بعيونك حنان ،، وچفوفك امان
زينب نادتك ،،، ياسور الخيم

خويه عباس ،، الاطفال ،، گضت مابيهه
شبت النار ،، بالگلوب ،، عطش ياذيهه
يبو فاضل ،،تناديك ،، يعمهه ارويها
هاي نهرين ،، الچفوف ،، يساقي اجريها

بچفوفك عذب ،، ترويهه الشرب
زينب نادتك ،،، ياسور الخيم

*****
بين الاطفال ،، يعباس ،، امان وجودك
عافو الماي ،، يركضون ،، اجو لزنودك
ارتوه وفاض،، نهر هاذ ،، تجاره بزودك
العطش راح ،، والخيام ،، تفيض بجودك

نوماس الخيم ،،، جودك والعلم
زينب نادتك ،، يا سور الخيم

*****
لمسة اورود ،، يوفاي ،، يمينك هايه
العطف صار ،، صواوين،، تدور الثايه
مأمنه بزود ،، العيون ،، ترف الرايه
ظلك السور ،، للضعون ،، كسرة فيايه

بزوده وغيرته ،،، تعلت رايته
زينب نادتك ،،، ياسور الخيم

*****
فرحة اطفال ،، يعباس ،، حنان عيونك
بين الخيام،، هوا أدور ،، نفس يردونك
رحمة حسين ،، ينوماس ،، ترا يسمونك
الضمه يعود ،، يذبلون ،، يخويه بدونك

انفاس الطفل ،، عم يابه الفضل
زينب نادتك ،،، ياسور الخيم

*****

انته موجود ،، الچفوف ،، نهر رواهه
تنسه الهموم ،، ولا طيف ،، ضمه يدناهه
لمة انجوم،، يعيناك ،، گمر ضواهه
بسمه منك ،، يعباس ،، تسر محياهه

عيناك الگمر ،، والطافك نهر
زينب نادتك،،، ياسور الخيم
*****

عليله وياجفن عالليل انخاك
شكثر رايد نعي ما قصر وياك
تراهه الوحشه تذبحني بلياك
بدمعك للفجر وصلني لو طر
*****
يجفني الوحشه عدهه احبال من خوف
على الدار الخليه اتحوم واطوف
اذا سيلك گطع ماغرگ الشوف
تاسرني ودليلي ابتوتته تنجر
*****
هاي الوحشه عدهه وياي نيشان
تهد سكته وتطگ بالبيت بيبان
اخاف ومنها تتغيرلي الوان
طفله وخوفي منها برسمي اثر
*****
يجفني ادمع لحد مااهلي يلفون
اجازيك بفرح ترخيك العيون
بعدها ماافكلك باب الجفون
ولا اخليك بين ارموشي تعثر
*****

ابو فاضل ،، ابو فاضل

يالماخذ كل حيلي يحزام الظهر
فراگك بده سنيني وي جاري النهر
تعنيتك واجدامي ينگلهه القهر
جيت ابهم إليالي فارگه الگمر


اخوي وجيشي انته وحامل الوانه
عگب حيلك اظل أبغير عوانه
وحيد وهاي هيمه شلون بغيابك
يصوب دهري سهمه وانه نيشانه

ابو فاضل ، ابو فاضل
*****

جيتك دمعة عازه من عين الخيم
وحچايت چا وينك تتحسر حرم
ياريت كون او هلبت الفظهه بألم
احچيهه واتلفت ما شفت العلم

يبو فاضل خيمنه تريد راعيهه
عفت سكنه وتريدك ماي ترويهه
علمنه الشلته بيدك مايرف وينه
اصوت خويه وينك روحي دليهه

*****
جيتك شفت الرايه يم راسك ترف
حنت والچفينك ليحن يرتجف
جودك طايح يمك وصوابه كلف
الماي روحه وطلعت ردت للجرف


خذت كل حيلي خويه طيحتك هايه
تخوصرت ابمشيتي مالي تچايه
وصلتك وشلگيتك يالگمر طايح
لگيت الجود يبچي والدمع مايه


*****
من عفتك لخيامك رديت انتحب
امشي وروحي بوادي وبوادي الگلب
مالتني بغيابك چلمات الغرب
شحچي خلافك وانه بالدمعه انغلب


اريد اوصل خيمنه منين دليني
عينك غمضتهه وانطفت عيني
الهوا يعثر مشيتي والدرب حيره
يچلمات الشماته أبگلبي تچويني


*****
طبيت الصيوانك شايل غربتي
اتلفت وأعيوني تهمل حيرتي
عامود هاي الخيمه شبگت يمنتي
صيوانك هدمته بعبرة نحبتي

نحبت بعالي صوتي خويه وحزامي
لحد ماگلبي احسه طاح گدامي
تركتك عالشريعه وجيت ياخويه
الك مو للشرب دلالي ظل ضامي



*****

هونك علي ياليل ارحم
جروح بظلامك كلهه تلتم
راحو هلي ،، محد الي ،، ياليل ارحم
*****
راعيه ،، صح مارجع هالبيت راعيه
حنيه ،، منك ردت ياليل حنيه
مر بيه ،، بس مو رعب واسيني مر بيه
ليليه ،، اتلوه من الخوف ليليه

بجروحي لاگيلك عذر
مرعوبه والوحشه اسر
انته اتعرف ،، جفني ترف ،، ياليلي ارحم
****
تسبيني ،، لمن تحل ياليل تسبيني
من عيني ،، تاخذ اماني ليش من عيني
تحديني ،، تفززني دمعة خوف تحديني
يحميني ،، راح الي منك چان يحميني

ياليل ابد ماتنجرع
اغفه ويفززني الدمع
حبلك سهر ،، يسبي نظر،، ياليلي ارحم

*****
ياليلي ،، انه العليله تدري ياليلي
هد حيلي ،، فراگ الاهل عذبني هدحيلي
تبچيلي ،، كونك ستر ياليل تبچيلي
ياويلي ،، من عيني ماخذ دمعي ياويلي

