جرح فرگاكم كبر
شيروف الحنين ،، من ينزف سهر
عيني عالدرب وانعاكم
علتي ياهلي بفرگاكم
طفله للدمع ،،،، عفتوتي

#####
وحدي ظليت وظعنكم،،چن شمس سلم ضواها
رحتو عفتوني عليله ،، أوعلتي لمتكم دواها
تحفر أدروب اعلخدي،،دمعتي وشوگي حداها
يالظعنتو الغربه گيدي،، روحي فرگاكم سباها

غرب ليلي او وحشتي
بخوف مگيده،،،دموعي سلوتي
شموسي غربت ياويلي
وحدي والسهر هد حيلي
طفله للدمع،،،،، عفتوني
#####

#####
چن رفيف الرايه اسمع،،اباب داري كل مسيه
انسى علتي بشوگ افزع،، ظني رديتو عليه
افتح الباب واشوفن،، صفنه والديره خليه
ثاري خفگت گلبي هايه،، يخاف وكت المغربيه

حلم من اصفن اشوف
عمي رد الي ،،،، والفززني خوف
غابت الشمس عن بابي
ليلي هذا حل بمصابي
طفله للدمع ،،،،، عفتوني

#####
يخلص إمناطر نهاري،،وحسبه تاخذني وتردني
بروحي لمناشد عليكم،، يسلب الحيل ويهدني
ظهري يحنيه انتظاري،، وارتجي الملگه بعدني
ياگلب صبرگ عليه ،، بطارش حسيني وعدني

حنت ظهري وگفتي
عالباب استند ،،،،، طالت صفنتي
تباري وحدتي حسباتي
گلبي جمره من حسراتي
طفله للدمع ،،،،، عفتوني
#####

اختلطت الامي عليه ،،خوفي والعله وحنيني
ياهو منهن التفتله ،، يريد ابو اليمه يجيني
شوگي وآهاتي وغربتي،، شبن النار بسنيني
وزعت روحي لجروحي،، والدمع ناوب ونيني

حسين جروحي نادتك
بويه رد عللي ،،، روحي اشتاگتك
حسيني ياشفه لجروحي
فرگتك سبب كل نوحي
طفله للدمع ،،،،، عفتوني
#####

يهلي اذكر من مشيتو،،والظعن بأول مسيره
بس ردت اطلع انادي،، شلون اظل ابلا عشيره
خطوة المعلوله تگصر،، وزاد فوگ العله حيره
بس مشيتو الهم چتفني،، للنياحه صرت اسيره

عثر جدمي وما وصل
عالعتبه انذبح،،، مني كل امل
صوتي مختنگ بالعبره
يهلي واعثرت چم عثره
طفله للدمع ،،،،عفتوني
#####

لفانه الليل ،، وانه بلاحيل ،،
گطع النفاس ،،، يهلي ،، هجوم الخيل
#####
عقيله انه غريبه،، بگيت ابلا ولي
اخوتي مذبحه ،، بعد ياهو الي
اصيح أبهيمتي
اصيح أبعبرتي
اصيح ابمحنتي ،، ها ياهلي

گطع سباح ،،، كفيلي الراح
الاگي شلون ،، يهلي،، هجوم الخيل

#####
اجمع باليتامه ،، من العسكر افر
علي ضاگ النفس،، بريتي مايمر
طفل بالهيمه تاه
طفل اركض وراه
طفل ناداني آه ،، عمه الجمر

دليلي احتار ،، بخيمنه النار
يضيع اطفال ،، يهلي ،،،، هجوم الخيل

#####
اعت روحي اكابر ،، واصبر بالحرم
تشب بيه الجروح ،، مثل حرگ الخيم
غريبه بكربله
غريبه العايله
غريبه بالفله ،، يهل الشيم

بعد عباس ،، غرب لنفاس
بحرمنه الام ،،،، يهلي ،، هجوم الخيل

######
لفه ليلي وظلامه،، هلي وهذا صعب
اغمض ياجفن ،،، وانه بولية غرب
جفوني ساهرن
جفوني ذبلن
جفوني عالظعن،،، گامت تصب

جفن سهران ،،، على النسوان
ركضت اگبال ،، يهلي ،،، هحوم الخيل

#####
اباري بالضعينه ،، واشد بيدي الجروح
ومن اسمع نعي ،،، اگابلهن وانوح
حرم فگدت ستر
حرم تنعه الخدر
حرم بيها عطر ،،، خيمه يفوح

لهيب اخيام ،،، نعي الايتام
يظل تذكار ،، يهلي ،،، هجوم الخيل
#####

علي ،،، من بعدك ضعت
علي ،،، ريتك لا رحت

علي ماهان ،، عطشان ،، تشكيلي ضماك
تنادي بصوت،، والموت ،، يالاكبر خذاك
*****
يانبض دليلي ،، عافيتي ويحيلي
ياعلي كلشي خذت لمن رحت

حسرتي بطلعتك ،، بالدمع تبعتك
روحي بيدك يالولد هونك صحت

من درت عليه،، هانت الرزيه
چنه توه فجري طر وصبحت

بيدي جيت المك،، ياعلي واشمك
بيني بينك خطوه يبني وفرفحت

تعال ،، رد جوه الظلع
تعال ،، ياشمسي التشع

شهگتك آه ،، ويلاه ،، جيت اركض وراك
تنادي بصوت ،، والموت ،، يالاكبر خذاك
*****
محنتي بغيابك ،، ضايع ومصابك
حتى تيهت الخيم وين الدرب

رايي من فگدته ،، النفس گطعته
عاليشمون الهوا ما انحسب

جدمي هم تحير،،بغيبتك يالاكبر
بكيفه ياخذني الهوا لمن يهب

بدمعتي ذكرته،،، مني الي طلبته
ضامي اجيت وگتلي يابويه العذب

مشيت ،، تاهت خطوتي
مشيت ،، صوتك عثرتي

رسمك صار ،، تذكار ،، متفطره شفاك
تنادي بصوت ،، والموت ،، يالاكبر خذاك
*****
عني انته غايب ،، وهرشه گلبي ذايب
شما تطول اغياب احس عمري گصر

