يبني يجسام ،، ياام مثل وني تون
يبني يجسام ،، ما لاگ الي غير الحزن

*

تانيتك ،، آ يالولد تانيتك
ما طاحت ايدي من الدعه ،، ياجاسم وناجيتك
يا غالي ،، تدري شكو بدلالي
من ساعة العني رحت ،، دمعي كفيل ابحالي

يوم الرحت من الخيام
يارب گلت رده بسلام
گلبي يرف مثل الحمام
بسم الربه ناديتك

كافي ما ظل صبر ،، لعتبي هذا عذر
يبني چا ماگلت ،، عندي ام تنتظر

لا يجاسم صحت ،، وشكثر فرفحت
مدري شحجي بعد ،، يلي مني رحت

*

بغيابك ،، تدري شصرت بغيابك
دمعه انچفيت اعله الشمع،، آه احترگ بطنابك
ياروحي ،، متوزعه بين اجروحي
ياجاسم وشوف الورد ،، ذابل عليك بنوحي

حتى الورد هم بي حنين
ذابل على صوت الانين
ياكل تعب ذيج السنين
ارحمني بس بجوابك

يبني تدريني ام ،، گلبي الك ينلچم
ألمن انه اتعبت ،،تالي هيچ انحرم

بعيني طولك حله ،، منين اجت كربله
ياهو گلها بحزن ،، عرسك اتبدله

*
لجدامك ،، من تمشي اصد لجدامك
گد مااخاف امن الهوا ،،لو هب تميل احلامك
تاليها ،، اتحسر لماضيها
ذيچه الليالي يالولد ،، يلرمشك محليها

لساحة حرب تمشي واشوف
صوت استمع ضرب السيوف
يالوحَدّك مابين الوف
ريت وطحت چدامك

ضامي تدخل حرب ،، گطعتلي الگلب
وشفتك ياغلاي ،، يبست امن الترب

ياجرح بالنظر ،، ماضي صار السهر
مو هوا هايه خيل ،، يعني مشيك خطر

*
شمعاتك ،، يبني گبل شمعاتك
راح وضوه عيوني انطفه،،من افگدت نظراتك
راويني ،، ضيك يبعد اسنين
بس ارجع وكلشي يرد ،، ترضه الدمع يحنيني

ظهري انحنه نار الصبر
ضاع التعب راح العمر
ذاب الجفن دمعي جمر
يايمه عرسك فاتك

بعيني ماظل ضوه ،، گلبي موگد دوه
تلمست حنتك ،، چفي بيها انچوه

شوفي ما بي نفع ،، باقي بس للدمع
شما عليه بطيت ،، حيل ادگ عالظلع

مرت ابطيفي رقيه
وانا اعاين بيها واسأل
شغيراها ،،
بكل جواب ايمر ضماها
وكل ملامحها تسولف
عن خرابه وعن هزيله
عن مخيم ،،
ركضت او ناره وراها
ودمعه طاحت منها گالت
يم گمرنه،،
مو رقيه انه اليتيمه
مو رقيه انه الغريبه ..
جيت اوصيچ ابوصيه
زينب امن الشام ردت
وعنها بعدتني المنيه

يم گمرنه ،،
تلگي زينب
محد الها،،،،
بالمدينه انتي اهلها
تلگي زينب ،،
رايح اتعرفين زينب
تنعى بالملگه الكفلها
عنها راح اوصفلچ اكثر
هيه زينب ،، لكن ابمشيتها تعثر
هيه زينب ،، بس دمعها بيها اثر
هيه زينب ،، بيها طفنه كلشي غير
تلگي زينب ،،
من مزار اخوتها ردت
وهايه محنتها الچبيره
مابقى لتشكيله همها
لو تگله چنت اسيره
تلگي زينب ،،
بعطرچ اتشم عطر اخوها
وهلبت اتغمض جفنها
يم گمرنه ،،
عيون زينب هيه حراس لضعنها
دنيه صارت كلها غربه
وانتي بس انتي وطنها

ياحسين  شماله الگلب
ياحسين   مضيع الدرب
ياحسين   فراگك غرب
جنت اظنه دربك سهل
بكل برودي رايد وصل
وانه اقره صعدن هزل  ،،،ياحسين

نفسي تمشي بمشتهاهه
وانه اعمى امشي وراها
بغيرك اسنيني متاها   ،،، ياحسين
شمسك الضوة سماها
ماكو اوضح من ضواها
ونفسي محجوبه بغواها،،،    ياحسين

ندمان   هالمرة اجيتك سيدي ورايد تنجيني
ندمان   اقبلني واغفرلي ذنوبي البينك وبيني
ندمان   وامحلفك بدمعة عليلة اتصيح تانيني

*****

ياحسين   شعندي عذر  
ياحسين بيا درب امر
ياحسين اتبده العمر
بس ندم اتفايض اجيت
معاهد ابحزني وماوفيت
لكن انته الرحمه وعفيت ،،، ياحسين

عفوك المحد يوصفه
روحي سباحه اعلجرفه
بين امانك اصحه واغفه ،،، ياحسين
وكحه آ ياعيني صلفه
ماعمت لحسيني وسفه
تبچي بس مابيها لهفه ،،، ياحسين

لهفان ،، خليني بس لمصيبتك ماغيرك اليسوه
لهفان ،، كون منذكرك چن جمر ساحگلي واچوه
لهفان ،، مو أدعيها لا صدك بس انته كون اهوه

*****

ياحسين وچانت حلم
ياحسين ترابك اشم
ياحسين منيتي اللطم
حلمي حققته برحمتك
وادخلت خيمة رحمتك
طهرت ريتي نسمتك ،،، ياحسين

كون اظل بهذا لحالي
بس جنح گلبي يغالي
شبيه جافيته دلالي ،،، ياحسين
لوم اكضيها الليالي
والدمع حبلي لوصالي
ياهو غيرك ليه والي ،،، ياحسين

خسران ،، كل لحظه مرت ماذكرتك نادم وتايب
خسران،،اجرحني بيك بغربتك خليني الك ذايب
خسران،،ماريده بظلوعي الگلب لو عاللطم طايب

*****

ياحسين شگد ابتعد
ياحسين خاضع ارد
ياحسين ارحم عبد
مجلسك يحسين الدَليل
الجرح بي طب العليل
لعتذاري دموعي سبيل ،،، ياحسين

