ردينه من اليسر ردينه
لا واحد أتلگاني ،، چاوينهم خواني

*****
رديت وضعوني تحمل أحزاني
بدموعي اشكي يهلي مو بلساني
لوعني درب الشام ياولياني
اسكن خرايب باليسر خلاني

دمعاتي يشتكن دمعاتي
ويسولفن بجروحي ،، يبن امي يامذبوحي

*****
چم ديره عالنوگ الهزل مرونه
ولا شامت الغضت بصرها عيونه
أحفر لحد كل ليله لو نزلونه
چم طفله بدروب اليسر مدفونه

أيامي عالهزل أيامي
من ديره ادخل ديره ،، محنه محنتي چبيره

*****
يالشام حادينه هتف ناداها
هاي الضعينه عالهزل جبناها
چلمة سبيه ياهلي شينساها
راح ابقى عمري عايشه وياها

مسبيه ياهلي مسبيه
ماچان ابد بحسابي ،، بسمي يصير أصوابي

*****
كل موقف بگلبي اثر نيشانه
شفت العذاب آنه بجميع ألوانه
شلون الذبحكم نوگف بديوانه
يذبحني لو اسمي جره اعله لسانه

دلالي ينفطر دلالي
بمجلس غرب وگفوني،، انه وبقايه ضعوني

*****
بيه جرح دمعاتي ما واصفته
موقف دهاني يهلي لمن شفته
شلون الرجس يضرب اخوي بشفته
ولمجلسي يگله خدركم جبته

گدامي ينضرب گدامي
طشت الذهب ياويلي ،، شفته وأخذ كل حيلي

*****
يبن امي من ديرة غرب ردينه
دمعه اعله گبرك فضنه وتبدينه
ماتت رقيه وچانت توصينه
ياعمه نوحي لوالدي توصلينه

توصيني ماتت توصيني
ذكريني يم الوالي ،، ياعمه واحچي شحالي

*****
وصتني گالت عمه لو رحتيله
بهاي العبايه عالگبر فَييله
عني البلايه وداع صار رحيله
مشتاگه ماتت طفلتك گليله

يابويه دمعتي يابويه
گد ما بچت مشتاگه ،، ماتت حزن بملاگه

*****

نعي شهاده الامام علي ابن موسى الرضا
عليه السلام

يبو محمد حلاة الآه ،، والياويل والونه
بسمك تلفظ عالعاف ،، شمعه ودوفة الحنه
وگف بين الخيم والخيل ،، وأمه وعمته شيمنه

عمته تصيح ياجسام
ياحسره الفرح مادام

وأمه تصيح واويلاه ،، عرسك ايست منه

*****

يبو محمد ذكرت حسين ،، بيك وطيحة الجربه
من گالو طحت مسموم،، وانته بديرة الغربه
مثل جدك غمضت العين،، مذبوح بعطش گلبه

جدك عالتراب الحار
طايح والگلب شب نار

محد گال شربة ماي،، راح يموت خنشربه

*****

يبومحمد جروح البيك،، شاعن مجلس قرايه
ودموعك على المذبوح،، شالت للحزن رايه
لولاك الجره اعلحسين ،، ياهو يذكره بحچايه