ظني چن وصلته،، ترويت وشربته
مرتوي شفافك ترد تنگط نهر

يمته ترد عليه ،، اصفگ راح اديه
وبكثر ما چفي اصفگنه انحفر

بحسرته تصبر ،، دلالي وتفطر
گلبي من عصراته ينفت چن حجر

عذاب ،، عشته بغيبتك
عذاب ،، گلبي لغربتك

شگول بهاي ،، والماي ،، ماحن ورواك
تنادي بصوت ،، والموت ،، يالاكبر خذاك
*****
تنادي هالسمعتك،، لمصرعك حضرتك
انته لو مو انته شفتك وشلكيت

وليدي هذا انته ،، گلبك من لمسته
عرفتك من اظماك من يمك دنيت

انا حسين اجيتك،، بويه و اعتنيتك
مو جسد بس روح يوليد اجيت

من وصلني صوتك ،، ياعظم بلوتك
شتت الروح ابمصابك مادريت

اجيت ،، روح ابلا جسد
اجيت ،، ميت يالولد

نحتلك نوح ،، والروح ،، جايبهه فداك
تنادي بصوت ،، والموت ،، يالاكبر خذاك
*****
شفتك حركتها ،، روحي املتهه
انحييت واملتني همستك

حاچيتك واتاني ،، يانبع حنانني
وادعي ياريت المنيه فاتتك

حچيلي وانه اسمعك ،، لا لتهله دمعك
لا تغمض وانا يبني بعازتك

لاتنطق وداعك ،، افتح بويه باعك
گوم خلينه نرد لخيمتك

بديك ،، لمني من الترب
بديك ،، تطفيني من اشب

نور العين،، لحسين ،، بالدمعه ارتجاك
تنادي بصوت ،، والموت ،، يالاكبر خذاك
*****
جروحك الي تنزف ،، روحي بيدك اترف
بويه للدمعه عفتني والعذاب

الموت ليش اجالك ،، بهمه واعتنالك
الموت ماگبلك ابد ماخذله شاب

رحت انته من اديه،، بعروگي المنيه
تجري مثل الدم يبويه وعيي غاب

موت بيه ساري،، حسيته احتظاري
توسدت يمك يالاكبر عالتراب

عليك،، گلبي ينعصر
عليك ،، چم مره احتضر

من امشيت ،، ونيت ،، يالمالي سواك
تنادي بصوت ،، والموت ،، يالاكبر خذاك
*****

خيمه ودموع وجفوف ... طاحت بارض الطفوف
.. ...
ياجروح الغاضريه
دمه لون المغربيه
،،،،،،،
كربله بيج المصايب ،،، غيرت لون التراب
خالطت ذراته صارت ،،، تنثر بسوحه الخضاب
كل الم الوانه ترسم ،،، عالارض لوحة عذاب
والدموع تسيل غربه ،،، والسهر ودع شباب

الهوا المر عالجروح ،،نسمته يعللهه نوح
من يهب بكل مسيه
دمه لون المغربيه
،،،،،،،،
ضامي سباح المخيم ،،، ينتضر يرجعله جود
جانت اماله يورد ،،،، لو شهك عطر الزنود
تالي نبلة فركه لاحت ،،،غمضت عين العهود
والنهر ناده الضمايه ،،،، راح عمكم مايعود
رايه ظلت عالنهر
چم طفل گلبه انكسر
وانكسر ياظهر اخيه
دمه لون المغربيه
********
دمعه طاحت عالوطيه ،، من جفن فاگد ولد
بين ادي شو چنه غافي،، وامه تنشد ماگعد
لهفة المرضع لبنها ،، فراگ لحظه وشوگه هد
وليدي رده دمعي مايه،، يرتوي وصدري مهد

ساكت شماله الطفل،، غافي لو صابه النبل
بيده جابه شهالرزيه
دمه لون المغربيه
***********
طشت الفرحه هلاهل، شابگ الياس البخور
والنده البخدود معرس ،چن صبح شعشع ينور
چلمة مهنه ييمه ،، بالخيم ظلت تدور
الفرح بس ليله باچر ، الدمه ايحني النحور

يمه من باچر اخاف ، ينذبح هذا الزفاف
ترحل وحنتك بديه
دمه لون المغربيه
**********
النار من لهمة مخيم ،، مرادها كشف الستر
والشمس عللخيمه وگفت ،،الغايه چنها تنتظر
العفاف اتشوفه رادت،،لحظه تانتها عمر
عطلت غيبتها حتى،،اطوّل ساعات الظهر

ياظهر تطلبها بيش ،، هايه نار وهذا جيش
جرح گلب الهاشميه
دمه لون المغربيه
************

دخيل ام البنين ،، دخيل ام البنين

دخيل،، وگفت ابابچ ادخيل
شلت چفي تواسيل
فدوه ام الگمر هذا الاسم بلساني ترتيل

فاح ،،، اشم عطر الوفه فاح
دليلي بعتبچ طاح
شهگت اسمچ لگيته مخضر بدلالي سباح

انتي تسبيحي ودعائي والذكر
انتي قرآني وحفظ وانتي الستر
بنعمة اسمچ اقره والطم عالصدر
للمحرم انتي سر ليلة قدر

دخيل ام البنين ،، دخيل ام البنين

************
رباي ،،، اريدن بيدچ ارباي
نخيتچ لزمي يمناي
بدرب تربيتچ امشي ماازل علميني ممشاي

تاه ،،، تره الماحشمچ تاه
وبعد ماتنفعه الاه
مثل معلول اظل ابعتبتچ ماحصل ادواه

لولا ترتيبچ فلا اندل درب
عن نظر عينج فلا اريد انحجب
ريح عطفچ روحي تاخذ من تهب
گلبي عد اظلوعه عاشگ ينحسب


