زينب هاي والبدار نعش امها
طفله والدهر بالدمعه حزمها
بس النوح والياويل وآآآلمها
لچمه شلون آ يالباب لاچمها

زينب ماتت امها من يلاجيها
*****
يمه تصيح يم حسين حاچيني
رحتي وياچ كون وياچ خذتيني
مو دمعات روحي تسيل من عيني
يمه ليا قهر يا ضيم عفتيني

سواد عيون زينب سال بيديها
*****
شذكر لو ردت أتذكرچ يمه
غير الباب تعرض صورته ورسمه
يم البيت موحش بيتچ وظلمه
گلبي الآه صارت حصته وسهمه

لطمها شلون زينب حيل مابيها
*****
نعشچ ماتشيع ليش يالزهره
يتيمه دموعي بالتوديع والعبره
أعدد وحدي يم جنازتچ واقره
وأشوغ بشوغتچ أتذكر العصره

زينب ياهي عدها وتنشد أشبيها
*****
أومي بأيدي ماظل صوت للصايح
نعشچ يمه ابوي الماخذه ورايح
موجدمه الاثر گلبه الاثر طايح
حيدر ما عهدته هاكثر نايح

لبوها تومي زينب امي رد بيها
*****

: احيي الليله المصاب ،، وحدي بغير اخوتي
ابچي بس مالگيت ،، چف يمسح دمعتي
يايمه الذكريات ،، جابتهن ليلتي
بابچ نار وخيام ،، والطف وغربتي

ايامچ وانه وحيده
يايمه ونوحي أزيده
وامسح دمعاتي بديه
ذكراچ لوحدي اعيده

محد يمي يواسيني
وينشف دمعة عيني
والوصيتيهم بيه
هم ذكراهم ياذيني

*
چنت اهمس بالجروح،، واولادچ تنجمع
نلتم نصرخ يباب ،، آهن آه الظلع
حسين يگابلني چان ،، انعاچ ويستمع
هليله وحدي انوح ،، ينزل غربه الدمع

يايمه ومحد اليه
كافي يگلي بحنيه
يازهره ومثلچ حالي
عبراتي بسكته جريه

سنين البيهه ألتمينه
راحت صارت ماضينه
ماظل واحد يبرالي
وايصبر گلبي حنينه

*
ليصبر گلبي چان ،، عباس بنظرته
وحسين يحضنه حيل،، من يسمع نحبته
هاي اول ذكره هاي،، للباب ودفعته
مرت دون الكفيل ،، ياگلبي وكسرته

جروحچ اقراها واخوتي
تشاركني بهايه بلوتي
هسه اندار وما ألگه
كلمه تسببلي سكوتي

هاي انه وهاي الحاله
انعى لگلبي واقراله
عتبه وخيمه المحترگه
صارن ساحة خياله


*
ماظني العشره يوم ،، انخه وتعذرت
اتلفت ليش اشوف ،، لمتنه اطشرت
فرق الآه امن اصيح،، وشگد اتغيرت
چانت مابيها خيل،، وظلوع اتكسرت

عشرتنه الظلت ذكره
واسنين اتحولت عبره
رحتي وضاعت يايمه
احلامي بذيچ العصره

چانت بس آه بروحي
صارت من گد اجروحي
گلبي المحد ظل يمه
ويأمنه بساعة نوحي

أتخيل الصبر ،، كالقابض الجمر
شتخيل بهاي ،، من أذكر الماي
ياحاله حالته ،، عالغبره نومته
تجاره عيناي ،، من اذكر الماي

شتخيله شلون الوصف
طايح وسط سبعين الف
حتى الارض دم ترتشف
من نزف الجروح

للصبر يحسين حد أنته جزيته
گلبك بغير المثلث ما رويته
آخ يا ذاك الرمل لتوسديته
يچوي واكثر منه نارك ما چويته

عاده القتل عاده ،، بس لا ولا هايه
ليش العدو ناده ،، خل نحرگ الثايه

*****

شمغيّر الضمه ،، ومسايل الدمه
متسلب الحيل ،، شيواجه الخيل
ماتخلص وبعد ،، الجاي اشد وأشد
ياويلي ياويل،، شيواجه الخيل

عدوانه تتناقل خَبر
طاح وفلا ينهض گدر
ماعنده ليشدله الظهر
ماعنده عباس

وحَدك والگوم تنتظر الاشاره
غيري خيلُ الله چانت هالعباره
إحملوا بالنار وسهام وحجاره
غاره تهجم بالأثر تتبعها غاره

عاده القتل عاده ،، بس لا ولا هايه
ليش العدو ناده ،، خل نحرگ الثايه

*****

تاخذني صفنتي ،، سفرتها دمعتي
راوتني أطفال ،، بحدود الخيام
متوزعه عالدرب ،، آه ونبض گلب
حالتها يا حال ،، بحدود الخيام

يتأملون آخر حمه
يدعوله الله يسلمه
ياربنه مهجت فاطمه
تشتاگه الگلوب

ملوي سرجه من المهر رد لخيامه
يصهل وجايب خبر ذيچ الظُلامه
رجعته من المعركه چانت علامه
يعني أطفال الظعن صاروا يتامه

