طبعا كتير منكم فاكرين بس شغلنا محصور على الشهادة السودانية بس.

بس غلطانين 🌚
السنة الفينا دي ح تكون قنبلة انفجارنا في شمل كافة مراحل التعليم الحساسة (ثامن، ثالث، برالمة 🌚)

وكمان ح نشرك معنا الناس الامتحنت شهادة السنة.

فاااا اعملوا دعوة لأكبر عدد ممكن وانتظرونا 🔥 🔥

كيفية التقديم للجامعات المصرية من الهاتف.

طيب يا عزيزي يا طالب أول خطوة تعملها وإنت عايز تقدم هي إنو تجهز الشهادة حقتك ومعاها الجواز على صورة ممسوحة ضوئياََ (بنسميها اسكنر) بعدها لو عندك الموقع تمام، ما عندك ليهو ادخل قوقل اكتب (ادرس في مصر) طوالي ح يجيب ليك الموقع، تخش فيهو. أول خطوة تعملها تنشئ حساب فيهو بعد تدخل (طبعاََ الموقع بطئ 😂ما هو عربي إفريقي منتظر منهم شنو 🤣)، المهم بعد تدخل أول صفحة فيها أول شيء ح يقابلك (تعليم جامعي "تشغيل موقع تجريبي" ) إنت ح تقدم من هنا لو عندك حساب.

لو ما عندك حساب تعال نعمل حساب، في نفس الصفحة قبل تدخل أي حتة تانية في أعلى الشاشة يمين الهاتف (لو كانت لغتك عربي 🌚 أو أعلى الشاشة يسار لو كانت لغتك غير العربي) ح تلقى شرطتين مكتوب عليهم (القائمة) تضغط عليها بتلقى آخر خيار (إنشاء حساب) تدوس عليه بدخلك في إنشاء الحساب اللي بكون عايز منك بريد إلكتروني وكلمة مرور مكونة من حروف وأرقام أنا بفضل ليك كدة، بعد تأكد كلمة المرور تنتظر في البريد هناك 😂 تخش الوارد بتاع البريد (الرسالة ح تجيك فوراََ 😎) تضغط على تنشيط الحساب وبكون في كود بعد تدخل في الرابط تكتبو.

بي كدة بكون عندك حساب..

الصفحة الأولى فيها بيانات أساسية عادية تدخلها واحدة واحدة.

أي حتة فيها نجمة ما ينفع تخليها فاضية لأن ح يرجعك وما ح يمشي معاك قدام، املاها (البريد الإلكتروني للأب والأم ممكن تكتب لا يوجد، وليس لديه إذا ما عندهم عادي، وإذا عندهم اكتب).

الرقم داخل مصر ممكن تخلي فاضي..

يلا الصفحة الأولى بتنتهي بتفاصيلك، تفاصيل أبوك وأمك، وبيانات القريب في مصر.

تمشي للبعديها، مرات ما بسمح بالتعديل في ركزوا في كل حرف بتدخلوهو.

بعدها بوديك للصفحة التالية اللي هي فيها تدخل نسب المواد، هنا ما تتذاكى وندخل نسب ما حقيقية 😂
جيب الشهادة قدامك ونزل النسب واحدة واحدة عشان بعدين ح يكون في اختلاف بين النسب الكتبتها ونسب الشهادة.

بعد تخلص من دي بوديك للرغبات، ودي أهم خطوة إنت مفروض تركز عليها؛ لأن لو ختيت رغبة غلط ح يشيلوك فيها وبعدين التحويل صعب ما يغشوك يقولوا ليك ساهل، ماف شيء ساهل.

ممكن أقول ليك (القصر العيني اللي هو طب القاهرة الأول، المنصورة التاني ودي في محافظة تانية، بعدها عين شمس داخل القاهرة، الإسكندرية برا القاهرة والزقازيق أكتر جامعة فيها سودانيين في الطب 😂) وممكن لو مقدم متأخر تخت حلوان كخيار إنك عايز تسكن داخل القاهرة لأنها في القاهرة.

بعد دا حساباتك إنت وحسب عندك أصحاب وين وأهل.

الخطوة الأخيرة هي الدفع، ح تدفع 2000 جنيه مصرية للتقديم وما تخاف ح يقبلوك إن شاء الله 💛
طريقة الدفع إما إلكتروني (فيزا كارد أو ماسترد كارد) أي واحدة من دول الزول البدفع ممكن تديهو كلمة المرور والبريد حقك عادي يدفع ليك، برضو في خانات ممكن يخليها فاضية وممكن يملاها بعد تنتهي عملية الدفع بكون التقديم تم وتنتظر النتيجة.