دخيل ام البنين ،،، دخيل ام البنين
************
طاف ،،، حنيني بكعبتچ طاف
شدهني الشوگ من شاف
عن الطافچ نشدته محترگ مالاگي اوصاف

روح ،،، حنانچ غرگ الروح
يفيض امنين ماروح
يراويني صور طف ونهر وحسين مذبوح

بعيني خليتي صور ياس وشمع
والمهد هزته مرضع بالدمع
رحمتچ خلتني اصرخ وانفجع
لمن يذكرون كسرات الظلع

دخيل ام البنين ،،، دخيل ام البني
************
خيام ،،، نعيتي مصاب الخيام
يهضمچ حال الايتام
بچيتي والزمن ضنچ اسيره رحتي للشام

سال ،،، كثر ما مدمعچ سال
شريكه صرتي بالحال
يمه حسين صحتي بيوم رحتي لملگه لعيال

انتي يام العزا وام الضعن
بان برسومچ حزن لتغربن
حرگه منچ ردنه عالگوه مشن
بجاهچ انطالب نواسي لنسبن

دخيل ام البنين ،،،، دخيل ام البني

************
ذاب،،، دليلي بندبتچ ذاب
فزعت ابدمعي طلاب
دخيل مروتچ خلي الدمع لعيوني جلباب

كون ،،، دخيلچ ارتجي كون
الي ماتنشف عيون
عبد واتوسلچ ماانسه لحظه يوم الضعون

ريت بس عطر الحزن مولاتي اشم
الناعي لو صاح العطش كون الچم
روحي بحبال المخيم تلظم
كون احس بآهات صراخات اليتم

دخيل ام البنين ،،، دخيل ام البنين
************

بعيونك حنان ،، وچفوفك امان
زينب نادتك ،،، ياسور الخيم

خويه عباس ،، الاطفال ،، گضت مابيهه
شبت النار ،، بالگلوب ،، عطش ياذيهه
يبو فاضل ،،تناديك ،، يعمهه ارويها
هاي نهرين ،، الچفوف ،، يساقي اجريها

بچفوفك عذب ،، ترويهه الشرب
زينب نادتك ،،، ياسور الخيم

*****
بين الاطفال ،، يعباس ،، امان وجودك
عافو الماي ،، يركضون ،، اجو لزنودك
ارتوه وفاض،، نهر هاذ ،، تجاره بزودك
العطش راح ،، والخيام ،، تفيض بجودك

نوماس الخيم ،،، جودك والعلم
زينب نادتك ،، يا سور الخيم

*****
لمسة اورود ،، يوفاي ،، يمينك هايه
العطف صار ،، صواوين،، تدور الثايه
مأمنه بزود ،، العيون ،، ترف الرايه
ظلك السور ،، للضعون ،، كسرة فيايه

بزوده وغيرته ،،، تعلت رايته
زينب نادتك ،،، ياسور الخيم

*****
فرحة اطفال ،، يعباس ،، حنان عيونك
بين الخيام،، هوا أدور ،، نفس يردونك
رحمة حسين ،، ينوماس ،، ترا يسمونك
الضمه يعود ،، يذبلون ،، يخويه بدونك

انفاس الطفل ،، عم يابه الفضل
زينب نادتك ،،، ياسور الخيم

*****

انته موجود ،، الچفوف ،، نهر رواهه
تنسه الهموم ،، ولا طيف ،، ضمه يدناهه
لمة انجوم،، يعيناك ،، گمر ضواهه
بسمه منك ،، يعباس ،، تسر محياهه

عيناك الگمر ،، والطافك نهر
زينب نادتك،،، ياسور الخيم
*****

عليله وياجفن عالليل انخاك
شكثر رايد نعي ما قصر وياك
تراهه الوحشه تذبحني بلياك
بدمعك للفجر وصلني لو طر
*****
يجفني الوحشه عدهه احبال من خوف
على الدار الخليه اتحوم واطوف
اذا سيلك گطع ماغرگ الشوف
تاسرني ودليلي ابتوتته تنجر
*****
هاي الوحشه عدهه وياي نيشان
تهد سكته وتطگ بالبيت بيبان
اخاف ومنها تتغيرلي الوان
طفله وخوفي منها برسمي اثر
*****
يجفني ادمع لحد مااهلي يلفون
اجازيك بفرح ترخيك العيون
بعدها ماافكلك باب الجفون
ولا اخليك بين ارموشي تعثر
*****

ابو فاضل ،، ابو فاضل

يالماخذ كل حيلي يحزام الظهر
فراگك بده سنيني وي جاري النهر
تعنيتك واجدامي ينگلهه القهر
جيت ابهم إليالي فارگه الگمر


اخوي وجيشي انته وحامل الوانه
عگب حيلك اظل أبغير عوانه
وحيد وهاي هيمه شلون بغيابك
يصوب دهري سهمه وانه نيشانه

ابو فاضل ، ابو فاضل
*****

جيتك دمعة عازه من عين الخيم
وحچايت چا وينك تتحسر حرم
ياريت كون او هلبت الفظهه بألم
احچيهه واتلفت ما شفت العلم

يبو فاضل خيمنه تريد راعيهه
عفت سكنه وتريدك ماي ترويهه
علمنه الشلته بيدك مايرف وينه
اصوت خويه وينك روحي دليهه

*****
جيتك شفت الرايه يم راسك ترف
حنت والچفينك ليحن يرتجف
جودك طايح يمك وصوابه كلف
الماي روحه وطلعت ردت للجرف


خذت كل حيلي خويه طيحتك هايه
تخوصرت ابمشيتي مالي تچايه
وصلتك وشلگيتك يالگمر طايح
لگيت الجود يبچي والدمع مايه


*****
من عفتك لخيامك رديت انتحب
امشي وروحي بوادي وبوادي الگلب
مالتني بغيابك چلمات الغرب
شحچي خلافك وانه بالدمعه انغلب


اريد اوصل خيمنه منين دليني
عينك غمضتهه وانطفت عيني
الهوا يعثر مشيتي والدرب حيره
يچلمات الشماته أبگلبي تچويني