يمگطع ابتوت الگلب
تتسلى بدموعي التصب

دمعي يهل ،، لمن تحل ،، ياليلي ارحم

*****
الواني ،، وحشة صفنتك غيرت الواني
احزاني ،، هيج ظلامك بيه احزاني
چواني ،، نجمك جمر ياليلي چواني
خلاني ،، اصرخ واصيحن آه خلاني

هيمه السمه وجمرك نجم
يچوي النواظر مو جدم
لمعة حزن ،، تچوي الجفن ،، ياليل ارحم

*****
صفناتي ،، تلتم جروح ابهاي صفناتي
آهاتي ،، طفله وعليله كثرت آهاتي
حسباتي ،، تاخذني للطف ويلي حسباتي
عماتي ،، بالهيمه ذيچ اشحال عماتي

اتفكر ابحال المشن
ذيچ الليالي هم غفن
بيهن الم ،، حرگ الخيم ،، ياليل ارحم
*****

جسام يبني ،،، هذا عرسك يومه
جسام يبني ،،، اگلب الملزومه
*****

گوم ييني وهسه حانت ساعتك
بالدرع والطاس تحله زفتك
روح ياجسام اگلب حومتك
مثل مابچفوفي اعجن حنتك

اعجن ارواح ،،، من تطب الحومه
جسام يبني ،،،، اگلب الملزومه
*****
اليوم اريدك مجتبى بساحة حرب
من تطب ميدان تگلبهه گلب
خل صفوف الجيش تتماوج رعب
خلي سيفك موت عالعسكر يهب

عيد امجاد ،، والدك وعلومه
جسام يبني ،، اگلب الملزومه
*****
والثلث تنعام منك هاشمي
أتغير وتنادي المنايه تحزمي
جيوش من برگة حسامك تنعمي
بطاري ملك الموت منك تحتمي

بيدك الموت ،، يبني يرخص سومه
جسام يبني ،، اگلب الملزومه
*****
حومتك خلهه قيامه والنشر
روح خلهه بروح يبني تنحشر
جنه ماكو لا ذنوب التغتفر
والسراط السيف لا ماينعبر

طبرة السيف ،، بالگصص موشومه
جسام يبني ،،، اگلب الملزومه
*****

سوايه سوي اليوم ماالهه وصف
موت اجري والجثث خلهه جرف
گوم واگصد ياهو ينعد بألف
گطعه يبني انصاف ماريده نصف

وال يلاگيك ،، بعرگه يبس ادمومه
جسام يبني ،،،، اكلب الملزومه
*****

سهر ليلي ،، اخذ حيلي
انه زينب باليسر اكفل ضعينه
الهزيله ديره ديره تحدي بينه
*****
يوم نادو عالفواطم للرحيل
تكفلة بضعوني بس مالي كفيل
من التعب هب الهوا بيه يميل
حتى ماالحگ اكف دمعي اليسيل

اصيرن لازم للخدر حجاب
انوحن كون وي الفگدت شباب

على الهزل ،، الي مقتل
مصاب اقره ،، على الاسره
حرم هايه،، بلا رايه .....

انه الوني ،، تكفلني
دليلي لكافله يشتد حنينه
الهزيله ديره ديره تحدي بينه
*****
عيني عالايتام من تحدي الهزل
كون اصبره الماحمل شد الحبل
انه عمه لو دروا عيني تهل
شلون يقنع بالصبر گلب الطفل

كون ماگدام اطفالي الوع
كون ابچي وكون ماتنزل دموع

اهل نوحي ،، دمع روحي
اباريهم ،، اواسيهم
الم دربي ،، يفت گلبي ......

الطفل ظلعه ،، مثل شمعه
ذايب بحر الفله گد ما مشينه
الهزيله ديره ديره تحدي بينه
*****
من دلال اخيامنه بهيمه نبات
والليالي تمر نحيب وذكريات
الليل نگضي بالخرابه مگبعات
نلوذ وحده بوحده لو حادينه فات

من بعد عين الهواشم والخيام
علفواطم عيني ما تغفه وتنام

اظل اسهر ،،ليالي اقهر
مثل جمره ،، يمر ذكره
جرح ماطاب ،، دلالي الغاب

الگلب ضامي ،، على اخيامي
بخرايب من سكنه ماغفينه
الهزيله ديره ديره تحدي بينه
*****
اكضي ليلي ابين ايتامي اطوف
متون اضمد لو افك حبل الچفوف
عله صوت الاه اگصده ومااشوف
وانه بيه اجروح بس ياهو اليروف

بالظلام وكون اضمد بالجروح
واليتيم اندله من اسمعله نوح

اليصب دمه ،، صرخ عمه
وانه اتحير ،، اظل افتر
شكبر بلواي ،، يتامه هواي

شصير انه ،، ويتامنه
من يجن الليل تنحب من سبينه
والهزيله ديره ديره تحدي بينه
*****
يمته يتشافه الجرح طر الفجر
يعني گيد وممشه بالهيمه واسر
وي جرح لگلوب مايرهم صبر
شلون صبره وهو نبضاته جمر

والرمال التخدش اجدام الزغار
الليل كله من الالم مشتعله نار

جدم ينزف ،، طفل يرجف
طلع صبحه ،، نزف جرحه
يشل ايده ،، خبر گيده

يهل دمعه ،، بألم ظلعه
عالجرح شدو حبل اسره بأدينه
والهزيله ديره ديره تحدي بينه
*****

صفيه ويا دمع مدفون ،، يجرح المحد ايذكره
يلچمه التحترگ اهات،،يشوغة خيمه من جمره
يحسره من السبايه وآخ،مشن حسره بثرحسره
فرض يوميه چفچ هاذ،،يسلم للحبل امره

*****
تيتمتي يبنت حسين ،،صعدتي عالهزل گوه
عطشتي للدلال الراح،،اسيره وللزجر سطوه
نياشينچ ظهر عاشور،،بلمخيم الچ اسوه
غريبه استوحدتچ نار،،حملتي بلوه من بلوه