ياحسين وصرخه هايه
شوغه بيها للضمايه
هنا يصح معنى الهِدايه ،،، ياحسين
حاجه مابيها النوايه
تزيد بس بجفني مايه
وابچي للراحن سبايه ،،، ياحسين

عطشان،،بس للبواچي بلا دمع صار العمر ذله
عطشان،،وبمجلسك آه الجرح لداوي كل عله
عطشان،،صار اسمك وجرح الضمه كلش صعب شله

زينب امانه بشاربك أكفل خدرها الغالي
يابو فاضل
تربيتي وانه مدربك زودك فخر دلالي
يابو فاضل
يوم الرحيل الكربله ،، لاتنسى هاي مدلله

*****
هالليله ليلة نوح ،، راس الولي مجروح
حيدر غده بياحال ،، بلونه المنيه تلوح

وين الگمر نادا ،، حط يمنته بيمنا
طاحت دمعته وداع ،، عالبگلب وصا

كض ايد ابو فاضل علي طالت اله نظراته
ويا حسرته
بزينب يبويه اوصيتي يحچي وجرن دمعاته
ويا حسرته
وصى ودمعته سايله ،، لاتنسى هاي مدلله

*****
گبل المنيه وكون ،، ردتك يسبع الكون
زينب اذا بحماك ،، مرتاح اغمض عيون

اكفل خدرها وهاك ،، لواي الي صار لواك
رباي واعرفك زين ،، يمنت بخت يمناك

انه ادري يبني تحزمت من ساعة الوصيتك
بالوصيه
تربيتي بيك اتشيمت كافل خدر سميتك
بالوصيه
يلبيدك ألوانه عله ،، لاتنسى هاي مدلله

*****

بم الخدر اوصيك ،، يوم الذي تماشيك
طولك اكسره فياي ،،وخلها اتنومس بيك

وين انته ماموجود ،، الهيبه طشها احدود
للطف لون تمشون ،، هودجها نصبه زنود

ناكتها حفها بهيبتك وبنظرتك حاميها
بالكفاله
نومسها لعب رايتك نبض بنبض ماشيها
بالكفاله
بويه وضعنها اتكفله ،، لاتنسى هاي مدلله

*****

امنتك اعله اخيام ،، وادري انته رفعت هام
لختك رموشك سور ،، وبين الجفون اتنام

ليليه تزهي اهلال ،،جودك فرات او سال
عطشانه ياعباس ،، هالچلمه ماتنگال

ماتعطش وانته نهر لاحاشه ياواليها
بزوده طافح
عيناها ماتعرف سهر وعيونك اتحاميها
بزوده طافح
الماي لخيمها توصله ،، لاتنسى هاي مدلله

*****
وصى الگمر واندار ،، لزينب علي الكرار
كافل الچ خليت ،، لمثله شَبه ماصار

چفها وي چف عباس ،، شمهن و اخذ انفاس
گلها اعله خدرچ هاي ،، چفوف الوفه حراس

مامثله هالكافل اسد ما عالخدر يتواره
طبعه نشمي
هالميزه بي من المهد تحرسچ طبعها انظاره
طبعه نشمي
شم چفه گام يقبله ،، لاتنسى هاي مدلله

ما چذب واگول ،، ذابحني العشگ
بس رايد انول ،، لحظه واحترگ
وعن ابن البتول ،، ماريد افترگ

احچي الاحسه بيه ،، الواضح عليه
ما ادعي الما نلت
ليش ادعيها عاشگ ،، بالدنيا غارگ
هايم چذب لو گلت
دمعي لمصابه يجري ،، وحسيني يدري
بدموعي ما مَثلت
اجرحني دوم اگله ،، والدمع اهله
بضعف الطلبته وگلت

*****

الحب بالكلام ،، ينگال وسهل
شعرف بالهَيام ،، وعايش جوَ ظل
تمر مر الكرام ،، بلساني الهزل

الماتت عشگ سبيه ،، دمعة رقيه
بكل خطوه هم تنغرس
بس الرباب اعدها ،، وافة وعدها
عاشت سگفها الشمس
شلون اليحب يجافي ،، يتهنه غافي
وتابع هوا والنفس
كلمة احب گلتها ،، حاشه اوصلتها
مفروض اهيم من احس

*****
غاية كل بچاي ،، اسعد فاطمه
الگالت هوَ ماي ،، شح وابني ضمه
بسمه يظل نداي ،، لحزني محزمه

خادم ردت لبنها ،، ريت وعسنها
تقبلني من الخدم
مجلسها من احضره ،، السواد اكثره
بعين الگلبها انهظم
ادعي يظل وصالي ،، وكل انشغالي
ماانسى حرگ الخيم
ياروحي اوصي روحي ،، ويالزهره نوحي
من الماي ابنها انحرم

*****

لحظات انكسار ،، بيه لمحنتك
العاشر ظهره نار ،، يحرگ شفتك
عيله بلايه دار ،، بعازة فزعتك

ياسيدي انكساري ،، بذكر الظهاري
بذكر العطش والحبل
من حيرة الغريبه ،، ياهلمصيبه
لو تله لو عالهزل
ما ينوصف المهها ،، بحرگت خيمها
شگد تدعي كونك عدل
تنادي ويرد سكوتك ،، ولدك واخوتك
فَرگها عنهم چتل

*****

تنشاف الجروح ،، موبس تنحچي
شوف وتلگه روح ،، لذتها البچي
ومن گد ماينوح ،، يطيح وينتجي

تلگه بدمعته واضح ،، ليليه نايح
بي تلگه معنى القرب
الاقرب على المصيبه ،، روحه غريبه
غير الدمع مايحب
تشوف العلامه لونه ،، بكلمة سبونه
من هضمته ينسلب
والمنجرح عذابه ،، صفنت خرابه
مشيت اسيره بغرب

*****

حنين كوثر من حنين
عزاء دمع ام البنين
أنخه الوفيه وشوف
تبچي بچي الملهوف

*****

من صوت الجرح حزن الحزن كبر
عيون ام الگمر للتعزيه كوثر
حاشه لينخه اسمها جفونه تتعذر
وماتبرد دمعته المنها يتشكر