*****
طبيت الصيوانك شايل غربتي
اتلفت وأعيوني تهمل حيرتي
عامود هاي الخيمه شبگت يمنتي
صيوانك هدمته بعبرة نحبتي

نحبت بعالي صوتي خويه وحزامي
لحد ماگلبي احسه طاح گدامي
تركتك عالشريعه وجيت ياخويه
الك مو للشرب دلالي ظل ضامي



*****

هونك علي ياليل ارحم
جروح بظلامك كلهه تلتم
راحو هلي ،، محد الي ،، ياليل ارحم
*****
راعيه ،، صح مارجع هالبيت راعيه
حنيه ،، منك ردت ياليل حنيه
مر بيه ،، بس مو رعب واسيني مر بيه
ليليه ،، اتلوه من الخوف ليليه

بجروحي لاگيلك عذر
مرعوبه والوحشه اسر
انته اتعرف ،، جفني ترف ،، ياليلي ارحم
****
تسبيني ،، لمن تحل ياليل تسبيني
من عيني ،، تاخذ اماني ليش من عيني
تحديني ،، تفززني دمعة خوف تحديني
يحميني ،، راح الي منك چان يحميني

ياليل ابد ماتنجرع
اغفه ويفززني الدمع
حبلك سهر ،، يسبي نظر،، ياليلي ارحم

*****
ياليلي ،، انه العليله تدري ياليلي
هد حيلي ،، فراگ الاهل عذبني هدحيلي
تبچيلي ،، كونك ستر ياليل تبچيلي
ياويلي ،، من عيني ماخذ دمعي ياويلي

يمگطع ابتوت الگلب
تتسلى بدموعي التصب

دمعي يهل ،، لمن تحل ،، ياليلي ارحم

*****
الواني ،، وحشة صفنتك غيرت الواني
احزاني ،، هيج ظلامك بيه احزاني
چواني ،، نجمك جمر ياليلي چواني
خلاني ،، اصرخ واصيحن آه خلاني

هيمه السمه وجمرك نجم
يچوي النواظر مو جدم
لمعة حزن ،، تچوي الجفن ،، ياليل ارحم

*****
صفناتي ،، تلتم جروح ابهاي صفناتي
آهاتي ،، طفله وعليله كثرت آهاتي
حسباتي ،، تاخذني للطف ويلي حسباتي
عماتي ،، بالهيمه ذيچ اشحال عماتي

اتفكر ابحال المشن
ذيچ الليالي هم غفن
بيهن الم ،، حرگ الخيم ،، ياليل ارحم
*****

جسام يبني ،،، هذا عرسك يومه
جسام يبني ،،، اگلب الملزومه
*****

گوم ييني وهسه حانت ساعتك
بالدرع والطاس تحله زفتك
روح ياجسام اگلب حومتك
مثل مابچفوفي اعجن حنتك

اعجن ارواح ،،، من تطب الحومه
جسام يبني ،،،، اگلب الملزومه
*****
اليوم اريدك مجتبى بساحة حرب
من تطب ميدان تگلبهه گلب
خل صفوف الجيش تتماوج رعب
خلي سيفك موت عالعسكر يهب

عيد امجاد ،، والدك وعلومه
جسام يبني ،، اگلب الملزومه
*****
والثلث تنعام منك هاشمي
أتغير وتنادي المنايه تحزمي
جيوش من برگة حسامك تنعمي
بطاري ملك الموت منك تحتمي

بيدك الموت ،، يبني يرخص سومه
جسام يبني ،، اگلب الملزومه
*****
حومتك خلهه قيامه والنشر
روح خلهه بروح يبني تنحشر
جنه ماكو لا ذنوب التغتفر
والسراط السيف لا ماينعبر

طبرة السيف ،، بالگصص موشومه
جسام يبني ،،، اگلب الملزومه
*****

سوايه سوي اليوم ماالهه وصف
موت اجري والجثث خلهه جرف
گوم واگصد ياهو ينعد بألف
گطعه يبني انصاف ماريده نصف

وال يلاگيك ،، بعرگه يبس ادمومه
جسام يبني ،،،، اكلب الملزومه
*****

سهر ليلي ،، اخذ حيلي
انه زينب باليسر اكفل ضعينه
الهزيله ديره ديره تحدي بينه
*****
يوم نادو عالفواطم للرحيل
تكفلة بضعوني بس مالي كفيل
من التعب هب الهوا بيه يميل
حتى ماالحگ اكف دمعي اليسيل

اصيرن لازم للخدر حجاب
انوحن كون وي الفگدت شباب

على الهزل ،، الي مقتل
مصاب اقره ،، على الاسره
حرم هايه،، بلا رايه .....

انه الوني ،، تكفلني
دليلي لكافله يشتد حنينه
الهزيله ديره ديره تحدي بينه
*****
عيني عالايتام من تحدي الهزل
كون اصبره الماحمل شد الحبل
انه عمه لو دروا عيني تهل
شلون يقنع بالصبر گلب الطفل

كون ماگدام اطفالي الوع
كون ابچي وكون ماتنزل دموع

اهل نوحي ،، دمع روحي
اباريهم ،، اواسيهم
الم دربي ،، يفت گلبي ......