*****
صفيه وماصفالچ حال،،يدمعه من العمر اكبر
على رمشچ بقايا رماد،على سمعچ دوي العسكر
للغربه گطعتي دروب ،، مصايب وشبقه مامر
تاليها اندفنتي وراح ،، للشام الضعن سدر

*****
ماشيتي الرمح ايام،،انشدچ هم شكيتي الحال
لوعن الجروح البيچ،،يشغلچ دم الرمح السال
عثرات الهزيله هواي،،ومضيگه النفس لحبال
يوميه لخرابه يروح ،،ضعنچ صاير بترحال

*****
ظليمه ومايذكرچ صوت،،ولا مر طاري بقرايه
وانتي عمچ العباس ،، الگبع خدرچ برايه
وينه الي بحضرتچ صاح،،بدمعه وردد حچايه
يعطشانه انتظرتي الجود،،والعاشر منع مايه

*****

ناگتي ،، تنعه بالدرب دلالي
محني شافته خيالي
تحن لو صحت يوالي

عثرتهه بدمعتي ،، تجرحهه غربتي
*
تحديني دمعتي وناگتي حنت عليه
محنيه عليهه من ثگل حبلي البديه
مالت من كثر ما انعه ضيم الغاضريه
ناخت من درت ياهي العليهه ياسبيه

ناخت تحدي مابيهه
لاعت من بواچيهه
من عرفت انه زينب
تالي انسبي اعليهه

محنتي ،، هلي عالترب عفتهم
ضمه والشمس چوتهم
نومه بالدمه شفتهم

سلتني حسرتي ،، تجرحهه غربتي

*

تاخذني عبرتي والهزيله تنعه وياي
طريت البراري والشمس هم زادت اضماي
اتذكر دلالي من اصد لعدانه حداي
صوت الناگه يعله لوعلة نحباتي وابچاي

هيمه وغربه يحدوني
بلا هودج يمشوني
صوت الناگه يتعاله
حتى ما يسمعوني

عبرتي ،،، بيهه تللچم جروحي
تالي ابچي ها يروحي
هزله تنعى ويه نوحي

تتعاله نحبتي ،، تجرحهه غربتي

*
صح هزله لچنه بالحدي ممشاهه بحساس
تعرفني عقيله بالغصب مشتني هالناس
ماترضه اشم الذاري وانه انفاسي عباس
تبعد من تحس گرب علينه حامل الراس

تحس بلوعته وهضمه
گلبي وراس ابو اليمه
لا ترضه يصد ليه
ولا اشوفه يصب دمه

مهجتي ،،، ظلعي بالقهر عصرهه
روحي يلتهب جمرهه
ياهو كسرتي جبرهه

ما تتشافه علتي ،، تجرحهه غربتي

*
تعرفني انه المچتوفه انه چنت اميره
دولبني زماني من دلالي صرت اسيره
تتعثر غدت من عرفت المحنه چبيره
من اشهگ تحس هالشهگه انفاسي الاخيره

تلوع امن اذكر حسيني
عثرتهه بدمع عيني
ناگه وتدري ممشاهه
ضيع بالفله اسنيني

لوعتي ،، بيه مارحم زماني
شمعه بلهضم طفاني
ويلي للغرب خذاني

والعاشت محنتي ،، تجرحهه غربتي
*
ماطاعت سياط الحادي وشگد حملت الام
ماتسرع تريد اطول اكثر هاي الايام
تعرف چنهه تاليهه اليه دهري اشضام
لمن بالدرب حسته گرب طبت الشام

تحدي الناگه مالومه
تحس ابگلبي وهمومه
كل ما انده الوالي
عالشام الگرب يومه


ضيعتي ،، امشي والحبل بديه
مو اميره خارجيه
والله منيتي المنيه

والصار بسفرتي ،،، تجرحهه غربتي
*

بيه شيرده الزمان
وألزم اچفوف الحنان
توذرت لابن امي شوگ،، بالدمع جفني استعان

صارت وصدگ ،، عنك افترگ
بشوگي احترگ ،، ياحسين

شلون أرق اسم ،، اذكره الچم
حيلي ينهدم ،، ياحسين

خويه ياقصة جروحي
لبسمتك مشتاگه روحي
اغفه ليليه اعله نوحي

*

ضايعه بين الي فات
نبضي عايش ذكريات
شينسه گلبي ياحسين ،، وانته الي كل الحياة

روحي نادتك ،، محلى عشرتك
نبضي صورتك ،، ياحسين

من چنت تمر،، بيه ابتشر
يورد العمر ،، ياحسين

تورد اسنيني من اشوفك
خويه بالحنيه اطوفك
حسيني يااعذب حروفك

*

گلبي ماحاسبها هاي
امشي وانته تظل وراي
اگضي عمري بلا حسين ،، لاحياة ابلا هواي

ما چنت أظن ،، يوم الك اون
بهجرك امتحن ،، ياحسين

گلبي وانمرد ،، حسيني وانفگد
شرتجي بعد ،، ياحسين

حسيني غاية امنياتي
يحلى من دونك مماتي
معنى مابيها حياتي

*

اهمس بأسمك واريد
صوتك اسمع حتى اهيد
نادي بسمي خويه گول،، انا يمچ مو بعيد

باقي هالعمر ،،صوتك انتظر
بالسمع يمر ،، ياحسين

لشوفتك أهم ،، اصفن ابحلم
ريحتك اشم ،، ياحسين

يل رحت وبلايه رجعه
احلم بصوتك اسمعه
يكضي حلمي دمعه دمعه

*

گلبي يابو سكينه ذاب
روحي مجروحه بغياب
شما يمر لون الغروب ،، چني اشوفك عالتراب

ميته من وكت ،، انته بي طحت
اختك أونحت ،، ياحسين

واگفه اعله تل ،، گاطعه الامل
ما ألي اهل ،، ياحسين

صورتك فوگ الوطيه
تمر علي مرت منيه
وارجع اشبچ عشر اديه

يبني يجسام ،، ياام مثل وني تون
يبني يجسام ،، ما لاگ الي غير الحزن

*

تانيتك ،، آ يالولد تانيتك
ما طاحت ايدي من الدعه ،، ياجاسم وناجيتك
يا غالي ،، تدري شكو بدلالي
من ساعة العني رحت ،، دمعي كفيل ابحالي

