بتالي اضعوني امشي خلوني
لفزعة اخواني دارت عيوني
ماهو برضاي غصب عنكم خذونه
سمعوا بس هاي اگلكم جتفونه
**""
انه زينب عالهزل بخواني مريت
عاينت هلبت نفس بيهم تمنيت
عالهزيله بلوعه السكته تلويت
امري گولي ادللي لهلچلمه حنيت

چلمه من الذكرى هاي من رحت ظلت وراي
ماتت بشفة اخوي الگضه وماضاگ ماي
طاح ابو اليمه وكلشي ظل يمه
أدللي صارت ماضي هالچلمه

يااسيره يناديني عدونه
سمعوا بس هاي اگلكم چتفونه
***"

من بعد ماچتفونه وصار ماصار
عالهزيله وعيني للخوان تندار
بينهم بيني دمعتي تركت اثار
الدمع معنى ضعنه بهالدرب سار

بدربي عفتلهم اثر حسرتي ودمعة قهر
تگلهم اثاري تره الضعن منانه مر
من جفن دامي تنزف احلامي
بكل اثر اترك يسري والامي
دمعي يروي عذابات الحدونه
سمعو بس هاي اگلكم چتفونه
*****
انه عالهزله يخوتي بتالي الضعون
اتكفلت بيهم واباريهم بالعيون
انعى وحدي ومااريدنهم يسمعون
ادري لوسمعوا نواعيي يطيحون

انعه سكته ومادرت ضعني ليه يلتفت
شلون اركبنه اليطيح لهايه يهلي حسبت
عالضعن عيني واحبس ونيني
وانه عالناگه حبلي بيديني
هيمه ليطيح يخوتي ايضيعونه
سمعوا بس هاي اگلكم چتفونه
****
بالدرب اثاري ظلت ليه عنوان
ضيم يتبع ضيم والخطوات نيشان
بلا كفيل الليل يرعب يخطف الوان
بلا امان شلون نغفه واحنه نسوان

عفنه باثار الهزل للي يتبعنه حبل

وبأثرنه الدم صبغ عالرمل عثرة طفل
من يمر ليلي مايظل حيلي
بيدي اكض گلبي واذكر كفيلي
شلون اگلكم غرب لتكفلونه
سمعو بس هاي اگلكم چتفونه
***
ويه كل خطوه يخوتي انبض امال
ها واگولن هسه يلحگ ضعني خيال
لايروحي انوب اگلهه والدمع سال
هذا حد الشام حالي وبيدي الحبال

راح اظل بغربتي بين وحشة هيمتي
ليلي اسهر للصبح بيه تحدي ناگتي
و شكثر صعبه رافگدت غربه
حسبه تاخذني وارجع بحسبه
وسفه لجناب بعدكم رافگونه
سمعوا بس هاي اگلكم چتفونه
***



ا

يامحرم من تهل فاطم تنوح وتنتحب
يامحرم تصيح لسه حسيني ماضاك العذب
سنين مرت ونگضت
جروح ابنهه ماشفت يامحرم
**"
شما يهل هذا الشهر فاطمه تمر بالنهر
تگله ياماي الفرات جرحك بگلبي كبر

انه ام وانته تعرف الام گلبهه شگد ترف
وشتظن فگد الولد بيهه يترك يااثر

احچي وانه بگلبي نار بطول جرفك جرحي صار
هذا اثر جرحك يماي منه دلالي انفطر

هذا جرحي مايروفه مايك شما يعتذر
هذا جرحي بطول جرفك يجري نيران وجمر

تموج جمراته ودوت
جروح أبنهه ماشفت يامحرم
***
حيل مابيهه بعد غالي عدهه هالولد
شلون ماتنعه وتنوح شلون ماتخمشله خد

ذكره عدهه منه ثوب تشمه نوبه وتنعه نوب
ياگلبهه وضيمه ضيم سنين مرت مابرد

الدمع لتصبه دم الاه من تطلع ألم
الحسره حد گطع النفس وحسره هيه بلايه حد

بين اديهه ذكرى من المنذبح مطلي بدمه
بين اديهه للقميص اتلولي وتحن فاطمه

يهيد ونه حسبت
جروح ابنهه ماشفت
***
ياخلگ ياجرح اشم جروح بي گد النجم
وليدي وجه الله ويحيف للحسن ماظل رسم

بين شاطي وخيمته چانت اكبر محنته
بيا وجه لخته يروح والامان اصبح حلم

من ألم كسرة گفا عالخواصر شد عبا
الهامه فرعها ويصيح راح المخرس الزلم

يصفگ ايده وعينه من تدمع تسولف حيرته
يصفگ ايده شاف اخيه زنوده شبگت جربته

چفوف منه تگطت
اجروح ابنهه ماشفت يامحرم
******
سنين المها حملته،، شلون تنسه مصيبته
وهيه كل رمشة جفن،، يابو الاكبر نادته

يبني تصرخ كل بچاي،، من اشوف گبالي ماي
حسين اگله لهالوكت،، ماتروت شفته

ضامي كل هاي السنين والحجر دامي الجبين
والسهم من صوبا بصدره فتت چبدته

تنعه يبني ليش مالاح العذب شفتك عجيب
تنعه يبني يمه لومتروي چا جرحك يطيب

شگد بديهه ضمدت
جروح ابنهه ماشفت يامحرم

*
لو لياليك بدن يعني دلالي امتحن
مدري اظل بكربله مدري اماشي لنسبن

وي بناتي لورحت نوحي يعله لونحت
وبألمهن راح ازيد اجروح اجرح من أون

كربله لوبيها اظل وانه ماعندي أمل
لنذبح روحه ترد لاهن جروح وشفن

يابناتي بكربله لوابقى اخوچن مايرد
يابناتي وياچن امشي عالهزل عيني تصد

حيل مابيها ومشت
جروح ابنهه ماشفت يامحرم
*"

سكنه من بين الخيم طلعت هظم فز بيهه
تعاين بكل كربله تراب وسمه وشاطيهه
سكنه خانگهه الدمع تشم نايبه بذاريهه
كربله صيري ام بخت والعايله باريهه
كربله كربله
*