الطفل ظلعه ،، مثل شمعه
ذايب بحر الفله گد ما مشينه
الهزيله ديره ديره تحدي بينه
*****
من دلال اخيامنه بهيمه نبات
والليالي تمر نحيب وذكريات
الليل نگضي بالخرابه مگبعات
نلوذ وحده بوحده لو حادينه فات

من بعد عين الهواشم والخيام
علفواطم عيني ما تغفه وتنام

اظل اسهر ،،ليالي اقهر
مثل جمره ،، يمر ذكره
جرح ماطاب ،، دلالي الغاب

الگلب ضامي ،، على اخيامي
بخرايب من سكنه ماغفينه
الهزيله ديره ديره تحدي بينه
*****
اكضي ليلي ابين ايتامي اطوف
متون اضمد لو افك حبل الچفوف
عله صوت الاه اگصده ومااشوف
وانه بيه اجروح بس ياهو اليروف

بالظلام وكون اضمد بالجروح
واليتيم اندله من اسمعله نوح

اليصب دمه ،، صرخ عمه
وانه اتحير ،، اظل افتر
شكبر بلواي ،، يتامه هواي

شصير انه ،، ويتامنه
من يجن الليل تنحب من سبينه
والهزيله ديره ديره تحدي بينه
*****
يمته يتشافه الجرح طر الفجر
يعني گيد وممشه بالهيمه واسر
وي جرح لگلوب مايرهم صبر
شلون صبره وهو نبضاته جمر

والرمال التخدش اجدام الزغار
الليل كله من الالم مشتعله نار

جدم ينزف ،، طفل يرجف
طلع صبحه ،، نزف جرحه
يشل ايده ،، خبر گيده

يهل دمعه ،، بألم ظلعه
عالجرح شدو حبل اسره بأدينه
والهزيله ديره ديره تحدي بينه
*****

صفيه ويا دمع مدفون ،، يجرح المحد ايذكره
يلچمه التحترگ اهات،،يشوغة خيمه من جمره
يحسره من السبايه وآخ،مشن حسره بثرحسره
فرض يوميه چفچ هاذ،،يسلم للحبل امره

*****
تيتمتي يبنت حسين ،،صعدتي عالهزل گوه
عطشتي للدلال الراح،،اسيره وللزجر سطوه
نياشينچ ظهر عاشور،،بلمخيم الچ اسوه
غريبه استوحدتچ نار،،حملتي بلوه من بلوه

*****
صفيه وماصفالچ حال،،يدمعه من العمر اكبر
على رمشچ بقايا رماد،على سمعچ دوي العسكر
للغربه گطعتي دروب ،، مصايب وشبقه مامر
تاليها اندفنتي وراح ،، للشام الضعن سدر

*****
ماشيتي الرمح ايام،،انشدچ هم شكيتي الحال
لوعن الجروح البيچ،،يشغلچ دم الرمح السال
عثرات الهزيله هواي،،ومضيگه النفس لحبال
يوميه لخرابه يروح ،،ضعنچ صاير بترحال

*****
ظليمه ومايذكرچ صوت،،ولا مر طاري بقرايه
وانتي عمچ العباس ،، الگبع خدرچ برايه
وينه الي بحضرتچ صاح،،بدمعه وردد حچايه
يعطشانه انتظرتي الجود،،والعاشر منع مايه

*****

ناگتي ،، تنعه بالدرب دلالي
محني شافته خيالي
تحن لو صحت يوالي

عثرتهه بدمعتي ،، تجرحهه غربتي
*
تحديني دمعتي وناگتي حنت عليه
محنيه عليهه من ثگل حبلي البديه
مالت من كثر ما انعه ضيم الغاضريه
ناخت من درت ياهي العليهه ياسبيه

ناخت تحدي مابيهه
لاعت من بواچيهه
من عرفت انه زينب
تالي انسبي اعليهه

محنتي ،، هلي عالترب عفتهم
ضمه والشمس چوتهم
نومه بالدمه شفتهم

سلتني حسرتي ،، تجرحهه غربتي

*

تاخذني عبرتي والهزيله تنعه وياي
طريت البراري والشمس هم زادت اضماي
اتذكر دلالي من اصد لعدانه حداي
صوت الناگه يعله لوعلة نحباتي وابچاي

هيمه وغربه يحدوني
بلا هودج يمشوني
صوت الناگه يتعاله
حتى ما يسمعوني

عبرتي ،،، بيهه تللچم جروحي
تالي ابچي ها يروحي
هزله تنعى ويه نوحي

تتعاله نحبتي ،، تجرحهه غربتي

*
صح هزله لچنه بالحدي ممشاهه بحساس
تعرفني عقيله بالغصب مشتني هالناس
ماترضه اشم الذاري وانه انفاسي عباس
تبعد من تحس گرب علينه حامل الراس

تحس بلوعته وهضمه
گلبي وراس ابو اليمه
لا ترضه يصد ليه
ولا اشوفه يصب دمه

مهجتي ،،، ظلعي بالقهر عصرهه
روحي يلتهب جمرهه
ياهو كسرتي جبرهه

ما تتشافه علتي ،، تجرحهه غربتي

*
تعرفني انه المچتوفه انه چنت اميره
دولبني زماني من دلالي صرت اسيره
تتعثر غدت من عرفت المحنه چبيره
من اشهگ تحس هالشهگه انفاسي الاخيره

تلوع امن اذكر حسيني
عثرتهه بدمع عيني
ناگه وتدري ممشاهه
ضيع بالفله اسنيني

لوعتي ،، بيه مارحم زماني
شمعه بلهضم طفاني
ويلي للغرب خذاني

والعاشت محنتي ،، تجرحهه غربتي
*
ماطاعت سياط الحادي وشگد حملت الام
ماتسرع تريد اطول اكثر هاي الايام
تعرف چنهه تاليهه اليه دهري اشضام
لمن بالدرب حسته گرب طبت الشام

