ترقبوا سيتم فتح استمارة تكميلية، فخليك قريب..
🔥 🔥

- [ ]
قصة كفاح البطل أسامة عصام
•جلس لامتحان الشهادة السودانية 2020.
•احرز من اول مرة نسبة 94,2.
•أحرز درجة 8.5 في امتحان ILETS.
•أحرز مجموع 1500 في إختبار القدرات SAT.
•يدرس الان في كلية الطب جامعة Hull York في بريطانيا.
٠تم تعيينه حديثًا ليصبح مدير قسم التحضير للآيلتس في المنصة الخاصة لطلاب Hull York.


ستنزل بعد لحظات ان شاء الله..

السلام عليكم اعزائي ورفاقي من كل مكان❤‍🔥
طيب بدون مقدمات راح عرفكم عن نفسي😅
اسمي اسامة عصام الدين محمد والكنية اسامة شيخ الدين. سوداني الجنسية وافتخر ❤️. من مواليد امدرمان الثورة خليفة 2003/11/29 درست الإبتدائية لحدي امتحنت الصف الثامن عام 2017 واحرزت بحمد الله المركز الثالث مشترك بمجموع 277 ومن ثم انتقلت الى المدرسة النموذجية للسنتين الأوائل. طيب يلا عالجانب اللي كان حرفياً مغامرة بمعنى الكلمة😅 وهنا راح اتكلم باللغة العامة لتوضيح تجربتي مع ثالث.
يا جماعة انا من خلصت تانية ثانوي ما عملت اي شي غير اني نزلت لي كورس صغير درست فيه اساسيات العضوية حقت تانية لاني كنت فيها تعبان بالمرة😂😂 لدرجة بعيدة ماف داعي افضح نفسي معاكم😅 بس خلوني اكمل ليكم بانه مش العضوية بس.. لا والرياضيات دي حاجة تانية حتى كنت بفكر في اني لما ادخل تالت هل حأجيب نسبة كويسة ولا لا😂 وبصراحة ما اكذب عليكم انا كنت معتبر صديق اخوي قدوتي وزيادة واللي هو عبدالرحيم ❤️ لأنه كان كل مرة بطمني بأني حأكون احسن زول وده غير الكلام اللي بسمعه من ناس البيت واخوي طريدي😅 يلا المهم فترة اجازة تانية ما قدرت انجز اي شي غير اساسيات العضوية وقصائد العربي و20 آية من سورة النور. بس تعالوا لما فتحت المدرسة🔥
نزلت العام الدراسي بحماس عالي شديد مع انه من بدايتها انتقدوني ناس البيت كلهم ما عدا ابوي بخصوص اني ليه افكر انزل في المدرسة اللي جمب البيت واخلي النموذجية اللي درست فيها سنتين😂 تعرفوا انه امي كانت معترضة شديد في الفكرة دي لأنها مدرسة جديدة يا دوبها اول دفعة ليهم وكده🙂 وكيف انت يا اسامة تسيب النموذجية بحد ذاتها وتختار المدرسة دي؟ طيب يا امي ويا ناس البيت انا فكرت كده لسببين.. الاول بانه مدير المدرسة درسني عربي في النموذجية وكان بدعمني شديد وزارع فيني الثقة وكلكم تعرفوه كويس😏 والسبب الثاني واللي هو القناعة بأنه اجتهادك الشخصي والتزامك بكل الجوانب الأكاديمية هو اللي حيرفع من قدراتك لفوق وعلى كده اتصلت لأبوي وكلمته بأني عاوز انزل تالت في مدرسة الصفوة والمهم وافق واتكلم مع ناس البيت واقنعهم❤️ للان بتذكر الكلمة دي " يا جماعة انتو بدل تعترضوا وافقوا لأنه اسامة ده فيه شغف عالي محتاجكم جمبه في الفترة دي وده غير انه المدرسة جمب البيت" ومن هنا خلاص بقيت اكتر من مبسوط وبس على طول مشيت لمذكراتي الخاصة❤️
