالنسبة لدراستي وشغلي أو شغل البيت؟
أخلص النية لله عز وجل، أنوي إنك تعملها برًا بوالديك وإدخالًا للفرح والسرور على الناس، وهكذا في كل المباحات حتى في نومك وأكلك بالتقوّي على الطاعة.

"عشرٌ فيا سعد الذي حاز التُقى
صلى وصام وما تعثر بالهوى"

شاركها فالدال على الخير كفاعله💗

وما تنسَى تعمل خطتك بعد توبتك هسي💗
واستمر بعدها "أحب الأعمال إلى الله أدومها وإن قل"

#تجمع_طلاب_صناع_المستقبل
#FMSG

جاهزين تبحرو معانا في مجال الهندسة المدنية؟🔥🔥

لظروف مرضيّة يعتذر المهندس: حسن طه عن الحضور.

دعواتكم له بالشفاء العاجل.❤️

حيستلم الراية المهندس: مهند عماد الدين.

طالب بجامعة السودان للعلوم و التكنولوجيا

السنة الدراسية الخامسة _ هندسة مدنية _ بكالريوس عام

العمل النقابي بالجامعة:

١: نائب رئيس رابطة الدفعة للدورة الأولى _ رئيس اللجنة الاجتماعية برابطة الدفعة للدورة الثانية

٢: المشاركة في تنظيم العديد من المناشط الثقافية بداخل الجامعة

الانجازات الخارجية:

١/ عضو بجمعية معهد المهندسين المدنين البريطانية ICE.

٢/ عضو بمكاتب جمعية ICE: SUST بقسم التدريب.

٣/ خبرة ميدانية بواقع اكثر من ثلاثة اشهر و نصف.

٤/ تخصص قيادة الفرق و التنظيمات من كلية ادارة الاعمال جامعة ميشيغن عبر منصة كورسيرا

جهزو كوب قهوة محترم، أو كباية شاي بلبن عشان تستوعبو العظمة دي.🔥🔥

خانة الأسئلة والتعليقات عن لقاء فك شفرة الهندسة المدنية:

صندوق التحسينات و مشاركات الجمهور في تطوير اللقاءات!
سيب لينا رأيك!🔥

تسجيل اللقاء

لأننا حريصين على تقديم أفضل فائدة لكم، نرجو منكم التكرم بملئ الاستمارة التالية:

https://forms.gle/k3LeN9EexbZFxGGa6

*التخصصات الإنسانية :*

عشان م تمشي بعيد ! التخصصات الإنسانية مقصود بيها علم النفس، علم الإجتماع ، والإعلام، وتعتبر من أهم التخصصات وسموها لينا بالإنسانيه لأنها بتهتم بدراسة الإنسان وسلوكه ومجتمعه ووسائل تواصله ، وبرضو بتشمل مجالات واسعة هدفها فهم الفرد والمجتمع وتطويره 🤍

*أولاً: علم النفس(Psychology)*
هو علم بهتم بدراسة سلوك الإنسان وعملياته العقلية زي التفكير ، الشعور ، الإدراك ، والذكاء تمام ؟!
وبهدف لفهم الشخصية البشرية والتفاعل معها وتحليل دوافعها

مجال علم النفس مهم جدا ومؤخراً حتى الناس بقت توعى وتقلل من المفاهيم الخاطئه ال كانت راسماها للمجال ودا مؤشر كويس ، يلا أرح نشوف مجالاته...🚶‍♀️

*أهم المجالات:*
عندنا علم النفس الإكلينيكي ودا بهتم لينا بعلاج الأمراض النفسية والإضطرابات الممكن تحصل لينا ، وعلم النفس التربوي بهتم بالمدارس والتعليم ، وبرضو علم النفس الصناعي والتنظيمي م تستغربوا من الإسم النوع دا بهتم ببيئة العمل، وأخيراً علم النفس الإجتماعي بدرس وبهتم بتأثير المجتمع على الفرد ، مجالات علم النفس موسعه ومتنوعه وكلها بتهدف لمصحلة الإنسان..🫂

*أهميته:*
تحسين الصحة النفسية وتعزيز فهم الذات ، وكمان بساعد في حل مشكلات سلوكية وإجتماعية .👌


*ثانياً : علم الإجتماع( Sociology* *)*
من المسمى بتاعه خطر ليك شنو؟! 🤔
أرح نشوف، هو علم بهتم بدراسة المجتمع والعلاقات بين أفراده ومؤسساته ، لفهم كيفية تكوّن المجتمعات وكيف بتأثر على السلوك الإنساني .

*أهم مجالاته :*
مجال الأسرة والطفولة وقضايا الفقر والجريمه ، وبرضو دراسة المؤسسات ( تعليم ، دين ، اقتصاد ) ، والتغير الإجتماعي والتنمية.