أو بنكي، يكون عندك زول في مصر ترسل ليهو القروش (الدفع ما بياخد عشرة دقايق هناك ما عندهم زحمة في البنوك 😂) ممكن يدفع من البنك الأهلي أو المصري، ولازم يحتفظ بالايصال عشان تاني ح تحتاجو، بعد يدفع يرسل ليك رقم الايصال تدخلو بعد تختار طريقة الدفع بالبنك في الموقع وبي كدة بكون انتهى التقديم.

ننتظر النتيجة مع بعض.

طبعاََ النتيجة ما بتظهر كلها يوم واحد فعشان كدة ممكن تتفحص الموقع كل يوم؛ لأن ما بجيك إشعار إلا بعد تدخل.

كلما قدمت بدري فرصتك ح تكون أكبر في الجامعات الكويسة.

رابط الموقع https://admission.study-in-egypt.gov.eg/

#لايفات_التعريف_بالمواد

محتار ما عارف تمشي علمي أو أدبي؟
خايف تمشي علمي لأنو صعب ؟
ما عارفة رغبتك شنو؟
المواد شنو وأنا بفضّل شنو؟
جيناكم بالحل حنبدأ معاكم إن شاءالله لايفات تعريفية بالمواد علمي وأدبي 🔥🔥🔥 ، و حنتكلم عنها بالتفصييييل و بالإضافة لكده حنعرف كيف نتعامل مع المواد و حنطرق للمشاكل البتواجه الطلاب و حنعرف كيف نحلها و لسه أكتر و أكتر ، خليكم قراب 💜

نعمل شير عشان الطلاب الجدد يكونوا عارفين ودي فترة ذهبية ليهم عشان يبدوا بداية صح.
ودي تسخينة لبداية العام الجديد إن شاء الله 🔥 🔥 🔥

لا زلنا في بداية الطريق ! وهنالك الكثير من المفآجات التي ستدهشكم
وها نحن ندشن روابط تجمعكم على منصات التواصل الإجتماعي ، نرجوا منكم متابعتنا و مشاركاتها مع أصدقائكم لنتمكن من إيصال رسالتنا
□ Instagram |

https://www.instagram.com/sd_fmsg

□Twitter |

https://twitter.com/FMSG_SD

🔥 🔥 🔥
نعمل شير شباب

كل عام وأنتم طيبون وبألف خير.
تقبل الله منا ومنكم صالح الأعمال والدعاء، ربنا يوفق كل ممتحن بإحراز درجات عالية متفوقة، ويوفق من لم يمتحن بعد لتسهيل أمور امتحاناته يا رب.

ما تنسونا من صالح دعائكم لنا بالتوفيق لنصل معكم وعبركم إلى منشودنا.
♥️♥️♥️♥️♥️♥️

من كان ينتظر العيد فإن العيد قد فات ومن كان ينتظرنا فإنا قادمون..

عايز تكون ضمن أسرتنا؟
عندك قريبك ممتحن؟
حابي تشاركنا تجربتك؟
عايز تقترح علينا أفكار؟
عايز تكون مدرس لمادة من المواد؟

فقط انتظرنا أيام قليلة ونكون معكم في عام جديد، جولة جديدة حافلة بمشاريع ضخمة بإذن الله.

ثورة التعليم ستنطلق من هنا 🔥 🔥 🔥
إنتوا جاهزين تدعمونا؟

#FMSG بعامه المختلف جاييكم 🔥 🔥

بسم الله الرحمن الرحيم

تجمع طلاب صناع المستقبل

يعلن تجمع طلاب صناع المستقبل عن الانطلاقة الرسمية لبداية العام الدراسي ٠٢٢- ٢٠٢٣م بالتعريف بالمواد من حيث:
- كيفية التعامل من المادة منذ الانطلاقة الأولى وحتى الامتحان

- كيفية التعامل مع صعوبة بعض المواد

- كيف تحرز درجة كبيرة في المادة أو تقفلها

وذلك إن شاء الله يوم الثلاثاء الموافق ١٩ يوليو ٢٠٢٢م مع أول حلقة تعريفية سيتم الإعلان عنها..


بنتمنى نحن تجمع طلاب صناع المستقبل FMSG أن تشاركوا الإعلان دا لأوسع نطاق عشان عندنا إن شاء الله خدمات جميلة ح نقدمها خلال العام..