يوم الرحت من الخيام
يارب گلت رده بسلام
گلبي يرف مثل الحمام
بسم الربه ناديتك

كافي ما ظل صبر ،، لعتبي هذا عذر
يبني چا ماگلت ،، عندي ام تنتظر

لا يجاسم صحت ،، وشكثر فرفحت
مدري شحجي بعد ،، يلي مني رحت

*

بغيابك ،، تدري شصرت بغيابك
دمعه انچفيت اعله الشمع،، آه احترگ بطنابك
ياروحي ،، متوزعه بين اجروحي
ياجاسم وشوف الورد ،، ذابل عليك بنوحي

حتى الورد هم بي حنين
ذابل على صوت الانين
ياكل تعب ذيج السنين
ارحمني بس بجوابك

يبني تدريني ام ،، گلبي الك ينلچم
ألمن انه اتعبت ،،تالي هيچ انحرم

بعيني طولك حله ،، منين اجت كربله
ياهو گلها بحزن ،، عرسك اتبدله

*
لجدامك ،، من تمشي اصد لجدامك
گد مااخاف امن الهوا ،،لو هب تميل احلامك
تاليها ،، اتحسر لماضيها
ذيچه الليالي يالولد ،، يلرمشك محليها

لساحة حرب تمشي واشوف
صوت استمع ضرب السيوف
يالوحَدّك مابين الوف
ريت وطحت چدامك

ضامي تدخل حرب ،، گطعتلي الگلب
وشفتك ياغلاي ،، يبست امن الترب

ياجرح بالنظر ،، ماضي صار السهر
مو هوا هايه خيل ،، يعني مشيك خطر

*
شمعاتك ،، يبني گبل شمعاتك
راح وضوه عيوني انطفه،،من افگدت نظراتك
راويني ،، ضيك يبعد اسنين
بس ارجع وكلشي يرد ،، ترضه الدمع يحنيني

ظهري انحنه نار الصبر
ضاع التعب راح العمر
ذاب الجفن دمعي جمر
يايمه عرسك فاتك

بعيني ماظل ضوه ،، گلبي موگد دوه
تلمست حنتك ،، چفي بيها انچوه

شوفي ما بي نفع ،، باقي بس للدمع
شما عليه بطيت ،، حيل ادگ عالظلع

مرت ابطيفي رقيه
وانا اعاين بيها واسأل
شغيراها ،،
بكل جواب ايمر ضماها
وكل ملامحها تسولف
عن خرابه وعن هزيله
عن مخيم ،،
ركضت او ناره وراها
ودمعه طاحت منها گالت
يم گمرنه،،
مو رقيه انه اليتيمه
مو رقيه انه الغريبه ..
جيت اوصيچ ابوصيه
زينب امن الشام ردت
وعنها بعدتني المنيه

يم گمرنه ،،
تلگي زينب
محد الها،،،،
بالمدينه انتي اهلها
تلگي زينب ،،
رايح اتعرفين زينب
تنعى بالملگه الكفلها
عنها راح اوصفلچ اكثر
هيه زينب ،، لكن ابمشيتها تعثر
هيه زينب ،، بس دمعها بيها اثر
هيه زينب ،، بيها طفنه كلشي غير
تلگي زينب ،،
من مزار اخوتها ردت
وهايه محنتها الچبيره
مابقى لتشكيله همها
لو تگله چنت اسيره
تلگي زينب ،،
بعطرچ اتشم عطر اخوها
وهلبت اتغمض جفنها
يم گمرنه ،،
عيون زينب هيه حراس لضعنها
دنيه صارت كلها غربه
وانتي بس انتي وطنها

ياحسين  شماله الگلب
ياحسين   مضيع الدرب
ياحسين   فراگك غرب
جنت اظنه دربك سهل
بكل برودي رايد وصل
وانه اقره صعدن هزل  ،،،ياحسين

نفسي تمشي بمشتهاهه
وانه اعمى امشي وراها
بغيرك اسنيني متاها   ،،، ياحسين
شمسك الضوة سماها
ماكو اوضح من ضواها
ونفسي محجوبه بغواها،،،    ياحسين

ندمان   هالمرة اجيتك سيدي ورايد تنجيني
ندمان   اقبلني واغفرلي ذنوبي البينك وبيني
ندمان   وامحلفك بدمعة عليلة اتصيح تانيني

*****

ياحسين   شعندي عذر  
ياحسين بيا درب امر
ياحسين اتبده العمر
بس ندم اتفايض اجيت
معاهد ابحزني وماوفيت
لكن انته الرحمه وعفيت ،،، ياحسين

عفوك المحد يوصفه
روحي سباحه اعلجرفه
بين امانك اصحه واغفه ،،، ياحسين
وكحه آ ياعيني صلفه
ماعمت لحسيني وسفه
تبچي بس مابيها لهفه ،،، ياحسين

لهفان ،، خليني بس لمصيبتك ماغيرك اليسوه
لهفان ،، كون منذكرك چن جمر ساحگلي واچوه
لهفان ،، مو أدعيها لا صدك بس انته كون اهوه

*****

ياحسين وچانت حلم
ياحسين ترابك اشم
ياحسين منيتي اللطم
حلمي حققته برحمتك
وادخلت خيمة رحمتك
طهرت ريتي نسمتك ،،، ياحسين

كون اظل بهذا لحالي
بس جنح گلبي يغالي
شبيه جافيته دلالي ،،، ياحسين
لوم اكضيها الليالي
والدمع حبلي لوصالي
ياهو غيرك ليه والي ،،، ياحسين

خسران ،، كل لحظه مرت ماذكرتك نادم وتايب
خسران،،اجرحني بيك بغربتك خليني الك ذايب
خسران،،ماريده بظلوعي الگلب لو عاللطم طايب

