عارفين ديل شنو؟🤔

تعالو نتعرف عليهم في ميدكس 🏃🏃
https://t.me/FMSGmedx

سلسلة جديدة حتبدأ، متحمسين؟!🔥🔥🔥🫡

إزيكم يا شباب 🙋‍♀️💜

و إن شاء الله تكونوا طيبين و بأفضل حال..

في حياتنا اليومية بتواجهنا مجموعة مواقف عقبات مطبات، ظروف لازم نتأقلم معاها و مشاكل مفروض نحلها..

و عشان نقدر نواصل في سكة طريقنا لازم يكون عندنا مهارات و سلوكيات لحتى نقدر نتكيّف و نتأقلم مع الظروف الحوالينا و نصل لنجاحنا و نهضة مجتمعاتنا و بلدنا..

طيب عارفين المهارات دي شنو؟
أنواعها و طرق اكتسابها؟

المهارات هي مجموعة من الأفكار و السلوكيات البتقدر تكتسبها بالتعلم و التجربة و لو اكتسبتها تأثيرك في قيادتك لحياتك بكون قوي🎯 و أي زول ممكن يكتسب المهارات دي لأنو رسولنا الكريم صلى الله عليه وسلم بقول:(إنما العلم بالتعلم و إنما الحلم بالتحلم)، محاولتك لإكتساب أي حاجة بعون ربنا حتقدر عليهو💜.

المهارات نوعين :_
١_المهارات الناعمة الSotf skills(ودي زي مهارات التواصل، التخطيط و التنظيم، و مهارات العمل الجماعي)
٢_المهارات التقنية أو الصلبة الHard skills (و دي المعرفة التقنية البتحصل عليها من خلال تجاربك الحياتية سواءً في وظيفتك أو من دورات تدريبية أو تعليم متخصص)

و عشان نحنا عايزنكم تستمروا في حياتكم و تحققوا طموحاتكم و أحلامكم حنمشي بيكم واحدة واحدة في المهارات دي و نوريكم ليها بالضبط و شنو الحاجات الازم تكتسبوها و تكون عندكم..

فيلا نبدأ و نشوف شنو أول حاجة محتاجيناها من المهارات دي...

🔎مهاراتنا الليلة مهمة شديد لأنو كل حاجة في حياتنا و نحنا ماشين بتتغير (دوام الحال من المحال) زي ما بقولوا و الناس القادرة إنها تنجز رغم تغير الظروف و الأحوال البنمر بيها حزن و فقد، فقر و غنى ، هو إنسان عندو دافع ذاتي!..

الدافع الذاتي دا طاقة داخلية(حاجة جواك كدا) بتشجِعّك من نفسك من غير مساعدة اي زول من غير دعم اي زول بتشجعك على الإستمرار في الحاجة الدايرها

في طلاب مستقبلهم حيضيع لو أهلهم ما صحوهم كل يوم😙 ما حيمشي للمدرسة و لا الجامعة😪 في موظفين مستقبلهم حيضيع لو ما كل يوم😪 الحواليهم شجعوهم إنهم يشتغلوا كويس و في ناس ما حتصلي لو ما في زول بذكرو بالصلاة😱...

جميل إنو نحنا نساعد بعض بس في مرحلة من مراحل حياتك يمكن ما تلاقي زول يساعدك و يقعد كل مرة يذكرك باللي لازم تعملوا و يمكن الحواليك زاتهم يكونوا ماشين غلط، و إنت محتاج من جواك صوت داخلي يحفزك..

دافع ذاتي عشان يخليك تكمل في سكتك ربنا ذكر مهارة الدافع الذاتي في قوله :(يأيها الذين آمنوا عليكم أنفسكم لا يضركم من ضل إذا إهتديتم إلى الله مرجعكم جميعاً فينبئكم بما كنتم تعملون) ركز مع نفسك و خلي الباقي لربنا.

و يمكن أغلبنا محروم من المهارة دي لأنو ما عارف طبيعة الدنيا كويس ، طبيعة الدنيا إذا فهمتها و عرفتها صاح دوافعك ما حتتكسر خالص، الدنيا دي مكان عشان نتعب و نشقى و أي حاجة عشان نحصل عليها لازم ندفع تمنها ما هو نحنا ما عايشين في الجنة الفيها اي حاجة عايزينها و نشتهيها ؛ فعشان كدا لازم يكون عندك تحفيز ذاتي نابع من نفسك حتى تقدر تصل لأهدافك و يزيد من حماسك و ثقتك بنفسك..

