تجمع طلاب صناع المستقبل - FMSG

#معاناة_أستاذ

بسم الله الرحمن الرحيم
اللهم صل وسلم على نبينا محمد وعلى آله وصحبه أجمعين.

شكراََ جزيلاً كثيراََ عظيماً تجمع طلاب صناع المستقبل FMSG على العمل العظيم البتقدموه دا، وربنا يبارك لكم فيه، وكمان بتمنى توصلوا الأقاليم لأن والله بتعاني طالب على معلم.

أنا أستاذ في واحدة من مدارس الأقاليم لي في الأقاليم أكتر من ١٩ سنة، ما كنت عايز أبوح بأسرار زي دي بس طالما للفائدة فأقولها ولأول مرة.

أنا كان مفروض أكون مدرس لغة فقط، بس النقص الحاد خلاني أكون شعبة لغة عربية في المقام الأول، وبدرس أحياناً إسلامية، دراسات وتاريخ، ماف معلمين نعمل شنو؟ نخلي الطلاب ساي؟
بنجازف معاهم كدة، مرات بتخلص ليهم المقرر ومرات ما بخلص بس بمتحنوا على الدرسوهو وفي منهم مجتهدين بقروهو من تلقاء نفسهم.
المناطق البتكلم عنها دي غنية بالأراضي الزراعية الخصبة، الأمطار فيها بالذات من الشهور دي لحد شهر ١٠ بتكون غزيرة يعني دا موسم زراعة بنضطر ندي الطلاب إجازة لغاية شهر ٩ عشان يساعدوا أهلهم لأن دا اعتمادهم الأول، زمان كان في نظام كدة بنشتغل دراسة في الصيف وبنديهم إجازة نصف سنوية في بدايات الخريف، عشان دا موسمهم الوحيد ومدخل زرقهم الأول والأساسي، التاس هنا مجبورة تزرع، الصغير، الكبير، النصيح والمريض كلهم بزرعوا.
حتى نحن المعلمين بنزرع لأن المرتبات ضعيفة جداََ وما كافية، السنكات سيئة خاصة لواحد متزوج زيي وعندو أولاد، المدراس في نفسها ما مهيأة للدراسة، في بعض القرى وصلتها المنظمات بنت ليهم مدارس وسكنات بس أهل القرى بسكنوا في السكنات دي معظمها، يعني نفوس تعبانة شديد لأن ما عندهم طريقة.
الواحد تلقاهو مدرس ومعتمد على الدراسة أو الطلاب معتمدين عليهو، في الحالة دي ما بقدر يشتغل شغل إضافي، ياها المرتبات الما كافية دي وبعض من الرسوم البدفعوها الطلاب، وما قادرين نعمل ليهم الرسوم كتيرة لأن فيهم ناس ما بقدروا يدفعوها، حتى في جزء بنعفيهم من الرسوم عشان أهلهم ما قادرين ومنهم الأيتام أباََ وفيهم الأيتام أماََ وأباََ.
بعد كل دا عندنا طلاب بجيبوا درجات كويسة بدخلوا الجامعات بس ما بقدروا يكملوا لأن ماف زول مسؤول عنهم وبلبي ليهم بعض من طلباتهم،وبعض مهم ما شاء الله درسوا واتخرجوا بس ماف شغل ليهم فبجونا المدرسة هنا عشان يساعدوا أخوانهم شوية ويسدوا بعض النقص، بس ما بقدروا يواصلوا سنين طويلة لأن ماف مرتبات كويسة.
المستلزمات المدرسية بنشتريها من جيب الطلاب، الأثاثات المدرسية أولياء الأمور بجيبوا جزء منها كل سنة لحد ما الإجلاس المدرسي يتم.
صراحة الكلام مخجل شديد ما كان الواحد يقولو بس قلنا يمكن نلمس ساكن في أصحاب القلوب الرحيمة لو ما وصلتنا توصل غيرنا وبتكون رسالتنا وصلت.

المعلمين هنا بياكلوا من جيبهم أو من دفتر رسوم الطلاب، مرات بكون ماف فطور لأن ماف قروش، المعلمات بعانن شديد لأن المساكن ما مريحة، والحمامات عافاكم الله ما بجودة كويسة، المطابخ سيئة شديد.
الحمدلله هو دا قدرنا المكتوب لينا بس الحقوا أولادنا قاعدين يضيعوا بسبب النقص والحكومات الما شغالة بيهم دي.

#FMSG

😢8❤2🤩1

1.6K views15:44