لزمت تراب الارض گالتله احسك ضامي
ناره گلبك تشتعل وعيونك اعله خيامي
مني وشتطلب بعد موغربتني ايامي
چني اشوفك تنتظر تشرب نزيف اجدامي
كربله كربله
***
دارت الصوب النهر شافته لم جروفه
ماشفت گالت عذب بس المنايه اطوفه
انته من كونك صدگ شاطي وتكرم اضيوفه
عمي لويمك وصل ماتنگطعله اچفوفه
كربله كربله
***
تعاين بگلب السمه واتحسرت مالومه
تخيلت دمعة طفل تتلاله بين انجومه
هبت الريح وخذت من ليله كل غيومه
ياهو باجر عالشمس يحجب ذبيح بحومه

***
كربله بگاعچ ردت اخلط جمر حسراتي
بلكي باچر من نفر تذكرين اهاتي
بلكي اكسرلچ گلب چفچ يفك عثراتي
باچر گبال الغرب اركض انه وعماتي
****
كربله ضيوفچ تره احنه ونزلنه بدارچ
اشمالچ بلايه وفه بيچ انهظم خطارچ
ماردنه منچ بس ستر عزيتي حته غبارچ
چاهيچي ليأمنچ خيم تلهمهه لهبت نارچ
**

فاطمه ،، فاطمه ،،،،، ناحت عرس القاسم

*****
لكربله تعنت ،، فاطمه ظنت
جاسم الليله… . تفرح بزفته
تناست العصره ،، ولوعة السطره
بالهوى تشتم… .. فوحت حنته

تمشي بهمه ،، محضره كلمه
مهنه يايمه ،،، رادت تگول
بان الطف بان ،، شافت الصيوان
والتهب نيران ،،، گلب البتول

بوادي الطفوف ،، فاطم تشوف نار الخيم
ذوبت شموع
عرسك عذاب ،، صار ومصاب ،، بيه يعيد
كسر الظلوع

*****
فرحه ماطالت ،، مهنه ماگالت
حضرت لعرسه… .. واجرت الدمعه
بخيمة القاسم ،، الجمر راسم
بالرماد اورود… .. والعطر ينعه

ونت ونه ،، آ يلمچنه
شافت الحنه ،،، فوگ التراب
حوفتك بالنار ،، تنرسم تذكار
الصواني اثار ،، حلم الشباب

صواني الشمع ،، فاضت دمع ،،حتى الورد
دموعه نده
ياسه اختنگ ،، من احترگ ،،داست عليه
خيل العده

*****
انحنت عالگاع ،، مدري منها شضاع
من على التربان… .. لمت الحنه
مرت ابجمره ،، يمنة الزهره
من الالم فزت… ..تجذب الونه

حنة ياشاب ،، خالطت لتراب
ويلي ياچف ذاب ،،، چف فاطمه
حنه وجمره ،، لمت الزهره،، تبچي والعبره
سالت دمه

فوگ الترب ،، دمعه تصب ،،ذبحو حلم
عرس الولد
من انحنت ،، شتذكرت ،،باب وحطب
وظلع انمرد

*****
وشلگت جاسم ،، چن ورد نايم
لكن ابجسمه… .. للطعن نيشان
عالترب خده ،، بس يشع بعده
ويلي بشفافه… .. منكتب عطشان

تبده اعله الگاع ،، يبني عمرك ضاع
وانه گلبي لاع ،، شفت الجروح
يبني شمحلاك ،، والضمه البشفاك
تنذبح خلاك ،، وانه انوح

ترحل نويت ،،شمعك طفيت ،،خدك عليي
ذاري يهب
رسمك ذبل ،، بيك اشعمل ،،حر الرمل
خدك يشب

*****

جيتي لزفتك ،، تالي شو شفتك
يبني عالغبره… ..تبدت ايامك
يالولد غافي ،، والشمع طافي
ويلي ياجاسم…… حرگوا اخيامك

چانت احلام ،، طرزت لخيام
دارت الايام ،، عرسك حزن
دارت والبين ،، غمضالك عين
بيه عاد اونين ،، جرح الجفن

بالطف ظلام ،، نار الخيام ،،تضوي الك
دخانه ياس
خيرك وصل ،، تالي الاجل ،،حافر اله
بالحنه داس

*****

بويه الدمع بويه ،، مافارگ عيوني
ما اشفه من علتي ،، لو ما اخذتوني

عليله ،، واتاني ،، لزمت الدرب
انوحن ،، بديه ،، عصرت الگلب

*****
عفتوني بالبيت ،، بس وحدي ظليت
الكم احن
يم عتبت الباب ،، انطر يغياب
انعى وأون
من رحتوا لليوم ،، هدمي والرسوم
تلونت حزن
نار الدمع نار ،، محبوسه بالدار
علتي سجن

گلبي ونظر عيني ،، يابويه يردونك
لو بيه عالممشه ،، چان اتبع اضعونك

بعدكم،، وحيده،، دمعتي تصب
انوحن،، بديه،، عصرت الگلب

*****
لو اضعن وياك ،، تبرالي عيناك
صحتي ترد
من اگطع النوح ،، بيه ترد تروح
بيك انسعد
بيديها عمتي ،، تتعافه صحتي
وحيلي تشد
لا چنه ماطاب ،، بيه من الغياب
علة بعد

لو اضعن وياكم ،، تتلايم اجروحي
بس البعد عنكم ،، يهلي لچم روحي

تحير ،، دليلي ،، بقيت بغرب
انوحن ،، بديه ،، عصرت الگلب

*****
چن عصرت البوب ،، يعصرني الغروب
لمن يحل
ياوحشة الليل ،، مني خذت حيل
بهذا النزل
دلالي موجوع ،، ماتشفي الدموع
جرحي وتشل
گلبي الشجي ذاب ،، من ذكر احباب
لا ما امل

اذكركم وگلبي ،، يتلوه سباحه
من يوم غربتو ،، لا ماشفت راحه

وحيده ،، وعليكم ،، يبويه اشب
انوحن ،، بديه ،، عصرت الگلب

*****
تاخذني الظنون ،، ترسم بالعيون
حال الضعن
للطف خذاني ،، دمعي حداني
شفت المحن
چنهن حرمكم ،، عافن خيمكم
واتراكضن
توحيلي باثار ،، خيل وضمه ونار
يتسابگن

