{ ذلِكَ وَمَن يُعَظِّم شَعائِرَ اللَّهِ فَإِنَّها مِن تَقوَى القُلوبِ }

الله أكبر، الله أكبر.
لا إله إلا الله.
الله أكبر، الله أكبر.
ولله الحمد.

تتقدم عائلة *تجمع طلاب صناع* *المستقبل* لكم بأغلى التهاني والتبريكات بمناسبة حلول عيد الفطر المبارك، أدام الله أعيادكم في صحة وسلامة.🎉

وكل عام وأنتم بخير.

#عيد_فطر_مبارك
#تجمع_طلاب_صناع_المستقبل
#FMSG

فضل صيام الست من شوال

لو كنت صُمت رمضان، عندك فرصة ذهبية تكمل الأجر وتزيد حسناتك بصيام ستة أيام من شوال، النبي ﷺ قال: "من صام رمضان ثم أتبعه ستًا من شوال كان كصيام الدهر" يعني كأنك صُمت السنة كلها، تخيل الأجر دا!

الحسنة بعشرة أمثالها يعني رمضان بيديك أجر 10 شهور، ولو صُمت ستة من شوال كملت 12 شهر وكأنك صايم السنة كلها في ميزان الحسنات.

والحاجة الحلوة الأيام دي ما شرط تكون ورا بعض، ممكن تصومها متفرقات على راحتك فلو فاتك صيام يوم ما مشكلة كمل باقي الأيام براحتك في الشهر.

ياخي الأجر دا ما يتفوت؛ خصوصًا إنه الصيام فضلُه كبير برفع الدرجات وبيكفر الذنوب وبيقربك من الله، فلو ربنا أداك الصحة والقدرة لا تفوت الفرصة دي، وربي يتقبل منك ومنّا.

#FMSG
#تجمع_طلاب_صناع_المستقبل
#مصابيح

هل عايز تكون من صناع المستقبل🤯 ؟ أو تشتغل مع تيم مليان حماس وإبداع 🤩؟ طيب لو قلت ليك إننا وفرنا ليك كل الحاجات دي ايوه زي ما سمعت😌!

يعلن تجمع طلاب صناع المستقبل عن فتح باب التقديم للعضوية في المكاتب التالية:

¹.مكتب شؤون الطلاب👨🏽‍🎓:
- قسم الإشراف.
- قسم التدريس.
- قسم إعداد الإمتحانات والإختبارات.
- قسم التحفيز والدعم النفسي.

².مكتب موارد البشرية👨🏽‍💼:
- قسم المتابعة والتقييم.
- قسم التنمية البشرية والتدريبات.

³.مكتب الأفكار والإبداع🛸.

⁴.فريق المونتاج🚀.

منتظرين شنو🔥؟
رابط الفورم:
https://forms.gle/eVdGxd8e1FDsN6147

⏰ آخر يوم للتقديم يوم الثلاثاء، الموافق 15/إبريل.


#تجمع_طلاب_صناع_المستقبل
#FMGS
#تطوع

لا تستعجل الثمرة، فكل شيء عنده وقته.❤️
#زناد

العشرينات سن بجمع بين القُدرة وقلة الخبرة، الحماس والتحديات.🔥

فيه بتتشكل هويتنا وأفكارنا، بس كيف نضمن أنه نحن في الإتجاه الصحيح، وشنو هي الحاجات المفروض أكون واعي بيها في الفترة دي؟🤔


وعشان نجاوب عن السؤال دا وأسئلة تانية، نقترح عليك مشاهدة حلقة *"ليش مرحلة العشيرنات أخطر مرحلة؟"* من بودكاست مايند | Mind.

تكلم فيها د.عمر السعدان عن ليه تعتبر العشرينات أخطر وأهم فترة في حياتنا، وشرح القرارات المصيرية في العمر دا، وكيف نكون واعين بتأثيرها على مستقبلنا.

ناقش خطوات النجاح، واكتساب الصفات الطيبة، والمهارات،وأكثر من كدا من النصائح القيمة، في حلقة مدتها ساعة فقط!♥️

حتلقو رابط الحلقة في التعليقات.