هههه بالنسبة للناس اللي علقت في كلمة مذكرات. ايوة كانت عندي نوتة اسمها يوميات الطالب الممتحن اسامة😅 كنت بكتب فيها كل يوم بالتفصيل من بداية اليوم المدرسي والى نهايته واستمرت معاي لحدي امتحننا الشهادة❤️ يلا على الأكاديميات.
كنت ماشي بخطة دراسية من اول يوم في المدرسة والى آخر يوم في العام الدراسي(قبل امتحان الشهادة السودانية بيومين) وكانت موزعة لي كل المواد (إسلامية، انجليزي، احياء، عربي، فيزياء، رياضيات، كيمياء) بالاضافة لدروس خاصة بالتحضير لامتحان اسمه SAT وكذلك امتحان الانجليزي المشهور آيلس 😅❤️ فالمهم ما اكذب عليكم من اول اسبوعين كنت يومياً بذاكر بمعدل يتراوح مابين 8 الى 9 ساعات بما فيهم الجمعة والسبت (طبعا مدرستنا ما كانت بتشتغل السبت مع انها خاصة بس يعني عشان لسه جديدة يمكن 😂😂) واستمرت خطتي على النحو ده لحدي وصلت يوم الخميس وقررت بأنه الجمعة تكون إجازة لبعض التعديلات الخاصة بمذاكرتي. ولما بديت اسبوع جديد كنت ضاغط نفسي شديد لدرجة انه خافوا علي ناس البيت وكانت ساعات المذاكرة مابين 10 ل 11 ساعة يومياً وكنت بصحى الساعة 3 صباحاً كل يوم وما بنوم الا بعد الساعة 10 مساء😓 ومرات قبل انوم بتذكر إني نسيت وجبة العشاء اللي مرات بفوتها بس لأنه بتكون عندي حاجة لسة ما خلصتها مع انه اكتر شي بحبه قعدتنا مع ناس البيت لاوقات الوجبات😔 بس على طول بقول معليش يا اسامة هي كلها شهور اتحمل وحا تقعد معاهم زي زمان واكتر❤️ مع انه حصلت لينا مناسبتين زواج بس ابيت اجامل ولما يجو ضيوف بقوا ما يشوفوني تصدقو؟ لدرجة بسألوا امي او اي حد من اخواني. وين أسامة؟ وهم يجاوبوا اسامة مشغول ربنا يعينه ❤️
حبيت تالت شديد وحبيت المعلمين واحلى يوم في المدرسة لما يكون البرنامج الصباحي على فصل علمي نظامي😂 لأني كنت بقدم ليهم احلى برنامج بحسب كلام ناس كتيرة🤣. واستمرت قصتي مع تالت والمدرسة الجميلة لحدي نزلنا اول امتحانات وجيت الأول في المدرسة❤️ رغم انه كان نزل معانا واحد عايد اسمه عمار كنت بخاف من انه يفوتني واحياناً بقيت اسأل بعض الناس منه ولحدي اتعرفت عليه وسألته من الامتحانات كانت كيف وكده وليه عدت والخذلك شنو وبقيت احس ببعض الخوف😂. واستمريت تقريبا شهر ونص لحدي من جديد قررت انه اعمل لنفسي اجازة يوم الجمعة لتعديلات تانية😂😭.

