كل ما يخص تخصص الصيدلة
في بوست واحد 🔥 🔥

البوست دا هدية للطلاب القبلوهم او الحيقبلوهم في كلية الصيدلة... لأنو شايفهم بيسألوا كتير عن حاجات مختلفة ...فممكن تعمل save للبوست دا وحيفيدك يوم من الايام ان شاء الله ..

يلا عشان الكلام يكون مرتب حأعمل عناوين رئيسية على اساس انك تختار العنوان الانت محتاجة :
########################
١/نبذة عن مواد كلية الصيدلة
#######################
٢/فرص العمل بعد التخرج
#######################
٣/بعض النصائح للتميز الاكاديمي

#######################

####################################

طيب نبدا طوالي بالاولى:

نبذة عن المواد:

بكالوريوس الصيدلة عادة بتكون فيهو مواد بتتمرحل معاك من اولى لخامسة :

سنة اولى وسنة تانية للتأسيس فحتاخد مواد زي :

English for medical terminologies

لغة انجليزية او مصطلحات طبية

.

.

General chemistry

كيمياء عامة او غير عضوية

Organic chemistry

كيمياء عضوية

.

.

الكيمياء دي انت بتاخدها كأساس مهم للمواد التانيه بعدين..

Biology and zoology حتاخد

علم الاحياء لأنك بتتعامل مع جسم الكائن الحي ومع خلاياه

حنخلط خلطة من علم الاحياء مع علم الكيمياء في مادة اسمها bio-chemistry ودي بتوريك التفعالات الكيميائية البتتم داخل الخلية...

والفيزياء كواحدة من المواد الاساسية برضه حناخدها في مادة الـphysics

وبرررضو حنعمل خلطة صغيرة بين الكيمياء والفيزياء في مادة اسمها physical chemistry

والكيميائيات دي كلها لأنو الدواء مادة كيميائية وجسمك برضو فيهو مركبات كيميائية ...بمناسبة جسمك حتعرف التشريح بتاعه في مادة اسمها Anatomyاو علم التشريح ودا بوريك تشريح الجسم بمختلف الاعضاء،،

اما الوظائف الطبيعية البتعملها لينا الاعضاء دي فدي حتدرسها في مادة علم وظائف الاعضاء او الـphysiology ...

في سنة اولى وتانية حتعرف مادة اسمها ال botany او علم النبات ودي بتدرسها لأنو النبات مصدر مهم جدا للمركبات الكيميائية الممكن نستخدمها كدواء ..وطبعا لازم نفهم خصائص المركبات دي وكيفية استخراجها من النبات في مادة اسمها العقاقير الطبيعية pharmacognosy ...

وبعد نستخرج الدواء من النبات ونعمل عليه كل التجارب مفروض نختار هل حنعمله في شكل كبسولة ولا حبه ولا حقنة ؟! والحاجات دي حنفهم بتتعمل كيف في مادة اسمها

ال pharmaceutics او علم الصيدلانيات ...

تقريبا كده اولى وتانية انتهت يلا نخش على تالته ورابعة :

نفس المواد الفاتو ديل حيستمرو معانا (ما كلهم طبعا ) في تالته ورابعة و حنبدا نتعرف على الامراض المختلفة في مادة اسمها علم الامراض او الـpathology ... لو عرفنا المرض حنصمم ليهو دواء ونصنعه كيميائيا في مادة اسمها
ال medicinal chemistry الكيمياء الطبية ودي مادة بتتكلم عن تصنيع او اختراع دواء بطرق مختلفة ... بعد ما نخترع دواء بعالج الصداع مثلا حنجي نفهم كيييف الدواء حيعالج الصداع ، واستخدامات الدواء دا شنو غير الصداع والاثار الجانبية وكمية من المعلومات في مادة اسمها الـpharmacology او علممم الأدوية 🤝

بس دقيقة ...