أحكو لينا عن حلقة بودكاست حضرتوها وكان ليه أثر كبير عليكم.


#FMSG
#تجمع_طلاب_صناع_المستقبل

كيف تكون قائد عظيم.😎

عايز تكون قائد جيد، بل قائد عظيم، وتكون مؤثر وتقود فريقك للنتائج المبهرة؟🧐

اليك خمس خطوات عشان تكون ذلك القائد الذي لا ينسى 😍.

١. أحصل على التعريف الصحيح للقيادة الممتازة.❗

لازم و مهم جدا تعرف يعني شنو قيادة جيدة ؛ لانه حسب تعريفك و نظرتك ليها حتتطابق أفعالك بناء عليه. طيب شنو هي القيادة الجيدة ؟🤔 قبل نعرف في نقاط مفروض نفهمها اول.

▪️القيادة الجيدة ما معناها تكون شخص كاريزماتك و اجتماعي 😲، أيوة ناس كتير إذا شافوا شخص عنده كاريزما و اجتماعي بفترض إنه قائد عظيم، أي هي بتساعد لكن ليست هي المحددة.

▪️كونك في منصب قيادي لا يعادل كونك قائد عظيم.

▪️كونك عندك ناس بتتبعك لا يكافئ القيادة العظيمة.

في ناس تعتقد أنه بس عشان عندك كم شخص بيتبعوك معناها أنت قائد جيد في حين لو جينا للتعريف الدقيق أي أنت بتكون بتقودهم بس يمكن انت بتقودهم بطريقة غير جيدة .🙂

▪️ القيادة الجيدة ليست متمحورة حول النتائج قصيرة المدى بتركيز أعلى يغطي على النتائج ذات المدى الطويل. بل العكس، تركيزك الشديد على النتائج قصيرة المدى بس عشان تظهر نجاح فوري ما بخليك قائد عظيم مطلقاً .🫠
القيادة الجيدة ماذا تعني ؟!

هي عملية توجيه فريق من الناس من خلال التأثير الجيد نحو تحقيق هدف ما بمعنى:

أ. القيادة الجيدة هي القدرة على التأثير و بناء الثقة و المعاملة السمحة. يقول توماس هاريس : " القيادة العظيمة هي بناء حضارة ثقة ، قيادة بتأثير و معاملة الناس معاملة جيدة على طول الطريق" ♥️

ب. القادة العظماء لمن يطلعوا و يخلوا الشركة بيخلوها في منصب بتنجح فيه الشركة من غيرهم .

٢. تعلم عن القيادة الجيدة ❗
تلقي معلومات سطحية و معرفة مبدئية هي البداية بس لكنها ما حتخليك قائد عظيم. القيادة العظيمة رحلة تعلم فأكيد حتأخد وقت .😊 خد وقتك عشان تتعلمها و تعرف مبادئها.

*اطلّع على المؤهلات
* والمهارات اللازمة المحتاج تنميها . من هذه المهارات القيادية اللازمة لتكون قائد مؤثر :

١. مهارات التواصل
٢. التحفيز و الإلهام و الإيجابية
٣. الابداع
٤. المسؤولية
٥. إدارة الوقت و التنظيم
٦. التأثير

*اقرأ كتب قيّمة عن القيادة العظيمة تابع البوست للآخر لتتعرف على افضل كتب ممكن تقرأها . 🥹
*اسمع بودكاست و كتب صوتية.
*ادخل كورسات .
*اتعرف على قادة عظماء و اتعلم منهم و استفيد.
ابداً لا تتوقف عن التعلم و التطور.💪

٣. طبّق الاتعلمته و خليك مستمر في تعلمك❗

إتعلم من اخطائك و امضي قدماً.
٤. استمع للآخرين و أخد الفيد باك و الملاحظات منهم❗😇

٥. طوّر قادة جدد❗
افضل طرق بتميزك كقائد عظيم هي انك بتهتم و تتطور قادة جدد يجو من بعدك بمعني← إعادة الإنتاج .

