إِزيَّك يا المافي زَيَّك 🫣🔥

حصل يا عزيزي سمعت عن مصطلح الحرية المالية 🤔؟
ولو سمعت عنو هل اتساءلت عن معناه؟

بعض من الناس السمعو عنو اتبادر لذهنهم أنو معنى الحرية المالية هو أن الشخص يستقل مادِّيّاً ويخرج عن اتكالو على أهلو.

لا شك أنو ده فهم لا يعدو عن كونه صحيح عن المصطلح بس يا عزيزي خليني أقول ليك أنو ده ما المقصود بالضبط. 😂

التعريف الأصح هو: الحالة البيكون فيها الإنسان قادر يغطي كل احتياجاته المالية من دون ما يكون مضطر يشتغل بصورة يومية للحصول على الدخل.

تحسو كلام راحات كده صح؟ 🤣🔥
وهو كذلك ف ببساطة هي أنك تكون قادر تتحصل على الدخل البيغطي احتياجاتك الأساسية والكمالية وتوفر منو وأنت رااقد في سريرك🙌🏻.

والموضوع ممكن في نظرك يكون صعب شوية وأقرب للاستحالة بس خليني أقول ليك أنو الأمثلة في واقعنا ومحيطنا كتيرة شديد.

فعندك التاجر ممكن يكون فتح محلو وخلى ناس يشتغلو مكانو وبعدد الزباين وهو في بيتو في احتمال أنو تجارتو رابحة وبالربح قادر يغطي على احتياجاتو 🙊.

مالك العقارات بيأجر عقاراتو وبصورة دورية بيستلم الأجرة وهو في مكانو... والأمثلة كتيرة ومن الواقع بنقدر نلتمس عدد منها. 👀🔥

حماس صح؟
_كيف ممكن أصل للراحات دي يا باشا 🤣؟
=أقول ليك النصيحة طييب 🫣؟

الموضوع ما ساهل، آآي عديل كده،، وممكن تصدف معاك وتنجح في مدة زمنية بسيطة، وممكن تنجح وتصل للحرية المالية بس بعد مدة طويلة في احتمال تصل لأكثر من 20 سنة،خلالها ح تقع وتقوم كتير شديد لحد ما تصل للأنت عايزو وممكن كمان ما تصل ابداً.

بس ده كلو ما مفروض يثبط عزمك ويخليك توقف سعي وراء الموضوع لأنو بجد يستاهل...

وعشان تتحاشى الأخطاء مفروض تدرس بعناية كل خطوة بتخطوها، وتكون قادر تدير الأموال العندك ومُدخلاتك بصورة كويسة...

بس الكلام ده كتير وأغلبو بيخوف من أني أبدا وانا كيف ح أقدر أشرع حاجة زي دي وانا لسة طالب 🤔؟
انت يا عزيزي مفروض تسعى لأنك تأمن لنفسك المستقبل المالي الح ينفعك في فترة عجزك.

وعشان كده سعيك للوصول للمرحلة دي لازم يبدأ من بدري شديد، من فترة الجامعة أو ما قبلها مثلاً وتحاول في الفترة دي تشوف وتجرب المشاريع الممكن توفر ليك رأس المال لمشروعك الكبير المن خلالو ح تصل للحرية المالية 👀🔥

وبالتالي نقدر نقول أنو وصولك احتمال تحقيقو كبير شديد طالما انت يا عزيزي بديت من بدري.

وواحدة من الحاجات المهمة كمان عشان تصل ل هدفك ده أنك تزيد من الوعي المالي عندك وكيف تقدر توفر وتستثمر من أبسط وأقل المبالغ.

وكده يا سيِّد أديناك نبذة عن واحد من أجمل المفاهيم والبتزيد عندك الوعي المالي بصورة كبيرة شديد حاول دايماً تبحث عن الموضوع وتسعى فيه وأضمن ليك بكده وصولك بإذن الله🔥.