تاخذني اظنوني ،، ودموعي تتجاره
مخيم شفت الكم ،، ما خممدت ناره

واشوفن،، يتيمه ،، تريد العذب
انوحن ،، بديه ،، عصرت الگلب

*****
يابويه تانيت ،، تاليها حسيت
وانه انتظر
مااسأل اشلون ،، يمته تعودون
عدكم عذر
ثاري المنيه ،، بالغاضريه
سلبت عمر
وانا انتظركم ،، عيني بدربكم
ليل وعصر

بويه انگطع گلبي ،، جفني سهر ليله
ضعني المشه يرجع ،، ليليه ادعيله

عرفته ،، مصابك ،، عليك انتحب
انوحن ،، بديه ،، عصرت الگلب

*****

يحسين الرايد گربك يتعطر بخيام
والعايش قصة حبك يتسمى الخدام
ويصيح وياك
موتي بفرگاك

*****
مثل عن العشگ واضح لگيت النار
العليها اقرب صفاته كلها تتغير
واليحبك يبو اليمه تميزه اثار
شفت لون الحزن برسومه من يظهر

يذكرك يختلف لونه
دمعته مطرزه جفونه
مصابك لوحه بعيونه

تميز بيك الي يحبك
حربه ويلعلن حربك
يضامي حرگته بگربك

ليگلك حد ماترضى مني تاخذ كون
دلالي بحبك فرضه ينبظلك ممنون
هذا انا وهاك
موتي بفرگاك

*****
ليحبك من يضحي مايريد اثمان
لجرح شفتك يگلك رخصتها الروح
ولا يطلب وجاها بسمك وعنوان
عن الدنيه تشغله خدمة المذبوح

ثمن احساسه عايشلك
تقبل خدمتي يگلك
اريد ابقى تحت ظلك

فعل مو كلمه يحچيها
حياتي لجلك افديها
بخدمتك سيدي افنيها

مارايد من امصابك رفعه وجاه وشان
من يگصد وايدگ بابك منك راد احزان
ليحب ناداك
موتي بفرگاك

*****
عزيزه جدورة الخدمه شكثر ياناس
يجلها بگد جلالة مجلسك يحسين
عليها ينحني وايحسها رفعة راس
واخذ من الصخام البيها كحلة عين

عزائك عنده قدسيه
خدوم وخالص النيه
العشگ هذا بمعانيه

العشگ عند اليخدمونك
بشكرهم ما يطلبونك
جرح بيهم على ضعونك

مو ياهو الچان اتعنون ظنه الحب كلمات
وجه الحب يخدم فعلن مايطلب غايات
وبكلشي افداك
موتي بفرگاك

*****
اليشم عطاب المخيم دليله يذوب
مواسات الحرم عنده تظل غايه
يعيش الغربه يوميه وكت الغروب
وعليك بروحه ينصب مجلس قرايه

نواعي بداخله ومأتم
ينوح لذكر المخيم
مهد محروگ بي يشتم

بلذيذ الماي اليشربه
يذكرك يذكر الغربه
عليك شگد لچم گلبه

تعزيته لحرگ الخيمه يوم الكافل طاح
والهزله التمشي بهيمه وگلب اختك من ناح
ياجرحي اقراك
موتي بفرگاك

*****
ابو الاكبر يلبي من نگول انريد
يوهبنه جمر لمصابه يچوينه
لچن ياهو الحفظ هالنار حتى تزيد
ومنو الصارت ثلج جمراته بيمينه

الحفظ نيرانه علاها
الهجرها يعني طفاها
وعطايا الوالي رداها

اذا جمره طفه يقبل
شعوره لكربله يذبل
صخر دلاله يتحول

مايبرد دمعه الگلبه للطف شال اثار
من يشتم عطر التربه بي تنوج النار
رايد ملگاك
موتي بفرگاك
*****

من على النهر ،، صووت الگمر
ناده علحرم… .. سلام ،،، كافل الضعينه
سدد القدر ،، نبلة النظر
وده للخيم… .. سلام ،،، من هوت يمينه

سلام …… من جرحي سلام
لضعوني سلام
يا زينب سلام

*****
على متوني حلم ضعني يزينب جربتي
ينطروني ارد ألهم أو لواااي بيمنتي

عاشوا انتظاري ،، بخيامي يتامه
كل ضامي دعائه ،، ارجع بالسلامه
يشكولي عطشهم ،، وشصوبة سهامه
يجرحني دمعهم ،، ظل بيه علامه

يشتكي الطفل ،، ياابا الفضل
للعطش اثر… .. جروح ،،، عمنه نشتكيلك
صعبه تحتمل ،، كل دمع طفل
بينا يا گمر …… .. جروح ،،، زادت برحيلك

جروح ،،، شكواهم جروح
اطفالي تنوح
عنهم راح اروح

*****
اخذ حيلي رسم شفه تفطرة بالخيم
رحت وانا احس گلبي نغم نبضه حرم

گاصد للشريعه ،، ما هم بكتايب
انا الما شبهني ،، فارس بالحرايب
همي وفكري كله ،، گلب سكينه ذايب
عطشانه انتختني ،، ألها سنيني واهب

سكنه للگلب ،، نبضه تنحسب
صاحت بدمع …… وراي ،،، جييتك املنه
ماخذ الدرب ،، گاصد العذب
امشي واستمع…… وراي ،،، عمي عاود النه

وراي ،،، كل ضامي وراي
كلمه بروحه هاي
رد ماردنه ماي
*****
مشيت وشايل ابروحي دموع امدلله
واخو يتنطر لجيتي بشمس هاي الفله

واگف بأنتظاري ،، ما انسه وگفته
يترجه برجعتي ،، هو يبشر اخته
تاليها بمحنتي ،، ياخويه ندبته
ناداني بوداعه ،، اي ظهري كسرته

خويه ما گلت ،، الا من طحت
والفظت اسم……حسين ،،، خويه وانتخيته
بين ادي نحت،، تالي غمضت
ياعطر اشم…… حسين ،،، عالنهر بچيته

حسين ،،، يا خويه حسين
ماظلتلي عين
وينك گلي وين

*****
ارد بيمن اذا عيني على الشاطي طفت
وهوت مني يمنتي وال جروح اتكاثرت

جربه بروحي چانت ،، بيها شگد اداري
ولمن صوبوهه ،، شبت بيه ناري
شلون ارجع شگلهم ،، شيصير اعتذاري
اي يختي يزينب ،، نتوادع قراري