بعض النصائح الاضافية:
خليك متواضع و إحرص إنه بيئتك تكون آمنة ( إنك تكون جدير بالثقة ومستمع و داعم إلى آخره ) لأعضاء فريقك .
اخدم فريقك و اتذكر القيادة بالتأثير وليس المنصب ولا تشخصنها كتير 🤩.

بما انك وصلت لهنا فدي هديتك 🥳
افضل كتب اي قائد لازم يقرأها

١. كتاب واحد و عشرون قانوناً راسخاً في القيادة المثلى. لجيمس ماكسويل

٢. كتاب من جيد إلى عظيم . لجيم كولينز

لو سألنكم، شنو أصعب تحدي واجهكم في التعليم عن بُعد؟🤔

حُسن الظن بالله… طوق النجاة حين تضيق الدنيا.

في لحظات الضيق، لما بتشعر إن كل الأبواب مُغلقة وفي قلبك همّ ما في شخص يعرفه غيرك… بيكون فيه باب واحد مفتوح دايمًا ده باب شنو ؟
باب الله طبعا 💗
وهنا بظهر معنى "حُسن الظن بالله".
ما بس كلمة بنرددها، ولا مجرد تفاؤل، بل هي عبادة قلبية عظيمة، معناها إنك تؤمن من أعماقك إن ربنا لن يُخذلك بل إن رحمته أوسع من خطاياك، وإن تدبيره لك أجمل من كل ماكنت تتمناه.
"أنا عند ظن عبدي بي"
هذا وعد من الرحمن، إذا ظننت الخير جاءك الخير إذا دعوت وأنت موقن بالإجابة فإنك قد أمسكت بأحد مفاتيح السماء.
بعرف شخص مر بظروف قاسية جداً فقد فيها أهله وماله، وكانت الأيام تمضي عليه ثقيلة... لكنه قال: "كنت كل ليلة أقول: يا رب، أنت أرحم من أن تتركني هكذا أنا متأكد إن بعد العسر يجي يسر."
ومرت الأيام وإذا بالفرج يأتي من حيث لا يحتسب... تغيّر حاله وتحولت محنته إلى منحة.

> نصيحه لكل من يقرأ:
مهما اشتد البلاء، لا تسمح لليأس يسكن قلبك ظنّ بالله خيرًا، حتى لو ما شفت النور في نهاية الطريق فإن مع العُسر يُسرًا هذا وعد ما بتبدل.

ابتسم وكرر في قلبك: "سيجعل الله بعد عسرٍ يسرا."

#تجمع_طلاب_صناع_المستقبل
#FMSG

تعبت وأنت كل مرة تبدأ خطة بحماس وبعدين تكسل؟
ما تخاف كلنا مرينا بالمرحلة دي 🤷🏻
وبقول لك غالبًا المشكلة مافي خطتك، بل في ترتيب أولوياتك، وعشان كده جيتك بالحل:
"مصفوفة ايزنهارو"✨
هي أداة فعالة لتنظيم الوقت وترتيب الأولويات، وتنسب إلى الرئيس الأمريكي: دوايت أيزنهارو، وتنقسم إلى أربعة مربعات، حسب أهمية المهام وعاجليتها:
1- هام وعاجل:
مهام مهمة و لازم تعملها في الوقت الحالي، المربع ده دائمًا هو السبب في الضغط والتوتر لو المهام الموجودة فيه ما تم إنجازها، مثل: كتابة الواجبات المدرسية، المراجعة للامتحانات.

2- هام وغير عاجل:
ده يعتبر مربع التنمية والتطوير، المهام هنا مهمة بس ما ضروري تنفذها حسي، لكن المربع ده لو ركزت عليه على المدى البعيد، ح تحسن من نفسك شديد، يشمل: الرياضة، الأكل الصحي، تعلم مهارة، بناء العلاقات، تعلم لغة جديدة.

3- عاجل وغير هام:
المهام في المربع ده بتسرق وقتك، بتحس أنها عاجلة ولازم تعملها، بس أغلب الوقت بتكون ما بتأثر عليك شخصيًا، فأنت ممكن تفوضها لزول تاني أو تحدد ليها وقت محدد لتنفيذها، مثل: المكالمات المفاجئة أثناء المذاكرة، الرد على رسائل غير مهمة، طلبات الآخرين.