*****

ياحسين شگد ابتعد
ياحسين خاضع ارد
ياحسين ارحم عبد
مجلسك يحسين الدَليل
الجرح بي طب العليل
لعتذاري دموعي سبيل ،،، ياحسين

ياحسين وصرخه هايه
شوغه بيها للضمايه
هنا يصح معنى الهِدايه ،،، ياحسين
حاجه مابيها النوايه
تزيد بس بجفني مايه
وابچي للراحن سبايه ،،، ياحسين

عطشان،،بس للبواچي بلا دمع صار العمر ذله
عطشان،،وبمجلسك آه الجرح لداوي كل عله
عطشان،،صار اسمك وجرح الضمه كلش صعب شله

زينب امانه بشاربك أكفل خدرها الغالي
يابو فاضل
تربيتي وانه مدربك زودك فخر دلالي
يابو فاضل
يوم الرحيل الكربله ،، لاتنسى هاي مدلله

*****
هالليله ليلة نوح ،، راس الولي مجروح
حيدر غده بياحال ،، بلونه المنيه تلوح

وين الگمر نادا ،، حط يمنته بيمنا
طاحت دمعته وداع ،، عالبگلب وصا

كض ايد ابو فاضل علي طالت اله نظراته
ويا حسرته
بزينب يبويه اوصيتي يحچي وجرن دمعاته
ويا حسرته
وصى ودمعته سايله ،، لاتنسى هاي مدلله

*****
گبل المنيه وكون ،، ردتك يسبع الكون
زينب اذا بحماك ،، مرتاح اغمض عيون

اكفل خدرها وهاك ،، لواي الي صار لواك
رباي واعرفك زين ،، يمنت بخت يمناك

انه ادري يبني تحزمت من ساعة الوصيتك
بالوصيه
تربيتي بيك اتشيمت كافل خدر سميتك
بالوصيه
يلبيدك ألوانه عله ،، لاتنسى هاي مدلله

*****

بم الخدر اوصيك ،، يوم الذي تماشيك
طولك اكسره فياي ،،وخلها اتنومس بيك

وين انته ماموجود ،، الهيبه طشها احدود
للطف لون تمشون ،، هودجها نصبه زنود

ناكتها حفها بهيبتك وبنظرتك حاميها
بالكفاله
نومسها لعب رايتك نبض بنبض ماشيها
بالكفاله
بويه وضعنها اتكفله ،، لاتنسى هاي مدلله

*****

امنتك اعله اخيام ،، وادري انته رفعت هام
لختك رموشك سور ،، وبين الجفون اتنام

ليليه تزهي اهلال ،،جودك فرات او سال
عطشانه ياعباس ،، هالچلمه ماتنگال

ماتعطش وانته نهر لاحاشه ياواليها
بزوده طافح
عيناها ماتعرف سهر وعيونك اتحاميها
بزوده طافح
الماي لخيمها توصله ،، لاتنسى هاي مدلله

*****
وصى الگمر واندار ،، لزينب علي الكرار
كافل الچ خليت ،، لمثله شَبه ماصار

چفها وي چف عباس ،، شمهن و اخذ انفاس
گلها اعله خدرچ هاي ،، چفوف الوفه حراس

مامثله هالكافل اسد ما عالخدر يتواره
طبعه نشمي
هالميزه بي من المهد تحرسچ طبعها انظاره
طبعه نشمي
شم چفه گام يقبله ،، لاتنسى هاي مدلله

ما چذب واگول ،، ذابحني العشگ
بس رايد انول ،، لحظه واحترگ
وعن ابن البتول ،، ماريد افترگ

احچي الاحسه بيه ،، الواضح عليه
ما ادعي الما نلت
ليش ادعيها عاشگ ،، بالدنيا غارگ
هايم چذب لو گلت
دمعي لمصابه يجري ،، وحسيني يدري
بدموعي ما مَثلت
اجرحني دوم اگله ،، والدمع اهله
بضعف الطلبته وگلت

*****

الحب بالكلام ،، ينگال وسهل
شعرف بالهَيام ،، وعايش جوَ ظل
تمر مر الكرام ،، بلساني الهزل

الماتت عشگ سبيه ،، دمعة رقيه
بكل خطوه هم تنغرس
بس الرباب اعدها ،، وافة وعدها
عاشت سگفها الشمس
شلون اليحب يجافي ،، يتهنه غافي
وتابع هوا والنفس
كلمة احب گلتها ،، حاشه اوصلتها
مفروض اهيم من احس

*****
غاية كل بچاي ،، اسعد فاطمه
الگالت هوَ ماي ،، شح وابني ضمه
بسمه يظل نداي ،، لحزني محزمه

خادم ردت لبنها ،، ريت وعسنها
تقبلني من الخدم
مجلسها من احضره ،، السواد اكثره
بعين الگلبها انهظم
ادعي يظل وصالي ،، وكل انشغالي
ماانسى حرگ الخيم
ياروحي اوصي روحي ،، ويالزهره نوحي
من الماي ابنها انحرم

*****

لحظات انكسار ،، بيه لمحنتك
العاشر ظهره نار ،، يحرگ شفتك
عيله بلايه دار ،، بعازة فزعتك

ياسيدي انكساري ،، بذكر الظهاري
بذكر العطش والحبل
من حيرة الغريبه ،، ياهلمصيبه
لو تله لو عالهزل
ما ينوصف المهها ،، بحرگت خيمها
شگد تدعي كونك عدل
تنادي ويرد سكوتك ،، ولدك واخوتك
فَرگها عنهم چتل

*****

تنشاف الجروح ،، موبس تنحچي
شوف وتلگه روح ،، لذتها البچي
ومن گد ماينوح ،، يطيح وينتجي

تلگه بدمعته واضح ،، ليليه نايح
بي تلگه معنى القرب
الاقرب على المصيبه ،، روحه غريبه
غير الدمع مايحب
تشوف العلامه لونه ،، بكلمة سبونه
من هضمته ينسلب
والمنجرح عذابه ،، صفنت خرابه
مشيت اسيره بغرب