#FMSG

https://www.facebook.com/groups/455414298909350/?ref=share

مجموعتنا على الفيس بوك 🔥 🔥 🔥 🔥 🔥 🔥 🔥

https://twitter.com/FMSG_SD/status/1548657457215537153?s=19

حسابنا على التويتر 🔥 🔥 🔥 🔥 🔥

https://www.instagram.com/p/CgHVYQeK1yl/?igshid=YmMyMTA2M2Y=
حسابنا على الانستغرام 🔥 🔥 🔥 🔥 🔥

قناتنا على التلقرام
https://t.me/sdfmsg

صفحتنا على الفيس بوك 🔥 🔥 🔥 🔥
https://www.facebook.com/FMSGsd/


نعمل مشاركة للروابط دي عشان نوصل إن شاء الله لأوسع نطاق ممكن.

السنة إن شاء الله ح نقدم خدمات تعليمية مقبولة بإذن الله..

جاهزين لأول مقابلة؟

عايزين تعرفوا عن المادة وكيف تقدر تجيب فيها الدرجة الكاملة؟

معانا ومعاكم الدكتورة يسرا عبدالرازق كأول متحدث في سلسلة #أعوف_موادك.

متحمسين قدر شنو؟ 🔥 🔥 🔥 🔥

يلا يلا نعمل شير كتير شديد

#FMSG

نأسف جداََ لتأخير البث ساعة عن ظروف خارج إرادتنا..

الساعة ٩:٠٠م إن شاء الله

لوقتها ممكن الناس تاخد فرصتها في كتابة الأسئلة..

مع الأسف الشديد ح يتأجل اللايف لأن الدكتورة جاتها ظروف بعيدة عن الحسابات (في المستشفى قد يكون عندها مريض أو مداومة).

بس بكرة إن شاء الله عندنا لايف تاني والسلسلة تمتد

مادة الأحياء..
محور الطب والمجالات الطبية وهي العقدة الحقيقية لكتير من طلاب القسم.

الليلة معاكم واحد من أميز الطلاب، نقدر نقول عليهو علامة مادة الأحياء.


تعالوا مع بعض كدة عمر ينصحنا ونسألو كتير لمن يقول ما داير..

وإن شاء الله درجة كاملة في مادة الأحياء..

اليوم الساعة ٨:٠٠م

كونوا حضور أنيق وكثيف عشان الزول دا بتحمس بالحضور الكتير 😎😅😅

نحن والظروف..


للأسف الشديد حصلت لعمر ظروف صعبة خالص فما ح يقدر يكون معانا اليوم ولكن ح نجيبو ح نجيبو 😎

- طيب والليلة يا FMSG تاني ح يتلغي اللايف؟


=لو قلت ليك ح يبقى ح تصدق؟ 😎
ح يكون لايف بديل للايف الأحياء وهو التعريف بمادة الفيزياء 🔥 🔥 🔥 🔥 🔥 🔥 🔥

مع الدكتورة يسرا عبدالرازق ورجعت لإنها تكون أول متحدث في السلسلة دي..

يلا نملأ الرسالة دي أسئلة للدكتورة ارح..

ما تنسوا الشير الشير الشير .

عشان نطلع ليكم كتاب الدرب قريب وكدة 😂

معاكم الكيمياء شخصياً الليلة 🔥 🔥 🔥 🔥 🔥 🔥

بسم الله الرحمن الرحيم

#قصتي أو بالأصح معاناتي مع الدراسة..

السلام عليكم ورحمة الله وبركاته.

أولاََ أحب أشكر تجمع طلاب صناع المستقبل FMSG بانهم اتاحوا لي الفرصة دي، وبالجد الشباب ديل بعملوا في عظمة بتمنى تدعموهم وتقيفوا معاهم..

بنهاية عام ٢٠٠٦ بدأت الحرب في قريتي وكان مفروض أدخل وقتها المدرسة بس بسبب الظروف الأمنية المدارس وقفت، وقفت في القرى أما المدينة شغالة عادي زي كأنو ما حصل شيء.
انتهى العام وفقدنا والدي ربنا يرحمه ومعاهو عدد من الأسرة والمعارف في اشتباكات رمزها القبلية وشعارها العنصرية.
دخلت المدرسة مسؤولة عني أمي أو بالأصح مسؤولة عننا نحن أربعة أولاد وبتين.
كنت الود الأكبر مني الاتنين بنات فارق العمر بيننا ما بسيط بس في النهاية هن بنات، أبوي ربنا يرحمو كان عندو حلم واحد، وهو إنو يقربنا لحد ما نتخرج ونبقى دكاترة ومهندسين أو أساتذة حتى.
دخلت المدرسة على عاتق مسؤولية أمي، أخواتي زوجوهن أعمامي عشان ما عندهم أب مسؤول عنهم وهم ما قادرين يعيلونا، فضلنا أربعة أولاد بس وأنا أكبرهم.
بقيت شغال درداقة عشان أدفع رسوم المدرسة لأن أمي بقت ما قادرة تدفع لي بسبب الضغط.
أخواني الاتنين الأصغر مني دخلوا المدرسة واحد منهم اشتغل ورنيش عشان نساعد أمنا.

