اطوف بذكرك اتغزل
گلب ممهور بسمك شوگ
ينبض بيك ما وشل
ملامح وردت من يوم
عودي بمايك اتبلل
علي انته العلي وعليت
كلمن بايعك أول
أتهجه اعله گد الشوگ
ثلث أحرف بيها أكمَل
علي شگد بيك وصفي يتيه
حگي وبيك ما أندل
أشوفك بالگمر واقراك
تسبيح النبي المرسل
أعاين للشمس خدين
خجلها غروب من ترحل
لان ماتانتك صليت
ندم تسليمها تأول
علي وكافي العلي مسميك
يسالفته الفلا تنمل
يلذة كل فرض مفروض
يغله البيك يتوسل
رخيصه الدنيا بس وياك
معانيها الحياة اجمل

*

اندگت اجراس الحزن يهل العزاء
بين الارض بين السمه هذا النداء
يامن سجيتكم لطم خدمه وبكاء
جمرة محرم ورثت من كربلاء

صوت اليبلغ بهلال الشهر
هوَ اليدون ياگلب انكسر
للغاضريه ،، تنعى الوفيه
دمع المحرم من أم الگمر

دمعات البدويه أم الاقمار
لحسين أتقربنه هنه الاذكار
انطينا وشركينا وي الخدام
وبجاهج رزقينا دمعات الثار

*
طف المصيبه بهالشهر تتخذه دار
تتحسر وتصبغ حزن وجه النهار
مجروحه بجروح الضعن گلبها نار
يافاطمه لكِ الاجر ترفع شعار

بصوت العليله تنعى العايله
لجود الضعينه تنوح وكافله
من المدينه ،، تصرخ ولينه
ياملگه راح يشوف بكربله

للزهره رايتها تنشرها أحزان
وتنوح اعله الفارگ اخته بصيوان
كل آه التلفظها مهجتها تذوب
والآه بمعناها حسين العطشان

*

بسم الگلبها محترگ لابن البتول
أندگت أركان العزاء وماتزول
للدمعه يترجاها من شاء الوصول
حره وأسمها لكربله باب الدخول

باب الحسين الواهبنه النِعم
لوما نعيها كل مجلس عدم
ممنون أگلها ،، كله بفضلها
هي نجاتي من يوم الندم

تتحنن تتلطف وتربي گلوب
دمعتها للخدمه مرسومه دروب
إنخاها وسلمها كل التسليم
إسألها وترشدك الحب ياصوب

*

رايتها آه لكربله والغربه لون
بَچت على حسين الصخر لبلا جفون
شمخلي بيها من ألم جرح الضعون
والعنها ينشد هايه أم گلب الحنون

ياأم مثلها وبگدها تحن
نسأل گلبها يسگينا الحزن
للماله ناصر ،، وبجرحه حاير
وبحبه هيه ضحت اغله أبن

وهبتله الموصوفه چفينه حزام
ألخلاها أعيونه تتصدى أسهام
ألطاح أعالشاطي واجروحه تصيح
هيهات أبلا جودي أوصل لخيام

*

ضاع أثرنه ،،
أحنه دمعه بصحره تاهت من ضعنه
أحنه جرحين بظهاري
ننچوي ونذكر خيمنه
وين ما نتعب غفينه
وين ما نگعد بچينه
وين ما عد الله گاع
أحنه بچاها كسرنه
للغري نوصل حلمنه
ما وصلنه،،،،
احنا ذول ايتامه مسلم
من الحوافر صح سلمنه
وماسلمنه من النياح
بالاسر ما طحنه لكن
الجدم بالممشى طاح
ليلة الوحشه ابد ماندري عنها
عشنه بالهيمه الليالي
بلا عناوين ارتحلنه
ضاع اثرنه ،،

كلشي عفنه بكربله
مابي حياة
والعطش ضيع ضعن
للنهر رحنه بأمل
ردنه الامان
نعرف الكافل وطن
اي وصلنه.
مالگينه چفوف عالشاطي تلمنه
ضاع اثرنه،،،،

بالطف اخر ما شهدنه
تسري نار بكل مكان
بيها چم آه السمعنه
نمشي وبذكرى عثرنه
مدري وين،،،
بينه ترسي الدنيا وين
يامكان بهالوسيعه
نلگه بي راحة جرحنه
ونلگه ليل،،،
ما يطالب سهره دين
ويمته نخلص من سهرنه
ضاع اثرنه

