زي ما عارفين العلم هو أساس كل حاجة في حياتنا، وهو اللي بيرفع قدر الزول وبيخليه يعرف الحق من الباطل.
و كمان طالب العلم ده عنده مقام عالي، ربنا بيكرمو في الدنيا والآخرة وكل خطوة بياخدها في طريق العلم هي خطوة لي قدام في طريق الجنة كمّا ورد في حديث النبي صلى الله عليه وسلم " مَن سلَكَ طريقًا يلتَمِسُ فيهِ علمًا ، سَهَّلَ اللَّهُ لَهُ طريقًا إلى الجنَّةِ ".


📍 في اوّل ورشة لينا وبعد غياب و زي ما واضح ليكم انه ح نتكلم عن العِلم و بعض من محاوره ايلي هي:
_ فضل العلم وطالب العلم.
-اهمية العلم في الدين.
-استصحاب النية في الدراسة.
-ساعات الدراسة والامتحان .
-كيف نبتعد عن السخط والجزع ونقصان الاجر" سب الدكاترة-سب الدهر".

📍و كله ده مع دكتور /يزيد المنير. 😉🔥

📌الزمان: غدًا الثلاثاء 13 /اغسطس.

📌هنا على قناتنا على التليجرام


فـ لازم تكونوا حضور بإذن الله. 🧡🔥

#تجمع_طلاب_صناع_المستقبل
#FMSG

بتقرأ كتير و بالساعات صح؟!
لكن في النهاية ما بتجيب النتيجة الانت عايزها☹️ و بتحس تعبك ضاع سدى و في حين انه اصحابك المعاك بقرو ساعات أقل لكن بنجزو
طيب حصل سألت نفسك لي بيحصل معاك كده و هم لا او السبب شنو؟🤔

الاختلاف كلو برجع لطريقة دراستك ايوا طريقة الدراسة لانه احتمال كبير انك م بتدرس بطريقة فعّالة تديك نتيجة حلوة

لكن شنو هي الطريقة الفعّالة دي الحتديك نتيجة حلوة؟🌚

تابع معانا السلسلة للنهاية و تاقي اصحابك عشان يستفيدو معاك. 😉🧡

#تجمع_طلاب_صناع_المستقبل
#FMSG.

📍نود تذكيركم بأن اللقاء مع دكتور يزيد المنير سيكون اليوم عند تمام السّـــاعة الثامنة مساءًا. 🧡🧡🧡🔥




فــكونوا على استعداد. 😉🔥🔥🔥🔥

#تجمع_طلاب_صناع_المستقبل
#FMSG.

📌أنت ما تعتقده عن نفسك.

رحم الله امرؤ عرف قدر نفسه، وأنت تعرف مقدارك وتحترمه؛ فلا تتعجل القمة، قاتل بثبات وستذوق حلاوة الانتصار والوصول بإذن الله.🧡
كائن من كان، ومهما حدث، ما من شيء يمكن أن يحطم عزيمتك إن آمنت بنفسك، حلق عالياً وافرد جناحيك في الفضاء واجعل العالم بأجمعه ينظر إليك في ذهول، فالمجد بانتظارك. 🧡

وكما تقول إيمي هيتاري :
غداً يفوز بالمكاسب صابر
لم ينته عن سعيه لثوان
مهما يطول الوقت جهده عائد
وبالنجاح متوج
من صبره من عمله أغلى الثمار يحصد

فلتحصد ثمرة جهدك وكن مؤمناً أنها ستكون لذيذة. 🧡

#تجمع_طلاب_صناع_المستقبل
#FMSG.

3 تقنيات للمذاكرة ستجعلك من أوائل الدفعة وصدقني
الاخيرة دي مضمونة مليون في المية🎉🧑‍🎓

هل بتعاني من أنك دايماً لمن تقرأ بتلقى نفسك بعد خمسة دقايق نسيت كل القريتو 🤦؟

إذا كان جوابك نعم، فأنت محتاج تطبق التقنية دي تاني👏
• تقنية القطع(chunking technique) 🧱
أو زي ما بقولوا التمهيد من أجل المذاكرة...