فدوه يمنتي ،، وفدوه هامتي
يختي للهظم……. يسيل ،،، مدمع الكفاله
انا محنتي ،، لهايه جربتي
منها كل حلم…… .. يسيل ،،، وانذبح دلاله

يسيل ،،، بالماي اليسيل
اتذكر واميل
عطشان العليل

*****
يزينب عالخيم عيني تصب دم الدمع
وداعآ گتلچ وادري دليلچ يستمع

ماهانت يخيتي ،، تشوفين الي بيه
طولي اليحمي خدرچ ،، توسد عالوطيه
لمگدر لفاني ،، شبيدچ وشبديه
فرگنه يزينب ،، ظهر الغاضريه

ماخذ العهد ،، ماارد بعد
باقي عالرمل…… ذبيح ،،، عالنهر مكاني
گلبي مابرد ،، گلبچ انوگد
يدري ابو الفضل…… ذبيح ،،، والقدر خذاني

ذبيح ،،، بفراگج ذبيح
من جرحي اصيح
يم گلب الجريح
*****

ياغصن راوي دلال
ياكحل عين الجمال
يبني ياجاسم تعال ،، غربت وين

من طلعت لحومتك ،، ايست من زفتك

*****
تعبي وارباي ،،، يثمر امتانيته
تالي دنياي ،،، عكس ال أتمنيته
جارت وياي ،،، وابني مازفيته

حسره ماگتلك ييمه امبارك
لا صواني شموع طافت دارك
الشمع طافي التوج بس نارك
وانا وانته بالعطش نتشارك

ما جنيت الا الدموع
وانحنت بيه الظلوع
انطفت يبني الشموع ،، وجت الروح

من عطشت ابخيمتك ،، ايست من زفتك


*****
دنيه بعدك ،،، معنى ماظل بيها
راح افگدك ،،، ونوح راح اگضيها
شلون اصدك ،،، منذبح تاليها

يبني من تغيب بلله شحالي
بيش اقنعه ويقتنع دلالي
سنين وانا فراگ مامر بالي
شلون رايح للمنيه اگبالي

رايح وامك تصيح
حسبت بيك استريح
يالولد لمن تطيح ،،، ريتني وياك

شظل اليه بطيحتك ،، ايست من زفتك

*****
دمعة امك ،،، وصلت لياحاله
چنها دمك ،،، ويالجفن سياله
آ يحلمك ،،، ماهنيت بجاله

توه عد أول شبابك يومه
وابتسامات العرس مرسومه
ياجمالك تالي هاي علومه
ضاع بين الخيل وسط الحومه

ورد بعودك شباب
عجل وبالحومه غاب
فرحتي انگلبت عذاب ،، حان الوداع

الخيل يوم اتلگتك ،، ايست من زفتك
*****
ثوب زفه ،،، محضره يوليدي
يمه وسفه ،،، مااخذته من ايدي
فراگ يطفه ،،، الشمع يوحيدي

من رحت حتى الورد ذب لونه
يعني عن گلبي شگول شلونه
بيه چلمات الفرح مدفونه
وانته رمشك بالدمه يكحلونه

والده وگلبي يلوب
يبني من ناري اذوب
من العرس تدخل حروب ،، آ يعريس

والصواني نادتك ،، ايست من زفتك


*****
انتها وراح ،،، كل امل بغيابك
الگلب صاح ،،، وانته سكته جوابك
من بعد لاح ،،، ليه جرح صوابك

اي صحيح اضماك فطر لوحك
لكن ايشع الحسن من روحك
تنزف وترسم جمال اجروحك
وامك لحد المنيه تنوحك

لوحه جرحك يا ضناي
وانته ما متتروي ماي
يطول ياجاسم بچاي ،، گلبي ملچوم

من شفتها طبرتك ،، ايست من زفتك
*****

بدويه فزعت والنعم ،، فزعتها رفعة راس
شدت حزم اربع زلم ،،، يا كربله ام عباس

ياطف استعد
ارباب المجد ،،،، امهم فزعتهم
*****


كربله سمعي الخبر ،، انتخت ام الگمر
حان وكته گالت النذر العليه
من گبل لا ينولد ،، الگمر چنت استعد
واجب وكون اشترك بالغاضريه
تمر سنه وتهل سنه ،، وانه علم بالضنه
شلون يوفون النفس لابن الزچيه
هسه كون اجني الثمر ،، تعبي ذاك والسهر
يا بنيني سمعو راح اوصي بوصيه

يايمه هايه كلمتي ،، تعبي التعبته دين
يامن رضعتوا درتي ،، وافولي وي حسين

تعرفهم كفوا
يفدون الاخوا ،، حگها وشيمتهم
*****

ياگمر لم اخوتك ،، يمي لعب رايتك
محله بيرغ هاشم وبيدك تلعبه
كربله ساحت حرب ،، طبها واگلبها گلب
صول بيها ونفذ المنك اطلبه
ها يراعي المرجله،، وكت المزامط حله
كفو يلي بمدرسه حيدر تربه
انه ام اشرس اسد ،، بيني مابينه عهد
ابو فاضل وانه ادري بزود حربه


هاشم علمها من يرف ،، عين ابني تجدح نار
شارب علي واحله وصف،، لابنك يحامي الجار

ساحات الحرب
تعرفهم رعب ،،حيود ومجدتهم

*****
الماشي گاصد كربله ،، فززعت حراس اله
وسيد الاقمار بيمينه الكفاله
وين ينوي بوجهته ،، عيونه تشتل هيبته
والارض گدامه مبسوطه لجلاله
جربه شايل عالمتن ،، مسهر لظعنه جفن
والفواطم خيم اعليهن دلاله
خل يجف ماي النهر ،، النبع جود الگمر
كوثري ماينوصف مايه زلاله

للغاضريه من وصل ،، للثايه دگ حدود
جرف النهر يعرگ خجل ،، لن كوثر بهالجود

لحسين الحرس
و الجيش انخلس ،، ياهيبة بختهم
*****

عدها شيال العلم ،، رمشه سور اعله الخيم
بالحسين وبالحرم مشغول فكره
عينه چفه وهامته ،، يفدي بيهن عيلته
كلشي عنده يهون الا حدود خدره
صوت لام الاربعه ،، يدوي دوم بمسمعه
امك المتفاخره جهدك تشكره
راسي شلته بوگفتك ،، اعجز اوصف غيرتك
ياوهج نور الوجود واحله گمره