فتحت دمعتك بيبان
ألنه ونقره عالعطشان

كل مجلس عزه لحسين،، دمعك صار تچايه

*****

كون يجازونك ،،. بيش يجازونك
وأنته الوصيت بأهل البيت،، وبكل غالي

وصيت وگومك ،، ماتسمع گومك
نكروك بساع تعبك ضاع ،، بيهم تالي

يامرسل بأسم الرحمه عجيبه
هيچ يجازونه الينعه حبيه
شلون ام ابيها تمسي غريبه

اي والله ومصابك
جازوك بأحبابك ،، ظلموهم بغيابك

*****

يارحمه إحسانك ،، وافوا إحسانك
كملت الدين.،، ماراضين ،، عن تكميله

بليلة تشييعك ،، عافوا تشييعك
خلفولك راي ،، چانت هاي ،، أول حيله

أرتدوا شالوا ضدك رايه
ظل يهجر گالو ماله حچايه
حرفو كل كلمه وسوره وآيه

يامرسل قرآنك
هجرته عدوانك ،، نكروا كل احسانك

*****

دار المرضيه ،، الزهره المرضيه
أتصد الباب ،، والچف ذاب ،، من صد ناره

لو تسمع ونها ،، شيوصف ونها
تنهض واطيح ،، آه تصيح ،، بويه الغاره

مجروحه بلون أدماها الدمعه
من بعدك زهرة عمرك تنعى
وشلون ينوح الكسروا ظلعه

إسمعها تناديلك
ليليه وتشكيلك ،، منعوني أبچيلك

*****

ياما بأحضانك ،، چانو بأحضانك
ولد الكرار ،، يالمختار ،، كل دنياتك

وآلدهم عونك ،، فاديك وعونك
سيفك وحزام ،، عالايام ،، ذاته بذاتك

آيات بحبهم قاري كتابك
للناس توصف همه ابوابك
چا ليش بحبهم صار صوابك

ياذونك بالعتره
بالمحسن والسطره ،، والساجد بالطبره

*****

معروفك بيهم ،، ماغير بيهم
كلهم يدرون ،، ويعرفون ،، هذا حسينك

عمداً بالحومه ،، طايح بالحومه
فوگ التربان ،، بالعطشان ،، ذبحوا دينك

بالطف اتناسوا هذا حبيبك
وأسهام البيها انصاب تصيبك
أبن المظلومه الزهره غريبك

عالغبره يتگلب
بجروحه يتعذب ،، تاليها يتسلب

*****

عالظلع ،، صب يا دمع
جفن الصميده
عالكسر شاغ بألم من مرت ايده

من لزم ظلع أنهشم ،، حيدره حيله انهدم

*****

ساعة الوسد زهرته
حيدره عالمغتسل
صب دمع عينه ودليله
هالمصيبه ماحمل
ابتعد عن الوديعه
گلبه فز لمن وصل
لامس بچفه ظلعها
وانهدم حيل الفحل

حيدره ،، لا مادره
بكسرة ظلعها
لامسه فز منهظم وايده رفعها

ظهره بچفوفه لزم ،، حيدره حيله انهدم

*****
ايده من فزتها ترجف
دمعه طگ سد الجفن
يعاين اعله الزهره لاچن
روحه مسحونه سحن
تحيرت يالزهره گلها
بكل نفس اشهگ واون
مدري اضمد مدري اچفن
جروح انتي وتندفن

جرح اشد ،، لو لل لحد
أگصد وادفنچ
والرمل يلچم جرح غافي اعله جفنچ

بدمعة صرخة ألم،، حيدره حيله انهدم

*****
عن علي تخفي ألمها
يمه مامره شكت
وهيه بين الام سطره
وبين عصره تعلعلت
العين بالمعصب خفتها
وعنه چم آه الخفت
تخاف لاتجرحله غيره
گباله مامره شكت

الجدم ،، دم ينرسم
ظل بأثرها
گباله ما تمشي ولا شالة نظرها

بعينه كل هذا انرسم،، حيدره حيله انهدم

*****
يالخفيتي كل ونينچ
ومارضيتي ينسمع
هسه شفت اجروحچ انا
وشفت اثار الدمع
والدمع ما مييزيته
من دمه كسر الظلع
وطعنت البسمار الها
چم اثر باقي وطبع

عصرتچ ،، لو سطرتچ
انعى عليها
لو طبع باب ونبت بسماره بيها

عنه كل هذا انكتم،، حيدره حيله انهدم

*****
راح اودعچ وانا ابقى
عايش وبجروحي باب
ثمنطعش عمرچ يزهره
ليش هيچ بعصره غاب
بصبري دنيه صدعتها
هسه صبري كله ذاب
من لمست أبأيدي ظلعچ
ورث بروحي مصاب

حسرتي ،، وكل لوعتي
واعظم مصابي
فاطمه ماينوصف بعدچ عذابي

گلبه من بابه انهظم،، حيدره حيله انهدم

*****

يمه لتعوفيني ،، احترگ بونيني
يم حسن بفراگچ،، كربله تسبيني

*****
يمه،، زينب انه وروحي يمچ فرفحت
يمه،، ريت عيني لفرگتچ لا صبحت
يمه،، غمضيتي وبوب ضيمي تفتحت
يمه ،، نار باب الدار للطف لمحت

دارچ الحرگوها ،، عينچ السطروها
بعيني رسمت باچر،، شلون ادي جتفوها

*****

يمه ،، عيوني شافتچ تسحگين الجمر
يمه،، مالزمتي الباب وانعاب الصدر
يمه ،، نار شبت وانتي عينچ عالخدر
يمه ،، بمحنتچ علمتي بنتچ عالصبر

بابچ وبسماره ،، تبينتلي اسراره
لكربله تعلميني ،، شلون الاگي الغاره

*****

يمه،، عني چم سوط الشگفتي بيمنتچ
يمه،، ليل صارت وامنتني شيلتچ
يمه ،،. گلتي هيچي مثلي احمي عيلتچ
يمه،، دمعچ الكاتب حروف وصيتچ

رسوم طفله بعينچ،، عمه تصرخ وينچ
صوره للطف هايه،، فسراها ونينچ

*****

يمه ،، ميت المحسن غدر يافاطمه
يمه ،، شالته چفوفچ لچن يگطر دمه
يمه،، من اديچ اليوم اخوي اتسلمه
يمه ،، باچر ايدي تشيل مذبوح الضمه

حسين يم اخيامي ،، بيده طفله الضامي
بعيني اصد اوليده ،، منذبح گدامي

*****

يمه،، چنتي من تنعين تطفح عبرتي
يمه ،، من ألم ظلعچ ونينچ ظنتي
يمه،، ثاري كل دمعچ جره لمصيبتي
يمه،، بليلچ تنوحين ليلة وحشتي