عاده القتل عاده ،، بس لا ولا هايه
ليش العدو ناده ،، خل نحرگ الثايه

*****

يالوالي نظرتك ،، حِيرتها خيمتك
كل هذا والصار ،، ما عنها تندار
بالعيله ممتحن ،، ماتغمض الجفن
ياحيره محتار ،، ما عنها تندار

تلفت نظرهم بالحرب
چفك تشيله من الترب
قصدوني آنه المنطلب
عوفوها الخيام

ياحسين او خالفوك بكل كلامك
أعتنوك وسلبوا يمنة سلامك
أجهز وهذا الرمح شايلها هامك
والعساكر فزعت وشبت خيامك


عاده القتل عاده ،، بس لا ولا هايه
ليش العدو ناده ،، خل نحرگ الثايه
*****

على ذكر العطش ومصاب الحسين
تعلمتي البواچي منين ياعين
لو لا الآه من گلب أم البنين
حرام أن چان دمعه اليوم تجرين

دمع عيونها أم عباس يچوينا
*****
من يوم أطلعت تتلگه الضعون
عرفنا للبواچي نفع العيون
هاي أم الوفه وين اليوافون
عالمذبوح كون وياها ينعون

للمذبوح جينه وياچ لطامه
*****
تشابيه الوفيه چانت گبور
مهظومه وعليهن بالنعي أدور
كل مصباح عدها يبدي عاشور
مكسورة گلب عالظهره مكسور

كل مصباح عدها لكربله قرايه
*****
غيرتها الشمس ما سكنة فياي
آه حسين تنعى الليل بهداي
گبلك ريت صوب چبدتي ضماي
عساني لاهنيت أبشربة الماي

أهد حيلي منذكرك عالرمل عاري

*****
ماتت من كثر ماتجري دمعات
على مصاب الثكاله واليتيمات
على الگضن ليالي بالخرابات
مشن حدايه بيهن نوگ هزلات

هزيله بغير هودج ناگة سكينه
*****

محنة ضمه ،، نار ودمه
بلون الجرح ،، جفن السمه
زينب تظل ،، من دون أهل
وي كل نفل ،، مات الامل

ظلام ،، هاي ليله شلون ليله
ظلام ،، والضعن فارگ كفيله
ظلام ،، حَير عيون العقيله

ظلام وكون زينب تجمع العيله

*****
ليلة أسر ،، تنخه الصبر
شافت خيم ،، تل من جمر
آه أو ألم ،، ون الحرم
زينب نعت ،، راعي العلم

كفيل ،، چان أمان ابهالوسيعه
كفيل ،، عينه غمضت عالشريعه
كفيل ،، آه چفينه گطيعه

كفيل وعذره سهمه نابت بعينه

*****
سمعت خبر ،، باچر سفر
مو للوطن ،، يخت الگمر
لا ياصبح ،، خلني بجرح
لوصبحت ،، بيك انذبح

أريد ،، أدفن أولاد الزچيه
أريد ،، أسكن ارض الغاضريه
أريد ،، فجري مايطلع عليه

أريد أديار هاشم ليها ردوني

*****
صوب الغري ،، صاحت علي
أحضر تره ،، محد إلي
هيمه ورعب ،، أرض الحرب
نومه الزلم ،، فوگ الترب

تعال ،، ياعلي الكرار وينك
تعال ،، خل تشوف الصار عينك
تعال،، كربله ذبحت بنينك

تعال وشوف مهجة فاطمه شحاله

*****
ليل ١١ ،، دمعه وعطش
نبض الگلب ،، خوف أرتعش
حيره حرت ،، حرمه وصرت
أحرس ضعن ،، ما حسبت

عذاب ،، فاگده وأحرس ضعينه
عذاب ،، گلبي ما يسكن أنينه
عذاب ،، أبتده بغيبة ولينه

عذاب أول مسيه حيره محتاره
*****

العذر يحسين يبني غمضت العين
بعد بيه دمع بس الاجل حان
تمنيت وردتها أطول الايام
حتى أنعاك اظل بكل الازمان
شهگت أخر نفس وي طلعت الروح
صحت يحسين يبني المات عطشان
جروحك چنت أعدها حساب بالاه
وكل آه بدليلي تخلي نيشان
هضيمه اعليك تنشف دمعة العين
وعجيبه اعليك واحد گلبه ما لان
يمن صرت الدرب لمراكض الخيل
شجاها الخيل شافت بيك ميدان
ثلث تيام جسمك عالرمل ليش
گبلك ياهو صار چفانه تربان
بعد وي الولد كون أوفي بدموع
وعلى خيامك ألي ماتطفه نيران

انوح اعليك نوح الفاجده وحيد
وعليّ يحسين گبرك صاير بعيد
لون بيدي يصح چاطرن البيد
على ترابك أموت وكلشي ماريد

لون عليك ونه تحرگ الروح
يمن ماكو اعلگبرك نايحه تنوح
عمت عيني شكثر نزفتلك جروح
وتالي تظل ثلث تيام مطروح

حلم دنياي هالدمعات،، ماعندي الا هيه
قصور النور والجنات،، مرضات الزچيه
بدمعتي وما سِواها
يقين ألگه رضاها
*****
رفع وجداني ،، صفات إيماني
علنها ومقتنع ،، سيل الدمع قرآن
نطق أياته ،، لحن حسراته
يرتل واستمع ،، سيل الدمع قرآن

