تجمع طلاب صناع المستقبل - FMSG

#_قصة_نجاحي_في_الصف_الثالت:
القصة دي لمن افكر فيها طوالي بتجيني ذكرى بعيييييدة شديد ، وأنا طولي شبرين كدا 😅، لسة طفلة وبلعب مع خالي في الهول بتاع بيتنا ، جدي الغالي قاعد في كرسيهو المعتاد وهالة من النور بتحيط بيه ،قال :( شهد دي لمن تكبر حتبقى دكتورة ، والرازي حيعلمها سواقة العربية ) ومعاها ابتسامة ما بنساها ابدا .
اها شوفتوا من اليوم داك وأنا شهد البتحلم تبقى دكتورة وتخلي جدها فخور بيها ..
( فجوة زمنية )
ما بكذب عليكم انا في الاساس ما كنت مجتهدة شديد ، لحد سنة سابع وانا بجيب 252 يعني ممتاز على الحافة كدا ، لحد ما جات سنة تامن وهنا وعيت ( بفضل اساتذتي الاجلاء) إنها سنة مفصليه ولازم احرز مجموع كبير ، وعرفت انو في مدرسة اسمها اسماء عبد الرحيم النموذجية هي مطلب كل المتفوقين والحالمين . فا بدت رحلتي في تامن من الصفر وانا هدفي الاذاعة ودخول اسماء ، المهم اجتهدت شديد وامتحنت الحمدلله وجات النتيجة وانا في اليوم داك متأكدة اني حأتزاع ، بدا المؤتمر وانتهى وانا ما اتزعت صراحة زعلت شديد و عرفت نتيجتي وكانت275 ما رضيت بيها ابدا في وقتها ، لكن بعد دخلت اسماء حمدت ربنا الف مرة عليها وعرفت اني محظوظة شديد .
الكلام دا 2018 خلالها حصلت حاجات كتيرة ماف داعي لذكرها لكن اتعلمت منها وصنعت مني كتير، نجر الشريط ووووويوو لحد 2020 من بداية السنة جدي بدا يتعب ويدخل المستشفى ، جاء وقت احتاج لجهاز تنفس ، ما كان بقدر يتحرك كويس ، يلا انا بطبعي للاسف زولة ضعيفة قدام الناس الانا متعلقة بيهم ما بقدر اتحمل اشوفهم تعبانين او منكسرين ، بهرب لمن احس بالعجز ، منظر يابا وهو في السرير ونفسو متضايق وخالتي بتديهو موية زمزم لا قادر ياكل ولا يشرب ورجلينو مورمات شديد كان بخطم قلبي شديد اول مرة اشوف زول من اهلي تعبان كدا 💔
كان عندي احساس ظائم بالعجز وانوو ياريت لو كنت اتولدت قبل كدا وبقيت دكتورة عشان اقدر اسعادو واخفف آلامو .
وصلت مرحلة بكون قاعدة في الغرفة براي وما بمشي اشوفو . لحدما جا يوم وقالو لي يابا عاوزكم ، مشينا انا وماما ، وهو لسة راقد نفس رقدتوا 😭😭😭😭😭😭😭😭😭😭😭😭💔
، وصانا كتير شديد ودعا لينا كتير شديد شديد ، دعاء يكفينا مية سنة من عمرنا ، في نفس اليوم نقلوهو المستشفى ما مرت 48 ساعة و جاء اليوم الاسود 💔 ما حاتكلم عن اليوم داك لاني ما حاتحمل ، لكن من وقتها وفي حاجة جوانا ماتت لا انا ولا اهلي زي مانحنا ،
المهم نزلت سنة تالت للمرة الاولى 2020-2021 صراحة عديتها اهمال ونوم وتلفزيون ، كنت فاقدة الشغف ، لحد نص السنة وانا قرايتي ما جايبة حقها في النهاية استسلمت ، في يوم جيت لماما قلت ليها انا عاوزة اجمد السنة واني ما بقدر على تالت دي ، طبعا ما وافقت وشاكلتني شديد وقالت لي تمتحني بس ... ما اطول عليكم عديت الامتحانات وانا كل يوم ببكي من الندم وعارفة روحي حاعيد حاعيد ، وبوووم جا يوم النتيجة وكانت 82.1 لحظتها نزلت مني دمعة واحدة بس ، لكن كانت حارة شديد ، اتصلت بامي كلمتها قالت لي اعادة بس ، في نفس اليوم سجلت في المدرسة وحرصت انها تكون قريبة لي فاخترت مدرسة العودة ، نزلت تالت يوم بعد النتيجة هنا انا حابة اشكر اساتذتي الاجلاء في مدرسة العودة والادارة الرشيدة كمان على دعمهم وجهدم الكبير وايمانهم بي 💙
بديت بكتبي حقت السنة الفاتت زاتهم ، ختيت جدول قاسي شديد لنفسي ، الناس كانو فايتني بتلات شهور فكان لازم الحقهم واللي زاد التحدي انو بلغونا انو امتحانات التصفية حتكون بعد اسبوع فكان لازم اكون في الفصل الاول والحمدلله اول ثمرة تعب جات وكنت اولة المدرسة ودا كان دافع اني اتحمل الضغط والتعب واتأكد اني حاحصل على ما اريد 💪 . الحمدلله واصلت قراية على النسق الانا عاوزاه والبناسب طموحاتي ، بس لكل جواد كبوة في نص السنة جاتني فترة ضغط نفسي صعبة شديد ما كنت بقدر اقرا ولا افتح كتاب ودائما خايفة ومتوترة
عدا شهر وانا بالحال دا فا لمن قربت الامتحانات الشهرية التانية قعدت مع نفسي وقلت ليها يا شهد هما خيارين ما عندهم تالت يا اما تستسلمي وتخسري جهدك ومستقبلك يا اما تقاومي وتسعي وتفوزي بي مستقبلك واحلامك 💪 فا قويت نفسي وحفزتها واستعنت بالله كل ما كان تجيني خوفة او كدا والحمدلله رجعت احسن من الاول لاني كنت ولا زلت دائما مؤمنة انو اي الم بنمر بيه هو تجربة وتهيئة ودرس للمستقبل بس ما اكتر فلا اجزع ولا اخاف وفعلا دا الحصل . وفووو مرت الايام والشهور وجا موعد امتحانات الشهادة وطبعا انتو عارفين قطعة الكهرباء والحر والنفسيات لكن كنت بصر لانو المرة دي يا غالب يا مغلوب😤
كل ما اتذكر اني كنت بساهر براي في الحوش والضلام والخوف من الضلام واي شي يتحرك يخلعني 😣 غايتو بس الحمدلله

❤6

1.74K views14:29