قبل ما الزول يجرب دوانا دا نحن لازم نتأكد بالتجارب انو ظابط من ناحيه كمية ونوعية والحاجة دي بنعرفها في الكيمياء التحليلة Analytical chemistry

وبكدا ضمنا الدواء حيصل للمريض وهو سليم👌 وفي التركيب الكيميائي والفيزيائي المناسب 👌

طيب في حاجة صغنونة كدا نحن بنهتم بيها شديد .. الكائنات الدقيقة يا اخوانا ..ناس البكتريا والفيروسات ووو ... طبعا معروف انهن كعبات وبعملن الامراض المختلفة فعشان كده لازم نعرفهم ، مادة الاحياء الدقيقة او الـmicrobiology حتوفر ليك الحاجة دي وبالمناسبة ..

علاقتنا بالبكتريا ما عداوه وبس ممكن نطلع منها دواء زي الانسولين !

الانسولين دا ممكن نطلعو من البكتريا والله ! عارف كيف ... ؟؟

ح اوريك .. بس خلينا نمشي سنه خامسة الأول ..

في خامسة في مادة اسمها biotechnology او التقانة الحيوية ودي بتوريك كيف ممكن نحول الخلية لمصنع ممكن ينتج لينا ادوية عجيبة ! كيف نعدل وراثيا في الخلايا وكيف كيف كتير ...

نضيف ليهم مادة او مفهوم جديد بدا يظهر في كليات الصيدلة وهو عندو دور مهم في كل مهام الصيدلي وهي مادة الممارسة الصيدلانية
Pharmacy Practice👌
ديل حيجوك من سنه اولى يوريك انت زاتك كصيدلي مهامك شنو وبيدربوك عليها في السنين المختلفة و بتتخرج صيدلي فاهم شغلو وما متشتت (الشغلة بقت ما زي زمان)

في خامسة بتبدا تفهم وتربط المواد القلناها فوق مع بعض وتبدا تظهر ليك تخصصات كبيرة زي تخصص ضبط الجودة quality control وده بتطبق فيه كلام التحليل الكيميائي ووو..

تخصص الصيدله السريريةclinical pharmacy ودا تخصص ادق حتطبق فيه علم الادوية لكن بالتركيز على المريض والعوامل الخاصة بالمريض بالذات في المستشفى ..

تخصص تالت وهو الpharmaceutics ودا نفس الكلام القبيل لكن هنا حتتعرف اكتر على احدث الاشكال الصيدلانية وكيفية تصنيعها في المصانع ...

تخصص اخير وهو الphytochemistry او الكيمياء المختصة بالنبات ودي مادة متعلقة بالنبات كمصدر للدواء ...

حتاخد مادة اسمها research methodology او طرق البحث عشان تفهم كيف تعمل البحث العلمي بكل خطواته ومفاهيمه

.

.

.

يلاااا معظم المواد من اولى لخامسة بكون معاها معامل او تجارب انت بتعملها ودي مهمة لأنها بتوقع ليك المعلومة وبتخليك تطبق النظري👌

طيييييييب

المواد دي قد تدرسها بمسميات تانيه لكن هي نفس المفهوم او المضمون ...
واحيانا في جامعات بتزيد او بتنقص مواد معينة حسب رؤية الجامعة ... وترتيب المواد قد نتلقى فيها اختلاف في الترتيب في السنوات ...المهم كل المواد بتدور حول المفاهيم القلناها فوق ..

.

.

####################################

.

لمن تتخرج فرص العمل بالنسبة ليك هي :

١-العمل في صيدلية مجتمع او مستشفى

ودا مجال حساس لأنك حتصرف فيه الدواء للمريض مباشرة وبالتالي انت اخر خط امان عشان المريض ياخد الدواء بالصورة الصحيحة
صيدليات حكومية
صيدليات خاصة
صيدليات المستشفيات

٢- مندوب طبي medical representative ودا انت بتشتغل مع 👈شركة معينة وبتسوق ليهم الدواء حقهم ، طبعا لمن الشركة تجيب دواء جديد لازم يصل للصيدليات والدكاترة في المستشفيات ولازم يعرفو عنو كل المعلومات المهمة ،، المعلومات دي بتوريها ليهم انت كمندوب طبي👌

٣-تشتغل في مصنع 👈في التصنيع 👈او ضبط الجودة 👈او وحدة التطوير والابتكار

٤-تشتغل في 👈معهد ابحاث كباحث للدراسات العلمية الخاصة بالأدوية

٥-مجال التدريس في الجامعات ودا مفتوح
👈 لكل التخصصات ومواد الصيدلة القلناها

٦-مجال الصيدلة السريرية ودا تخصص بسمح ليك في العمل في المستشفيات 👈مع الكوادر الطبية الاخرى في منظومة واحدة وغالبا دي بتتعمل للمرضى الحالتهم بتحتاج يرقدوا في المستشفى وياخدو عناية خااااصة.