خياله وخيول انثنت ،، لمن نويت اتصول
بالملگه كلها اتعذرت ،، يذبحنه كلها تگول

مافاد العذر
من حان الامر ،، خزراته عمتهم


*****

عجزت كل الوصف ،، حره بيها ينحلف
وللقيامه الغاضريه تحچي بيها
سيدة عرش الوفه ،، والفخر بيها احتفه
يجري نهر العاطفه من بين اديها
ربت ونعم الربه ،، نالت اعله مرتبه
بتضحيتها وبسهرها وبنعيها
حرمه عاشت كربله ،، وكل دمع لمدلله
والحزن خضر مآتم من بچيها

ام البنين وما بعد ،، حرمه مثلها تصير
حسين الامير وللابد ،، ماعدها غيره امير

حره وطاهره
تاج ومفخره ،، اولاد وفدتهم
*****

حان الوداع وسلمت للغربه حالي
ياروحي هالدار انطفت مابيها غالي

بيه الوداع اشخله من نار
عفتوني المن يهلي بالدار

*****
بين روحي ونوحي ،، جروح تدي اجروحي
شتضمد اديه
الاه ما تتشافه ،، وچنها ما تتعافه
لحد المنيه
ما حسبت احسابي ،، تشيل عني احبابي
الچانو تچيه
تعذروا امنيتي ،، وحدي هسه ابيتي
ومحد اليه

امنيتي اشيل ومحملي كافل يكفله
بس ابقي گلي والدي واخجل شگله

طفله وصحت يوم الركب سار
عفتوني المن يهلي بالدار

*****
يهلي من عفتوني ،، اغله ما بعيوني
عالخد جريته
حالي شوصف حالي ،،لا اخو لا والي
ابقى بحميته
بيتكم جدرانه ،، الظلام الوانه
توحش مسيته
وانشد شتاليها ،، محنتي شيگضيها
وي الفارگيته

نومي هجرته من هجر داري ضعنكم
ابچي واصيحن ياهلي لو هسه يمكم

غربه بغرب يا صوب أله اندار
عفتوني المن يهلي بالدار

*****

ارجع وشلگاها ،، دور طافي اضواها
وشغلت صفنتي
لا حياة ابدونك ،، من رحت بضعونك
حلت غربتي
مسية اول ليله ،، بويه صحت ادخيله
بنوحي وعبرتي
شلون اخلص ايامي ،، من يسكن آلامي
وايگلي سكتي

لا عندي حيل اولا صبر واتحمل افراگ
لا صوتي يوصل واشتكي من علة الاشواگ

مابين شوگي وعلتي احتار
عفتوني ألمن يهلي بالدار

*****

حسين من ميمونه ،، صوبي دار عيونه
وبصدره عبره
راح يمشي وروحه ،، لفرگتي مجروحه
الله يصبره
ودع وحسيته ،، مال من ناديته
ملگاك انطره
طفله بس اقراها ،، من سكت معناها
عالسكته اعذره

مبهم جوابه من رفع ل الله يمينه
شدهتني نظرات الحرم كلها حزينه

بسچة سفركم وضحت اخطار
عفتوني المن يهلي بالدار

*****
اي يروحي وتالي ،، من يسر دلالي
وانه الغريبه
يگلي هاي الرايه ،، ردت اعله الثايه
تجلي المصيبه
ياهو ليدگ بابي ،، حتى يبره صوابي
ويبرد لهيبه
ليلي مر ونهاره ،، سكته ماكو بشاره
وعيني سچيبه

للرايه مشتاگه شكثر اشتم هواها
طارفها اعگده وعلتي الگه دواها

مشبوحه لهلي هاي الانظار
عفتوني المن يهلي بالدار

*****

دموع أبلون إلجروح ،، وغريبه بكربله تنوح
اجيت وظلعي مكسور ،، لگيتك يبني مذبوح

ابچي ليا مصيبه ،، الك لو للغريبه

*****
هذا الضعن ،، محنه امتحن
وبابي بداية قصته
ماينتهي واكثر بعد ،،يزود المصاب الشفته

جروحي هذن ،، واتحولن
لبني وتعدن لخته
وبكربله حان الوعد ،، وانه الحصل حاضرته

يطف هنا ،، صحت ويلا
دخلت الكربله بنوحي
جروحي تعود ،، وراح تزود
جروح ابني على جروحي

عذاب ومحنت الدار ،، عصرتي ولهبت النار
ظليمه يبني يحسين ،، زماني الكم اندار

وادموعي السچيبه ،،، الك لو للغريبه

*****

جبت الدرب ،، دمعات اصب
اهجس ونين احسيني
مسابگ دليلي وي الجدم ،،وآخ الظلع ياذيني

هيمه ورعب ،، ساحة حرب
بضعني منو يدليني
نار وعجاج وملحمه ،،بلله شتميز عيني

ييمه حسين ،، اشوفك وين
جاوب خاطر اندلك
على الصيوان ،، شفت دخان
ونيران بخيام اهلك

رماد الخيمه بالعين ،، ماشوفك تون وين
غريب وادري عطشان ،، يمه ويلي يحسين

ماي افرض اجيبه ،، الك لو للغريبه

*****
وين الحرم ،، وين العلم
وين الضعن راعيه
شفت وعساني لا شفت ،، چف عالترب مرميه

بجمر الخيم ،، طابع جدمم
واضح اثر علويه
فرن بناتي وكربله ،، خيل وشمس ظهريه

وين اندار ،، ألگه النار ،،بمخيم علاوينه
شفت ثايه ،، بلا رايه ،، والكافل غمض عينه

كفيل العايله طاح ،، امان البلضعن راح
عدوكم للسلب جاي ،، احرگوا بالخيم صاح

اصير ألمن مجيبه ،،، الك لو للغريبه


*****
خاطر كسر ،، جارح نظر
وادي وعساكر سوره
ظهريه والطلعت غصب ،، عنها گلت معذوره

منين الحذر ،، من ياخطر
والطف منايه ادوره
وانا ويعمة هالضعن ،، اركض صرت مجبوره

طاح السور ،، والناطور ،،ضعن ماواحد ايجيره
هالوليان ،، عالتربان ،، ومصيبة زينب اچبيره