الليل ماتغفينه ،، دمعچ تصبينه
ظعني گبل ارحيلچ،، بالنعي تواسينه

*****

فاطميه وليالي مصاب
دمعي طاح بسؤاله عتاب
انته باب وعجيبه هويت

تدري هاي الزچيه وراك
گوه لو بأختيار ورضاك
بيها تكسر ظلعها نويت

إنته باب ومثله صيتك مايصير
فضلك البيت الخدمته بيت أمير

عتبي وياك للمنيه
شلون تميل عالزچيه
صرت بطوع چف ذليله
وأم العقيله
بسدك دخيله ،، يباب

*****

اي يباب وعتابي يدوم
انته صرت الوسيله بهجوم
وأنذبح طفل عمره جنين

انته لوما عليها تطيح
يعني ماظل جفنهاجريح
ولا گضتها الليالي انين

بينك وحايط عمرها كله ضاع
وهذا بسمارك تسبب بالوداع

منك صار كل حزنها
والدم سال من جفنها
والمذبوح فرحت امه
عالعتبه دمه
المحسن اسمه ،، يباب

*****

ألي مثلك صفاته تكون
خشبه لكن طبعها حنون
لامسك نبي چفه نسيم

لو نسيته يمين الرسول
وتالي تعصر دليل البتول
تلبي غاية ثاني زنيم

تنفتح ليش اليدفعك ماهو ضيف
وتنتشر جمرات تاليها يحيف

لاذت بيك ام ابوها
وتدري الگوم مارعوها
بيك النار والحبيبه
بهاي المصيبه
صارت غريبه ،، يباب

*****

للزچيه دموع وأنين
ما محاها غبار السنين
وما مثلها غريبه تنوح
للقيامه ظلعها كسير
ام ابوها جرحها چبير
الدمعه منها تعادل جروح

ماسكن ليله جرحها ومايطيب
والبقى من العمر خلص نحيب

ليل الآه يا مصابه
عالمجروح صب عذابه
ويل أبويل كل دموعه
يگضيها لوعه
الكسرو ظلوعه ،، يباب

*****

بابك بدمعة عبد حَنيته
ماي وجهي بعتبتك بديته
*****

ماي وجهي والدمع لبعيني
والحنين لعتبتك يحچيني
دخيلك لبر رحمتك رسيني
حاشه ياهو توسل ورديته
*****

حاشه ياهو المنك يرد خالي
العبد عاش بدلالك غالي
هذا گلبي وانته ادره بحالي
لغير بابك راسي ما طخيته
*****

غير بابك يالرضا لا ما أدگ
ياملاذي المنه ما أريد افترگ
خارج اسوارك اذا صرت احترگ
والله والبيك اعتصم نجيته
*****

والله والبيك العگدها أبتوته
آمن يعيش الحياة او موته
أرحم النادى حسين بصوته
بسمه والينخاك ما صديته
*****

بسمه والينخاك بسمه تعينه
والدموع أدروب بينك بينه
يالرضا لصوب الحزن أهدينه
لكربله الدلال اخلص نيته
*****

الحزن يبن أمي وارثته من الزهره طبع
من اگلب اسنيني تتفايض اهات ودمع
علمتها أجروحي تتصبر بيك وتقتنع

ما ألي تره نبض بس انته
يامهجتي وبعد روح أخته
بيش اصبر الگلب لو عفته

أنه ماعندي لغيابك صبر
تفز اجروحي لو صار العصر
فتحلي اوداعك بيبان اليسر
*
ياحسين أنعادت كل ذكرى لايامي المضن
من چنت تحچيلي وعيوني شوگ ايغورگن
ينعقد مأتمنه عالزهره المظلومه أم حسن

چنه ننتحب سوى عالزهره
نذكر اشبيها جره من العصره
وانته لگليبي چنت كل صبره

اذكرك وانته حيلي لمحنتي
منو البغيابك يرحم غربتي
اذا عدوانك حرگوا خيمتي
*
من بعد گلب امي ظل گلبي يرويك الحنان
وأنا احس بوجودك الدنيه مليانه أمان
ايفرگ أبخوتنه چا بيمن يطلبنا الزمان

انه بعد امي صرت مثل امك
وانته الي صرت الهوا واشتمك
ما ألي يحله لفظ غير اسمك

اشم ابعطرك عطر امي يفوح
بعد بغيابك شيروف الجروح
اظل كل عمري لمصابك انوح
*
نفترگ لا حاشه كل لحظه عشناها سوى
نوري چان أجبينك من غيره ماريدن ضوه
كل جرح ياخويه بسماتك چانتله دوى

ماحسبت ابكربله توادعني
وبمصابك ياحسين تفجعني
يعني بعدك دنيتي تضيعني

الگلب تدري بي كلشي مايريد
يطالب گربك لا ترحل بعيد
بوداعك ادري يگطعولك وريد
*
هذا نحرك ياما شفت امي تشمه تقبله
شلون اشوفه اگبالي تتروه بدمه كربله
وعالرمح ياويلي ايعلي راسك حامله