تحدي الناگه مالومه
تحس ابگلبي وهمومه
كل ما انده الوالي
عالشام الگرب يومه


ضيعتي ،، امشي والحبل بديه
مو اميره خارجيه
والله منيتي المنيه

والصار بسفرتي ،،، تجرحهه غربتي
*

بيه شيرده الزمان
وألزم اچفوف الحنان
توذرت لابن امي شوگ،، بالدمع جفني استعان

صارت وصدگ ،، عنك افترگ
بشوگي احترگ ،، ياحسين

شلون أرق اسم ،، اذكره الچم
حيلي ينهدم ،، ياحسين

خويه ياقصة جروحي
لبسمتك مشتاگه روحي
اغفه ليليه اعله نوحي

*

ضايعه بين الي فات
نبضي عايش ذكريات
شينسه گلبي ياحسين ،، وانته الي كل الحياة

روحي نادتك ،، محلى عشرتك
نبضي صورتك ،، ياحسين

من چنت تمر،، بيه ابتشر
يورد العمر ،، ياحسين

تورد اسنيني من اشوفك
خويه بالحنيه اطوفك
حسيني يااعذب حروفك

*

گلبي ماحاسبها هاي
امشي وانته تظل وراي
اگضي عمري بلا حسين ،، لاحياة ابلا هواي

ما چنت أظن ،، يوم الك اون
بهجرك امتحن ،، ياحسين

گلبي وانمرد ،، حسيني وانفگد
شرتجي بعد ،، ياحسين

حسيني غاية امنياتي
يحلى من دونك مماتي
معنى مابيها حياتي

*

اهمس بأسمك واريد
صوتك اسمع حتى اهيد
نادي بسمي خويه گول،، انا يمچ مو بعيد

باقي هالعمر ،،صوتك انتظر
بالسمع يمر ،، ياحسين

لشوفتك أهم ،، اصفن ابحلم
ريحتك اشم ،، ياحسين

يل رحت وبلايه رجعه
احلم بصوتك اسمعه
يكضي حلمي دمعه دمعه

*

گلبي يابو سكينه ذاب
روحي مجروحه بغياب
شما يمر لون الغروب ،، چني اشوفك عالتراب

ميته من وكت ،، انته بي طحت
اختك أونحت ،، ياحسين

واگفه اعله تل ،، گاطعه الامل
ما ألي اهل ،، ياحسين

صورتك فوگ الوطيه
تمر علي مرت منيه
وارجع اشبچ عشر اديه

يبني يجسام ،، ياام مثل وني تون
يبني يجسام ،، ما لاگ الي غير الحزن

*

تانيتك ،، آ يالولد تانيتك
ما طاحت ايدي من الدعه ،، ياجاسم وناجيتك
يا غالي ،، تدري شكو بدلالي
من ساعة العني رحت ،، دمعي كفيل ابحالي

يوم الرحت من الخيام
يارب گلت رده بسلام
گلبي يرف مثل الحمام
بسم الربه ناديتك

كافي ما ظل صبر ،، لعتبي هذا عذر
يبني چا ماگلت ،، عندي ام تنتظر

لا يجاسم صحت ،، وشكثر فرفحت
مدري شحجي بعد ،، يلي مني رحت

*

بغيابك ،، تدري شصرت بغيابك
دمعه انچفيت اعله الشمع،، آه احترگ بطنابك
ياروحي ،، متوزعه بين اجروحي
ياجاسم وشوف الورد ،، ذابل عليك بنوحي

حتى الورد هم بي حنين
ذابل على صوت الانين
ياكل تعب ذيج السنين
ارحمني بس بجوابك

يبني تدريني ام ،، گلبي الك ينلچم
ألمن انه اتعبت ،،تالي هيچ انحرم

بعيني طولك حله ،، منين اجت كربله
ياهو گلها بحزن ،، عرسك اتبدله

*
لجدامك ،، من تمشي اصد لجدامك
گد مااخاف امن الهوا ،،لو هب تميل احلامك
تاليها ،، اتحسر لماضيها
ذيچه الليالي يالولد ،، يلرمشك محليها

لساحة حرب تمشي واشوف
صوت استمع ضرب السيوف
يالوحَدّك مابين الوف
ريت وطحت چدامك

ضامي تدخل حرب ،، گطعتلي الگلب
وشفتك ياغلاي ،، يبست امن الترب

ياجرح بالنظر ،، ماضي صار السهر
مو هوا هايه خيل ،، يعني مشيك خطر

*
شمعاتك ،، يبني گبل شمعاتك
راح وضوه عيوني انطفه،،من افگدت نظراتك
راويني ،، ضيك يبعد اسنين
بس ارجع وكلشي يرد ،، ترضه الدمع يحنيني

ظهري انحنه نار الصبر
ضاع التعب راح العمر
ذاب الجفن دمعي جمر
يايمه عرسك فاتك

بعيني ماظل ضوه ،، گلبي موگد دوه
تلمست حنتك ،، چفي بيها انچوه

شوفي ما بي نفع ،، باقي بس للدمع
شما عليه بطيت ،، حيل ادگ عالظلع

مرت ابطيفي رقيه
وانا اعاين بيها واسأل
شغيراها ،،
بكل جواب ايمر ضماها
وكل ملامحها تسولف
عن خرابه وعن هزيله
عن مخيم ،،
ركضت او ناره وراها
ودمعه طاحت منها گالت
يم گمرنه،،
مو رقيه انه اليتيمه
مو رقيه انه الغريبه ..
جيت اوصيچ ابوصيه
زينب امن الشام ردت
وعنها بعدتني المنيه

يم گمرنه ،،
تلگي زينب
محد الها،،،،
بالمدينه انتي اهلها
تلگي زينب ،،
رايح اتعرفين زينب
تنعى بالملگه الكفلها
عنها راح اوصفلچ اكثر
هيه زينب ،، لكن ابمشيتها تعثر
هيه زينب ،، بس دمعها بيها اثر
هيه زينب ،، بيها طفنه كلشي غير
تلگي زينب ،،
من مزار اخوتها ردت
وهايه محنتها الچبيره
مابقى لتشكيله همها
لو تگله چنت اسيره
تلگي زينب ،،
بعطرچ اتشم عطر اخوها
وهلبت اتغمض جفنها
يم گمرنه ،،
عيون زينب هيه حراس لضعنها
دنيه صارت كلها غربه
وانتي بس انتي وطنها

ياحسين  شماله الگلب
ياحسين   مضيع الدرب
ياحسين   فراگك غرب
جنت اظنه دربك سهل
بكل برودي رايد وصل
وانه اقره صعدن هزل  ،،،ياحسين

نفسي تمشي بمشتهاهه
وانه اعمى امشي وراها
بغيرك اسنيني متاها   ،،، ياحسين
شمسك الضوة سماها
ماكو اوضح من ضواها
ونفسي محجوبه بغواها،،،    ياحسين