ديني بهاي،، ذكر الماي
يجرح وجداني واتحسر
شلون يصير ،، خيل أتغير
وذاك الطايح أبن الكوثر
يحله النوح ،، للمذبوح
جيش وكله لسلبه تحضر
يم حسين ،، دمع العين
بلكي يواسي مصابچ يگدر

هتاف العين والاحساس ،، أصوات بجفنها
أبنها وطاح ها ياناس ،، واسوها بأبنها

نعم مجلس عزاها
يقين الگه رضاها

*****

مشيت أبنيه ،، رضا المرضيه
نجاتي وكل امل ،، بيها العمل مقبول
بذر طشيته ،، بدمع رويته
بسمها و لا وَجل،، بيها العمل مقبول

فاز الصاح ،، گلبه وناح
ربحه الآهات اليچونه
مو أوهام ،، كل لطام
عنده المجلس هوَ الجنه
گلب الشاء ،، يازهراء
خطوات الخدمه يوصلنه
شانه يصير ،، عدها چبير
من يخلص لحسين الونه

زَرع الاعمال و المقبول ،، تتزهر ثماره
رضا الزهراء مامجهول،، بالخدمه الاشاره

أذا ابچي لبچاها
يقين الگه رضاها

*****
عشت أيامي ،، هدف وأحلامي
أنال من الشعر ،، لحظة كسر بالروح
صحت مولاتي ،، ألچ غاياتي
نخيت أو أنتظر ،، لحظة كسر بالروح

صوبچ جيت ،، ما مليت
أتوسل كون تقبليني
جيت أنخاچ ،، أبچي وياچ
نار الدمعات ترزقيني
لزمي چفوف ،، خاف تعوف
طفكم والدنيه تلهيني
تنشف عين ،، وانسى حسين
من هاي الغفله تنجيني

أريد النار من أخيام ،، بيه للمنيه
وأنوح لهاي ليش أيام ،، عطشانه رقيه

بحراره اذكر ضماها
يقين الگه رضاها

*****

بكتاب أياته ،، وصف جناته
جنان الله اعتقد ،، گبل اللحد والصور
بلاها الحيره ،، حزن تفسيره
الدمع جنة عبد ،، گبل اللحد والصور

مو أنهار ،، لا أثمار
بيهن يتلذذ وجداني
لا بقصور ،، جنحي يدور
راحت روحي ونوري احزاني
طعم الاه ،، والويلاه
تاخذ گلبي لعالم ثاني
الگه اطناب ،، طفل أنصاب
وأمه لهسه يرد أتاني

انه بفردوس من ترضين ،، اقرالچ مصيبه
عزاء نقيم وتحضرين ،، ياأم الغريبه

لون گلبي نعاها
يقين الگه رضاها


*****

كل نعمتي وكل دلالي
من فضلها راسي عالي
أم الاطياب أبكرمها رفعتني بدنيتي
واجب السجده لذكرها
والله وأدخيل أم گمرها
رازقتني بدمعتي
*****

نعمة الحال ،، مو كثر مال
مختصر جوهر كلامي حب الحسين
وأم الاطياب ،، خلت مصاب
بيه ودموعي بفضلها طَرزت العين

خلت بروحي ذكر الغريب
حرگتي ونوحي لذاك السليب
دمعي سچاب

غيرت معنى حياتي
حققت كل أُمنياتي
شوگي هذا للمجالس هيه بيه زرعته
نعمه محفوف أبنظرها
والله وأدخيل أم گمرها
رازقتني بدمعتي

*****
هيه عنوان ،، باب الاحزان
بيه كل حسره بأسمها ولفظة الآه
أنوي صرخات ،، كل عزاءات
تعزيه ألها لجرحها ويلي ويلاه

تصرخ أدموعي ويلي الطفوف
ألطم أظلوعي أنعى الچفوف
أذكر الجود

ألطم أبنية حزنها
وأذكر مصيبة أبنها
طايح وچفينه ظلت تحرس احدود الخيم
ياحزن فايض نهرها
والله وادخيل أم گمرها
زازقتني بدمعتي
*****
عاشت ألآم ،، تنعى الخيام
للعقيله و لليتامه نفضت الحيل
أتعلم الناس ،، صدق الاحساس
شگدحَنينه الاه بيها صَفنت الليل

بلون الليالي ،، مجره الدموع
تنعى يغالي ،، محني الظلوع
آ يعطشان

هايه حالتها الوفيه
چنها خيمه بغاضريه
خيمه صارت كلها جمره عالعقيله من تون
أنچوي لحظه بجمرها
والله وادخيل أم گمرها
رازقتني بدمعتي
*****
ترسم أگبور ،، يمهن أدور
ياعذابي تصيح مني شماخذ البين
بين عطشان ،، وساقي رضعان
وبوجاهتها أطوفن بين جرحين

الفاتحه ألها ،، قاري وازور
وانرزق عبره ،، أجفوني تثور
فوگ الاعتاب

اطلب ألگلبي حراره
يختلف طعم الزياره
لمن أتوكل عليها كلشي عندي يختلف
حلمي أشم تربة گبرها
والله وادخيل أم گمرها
رازقتني بدمعتي
*****
والله ممنون ،، لام الضعون
عدد أنفاس الخلائق گد ال أنجوم
ترفع الشان ،، تصنع أنسان
گلبي ينخاها ويطالب نعمتي أدوم