ظهريه وظعن تاه ،، بين الغربه ويلاه
شخلت بيهن النار ،، غير مناوب الاه

هالونه العجيبه ،، الك لو للغريبه

*****
من الجره ،، لون الثره
دم ولدي صابغ لونه
عمدآ يمرون بجسد ،،أعلجروحه ويصوبونه

عبرة مره ،، متكسره
تناشد غدة ميمونه
ابن امي طاح ولا أله ،،يامهره لينصرونه

زينب هاي ،، تحشم جاي ،،وهلبت هالمهر يفزع
للعطشان ،، بالميدان ،، ويدفع ساعة المصرع

دمك والترب لون ،،، و بجروحك يسحگون
اصيح شمالها الگوم ،،يبني و ما يسمعون

هالصوت بنحيبه ،، الك لو للغريبه
*****

هاي انه زينب ،، وخيامي تلهب
حرمه وبخوتي ،، گلبي تصوب

اخر سنيني هايه ،، متكفله بضمايه
اشگف عن اليتامه ،، والطف ارض منايه

انه بتالي العمر اخسر كفيلي
اطيح وانخه يارب گوي حيلي
يتيم الينجرح جرحه بدليلي

*****
هونچ عليه ،، يالغاضريه
مني شخذتي ،، واشظل أليه

ضاع بظهر دلالي ،، دمعه وركض صفالي
ياكربله شخذيتي ،، حتى انرسم خيالي

مصايب والعطش چان البدايه
وتالي أبلا خيم لا يمي رايه
غريبه واخوتي كلهم ضحايه

*****
ضعني يجيره ،، شيخ العشيره
من ودعاني ،، حيرني حيره

حرمه شكبر بلوتي ،، طايح چبير اخوتي
انخامن ابمصابي ،، وأتشيمه نخوتي

ألي ماخله كل خيمه زماني
اخو ماظل بعد يفزع اتاني
صرت خيمه ويتامانه بأماني

*****

مجبوره اكابر ،، واجبر خواطر
واحرس يتامه ،، من الحوافر

صبرآ صحت ضعنه ،، هالديره مو وطنه
ما بيها ظل محامي ،، خلصت ذبح زلمنه

بعد غير الصبر بلله شبديه
ورضت بيها امتحن هالغاضريه
وألاگي وحدي المابي حميه

*****

اخر زلمنه ،، يذبحني ونه
علته ودمعته ،، لتكفلنه

هذا العليل اشوفه ،، خيل العده تطوفه
اركض وارد يويلي ،، متوصيه ما اعوفه

عليل او مانخيته لهلمصيبه
يظل ابخيمته وصية حبيبه
تجرحه ونتي ونة غريبه

*****

جود وخيام ورايه ،، بذمتك يحامي الثايه
صاغولي من زودك اسم ،، واحلى اسم وفايه

توجني صيتك ياگمر ،، صرت الاميره للوفه
جازيته تعبي والسهر ،، تربيتي بيك موصفه

وسامك جودك ،، يراية صيتي
يرفعة راسي ،، هله بتربيتي

*****

يحلف عليك الشافك ،، مالك شبه بوصافك
حتى بنطق اسم الحسين،، يمه اختلف بشفافك

اشهد صرت واحد احد ،، لا گبلك وبعدك اخو
ياهي التضاهيني بولد ،، بت حيدره تگله كفو

الك بس لايگ ،، عضيد وكافل
ييمه اچفوفك ،، تعدل المايل


*****

عده وعدد عدوانك ،، وانته ملك ميدانك
فارس يهيم كل حرب ،، موت الزلم عنوانك

چفينك حزام الظهر ،، والرايه خيمه للضعن
عطشانه موجات النهر،، من لامستهن أرتون

ملك بالحومه ،، فوارس صيدك
وكت لملاگه ،، مناك وعيدك

*****

بحب سيدك ربيتك ،، بحسين ذايع صيتك
يبني نذرتك من زغر ،، ساقي الخيم ناويتك

جودك ذخرته لكربله ،، تتروه من مايه الحرم
ياساقي كل العايله ،، وصفتك بسور الخيم

يسور العيله ،، يفي اخيامك
خدمة حسينك ،، حلم ايامك

*****

والدنيه لا مابيها ،، مثلك يالمحليها
تميز جمالك عالخلگ ،، چبد السمه امضويها

يا أصل كل غيره وبخت ،،چفوفك مناهل للوفه
عيونك على الدنيه ضوت،، كون الله لولاها طفه

نهر لضعونك ،، يراعي الغيره
الوجود بأيدك ،، الك تدبيره
*****

سور الخيم چفين ،، طول العضيد افياي
صاح بوداعه حسين ،، مايسوه عگبه الماي

طايح ،، هيبة.كل زلمنه
طايح ،، نوحن ياخيمنه

*****
فاگد گمر رد الغريب العيلته
يمشي وكسر ظهره ترسمه خطوته
متمحن وطاح اليسنده بمحنته
ومخيمه يسولف ملامح غربته

متمحن او مالوم ،، وادموعه غربه اطيح
من مشيته مفهوم ،، محني وتعثره الريح

راجع ،، ومفارگ محنه
طايح ،، نوحن ياخيمنه

*****
چانت خيامه بظل رموشه مدلله
وچانت عيونه تضوي گمره بكربله
راح وبعد هذا الضعن ياهو أله
بيمن بعد تغمض جفون العايله

مابعده عين اتنام ،، فاگد امانه الليل
واستاحشت لخيام ،، وعياله شافت ويل

ويلي ،، عالودع ضعنه
طايح ،، نوحن ياخيمنه

*****
ماسولف حسين بدمع عينه الخبر
لمن وصل صافن لگه گباله النهر
من چلمه سولفها على ضفافه الگمر
مااشرب وعندي اخو ظامي انتظر