ندمان   هالمرة اجيتك سيدي ورايد تنجيني
ندمان   اقبلني واغفرلي ذنوبي البينك وبيني
ندمان   وامحلفك بدمعة عليلة اتصيح تانيني

*****

ياحسين   شعندي عذر  
ياحسين بيا درب امر
ياحسين اتبده العمر
بس ندم اتفايض اجيت
معاهد ابحزني وماوفيت
لكن انته الرحمه وعفيت ،،، ياحسين

عفوك المحد يوصفه
روحي سباحه اعلجرفه
بين امانك اصحه واغفه ،،، ياحسين
وكحه آ ياعيني صلفه
ماعمت لحسيني وسفه
تبچي بس مابيها لهفه ،،، ياحسين

لهفان ،، خليني بس لمصيبتك ماغيرك اليسوه
لهفان ،، كون منذكرك چن جمر ساحگلي واچوه
لهفان ،، مو أدعيها لا صدك بس انته كون اهوه

*****

ياحسين وچانت حلم
ياحسين ترابك اشم
ياحسين منيتي اللطم
حلمي حققته برحمتك
وادخلت خيمة رحمتك
طهرت ريتي نسمتك ،،، ياحسين

كون اظل بهذا لحالي
بس جنح گلبي يغالي
شبيه جافيته دلالي ،،، ياحسين
لوم اكضيها الليالي
والدمع حبلي لوصالي
ياهو غيرك ليه والي ،،، ياحسين

خسران ،، كل لحظه مرت ماذكرتك نادم وتايب
خسران،،اجرحني بيك بغربتك خليني الك ذايب
خسران،،ماريده بظلوعي الگلب لو عاللطم طايب

*****

ياحسين شگد ابتعد
ياحسين خاضع ارد
ياحسين ارحم عبد
مجلسك يحسين الدَليل
الجرح بي طب العليل
لعتذاري دموعي سبيل ،،، ياحسين

ياحسين وصرخه هايه
شوغه بيها للضمايه
هنا يصح معنى الهِدايه ،،، ياحسين
حاجه مابيها النوايه
تزيد بس بجفني مايه
وابچي للراحن سبايه ،،، ياحسين

عطشان،،بس للبواچي بلا دمع صار العمر ذله
عطشان،،وبمجلسك آه الجرح لداوي كل عله
عطشان،،صار اسمك وجرح الضمه كلش صعب شله

زينب امانه بشاربك أكفل خدرها الغالي
يابو فاضل
تربيتي وانه مدربك زودك فخر دلالي
يابو فاضل
يوم الرحيل الكربله ،، لاتنسى هاي مدلله

*****
هالليله ليلة نوح ،، راس الولي مجروح
حيدر غده بياحال ،، بلونه المنيه تلوح

وين الگمر نادا ،، حط يمنته بيمنا
طاحت دمعته وداع ،، عالبگلب وصا

كض ايد ابو فاضل علي طالت اله نظراته
ويا حسرته
بزينب يبويه اوصيتي يحچي وجرن دمعاته
ويا حسرته
وصى ودمعته سايله ،، لاتنسى هاي مدلله

*****
گبل المنيه وكون ،، ردتك يسبع الكون
زينب اذا بحماك ،، مرتاح اغمض عيون

اكفل خدرها وهاك ،، لواي الي صار لواك
رباي واعرفك زين ،، يمنت بخت يمناك

انه ادري يبني تحزمت من ساعة الوصيتك
بالوصيه
تربيتي بيك اتشيمت كافل خدر سميتك
بالوصيه
يلبيدك ألوانه عله ،، لاتنسى هاي مدلله

*****

بم الخدر اوصيك ،، يوم الذي تماشيك
طولك اكسره فياي ،،وخلها اتنومس بيك

وين انته ماموجود ،، الهيبه طشها احدود
للطف لون تمشون ،، هودجها نصبه زنود

ناكتها حفها بهيبتك وبنظرتك حاميها
بالكفاله
نومسها لعب رايتك نبض بنبض ماشيها
بالكفاله
بويه وضعنها اتكفله ،، لاتنسى هاي مدلله

*****

امنتك اعله اخيام ،، وادري انته رفعت هام
لختك رموشك سور ،، وبين الجفون اتنام

ليليه تزهي اهلال ،،جودك فرات او سال
عطشانه ياعباس ،، هالچلمه ماتنگال

ماتعطش وانته نهر لاحاشه ياواليها
بزوده طافح
عيناها ماتعرف سهر وعيونك اتحاميها
بزوده طافح
الماي لخيمها توصله ،، لاتنسى هاي مدلله

*****
وصى الگمر واندار ،، لزينب علي الكرار
كافل الچ خليت ،، لمثله شَبه ماصار

چفها وي چف عباس ،، شمهن و اخذ انفاس
گلها اعله خدرچ هاي ،، چفوف الوفه حراس

مامثله هالكافل اسد ما عالخدر يتواره
طبعه نشمي
هالميزه بي من المهد تحرسچ طبعها انظاره
طبعه نشمي
شم چفه گام يقبله ،، لاتنسى هاي مدلله

ما چذب واگول ،، ذابحني العشگ
بس رايد انول ،، لحظه واحترگ
وعن ابن البتول ،، ماريد افترگ

احچي الاحسه بيه ،، الواضح عليه
ما ادعي الما نلت
ليش ادعيها عاشگ ،، بالدنيا غارگ
هايم چذب لو گلت
دمعي لمصابه يجري ،، وحسيني يدري
بدموعي ما مَثلت
اجرحني دوم اگله ،، والدمع اهله
بضعف الطلبته وگلت

*****

الحب بالكلام ،، ينگال وسهل
شعرف بالهَيام ،، وعايش جوَ ظل
تمر مر الكرام ،، بلساني الهزل

الماتت عشگ سبيه ،، دمعة رقيه
بكل خطوه هم تنغرس
بس الرباب اعدها ،، وافة وعدها
عاشت سگفها الشمس
شلون اليحب يجافي ،، يتهنه غافي
وتابع هوا والنفس
كلمة احب گلتها ،، حاشه اوصلتها
مفروض اهيم من احس