4- غير هام وغير عاجل:
مهام بتضيع وقتك، بإختصار أى مهمة في المربع ده ما منها فائدة، عندك حلين: يا تقلل منها، أو تحدد ليها وقت بعد المهام، أى تخليها زي مكافأة بعد الإنجاز، مثل: مشاهدة الريلز والفيديوهات العشوائية، التحدث لفترات طويلة دون فائدة، مشاهدة الأفلام والبرامج.

📌طيب أنا عرفت الطريقة دي، بس أعمل شنو؟ جيب ورقة وقلم وتعال:
-اكتب كل المهام المطلوبة في الأسبوع ده.
-صنف كل مهمة حسب أهميتها وعاجليتها في واحد من المربعات الأربعة.
-رتب يومك بناء على هذه التصنيفات.
تذكر:🫵🏻
- ✅ابدأ بالمربع (1)
- ⏳خصص وقت منتظم للمربع (2)
- 🤝فوّض ما يمكنك من المربع (3)
- ❌قلل أو تجاهل المربع (4)

ابدأ رتب أولوياتك بمصفوفة أيزنهارو، وشاركنا تجربتك✨

#تجمع_طلاب_صناع_المستقبل
#FMSG

قاوم.♥️
#زناد

*هل جيل Z مختلف فعلًا؟* 🫣🔥

أكيد مصطلح جيل Z أو Gen Z مرّ عليك في الفترة الفاتت، لو ما عارفهم منو، فهم المولودين بين (1995 -2010).

ناس جو مع التطور التكنولجي، الغير من طريقة تلقينا للمعلومات وتواصلنا مع الناس، ونسبة من سلوكياتنا وعاداتنا.

فنرجع للسؤال هل هُم مختلفين؟👀

يُعتبر كتاب "الهشاشة النفسية: لماذا أصبح جيلنا أضعف وأكثر عرضة للكسر؟" أول كتاب عربي يناقش الموضوع دا.🤩

حاول الدكتور إسماعيل عرفة أنه يفهم الجيل من الداخل: حساسيتهم تجاه النقد، الخوف من المسؤولية، والإنهيار تحت الضغط.

الكتاب بيشرح ببساطة كيف أثرت وسائل التواصل الاجتماعي في تكوين علاقاتنا، ونظرتنا لنفسنا، وطريقتنا في التعامل مع المشاكل.🚀

وُصف كل شاب في الجيل دا بأنه "مميز بطريقته الخاصة"، لكن ومع انتشار الهشاشة النفسية بين الأغلب بقو يقولو ليه، "جيل رقائق الثلج" – لأنهم بسيحو سريع تحت الضغط!

اللطيف في الكتاب أنه ما بهاجم الجيل، بل بيساعده يفهم نفسه أكثر، ويبين الطريق لتعزيز المناعة النفسية والتوازن العاطفي في عالم سريع ومتقلب.♥️

لو أنت من جيل Z أو بتتعامل مع شباب من الجيل دا، فالكتاب دا حيغير نظرتك لنفسك أو ليهم تمامًا.

أنصحونا بكتاب من اختياركم، وما تنسو تقروه وتورونا رأيكم.🤍

#تجمع_طلاب_صناع_المستقبل
#FMSG

السلام عليكم ورحمة الله وبركاته......

كُلُّ زول فينا عنده طموح وشغف إنّه يكون مُتحدِّث مُبدع وعنده كاريزما حلوة، ولكن للأسف *"لا يُولَد أحد في هذه الحياة وهو مُحدِّث مُبدع"*.

اليوم، حابة أتكلم معاكم في مهارة -كمية من الناس اعتقد إنها بتعاني من فُقدانها- ألَا وهي *مهارة التحدُّث أمام الجمهور*، العنوان مُهيب صح؟! ويمكن اسي أنا وأنتِ وأنتَ بنعاني منها.....