طب للنهر عطشان ،، بس الگمر وفاي
خله العطش نيشان ،، متفطره هاي وهاي

ظامي ،، ما شارب گبلنه
طايح ،، نوحن ياخيمنه

*****
حگه ويرد مهظوم لمفارگ شهم
ابو فاضل عسكر لوحده الاسم
ذاك ابو النظره بحرب تخلس زلم
بگطعة چفوفه الكفاله تنفطم

فاگد كفيل اضعون ،، راجع وحيد حسين
كل عيلته يشوفون ،، مجراها دم العين

فاگد ،،، چفين الكفلنه
طايح ،،، نوحن يا خيمنه
*****

علي ،، من بعدك ضعت
علي ،، ريتك لارحت

يالماخذ فرحتي ،، روحي وكل مهجتي

*****
رحت يالاكبر وروحي ،، املها يالولد ترجع
اتاني وينعصر گلبي،،شما صوت السيوف اسمع
اشوف الخيل تتزاحم ،، شي بشي غدت تدفع
علي وشما صحت گلبي ،، احس أبتوتته تتگطع

تعال ،، رد جوا الظلع
تعال ،، ياشمسي التشع

مخنوگه عبرتي ،، روحي وكل مهجتي

*****
علي وبحيل ابوك اعلم،،وثباته بالشدد ادره
لكن بأنتظارك لا ،، تصدع كل جبل صبره
اشد ياحيل بفراگك ،، احبس يبني چم عبره
ضاگت والنفس مخنوگ ،، هواك الريه تنتظره

هواك ،، دونه ماأشم
هواك ،، عايش بي حلم

شلون احبس حسرتي ،، روحي وكل مهجتي

*****


يالكبر بيك انه مدلل ،،يواهس كل وجودي انته
على جناح الفرح جدمي،،انگله ودربي وردته
هسه انگل جدم حيران،،جمالك يبني فارگته
عطشان لعذب ملگاك،، شكابر جفني فطرته

عذاب ،، عايش فرگتك
عذاب ،، روحي العطشتك

تجرحني صفنتي ،، روحي وكل مهجتي

*****
گبل ماتدخل الحومه،، ردت حسنك يشوفونه
گلت هلبت يبويه وبيك ،، رسول الله يذكرونه
رحت وبكل وسيلة موت ،،درب مهرك يگطعونه
لا للشاطي لا لحسين ،، يرجع لا تخلونه

رماح ،، دربك ينمنع
رماح ،، بيهن منفجع

بغيابك غربتي ،، روحي وكل مهجتي

*****
حضرتك من طحت بويه،لحگت اخر نفس منك
اجيتك وانه المضيع ،، روحي التطلع بونك
شميتك لحد الموت ،، ابد مو نيتي اودعنك
تعنيتك واريد وياك ،، اطبگ جفني وي جفنك

اموت ،، غاية جيتي
اموت ،، شلي بدنيتي

يااعظم محنتي ،، روحي وكل مهجتي

*****

آه ،،يبني ومهجة گلبي وردة حياتي
آه ،، بعدك كون اتوذر هاي امنياتي

مغرم انه بجمالك
ضايع بلا وصالك

*****
علي اترف حلم متكحله بي عيني
يازينة كبرتي و كشخت اسنيني
عطش لا تحچي هاي الكلمه تچويني
خذت كل حيلي يوم الگتلي رويني

آه ،، واهس شوفي الاكبر عطر الاشمه
آه ،، تذبل وانه بجرحك جرحي الچمه

عني شلت رحالك
ضايع بلا وصالك

*****
ياخد الورد يابزغة اهلالي
يا محلى شبابك طرز امالي
ورد حسنك اشوفه اتگطع اگبالي
عليك شما اصد ينصاب دلالي

آه ،، مثلك وين وياهو اليوصل شبابك
آه ،، لبش گبالي الجيش تقصد عذابك

بان الضمه بدلالك
ضايع بلا وصالك

*****
فده اسنيني ثمن يوليدي اضحيها
إعله گطرة ماي وشفافك ارويها
عساني لا سمعت اضماك حاچيها
ولا شفتك يالاكبر عاينت بيها


آه ،، مثل اشفافك گلبي تفطر يروحي
آه ،، من جروحك اكبر وكثر جروحي

نبض الگلب حچالك
ضايع بلا وصالك

*****
خذت حيلي ورحت يافتشت عيوني
عليك الويل فوگ الويل شوفوني
اموت بدونك العادوك يدروني
گوم الگابلتك بيك ذبحوني

آه ،، شلون اوصلك يبني وينگلني حيلي
آه ،، وانظر بدرك ينزف نورك يا دليلي

ينزف ضوه كمالك
ضايع بلا وصالك

*****
بين اسيوف بين ارماح عسكرها
الي صورة جمال اهناك ادورها
شلگه وصوبك الخياله معبرها
سنين اثمنطعش عالگاع ناشرها

آه ،، بين الخيل وليدي فوگ الوطيه
آه ،، كل الصاير بيك اتمنيته بيه

يالمامثل خصالك
ضايع بلا وصالك

*****

انگطع سباح گلبه ياعلي حسينك
اصيح وماترد الصوت چا وينك
بكبر همي المسافه بيني ما بينك
گبل لا اوصلك خوفي تسد عينك

آه ،، صحت بعالي الصوت وماكو جوابك
آه ،، تيه جدمي دروب الحومه بمصابك

وحسينك اعتنالك
ضايع بلا وصالك

*****

صوت الدللو يالولد ،، من گلب الخيام
هاي الرباب وياجفن ،، بي دمعه وينام
من يا دلال ليا عطش ،، جابتها الايام
وعبدالله ابنها بكربله ،، رضعته آلام

*****
عطشانه وتهز المهد ،، وتناغي بهداي
نام اعله وني واستچن ،، يالبت احشاي
عبدالله باچر ترتوي ،، يوليدي رجواي
هلبت كبل طرة الفجر ،، يتحصل الماي

*****
كل ام تلولي للضنه ،، ترسم حلمها
باچر بعد باچر يشب ،، يكبر ابنها
بس الرباب ابلا حلم ،، سهرة جفنها
ينبض گلبها بيا أمل ،، من جف لبنها

*****

ليلة وداع وتنگضي ،، الليله گصيره
يستعجل بطرتة الفجر ،، عالبيها حيره
حضنت ابنها وماروت ،، من شم عبيره
تناغي وتحس بنظرته ،، هاي الاخيره

*****
من تعله بالطف الشمس ،، والحر يصب نار
گلب الرباب اعله الطفل ،، شتسوي تحتار
من هسه وتشوف العطش ،، بشفافه اثار
وشافت ذبل خده الترف ،، واچفوفه الزغار