******

حسين ،، غريب ،، تجري الدموع الغربته
مصاب ،، عجيب ،، يامحنه تشبه محنته
مجلسنا ينعى مصيبتك
نطلب يضامن نظرتك

*****

بداية كل عزاء ،، توجهنا بنداء
أحضرنه يا. نبع الحزن خلي بگلبنه نار
توكلنا عليك ،، مجالسنه بإِديك
غذينه بنفاسك. يمن بسمك عزانه صار

رايتنه بسمك رفرفت ،، بسمك بده لطمنه
يا واهب الدمعه الجرة ،، غيرك منو يلمنه
أنته التشد حزمنه

رِثاء ،، بدور ،، شبان طاحوا من هلك
نريد ،، حضور ،، أنفاسك ونتوسلك
كل الحزن من عبرتك
نطلب يضامن نظرتك

*****
توسلنه و نريد ،، گلبنه ما يهيد
كون الدمع. من الگلب يتسابگ ويسيل
مصيبه أولى هاي ،، جرحها يبدي ماي
وأخرها نار. وبالضعن بلوه ابتله العليل

مافرقت هاي الحرب ،، ما أنصف العلنها
حرمت رضيع من العذب،، والأم فرغ حضنها
صاب السهم أبنها

عذاب ،، رضيع ،، من الضمه لحر السهم
عيال ،، تضيع،، شبيد العليل اعله الخيم
يادمعه واسة دمعتك
نطلب يضامن نظرتك

*****
يدمعة الوداع ،، يلوعة الضياع
دمعة أخت دمعة طفل بيها المنايه لون
جرح مامثله صار ،، مصيبة النهار
ظلت عيال ومابقه لبسده يحتمون

صار الظهر والعايله ،، هذا الكلف عليها
شتسوي كل امدلله ،، من فارگت وليها
عالشافته شبديها

دموع ،، رحيل ،، يابلوه هالضعن ابتله
دماء ،، تسيل ،، وتروي بقعة كربله
ريت المدامع عزتك
نطلب يضامن نظرتك

*****

معاني بهالسواد ،، حزن أبا الجواد
يجرح شعور اليفهمه ويلوح أله المصاب
مواسي بينه ناح ،، حسبلك الجراح
يقرالك آهات الضعن وآلامه والعذاب

ألغاضريه مصيبتك ،، لمعذبك مخيم
آ يالرضا ياحَسرِتك ،، سور الضعن تهدم
جود العذب تيتم

خيام ،، تنوح ،، ويلاه ياعمنه الگمر
الأمان ،، جروح ،، باقي على جروف النهر
نقره المصيبه الجرحتك
نطلب يضامن نظرتك

*****
تغرب الحسين ،، زلم هاشمها وين
نار او رمح غربه وضمه منهن دليله ذآب
صحبته ودعوا. ،، بنفسهم افتدوا
وأعيونه تبره. لخوته وأولاده عالترآب

أبن الزچيه الوحده. ،، ماتنوصف محنته
آ يالهضيمه والعده ،،. تتنطر ألوگعته
آخ شكبر غربته

يشوف ،،. رجال،،. متگطعه فوگ الثره
بشفا. ،،. رمال ،،. حَر وعطش لمغيره
نقره المصيبه بنيتك
نطلب يضامن نظرتك

*****

مامثله يومك ،، يبن أمي ويلا
يجرح دليلك ،، ويفطره أضما
وأكلف جروحك ،، مايحصل أدوا
لمن عضيدك ،، عالشاطي تلگا
أخر كلامي،، ويلي يضامي

الحسن نادى بالمنيه
ما مثل يوم الغاضريه
ياحسين شهاي المصيبه
وحدك أتظل يبن الزچيه

*****
أُمنه أذكرلها ،، بساعات الغروب
يطفح دمعها ،، وبذكرك تلوب
انشدها عنك ،، وتگلي مكتوب
يتغرب حسين،، ويصير مسلوب
كل مُغربيه ،، تنعى الزچيه