رأيك شنو، م تجي شوية نتكلم عنها...... موافق؟!، جاهز؟!، طيّب خلينا نبدأ........

*مهارة التحدُّث أمام الجمهور*: هي مهارة زيّها زي باقي المهارات، تحتاج إلى تطوير وحاجات كتيرة عشان تصل لمرحلة إنّك تكون مُتحدِّث مُبدع وكل الناس بتثني عليك.

طيّب، يا سيّد يا جيّد ح أديك كذا نقطة عشان تقدر تتحدَّث أمام جمهور، وتكون مُتحدِّث مُبدع:-

*قبل التحدُّث:-*

1.تعبئة العقل: عبء عقلك، كلما عبأت عقلك -سواءًا بمعلومات، أفكار، تطوير في ذاتك أو تخصصك- نطق لسانك أفضل.

2.إشباع العين: شَبّع عينك، تابع لقاءات مثلا، ليه طيّب؟! لأنّه ح تلقى معلومات جديدة، ح تلقى مقتطفات من أساليب المُتحدِّثين، وح تلقى أفكار جديدة.

3.تعبئة الأذن: تعبء أذنك، كيف؟! بالإستماع الكتير، الإستماع للأشياء الطيبة اللي ممكن تطلع من لسانك.

4.الخروج بجسدك: اطلع بجسدك وجرّب تسوي حاجات جديدة، التجارب بتديك خبرة في الحياة، وما تكون منعزل وعلاقاتك محدودة.

5.التحضير: كلما حضّرتَ أكتر، أبدعتَ أكتر.....

6.التدريب: مهم جدا، لو م قدام ناس عادي م مشكلة، ممكن في غرفتك، وأنتَ طالع بعربيتك أو وأنتَ واقف قدام المراية ودا يعتبر من أقوى أنواع التدريب.

7.التركيز والإهتمام باللحظات الأولى في مواجهتك للجمهور: طيّب ليه؟!! لأنها هي اللي ح تحدد طريقة حُكم الجمهور عليك وعلى نظرتهم ليك.

8.ما تكتِّر من الإكل: علاقته شنو طيّب بالتحدُّث أمامالجمهور، والله ي فنان الأكل الكتير ح يخليك كسلان وخملان وشكلك ح يكون م حلو قدام الناس عشان كدا، كدا عرفتَ العلاقة شنو؟؟!

9.الإستعداد النفسي: طيّب، دا بكون كيف؟ بكون عن طريق الإسترخاء والتنفس العميق.

النقاط الفاتت دي لازم تتبعها بس قبل ما تتحدَّث، أَمَّ للجاية دي، فهي النقاط اللي مفروض تتبعها أثناء حديثك....

*أثناء التحدُّث:-*

1.التواصل البصري: ودا بكون بإنّك تنظر جمهورك، مش تعاين في مكان ثاني او تكون مدنقر رأسك في الأرض أو العكس، إلّا إذا كان الموضوع عنده علاقة بالوضعيات دي.

2.التحكُّم في القلق: كيف؟؟ برضو بإنّك تسترخي وتتنفس نفس عميق.

3.التنوّع في نبرة الصوت: فكرة إنّك تكون قادر تستخدم نبرات مختلفة في خطابك أو حديثك، دا شي كَفِيل إنّه يجذب إنتباه الجمهور ليك....

4.الإستماع للجمهور: أثناء حديثك يا كابتن، لازم تستمع لجمهورك، وتستجيب لأسئلتهم....

5.المرونة: خليك مَرِن وجاهز ومستعد لأي تغييرات في الجمهور أو الموضوع.

6.لغة جسدك: 55% من الناس اللي ح تتفاعل معاك، ح تركز على لغة جسدك؛ ولغة جسدك مفروض تتوافق مع الخطاب أو الحديث اللي أنتَ قاعد تلقيه.

وفي الختام، بحب أقول ليكَ إنّه التحدُّث أمام الجمهور ح يساعدك في تحسين ثقتك بنفسك وبحسِّن مهارات التواصل عندك وأخيراً، بخليك تكون سبب في التأثير على الآخرين.