-مجال التركيبات الصيدلانية العلاجية او التجميلية ودا بتعمله في معمل بمواصفات معينه وانت زاتك بتكون خشيت كورسات او دراسات عليا معينة..

.
.
.
-مجالات اخرى

.

.

طيب المجالات دي فرص العمل فيها 👈بتتفاوت إلى حد كبير داخل وخارج السودان.... لكن في النهاية كل زول برغبته واجتهاده وقسمته ....

.

.

.

.

.

.####################################

#اقتراحات للتتميز الأكاديمي# :

-ما تتأثر بنتيجتك حقت الشهادة السودانية وما تيأس بسببها : لأنو الجامعه اقل اهتمام منك واجتهاد بظهر في النتيجة والشهادة واقل اهمال برضو بظهر في النتيجة.

.

.

-حاول افهم قبل ما تحفظ ... حاول افهم قبل ما تحفظ ...حاول افهم قبل ما تحفظ ..

.

.

ما تستهين بمادة وتقول دي بدونا ليها لي ؟! زي ما شفتا فوق المواد مربوطة ببعض فحاول افهم ..ومع السنين حتربط المعلومات مع بعض .

.

.

لو واجهتك مشكلة الترجمة ،، استخدم تقنية:

١-المترجم حتترجم الكلمات الماعارفها وبعد شوية حتبقى عندك ذخيرة لغوية كويسة وما بتحتاج تترجم كتير كلما مشيت لي قدام.

٢-الدراسة الجماعية
المذاكرة الجماعية بتنفع مع عدد من الناس، الزول البشرح هو اكتر زول بستفيد، والناس المعاهو وبسمعو في الشرح ديل برصو بستفيدو وبتتسهل ليهم حاجات وبختصرو زمن القراية

.

.

لو الدرس ما فهمتو :

١-افتح المرجع واقرا الجزو المافهمته

٢-افتح اليوتيوب واكتب اسم الشي المافهمته

٣-ما تدك المحاضرات وتعال بدري

٤-اسأل الدكتور من المافهمته

٥-اسأل زميلك يشرح ليك

٦-اقرو في شكل قروبات

.

.

.

تقنيات احتمال تحتاجها:

١-لخص المادة الفيها كلام كتير

٢-اشرح المادة الفيها كلام بسيط

٣-استخدم اسلوب الخرائط الذهنيه

.

.

.

حاجات حتحس اثرها في مستواك قبل التخرج وبعد التخرج:

١-اشرح لغيرك

٢-شارك في السمنارات

٣-شارك في المناشط غير الاكادمية

٤-في الاجازة خش كورسات انجليزي او اي حاجة ممكن تضيف ليك كصيدلي ..

٥-في الاجازة استغل الانترنت وخش اليوتيوب الواااحد دا واكتب كيف اطور نفسي في ..(الانجليزي الاحياء الكيمياء وغيرو )

٦-اثناء الدراسة لو ما قدرت تقرا المادة اول بأول ما تخليها تتراكم عليك شديد...
٧-راجع الدرس الفات قبل ما تخش المحاضرة الجديدة والله دي حتعمل فرق كبير في الاداء

.

.

.

حاجات مهمة حاول اهتم بيها :

١-الكمبيوتر مهم ، كل ما اتعلمته كلما لقيت نفسك مميز وقادر تنجز بسرعة قبل وبعد التخرج ...

٢-بداية السمستر افهم واتوسع في الشرح .... لكن ....نهاية السمستر ركز القريته وحل اسئلة وكويزات عشان تعرف كيف تحل في الامتحان.

٣-خليك ايجابي ،، ومبادر ،، وخت لنفسك عهد انك تتقن الحاجه الماسكها ..سواء كانت قراية .. او شغل بعد التخرج ..