شوصف كرمها ،، راية أمان
والله وأسمها ،، خيمة حنان
لليواسون

منها ممنون أل وجودي
ألها شكري وكل سجودي
كرمتني علمتني بحرگه ألفظ كربله
مستحيل ابلغ شكرها
والله وأدخيل أم گمرها
رازقتني بدمعتي

*****

يغفه الليل جفني مطرز أحلام
أفز واليمته چلمه ملازمه شفاي

أعد أيام جيته المحسن بشوگ
وأتخايل كبرته موسعه الفياي

صار رماد حلمي بحرگة الباب
هذا أول أخو ذبحتلي دنياي

منها وخوفي يجري بهاي العروگ
وأشوف العتبه سيف گبال عيناي

گمر أنطر وأخافن غفلة الموت
هم تنطر ليالي وتحسب وياي

ألي منچ أخو يم الوفه يصير
يشل أجروحي حسنه يهود أبچاي

موعوده بدرب جدميني تمشي
وألي بدربي كفيل يباري ممشاي

يعرض للهوا ويصده لاخاف
أله نيه يهب لو يگرب حذاي

يشع خده شمس وايضيع النجوم
أذا لمعة يحسها بظلمة سماي

أمان الرايه بيده تغطي لخيام
بسمة عينه گمره تصير وأضواي

نده جبينه عذب يرويني عباس
ما أكرب نهر لو أشتكي أضماي

أخوي الشلتي روحه بلبة أحشاچ
نبض شلته بدليلي وأسمه وفاي

احس دگاته توگف گلبي كل ما
أشوفچ كربيتي لباب بلواي

أذكر عصرة امي ومحسن الطاح
وأشوف اخيام باچر تحرگ أعداي

أذا مال وكسر من عندچ أظلوع
ظهر الحسين تكسر ميلت ألواي

تره البسمار نبله تودر الشوف
وأظل انه وخواتي بغير حماي

أحذري الباب منه لاتگربين
تره العتبه جرف وأتاني سگاي

اشوف أمي تموت گبالي مرتين
عليمن والمنايه تصير سلواي

اخو راح واخو انتظره ماريد
ميت ينولد چا ياهو حداي

اذا عصروچ يمه ودفعو الباب
معناها بحبل چتفوها يمناي

******

مملكة الخدم عالم إله باب
أ أدخُل منتظر عطف أُم الاطياب
قبولي بكيف مولاتي
أ أدخُل كُل مناجاتي

*

عالمها عالم خدم ،، لوح وعرش والقلم
والتحكم أُم عباس
عالمملكه سيده ،، بالخدمه متفرده
يمها قبول الناس
وين الگلب محترگ ،، يتوجه ومن صدگ
يگصدها محني الراس

وصول ومنتهى الغايات
دخول لساحة الخدام
أناجي والدمع رايات
دخيلچ حققي الاحلام

أدعي وأنتظر وأتوسل سنين
يا أم المحنه يم البنين
يبرر دمعي غاياتي
أ أدخل كل مناجاتي
*

أبدي الشكر والحمد ،، أسجد وأسلم عبد
أخضع خضوع إذلال
وأتقدم أبهالطلب ،، ل أشرف نسب بالعرب
أعگد بأسمها أمآل
بأولادچ الاربعه ،، يا مستجابه الدعه
هذا انا هذا الحال

بوجاهت راية السگاي
وچفوفه ونظر عينه
طلبتي تنقضي رجواي
عسن أسمي تقبلينه

مراضيها مقام وأبهى عنوان
مو جنات أكبر ذاك َ رضوان
خضوعي وهاي سجداتي
أ. أدخل كل مناجاتي
*
يم الوفه الواهبه ،، كل منزله ومرتبه
يا سيده اعله الكون
للمأتم انتي العمد ،، انتي السند والمدد
تتنخه بيچ أعيون
بابچ على عتبته ،، گلبي رهن نبضته
ينطق الچ ممنون

لنهاية عمري ما أندار
ولايذبل أمل روحي
ولا غير النويته اختار
نويت أتقرب أبنوحي

دگات الگلب نغمة دمع طاح
لايذ مستجير بعتبتچ صاح
ألچ مكسوره عبراتي
أ أدخل كل مناجاتي
*

أندبها طول العمر،، عالباب أظل منتظر
أتقرب ألها ادموع
عن كربله والخيم ،، وليل ١١ عالحرم
أقره بگلب موجوع
أذكر خرابه وهزل ،، لوحة حزن تكتمل
منها الحزن مسموع

إذا گطرة دمع ترضين
من أدموعي لجريها
خادم أسأل تسمحين
روحي الكم تسميها

مملكة الحزن ياحلم الاحلام
أول خطوه ألها تصير لطام
مُناي الماضي والأتي
أ. أدخل كل مناجاتي
*

سفرة عطف تنوصف ،، لا تنضب ولا تجف
تغني الگصد طلاب
سائلها ما ينكسر ،، من عسره رد بيسر
سائلها لا ما خاب
طالب وأريد الأذن ،،بالخدمه كحل الجفن
من ينفتحلي الباب