#تجمع_طلاب_صناع_المستقبل
#FMSG

النوم Vs السهر أيام الإمتحانات

من المعروف إنه السهر بقلل التركيز وبالتالي قلة التركيز حتزيد من اِحتمالية عدم إجتياز الإمتحان برضى تام، بس برضو وفقاً لتجارب كتيرة أنا سمعتها شخصيًا في ناس برووا حكايات مختلفة عن السهر!

بحب أدلل في حديثي دائمًا لتجارب شخصية أو من الناس الحوليني، بحس كدا المُخاطب بيطمن من تجارب الناس فخلوني أسوقكم معاي في حديث عن النوم والسهر الما حيخلص معانا دا...

أنا كإنسانة إمتحنت شهادة ثانوية، في البداية أي طريقة وأي تكنيك جربته في محاولة مني للوصول للطريقة المناسبة والصحية في كل خطواتي
جربت أساهر لين الصباح وأنوم بعدين أي يعني قلبت نومي
جربت أنوم بدري وأصحى صلاة الصبح
جربت أساهر سهر متوسط
ما أصلًا الحياة تجارب ولو نحن ما جربنا عمرنا ما حنتعلم...

المهم
تعالوا أوريكم وصلت لشنو في إختبار السهر والنوم العملته دا، في الحقيقة ما كان اختبار عادي كانت عبارة عن حلبة مصارعة في اليمين النوم وعلى اليسار السهر وفي النص عقلي الما عارف يختار الحل المناسب، ديلك بتضاربوا وكل شوية تجيه بنية ولا كف طاير...

المهم يا أعزائي الممتحنين:
-إنك تساهر وتقلب يومك وتقول والله ياخي أحسن لي أنوم بالنهار وأصحى باليل ما فكرة كتكوتة نهائي؛ لأنه ومن خلال عشرمية دراسة أجروها للنوم لقوا إنه نومة بالليل دي لو فاتت ما بتتعوض لو نمت نهارك كله زيادةً على مشاكل التركيز الحتحصل، وقد كان والله فما انصح وأوعى من إنكم تعملوا العملية دي.

=بالنسبة للنوم أحسن فترة نوم تبدأ من تسعة أو عشرة أقصى حاجة حداشر، تظبط منبهك لسبعة تمنية ساعات وتقوم تشوف مذاكرتك بوين ما تبقى دمك بقري وتجرها عشرة ساعات عشان قالوا ليك النوم كويس أيام الإمتحانات.

برضه من تجارب حيّة للطلاب المئة الأوائل ككل لقيت إنه الروايات مختلفة، في واحد بقول ليك كنت بنوم تسعة ما بصحى أكتر من تسعة كان دفعوا لي مال قارون وبصحى صلاة الصبح زي الفل

وجا واحد قال لا كنت بساهر وبرضه بصحى بدري زي الفل مركز ومصحصح والأمور باسطة وتمام التمام

وفي النهاية النتيجة كانت إنهم الإتنين إتذاعوا مع المئة الأوائل

فحسب تحليلي، القصة حسب القدرات والإمكانيات العقلية، حسب أنت عقلك لو ساهر حيقدر يركز ويذاكر بفعالية أو العكس حتكون ما مجمع وبتذاكر كأنك بتنفخ في قربة مقدودة...

عشان كدا يا عزيزي، الحياة موازنة، لازم توازن بين نومك وساعات مذاكرتك وأوقات راحتك، بحيث يكون نظامك صحي وتكنيكك ممتاز ومذاكرتك فعالة، وأنت فاهم وعارف كويس إنك لو استمريت حسب التكنيك المعين البناسب قدرتك العقلية والجسدية حتقدر تحرز معدل ممتاز يرضيك ويرضي والديك...

دقيقة أسمعني
لو اتزنقت زنقة الكلاب والإمتحان كبس عليك وأنت ما عارف تنوم ولا تصحى تذاكر، نوم عشان على القليلة تخش الإمتحان وأنت مركز وقدر الذاكرته دا تعرف تحله...

#تجمع_طلاب_صناع_المستقبل
#FMSG