التقنية دي بتسبق عملية المذاكرة حيث تعتبر هي الأساس
لو عاوز تتذكر القريتو، طيب كيف أستعمل التقنية دي؟🤔

بكل بساطة ترتكز هذه التقنية على تقسيم المعلومات
العاوز تقراها لقطع صغيرة يسهل هضمها..
ايوا بالضبط كدا زي ما معدتك ما بتستحمل كمية أكل
كبيرة، فعقلك نفس الشي ما بقدر يهضم معلومات كتيرة
في نفس الوقت🧠...

عشان كدا المرة الجاية ما تحشي مخك مرة واحدة واديهو حتة حتة عشان يهضمها ليك ومخك ما يبقى تخين.🙂🤍


•طيب التقنية التانية دي لو عاوز طريقة تحفر بيها المعلومات حفر في رأسك؟!🙆
ودي الطريقة البستعملوها الناس الشاطرين عشان كدا
سموهم حفارين ⛏️..

يلا تعال نشوفها هي شنو ..
تقنية التكرار المتباعد أو ( spaced repetition) 🕥⏳

ببساطة تتم عن طريق الدراسة على فترات متباعدة ..
خلينا نقول مثلاً أنو عندك اختبار الأسبوع الجاي في وِحدة أو gapter معين عشان تطبق القاعدة دي كل العليك أنك تقسم الوحدة إلى أجزاء زي ما قلنا فوق ولا نسيت 🙆..

وتبدأ تقرأ اليوم الأول جزئية وتفط يوم وتقرأ اليوم الثالث وهكذا اليوم الخامس لحد ما تنتهي من الوحدة بأكملها بس السر إنك تراجعها كلها قبل يوم الإمتحان وحا تلقاها بقت ساهلة شديد لأنك قسمتها وقريت على فترات متباعدة في نفس الوقت 👏..

وفي النهاية عاوزة أقول ليك أنو لكل ساعي ما سعى وما حا يكون في نفع للتقنيات دي إذا أنت أصلاً ما قاعد تقرأ ..

كفاك وهم ببطولات المستقبل الخاتيها لروحك والأعذار
المبتزلة أنو منتظر الوقت المناسب !!
والامكانيات المناسبة !!
وخليها للمرة الجاية 🙄!!

حان وقت رحيلك عن عالمك المألوف وتركك لروتين القطيع رافقنا في تحديات تجمع طلاب المستقبل بإعطائنا وقت فراغك لتطوير نفسك ...

كل العليك تتطبق التقنيات دي وأهم حاجة تشاركنا نجاحك وكيف أثرت معاك 🤍..

كشفنا أوراقنا ! فأخبرني ما أنت فاعل يا عزيزي الطالب؟🫵

#تجمع_طلاب_صناع_المستقبل
#FMSG.

السلام عليكم ورحمة الله وبركاته

- تجمع طلاب صناع المستقبل - FMSG
مواصلة لما بدأناه قبل ثلاثة أعوام دراسية، نعلن في هذا الشهر شريط الإسناد الأكاديمي لطلاب الشهادة السودانية لدفعة 2023، نأمل أن نقدم لهم ما يعينهم ويخفف عما يمرون به من مأساة وظروف.

خلال هذه المجموعات ستتم جدولة حصص الإسناد الأكاديمي، استقبال أسئلة المناقشة، الإعلان عن اللقاءات المختلفة، التعريف بالمواد، تقديم الدعم المعنوي بالإضافة لأوراق العمل و الامتحانات .