وصلت تامن وأنا مسؤول عن نفسي، المدرسة فيها ١٠ أستاذ وكلهم من القرية لأن المعلمين البقية بسبب الوضع الأمني رافضين يجوا الأستاذ الواحد ماسك أكتر من مادتين مرات، وهم ذاتهم ما خريجين تربية، وجزء منهم طلاب شهادة سودانية بس، المهم جازفت لمن جبت لي ١٦٦ الفرحة الشفتها في أمي كانت كفيلة بانها تخليني أقرأ باقي عمري كلو عشان أحقق حلمها.
عملت لي كارو بعد روحي قربت تطلع من الدرداقة، بقيت يوم السوق بشتغل كارو عادي والأيام العادية بشتغل موية عشان أجهز للثانوي.
دخلت الثانوي وقدرت أوفر جزء من المتطلبات وهي كانت (كراسات، أقلام والزي المدرسي كان قميص أبيض قصيتو من الترزي وبنطلون أسود أشتريتو العيد)
ما قدرت أوفر كتب، بستلف من أصحابي، جازفت بالطريقة دي خلصت أولى وتانية بمعاناة شديدة، وكان المجتمع ضاغط علينا أكتر من الحياة، عشان أمنا شغالة تبيع شاي.
دخلت الشهادة وكانت أكبر تحدي في حياتي، ما قدرت أدفع رسوم المدارس الخاصة والمدرسة الحكومية ما فيها معلمين علمي لأن كنت عايز أقرأ أحياء، عندنا كم غنماية كدة كنا بنحلبهم بعناهم ودخلت المدرسة الخاصة، بس المصاريف بقت عائق كبير جداََ مرات في الأسبوع بفطر مرتين، مرات بكون صايم، عشان ما عندي حق الفطور، دا حلو عشان أحقق حلم أمي.
الامتحانات جات جبت ٦٨، بس ما بتدخلني التخصص العايزو، ماف حل قدامي غير أقدم لأن ماف حاجة أعود بيها، قدمت قبلوني زراعة في واحدة من الجامعات، بس للأسف ما قدرت أكمل جامعة لأن ما عندي لا حق المواصلات ولا الرسوم البسيطة الكانت، ولا حق الداخلية، وكانت أمي تعبانة شديد عشان نقرأ، قررت أشتغل عشان هي خلاص عمرها بقى كبير.

الليلة أنا حسران شديد لاني خذلت أبوي المات عشانا، وخذلت أمي الأفنت عمرها كلو عشان تربينا أحسن تربية، ما قدرت أقرأ جامعة لأني كنت وحيد، ما قدرت أقرأ لأن الدولة ما وفرت لينا حقوقنا، ما قدرت أقرأ لأن في ناس ما بهمها أمرنا، ما قدرت أقرأ عشان القراية بقت بالطبقات عندك قروش تقرأ ما عندك قروش تشتغل للناس العندها قروش، ليه كدة؟

عشان كدة برجع وبكرر ادعموا تجمع طلاب صناع المستقبل FMSG لأنهم قايمين بعمل جبّار، لمن لقيت الفكرة حقتهم بكيت شديد وقلت ياريت كانوا في زمني قاعدين.

شكراََ تجمع طلاب صناع المستقبل FMSG صوت الطالب، وعبركم أحب أوصل رسالة لكل طالب، إنت محظوظ لأنك قادر تحقق أحلام أمك وابوك ولأن أبوك قادر يحقق ليك رغباتك.
إنت محظوظ لأنك ما واجهت صعوبة في الحياة، ما تيأس لأن صدقني في ألف واحد بتمنى يكون قالت يدفع بس الرسوم عشان يبرع، فما تضيع وقتك في الفاضي واستغل الفرصة دي.

#FMSG شكراََ للمرة الأخيرة ❤️