نقصت ساعات المذاكرة اتخيلو! لدرجة بقت مابين 6 ل 7 ساعات وكل جمعة اجازة ما اذاكر واخليها تكون للطلعات والنزهات😂 بس عشان كنت مهتم بالرياضة شديد بالذات الكورة والجري ورفع الاثقال😅فالمهم بقيت كل مرة اخصص ساعات عشان ما اظلم نفسي اللي كانت بجد محرومة من كل شي (لعب، زيارات، موبايل، تلفزيون) واصلا اكتر اتنين بلتقي معاهم جاري محمد وعبدالرحيم صديقي وغير كده ما قاعد الاقي اي زول😄
مرت الشهور لحدي جات الامتحانات التجريبية الخاصة بالمدرسة وبالضبط كنت جاهز من كل النواحي بالذات من بعد توفيق الله ثم وقفة ناس البيت ومدير المدرسة معاي واصحابي شلتي اللي كانوا متفهمين انقطاعي منهم وبس استمرت الحكاية لما طلعة نتيجة التجريبي بس المرة دي جيت الثاني عكس الامتحانات الشهرية حقت المدرسة لانه عمار كان جايب 94% وانا 93.9% بالضبط كده الفرق بيننا كان 0.1% 😅 وحرفيا بقينا اصحاب ونذاكر مع بعض وحتى طلع الجو والمزاج بتشابه😂😂 وواصلت بنفس الخطة السابقة على النحو ده.
الاسلامية كل يوم ١٠ آيات من سورة النور و مرتين في الاسبوع تركيز على اجزاء بقية المقرر بالتديج و ٤ ساعات خاصة بحل الامتحانات من المريح. الفيزياء ٣ مرات اذاكرها من الكتاب ومذكرة اسمها اضاءة اشتراها لي عبدالرحيم من المكتبة اللي جمبهم لما كان مؤجز❤️ العربي عشان مستواي فيه متوسط كنت بذاكره ٥ مرات فيهم ٣ حقات القواعد ووحدة بلاغة والاخيرة ثابته كل جمعة للأدب عشان عمار بذاكره معاي😄 الاحياء دي حرفيا حفظتها من الكتاب وخسران فيها اكتر من ٢٠٠ ورقة بصراحة لما زهت منها وقلت الا اجيب فيها ٩٨ في الشهادة وده بالاضافة الى امتحانات المريح والكيمياء دي بذاكرها من الكتاب بس+ امتحانات الشهادة ٢٠٠٣ ل ٢٠١٩ وتجريبي الخرطوم الحكومي فقط بحسب كلام صحبي العزيز لانه كان متشدد شديد في النصيحة دي واكيد بتكونوا عرفتوه 😅😂 الرياضيات من الرائد والمفيد والموسوعة والإنجليزي ده اصلا حبيبي من طفل لاني كنت بتكلمه كتير في حياتي وما كان عندي ليه غير المريح والكتاب. والمهم مرت الشهور لحدي اقتربنا من امتحان الشهادة🔥 وكنت متحمس ليها شديد بس حصلت معانا ولأول مرة بسبب جائحة كورونا تأجيل الامتحانات لأجل غير مسمى ومن هنا خلاص حسيت بقمة الإحباط 💔💔💔💔 وزهجت من اي شي ووقفت من المذاكرة لأكتر من شهرين تصدقوا؟ حتى امي وابوي واخواني وكل حد بعرفني احتار يعمل معاي شنو😓 بس مرت الأيام وزيما كنت محبط حاولت انهض من جديد وبقيت افكر واسأل بانه هل يمكن تعبي ده يضيع كده وخلاص؟