شلون اصد عالرمح بعيوني
گوه كون انسبي يردوني
خويه فوگ الهزل يحدوني

اشيل أچفوفي التتگاطر دمه
واصيحن شوفي حسينچ فاطمه
واگلها اضعونچ ذابحها الضمه
*

مصاب الظلع واكبر بعد
الله امتحنها بالولد
ممتحنها ،، بطف أبنها
*****
أمتحان الزهره بالطف،، وذاك بسمار البدايه
علخيم عين الها كافل،،كل حياته بجود مايه
چن ظلعها الجود نازف،، محنة العباس هايه
السهم بسمار صوب ،، عالمتن حلم الضمايه

شم الهوا تحول ألم
مثل ام حسن راعي العلم
سل بدنها،، طف ابنها

*****
تنعصر وأتصيح يبني،، إبعد من الباب يمه
هيه لو لحسين بلله ،،بالجره مطلوب دمه
تواجه النيران حتى،، ما تچوي ذيال هدمه
تضحيتها وكل ألمها،، في سبيل الاسمه رحمه

غاره بأثر غاره العدو
حسين الخسر أم واخو
هذا ونها ،، بطف أبنها

*****
حادث الباب ومصابه،، ليش اشوفه الغاضريه
الزمن بس چان فارق،، والمصايب هيه هيه
عن حريج الباب أقره،، بالدمع تعرض رقيه
طفله بس نسختها فاطم،، فوگ تل الزينبيه

وجه الشبه حَير دمع
من ياهي مكسور الظلع
أقره عنها ،، بطف أبنها
*****
دار بس أخيام أشوفه،،والمدينه چنها صحره
والزچيه هي زينب ،، هالضعن محتاره بأمره
نار ماواحد طفها ،، كل جدم وآشمته جمره
الزهره بالاكبر شفتها ،، والشبه بسنين عمره

هاي انتي لو ام الخدر
متحزّمه بحيدر صبر
كل حزنها ،، بطف أبنها
*****
طلعت حسين الاخيره،،الوداع اوضح صورها
هايه زينب هيه امها،،تبچي طلعت من خدرها
هناك حيدر يرجعلها ،، هنا تسلم كون أمرها
يعني ضعف اجروح بيها،، يامصيبتها شكبرها

ياروح اخذ لمن رحل
لارض الحرب ضامي نزل
يامحنها،، بطف ابنها
*****

ربح العمر ياسيدي بتعزيتك
غير الدمع مادورت
وبهلته يامه أحلمت
مثله رزق لاماشفت ،، بسنيني

جفن اليحبك بالعلن بالخلوه هم يبچيلك
عيونه اعلذكرك غورگن وبحرگته يناديلك
ياحسين رزق اليحب
هالحروف هزت گلب
*****

ليك الحزن نغمة وتر أشواگي
من اسمع اسمك انكسر
والصفنه تاخذني بأسر
للطف وأشوفك بالظهر ،، بألآمك

اليدعي اشتاگك وضح شوگه اثر برسومه
بمصابك البيك انجرح حسراته طرزت يومه
شگد جروح أبنينوى
كلشي نار حتى الهوى

*****
ما تنحبس ماتنتهي هالدمعه
تجذب دمعتي رحمتك
يرسم خيالي صورتك
ياحاله الگه حالتك ،، ياضامي

أتخيل ارسملك نهر،، يم جدمك وتتروه
بس گتلي من بعد الگمر،،صار العذب مايسوه
دمعي چا ما ينلزم
وأذكرت جود الشهم

*****
غروب الشمس من منحرك ألوانه
دمك غطه قرص الشمس
حال الضعن مو مثل امس
ياهو الذي بجرحك يحس ،، والغربه

ياسيدي وصف الالم،، يلچمنه وايبچينه
شحال الذي شاف الخيم،، نار وچوت جدمينه
ياعذاب گلب الحرم
هذا ليل ماكو خيم

*****
غيرك منو بي تنعگد أمالي
واجب عليه ما أحب
غيرك وأسكنه بالگلب
كل أُمنياتي انحسب ،، باچيلك

عن كل نفس ممنون الك،، ماعندي غيرك غايه
بأسم الرضيع اتوسلك ،، احكم دليلي ورايه
ياحسين كل طلبتي
بمنبرك شد نيتي