عن محرم أذكر حچيها
ياحسين وأذكر نعيها
تذكر أمصابك الحنينه
ذكرك امنه شمسوي بيها

*****
ياخويه جرحك ،، من كربله خيام
أنته وخواتك ،، تتشارك آلام
صيوانك يموج ،، من ون الايتام
ياوسفه ويصير ،، الشاطي احلام
بسمك يندبون،، لمن يعطشون

هاي اطفال او دللتهم
والطفوف أشگد ذبلتهم
تمرهم ايام أبمخيم
بالعطش ويلي لوشفتهم

*****
تاليها وحدك ،، يالمالك انصار
وتصير نيشان ،، لسهام وحجار
وخدك يچوّي ،، ذاك الرمل حار
كلشي يعاديك ،، حتى الشمس نار
آآآ يا مصابك،، خويه وعذابك

هذا گلبي ينبض أنينه
ياغريب المحد يعينه
محنه محنت أبن الزچيه
طايح او دم ينزف جبينه

*****
مو من مصابي ،، دمعاتي يحسين
يومك نعيته. ،، وأبتلت العين
چني اشوفك ،، مابين نارين
تعلن رحيلك ،، تضيع الصواوين
ضعنك وداعه ،، يعني ضياعه

ياحسين الحيره بمصابك
شحاله ضعنك ساعة غيابك
لو هويت وضعنك ينادي
ياحسين شيطلع جوابك

*****

هاي الليالي ،، بخيمة دلالي
لمتنه رايه ،، يحرسني غالي
*****
يهنيالي على أخواني ،، عليه محله لمتهم
شوصف من يجن ليلي ،، تصير إخيامي كعبتهم
گبل ما بالكلام اطلب. ،، جواب الگاها نظرتهم
بخوتي مطرزه سنيني ،، هواشم محلى نخوتهم

مابين أخوتي ،، الگه سلوتي
اكرم وانعم ،، تاجي ونخوتي

*****

غريبه الديره بس گلبي ،، ما ليله اختلف نبضه
كافل عندي وچفوفه. ،، من حد السيوف أمضه
طهرها الگمر طهرت ،، بحد أمخيمي توضه
جدامه الباركت هيمه ،،. خَضار تحولت أرضه

بالطف نزلنه ،، بصاية زلمنه
والگمر چفه ،، سور لحرمنه

*****

گبل عشرة هلالك چان،، ضعني تظلله الرايه
متبسم طفلنا ينام. ،، يصحه بأترف حچايه
ضعن ما مال حمله ولو،، يميل اخواني تچايه
عين وبالدلال تفيض. ،، جود وما فرغ مايه

جود الكفاله ،، يجري دلاله
عم الضعينه. ،، محلى خصاله

*****

عرش بعيوني صيواني ،، جفون أخواني حدينه
اصبّح كل فجر ألگه ،، فجر هيبة محامينه
شمس من تطلع العباس،، ضواها يعكسه بجبينه
ابو فاضل وهبني چفوف،، وقف للخدمه چفينه

جبينه ضوانه ،، منه هوانه
بأسمه ونخوته ،، رفرف لوانه

*****
اي هذا الدلال وهاذ ،، حالي بهيبة أخواني
شبه ما ألهم بهالناس ،، ولا يحصل خدر ثاني
يليلي هم گبل سامع ،، گبل ما تبتدي أحزاني
سهرتك لو شكيت الحال،، گلتلك دهري لاواني

بيهم يليلي ،، سالم دليلي
ما اشكي وانه ،،، عندي كفيلي
*****

يالعليله حسينچ أشگال
وأقتنعتي بغربة الحال
رضيتي،، ودمعتچ جريه
رضيتي،، والصبر منيه
*****

چم عذر أنشد سمعتي ،، من سألتي ضعونچ
يالعليله وما قنعتي ،، وحدچ إيخلونچ
بالسفر يا ما حلمتي ،، وياهم يحسبونچ
حملوا وأنتي طلعتي ،،. والعتب بعيونچ

دمعتچ دمعهم ،، يتفسر إغياب
نحيله ودربهم ،، لفراگچ اسباب

الضعن قدملچ أعذار
وَدعوا وبگلبچ إشصار
نعيتي ،، ونبرتچ شجيه
رضيتي ،، والصبر منيه

*****
گوه جدمچ يخطي خطوه ،، بس وصلتي الغايه
توسطيتي بين الاخوه. ،، جوه ظل الرايه
أضعن بحيل الله أگوه. ،، أخذوا مني حچايه
ليش أرد شباقي يسوه ،، من هجرتو الثايه