الروابط:


#تجمع_طلاب_صناع_المستقبل
#FMSGالمساق العلمي
https://chat.whatsapp.com/L7oeJKdI2kFK4YmNyWnnP7

المساق الادبي
https://chat.whatsapp.com/FQV72eicmhwFfDdqvsn96a

فضلا و ليس أمراً :
شارك الروابط لتعم الفائدة و لتصل لأكبر قدر ممكن من الطلاب المعنيين🤍
نسأل الله التوفيق و السداد 🤍

هل تساءلت يا عزيزي القارئ انا ليه بنسى كتير🤔 و في نص قاعة الامتحان يمر عليك سؤال و انت عارف الإجابة بس ما قادر تتذكرها؟ دا لانه انت ما حفظت بالطريقة الصحيحة و الفعالة 😓.
الإستدعاء النشط active recall من افضل طرق المذاكرة الي حرفيا لو طُبقت بالطريقة الصحيحة ما حتنسى اي معلومة انت حفظتها 🤩( طريقة الحفارين).
ما هي تقنية الإستدعاء النشط active recall؟⁉️
ببساطة هي تحفيز ذاكرتك بشكل نشط لاستدعاء معلومة معينة.مثلا لو سألتك متى كان إستقلال السودان ؟هنا عقلك يبدأ عملية بحث في الذاكرة و يجيب ليك الإجابة على هذا السؤال ،دا كدا استدعاء نشط من غير ما ترجع لمصدر آخر .و شتان ما بين الإستدعاء النشط للمعلومة و التعرف و الإعتراف بالمعلومة كيف يعني 🥲 ؟ معظم الطلاب لمن يجيب ملاحظاته و ملخصاته بيقرا المعلومة و تمر عليه( هو في نفسه: آه المعلومة دي أنا عارفها😌) و لكن للأسف هنا عقلك مجرد اتعرف على المعلومة و هذا لا يعني تماماً إنك ممكن تسترجعها بسهولة لو سألتك منها بعد ساعتين من جلسة المذاكرة😓 .
يعني يا عزيزي القارئ انت لا تعلم و تفهم معلومة ما الا لمن تسترجعها كاملة مكملة من ذاكرتك عشان كدا دي من اقوى الطرق لحفظ المعلومة و التعلم عموماً 🤩.
الأن انت بتسأل انا كيف أطبق الطريقة دي؟
أولاً: طريقة الSQ3R
ـ١ ـ servey مسح و تصفح سريع كدا للمادة العايز تقراها.
ـ٢ـ Question بعد اتصفحت اسأل نفسك اسئلة انت ممكن تلقى اجابتها بعدين في المادة.
ـ٣- Read ارجع تاني واقرا المادة بتركيز و حاول تلقى أجوبة للأسئلة القبيل😎.
ـ٤ـ Retrieve دي جزئية الاستدعاء هنا ، استرجع المعلومات القريتها و حاول لخصها بكلماتك انت سواء كتابة أو بصوت بس 🗣️.
ـ٥- Review اعمل مراجعة سريعة تاني للمادة الاتعلمتها.
ثانياً: طريقة the faynman الفهم منها انو افضل طريقة تتعلم بيها حاجة هي إنك تشرحها لزول ( ما ضروري تشرح لشخص المهم تشرح بصوت مسموع ) لانه لو قدرت تشرح المعلومات بطريقة مبسطة حتى لو كانت المادة معقدة اعرف انك متمكن من المادة دي 😎.
ثالثاً: استخدم الفلاش كاردس.للممارسة و التثبيت

و أخيراً 🤍
كل ما مارست استدعاء المعلومات اكتر كل ما ثبتت في عقلك و م حتنسى تاني😌

#تجمع_طلاب_صناع_المستقبل
#FMSG.

مساء الخير على السائر في الدرب🫡

التحديات كترت عليك؟ حاسي نفسك ما بقيت قدرها؟ما تكسر الحنك! ما تستلم! .

ما تصدق زول بكذب عليك و بقول ليك في ناس نجحوا بدون ما يتعبوا، عمره النجاح ما بيجي إلا إذا كان قبله فشل، فأصبر..إتحمل..و جاهد..


يقول ابن خلدون:
"الأوقات الصعبة تجلب رجالاً أقوياء، و الرجال الأقوياء يجلبون أوقات الرخاء "


كلنا متفقين أننا في الأوقات الصعبة، لكن السؤال هل نحن قدر المسؤولية ؟ هل ح نبقى الأمل؟
شايفك يا العملتي رايحة الكلام دا ما للرجال بس.