واگف منها اريد مراد
حاشه تخيب ظنوني
دخيلچ گلبي لا ماراد
الا البي تريدوني

هاي وما عداها طلبتي هاي
تكتبيني بكتابچ ثوب الماي
وگفت اتلوها دعواتي
أ أدخل كل مناجاتي

*

من بعدك هذا الحال
يوميه أعيش آآمال
راجعلي أشوف
لكن ألگاها خيال

چم شوغه وآه أوحسبه
بالماي الانوي أشربه
ماشربته ألا شبني بنار

چا غير الدمعه شبيدي
وأنطر ترجع يوليدي
خله بيه الانتظار آثار

ياحيلي الراح مني
ياظعني الراح مني
شوغاتي حسباتي كل ليل ونهار

*****
منتظره عزيز الروح
وأعيوني دمعها جروح
أنفاسي عذاب
أم أو للفرگه أنوح

أبتدت بالفرگه وفاتي
إرجع او ترجعلي حياتي
هذا حالي من رحت يحسين

ميته شوگ وتالي أسمعه
عن مصابك بشر الينعى
ميته مره لا متت مرتين

گالولي غريب يبني
ياويلي غريب يبني
أمالي يالغالي متحوله أنين

*****

گصرت أيامي يريت
ولا أسمع انته هويت
يايمه وحيد
ضامي وعالغبره بقيت

من طحت چا ياهو يعينك
بالحجر مصيوبه جبينك
ضامي ويلي مابگالك حيل

غاضريه الديره غريبه
أستوحدوك وهايه مصيبه
فزعوها ومن يرد الخيل

عالغبره يسيل دمك
ظهريه يسيل دمك
ماعندك ليسندك ياويلي اويل

*****
لعيونك أضحي أرباي
ترجعلي أريد أبهاي
أولادي نذور
چانو بالدنيه ضواي

اغله مابالدنيه وهبته
أبوفاضل أبني نذرته
ما ولدته ألا يحمي ظعون

أمنياتي عيوني تشوفك
وبحرارة شوگي أطوفك
حسره ظلت أُمنية العيون

أمنيتي جروح بيه
ما تشفى جروح بيه
محنيه لابيه أنساك شلون
*****

رويت الهيمه دموع
يايمه حنيت أظلوع
مهظومه اصيح
حروفك ألفظها وألوع

ياحسين الونه لونها
بيه تنشر جمره حزنها
يعني دمعي من يصب نيران

بالبوادي ارتله عذابك
والظلام اشكيله غيابك
من مصابك گلبي ظل حيران

مذبوحه عليك روحي
تنشدني عليك روحي
أنعاها أقرآها آ ياعطشان
*****

حنه ظهره الگمر
ماراد يشرب ماي
أستحه منه الفرات وصابته الرجفه
تيه والنتيجه
الروج يلطم روج
مسابگ والبخيت الامسه بچفه
لتگلي السعف
هيچ انحنه وبالكيف
ولتگلي اظن وارثها لوصدفه
بس هو النخل
بي غيره بي ناموس
شاف أستاذه دنگ دنگ بسعفه
من يصفگ جنح
موغايه حتى يطير
إذا تحسبها غايه منيلك عرفه

يلطم لو صفگ جنحين ،، بسما
يهيم و يلهج الونات ،، بسما
ياعباس نفزع كون ،، بسما

شلت ايدك انه وكون شايلها چا لا
عن أبرها ايگولون ذاكه رحمنا

حنه ظهره الگمر
شوف السمه شلون
چنها اعله الارض تنشاف ملتفه
من ترعد حزن
تصفگ أديها غيوم
ماصبيت گطره بجربتك وسفه
أظل ما أنعدل
مچفيه للدوم
دلالي شمس وغروبكم نزفه
كلشي ويالگمر
غير بالاطباع
من شافوا سماحة مشيته الترفه
الا الجيش كله
حاسد الجود
يرامونه بسهام أعيونهم صلفه

حسد مصيوب جودك ،، چ ِمليته
ترافه الماي منك ،، چَ مليته
چم كون بغيابك ،، جَ مليته

ظلت أمنيات بغير جيه



**********

ألفظ أسمك
وأستلذ حيل بصفنتي
وانشغل بالما توصف
البيك شفته
خرسه عن وصفه لهجتي
وأنته تدري
سوالف عيوني دمعها
أو تبقى ممنونك نغمتي

ألفظ أسمك
والبرد يندار صيف
والثلج يعرگ خجل
ويذوب حيف
بس هذاك الشاطي بعده
تگلب الموجه وشفت لمعتها سيف
وأنه ذاك انه بعدني
للهوى مفرع جمرتي
والسمه شما بيها تمطر
المطر ما بلل الحاء بحسرتي
عندي سگف الشجره زحمه
تصير بفيايه گعدتي
سبقت سنيني الملامح
والشباب الفات صبحه
أنجومه شيب
ضحكه عاشت يوم كامل
عندي عيب
هذا حالي

ألفظ اسمك
للنهايات ويشوفن
ماكو أوحش من سكتي

بيه مو صفنت عشگ
صفنت سؤال.؟؟؟؟؟
ليش لحظات الفرح تنزل دمعتي
من أذكرك
ألگه بشفافك عطش
وأذبح صفنتي