انخاها وتزود حزن
نخوتها مفتاح الجفن
حاشه تردك لاتظن

شكور بروحي الها شكور
اضيع لو ما چفها سور
رتل اسمها وطوف
تبچي بچي الملهوف

*****
تتحنن عليه وتلطف ابنظره
حيل اتخلي بيه للجرح اقره
اشوف حسين بيها الوانه متغيره
بين اخيامه والشاطي لزم ظهره

تبده الامان اعله النهر
صاح الاخو ظهري انكسر
ظلت خيامه ابلا گمر

خيام زينب للخيام
تصيح بعدچ دربي شام
تالي الطفل مچتوف
يبچي بچي الملهوف

*****

من عاشر محرم ميته احس بيها
شلون اتشم هواها وراح غاليها
بزينب حسِبَت ياهي لتلاگيها
يوم البي ترد واحبال بيديها

ظلت تناطر عالدرب
زينب ترد من الغرب
ميته ودمع عالخد يصب

حياة ماظلت حياة
حسين كل حي بعده مات
شافت اثر لچفوف
تبچي بچي الملهوف

*****
مو وي الضعن بس تگضي ليلتها
تنعى لزينب لتبچي بخرابتها
زينب بالسبي تلوللي ليتيمتها
وأم الاربعه أتصبر عليلتها

ليل المدينه وغربته
من الخرايب وحشته
تنعى الفواطم سهرته

تنوح ايتام التنوح
تلوج من نفس الجروح
جروح ابجروح تروف
تبچي بچي الملهوف

*****

بس هالصوره تخطر ويه ذكراها
ترسم عالترابه أگبور لرباها
لبدور الهواشم تنطي مگفاها
ويم الاغلى منهم يثگل ابچاها

يوميه ترسم هالرسم
وبكل گبر تكتب اسم
للغالي اكثر تلچم

تذوب من ونها تذوب
عذاب عدها بكل غروب
غروب الدمع موصوف
تبچي بچي الملهوف

بابا راح اموت ،، وانته مااجيت
گتلي بالخيام ،، مودعه و مشيت
عالهزل وراك ،، بدمعي ناشديت
تحملت عذاب ،، بالسبي رضيت

چان بخيمنه اسمي رقيه
وچان الدلال امخيم عليه
لمن گلتلي بالشام اشوفچ
يا بابا اجيتك واسمي السبيه

*****

برسومي جروح ،، بروحي الانتظار
ديره ديره اطوف ،، شوگ البيه سار
بابا شگد مشيت ،، بصحره تذري نار
يمته الملگه وين ،، هم يجمعنه دار

توليني ديره وتذبحني ديره
دربي المشيته جروحه چبيره
خافن گبل لا يجمعنه ملگه
بالهيمه تگضي سنيني الگصيره

*****

شما أعثر اگول ،، ياجدمي شبلاك
عديت الركاض ،، والجمر الچواك
كابر عالجروح ،، واسعدني بخطاك
ليّعثّرك كلام ،، شمات الحداك

متلهفه تدري لشوفة ولينه
كل عثره يجرح گلبي حنينه
ياجدمي تسرع بالممشه اريدك
موعوده اشوفه بأخر سبينه

*****

من شفت الحمام ،، متعلي بسما
من الهزله ارتجيت ،، يحملني هوا
گلبي صوابه موت ،، كلشي ماشفى
ملگه وحضن اديك ،، يابابا دوا

كل طير احسده وانزف اماني
واتمنه جنحه لحضنك خذاني
انسه وتشيل اچفوفي امنياتي
ويلچم ادي گيدي الچتفاني

*****

طفله ومادريت ،، والها تلهفت
تاليها شلگيت ،، بالشام او شفت
حلم الملگه ضاع ،، وانا ويا ضعت
راسك ياحسين ،، جابولي بطشت

كل حلمي ضاع بشام المصيبه
تفارگني والگه اخدودك تريبه
من جرحي اكبر جرحك لگيته
انته الغريب وانه الغريبه

*****

ياغريب ،، ياغريب
بهالبلد مالك مجيب
چنك حسين بغربتك ،، ياغريب
*****
يامسلم خِلت عينك ،، وَحدك لا اهل وانصار
انته بغربتك واهلك ،، منك تنتظر اخبار
ديار الكوفه لا هلت ،، لا بيها انفتحلك دار
غروب وغربه هالديره ،، ومابيها الفزع نغار

ديره مابيها امان ،، خانت وخان الزمان
حيره حيره ،، بلا عشيره
ديره مابيها امان

بالغروب ،، بالغروب
وحدك بهاي بالدروب
تنزف الحيره نظرتك ،، ياغريب

*****
بجدامك تخط وحشه،،صفناتك تريد اعضيد
رسمت حيرتك صوره ،،عالبطّف يظل اوحيد
مصاب الطف بده بيومك،،واهلك يالغريب ابعيد
ماغير المنيه اصحاب ،، وياك التمشي ايد بأيد

ابتدت بيك الطفوف ،، باجر اتحارب الوف
هيه هايه ،، البدايه
ابتدت بيك الطفوف

ياعذاب،، ياعذاب
شتسأل الوحشه جواب
تمشي والموت برفگتك ،،ياغريب

*****
گوم الوعدتك خانت ،، نكرة كل كتبها وياك
ليله وصبح المصباح،، واهل الكوفه كلها اعداك
قانون العطش علنوا،، يالخضت الحرب بضماك
جرحو شفّتك والماي،، ماضگته اختلط بدماك

ماگبل معروفه هاي ،، مايضوگ الضامي ماي
هالمصايب ،، بالحرايب
ماگبل معروفه هاي

عطشوك ،، عطشوك
يابو طاهر مارووك
بالضمه مجروحه شفتك ،، ياغريب

*****
برماح او نِبال ونار ،، فزعت وادم لحربك
ومنهم بالحجر ياحيف،،شهود اتعين لضربك
ماعندك خيم والناس ،، تحرگ بالحطب دربك
من گبل الذبح يردون،،، اكثر ينجرح بگلبك