ورونا في التعليقات شنو الحاجة البتحفزكم عشان تواصلوا؟

ما ننسى الايك و الشير و انتظرونا المرة الجاية عشان نتعرف على مهارة تانية من مهاراتنا..

#تجمع_طلاب_صناع_المستقبل
#FMSG

https://t.me/sdfmsg

وماننسى الشير لي رابط القناة لأنو مستنياكم فعاليات كتيررة🔥🔥

صباح الخير صُناع المستقبل💙

لا أحد يولد بنمط أو بسمات معينة أو بقدرة ما، ولم نولد من أرحام أمهاتنا
ندرك من نكون، في البداية نتعلم وبالتظاهر نعرف كيف نكون كمثلنا وقدوتنا، نتعلم
ذلك عن طريق النسخ والتقليد💙💙💙💙💙

وكما قال سلفادور دالي:"هؤلاء الذين ليس لديهم القدرة على المحاكاة والتقليد
هم أناس خاملون وغير منتجين".

خمنو؟😁🔥🔥
#FMSGmedx

ميدكس فيها شنو بكرة؟؟ يلا عليهم عشان نعرف🔥
https://t.me/FMSGmedx

بمناسـبة اليوم العالمي للسكري،كل التقدير والاحترام لمرضى السُكـري ،ابتسموا فـأنتم أبطال🔥.
#FMSGmedx

تابعوا محتوى اليوم العالمي للسكري على قناة FMSGMEDX
https://t.me/FMSGmedx

نسيت انواع الحاجة دي ،لخبطت في قوانين الفيزياء ،الفرق بين المادتين في التفاعل ما عرفته .....الخ

كلها جمل بنسمعها وقت الامتحانات وعشان نحل المشكلة دي كتبنا ليكم البوست دا تمام ؟!
ايوا تمام
طيب يلا ارح نشوف حنحلها كيف .

يا طالب يا عزيز الاسئلة الفوق دي بنحلها بطرق واستراتيجيات المذاكرة ،اي اي استراتيجيات يعني يا الحبيب حنخطط ونضع جدول عديل للمذاكرة.

من الطرق دي انو نحن بنقسم المادة إلى اجزاء على فترات متباعدة شوية (مثلاً كل خميس من الساعة ٨ لحدي ٩ حاقرا كمياء باب العضوية )، الطريقة دي حتخليك تركز على المعلومات المهمة في الدرس ولمن يجي الاسبوع التاني تراجع وتتذكر الدرس الفات حتى تدخل على درس جديد وبكدا حتكون بتضرب عصفورين بحجر واحد يا الحبيب (مذاكرة درس جديد ومراجعة درس سابق ).

يا طالب يا عزيز عارف انو برضو خلال اليوم ممكن تقرأ كم مادة والافضل يكون مختلفات او مادة واحدة لكن الابواب مختلفة .

قعدة واحدة وانتهي من المادة للإمتحان ؛دي طريقة غلط وانت كدا بتضيع في وقتك لا غير الاحسن إنك تقرا في فترات متقطع (تقرا ربع ساعة مثلا وتوقف شوية وتاني تقرا ربع ساعة وتوقف وهكذا 🌚).

لو عندك مادة حفظها كتير ممكن تستخدم الخرائط الذهنية خصوصا في الدروس البكون فيها انواع ،وأقسام،ومباديء واي تعدد .

بنتمنى البوست يفيدكم وبنتمنى ليكم مذاكرة ودراسة جميلة وخفيفة على قلوبكم ♥️
#تجمع_طلاب_صناع_المستقبل
#fmsg

إنَّ الأحلام العظيمة لا يمكن أبدًا أن نجدها على أرصفة الشوارع ، إنَّها تسكن أبراجًا و تحتاج إلى جُهدٍ كبير و كذلك حُلمك💙.
#تجمع_طلاب_صناع_المستقبل
#fmsg

اغلبنا في مرحلة الثانوي بنكون جايطين وما عارفين نختار مجالنا الجامعي عل أي أساس...

وبنسأل الناس الأكبر مننا انو اخترتوا مجالاتكم عل اي اساس ؟

وهل كلام الناس صاح انو ماف مجالات أحسن من المجالات الطبية والهندسة ...
وباقي المجالات كشا مشى ساي ؟؟😢

وهل بالجد المجالات الطبية والهندسية هي ال Top وفرص عملها مضمونة مية المية وبعد اتخرج حأشتغل طوالي وابقى جلابي و الف العالم كله ؟ 😎

وغيره من الأسئلة الكتيرة البنطرحها لروحنا وما لاقين ناس يجاولوا لينا عليها .