*****

اليتامه جروحي ،، عطاشى بهيمه
شطفي بروحي ،، لهب ياخيمه

*
هاي انه زينب والضعن
جرحي التغرب عالوطن
متوزع ابكل كربله

جروحي اليتامه والخيم
يعني شكثر بيه ألم
گد ما بچت هالعايله

كل خايف وساحگ جمر
گلبي اعله حاله ينكسر
گدامي يركض بالفله

بيه مصايب عيلتي
هاي انه بالطف حالتي
ابچي اعله حال مدلله

اريدن غالي ،، يطفي اخيامه
دلالي اطفالي ،، وجمر بجدامه

*
واحد من اجروحي الضمه
وچان اليستره امخيمه
مايبره لكن بي ألم

هسه المخيم محترگ
والمنه يبعد ينسحگ
كل حافر بلايه رحم

دمعي يتيمه عالثره
تلچمني عثرةكل مره
طلعوها گوه من الخيم

واتلاكن بروحي نزف
خيمه وفزع سبعين الف
متحييره وآلامي حرم

دموعي ايتامي ،، وعساكر هايه
اثر بجدامي ،، رماد الثايه

*
كل حسره اسميها بأسم
وألها بنظر عيني رسم
ضاعت وادورها بظهر

الگاها واتگلي بدمع
ياعمه كسرولي ظلع
لبعمري شتعرف الصبر

تنشدني وين اهل الوفه
وعن المخيم ماطفه
لو بعده تل من الجمر

يمها وصحت ياغربتي
هالديره ماهي ديرتي
واديها ماخله خدر

اسامي آلامي ،، بنات حسيني
غرب ايامي ،، جروح بعيني

*
عندي جرح صوب النهر
يركض يحشم ياگمر
عمتنه بينه تمتحن

تجمعنه ونرد نبتعد
بالهيمه من خيل التهد
والذاري جمرات الجفن

يهضمني جرح ام الطفل
مفجوعه وتعاتب نبل
شهور وخذتهن من حضن

هاي انه بين الفاگده
وبين احامي من العده
مابين اصبرها التون

يحشم رايح ،، يراعي الغيره
لگه الچف طايح ،، وتحير حيره
*

عالتله من حشمت ،، يالوالي
بصبري اليوم اتحزمت ،، لعيالي

زينب انه بغربتي
وحدي بوحشة هيمتي
يبن امي بهذا العمر
كون اتحمل محنتي

صرنه مابين الغرب ،،، وانته عالترب
والدمع شوفه اليصب ،،، هذا دم گلب

وگفت واشتكي يحسين حالتنه
يخويه من طحت حرگوها خيمتنه
ركضنه شگد ركضنه وخيل تبعتنه

*
شبيها الخيم بس حرم ،، وايتامي
والجيش بناره هجم ،، لخيامي

فرينه بذاك الظهر
عالهيمه ماظل ستر
ياويلي جمر الخيم
لطفالي صاير گبر

عالحرم صار الركض ،،، بالظهر فرض
والجمر يملي الارض ،،، بالجدم يكض

بظهر عاشر محرم گلبي والله احتار
الاگي الضيم ملگه منين مااندار
الحرم تصرخ يتامه انه وسط النار

*
النار وكل كربله ،،شبتها
وين اتفر العايله ،، تبعتها

شيقنعها النار وتكف
متعلگه بجدم الترف
نركض خلتنا غصب
گدام السبعين الف

يحترگ كلمن عثر ،،، ما أله مفر
والسلم ظل بي اثر ،،، للرعب صور

ملاذا انه صرت والعايله بسدي
واصد النار عنهم لازم لوحدي
واصيرن خيمه الهم خيمه ماعندي

*
وبحضن المرضع مهد ،، أتحاميله
ظل ذكرى من الولد ،، تناغيله

من الخيمه جابته
چن ابنها شالته
شما تگعد عن الشمس
وعن الترب غطته

بي سهر خضر ورد ،،، بشمه تنسعد ؟
لو تظن بعد الفگد ،،، إلولد يرد

الولد راح الولد بس هذا تذكاره
خذته ومارضت يتفرهد بغاره
اصدلها وعليها ادموعي تجاره
*
وترچيه من الاذن ،، سلبوها
ودم سايل من الجفن ،، ضربوها

كسرة گلبي مدلله
مغمضه وتركض بالفله
تسحگ عالجمره وتصيح
شسويتي ياكربله

طفله من نار الخيم ،،، تبعت الحرم
تركض او من الالم ،،، يعثر الجدم

بثلاث سنينها والعين معصوبه
وتراچيها من اذنها گوه مسلوبه
يتيمه وفرت ابلا شوف مرعوبه

*

ابو فاضل ياعم وكفيل
ياخوه ياخل وخليل
يا ساقي يااجمل جميل
ابو فاضل طلبة حيدره

جمال الكون كله ذره بترابك
شوصف عالشجاعه يطحن صوابك
شبابك حيدري والمشيه مثل حسين
خليله وگمره صرت بليل اطنابك

*****
ياعاشگ مثله بالوجود
عين انطه لمحبوبه وزنود
متسيد مملكة الخلود
وفاي وتاج اعله العشگ

رفع راية وفاءه او ضحه چفينه
رسالة حبه وقعها بسهم عينه
مو كلمه العشگ گلها ادعة عشاگ
بس عباس صوور عشگه لحسينه

*****
من دونك ما يثبت غرام
لا غيرك واصل للهيام
ابو فاضل لذة كل كلام
اخو زينب واسجد للاسم

بنات حسين عمهن من يذكرنه
يشيلن راسهن يتشكرن منه
لذتها السوالف بالعلم والجود
ويا محلى الكفاله البيها كفلنه

*****
بيمينك هنياله لواك
وسمته ومارف لسواك
وافيته ونوماسه بوفاك
محلى بيمينك من يرف

يلمعلم الوفه والتضحيه اعلومك
يقين الخوه صارت خوه من يومك
لولاك انطفه كل الضوه عباس
على الدنية ضوة متفضله ارسومك

*****
عباس ويامعنى الكمال
يااجمل من كل الجمال
متوصف بوصاف الجلال
ياهيبة جبار الخلق

ابو فاضل علي طبعه ومعانيه
خلط ماي المفرات ابچفه حنيه
فارس تنثني من خزرته لرماح
والميدان هو ايصير راعيه

*****