كلها بالكوفه تصيح،، بضربتي مسلم جريح
گطعوا دربه ،، صوبوا گلبه
كلها بالكوفه تصيح

جرحوك ،، جرحوك
بنار اجوك وحاوطوك
عالخيم حرگوا مهجتك ،، ياغريب

*****
مسلم گربك وي حسين،، غايه الهم يبو طاهر
ذبحوك وقصدهم بيك،،جرحوا گلب ليناطر
بيك انشاف ابو اليمه ،، هل بيك اشتفه الغادر
واكثر من مصابك هاذ،، حسين مصابه اشد باجر

باچر حسين الغريب ،، ينذبح ببنه الحبيب
ويم عضيده ،، يلوي جيده
باچر حسين الغريب

والخيام ،، والخيام
الطف شگد الها ضام
تهَوون الها كل محنتك ،، ياغريب

ناوي ليا وطن ،، يا جرح الزمن
عايف ديرتك ،، ياحسين
*****
ودعتني ودمع ،، عينك اعله الگبر
مسافر ويا سفر ،، ياحبيبي انتظر
اعدل ابنيتك ،، بكربله لا تمر
بيها لو خيمت ،، ظهرك الينكسر

دمك كربله ،، ادري تحلله
وتسبي عيلتك ،، ياحسين


*****
بيه لتذكرك ،، وارثت فاطمه
امك ابكربله ،، تقاسمك بالضمه
ومن رقيه مثل ،، عيني تجري الدمه
ومثلي رايح تظل ،، للنعي محزمه

مثلي بالجرح ،، بذبحي تنذبح
بصوتي نادتك ،، ياحسين


*****
رايح ومنزلك ،، لو رحت ينطفي
مغرب لغربتك ،، لكاتبك مو وفي
يحاربك وبحرب ،، يبني ما يكتفي
يسد عليكم نهر ،، وبالضمه يشتفي

مابين الغرب ،، ما تهنه بعذب
تيبس شفتك ،، ياحسين

*****
يبني عندك طفل ،، صياره لمه امل
تحلم اتكبره ،، وهو ينتظره اجل
محنتك عالولد ،،بالمهد لو ذبل
من حضن عمته ،، للمنيه انحمل

وتنادي الحرم ،، عبدالله انفطم
وتبچي لحالتك ،، ياحسين

*****

رايح وبالضعن ،، چم طفل چم مره
وكربله ياحسين ،، ماتعرف امخدره
تحرگ امخيمك ،، لو طحت عالثره
والطفل لو ركض ،، الجمر معبره

واليسحگ جمر ،، للهيمه يفر
ينوح لفرگتك ،، ياحسين

بالحزن على الجره توشح الجمال
منجرح يظل ولا يبتسم محال

هذ الجمال الضامن اسمه
لوحة عطش بالدنيه رسمه
لا منه لا تترجه بسمه
علنها لا وصال

ياشيعه هالنداء ،، من سيد العزاء
نوحو على الحسين ،، لا ينتهي البكاء

هذا الرضا الحنين ،، ما يبتسم حزين
سنينه انگضت جروح ،، برسومه كربلاء

*****
كل ملامح الضعن بالرضا جروح
لونه كله يختلف من يظل ينوح

لون الوداع اكثر علامه
لو اكثر انياح اليتامه
مدري طفل ضحه لخيامه
بشفته ضمه يلوح

زفه وشمعها ذاب ،، صار العرس مصاب
كل هذا والوداع ،، ما مكتفي بشباب

رد للطفل خذا ،، بحر السهم روا
تناغي المن الرباب ،، ما بالمهد جواب

*****

هل محرم الدمع اعلن الحداد
عالمصيبه دمعته للحزن مداد

يذبل هظم ليله اعله ليله
حروف العطش ينبض دليله
من تنذكر عمته العقيله ،،
عليها جرحه زاد

زينب اخت غريب ،، باچر يظل سليب
عين الها عالخيام ،، والشاطي مو قريب

ياحيره بالنهار ،، والخيمه كلها نار
لا رايه لا كفيل ،، بس الدمع مجيب

*****

عينه شافت النده وانحنه عذاب
عمه عنده بالضعن طفله عالمصاب

گطرة نده تذكره بعمرها
طفله ودهرها ماعذرها
فوگ الجمر تركت اثرها وابوها عالتراب

طفله او وراهه خيل ،، غورك جفنها سيل
طشت عمرها آه ،، ماباقي بيها حيل

ينفع صبرهه بيش ،، لو عاينلها جيش
يرجف غصنها خوف ،، غيب ضواهه ليل

*****

للورد اذا همس يحتركله لون
يارقيه هالاسم مأتم الضعون


كون الورد للطفله معبر
مو عالرمل من تمشي تعثر
حال اليتيمه شو تغير
غمض عين الحنون

بالغاضريه نار ،، ما ميزت الزغار
نار وطبعها هاذ من الورد تغار

مأتم ضعن سؤال شيرجع الدلال
بالهيمه طفله هاي تالي السبي قرار

*****

ياخويه جيتك من الثايه
شچايه للنهر شچايه
تلگاني خويه شيل الرايه
ياخدري وهيبته وفيايه

*****
خويه هم تدري الخيم ،، شبت وبيها الحرم
عالجمر نسحگ غصب خلونه
حيره والساحگ جمر ،، كون اقنعه بالصبر
كون اقنعه غابو اليحمونه
هيمه ماتحمي الضعن ،، محنه دلالي امتحن
شلون ضيعه بالفله ضيونه
يگطع انفاسي الركض ،، اعثر وگوه انتهض
وين ماعد الله بر تبعونه

ياخويه بلا علم ظلينه
فرينه من الخيم فرينه
ماعدنه والي ليحامينه
عالهيمه شكد دمع صبينه


*****
خويه وانته اعله النهر ،، حدها ثايتنه انعبر
صحنه ياعباس ياحامينه
طفنه صيوان احترگ،،غالي من غالي افترگ
خوفنه ونيران دارت بينه
حرمه ظاعلها ابن ،، بالخيم بعده تظن
للخيام اندوّره ردينه
خويه چم مره نرد ،، واللهب بالچف نصد
بلا عدد فوگ الجمر مرينه

كل ضايع بالخيم دوريته
ناديته بدمعتي ناديته
صيواني محترگ طبيته
لو تطفه ناره چا طفيته