وموضوع اختيار المجال موضوع صعب و حساس جدا لأنه جزء من حياتنا حيعتمد عليه وحيأثر بحياتنا بصورة كبيرة .

فقبل ما نعرف انو عل اي اساس يفترض نختار المجال الحيكون مناسب معانا...

لازم نشوف أول شي انواع تفكير اغلبية الناس الحولينا في مجتمعنا السوداني بخصوص اختيار المجال ..😁

النوعية الأولى : اختاروا مجالاتهم بناء عل رغبتهم الخاصة وشغفهم تجاه المجال وشايفين روحهم في المجال وحيقدروا يبدعوا ويكونوا متميزين في المجال.

النوعية التانية : حكمتهم نسبهم.. في كمية عندهم رغبة في مجال معين لكن نسبهم ما سمحت ليهم فإضطروا يغيروا مجالهم .

النوعية التالتة : جابوا نسب عالية ونسبهم بدخلهم اي مجال وما عارفين يختاروا اي مجال ينفع معاهم واختاروا اي مجال من طرف والنوعية دي بذات ماشة ورا اراء المجتمع عموما انو المجالات الطبية والهندسية مجالات قمة أما المجالات التانية مجالات كشا مشى. 🤸

النوعية الرابعة : همهم المكانة الإجتماعية والقروش ما اكتر .

النوعية الخامسة : اهاليهم بكونوا فارضين عليهم مجالات معينة وبتكون ما رغبتهم للأسف والنوعية دي من الأهالي بحاولوا يحققوا احلامهم الخاصة في عيالهم .

فخليكم متابعين معانا في البوستات الجاية عشان تعرفوا معانا اكتر و اكتر عن #كيفية_اختيار_المجال_الجامعي

📌ونصيحة مننا ... ما تقارنوا المجالات ببعض وماف مجال أحسن من مجال وماف حاجة اسمها مجالات قمة أو كدا دي مفاهيم مجتمعية خاطئة ومتوارثة للأسف اي مجال عنده مكانته وقيمته وفائدته ..

دا تاني برجع ليك تختار المجال الشايف فيهو نفسك وحتقدر تكون متميز فيهو لقدام وطالما كنت متميز في مجالك البتحبه الفرص حتجيك من وين لوين ..

فبس خليكم متابعين معانا عشان تعرفوا كيف تختاروا صاح .✨💛

#تجمع_طلاب_صناع_المستقبل
#FMSG

قصة نجاح 🌼
انا طالبة من الجزيرة امتحنت الشهادة السودانية في 2009 احرزت 81% قدمت في عدة جامعات لكن كنت عايزه مختبرات جامعة السودان للعوم والتكنولوجيا لكن للأسف شالوني كلية العلوم الرياضية جامعة الخرطوم وانا كنت بكره الرياضيات شديد و ما بعرف فيها حاجة من الثانوي فقررت اترك الجامعة وارجع تاني الثانوي لكن عندي اختي الاكبر مني قالت لي "انت ما ضروري تكون في المكان الانت عايزو بس انت لازم تكون متميزة في المكان انت فيهو " ومن هنا انا بقيت افكر لي انا م اتحدى نفسي شوية واكون متميزة دخلت الجامعة واجتهدت وبعد الامتحانات مشيت عشان اشوف النتيجه في البورد لكن المفاجأة انو انا جايبه 3.80 في الرياضيات و 3.50 في المعدل (بروف الدفعة)
اتخرجت 2014 بتقدير إمتياز حضرت الماجستير و الدكتوراه في أمريكا في الذكاء الإصطناعي واليوم انا باحثه في معهد بنسلفانيا لذكاء الاصطناعي.

#نصيحة 🌼
اذا قدمت وشالوك في جامعة او تخصص انت ما عايزو م ترفض لانو والله عن تجربه الرغبة الحقيقيّة بتجي في الجامعة لأنك في البداية انت بتكون ما عارف كتير عن الجامعة أو التخصص لكن بعد تدخل الجامعة بتعرف اكتر وتلقائياً الرغبة بتجيك واتأكد تماماً إنو كل شئ جاي من ربنا لخير دائماً.

"( وَعَسَى أَنْ تَكْرَهُوُ شَيْئَاً وَهُوَ خَيْرٌا لَكُمْ...)"💛✨️
#قصص_نجاح
#تجمع_طلاب_صناع_المستقبل
#fmsg