😔 بقيت محتار بين ليلة وضحاها لأنه حتى مذاكرتي بقت تعبانة شديد اقل من ٣ ساعات. لحدي امي مرة اتكلمت معاي كتير وقالت لي كلام غير من نفسي شديد وطبعا انا من النوع اللي ما ببكي نهائي يمكن سنة كاملة ما تنزل مني دمعة😅 بس كلام امي هزاني لدرجة قلت اخيرا بقيت تحس يا اسامة وضمتني عليها وقالت حتقعد معاي في غرفتي لحدي استقر في دراستي وارجع زيما كانت بتعرفني❤️
ورجع فيني الامل اجيب في التسعينات وبإذن الله. وفعلا لما اعلنوا عن تحديد موعد جديد للإمتحانات فرحت شديد وكنت متفائل اجيب اكتر من 95 لانها كانت من بداية العام حلمي.. واستمرت الايام لحدي بدأت الامتحانات وجلسنا اليوم الاول والثاني والثالث وبعدها بشوية مرضت مرض شديد💔 لأول مرة ظهرت لي ملاريا والتهاب في الدم الأبيض لدرجة انهم رقدوني فالمستشفى😢 وناس البيت افتكروا اني حأموت لانه في البداية حصل لي ضيق تنفس وبقيت يومين عايش بجهاز الاوكسجين للسلامة بحسب كلام الدكتور وامتحنت في المستشفى مادتين وكنت بملي الزول اللي عينوه لي على اساس انه يكتب لي وبتذكر صدفت مع نهاية اسبوع قلت خلاص انا لازم اتشجع واقاوم واحاول آكل كويس واشرب عشان جسمي يكون قادر على الحركة وبقيت ادعي يا رب تفرجها وتسهل علي امري وما كنت خايف ابداً وما زلت متمسك بالأمل وما خات اي اعادة وواصلت بقية الايام حتى بتذكر يوم نزلت اواصل جاء الكنترول وضماني عليه وقال لي انت بطل وانا واثق انك حتفوتهم ويلا على الحجرة يا بطل❤️ مع اني طولت ما دمعت بس كلامه خلاني لا ارادياً دمعت ودخلت الامتحان وبقيت مع ورقتي لحدي بعد نص الزمن ببسيط جمعت وطلعت متفائل واستمرت الايام مع اللي باقي بقيت اقعد الزمن كله لحدي انتهت الامتحانات وبكده حالتي المرضية تلقائياً اختفت❤️
ناس البيت فرحوا بسلامتي من جديد وامي كانت بتقول اي نسبة تجيبها انا راضية عنها لانك اثبتت لي انك راجل. وبكده واصلت مخططي نزلت معهد المركز الثقافي البريطاني في السوق العربي ونزلت تحضير للآيلس وامتحنت على طول ونتيجتي ظهرت بعد اسبوعين لقيت نفسي جايب معدل 8.5 وده معدل عالي شديد والمهم استمريت في طريقي وسافرت امتحن SAT قلت خلاص عشان ما افكر في النتيجة اشغل نفسي وبعد امتحنته نزلت شغل على طول ورجعت العب كورة واتمرن وبقى روتيني كده لحدي ظهرت النتيجة وجبت 94.2% من اول مرة وهنا يادوبي حسيت بطعم التفوق وقلبي رق ودموع الفرح نزلت بحر❤️❤️وفرحت لصديقي عمار كان