*****
خيل ومراكض طفل ،، حافر و نار وحبل
شما ألم ايتامي تهجم غاره
كربله ساحت حرب ،، بيها ظلت بس غرب
وانا حرمه بالفله محتاره
رماد هد ويالهوه ،، من الجفن سلب ضوه
ظلمه والحافر ظعن اثاره
آه بس اسمع سمع ،،صوت من كسر الظلع
وصوت لمدلل يطفي بناره

اشكيلك خويه هاي الحاله
خياله هجمت الخياله
كل خايف دمعته تبراله
ماعنده سد يلوذ بجاله


*****
خويه نسوان الضعن ،، ركضن بسدي احتمن
انا خيمتهن صرت يالوالي
من عگب فيّ رايتك ،، هذا حالي بفرگتك
ظل صرت من الشمس لعيالي
حگي اشكي بدمعتي ،،عيله كلها بذمّتي
مايسرك لو تشوف اشحالي
عمري مو عمر التعب ،، بس عليّ هذا انكتب
گبال عيني ينذبح كل غالي

مكتوبه هايه تالي سنيني
توليني كربله توليني
بلا خيمه ذاري ليغطيني
امر الله حال بينك بيني


*****

للنهر يا ابا الفضل ،، جيتك بدمعي اليهل
هاي ماچانت ابد بحسابك
زينبك لمدلله ،، بكل جرح متكفله
والجروح ابگد لهيب اطنابك
هاشميه ويا وكت ،، انه مسبيه صرت
والسباني اليوم چان يهابك
يا مصيبة فرگتك ،، عنه غابت يمنتك
عيله منكوبه صفت بغيابك

مو زينب لا انه المسبيه
مابيه عالسبي مابيه
بدلالي جروح ياراعيه
غيرتني كربله بظهريه

ياجسام ،، يبني
تعب رباي ،، يبني
ربيتك ،، زفيتك ،، عرسك يوم حزني

*****
رمله تهوس لجسام ،، ياثمرة تعب ليام
حسنك ماتوصفه احلام ،، يمورّد زماني

يبني يا شطب ريحان ،، صيتك يخلس الميدان
اشرس واترف الشبان ،، بيك اتعله شاني

ياشبل الاسد حياك ،، جازيت السهر ورباك
يبرالك علي ابممشاك ،، يا ظلي واماني

حده بناظرك والطاف ،، طبع معزب ومضياف
صوره للحسن تنشاف،، نسخه بالمعاني

ماموصوف ،، حسنك
لمعة سيف ،، حسنك
وعدانه ،، حيرانه ،، شافت ويل منك

*****
من يوم الصرت منذور،، لو يوم الزمان يجور
تفزع من يحل عاشور ،، ولعمك تنصره

حزمتك صدگ ولهاي ،، قدمتك يلب احشاي
هد وصَوّت انه الجاي ،، سيفي من يعبره

جاسم ياكحل للعين ،، يا بهجت گلب لحسين
كلشي لجيتك محضرين،، ياس وخيمه خضره

عمتك بس تسولف بيك،،روح رويحتي تسميك
لله توجهت يحميك ،، دربك يبني انطره

عود وشوف ،، عمتك
تفرح بيك ،، عمتك
اي يبني ،، تنشدني ،، يمته تصير جيتك


*****
وي عرسك جهادك صار ،، انزل طالبنه بثار
روح ولعب البتار ،، افعل ما بدالك

طب للحومه طبت حيد ،،واتخير ركاب وصيد
اطحن وانه اگلك عيد ،، فرحني بنزالك

هاي الحنه هاي ورود ،، تنطر ياعطرها تعود
حارب والعرس مريود ،، عودنه بدلالك

طرزت الصواني امال ،،رسمك منتظرته اهلال
عمري ادفع ثمن للگال ،، هلبين خيالك

حوفه وهاي ،، حنه
اعجن كون ،، حنه
يهلالي ،، دلالي ،، ما مگطوع ظنه

*****
عيني اعله الشمع من ذاب،،انشد والدموع جواب
يبني طولت لغياب ،،يمته ترد عليه

يبست حنتك ماجيت ،،عين اعله الدرب خليت
من رف الجفن حسيت ،، صابتك رزيه

عرسك والفرح مادام ،، نوح تحولت لخيام
حلمي البي عشت اعوام ،، سلبته المنيه

بعرسك افرح تمنيت ،، احزن يبني ماظنيت
بيه ياجرح خليت ،، يالرحت من اديه

ما ظنيت ،، ويلي
مني تروح ،، ويلي
من ايدي ،، يوليدي ،، رحت وراح حيلي

*****
يبني لخيمتك جابوك ،، ظلت حسره ماحنوك
يم الحوفه من خلوك،، ذبل كل وردهه

ياجاسم حِلالي النوح،،متحوله الحلاة اجروح
ياام مثلي يامذبوح ،، تنصاب بولدهه

سنين من التعب وياك،،سحگتهن خيول اعداك
دهري عالترب بداك ،، وهروشي مردهه

شلون تصوبت بصواب،،دنيه ومنها حسنك غاب
ياموت السمع لعتاب ،، وايامك يردهه

عالتربان ،، طايح
بين الخيل ،، طايح
وبدمك ،، من امك ،، تعب سنين رايح

*****

علي بويه ،، علي بويه

*****
علي اترف حلم متكحله بي عيني
يازينة كبرتي و كشخت اسنيني
عطش لا تحچي هاي الكلمه تچويني
خذت كل حيلي يوم الگتلي رويني

يبعد اسمي ،، الحزن سهمي
عَطش گتلي،، يبس دمي

*****
ياخد الورد يابزغة اهلالي
يا محلى شبابك طرز امالي
ورگ حسنك اشوفه اتگطع اگبالي
عليك شما اصد ينصاب دلالي

نده اخدودك ،، غصن عودك
ترف والحر ،، على حدودك

*****
فده اسنيني ثمن يوليدي اضحيها
إعله گطرة ماي وشفافك ارويها
عساني لا سمعت اضماك حاچيها
ولا شفتك يالاكبر عاينت بيها

يسابيني ،، فده سنيني
على شفافك ،، عمت عيني

*****
خذت حيلي ورحت يافتشت عيوني
عليك الويل فوگ الويل شوفوني
اضيع بدونك العادوك يدروني
گوم الگابلتك بيك ذبحوني

يلاگونك ،، يعرفونك
نبض بيه،، ويذبحونك

*****
بين اسيوف بين ارماح عسكرها
الي صورة جمال اهناك ادورها
شلگه وصوبك الخياله معبرها
سنين اثمنطعش عالگاع ناشرها

المنك ،، واشمنك
مرد روحي ،، علي ونك

*****

انگطع سباح گلبه ياعلي حسينك
اصيح وماترد الصوت چا وينك
بكبر همي المسافه بيني ما بينك
گبل لا اوصلك خوفي تسد عينك