عليله ومنيتي ،، لو عني تمشون
حچيتي وهويتي،، ما بين الضعون

گلبچ براگ العلم طاح
شلون أرد وشوگي ذباح
خطّيتي ،، بخطوتچ عزيه
رضيتي ،، والصبر منيه

*****

وآلدچ خانگته عبره. ،، وأنتي آه گباله
بادلچ باللحظه نظره ،، منكسر دلاله
ضمچ حسين اعله صدره ،، تغيريتي بجاله
شگال وانتي صرتي بأمره،، ورتضيتي الگاله

همسلچ كلمته ،، غيرلچ اللون
انشغلتي ابسمته ،، لو حسن العيون

عاوديتي والابو وين
للطفوف توجه حسين
بقيتي ،، بدارچ الخليه
رضيتي ،، والصبر منيه

*****

ياصبر فَرَغ دليله ،، وانتي بين احضانه
ودع ويمسح دخيله ،، دمعتچ بردانه
بويه گلچ يالعليله ،، ما تجين ويانه
وانتي سلمتي لرحيله ،، وبالدمع غرگانه

رضيتي عجيبه ،، ماگلتي وياك
بقيتي غريبه. ،، واترجى ملگاك

گلتي يمته وي هلي تعود
وأغفه بويه بحضنك ردود
بچيتي ،، من مشت رقيه
رضيتي ،، والصبر منيه

*****

للسهر يبقى رضيتي ،، الجفن كل ليله
من اول وداعچ بديتي ،، والدچ تبچيله
الظعن سار اشتكيتي. ،، الالم برحيله
بالدمع آخ انحنيتي ،، والجفن دم سيله

نزلكم يهلنه. ،، وحشه عليه
نعيت المحنه ،، وعيني جريه

وَحدچ كل ما يمر ليل
والسهر ما خله الچ حيل
صفيتي ،، للسهر سبيه
رضيتي ،، والصبر منيه

*****

جمرة حنين الدموع اجريها
دونك حياتي حسين افنيها
بالدمع ام البنين
شيدة عالم حزين،، ينعى الحسين

*****

يا أغله غالي ،، هاي أنا حالي. ،، وأنته بعيد
سلوة دليلي ،، صارت عويلي. ،، هيهات أهيد
بيه الاماني ،، أنطر وأتاني. ،، ملگاك اريد
شاغلني نوحي ،، بعدك يروحي ،، ميته أكيد

دمعتها بعد حسين محد وصفها
دمعه وسواد العين لون إبطرفها

ذبِلت،، هَلت،، عيني ودمعها مهجة أگليبي

شاغلها عن الوجود أفراگه
بكثر الدموع التصب تشتاگه
مابرد ذاك الحنين
شيدة عالم حزين،، ينعى الحسين

*****
دارك أگصده ،، عنك أنشده ،، ألگه الجواب
يشكي بغيابك ،، ومغطي بابك،، ذاري التراب
فاگد مضيفك ،، ريحة رغيفك،، ياكرم غاب
كل اليودك ،، برسومه بعدك ،، لون المصاب

عمداً أدگ الباب والبيت أنشده
وين المحنه البيك وين الأوده

أبره،، وأقره،، آ يا غريب الهاجر أدياره

صفنه وأنين أو حنين أبابه
دارك گصدته وأشم أترابه
ناحت أيام وسنين
شيدة عالم حزين ،، ينعى الحسين

*****
لا گلبي يبرد ،، لا جرحي ينشَد ،، لا أنته جاي
غير أنتظاري. ،، ليوم إحتضاري ،، ماعندي راي
يبن الزچيه ،، نار الي بيه ،، ذوبة أحشاي
حتى البوادي ،، تسمع شنادي ،، يبني وغلاي

لمصوب من أفراگ شيداوي علته
بس شوفة المحبوب هيه التسكته

جروحي،، بروحي،، غيرك يايمه من يداويها

شوگ وعذاب أنتظار الوالي
حگها وتضيع أبوداع الغالي
من كثر ذاك الانين
شيدة عالم حزين،، ينعى الحسين