وتذْكر:
{ وَأَن لَيسَ لِلإِنسانِ إِلّا ما سَعى () وَأَنَّ سَعيَهُ سَوفَ يُرى }.

#تجمع_طلاب_صناع_المستقبل
#FMSG.

" وَبَشِّرِ الصَّابِرِينَ ۝ الَّذِينَ إِذَا أَصَابَتْهُمْ مُصِيبَةٌ قَالُوا إِنَّا لِلَّهِ وَإِنَّا إِلَيْهِ رَاجِعُونَ "

بقلوب مؤمنة بقضاء الله وقدره، ينعي تجمع طلاب صناع المستقبل معالي وزير التربية والتعليم" محمود سر الختم الحوري" الذي وافته المنية يوم الجمعة ١٦/اغسطس اثر وعكة صحية لم تمهله كثيرًا، تاركًا وراءه فراغًا كبيرًا في ساحة التعليم.
كان الفقيد رمزًا للاخلاص في خدمة وطنه وأبنائه، نسأل الله أن يرحمه رحمة واسعة، وأن يجزيه خير الجزاء على ما قدمه للوطن و يلهم أهله وذويه ومحبيه الصبر والسلوان.

وإنا لله وإنا إليه راجعون.


#تجمع_طلاب_صناع_المستقبل
#FMSG.

👨🏾: دا شنو قاعد تتكلم براك بتقول في شنو؟

👱🏼‍♂️:قاعد أكرر.

👨🏾:تكرر في شنو ؟

👱🏼‍♂️: أكرر في الدرس الحفظته عشان ما انسى.

👨🏾: بدل تقع تكرر كدا ! تعال اقول ليك ٣ طرق فعالة للحفظ !

__
1.طريقة الFeynman technique :

الطريقة دي بتعتمد على انك تذاكر الدرس بصورة عادية وتقفل الكتاب و توديه حته بعيدة وتبدء تشرح الدرس من الأول كأنك بتشرحه لطفل عنده عشرة سنين👦🏽 (يعني بطريقة مبسطة جداً) بعد تخلص شرح تمشي تفتح الكتاب تشوف الحاجات الماعرفت تشرحها أو نسيتها لما تعرف نقاط ضعفك تعيد الدرس من أوله لأخره بنفس الطريقة لحد ما الدرس يبقى زي الموية🚰.


2. إستخدام ال mnemonics :

وتعني الاختصارات، مثلاً عندك نقاط معينة عاوز تحفظهم تاخد الحرف الأول من كل نقطة وتعمل بيهم كلمة او الكلمة الأولى من كل نقطة وتعمل بيهم جملة🎯.
ناخد مثال انا عايز احفظ النقاط دي ( ¹.جوز _ ².موز _ ³.لوز) احفظهم بكلمة (جمل) وقس على ذلك 🤹🏽‍♂️ .


3.طريقة ال Active recall :

الطريقة دي بتعتمد هل احنا فهمنا الكلام الحفظناه ولا لا ؟أول حاجة حنقرأ الجزء العايزين نذاكره بسرعه ، نجيب ورقة ونكتب فيه المتذكرنه ونجي نقارن الكتبناه بالمنهج ونشوف الناقص شنو ودا غالباً أكتر جزء بتنسي فبنذاكره تاني ونأكد عليه وبعدين بنسمعه تاني📑.
الطريقة دي مناسبة جداً للمذاكرة لأنها بتخلي المعلومات تثبت، بس مشكلتها إنها بتحتاج وقت طويل يعني ما بتنفع ليلة الإمتحان⏱️.


في النهاية في طرق كتيرة شديد ودي كانت على سبيل المثال لا الحصر فأنت اخد الطريقة البتناسب مستوى حفظك و وقتك واعرف انك قادر تحفظ وقادر تنجز ومافي شئ بتوقفك فأنت قول بسم الله وابدأ اقرأ والله ولي التوفيق🤍.


شاركونا في التعليقات اكتر طريقة من الطرق المذكورة بتناسبك وحتبدأ تطبقها 💆🏽‍♂️؟ولو عندكم طريقة خاصة بيكم قولوها عشان تساعدوا غيركم 🙋🏽‍♂️.