أيا لكبر ،، همت بالبر
طحت يبني ،، اگوم اعثر

*****

يم عتبة الباب ،، منتظره غياب
فَرضي اعله بابي اوگف واتاني صبح ومسيه
صح الظهر حار ،، بس عندي اذكار
بدموعي ارتل آ يا ضعنه الما رد عليه

ترتيلي بسماء الاهل
منهم الي محد وصل
مو عله لا بيه علل ،، من هم زماني

تطلع شمس تغرب شمس
اتعب واناجيهم همس
باب انطبع بظلوعي احس ،، گد ما اتاني

يومي عده وگضه ،، وما وصل اي خبر
شگد وكفت انتظر ،، حتى ظهري انكسر

*****
احسبها دمعات ،، واگضيها صفنات
چا يمته يخلص يهلي سفركم هذا سؤالي
وجفوني لليوم ،، ماضاگت النوم
تاخذني حسبه وتردني حسبه اي هذا حالي

اصفن على درب الضعن
حسباتي بفكاري حدن
شگد انتظر حتى يجن ،، عمتي وخواتي

منتظره وايمرني حلم
اتخيل الملگه ابتسم
والدمعه تندهني هظم ،، تچوي امنياتي

مساهره وما غفت ،، عيني بس ترتقب
اصفن او انتبه ،، ذايب الگه الگلب

*****
من طال الفراگ ،، صب الدمع لاگ
دار الحزينه يتسمه داري من گد شجوني
لا شده وتهون ،، لا هم يرجعون
لابيه اصبر منسيه كلمه تمر بظنوني

راهم على الدار الحزن
اظلم على انواره يحن
يرد الصدا بي من اون ،، آ يا مصابي

ناسيني اگول وانتبه
ياگلبي حتماً مشتبه
لابد يجوني وأفتره ،، وانسه عذابي

تنگضي شدتي ،، داري نوره يشع
لو خبرهم وصل ،، ما اهل الدمع

*****

آ يا بچي الليل ،، ماخله كل حيل
وحدي وتمرني بس ذكرياتي هاي المصيبه
چان الابو هنا ،، تحرسني عينا
ودعني واخر نظراته ليه چانت غريبه

چانت ثگيله دمعته
واكثر تحير مشيته
من اذكر اخر نظرته ،، اصفگ بديه

من مارضالي بالسفر
يوحيلي چان ابكل نظر
ممشاهم لديرة خطر ،، للغاضريه

اتذكرت واعرفت ،، بهالسفر نايبه
وديره بيها النزل ،، رايح اتعذبه

*****

اتصبر ايام ،، واتناسه آلآم
ياروحي هونچ اقنعها باچر طارش يجيني
هسه اتضح لا ،، گلبي الترجا
لا راح اشوفه ولا راح اگله شسوه حنيني

للتالي هايه حالتي
مناوب دمعتي وحسرتي
والعله علة فرگتي ،، ما اشفه منها

بگلبي الكسر ماينجبر
وجروحي ماتقبل عذر
ما ينفع ألونها الصبر ،، خيم حزنها

الجرح بالگلب ،، والاماني طفن
علة امفارگه ،، علتي ياضعن

اربع قرابين ،، افديها للدين
گلبي المشه ويا ،، حراسه ماشين

الحداد اعلنته والمدمع جراله
ظهري لفراگه انكسر من شد رحاله


*****
انه ام اربع زلم ،، لنخوتي اطيح النجم
سنين وانه اعله الوفه بيهم اربي
حچايتي كل هالعمر ،، حسين يأمركم امر
شما خضعتوله إذن جازيتو تعبي
حسين ماشي لكربله ،، وانه لمضحيه اله
بيا وجه لو قصرت احچي وي ربي
ديني كله ودنيتي ،، مرتجاي وغايتي
مني يقبل تضحيه بعنوان حبي

ربيت الابطال ،، تتگطع اوصال
لوما يضحون ،، مايبرد البال

تعبي كله والضنه فدوه غداله
ظهري لفراگه انكسر كن شد رحاله

*****
سري استاره العشگ ،، سنين وانه احترگ
يمي مولاي واله يشتد حنيني
گباله اعثر بالحچي ،، وروحي ترغب بالبچي
من يغيب الليل اخلصنه بونيني
بسمه سميت الگلب ،، وانا خادمته انحسب
گباله ادنگ مستحه ويعرگ جبيني
وحدتله بطاعتي ،، اسمه جوهر سجدتي
حسيني من حبل الوريد اقرب يقيني

يارفعة الشان ،، حصلته عنوان
خدامة حسين ،، مظهر للايمان

شاكره اسجد على نعمة وصاله
ظهري لفراگه انكسر من شد رحاله

*****
ساعة العني رحل ،، كلشي بالدنيه ذبل
علگت لون السواد انطر رجوعه
من سماتي الصابره ،، هسه لا متغيره
انه من يوم ابتعد صرت الجزوعه
حسين اوصف صورته ،، چنه مابين اخوته
گلبي يمشي ويا مشت تحمي ظلوعه
ميته وانتظره يرد ،، وادعي لا طال البعد
جفني بغيابه انشغل بس بدموعه

حزني بده هنا ،، چا يمته ملگا
ياربي من غاب ،، لوعني فرگا

بعيد عني حسين ماادري شجراله
ظهري لفراگه انكسر من شد رحاله

*****

من گبل مو هالوكت ،، ما اعوفه حاذرت
من رحل لا ليلي ليل او لا نهاري
صح اخوته بخدمته ،، عيون تحرس خطوته
لكن انا لسيدي متعلمه اباري
چنت اتلگه الگمر ،، من يجي جايب خبر
يصيح ماي حسين يمه بأنتظاري
اركض ويا واضطرب ،، آه يالطالب شرب
خافن يمر بي عطش گاطع صحاري