*****
يجرح شعوري ،، يهدملي سوري. ،، كل حيلي مال
يوصلني منك ،، ياضامي ونك ،، مثل الخيال
بالون لمحتك ،، متفطره شفتك،، وادماهه سال
تكبر بلوتي ،، واندب نخوتي ،، أربع رجال

وين المدينه او وين يالغاضريه
بس كل جرح بحسين جرح الوفيه

چني،، أبوني،، شفتك َوحيد او ضامي بالحومه

بيه يبان اختلاف ألوانك
يبني أحس أبوداع أخوانك
من گلب بالهم رهين
شيدة عالم حزين ،، ينعى الحسين

*****
أنعى وأراقب ،، منتظره غايب ،، ما لمني دار
بالهيمه داري ،، وشمس الظهاري ،، تتبده نار
يحرم عليه ،، فيّ الثنيه ،، طول النهار
وجداني يدري،، السميته عمري ،، بجروحه حار

أتنعم أبفي بيت ما أقبل بهاي
وأبن الزچيه أسهام صارتله لفياي

نارين،، يحسين،، ضماك وغربتك تستعر بيه

نار وسهام او رماح أتلوحه
يروي الرمال أبنزيف أجروحه
للگضه أبلايه مُعين
شيدة عالم حزين،، ينعى الحسين

*****

من ذَالذي گلبه أستعد ،، يتسمى خَدآم
ينوي الدمع غيمة بَرَد ،، بحدود ألخيام
نيه برسومه تبان
لو ذكروا العطشان ،، بحدود الخيام

*****
المحرم والخدم......
چنهم مثل قوس وسهم
نيشانه يوصله بضباب

هذا المحرم واليحب ،، ماعنده بس هالغايه
يعدم مطالب دنيته ،، ويشيل دمعه الرايه
لايبقى ريشه بالهوا ،، وتميله كل أحچايه
وجدانه كون إيحركه ،، ويصير صوت قرآيه

كل الجوارح تمتثل ،، للمدمع الراي
يتلگه عاشور اليهل ،، ويعاتب الماي
يا أول الاحزان
لو ذكروا العطشان ،، بحدود الخيام

*****
المحرم لليحب......
دمعة صدگ ترسم درب
آه الجرح تفتحله باب

وجّه شعورك كربله ،، توصلها لمن تنعى
الحسره ترفع دمعتك ،، أنويها غيمه الدمعه
هلبت تظلل من شمس ،، لو حرها لحظه تمنعه
وأتمنى لو ظهر العطش ،، عن الخيام ادفعه

هاي أُمنيات المحترگ ،، دلاله لحسين
يتمنى يحسبها صدگ ،، وإيمطر العين
جفنه يفك بيبان
لو ذكروا العطشان،، بحدود الخيام
*****

المحرم ياخلگ........
ماعايش المنه افترگ
مات ويظن ماي السراب

عَشرة ليالي يالمحب ،، خدمه ودموع إحييها
عيش اعله گد ما محترگ،، والجمره لا تطفيها
فرصة وجودك خدمتك ،،حس بالخيام شبيها
يا ليتنا المو من صدگ ،، ما تچوي لا تحچيها

بين المخيم والعلم ،، متگطعه زنود
صفنة طفل ومتاني عم،، مايرجع بجود
وين اليشب نيران
لوذكروا العطشان ،، بحدود الخيام

*****

المحرم عالمك......
مفتاحه دمعه توصلك
شيل العلم حَل المصاب

حضر دِليلك واستعد ،، للمغترب بضعونه
الدمعه تنعد نصرته. ،، قله الذي ينصرونه
باچر على حدود الخيم ،، وآلد تهل عيونه
يذبل دلاله بالمهد. ،، بالاكبر ايذبحونه

من صاح الا من ناصرٍ ،، حتى أنته مشمول
ضحالك بأجمل ابن ،، عمره دللول
يوم العزا قد حان
لوذكروا العطشان ،، بحدود الخيام

*****

المحرم والطفل......
فطرة گلب حلقة وصل
مادور الحب بكتاب

رد اعله فطرة مولدك ،، عالمفترض لا تكبر
الواجب يظل واجبك ،، خاين اذا تتعذر
چان ادعِائك عاهدت ،، عالدمعه ما تتغير
حان العزاء وفاطمه ،، نشرت سواد المنبر