*****

عهدي للمنيه ،، عاگد ألها نيه
بگلبي واليريده ،، تعلم الزچيه

منها دمعي أطلبه،، والجرحها اصبه
صوتي بالمجالس،، ألها عون أحسبه

مابيني وبينچ عيني
من تدمع يحلى ونيني
اتخيل صرخة ظلعچ
آ يبني آ يحسيني

واسيها يا گلبي انعى حسين
*****

معنى انا خادم ،، للزچيه فاطم
بيه حرگه واجب،، فزعه بيه لازم

روحي هذا املها ،، ابقى جوه ظلها
مجلسچ ملاذي. ،، بكل يقين أگلها

ياروحي نوحي أو نوحي
وياها ديني جروحي
ونتها مو كل ونه
من تصرخ يا مذبوحي

واسيها ياگلبي انعى الحسين
*****

جوهر الديانه ،، حفظي للأمانه
والامانه حيلي ،، مجلسچ مكانه

ياسُليمُ أقره ،، تغلي بيه عبره
يامصاب أبنها ،، الغريب أذكره

أنخاها كون أوياها
أتقرب بالواساها
ليواسي ينفض حيله
هنياله ونال أرضاها

واسيها يا گلبي انعى الحسين
*****

الدفعها ظنه ،، يخفي بيها ونه
الظلع يكسره ،، يذبح المحنه

حتى لا بديها ،، تلطم او نعيها
بكربله تزرعه ،، وتثمر أبچيها

والسطره تمنع عبره
وغاليها يدفن ذكره
ما واحد يذكر يومه
لو لاها جروح الزهره

واسيها ياگلبي انعى الحسين

*****
غايتي رضاها ،، أبچي وي بچاها
عالعطش دليله،، ينچوي وچواها

هايه حالة أمه ،، الجفن تلزمه
غالي من تذكره،،الظلع تلچمه

وحدها چا ماعدها ؟؟؟
ليشارك دمعة خدها
ها وينه اليفزع ليها
بمحنتها وايساعدها

واسيها ياگلبي أنعى الحسين
*****

زينب هاي والبدار نعش امها
طفله والدهر بالدمعه حزمها
بس النوح والياويل وآآآلمها
لچمه شلون آ يالباب لاچمها

زينب ماتت امها من يلاجيها
*****
يمه تصيح يم حسين حاچيني
رحتي وياچ كون وياچ خذتيني
مو دمعات روحي تسيل من عيني
يمه ليا قهر يا ضيم عفتيني

سواد عيون زينب سال بيديها
*****
شذكر لو ردت أتذكرچ يمه
غير الباب تعرض صورته ورسمه
يم البيت موحش بيتچ وظلمه
گلبي الآه صارت حصته وسهمه

لطمها شلون زينب حيل مابيها
*****
نعشچ ماتشيع ليش يالزهره
يتيمه دموعي بالتوديع والعبره
أعدد وحدي يم جنازتچ واقره
وأشوغ بشوغتچ أتذكر العصره

زينب ياهي عدها وتنشد أشبيها
*****
أومي بأيدي ماظل صوت للصايح
نعشچ يمه ابوي الماخذه ورايح
موجدمه الاثر گلبه الاثر طايح
حيدر ما عهدته هاكثر نايح

لبوها تومي زينب امي رد بيها
*****

: احيي الليله المصاب ،، وحدي بغير اخوتي
ابچي بس مالگيت ،، چف يمسح دمعتي
يايمه الذكريات ،، جابتهن ليلتي
بابچ نار وخيام ،، والطف وغربتي

ايامچ وانه وحيده
يايمه ونوحي أزيده
وامسح دمعاتي بديه
ذكراچ لوحدي اعيده

محد يمي يواسيني
وينشف دمعة عيني
والوصيتيهم بيه
هم ذكراهم ياذيني

*
چنت اهمس بالجروح،، واولادچ تنجمع
نلتم نصرخ يباب ،، آهن آه الظلع
حسين يگابلني چان ،، انعاچ ويستمع
هليله وحدي انوح ،، ينزل غربه الدمع

يايمه ومحد اليه
كافي يگلي بحنيه
يازهره ومثلچ حالي
عبراتي بسكته جريه

سنين البيهه ألتمينه
راحت صارت ماضينه
ماظل واحد يبرالي
وايصبر گلبي حنينه

*
ليصبر گلبي چان ،، عباس بنظرته
وحسين يحضنه حيل،، من يسمع نحبته
هاي اول ذكره هاي،، للباب ودفعته
مرت دون الكفيل ،، ياگلبي وكسرته

جروحچ اقراها واخوتي
تشاركني بهايه بلوتي
هسه اندار وما ألگه
كلمه تسببلي سكوتي

هاي انه وهاي الحاله
انعى لگلبي واقراله
عتبه وخيمه المحترگه
صارن ساحة خياله


*
ماظني العشره يوم ،، انخه وتعذرت
اتلفت ليش اشوف ،، لمتنه اطشرت
فرق الآه امن اصيح،، وشگد اتغيرت
چانت مابيها خيل،، وظلوع اتكسرت

عشرتنه الظلت ذكره
واسنين اتحولت عبره
رحتي وضاعت يايمه
احلامي بذيچ العصره

چانت بس آه بروحي
صارت من گد اجروحي
گلبي المحد ظل يمه
ويأمنه بساعة نوحي

أتخيل الصبر ،، كالقابض الجمر
شتخيل بهاي ،، من أذكر الماي
ياحاله حالته ،، عالغبره نومته
تجاره عيناي ،، من اذكر الماي