اول المدرسة لأنه يستحق والاحياء يمكن في ناس عندها فضول تعرف اذا قفلتها😂. نعم قفلتها والحمد لله❤️وانتهت رواية يوميات الطالب الممتحن اسامة بنسبة عالية رضت قلبه وعوضت المه وتعب اهله وصح لو تتذكروا عام ٢٠٢٠م النسب كانت كبيرة😁 شالوني طب الزعيم الازهري لما قدمت ومع اني زعلت بس استخدمت ال CV بتاعي وقدمت بيه تقديم صحيح بكامل مستنداتي وتم قبولي بحمد الله تعالى في افضل جامعات بريطانيا واللي هي كلية الطب ، هول يورك University of Hull York Faculty of Medicine والآن انا داخل على المستوى الثاني ❤️
ومن هنا نصيحتي لكل طالب ممتحن إياك ان تستسلم وخلي أسامة قدوة ليك واعرف انه هدفك حتحققه ما دمت قوي وواثق من مقدراتك.

اعداد الطالب: اسامة عصام محمد

#قصص_كفاح

الهمه هي الحياة و الحياة في الهمه

- مقدمه

لطالما كانت الهمه شىء مهم في حياتنا فهي اللتي تجعلنا نتقدم في حياتنا و بحياتنا

قد يبدو كلامي محيرا قليلا لكن مهلا كل شىء سيتضح
في حياتنا يقصد بها الحاله النفسيه و المعنويه.
حيث ان الاشخاص اصحاب الهمم دائما لا يستسلمون مما يعني انهم يستطيعون مواجهة اي شيء بكل عزيمه ، فلن توقف عقبات الحياة تقدمهم المستمر في حياتهم

و التقدم بالحياة يكون في الانجازات التي تحققها في حياتك فبعد كل انجاز تزداد خبره و ثقه بالنفس لدرجة لا يمكن اعتبارك نفس الشخص القديم .

- القصه

بعد ان اصبح كل شىء واضح دعنا نبدأ قصتنا

تبدأ احداثنا في عام 1980 في الريف
مع ‏عائلة ‏مزارع فقير او لنقل على قدر حالهم لم يكونو يمتلكون اي مشاكل لكن لم يكن لديهم ابدا فائض من المال كان لدى الاب مزرعه صغيره يزرع فيها القمح ، و بعض الابقار و زوجته و طفلان ‏توأم في ‏السابعة من العمر ، فكان يذهب للزراعه و زوجته تطعم و تحلب الابقار كل يوم وكان الطفلان حمزه و احمد يلعبان قليلا و يساعدا قليلا لكن لم تكد مساعدتهم تذكر فلقد كان احمد فضولي للغايه و يحب الاطلاع لدرجة انه علم نفسه ‏القراءة بنفسه من الكتب البسيطه التي اعطاها له صاحب المكتبه الوحيدة في الحي على عكس حمزه الذي كان كل هدفه انه يريد مواصلة حياة والده او ربما لم يكن له هدف انما اخذ فقط بالموجود امامه ، و مع مرور الوقت اظهر حمزه قوة بدنيه كبيره و اصبح يقوم بمعظم اعمال الحفر و الحرث و الزراعه وحده ولكن اكتشفو ان احمد لديه فقر في الدم م لا يسمح له بعمل اعمال شاقه فكان يساعد والدته مع الابقار لكن ليس حقا كان يقضي معظم وقته في القراءه حتى طلب من والده ان يسمح له البسفر الى العاصمة فلقد رفض اباه نظرا منه ان العلم امر تافه و مضيعه للوقت و امه كان لها بعض المخاوف
و لكن مع الحاح الابن و اصراره وافقا مرغمين، خوف من ان يهرب ابنهم من البيت و يخسروه للابد .

لقد ذهب احمد الى العاصمة عن طريق التجار الذين ياتون الى قريته ‏ليشتروا من المزارعين ، فعندما ذهب احمد انضم الى المدرسه و نظرا لتعليمه وضعوه في السنه الاخيره على الفور صحيح انه كان اكبر بعدة اعوام من زملائه ولكن لقد كون بعض العلاقات الجيدة ولقد احرز اعلى علامه على مستوا الولايه و رغم ان الكثير من اصدقاه و معلميه نصحوه بدراسة الطب او الهندسة المعماريه فلقد رفض رفضا قاطعا و درس علم الارض و الهندسه الزراعيه . و عاد الى قريته من جديد و لقد عثر في رحلته هذه على بعض الممولين لخطته الكبيره لقريته الصغيره 😉.