فضل للي أرضعتني ،، صف لبنها
دمع وآهات روحي ،، صف لبنها
شگله الگلي بلله ،، صف لبنها

شگله شلون حال أبن الزچيه


*****

حاروا بوصافك كل الي يوصفونك
بس حيدر وأمك بالكلمه يرسمونك
ترفه وهم شرسه يانظرات عيونك

بين وبين ،، هالجفنين
الكون وأسراره
فيض الطاف ،، أحلى اوصاف
جنة رب وناره
عالعدوان ،، بالميدان
مايرحم بتاره

هذا العباس والاسرار بحروفه
رحمه وتعذيب تكوين چفوفه


*

مفتوله أزنودك بأخلاص البدويه
تكوينك هيبه ومعجونه بحنيه
أنته النوماس وما غيرك راعيه

ذيچ أيام ،، چان أحلام
وأمه تراقب خيره
سبع شهور ،، وشع النور
بيك الفرحه چبيره
تفخر بيك ،، وترَويك
درة بيك الغيره

صار العباس يامحلى صياره
باب الحاجات ومراد وشاره

*
يا وارث حيدر أقواله وأفعاله
نسخة أطباعه ومفصل تفصاله
ياخوف الساكن بگلوب الخياله

بيك أندار ،، حامي الجار
بتلاثين سنينك
صوتك سيف،، ماخذ حيف
گبل صواب أيمينك
حشر الناس ،، ياعباس
جدحه بنظرة عينك

تخمين أرقام ماهي معدوده
خيل وخيال يطحن بزنوده

*

يا أجمل فارس ياعنوان الفاتك
ياحد ايحدهن ياعباس اصياتك
ماتجرح تذبح معروفه طعناتك

ترعد ويل ،، تثني الخيل
تطشر جدامك
من الخوف ،، يعمه الشوف
لو نزلت ألثامك
تخطف لون ،، ويرجفون
من خطوات اجدامك

زلزال الگاع صولاتك هايه
بگلب الميدان هزيت الرايه

*
لازمها بأيدك يافرحتها الرايه
يتنومس جودك ما فارغ من مايه
عينت چفوفك حدين اعله الثايه

حيدر بيك ،، ومخليك
چف الساقي وكافل
يا وفاي ،، أمك هاي
بيك ترد العايل
لهاشم جيت ،، گمرة بيت
دخيلك يابو فاضل

چا هذا الجود عِشره ويمتونك
سور وناطور يارمش جفونك

**

حيره احتار گلبي أبين جرحين
جرح عباس هذا وجرح الحسين
*****

بين جفوني ظلت دمعتي تنود
أهيم واختنگ والحيل مهدود
اظل ألهج دخيل الگطع زنود
ذاك ال عالشريعه غمض العين

*****
يم باب الگمر يا محله لدموع
وللعطشان يحله لطم الظلوع
اي للطفله چنه الصوت مسموع
رقيه تصيح من بين الصواوين

*****
أگصد للغريب وما يظل حيل
تجي بعيني صور لمراكض الخيل
هذا الليل آ ياوحشة الليل
ياهو للضعن وأزلامه ميتين

*****

بين أگبوركم واتخيل الحال
گضيتو وبخيمكم ضجت اطفال
بعدكم ماكو رايه تحامي العيال
بعدكم بس جمر يبره النسواين

*****
احاچي الروح بلله شلون ياروح
جرحهم ما تشبها كل الجروح
نومه وظلت ألهم نايحه تنوح
زينب ناحت وما عدها ليعين

******
ياهو يعينها المتكفله بيتام
غربه بغربه ظلت بعد الخيام
مو كافي بخرايب ظلت ايام
ليش الا بهظمها اطب دواوين
*****

حرمه وياهو ألها ماكو خوان
جفنها للدمع للعيله سهران
ضيعه شلون ضيعه يم الاحزان
بيها من الصحاري يانياشين
*****

وافتها المنيه واخر صواب
دارت عينها ولا شافت أحباب
تالي وتندفن بديار الاجناب
ولهسه بگبرها نوح و ونيين
*****

تاليها وجزات الضيم يم عون
بديار الشماته گبرچ يكون
ضريح وخالي من دمع اليزورون
مو بس نار گلبچ يدوي نارين
*****

أزور وكل طواف بشفتي اعذار
ذكرت الشام بيها شصار ماصار
واگولن عذروا گلبي لسعته النار
مهظوم اعله اختكم ياميامين
*****

دلال الينطر جود توذر عطش
بالخيمه كل نظره تتفسر عطش
لون وصوت اليذبل يتغير عطش
أطفال أشتتحمل ما تگدر عطش

صحره كل طفل لونه
بعد ما ذبحوا أظنونه
مكان الجربه بالخيمه
يصدله بدمعة عيونه

أمل گلبه ،،
يرد أردود عمه عالمتن جوده
أمل گلبه ،،
سباحه انگطع للگطعوا زنوده

جمر تمطر سمه العاشر
ضمايه وچم گلب حاير

*****

يروي چان العباس أبنظره طفل
تبرد ناره وما يكسر عبره طفل
يتصبر چا هسه شيصبره طفل
بلا عمه والهم مو گد عمره طفل