شتخيله شلون الوصف
طايح وسط سبعين الف
حتى الارض دم ترتشف
من نزف الجروح

للصبر يحسين حد أنته جزيته
گلبك بغير المثلث ما رويته
آخ يا ذاك الرمل لتوسديته
يچوي واكثر منه نارك ما چويته

عاده القتل عاده ،، بس لا ولا هايه
ليش العدو ناده ،، خل نحرگ الثايه

*****

شمغيّر الضمه ،، ومسايل الدمه
متسلب الحيل ،، شيواجه الخيل
ماتخلص وبعد ،، الجاي اشد وأشد
ياويلي ياويل،، شيواجه الخيل

عدوانه تتناقل خَبر
طاح وفلا ينهض گدر
ماعنده ليشدله الظهر
ماعنده عباس

وحَدك والگوم تنتظر الاشاره
غيري خيلُ الله چانت هالعباره
إحملوا بالنار وسهام وحجاره
غاره تهجم بالأثر تتبعها غاره

عاده القتل عاده ،، بس لا ولا هايه
ليش العدو ناده ،، خل نحرگ الثايه

*****

تاخذني صفنتي ،، سفرتها دمعتي
راوتني أطفال ،، بحدود الخيام
متوزعه عالدرب ،، آه ونبض گلب
حالتها يا حال ،، بحدود الخيام

يتأملون آخر حمه
يدعوله الله يسلمه
ياربنه مهجت فاطمه
تشتاگه الگلوب

ملوي سرجه من المهر رد لخيامه
يصهل وجايب خبر ذيچ الظُلامه
رجعته من المعركه چانت علامه
يعني أطفال الظعن صاروا يتامه

عاده القتل عاده ،، بس لا ولا هايه
ليش العدو ناده ،، خل نحرگ الثايه

*****

يالوالي نظرتك ،، حِيرتها خيمتك
كل هذا والصار ،، ما عنها تندار
بالعيله ممتحن ،، ماتغمض الجفن
ياحيره محتار ،، ما عنها تندار

تلفت نظرهم بالحرب
چفك تشيله من الترب
قصدوني آنه المنطلب
عوفوها الخيام

ياحسين او خالفوك بكل كلامك
أعتنوك وسلبوا يمنة سلامك
أجهز وهذا الرمح شايلها هامك
والعساكر فزعت وشبت خيامك


عاده القتل عاده ،، بس لا ولا هايه
ليش العدو ناده ،، خل نحرگ الثايه
*****

على ذكر العطش ومصاب الحسين
تعلمتي البواچي منين ياعين
لو لا الآه من گلب أم البنين
حرام أن چان دمعه اليوم تجرين

دمع عيونها أم عباس يچوينا
*****
من يوم أطلعت تتلگه الضعون
عرفنا للبواچي نفع العيون
هاي أم الوفه وين اليوافون
عالمذبوح كون وياها ينعون

للمذبوح جينه وياچ لطامه
*****
تشابيه الوفيه چانت گبور
مهظومه وعليهن بالنعي أدور
كل مصباح عدها يبدي عاشور
مكسورة گلب عالظهره مكسور

كل مصباح عدها لكربله قرايه
*****
غيرتها الشمس ما سكنة فياي
آه حسين تنعى الليل بهداي
گبلك ريت صوب چبدتي ضماي
عساني لاهنيت أبشربة الماي

أهد حيلي منذكرك عالرمل عاري

*****
ماتت من كثر ماتجري دمعات
على مصاب الثكاله واليتيمات
على الگضن ليالي بالخرابات
مشن حدايه بيهن نوگ هزلات

هزيله بغير هودج ناگة سكينه
*****

محنة ضمه ،، نار ودمه
بلون الجرح ،، جفن السمه
زينب تظل ،، من دون أهل
وي كل نفل ،، مات الامل