وينه اليعاهد فاطمه ،، المذبوح ابنها
نشرة قميصه بالسمه ،، راية حزنها
وينه العلي ماهان
لو ذكروا العطشان ،، بحدود الخيام

*****

گبل كربله. ،، وعذاب الضمه
تواسي ردت. ،، ابن فاطمه
وبحنينك يابو طاهر تحترگ لحسينك

*****

من حنينك ،، چف يمينك
هدمت كوفة أميه
تدعي ربك ،، تگضي حربك
تدعي وآمالك نديه
من حياتك ،، امنياتك
توصل الها الغاضريه
نار صاير ،، يابو طاهر
شوگك لابن الزچيه


يليث الحرب ،، دليلك جمر
بعيد وتحن ،، جزيت الصبر
هدمتها الكوفه كلها والنعم بيمينك


*****
صوت روحك ،، من جروحك
يهتف بحبه لامامه
انته وحدك ،، واليضدك
گطعت دروبك سهامه
بيا وسيله ،، تعتنيله
توگف تحامي الخيامه
بعيد عنه ،، صوره منه
طفك الكوفه علامه

أماني بقت ،، يصدها سهم
تجي لكربله ،، تحامي خيم
عالفواطم يابو طاهر ليل تحرس عينك


*****
ها يمسلم ،، غربه ترسم
لمن لوحدك تنازل
ياغربته ،، كل صحبته
ودعو حتى ابو فاضل
لا بنينه ،، التعينه
لا وفة عهده القبايل
هذا همك ،، خله دمك
من جروحك نار سايل

حناك الهظم ،، عذابك نهر
على المشرعه ،، يطيح الگمر

حزام ظهرك من تفگده ياهو ليعينك

*****

گبله رسمك ،، لونه دمك
والظهر ماخله لونك
ياحميتك ،، هايه نيتك
تريد مثله يعطشونك
باقي تقهر ،، بلايه اكبر
وبجماله يعذبونك
اعتذرته. ،، ما شبهته
لامخيم لا ضعونك

شبه ماالك ،، بعذاب الولد
يگلك عطش ،، دليله انمرد

گبال عينك لونه ذبل زهرة سنينك

*****
من تحارب ،، هالكتايب
تذكر حسين بمحنته
جرحك بهاي،، لحظة الماي
گالو اشرب ماشربته
الدمع السال ،، عذبك حال
صورت حسين بغربته
كلشي ضحيت ،، انته واسيت
بالرمح راسك رفعته

مواسي ونعم ،، رفضت العذب
غريب اذكرت.،، عطش بالغرب
من قصرهم عالترابه تبدي خدينك

*****

بلا رايه ،،
يزينب وحدي راجعلچ بلا رايه
بلا مايه ،،
عضيدي طايح أو جوده بلا مايه
هِدم ثايه،،
كفيلچ من وگع يختي هدم ثايه

يزينب خسرنه ،، على الماي گمرنه

يزينب شبابه توسم جروح
كعبتي عذابه أطوف وانوح
گمرنه مصابه سلب مني روح

*****
اخذ حيلي ،،
جرف ماي النهر خويه اخذ حيلي
گمر ليلي ،،
لگيت اشفافه متفطره گمر ليلي
صحت ويلي ،،
لمن شفت العمد خويه صحت ويلي

طفه كل ضوانه ،، فگدنه أمانه

كفيلج يحره بعد ما يعود
وگع عالشريعه بلابه زنود
يويلي اعلهامه جرح للعمود


*****


نده جبينه ،،
خجل يرسم على الجربه نده جبينه
غمض عينه ،،
گبل ما ودعه خويه غمض عينه
على ونينه ،،
نهدم حيلي انكسر ظهري على ونينه

لگيته شلگيته ،، عضيدي بمنيته

وصلته يزينب لگيته يون
جماله تخضب بدموم الجفن
علشاطي انحب لعيونه احن

*****
بقت حسره ،،
بدليل الي كفل اخته بقت حسره
خلص عمره ،،
ولا بسمي لفظ مره بقت حسره
فضت عبره ،،
طحت فوگ الترب يَمه فضت عبره

گطع گلبي وني ،، لان ما حظني

تحسر دليله لان ما گدر
يگوم اعلحيله اخوچ الگمر
يزينب رحيله كسرلي الظهر

*****
حرت بأمري ،،
عگب چفين ابو الغيره حرت بأمري
فدا عمري
يريت الموت بادلنه فدا عمري
اشد ظهري
اذا مو بيده ما اگدر اشد ظهري