اتذكر وهاي ،، چوتني بعضاي
خافن يمر يوم ،، مايشرب الماي

انذبح بس لا عطش يلمس جماله
ظهري لفراگه انكسر من شد رحاله

*****

ضعنه من يوم الطلع،،كل خبر منه انگطع
غير ولدي هم الي انذور لرجعته
ايدي عالخد وارتقب ،، الگصد ديرة غرب
مو وهم بس چني يتحسر سمعته
صوته بي نبرة ضمه ،،وآه من امخيمه
اصفن وصوت اسمع لطيحت دمعته
وينه ليجيب الخبر ،، عن اخوته والگمر
لبيهم امنته ابو اليمه وحرسته

ياروحي لتلوع ،، من صوت الدموع
صوت الكسر آه ،، من ظهره مسموع

وصيتي كون اولادي لطيح ابداله
ظهري لفراگه انكسر من شد رحاله

*****

خويه شيل الرايه يبو فاضل
الخيل اجت عنايه يبو فاضل

حرگوهن خيمنه ،، ردّنه بعلمنه

*****

حشِمت زينب ،، الخيم تلهب ،، گوم يالوالي
فازع العسكر ،، عالخيم يفتر ،، تاهت اعيالي
يابعد اختك ،، تنتهض ردتك ،، تعاين لحالي
تحيرت حيره ،، محنتي چبيره ،، دمعي يبرالي

تمحنت بيتامي ،، يبو فاضل
فرهدوهه خيامي ،، يبوفاضل

خل يلتم شملنه ،، ردنه بعلمنه

*****
الدمع سايل ،، گرب العايل ،، ياهو ليرده
بالخيم نيران ،،بالفله عدوان ،، والضعن وحده
بالظهر ردنه ،، والي ماعدنه ،، نحتمي بسده
غمضت عيونك،،ضعني من دونك،،طايح بشده

بس حرم ظلينه ،،يبو فاضل
ياهو ليحامينه ،، يبو فاضل

ياخويه انهظمنه ،، ردنه بعلمنه

*****


*****
حاله حالتنه ،،بوادي غربتنه ،، من يحامينه
ياهو يجمعنه ،، نركض وضعنه ،،خويه طشينه
كربله هيمه ،، ماكو ظل خيميه ،، ظلنه بيدينه
ياعضيد حسين ،، الخلاص منين،،خويه دلينه

شلون اوصف الحاله ،، يبو فاضل
من هجمت الخياله ،، يبو فاضل

نركض من يلمنه ،، ردنه بعلمنه

*****
حرمه وضعوني ،، عمه نادوني ،،هجمت عدانه
ياشملنه الراح ،، ياطفلنه الطاح ،، وانه حيرانه
بعمنه دلينه ،، نشتكي البينه ،، لحامل لوانه
نطيح يم جوده،، نلوذ بزنوده،، هو رجوانه

گوم شوف ضعونك ،، يبو فاضل
تنتهض يردونك ،، يبو فاضل

ينادونك يعمنه ،، ردنه بعلمنه

*****

بدموعي ،، بدموعي ،، اكتب حسين
من دونك ،، من دونك ،، ضايع حسين

*****
هذا مو حب عابر ،، حتى اعوفك باچر
انته ماضي وحاضر ،، وانته الهيام

ماكو غيرك والي ،، يمتلك دلالي
لا ولا يحلالي ،، غيرك إمام

ياهو الي من دونك ،، حق اظل ممنونك
بليل رمش عيونك ،، اغفى وانام

يامولا ،، يامولا ،، مثلك حسين
هيمني ،، هيمني ،، عطفك حسين

*****
حبه شلته الرايه ،، كون انال الغايه
دوم اظل بفيايه ،، واحفظ عهود

كل وجودي حسيني ،، هوه حبي وديني
مجلسه يغذيني ،، حنيته جود

برحمته خلاني ،، عالدمع دلاني
استلذ بحزاني ،، وبذكره انود

بظلاله ،، بظلاله ،، گلبي حسين
غذاني ،، غذاني ،، حزنه حسين

*****
من امر بجروحه ،، كلبي يشتد نوحه
آ يشوغة روحه ،، بفگد العضيد

اخ يا آلامه ،، من ضما واخيامه
ما حسبت اسهامه ،، الف وتزيد

يا هو مثله كباله ،، صوبوا دلاله
بالرضيع الشاله ،، يسگي يريد

عالشاطي ،، عالشاطي ،، روحك حسين
عطشانه ،، عطشانه ،، عيالك حسين

*****




****
ياصفنتي بليلي ،، دمعي ظل يحچلي
عنك وياويلي ،، انته الغريب

ذكرك ايبچيني ،، بكربله ايخليني
صورتك لبعيني ،، شفتك تريب

العشگته بروحي ،، ضامي يچوي بلوحي
هايه علت نوحي ،، آ يا سليب

تتغرب ،، تتغرب ،، وحدك حسين
عالغبره ،، عالغبره ،، جسمك حسين

*****

تابع ضعنكم سيدي
حارس خيمكم خادمك ،، انا العبد جون
بعروگي تجري طاعتك
قدمته نحري للذبح ،، ياسيد الكون

طوع امرك وامتاني ،، ترخصني لميداني
اصبغ لوني ابدمي ،، افديك الروح

عبدك درع اخيامك ،، كحلي تراب اجدامك
گبل السيف ابحبك ،، انه المذبوح

يامولا فدوه لترابك ،، اطنابك حارس اطنابك

*****
اتخلى عنك بالشدد
اتناسى مَنك لا ولا ،، اقبلها مولاي
ماانطي ظهري للنِعم
ما همني عمري بس مهم ،،ابقه انه وفاي

ما ابعد ياغالي ،، منك نعمة حالي
دنيه ومابيها انته ،، خليها تزول

خدامك وايماني ،، أَمشي لعالم ثاني
لوعفتك راح ابقى ،، عايش مذلول



*****
من چف رقيه سفرتي
امضغ حميه ياحسين ،، ابكل الايام
تطعمني نظره واحترگ
شعلتني جمره والگلب ،،بيك شكثر هام

مولاتي ويوميه ،، تزرع حبك بيه
هذا انه بسبعيني ،، ومتولع بيك

عادت لاول طيني ،، عجنته يحسيني
خلت كل ذراتي ،، شوگ تناديك

*****
هذا حدادي ،، اعلنت
رايه بسَوادي ،، للحزن ،، لوني الحزن صار
ضامي واشوفك ،، ارتوي
ارجع واطوفك ،، ياعطش ،، حتى اشتعل نار