و عندما سالناه كيف اصبح يمتلك اكبر مزرعه و افضل ‏خضروات في البلد كامله

قال : لاني دائما اردت المزيد لحياتي و كان لدي الهمه و العزيمه لتحقيق جميع اهدافي

#قصص_كفاح

ثوب جديد لتجمكم 🔥 🔥 🔥

شالوك الجامعه الف الف الف مبارك عليك وإن شاء الله حياة علمية سعيدة بغض النظر عن إسم الجامعه أو الكلية، عايزك تركز معاي وتنتبه للكلام البقولو ليك، إنت من شالوك الجامعه إعتبر نفسك خلاص بقيت زول كبير و واعي وبتقدر تختار إختياراتك دون تدخل من أحد في ذلك وأعلم أن الجامعه مرحلة من مراحل التعليم، الأيام الأولى في الجامعه هي بتكون ليك أحلى أيام معاها أيام التخرج بالطبع اما باقي السنين بيناتهم فبتكون ليك عادية جدآ، في الايام الأولى إنت بتكون عايز تعمل ليك شِله أو أصحاب بمعنى أصح لازم تختار الأصحاب الصح الأصحاب البودوك لطريق قويم وسليم ونهايتو فرحة وضحكة، وعايز تتعرف على الجامعه وبتجي ما شاء الله عليك معنوياتك مليانه حافظ عليها وأبعد عن المحبطين أعداء النجاح البقولوا ليك الجامعه سكة عطش وما في فرص عمل بعدين وإلى اخره ياااخ انت أقرا وإجتهد وبعدين التوفيق من عند الله ومافي زول عارف إنت بحصل ليك شنو بعدين، وقبل ما تنزل لازم لازم يكون عندك هدف خاتيهو قدام عيونك وناوي تصل ليهو يااخ إن شاء الله تجي بروف الدفعه بس لازم يكون عندك هدف لأنو حياتك بدون هدف أشبه بكونك في كهفٍ خالي لا يُرى فيه غيرُ الظلام، وما تسمع للزول البقول ليك الجامعه ما فيها قراية كتيرة وياها بتتجازف ما تشيل هم يا عزيزي القراية البتقراها في الجامعه دي أهمَّ من أي قراية سابقه إنت قريتها في حياتك السابقات كلهم كان هدفك إنك تحصل الجامعه أما قراية الجامعه دي هدفها إنك تكوّن ذاتك وشخصيتك ما إذا كنت ناجح أو غير ذلك أنا ما بقول ليك أقرا بس وما تترفه وتطلع مع أصحابك يااخ أطلع وإترفه بس حاول كل يوم إتذكر انو وراك مذاكرة لازم تذاكرها، نجي للسؤال الأهم انو كيف تقدر تبني شخصيتك في الجامعه؟ الموضوع ساهل بتقدر تبني شخصيتك في الجامعه بإنك تشارك في اي فعالية قامت بيها الجامعه منتدى ثقافية وغير ذلك، بتقدر تبني شخصيتك في الجامعه بإنك تكون زول شغوف بالعلم وباحث ما تعتمد على كلام الدكتور في المحاضر بس ده طبعآ انت في البدايات ما مطالب بيهو لأنك لسه نازل لكن بعد تتقدم في السنين وتصل عام التخرج او العام القبل التخرج يلا هنا لازم تكون زول باحث وشغوف بالعلم بتقرا مراجع وبتتطلع أكتر على مجالك وبتخش دورات في مجالك تتطور بيها نفسك، أما وإنت في بداياتك ركز مع المحاضرة وذاكرها بعدين وهتلاقي نفسك بتجيب معدلات هايله، أخر كلام عايز أقولو انو القريتو فوق ده كلو من وجهة نظري انا وأوجه النظر بتختلف ممكن زول غيري يكون عندو وجهة نظر تانية للجامعه ولحياتها، أنا كتبتو بحسب العشتو فيها والسلام عليكم.

امتحانات الشهادة السودانية، هي لا تزال تمثل ذاك الكابوس المرعب في كل عام، لكن أنت مقبل على الإمتحانات وأخصُّ بذلك الطلاب الذين سوف يجلسون لأول مرة؛ قد بعتريكَ بعضُ شعور الخوف وهو أمرٌ طبيعي والخوف في حد ذاته
قد يكون شعور أصحاب الهمم العالية، والنفوس التوّاقة للتفوقِ والنجاح.