*****

حنين كوثر من حنين
عزاء دمع ام البنين
أنخه الوفيه وشوف
تبچي بچي الملهوف

*****

من صوت الجرح حزن الحزن كبر
عيون ام الگمر للتعزيه كوثر
حاشه لينخه اسمها جفونه تتعذر
وماتبرد دمعته المنها يتشكر

انخاها وتزود حزن
نخوتها مفتاح الجفن
حاشه تردك لاتظن

شكور بروحي الها شكور
اضيع لو ما چفها سور
رتل اسمها وطوف
تبچي بچي الملهوف

*****
تتحنن عليه وتلطف ابنظره
حيل اتخلي بيه للجرح اقره
اشوف حسين بيها الوانه متغيره
بين اخيامه والشاطي لزم ظهره

تبده الامان اعله النهر
صاح الاخو ظهري انكسر
ظلت خيامه ابلا گمر

خيام زينب للخيام
تصيح بعدچ دربي شام
تالي الطفل مچتوف
يبچي بچي الملهوف

*****

من عاشر محرم ميته احس بيها
شلون اتشم هواها وراح غاليها
بزينب حسِبَت ياهي لتلاگيها
يوم البي ترد واحبال بيديها

ظلت تناطر عالدرب
زينب ترد من الغرب
ميته ودمع عالخد يصب

حياة ماظلت حياة
حسين كل حي بعده مات
شافت اثر لچفوف
تبچي بچي الملهوف

*****
مو وي الضعن بس تگضي ليلتها
تنعى لزينب لتبچي بخرابتها
زينب بالسبي تلوللي ليتيمتها
وأم الاربعه أتصبر عليلتها

ليل المدينه وغربته
من الخرايب وحشته
تنعى الفواطم سهرته

تنوح ايتام التنوح
تلوج من نفس الجروح
جروح ابجروح تروف
تبچي بچي الملهوف

*****

بس هالصوره تخطر ويه ذكراها
ترسم عالترابه أگبور لرباها
لبدور الهواشم تنطي مگفاها
ويم الاغلى منهم يثگل ابچاها

يوميه ترسم هالرسم
وبكل گبر تكتب اسم
للغالي اكثر تلچم

تذوب من ونها تذوب
عذاب عدها بكل غروب
غروب الدمع موصوف
تبچي بچي الملهوف

بابا راح اموت ،، وانته مااجيت
گتلي بالخيام ،، مودعه و مشيت
عالهزل وراك ،، بدمعي ناشديت
تحملت عذاب ،، بالسبي رضيت

چان بخيمنه اسمي رقيه
وچان الدلال امخيم عليه
لمن گلتلي بالشام اشوفچ
يا بابا اجيتك واسمي السبيه

*****

برسومي جروح ،، بروحي الانتظار
ديره ديره اطوف ،، شوگ البيه سار
بابا شگد مشيت ،، بصحره تذري نار
يمته الملگه وين ،، هم يجمعنه دار

توليني ديره وتذبحني ديره
دربي المشيته جروحه چبيره
خافن گبل لا يجمعنه ملگه
بالهيمه تگضي سنيني الگصيره

*****

شما أعثر اگول ،، ياجدمي شبلاك
عديت الركاض ،، والجمر الچواك
كابر عالجروح ،، واسعدني بخطاك
ليّعثّرك كلام ،، شمات الحداك

متلهفه تدري لشوفة ولينه
كل عثره يجرح گلبي حنينه
ياجدمي تسرع بالممشه اريدك
موعوده اشوفه بأخر سبينه

*****

من شفت الحمام ،، متعلي بسما
من الهزله ارتجيت ،، يحملني هوا
گلبي صوابه موت ،، كلشي ماشفى
ملگه وحضن اديك ،، يابابا دوا

كل طير احسده وانزف اماني
واتمنه جنحه لحضنك خذاني
انسه وتشيل اچفوفي امنياتي
ويلچم ادي گيدي الچتفاني

*****

طفله ومادريت ،، والها تلهفت
تاليها شلگيت ،، بالشام او شفت
حلم الملگه ضاع ،، وانا ويا ضعت
راسك ياحسين ،، جابولي بطشت

كل حلمي ضاع بشام المصيبه
تفارگني والگه اخدودك تريبه
من جرحي اكبر جرحك لگيته
انته الغريب وانه الغريبه

*****

ياغريب ،، ياغريب
بهالبلد مالك مجيب
چنك حسين بغربتك ،، ياغريب
*****
يامسلم خِلت عينك ،، وَحدك لا اهل وانصار
انته بغربتك واهلك ،، منك تنتظر اخبار
ديار الكوفه لا هلت ،، لا بيها انفتحلك دار
غروب وغربه هالديره ،، ومابيها الفزع نغار

ديره مابيها امان ،، خانت وخان الزمان
حيره حيره ،، بلا عشيره
ديره مابيها امان

بالغروب ،، بالغروب
وحدك بهاي بالدروب
تنزف الحيره نظرتك ،، ياغريب

*****
بجدامك تخط وحشه،،صفناتك تريد اعضيد
رسمت حيرتك صوره ،،عالبطّف يظل اوحيد
مصاب الطف بده بيومك،،واهلك يالغريب ابعيد
ماغير المنيه اصحاب ،، وياك التمشي ايد بأيد

ابتدت بيك الطفوف ،، باجر اتحارب الوف
هيه هايه ،، البدايه
ابتدت بيك الطفوف

ياعذاب،، ياعذاب
شتسأل الوحشه جواب
تمشي والموت برفگتك ،،ياغريب

*****
گوم الوعدتك خانت ،، نكرة كل كتبها وياك
ليله وصبح المصباح،، واهل الكوفه كلها اعداك
قانون العطش علنوا،، يالخضت الحرب بضماك
جرحو شفّتك والماي،، ماضگته اختلط بدماك