رجعت وخطوتي توضح بلوتي

اصد ال خيمنه. ظلام الخيم
يهيبة زلمنه يزود العلم
يفيي ومحنه. يستر الحرم

*****

يا اهل بيت النبوه ،، طبتم وطابت كربله
الخدم عالمها ضَوهَ ،، صب الدمع الكم حله
اليحب منكم تروه. ،، الكم يشد الراحله

كربله بيها الهوا يجلي الگلب
اليحب منها ارتوه عذب العذب
هالدرب ماغيره ل الله هالدرب

*
الهدايه من خيمكم. ،، نورتو ألها بالدمه
النجاة بفي علمكم ،، بالچف ثمنها والضمه
حاشه ماخاب السألكم ،، انتم سند انتم حمه

ياخلاص المحتمي بسد العلم
يامجيبين الدُعا يهل الكرم
ياحقيقه كلشي عاداكم وهم

*
أصطنعكم الله لجله ،، آله واسمه والصفه
حكمته وميزان عدله ،، عباده انتم واكتفه
التبعكم شانه يعله ،، فايز الثوبه الوفه

يلگه روحه بمجلس حسين الحضر
دمعه رتب الاثر فوگ الاثر
نعمه دامت لليوافيها وشكر

*
مدعين الكم خدمنه ،، ماعن ذكركم نفترگ
الجره اعليكم لچمنه ،، خلونه مره نحترگ
عدكم أوريت انقبلنه ،، او تنحسب لحظة صدگ

لو نفس من إدعانه ينقبل
رحمه هايه وبعطفكم ننشمل
من صدگ كون الدمع الكم يهل

*
إلكم إيوجه دليله ،، يعقدّها الكم نيّته
حاجته بأسم العليله. ،، ماتبرد الكم دمعته
هذا مجلسكم دخيله. ،، دين الله كله ورحمته

رحمة الله أنتم الما الها حد
وبذكركم يعني اسم الله نحمد
اسمه مؤمن كلمن بحبكم شهد

*

ياخيام.....
ماكو بعد ،، سور وعمد،، ياخيام
ياخيام......
ثبتي صبر ،، هذا ظهر ،، ياخيام

كفيل ،، مايعود ،، مايعود

*
كل حنان وهيبه وأترف إحساس
وزع بصيوانه.چفه عباس
ياخيام اصياتچ كلها نوماس
صيري لل بكتارچ درگه والطاس

الكفيل الدگ وتد حيلچ يخيمه
طيحتچ لو ما رجع أكبر هضيمه

چفه راح .......
انتي وطن ،، احمي ضعن ،، چفه راح
چفه راح........
للي ضمه ،، ظلي حمه ،، چفه راح

كفيل ،، مايعود،، مايعود

*
ياخيام الكافل كربله نار
مابقت للعيله چفوف نغار
من حنان عيونه انتي آثار
بالفله ماغيرچ. للحرم دار

مطرزه بهيبة أخو وبذكرياته
أنتن بعين الگمر فيّ الخواته

للأمان........
الخيَمه گلب ،، من الغرب،، للأمان
للأمان........
تبقى حرم ،، خله خيم ،، للأمان

كفيل ،، مايعود،، مايعود

*
ثبتي هذا العايل فَزع الخيل
گاعچ ألتزميها شما إلچ حيل
من الشمس للعيله فَيّچ الليل
هيمه هاي وبيها ويل ياويل

شدي حيلچ الضعن فازع عدوه
أنتي آخر مابقى لطيب الاخوه

هايه خيل...........
هذا طفل ،، گلبه وجل ،، هايه خيل
هايه خيل.........
ياهو يصد ،، جيش اليهد،، هايه خيل

كفيل،، مايعود،، مايعود

*

كل گلب ياخيمه چويته وداع
من رحل عباسه أول اضياع
هسه غيرچ ماكو باقي مناع
أطفي لا جمراتچ تملي هالگاع

انتي ماغيرچ حمه لظعن العقيله
لا تصيرين الجمر وتسحگه عيله

لا يضيع......
حرسي جدم ،، عمره حلم،، لايضيع
لا يضيع........
عمه رحل ،، أنتي أمل،، لايضيع