#تجمع_طلاب_صناع_المستقبل
#FMSG

"في الإتحاد قوة"
مقولة مشهورة صح؟
سلام الله عليك يا راقي، أكيد سمعت بالمقرلة الفوق دي وممكن تكون معتمدها في حياتك اليومية، لكن هل حصل فكرت فيها من منظور المذاكرة؟
أيييوه ما تعاين كدا، حتى في المذاكرة الإتحاد قوة، ثقة، صلابة، وثبات. حتقول لي كيف؟
تمام، خليني أديك مثال بسيط: عندك وجه واحد في القرآن الشيخ عايزك تحفظه الصباح وتسمعه العصر "ناس الخلوة💙"، لقيت نفسك قدر ما تعيد فيهو ما بتركز ليك، وعندك أصحابك 3 في نفس الحلقة وفي نفس الورطة، واحد فيهم اقترح عليكم تقعدوا تسردوا مع بعض كل زول يقرأ 3 آيات والبقية يرددوا معاه، بعد ساعة بالضبط لقيت نفسك قطعت نصف الصفحة حفظ والنصف التاني محتاج تركيز بسيط، بعد ساعتين قدرت تسرد غيباً الصفحة كلها وباقي ليك مراجعة خفيفة وخلاص، إلتمست الفرق ولا لا؟
العصر أذن والناس صلت وطلعت وقعدتوا للتسميع قدام الشيخ بكل ثقة وتلاوتك ثابتة راكزة اللهم بارك و زد وأنعم.
المثال دا بوضح لينا أهمية وفوائد القراءة الجماعية وهي عندها كذا طريقة وكلها ناجحة ومفيدة.
عارف إنو في نوعين من المذاكرة(سماعية، وبصرية)، في القراءة الجماعية بيكون النوعين موجودات، فمثلاً:
▪️طريقة الأستاذ "اللي هي تتفقوا على شخص معين يكون فاهم درس استصعب عليكم وياخد مكان الأستاذ ويشرح ليكم، بعدها يسأل أسئلة تفاعلية لتثبيت الفهم".
▪️طريقة الند "و دي بتكون فعالة في مراجعة درس اليوم، وهو إنكم بعد تذاكروا تتحدوا بعض في أسئلة متعلقة بالدرس وتستفيدوا من إجاباتكم المختلفة".
▪️طريقة السرد" زي المثال الفوق، و دي تنفع في مواد الحفظ بنفس طريقة القرآن دي".
▪️طريقة التوأم المختلف" الاسم من إبتكاري طبعاً😅"، الطريقة دي ممكن تعتمدوا عليها في حل المسائل الرياضية" رياضيات، كيمياء، فيزياء... الخ"، وهي كالآتي: غالباً في المسائل الزي دي بكون في أكتر من قانون للحل وبعضها صعب، حتتفقوا على مسألة في الدرس الواحد وتشوفوا القوانين المختلفة لحلها وكل زول ياخد قانون يحلها بيهو ويشرح طريقة حلها وتشوفوا هل وصلتوا لنفس النتيجة ولا لا؟
حتستفيدوا منها في إنكم تقدروا تحلوا المسألة بأكتر من طريقة وبسهولة لأنكم بتتبادلوا أفكاركم.

أكيد في طرق تانية وفوائد أكتر ما ذكرتها، كل زول يورينا في التعليقات علاقته مع القراءة الجماعية وبستفيد منها كيف؟

إن شاء الله الكلام كان طيب ومادة دسمة، وعلينا وعليكم بالعافية💙.

#تجمع_طلاب_صناع_المستقبل
#FMSG

أنت طالب شهادة سودانية دفعة 2024 ولسه ما دخلت القروب دا؟

خليك عارف أنك مفوّت على نفسك فُرص كبيرة!
أيّ فُرص ما فرصة واحدة.

المكان دا معمول ليك يا عزيزي الممتحن، من شروحات ومراجعات وأكتر من كدا كتير.

بكل بساطة بتقدر تنضم من خلال الرابط أدناه:

https://whatsapp.com/channel/0029Vb4ELW3IHph8Wwt9E53o

اطلبْ العلمَ ولا تكسلْ فما
أبعدَ الخيرَ على أهلِ الكسلْ

تنظم نفسك يعني يكون عندك هدف واضح تحققه، ودا بيتضمن التخطيط والاجتهاد لإكمال المهام اليومية.

قد يكون البعض عنده عدة أهداف عايز يحقيقها ولكن من الافضل تبدأ كل شهر بهدف واحد من الأهم للمهم.

وعشان تنجزه لازم يكون عندك *روتين يومي.*

ودي شوية نصائح لبناء روتين متوازن:

* تستيقظ مبكرًا : وحتلقى البركة في وقتك البتستع لتنفيذ جميع مهامك وحتشعر أنك جد عايز تنجز في يومك (السبب بيولجي) على خلاف لم تصحى متأخر وقتها حتكون مرهق قبل أن تعمل حاجة أصلًا.

* حدد ساعات يومك⏳: فهي عامل من عوامل تنظيم الوقت؛ لأنك أول ما تصحى حتفكر "ماذا سأفعل؟" ولكن الفايدة شنو لو رجعت للنوم !

* أبعد المشتتات عنك🤳🏻: فهي بتسرق منك الوقت، وإذا كنت تمسك تلفونك عشان تدخل وسائل التواصل أو تبدأ باللعب، ما حتجز حاجة وحتتفاجئ بيومك ضاع ساكت!

* تترك وقتاً كافياً لنفسك🙂‍↕️:

بدل من تضييع وقتك في المشتتات أترك وقت لنفسك تتأمل فيه، تتدرش مع العائلة، تمارس هواية أو حتى تأخذ قسطاً من الراحة.

* تحافظ على صلواتك🛐 :

فهي بتدربك على النظام، فما بين كل صلاة والثانية، وقت كافي تنجز شىء مفيد أو يطور منك.

* تراقب تقدمك 📊 :

أعمل قائمة من أولوياتك ومربع فاضي أمامها تضع فيه علامة ☑️ بعد انتهائك من مهمة أو علامة✖️إذا لم تقم بفعلها، دا حيشجعك ويعزز إحساس المسئولية إتجاه نفسك.

وما تنسى أن النظام مهم سواء حولنا أو إدارتنا لوقتنا، فهو بأثر على نفسيتنا البتظهر في السلوك البيرفعك بيجعلك تلجأ للتسويف.

#تجمع_طلاب_صناع_المستقبل
#FMSG

تهنئ مبادرة تجمع طلاب صُناع المستقبل المتطوعين بمكتب شؤون الطلاب بأقسامه(الإشراف، التحفيز، التدريس، أوراق العمل والامتحانات):

والمتطوعين بمكتب الإعلام بأقسامه(كتابة محتوى/ تصميم/ نشر وإدارة الصفحات/ التعليق الصوتيّ):