ماگبل معروفه هاي ،، مايضوگ الضامي ماي
هالمصايب ،، بالحرايب
ماگبل معروفه هاي

عطشوك ،، عطشوك
يابو طاهر مارووك
بالضمه مجروحه شفتك ،، ياغريب

*****
برماح او نِبال ونار ،، فزعت وادم لحربك
ومنهم بالحجر ياحيف،،شهود اتعين لضربك
ماعندك خيم والناس ،، تحرگ بالحطب دربك
من گبل الذبح يردون،،، اكثر ينجرح بگلبك

كلها بالكوفه تصيح،، بضربتي مسلم جريح
گطعوا دربه ،، صوبوا گلبه
كلها بالكوفه تصيح

جرحوك ،، جرحوك
بنار اجوك وحاوطوك
عالخيم حرگوا مهجتك ،، ياغريب

*****
مسلم گربك وي حسين،، غايه الهم يبو طاهر
ذبحوك وقصدهم بيك،،جرحوا گلب ليناطر
بيك انشاف ابو اليمه ،، هل بيك اشتفه الغادر
واكثر من مصابك هاذ،، حسين مصابه اشد باجر

باچر حسين الغريب ،، ينذبح ببنه الحبيب
ويم عضيده ،، يلوي جيده
باچر حسين الغريب

والخيام ،، والخيام
الطف شگد الها ضام
تهَوون الها كل محنتك ،، ياغريب

ناوي ليا وطن ،، يا جرح الزمن
عايف ديرتك ،، ياحسين
*****
ودعتني ودمع ،، عينك اعله الگبر
مسافر ويا سفر ،، ياحبيبي انتظر
اعدل ابنيتك ،، بكربله لا تمر
بيها لو خيمت ،، ظهرك الينكسر

دمك كربله ،، ادري تحلله
وتسبي عيلتك ،، ياحسين


*****
بيه لتذكرك ،، وارثت فاطمه
امك ابكربله ،، تقاسمك بالضمه
ومن رقيه مثل ،، عيني تجري الدمه
ومثلي رايح تظل ،، للنعي محزمه

مثلي بالجرح ،، بذبحي تنذبح
بصوتي نادتك ،، ياحسين


*****
رايح ومنزلك ،، لو رحت ينطفي
مغرب لغربتك ،، لكاتبك مو وفي
يحاربك وبحرب ،، يبني ما يكتفي
يسد عليكم نهر ،، وبالضمه يشتفي

مابين الغرب ،، ما تهنه بعذب
تيبس شفتك ،، ياحسين

*****
يبني عندك طفل ،، صياره لمه امل
تحلم اتكبره ،، وهو ينتظره اجل
محنتك عالولد ،،بالمهد لو ذبل
من حضن عمته ،، للمنيه انحمل

وتنادي الحرم ،، عبدالله انفطم
وتبچي لحالتك ،، ياحسين

*****

رايح وبالضعن ،، چم طفل چم مره
وكربله ياحسين ،، ماتعرف امخدره
تحرگ امخيمك ،، لو طحت عالثره
والطفل لو ركض ،، الجمر معبره

واليسحگ جمر ،، للهيمه يفر
ينوح لفرگتك ،، ياحسين

بالحزن على الجره توشح الجمال
منجرح يظل ولا يبتسم محال

هذ الجمال الضامن اسمه
لوحة عطش بالدنيه رسمه
لا منه لا تترجه بسمه
علنها لا وصال

ياشيعه هالنداء ،، من سيد العزاء
نوحو على الحسين ،، لا ينتهي البكاء

هذا الرضا الحنين ،، ما يبتسم حزين
سنينه انگضت جروح ،، برسومه كربلاء

*****
كل ملامح الضعن بالرضا جروح
لونه كله يختلف من يظل ينوح

لون الوداع اكثر علامه
لو اكثر انياح اليتامه
مدري طفل ضحه لخيامه
بشفته ضمه يلوح

زفه وشمعها ذاب ،، صار العرس مصاب
كل هذا والوداع ،، ما مكتفي بشباب

رد للطفل خذا ،، بحر السهم روا
تناغي المن الرباب ،، ما بالمهد جواب

*****

هل محرم الدمع اعلن الحداد
عالمصيبه دمعته للحزن مداد

يذبل هظم ليله اعله ليله
حروف العطش ينبض دليله
من تنذكر عمته العقيله ،،
عليها جرحه زاد

زينب اخت غريب ،، باچر يظل سليب
عين الها عالخيام ،، والشاطي مو قريب

ياحيره بالنهار ،، والخيمه كلها نار
لا رايه لا كفيل ،، بس الدمع مجيب

*****

عينه شافت النده وانحنه عذاب
عمه عنده بالضعن طفله عالمصاب

گطرة نده تذكره بعمرها
طفله ودهرها ماعذرها
فوگ الجمر تركت اثرها وابوها عالتراب

طفله او وراهه خيل ،، غورك جفنها سيل
طشت عمرها آه ،، ماباقي بيها حيل

ينفع صبرهه بيش ،، لو عاينلها جيش
يرجف غصنها خوف ،، غيب ضواهه ليل

*****

للورد اذا همس يحتركله لون
يارقيه هالاسم مأتم الضعون


كون الورد للطفله معبر
مو عالرمل من تمشي تعثر
حال اليتيمه شو تغير
غمض عين الحنون

بالغاضريه نار ،، ما ميزت الزغار
نار وطبعها هاذ من الورد تغار

مأتم ضعن سؤال شيرجع الدلال
بالهيمه طفله هاي تالي السبي قرار

*****

ياخويه جيتك من الثايه
شچايه للنهر شچايه
تلگاني خويه شيل الرايه
ياخدري وهيبته وفيايه

*****
خويه هم تدري الخيم ،، شبت وبيها الحرم
عالجمر نسحگ غصب خلونه
حيره والساحگ جمر ،، كون اقنعه بالصبر
كون اقنعه غابو اليحمونه
هيمه ماتحمي الضعن ،، محنه دلالي امتحن
شلون ضيعه بالفله ضيونه
يگطع انفاسي الركض ،، اعثر وگوه انتهض
وين ماعد الله بر تبعونه