#تجمع_طلاب_صناع_المستقبل
#FMSG

الضغط يُولِّد الانجاز

كلنا بنمر بفترات صعبة كتير شديد 💔
فترات بنكون مضغوطين فيها من كل
جهة، وفي نفس الوقت عندنا كمية
من الحاجات عايزين نعملها😔

احياناً بنحس روحنا ما فاهمين حاجة
ما عارفين نعمل شنو ونخلي شنو 🤷🏻‍♂️
بس بعد الفترة تعدي بنلقى اننا بفضل
الله اشتغلنا بابداعية كبيرة شديد وبنكون
فخورين بي روحنا 😴👏

دائماً اعرف كيف تقسم زمنك صح في
عِزّ الازمات
ومهما حصل اتذكر انه الضغط يُولِّد…

شاركونا مواقف كنتو مضغوطين فيها
شديد وقدرتو عملتو فيها شغل ابداعي💙.


#تجمع_طلاب_صناع_المستقبل
#FMSG.

ما يغشوكم و يقولو ليكم القرو عملو شنو، عشان القرو ابدعو و انجزو و انتو لسه بتسمعو في كلام المحطمين🤭

تعالو اوريكم الطالب ده قرا و عمل شنو😏 :

- طالب الطب العمومي والجراحه العامة
- رائد أعمال إجتماعي
- قائد تطوعي
- مستشار منظمة غياث الخيرية
- رئيس منظمة غياث الخيرية سابقا.
- أمين عام ملتقي طلاب الطب السودان سابقا.
- رئيس لجنة إعداد الدستور واللوائح باتحاد طلاب الطب السودان.
- أمين عام مبادرة وريدك سابقا.
- السكرتير الإداري لبنك الدواء سابقا.
- عضو جمعية علم وظائف الأعضاء السودانية سابقا.
- مدير أنشطة وفعاليات بمنظمة قوم الخيرية سابقا.
- أمين مكتب اللغات بجمعية الطلاب السودانيين سابقا.
- المجلس الاستشاري للمبادرة السودانية لعلاج الإدمان سابقا.
- عضو إتحاد الشباب العربي سابقا.
- البورد العربي للقيادات التطوعية.
- مهتم بالأعمال الخيرية والبرامج التوعوية.
- مهتم بالأعمال النقابية والطلابية.
- ناشط في مجال التعليم والصحة والتوعية المجتمعية.
- منظمة الوقاية من الأمراض المنقولة بالدم
- الجمعية السودانية لأصدقاء مرضي السرطان تداعي
- جمعية اصدقاء مرضي السكري
- مدير مؤسسة الأمل الاستشارية
- متحدث تحفيزي
- مهارات التخطيط الشخصي وإدارة الوقت
- تنظيم مشاريع الحقائب الرمضانيه وكسوة شتاء وإطعام أبطال الشوارع
- مؤسس منصة المستشار للارشادات والاستشارات الجامعية
- متحدث في المؤتمر الدولي لباحثي المجتمع المدني ال١١ جامعة موسكو للعلوم السياسية.
- متحدث ورئيس المؤتمر الافريقي للقيادات التطوعية.
- عضو لجنة العلاقات العامة والدولية الاتحاد العربي للشباب والتنمية.
- عضو مجموعة اصول الطب في الاسلام البحثية

ايوا ياهو أحمد الحافظ المهدي خليفة

ح يكون ضيفنا الليلة في لقاء رهيب جدا مليء بالإنجازات يلا خليكم متابعين🤍


#تجمع_طلاب_صناع_المستقبل
#FMSG

في نص الجوطة الحاصلة دِي ما تنسى نفسك،  نفسك حِبها وإعتني بيها خليك اهم شخص في حياتك وخليك دايما قوي ومُتحمس ما تنسى! أنت بتستحق كل شي 💙.
"فما عليك من سواد أمس صباح الخير بقلبٍ رحبٍ جداً💙. "




#تجمع_طلاب_صناع_المستقبل
#FMSG