عطشان وترويني ،، وانه الشفت ابعيني
ذبلان وبشفافك ،، متوجره اخيام

تتلطف بصحابك ،، متحير بطنابك
صوت الطفل انسمعه ،، ياضامي اينام


*****

اهديني كلمه لخدمتي
اسمحلي ارسمه هالعشگ ،،بسنان الارماح
طعم المنيه يختلف
بالغاضريه كوثرك ،، بگد السمه لاح

حب ارسم بجروحي ،، تفيض بأيدك روحي
اسمك اخر كلمه ،، بشفافي حسين

عبدك نلت الغايه ،، رفعه ومنك هايه
لعيونك اتوذر ،، ماهاب البين

*****

عباس سبع الگنطره
يبني ويهيبة حيدره
يامن كفلة امخدره
بعطرك هواها عطره
ظلك عليها كاسره
خدمتها النه مفخره ،، ام البنين اتنادي

لُم الوفه اندار الگمر
عباس انه ودوني البشر
محفوظه زينب بالنظر
بوجودي معدوم الخطر
ليلفظ اسمها لو گدر
بالدنيه ما يبقاله اثر ،، يا يمه يا وفايه

لزمت يمنته وتبتسم
معتبر واعرفنك شهم
يبني و يطاعون الزلم
مشهوده الك اي والنعم
شبه الوصي فعل ورسم
بوصيتي ادري تلتزم ،، ام البنين تنادي

وصيتچ يگلها بالگلب
والرايه لعبها لعب
تدريني ما اهم ابحرب
لحدودي ماتنده الغرب
زينبنه من تطلب شرب
من جودي تتهنه بعذب ،، يايمه يا وفايه

بويه يحسين ،، اظل وين ،، عليله اخذوني
وحدي بالدار ،، اشب نار ،، لون عفتوني

گلبي ناداك ،، خذني وياك
وحدي لتخلوني
*****

بويه تدري بعلتي ،، ولو مشيت ابعيلتي
بحالتي شلون
وحدي رايدني اظل ،، وابقى اعيشن عالامل
اي والضنون
وياك اريد ابهالسفر ،، ولا اظل انطر خبر
جيت الضعون
مالي حيل اعله الدمع ،، انتظر واحني الظلع
من تبعدون

آ يفرگاك ،، بلياك ،، احير ابحالي
ابقى اشتاگ ،، والفراگ ،، سهم دلالي

شلون انساك ،، خذني وياك


*****
تريد اودعك واحتمل ،، دون ما دمعي يهل
دون ما انوح
مو بدي گلبي انعصر ،، والدمع غورگ نظر
شاغت الروح
لا تگلي اتحملي ،، وانا غيرك ماالي
يبره لجروح
لا تعوف ايدي انتظر ،، علّتي اقبلها عذر
بويه لتروح


يمنتي هاي ،، يرجواي ،، يبويه الزمها
لحظنك الروح ،، ترا تنوح ،، اخذها وضمها

مدلي يمناك ،، خذني وياك

*****
للمهر راح اتبعك ،، مو قصد لموادعك
اطلب ارضاك
انتظر كون استمع ،، تگلي كافي من الدمع
واضعن وياك
بروحي هايه منيتي ،، من تصد لحالتي
تمدلي يمناك
واضعن ويالعايله ،،، صوب وادي كربله
بويه بحماك

اخدم اضعون ،، تقبلون ،، اروح وياكم
ولا بعيدين ،، يطيبين ،، صعب فرگاكم

يكتل اجفاك ،، خذني وياك
كون وي اضعونك

*****
تروح عني وحيرتي ،، راح اظل ابغربتي
شحمل الام
عله بيه والزمن ،، بيني فرگ والضعن
وشبعد ضام
وانا ماادري شكثر ،، شهور لازم انتظر
مدري اعوام
مدري ماترجع بعد ،، وانا ابقى بهالبلد
عايشه احلام

غربتي صواب ،، ولا طاب ،، ألم لبروحي
بعدك الليل ،، اخذ حيل ،، سلوتي جروحي

نجمه بسماك ،، خذني وياك


*****

وين اظل ومنزلك ،، لو هجرته ايحن الك
مثلي هالدار
الوحشه راح تلازمه ،، ليله ليله اتظلمه
تعمه الانظار
بي شعاين لو خله ،، من بعدكم يا هله
باقي تذكار
يعني وين انه التفت ،، صوره بي الكم شفت
واشتعل نار

وحشت بالليل ،، دمع سيل ،، سلب انظاري
ذكرى واهات ،، صبر مات ،، حزينه بداري

ابقى انعاك ،، خذني وياك


*****

وحدي يا ابالغوث شوفة عينك
ذاك عالغبره ذبيح حسينك

******
وحدي يا ابالغوث من ذاك الظهر
يروح صبري وانخه يارب الصبر
بويه اول تالي امشي عالجمر
هاي صارت من فگدت ابنينك

*****
صارت وصرت انه وحدي بكربله
بين جسم حسين بين العايله
ماوصلت ابن امي من ردت اوصله
الخيل گتله اجول بيني وبينك

*****
الخيل آ آ يالخيل شلت حالي
بويه تسبگني وتدوس اطفالي
ليل صار وهسه اريدن والي
حرمه خليني بحمه چفينك

*****
حرمه ويريدوني اركب عالهزل
اطلع وبيديه مشدود الحبل
مني راح يضيع چم طفله وطفل
راح نمشي وعاليسر ناخينك

*****
راح نمشي ليا بلد مايندره
وراح اظل بهالضعن متحيره
شلون هاي تصير وانه مخدره
اطلع ويحدوني لمعادينك

*****
اطلع ويطلع رمح راس الذبيح
يعني جفني من الدمع مايستريح
وانه بين الغربه مااگدر اصيح
يعيني الله لهل وضع ويعينك

*****
ايعيني الشاء اعله ضيمي بحكمته
ضعني صارت بالخرايب راحته
عيني عالسجاد آ يا غربته
ويلي عمه بسلسله مگيدينك

*****