أمانه سوره وفيايه
يشوفه برفة الرايه
صفه لا عين ألتحرسه
ولا يتروه بحچايه

تشب ناره ،،
أول مره شايف للمخيم ظل
تشب ناره ،،
مايسمع رفيف لراية اليكفل

جمر تمطر سمه العاشر
ضمايه وچم گلب حاير

*****

أطفال وبالخيمه لمتهم ألم
جمرات وتتگاطر دمعتهم ألم
من شَدة معصبها عمتهم ألم
متحضره شو چنها لغربتهم ألم

عليها شافوا الحيره
عذاب الناظر أديره
شافوا حالها تغير
بعد فراگ ابو الغيره

أبو فاضل ،،
عمتهم تصيح وصاحوا أوياها
أبو فاضل ،،
دونك يعني راح أنضيع معناها

جمر تمطر سمه العاشر
ضمايه وچم گلب حاير

*****

أطفال بهالوادي ماتسلم ظهر
صيوان وبالتربان أمحزم ظهر
مايرحم سيف الحر يتهجم ظهر
عالشفه بضماهم يترسم ظهر

تغير كل طفل رسمه
صحره وماتهب نسمه
وجه وجهه للشاطي
هلبت ينتهض عمه

ثلم چبده ،،
هبوب الريح سوى شفته جمره
ثلم چبده ،،
يشد الحيل بيمن لنفگد صبره

جمر تمطر سمه العاشر
ضمايه وچم گلب حاير

*****
ألنوماس أصياته وأبجاله. عله
لا صوت الخيل اولا خياله عله
لابيرغ لا كل سيف گباله عله
من بعده ليخاف من خياله عله

جيش وكله گدامه
چان مدنگ الهامه
هسه بطيحته حِسهم
يوصل وسفه لخيامه

الهوا سمومه ،،
ما چانت على الصيوان تتعده
الهوا سمومه ،،
هسه سهام يوصل طاح اليرده


جمر تمطر سمه العاشر
ضمايه وچم گلب حاير

*****

راح اسم ام الخدر ،، ضاع بدروب اليسر
ضعت وانا مدلله
بين شام وكربله
*****
بدنيتي سنين العشتها
شعندي بيهن ذكريات
غير فرگه وسيل دمعي
ماشفت حد الممات
انه لحترگن خيامي
بالخرايب صرت أبات
لهسه من أثار حبلي
چن أديه مگيدات

دمعي يرسم من يهل،، نار وحبال وهزل
تبده عمري بالفله
بين شام وكربله
*****
غير فگد اخواني شذكر
غير دمعي شظل ألي
بذيچ ظهرية محرم
گبالي صرعه كل هلي
كلشي صار بعيني غربه
يوم غمض كافلي
وهاي أول مره أشوفن
بعازة الفي محملي

گلبي چانت دگته ،، وي رفة رايته
مات حسره لكافله
بين شام وكربله
*****
الموت نازل بيه رايد
روح ياخذ من جسد
وانه ظلت روح بيه؟
حتى يقبضها بعد
روح شوف بيا خرابه
بيا قصر وبيا بلد
مدري يم الشاطي ظلت
مدري يم ذاك المهد

لو بعدها اعله الرمح،، تنوح بأسم المنذبح
هناك روحي معلعله
بين شام وكربله

*****
شنسى ظهرية ركضتي
لو شماته بغربتي
لو طلعتي من المخيم
لو وداعي وي اخوتي
لهسه من الليل خوفي
يعيد ليلة وحشتي
ويا سبيه الچلمه هايه
فرهدت كل هيبتي

شب دلالي وي الخيم،، ليل وانه احرس حرم
دموعي جمره سايله
بين شام وكربله

*****
شلون تبره جروحه گلبي
شلون يحصل بلسمه
وانه شفت حسين أخيي
يزيد يضرب بلسمه
الملگه وي ذباح أخوتي
باقي حيلي هدمه
وطبت الديوان كلفه
لهايه ما متعلمه

راح حيلي بوگفتي،، هنا شفت روس أخوتي
ضيم دلالي أنمله
بين شام وكربله

******

زينب ،، لاخر نفس ظلت غريبه
زينب ،، ما عدها يوم ابلا مصيبه
أنواع المصاب
وألوان العذاب
أسباب الدموع ،، چان أولها باب

الجفن ما يغمض ليله
الدمع ما گاطع سيله
للزمن دين أتوافيله

******

زينب ،، نحرت گلبها الغاضريه
زينب،، كل محنه وافتها المنيه
گلب الحره لاع
ذابحها الوداع
تالي اعله النياگ ،، شيعها الضياع

ميته من عاشور وضيمه
لا حمه لا ظلت خيمه
والحدي أيام بهيمه

*****
زينب ،، وحشة خرايب لبگبرها
زينب،، ونت يتامه يمر ذكرها
دمعه وصفنه هاي
بيها الحيره راي
منها تعالى صوت ،، زينب ردنه ماي

الجرح يادمعه تروفه
والاسم أهات حروفه
والعطش ليهسه يطوفه

*****
زينب ،، بالطف صفت عمة يتامه
زينب ،، لون الحزن حد القيامه
لا جرح اليطيب
لايهده النحيب
لخت الظل وحيد ،، بالهيمه وغريب