فالتعلم عزيزي الممتَحن أنّ للخوف جوانب إيجابية مشرقة وأخرى سلببة خلاف ذلك، فمن ما هو إيجابي إذ يحثُك للقراءة بنهم وكل جدٍ واجتهاد ومراعاة عوامل النجاح والحرص الدائم على اجتياز الامتحانات بسلامٍ دائم.
أما سلبياته فتجعلُك تتعرض لنوبات التوتر والقلق المستمر،
أما داخل حُجرة الإمتحان، فتجلك مشتت الانتباه ولا تستطيع أن تجمّع أبسط المعلومات ناهيك عن تلك التي تحتاج منك إلي كمٌ من التركيز والحضور الذهني التام، لذا الأمر ليس في غاية الصعوبة ولا يتطلب الخوف.

كل الأشياء التي سوف ترد في ورقة الإمتحان بشكلٍ أو بآخر هي ليست ببعيد عن محتوى المقرر الدراسي، فقد تذكر معية الله واعمل ما هو عليك فعله( اجتهاد، تركيز، عزم، طرد الخوف والأفكار السالبة).
لذا لا تجعل الخوف ينال منك ويستحوذ على دماغك وآلية عمله الطبيعي، ويستهلك طاقتك التي تحتاجها ساعة الجد والحسم الذي ظللت تنتظره طيلة العام.
...فهذه مني إليك( اعمل ما لزامًا عليك فعله، وتوكل على الله الذي لايضيع أجر العاملين)


#التجمع

أحلم لتصل الطريق لن يكون سهلاً ولكن الوصول لابد منه...

تالته أول فاصل بينا وبين أحلامنا كلنا مرينا بي الفتره بتاعت الضغط النفسي الرهيب البيحصل في فتره إمتحان الشهاده وحاله الخوف البتكون مصاحبه ليه بس دا مابيعني إنو نخلي الحاجات دي تأثر علينا وتضيعنا..

فاعايزه أديكم نصائح واعتبروها من أخت ليكم:ماتضغط نفسك شديد في أخر فتره غريبه من الامتحانات لانو حاتتأثر ،نظم نومك كويس وأكلك ونظم صلواتك، ماتستمع لي أي كلام سلبي أشحن نفسك طاقه إيجابية وبس ماتعيش نفسك في حاله من التوتر والخوف الامتحانات دي بسيطه جدا وابدا مابتحتاج منك كل الضغط دا لي نفسك ، طمن نفسك وخليك واثق في ربنا وفي نفسك واتذكر إنو لكل مجتهد نصيب وربنا مابيضيع تعبك،واتذكر إنو عندك أحلام مستنيه منك تحققها..!

وربنا يوفقكم ياارب

السلام عليكم طلااب الشهادة السودانية البوست ها يكون فيهو نصائح عشان تتجاوزوا المرحلة دي واخوانكم منتظرنكم بي فارق الصبر في الجامعة 🤩🤩🤩🤩
اول حاجة عايزنك تعرف إنه لسة في وقت ...اي زي ما قريت كده في وقت !! تعال اثبت ليك دي تاني نخش في الجاي ... باقي ليك 22 يوم = 528 ساعة = 528 ×60 = كم دقيقة ؟؟؟ اوبااا في وقت يعني في وقت خت اليقين في قلبك واقرأ وانت مطمن من حتة الزمن لو ما قاري نهاي بتعبر 💙