.

.

اخيرا : قد اكون نسيت شي كدا ولا كدا لكن دا الاتذكرته ... واسأل الله ان ينفع به كل محتاج له. اذا في استفسار او سؤال من طلابنا فمرحب بيه في اي وقت في مجموعة في التلجرام عملناها عشان نرد على استفسارات سنه اولى صيدلة.

.

.

طارق عمر/ محاضر كيمياء حيوية
خريج كلية الصيدلة جامعة امدرمان الاسلامية 2016
حائز على جائزة التميز الاكاديمي في علم الادوية بكلية الصيدلة. 2015
رئيس قسم الكيمياء الصيدلانية بكلية الصيدلة جامعة امدرمان الاسلامية 2022
مؤسس سلسلة فيديوهات طارق عمر التعليمية 2019

منقول من صفحة
Tarig Omer Educational

بسم الله نبدأ مع سلسلة #مع_متفوق.

الحلقة اليوم إن شاء الله على قناة التجمع بالتلجرام

https://t.me/sdfmsg

أي سؤال حابين تسألوا لي ريان أسئلوا هنا ✅

يجب أن تكون شديد التركيز وتعمل بجد ، لكن الأمر لا يتعلق بالعمل الجاد دون معرفة ما هو هدفك!

#تجمع_طلاب_صناع_المستقبل
#FMSG

✨
"أقرأ حسي عشان ترتاح بعدين " كتير مننا فقد ثقته بالمقولة دي لأنه الوضع الحالي أصعب من زمان بس نعاين للنص المليان، النجاح ما عنده طعم لو ما كان بعد تعب ومثابرة و السعادة الحقيقية ما في الختام بل في الرحلة نفسها، مثلاً حسي لمن تتذكر أيام الثانوي و تتذكر كيف إنه كنت مضغوط ومتنشن لكن فرحة الأهل يوم النتيجة نستك كل التعب دا وبقت الذكريات الجميلة للتعب الرحلة هي البتداعب خيالك، فما تيأس و واصل المسير
دمتم بخير وصحة وسعادة
كسرة : ممكن تشاركنا ذكرياتك أيام ثالثة ثانوي؟
✨

#تجمع_طلاب_صناع_المستقبل
#FMSG

من اهم الحاجات البنحتاجها نحنا كمجتمع طلاب دعم معنوي و تحفيز دائم ، وفي ظل الظروف و الاوضاع البنمر بيها من افضل الحاجات انو التحفيز دا يجي من شخص عارف بي بالمجال ، و بذات دا لو كان المجال دا من احد رغباتنا ، يلا يا اخوان اجمعوا هنا سريع 🏃🏻و ما تفوتوا اللقاء التحفيزي مع :
الطيب محمد الطيب
•طلاب في السنة الرابعة كلية طب و جراحة كلية نبته
•رئيس رابطة طلاب الطب و الجراحة بكلية نبته(NCMSA)
•نائب المدير التنفيذي لمنظمة قوم الخيرية
•مدرب مصمم جرافيك
•مسؤول الاعلام للعديد من المنظمات
•مقدم للعديد من الورش في المجالات(الطب، تطوير الذات و التحفيز ، الاعلام و التسويق الالكتروني و غيرها من المجالات الاخري)
يلا كلكم ما تفوت عليكم الفرصة و اللقاء التحفيزي ما لطلاب طب بس كل المجالات ممكن تجوا و تسفيدوا 💜