ماطفت خيمتها الحره
ياگلب لاتبرد أقره
ويلي يا بت امها الزهره

*****
زينب ،، حد ما دنت ساعة وفاها
زينب.،، للضامي ما كفت عزاها
يوم الوالي طاح
عذبها النياح
يبن أمي الذبيح ،، گلب الحره صاح

ياحزن أم عون البيها
من غمض عينه واليها
فگده والحبل السابيها

******

زينب ياراعي العلم
بعد مصايب كربله
بعد چفوفك والخيم
زينب صارت كافله
أيام اجروح وألم
هزل تحدي بالفله
تقراك لگلوب الحرم
أيات صبر وبسمله

زينب ،، بأسم أخوها تحزمت
زينب ،، عين تسهر ما غفت
خيمه وتلم الدلال
عين تسهر ماغفت. زينب

للعيله يازينب العقيله ،، صارت كفيله
الضعن ذاك بألم رحيله ،، صارت كفيله
حارس ضعنها
حرمه وجفنها
ليل ونهار الدمع. ماينگطع مسيله
*****

تتنخه يا ابا الفضل
من اسمك تاخذ صبر
ترعاهم حرمه وطفل
تجبر گلب الينكسر
ماتجزع لحظه وتمل
متحمله ويل اليسر
زينب للجاي وگبل
يتستر بيها الستر

زينب ،، يا بوفاضل والنعم
زينب.،، تبره لجروح اليتم
چنها أنته وي العيال
تبره لجروح اليتم. زينب

ليليه صح تنزل بخرابه. ،، فوگ الترابه
تتفگد ياهو اشتكى عذابه.،، فوگ الترابه
من الضعينه
لتسمع أنينه
عمته لجروحه ضمد. وتهون مصابه

*****
تلهج كل ذاك الدرب
يوم الهزل سدرن
عباس ألنه من الغرب
حامينه وسور وطن
بحماك ياخويه الگلب
نبضات گلبي يرددن
لولاك ياعذب العذب
أيام هضمي ماگضن

زينب ،، يوم عافت نينوى
زينب.،، حزامها راعي اللوا
عنها واليسأل سؤال
حزامها راعي اللوا. زينب

من أسمك تاخذ مدد يغالي ،، أبره لعيالي
اتوكل كل ما اشد رحالي ،، أبره لعيالي
تندب وليها
برحلة سبيها
تنعى زينب بالدرب. ،، آ يا فخر دلالي

*****

زينب بالليل اليمر
أطوف ما بين الدمع
ثمانين واكثر بالاسر
واسلمهم لازم ظلع
زينب وبتالي العمر
بالصار هذا تنفجع
ويلاه لطلوع الفجر
من كل طفله تستمع

زينب ،، صار أمانتها الضعن
زينب ،، الحرم بيها أحتمن
حرمه وبذيچ الدروب
الحرم بيها احتمن زينب

لولاها چا ضاعت الضعينه ،، لولا الحزينه
بالعيله ما تنزل السكينه ،، لولا الحزينه
زينب أملهم
لمت شملهم
هيه ظلت للسهر ،، ام الخدر رهينه

*****

عيونه ماشافت نهار
السجن صايرله دار
بليل گضه غربته ،، مات حسره لعمته

*
الضوه مذبوح لونه ،، عاش بس لون الظلام
للسجن نجمات صارت،، تلمع أدموع الامام
بلا نهار سنين حبسه،، عام يدفع ليل عام
يعني كل ايامه وحشه،، وحسرته تطلع خيام

السجن چن خيمه صار
بيها ماتطفاله نار
سجنه ليلة وحشته ،، مات حسره لعمته

*

الكاظم بصفنة غربته،، تمر على عيونه صور
خيمه ومناشغ يتيمه،، وعين أخت صوب النهر
وطفله من ينزل دمعها،، بخدها يتوضح اثر
صواب چف جارح جفنها،، علماها اعله السهر

تسهر الطفله وتون
من ألم جرح الاذن
شاف ضيم أبصفنته ،، مات حسره لعمته

*
راف حسره بحسره طلعت،،صوره وگليبه نلچم
عمته هاي الجاي تنعى،، ويمها ملتمه الحرم
باچر شلون ويباچر ،، يبتدي فجر الالم
ويامن امشي شلون اطلع،، لا كفيل ولا علم

تنعى والمدمع يسيل
عالنهر غافي الكفيل
راح اخوها وفگدته،، مات حسره لعمته

*
ليل وحشة عمته سجنه،، ظلمته بنوحه تزيد
هنا سمعها تصيح عني،، ياسلف هاشم بعبد
عالخيال بحيله كله،، گام يوصلها يريد
تعثر وطاح اعله وجها،، عثره گيد الحديد

نادى لا لا يازمان
عمتي بلايه أمان
الگيد عثر ركضته،، مات حسره لعمته

*
تالي فتحوا باب سجنه،، لكن بيا حاله چان
الحديد الچان بيده،، من أثر حسراته لان
شافه طر فجر العقيله،، واليسر مصباحه حان
ماحمل تطلع غريبه ،، شلون ظل عمته يبان

مات وي طرت الفجر
بأولى لحظات اليسر
وي أول شهگته ،، مات حسره لعمته

*