طييب اوصيك او حاجة بي صلاتك ما تلعب فيها... صلاتك شنو ؟ ....من تسمع الأذان تجدع كل الفي يدك وتمشي تصلي وادعي ربنا كتيرر الفترة
تاني حاجة اقرأ سورة يس من تصحا من النوم ها تسهل ليك كل يومك واصحا بدري من 4 صباحا وابدأ يومك قبل الناس ها تحس بي يومك اتضاعف ولمن تجي الساعة عشرة ها تكون قاري اقل شي خمسة ساعات 💙
ثانيا في الفترة دي حل امتحانات ركز عليها اكتر من قراية حاجة جديدة امسك المريح والحاجة البتغلبك شوف الحل ولمن يلاقيك مرة تانية في الامتحانات ها تقدر تحله واحتمااال كبيير يجيك في الإمتحان ..ماف شي بعيد .. وكمان لو لقيت آخر خمسة امتحانات من كل مادة كاملة تكون عظمة على عظمة لأنك ها تعرف طريقة الإمتحان ولازم تعود نفسك ع جو الإمتحان اقعد في مكان هادئ واظبط المؤقت في تلاتة ساعات واعرف نفسك الحاجة الأخدت منك وقت شنو وركز عليها الإمتحانات لو انت قاري من بداية السنة ها تثبت ليك معلوماتك ولو ما قاري ها تديك الزيت يعني ها تطلع بي فايدة كبيرة .
ثالثا ما ها اقول ليك اقرأ كم ساعة والكلام ده اقرأ قدرتك يعني لو بتقدر تقرأ 12 ساعة بي تركيز وحاسيها ما ضاغطة وبتحس بي نفسك طلعت بي حصاد كويس من ال 12 ساعة دي ..اقرأ طوالي لكن ما تضغط نفسك وتمرض ..دي ما ايام مررض 😂 اقرأ قدرتك بس .. وما تقول قدرتي 3 ساعات ايااك ايااك 🤣🤣🤣

رابع حاجة ما تلعب في نفسك اشرب عصاير وأكل كوييس ...محتاج طاقة انت وركز علي عصير الليمون ما تنتظر يعملو ليك قوم برااك وبإذن الله ها تجيب نسبة تفرحك وتفرحنا وتخش التخصص اللي عايزه ...منتظر شنو ..قوم شوف قرايتك اخوانكم منتظرنكم في الجامعة 😭💙💙

حبايبنا....

الساعة ٩ تعالوا نتونس شوية مع واحد من متفوقي العام الماضي، ح تكون ونسة واستضافة أكتر من رائعة إن شاء الله 💛 💛

أي جات مباغتة بس تعالوا وانكربوا معاها ح تستفيدوا جداََ بالذات للناس القارية وخايفة والناس الما قارية..

الناس تكتب أسئلتها هنا من هسي وبعدين كمان 🔥 🔥 🔥 🔥

بدأ العد التنازلي لامتحانات الشهادة السودانية و طبعا كمية التوتر المصاحبة الفترة بتكون م طبيعية ، بكون في خوف حاصل و بكون ف كمية كبيرة من الفرحة المتلخبطة مع شعور الرهبة.
عزيزي الطالب و عزيزتي الطالبة لا بأس عليك و كله سيهون في سبيل نجاحك ان شاء الله و تذكر دائما ان بعد كل عسر يأتي اليسر و بعد كل حزن تأتي فرحة لا يستطيع بعدها الكون ان يسعنا من شدتها. ❤
تبقى القليل في هذه المعركة و ب التأكييد ستتوجون في نهايتها بالنجاح ❤️
فقط تذكر عزيزي الممتحن النصائح التالية :
- اولا : استعن بالله و ثق به و حافظ على صلواتك و وردك اليومي و ادعو الله كثيرا و الحح عليه دعائك ❤
-ثانيا : لا ترهق نفسك ابدا في هذه الايام و حاول ان تأخذ اكبر قسط من الراحة و النوم ف اجهاد نفسك في هذه الايام سيؤثر سلبيا عليك في الايام القادمة و ما تختزنه من طاقة الان صدقني انك ستحتاج اليه في مقبل الايام فلا تجهد نفسك❤
- ثالثا: بر الوالدين و هو من احد اهم اسباب النجاح في الحياة و بدعواتهما يسهل الله لك كل امر في الدنيا فكن باراً بهما❤
- رابعا : و الاهم من كل هذا ثق بنفسك و تذكر دائما العبارة التي تقول : " و ازهر من جديد و اثبت لهم ان الذبول خرافة " . ثقتك بنفسك و انك تستطيع ان تأتي من بين المئة الاوائل احد اسباب النجاح ف الشهادة السودانية ❤
و اخيرا وليس اخراً تذكر :
"ان الله يهونها ثم تَمُر و كأنها لم تكن" ❤️