*نجي لأهمية علم الإجتماع:*
علم الإجتماع بكشف لينا عن أسباب الظواهر الإجتماعية ، وبساهم في بناء سياسات إجتماعيه فعّاله ، وم كدا بس ! بعزز الوعي المجتمعي والتماسك الإجتماعي .🤝

علم النفس زي م قلنا بدرس سلوك الإنسان ، أما علم الإجتماع بدرس لينا المجتمع كله ، وقع ليك ؟!👍

*ثالثاً : الإعلام( Media)*
طوالي جات في بالك الشمارات صح ؟🌚😂
الإعلام هو التخصص المعني بنقل المعلومات والأخبار والأفكار ، عبر وسائل مختلفه زي التلفزيون، والإذاعه، والصحف ، والوسائط الرقمية .

*مجالات الإعلام :*
الصحافة والإذاعه والتلفزيون، والإعلام الرقمي ومنصات التواصل، والعلاقات العامة والإعلان ، وأخيراً الإنتاج الاعلامي وصناعة المحتوى، يعني تتفسح زي م عايز .😉

*أهميته :*
بأثر على الرأي العام والحاجه دي أنتشرت كتير مؤخراً ، والإعلام هو وسيلة للتثقيف والتوعية ، و بدعم التواصل بين الأفراد والمجتمعات .

*ختاماً:*
كل التخصصات الذكرناها دي بتعمل مع بعض عشان تفهم الإنسان من كل زواياه ، وبتلعب دور محوري في بناء مجتمعات صحية ، مثقفة ، ومتوازنة ، ونتفق أنها من المجالات ال عندها تأثير واضح ومباشر في حياتنا
كأفراد وجماعات .🫶🤍

#تجمع_طلاب_صناع_المستقبل
#FMSG

أحمد ماسك قلم Bic في امتحان الانجليزي، والدنيا حر والكهرباء قاطعة والمراقب بحمر ليه.

وهو مندمج في الComposition والمراقب بعاين قي ورقته لقاه كتب:

*I want to be a doctor to help poor people.♥️*

جا المراقب عاين لورقته وأخد ليه ضححككةة كدا.🥲💔

- *تتخيلو المراقب ضحك ليه؟* 👀

- وهل أحمد حيبقى دكتور فعلًا ويساعد المحتاجين؟

- هل الطب هو مكان أحمد الصحيح أم أحمد حتشيلو الهاشمية بسبب أنه راجل خالو أخو صاحبه قالت ليه وشك وش دكتور!

*والسؤال الأهم من دا كللله...*

لقاء تجمع طلاب صناع المستقبل القادم هيفك لينا شفرة أيّ مجال.🫣

أها الحلمه يقرأ طب فيكم منو؟

أوعك تفوت اللقاء دا، لأنه محاوره غير عن أيّ محاور!🚀

أحكو لينا في التعليقات مواقف غريبة بتخص اختيار المجال مرت بيكم.👀

#تجمع_طلاب_صناع_المستقبل
#FMSG

لو ممتحن وبتعاني من التشتت وزيادة الضغط وقلة التركيز، أو أهلك ضاغطين عليك عشان عايزنك تتزاع.😭

قلنا ليك نحن معاك في الطريق...♥️

وبتهمنا صحتك النفسية دي زي ما بهمنا مستقبلك الدراسيّ.

عشان كدا مجهزين ليك *" فعالية "نقطة تحول"* الحتمثل نقطة تحول ليك وحناقش فيها كل التحديات دي وأكتر.🚀

*بكرا (2/6/2025) الساعة 8 مساء بتوقيت السودان.*

كل ما عليك تنضم لقناة التحفيز للطلبة عبر الرابط التالي:

https://t.me/motivatefmsg

ورينا أكبر مشكلة دراسية بتواجهك شنو؟👀👀

جاهزين للنقطة التحول؟😉

اقبض اقبض🏃🏃
اااي جيبو نزلو هنا دا، برااحة
كسرة:
دا واحد ممتحن ناس التجمع لقوه لافي ساي جابو ختوه هنا عشان بعدين عندنا لايف الساعة ٨ مساء

أهلًااااااا بكككككككم في "عالم الطب" حيث يلتقي العلم مع الإنسانية، وطبعًا الإنسانية دائمًا مُتأخرة عشان في زحمة مواصلات!😂

لكن نحن ما حنتكلم عن الطب وبس…حنحكي عن شغف، إنسانية، و رسالة قبل تكون مهنة!

لقاءنا الجاي شيق ومليان حيوية🔥

حنشوف شنو البخلي المجال دا تحديدًا مميز؟
إضافةً لقصص، مفاهيم، وتجارب بتخليك تعيش جو الطب وتحس بنبض المريض، وأنت ما لابس سماعة أصلًا! 😂

فلو كنت:
طالب طب داير تفهم جوهر المهنة وما وراها.💊
مؤمن إنه الطب فن قبل ما يكون علم.🎨
شغوف بالحقل الطبي.

فاللقاء دا ليك.🫵
لأنه أكيد ما حتطلع زي ما جيت!


📌 يوم الأربعاء على الساعة 9:00 مساءً بتوقيت السودان.

منشنو الناس العايزنها تحضر اللقاء دا وبطلو غتاتة.

#تجمع_طلاب_صناع_المستقبل
#FMSG