ظلام ،، هاي ليله شلون ليله
ظلام ،، والضعن فارگ كفيله
ظلام ،، حَير عيون العقيله

ظلام وكون زينب تجمع العيله

*****
ليلة أسر ،، تنخه الصبر
شافت خيم ،، تل من جمر
آه أو ألم ،، ون الحرم
زينب نعت ،، راعي العلم

كفيل ،، چان أمان ابهالوسيعه
كفيل ،، عينه غمضت عالشريعه
كفيل ،، آه چفينه گطيعه

كفيل وعذره سهمه نابت بعينه

*****
سمعت خبر ،، باچر سفر
مو للوطن ،، يخت الگمر
لا ياصبح ،، خلني بجرح
لوصبحت ،، بيك انذبح

أريد ،، أدفن أولاد الزچيه
أريد ،، أسكن ارض الغاضريه
أريد ،، فجري مايطلع عليه

أريد أديار هاشم ليها ردوني

*****
صوب الغري ،، صاحت علي
أحضر تره ،، محد إلي
هيمه ورعب ،، أرض الحرب
نومه الزلم ،، فوگ الترب

تعال ،، ياعلي الكرار وينك
تعال ،، خل تشوف الصار عينك
تعال،، كربله ذبحت بنينك

تعال وشوف مهجة فاطمه شحاله

*****
ليل ١١ ،، دمعه وعطش
نبض الگلب ،، خوف أرتعش
حيره حرت ،، حرمه وصرت
أحرس ضعن ،، ما حسبت

عذاب ،، فاگده وأحرس ضعينه
عذاب ،، گلبي ما يسكن أنينه
عذاب ،، أبتده بغيبة ولينه

عذاب أول مسيه حيره محتاره
*****

العذر يحسين يبني غمضت العين
بعد بيه دمع بس الاجل حان
تمنيت وردتها أطول الايام
حتى أنعاك اظل بكل الازمان
شهگت أخر نفس وي طلعت الروح
صحت يحسين يبني المات عطشان
جروحك چنت أعدها حساب بالاه
وكل آه بدليلي تخلي نيشان
هضيمه اعليك تنشف دمعة العين
وعجيبه اعليك واحد گلبه ما لان
يمن صرت الدرب لمراكض الخيل
شجاها الخيل شافت بيك ميدان
ثلث تيام جسمك عالرمل ليش
گبلك ياهو صار چفانه تربان
بعد وي الولد كون أوفي بدموع
وعلى خيامك ألي ماتطفه نيران

انوح اعليك نوح الفاجده وحيد
وعليّ يحسين گبرك صاير بعيد
لون بيدي يصح چاطرن البيد
على ترابك أموت وكلشي ماريد

لون عليك ونه تحرگ الروح
يمن ماكو اعلگبرك نايحه تنوح
عمت عيني شكثر نزفتلك جروح
وتالي تظل ثلث تيام مطروح

حلم دنياي هالدمعات،، ماعندي الا هيه
قصور النور والجنات،، مرضات الزچيه
بدمعتي وما سِواها
يقين ألگه رضاها
*****
رفع وجداني ،، صفات إيماني
علنها ومقتنع ،، سيل الدمع قرآن
نطق أياته ،، لحن حسراته
يرتل واستمع ،، سيل الدمع قرآن

ديني بهاي،، ذكر الماي
يجرح وجداني واتحسر
شلون يصير ،، خيل أتغير
وذاك الطايح أبن الكوثر
يحله النوح ،، للمذبوح
جيش وكله لسلبه تحضر
يم حسين ،، دمع العين
بلكي يواسي مصابچ يگدر

هتاف العين والاحساس ،، أصوات بجفنها
أبنها وطاح ها ياناس ،، واسوها بأبنها

نعم مجلس عزاها
يقين الگه رضاها

*****

مشيت أبنيه ،، رضا المرضيه
نجاتي وكل امل ،، بيها العمل مقبول
بذر طشيته ،، بدمع رويته
بسمها و لا وَجل،، بيها العمل مقبول

فاز الصاح ،، گلبه وناح
ربحه الآهات اليچونه
مو أوهام ،، كل لطام
عنده المجلس هوَ الجنه
گلب الشاء ،، يازهراء
خطوات الخدمه يوصلنه
شانه يصير ،، عدها چبير
من يخلص لحسين الونه

زَرع الاعمال و المقبول ،، تتزهر ثماره
رضا الزهراء مامجهول،، بالخدمه الاشاره

أذا ابچي لبچاها
يقين الگه رضاها

*****
عشت أيامي ،، هدف وأحلامي
أنال من الشعر ،، لحظة كسر بالروح
صحت مولاتي ،، ألچ غاياتي
نخيت أو أنتظر ،، لحظة كسر بالروح

صوبچ جيت ،، ما مليت
أتوسل كون تقبليني
جيت أنخاچ ،، أبچي وياچ
نار الدمعات ترزقيني
لزمي چفوف ،، خاف تعوف
طفكم والدنيه تلهيني
تنشف عين ،، وانسى حسين
من هاي الغفله تنجيني

أريد النار من أخيام ،، بيه للمنيه
وأنوح لهاي ليش أيام ،، عطشانه رقيه

بحراره اذكر ضماها
يقين الگه رضاها

*****

بكتاب أياته ،، وصف جناته
جنان الله اعتقد ،، گبل اللحد والصور
بلاها الحيره ،، حزن تفسيره
الدمع جنة عبد ،، گبل اللحد والصور

مو أنهار ،، لا أثمار
بيهن يتلذذ وجداني
لا بقصور ،، جنحي يدور
راحت روحي ونوري احزاني
طعم الاه ،، والويلاه
تاخذ گلبي لعالم ثاني
الگه اطناب ،، طفل أنصاب
وأمه لهسه يرد أتاني