https://t.me/sdfmsg

الفشل °
مش بسب انك بليد أو أنك
. اساسا دا مستواك °
ف الحقيقة. كل الناس واحد
ال بيجيب 3.80. لو أهمل ح يجيب 1.3
والبيجيب 1.2 لو اجتهد وركز حيجيب 3.90.
الشغلة عبارة عن تأثير نفسي°
ف الناجح هو الزول القدر يقنع نفسو انو مافي حاجة صعبة وكلو ساهل و واضح
والفشل. هو الزول الزرع فكرة في راسو انو المادة دي مثلا.. كيمياء أحياء. مايكرو دنميكا
مادة صعبة. وقرايتها صعبة °¶.
فكدا انت ما ح تقدر تقراها ولا حتقدر تنجز فيها.
طيب.. خليك عارف انو مافي مادة صعبة اولا
ايوا مافي مادة صعبة.
طلع كل الأفكار السالبة من راسك. °¶.
وابدا بي رواقة أقري
لو ختيت في بالك انو المادة دي كلها أو فيها جزئية ما بتتفهم لي الا يشرحوها لي
انت كدا.. انت كدا أديت تعليمات لعقلك الباطن انو ما يقرى المادة دي لانو ما حيفهمها.
بس لو قلت بسم الله وزرعت فكرة انو المادة دي ساهلة و واضحة. °¶
حتلقي نفسك بتميل لقرايتها. وفاهم
وما بتيأس من قرائتها..
مختصر كلامي
(تحاول تطلع كل الأفكار السالبة.. المادة دي صعبة.. النقطة دي معقدة.. ما ح اجيب معدل عالي) °¶
ولازم تخت ف بالك انو موادك كلها ساهلة وواضحة. ما تيأس من قرايتها
وما تخلي اليأس والإحباط يسيطر عليك.
خليك قوي وخليك عندك عزيمة وإصرار
انت قدرها و ح تجيب أعلى معدل
انا واثق فيك مهمن كنت وأينما كنت.
لازم تبدي من هسي دي.
تشوف الفاتك شنو وتلحق نفسك
وتجيب معدل عالي °¶
عز نفسك بمعدل عالي تختو في الاستوري وتفتخر بيه طول العمر.
النجاح والتفوق متاح للجميع
ولاكن يناله فقط من أراده وسعى إليه
ولا يناله من لم يرده ولم يسعى إليه
بالتوفيق ان شاء الله


#تجمع_طلاب_صناع_المستقبل
#FMSG

إلى ذلك الكائن المجتهد
ما تخلي شوية إمتحانات تعكر مزاجك يا جميل يا رايق ،✨💚أجتهد حسي عشان تفرح عيوناً تعبت كتير عشانا..
لازم ما نخذلهم و نرفع رأسهم
كونوا بخير ودمتم سالمين💚✨

#تجمع_طلاب_صناع_المستقبل
#FMSG

صباح الخير للناس الجميلة ، للناس البتصحى كل يوم وهي متفائلة بي انو باكر أحلى من الفات ، للناس الظنها في ربها كل خير وإنو رب الخير م بجي إلا بالخير ، للناس البتعافر ، للناس البتقع ألف مرة وبتقوم مليون مرة ، للناس الم بتعرف اليأس في طريقها ، للناس البتحاول تتأقلم مع الظروف الصعبة ، للناس البتقهر مخاوفها وتنفض من نفسها غبار الخوف ، للناس العندها حلم ومصرة تحققو ..

*" صباح الخير عليكم شديد .."*♥️🌸

#تجمع_طلاب_صناع_المستقبل
#FMSG

اقل من عشرة دقايق تفصلنا 🥳🥳🥳

خليكم قراب

مساء الخير عليكم🙋‍♀️ لقاءنا المرة دي مع ضيف مميز من المجال الطبي واللي بيعرفنا أكتر علي التخصصات الطبية
ضيفنا اليوم للحلقة طالب طب اللهم بااارك 😎

يزيد المنير إبراهيم عبدالله

نجي نتعرف عليهو عن قُرب

-طالب طب- كلية اليرموك- السنة السادسة والأخيرة 🔥
-ناشط توعوي في العديد من المبادرات والمنظمات ( الحاجة دي بتدعمو لبعدين )
-كاتب محتوي في العديد من المبادرات

يزيد شخص نشط مشارك في كتير من المنظمات والمؤسسات زي :
* قوم الخيرية
*خطوة
*مجموعة داؤود البحثية
وغيرها الكتير من المؤسسات الشبابية نكتفي بهذا القدر

وتعالوا نتعرف عليهو أكتر 😉

موعدنا بكرة الثلاثاء الساعة 8 مساء علي صفحة التجمع

https://t.me/sdfmsg

نعتذر..
تم الغاء اللقاء لحين اخطاركم بموعده..