*****
غاية كل بچاي ،، اسعد فاطمه
الگالت هوَ ماي ،، شح وابني ضمه
بسمه يظل نداي ،، لحزني محزمه

خادم ردت لبنها ،، ريت وعسنها
تقبلني من الخدم
مجلسها من احضره ،، السواد اكثره
بعين الگلبها انهظم
ادعي يظل وصالي ،، وكل انشغالي
ماانسى حرگ الخيم
ياروحي اوصي روحي ،، ويالزهره نوحي
من الماي ابنها انحرم

*****

لحظات انكسار ،، بيه لمحنتك
العاشر ظهره نار ،، يحرگ شفتك
عيله بلايه دار ،، بعازة فزعتك

ياسيدي انكساري ،، بذكر الظهاري
بذكر العطش والحبل
من حيرة الغريبه ،، ياهلمصيبه
لو تله لو عالهزل
ما ينوصف المهها ،، بحرگت خيمها
شگد تدعي كونك عدل
تنادي ويرد سكوتك ،، ولدك واخوتك
فَرگها عنهم چتل

*****

تنشاف الجروح ،، موبس تنحچي
شوف وتلگه روح ،، لذتها البچي
ومن گد ماينوح ،، يطيح وينتجي

تلگه بدمعته واضح ،، ليليه نايح
بي تلگه معنى القرب
الاقرب على المصيبه ،، روحه غريبه
غير الدمع مايحب
تشوف العلامه لونه ،، بكلمة سبونه
من هضمته ينسلب
والمنجرح عذابه ،، صفنت خرابه
مشيت اسيره بغرب

*****

حنين كوثر من حنين
عزاء دمع ام البنين
أنخه الوفيه وشوف
تبچي بچي الملهوف

*****

من صوت الجرح حزن الحزن كبر
عيون ام الگمر للتعزيه كوثر
حاشه لينخه اسمها جفونه تتعذر
وماتبرد دمعته المنها يتشكر

انخاها وتزود حزن
نخوتها مفتاح الجفن
حاشه تردك لاتظن

شكور بروحي الها شكور
اضيع لو ما چفها سور
رتل اسمها وطوف
تبچي بچي الملهوف

*****
تتحنن عليه وتلطف ابنظره
حيل اتخلي بيه للجرح اقره
اشوف حسين بيها الوانه متغيره
بين اخيامه والشاطي لزم ظهره

تبده الامان اعله النهر
صاح الاخو ظهري انكسر
ظلت خيامه ابلا گمر

خيام زينب للخيام
تصيح بعدچ دربي شام
تالي الطفل مچتوف
يبچي بچي الملهوف

*****

من عاشر محرم ميته احس بيها
شلون اتشم هواها وراح غاليها
بزينب حسِبَت ياهي لتلاگيها
يوم البي ترد واحبال بيديها

ظلت تناطر عالدرب
زينب ترد من الغرب
ميته ودمع عالخد يصب

حياة ماظلت حياة
حسين كل حي بعده مات
شافت اثر لچفوف
تبچي بچي الملهوف

*****
مو وي الضعن بس تگضي ليلتها
تنعى لزينب لتبچي بخرابتها
زينب بالسبي تلوللي ليتيمتها
وأم الاربعه أتصبر عليلتها

ليل المدينه وغربته
من الخرايب وحشته
تنعى الفواطم سهرته

تنوح ايتام التنوح
تلوج من نفس الجروح
جروح ابجروح تروف
تبچي بچي الملهوف

*****

بس هالصوره تخطر ويه ذكراها
ترسم عالترابه أگبور لرباها
لبدور الهواشم تنطي مگفاها
ويم الاغلى منهم يثگل ابچاها

يوميه ترسم هالرسم
وبكل گبر تكتب اسم
للغالي اكثر تلچم

تذوب من ونها تذوب
عذاب عدها بكل غروب
غروب الدمع موصوف
تبچي بچي الملهوف

بابا راح اموت ،، وانته مااجيت
گتلي بالخيام ،، مودعه و مشيت
عالهزل وراك ،، بدمعي ناشديت
تحملت عذاب ،، بالسبي رضيت

چان بخيمنه اسمي رقيه
وچان الدلال امخيم عليه
لمن گلتلي بالشام اشوفچ
يا بابا اجيتك واسمي السبيه

*****

برسومي جروح ،، بروحي الانتظار
ديره ديره اطوف ،، شوگ البيه سار
بابا شگد مشيت ،، بصحره تذري نار
يمته الملگه وين ،، هم يجمعنه دار

توليني ديره وتذبحني ديره
دربي المشيته جروحه چبيره
خافن گبل لا يجمعنه ملگه
بالهيمه تگضي سنيني الگصيره

*****

شما أعثر اگول ،، ياجدمي شبلاك
عديت الركاض ،، والجمر الچواك
كابر عالجروح ،، واسعدني بخطاك
ليّعثّرك كلام ،، شمات الحداك

متلهفه تدري لشوفة ولينه
كل عثره يجرح گلبي حنينه
ياجدمي تسرع بالممشه اريدك
موعوده اشوفه بأخر سبينه

*****

من شفت الحمام ،، متعلي بسما
من الهزله ارتجيت ،، يحملني هوا
گلبي صوابه موت ،، كلشي ماشفى
ملگه وحضن اديك ،، يابابا دوا

كل طير احسده وانزف اماني
واتمنه جنحه لحضنك خذاني
انسه وتشيل اچفوفي امنياتي
ويلچم ادي گيدي الچتفاني

*****

طفله ومادريت ،، والها تلهفت
تاليها شلگيت ،، بالشام او شفت
حلم الملگه ضاع ،، وانا ويا ضعت
راسك ياحسين ،، جابولي بطشت

كل حلمي ضاع بشام المصيبه
تفارگني والگه اخدودك تريبه
من جرحي اكبر جرحك لگيته
انته الغريب وانه الغريبه

*****