انه بفردوس من ترضين ،، اقرالچ مصيبه
عزاء نقيم وتحضرين ،، ياأم الغريبه

لون گلبي نعاها
يقين الگه رضاها


*****

كل نعمتي وكل دلالي
من فضلها راسي عالي
أم الاطياب أبكرمها رفعتني بدنيتي
واجب السجده لذكرها
والله وأدخيل أم گمرها
رازقتني بدمعتي
*****

نعمة الحال ،، مو كثر مال
مختصر جوهر كلامي حب الحسين
وأم الاطياب ،، خلت مصاب
بيه ودموعي بفضلها طَرزت العين

خلت بروحي ذكر الغريب
حرگتي ونوحي لذاك السليب
دمعي سچاب

غيرت معنى حياتي
حققت كل أُمنياتي
شوگي هذا للمجالس هيه بيه زرعته
نعمه محفوف أبنظرها
والله وأدخيل أم گمرها
رازقتني بدمعتي

*****
هيه عنوان ،، باب الاحزان
بيه كل حسره بأسمها ولفظة الآه
أنوي صرخات ،، كل عزاءات
تعزيه ألها لجرحها ويلي ويلاه

تصرخ أدموعي ويلي الطفوف
ألطم أظلوعي أنعى الچفوف
أذكر الجود

ألطم أبنية حزنها
وأذكر مصيبة أبنها
طايح وچفينه ظلت تحرس احدود الخيم
ياحزن فايض نهرها
والله وادخيل أم گمرها
زازقتني بدمعتي
*****
عاشت ألآم ،، تنعى الخيام
للعقيله و لليتامه نفضت الحيل
أتعلم الناس ،، صدق الاحساس
شگدحَنينه الاه بيها صَفنت الليل

بلون الليالي ،، مجره الدموع
تنعى يغالي ،، محني الظلوع
آ يعطشان

هايه حالتها الوفيه
چنها خيمه بغاضريه
خيمه صارت كلها جمره عالعقيله من تون
أنچوي لحظه بجمرها
والله وادخيل أم گمرها
رازقتني بدمعتي
*****
ترسم أگبور ،، يمهن أدور
ياعذابي تصيح مني شماخذ البين
بين عطشان ،، وساقي رضعان
وبوجاهتها أطوفن بين جرحين

الفاتحه ألها ،، قاري وازور
وانرزق عبره ،، أجفوني تثور
فوگ الاعتاب

اطلب ألگلبي حراره
يختلف طعم الزياره
لمن أتوكل عليها كلشي عندي يختلف
حلمي أشم تربة گبرها
والله وادخيل أم گمرها
رازقتني بدمعتي
*****
والله ممنون ،، لام الضعون
عدد أنفاس الخلائق گد ال أنجوم
ترفع الشان ،، تصنع أنسان
گلبي ينخاها ويطالب نعمتي أدوم

شوصف كرمها ،، راية أمان
والله وأسمها ،، خيمة حنان
لليواسون

منها ممنون أل وجودي
ألها شكري وكل سجودي
كرمتني علمتني بحرگه ألفظ كربله
مستحيل ابلغ شكرها
والله وأدخيل أم گمرها
رازقتني بدمعتي

*****

يغفه الليل جفني مطرز أحلام
أفز واليمته چلمه ملازمه شفاي

أعد أيام جيته المحسن بشوگ
وأتخايل كبرته موسعه الفياي

صار رماد حلمي بحرگة الباب
هذا أول أخو ذبحتلي دنياي

منها وخوفي يجري بهاي العروگ
وأشوف العتبه سيف گبال عيناي

گمر أنطر وأخافن غفلة الموت
هم تنطر ليالي وتحسب وياي

ألي منچ أخو يم الوفه يصير
يشل أجروحي حسنه يهود أبچاي

موعوده بدرب جدميني تمشي
وألي بدربي كفيل يباري ممشاي

يعرض للهوا ويصده لاخاف
أله نيه يهب لو يگرب حذاي

يشع خده شمس وايضيع النجوم
أذا لمعة يحسها بظلمة سماي

أمان الرايه بيده تغطي لخيام
بسمة عينه گمره تصير وأضواي

نده جبينه عذب يرويني عباس
ما أكرب نهر لو أشتكي أضماي

أخوي الشلتي روحه بلبة أحشاچ
نبض شلته بدليلي وأسمه وفاي

احس دگاته توگف گلبي كل ما
أشوفچ كربيتي لباب بلواي

أذكر عصرة امي ومحسن الطاح
وأشوف اخيام باچر تحرگ أعداي

أذا مال وكسر من عندچ أظلوع
ظهر الحسين تكسر ميلت ألواي

تره البسمار نبله تودر الشوف
وأظل انه وخواتي بغير حماي

أحذري الباب منه لاتگربين
تره العتبه جرف وأتاني سگاي

اشوف أمي تموت گبالي مرتين
عليمن والمنايه تصير سلواي

اخو راح واخو انتظره ماريد
ميت ينولد چا ياهو حداي

اذا عصروچ يمه ودفعو الباب
معناها بحبل چتفوها يمناي

******