ياخويه بلا علم ظلينه
فرينه من الخيم فرينه
ماعدنه والي ليحامينه
عالهيمه شكد دمع صبينه


*****
خويه وانته اعله النهر ،، حدها ثايتنه انعبر
صحنه ياعباس ياحامينه
طفنه صيوان احترگ،،غالي من غالي افترگ
خوفنه ونيران دارت بينه
حرمه ظاعلها ابن ،، بالخيم بعده تظن
للخيام اندوّره ردينه
خويه چم مره نرد ،، واللهب بالچف نصد
بلا عدد فوگ الجمر مرينه

كل ضايع بالخيم دوريته
ناديته بدمعتي ناديته
صيواني محترگ طبيته
لو تطفه ناره چا طفيته


*****
خيل ومراكض طفل ،، حافر و نار وحبل
شما ألم ايتامي تهجم غاره
كربله ساحت حرب ،، بيها ظلت بس غرب
وانا حرمه بالفله محتاره
رماد هد ويالهوه ،، من الجفن سلب ضوه
ظلمه والحافر ظعن اثاره
آه بس اسمع سمع ،،صوت من كسر الظلع
وصوت لمدلل يطفي بناره

اشكيلك خويه هاي الحاله
خياله هجمت الخياله
كل خايف دمعته تبراله
ماعنده سد يلوذ بجاله


*****
خويه نسوان الضعن ،، ركضن بسدي احتمن
انا خيمتهن صرت يالوالي
من عگب فيّ رايتك ،، هذا حالي بفرگتك
ظل صرت من الشمس لعيالي
حگي اشكي بدمعتي ،،عيله كلها بذمّتي
مايسرك لو تشوف اشحالي
عمري مو عمر التعب ،، بس عليّ هذا انكتب
گبال عيني ينذبح كل غالي

مكتوبه هايه تالي سنيني
توليني كربله توليني
بلا خيمه ذاري ليغطيني
امر الله حال بينك بيني


*****

للنهر يا ابا الفضل ،، جيتك بدمعي اليهل
هاي ماچانت ابد بحسابك
زينبك لمدلله ،، بكل جرح متكفله
والجروح ابگد لهيب اطنابك
هاشميه ويا وكت ،، انه مسبيه صرت
والسباني اليوم چان يهابك
يا مصيبة فرگتك ،، عنه غابت يمنتك
عيله منكوبه صفت بغيابك

مو زينب لا انه المسبيه
مابيه عالسبي مابيه
بدلالي جروح ياراعيه
غيرتني كربله بظهريه

ياجسام ،، يبني
تعب رباي ،، يبني
ربيتك ،، زفيتك ،، عرسك يوم حزني

*****
رمله تهوس لجسام ،، ياثمرة تعب ليام
حسنك ماتوصفه احلام ،، يمورّد زماني

يبني يا شطب ريحان ،، صيتك يخلس الميدان
اشرس واترف الشبان ،، بيك اتعله شاني

ياشبل الاسد حياك ،، جازيت السهر ورباك
يبرالك علي ابممشاك ،، يا ظلي واماني

حده بناظرك والطاف ،، طبع معزب ومضياف
صوره للحسن تنشاف،، نسخه بالمعاني

ماموصوف ،، حسنك
لمعة سيف ،، حسنك
وعدانه ،، حيرانه ،، شافت ويل منك

*****
من يوم الصرت منذور،، لو يوم الزمان يجور
تفزع من يحل عاشور ،، ولعمك تنصره

حزمتك صدگ ولهاي ،، قدمتك يلب احشاي
هد وصَوّت انه الجاي ،، سيفي من يعبره

جاسم ياكحل للعين ،، يا بهجت گلب لحسين
كلشي لجيتك محضرين،، ياس وخيمه خضره

عمتك بس تسولف بيك،،روح رويحتي تسميك
لله توجهت يحميك ،، دربك يبني انطره

عود وشوف ،، عمتك
تفرح بيك ،، عمتك
اي يبني ،، تنشدني ،، يمته تصير جيتك


*****
وي عرسك جهادك صار ،، انزل طالبنه بثار
روح ولعب البتار ،، افعل ما بدالك

طب للحومه طبت حيد ،،واتخير ركاب وصيد
اطحن وانه اگلك عيد ،، فرحني بنزالك

هاي الحنه هاي ورود ،، تنطر ياعطرها تعود
حارب والعرس مريود ،، عودنه بدلالك

طرزت الصواني امال ،،رسمك منتظرته اهلال
عمري ادفع ثمن للگال ،، هلبين خيالك

حوفه وهاي ،، حنه
اعجن كون ،، حنه
يهلالي ،، دلالي ،، ما مگطوع ظنه

*****
عيني اعله الشمع من ذاب،،انشد والدموع جواب
يبني طولت لغياب ،،يمته ترد عليه

يبست حنتك ماجيت ،،عين اعله الدرب خليت
من رف الجفن حسيت ،، صابتك رزيه

عرسك والفرح مادام ،، نوح تحولت لخيام
حلمي البي عشت اعوام ،، سلبته المنيه

بعرسك افرح تمنيت ،، احزن يبني ماظنيت
بيه ياجرح خليت ،، يالرحت من اديه

ما ظنيت ،، ويلي
مني تروح ،، ويلي
من ايدي ،، يوليدي ،، رحت وراح حيلي

*****
يبني لخيمتك جابوك ،، ظلت حسره ماحنوك
يم الحوفه من خلوك،، ذبل كل وردهه

ياجاسم حِلالي النوح،،متحوله الحلاة اجروح
ياام مثلي يامذبوح ،، تنصاب بولدهه

سنين من التعب وياك،،سحگتهن خيول اعداك
دهري عالترب بداك ،، وهروشي مردهه

شلون تصوبت بصواب،،دنيه ومنها حسنك غاب
ياموت السمع لعتاب ،، وايامك يردهه

عالتربان ،، طايح
بين الخيل ،، طايح
وبدمك ،، من امك ،، تعب سنين رايح

*****