كفيل،، مايعود. ،، مايعود

*
الظهر ساعاته. نار وجروح
والعطش بالفاگد يذبح الروح
ظلي للواليها ضامي مذبوح
بسدچ من الغربه تگعد أتنوح

ياخيم هاي الحرم ماعدها وآلي
ظلي لو بس للدموع الي تلالي

تبچي وين..........
صعبه مره ،، بهيمه تره ،، تبچي وين
تبچي وين........
شلون وتون ،، أم الحزن ،، تبچي وين

كفيل. ،، ما يعود. ،، مايعود

*

أبچي وللعفتهم عيني تندار
أظلن لو أودع گلبي محتار
هذا أول صبح ماعندي بي راي
للگيد الامر ما أگدر أختار

راح أودع مو بديه
راح أودع الغاضريه
خطوه خطوه گيدي گلي
بيدي امرچ ياسبيه

مشيت لخواني ألتفت
بدموعي صحت
گلتلهم رحت


*****
ألمن مادرينه بينه يحدون
غير الهيمه ما شفنه بالعيون
مامِتعوّدين بهزل انطوف
ولا غير الاهل نسمع يأمرون

كلمه تجرح كل ضعنه
كلمه تجرح مو لهلنه
ظل ورانه عالشريعه
عطف أخونه من رحلنه

وداع كافل عيلتي
غير حالتي
تذبح غربتي

*****
بآثار الهزل دمعات الايتام
الچف والحبل عشرتهم آلام
هاگد بالسبي تتفتح اجروح
مدري يادهر ليامنه شضام

عالهزيله طفله تنعه
عالهزيله كلها دمعه
تبره عيني كل يتيمه
ون گلبها انا اسمعه

جروح ياحدي الهزل
من حبل لحبل
الون متصل

*****

نبعد والخيام آثارهن وين
دخان بسمانه تشوفها العين
نمشي وذكريات اليمشي مجبور
ترسمها مدامع على الخدين

دمعه ترسم كل دلالي
دمعه ترسم هذا حالي
خيمه بيها كلشي عفنه
رحنه عنها بلايه وآلي

خيام عفناها جمر
ودعها الخدر
والنار العذر

*****

راحتنا بخرايب والسگف ليل
وتراب اليسر وي الدمع سيل
ما اغمض جفن اتفگد اجروح
كل جرح بيتيمه ياخذ الحيل

من خيمنه للخرايب
من خيمنه للترايب
هذا دهري هذا حكمه
ماذخرلي بس مصايب

ظلام والديره غرب
عيله بلا ذنب
يسروها بحرب

*****

بلايه موعد العزاء ،، للحياته كربلاء
بسكتّه يدوي نار

هايه حالت الجزوع ،، مو شرطها بس دموع
أبروحه يلكه ثار

عهوده لحبيبه لجروحه خالص عبرته
وجوده المصيبه بس الها يعقد نيته

كل دمعه خالصه يجريها
وآهاته جمره مايطفيها
ماينسى سيده ولا ثاره
وعهوده بلطمته يوافيها

*

مصدر احزان الوجود ،، گطره والبدّآها جود
منها التعازي صار

لحظه عيش بهاالسنين ،، من صدگ حس بأنين
خيمه أحتوتها نار

عَلمهم جربته كون بمدامع تنذكر
طفلهم دمعته تكسر خواطر الخدر

ابو فاضل المجالس شرعه
من جوده طاحت أول دمعه
ماتوگف تعزيه لخيامه
مايبرد بِسمه صوت الينعه
*

مظهر الحب مو كلام،، وادعينه بالغرام
معنى العشگ عذاب

اليحب عايش غريب،، ذايب بذكر الحبيب
يتنفس المصاب

ضحكته حزينه ما بارح ألسانه الذكر
عبرته. انينه لو منه راحت يحتضر

منو بينه واصل لهلحاله
كل عمره المصيبه گباله
مو كلمه العشگ للعاشگ
مطلوبه بالعشگ افعاله
*

الگلب تهذيبه كون ،، خدمة اليخدم ضعون
وبنية الوصال

بيني ما بين الحسين ،، أذكره وتجريلي عين
لمصيبة العيال

أخدمه اعله نيتي ريت بمراضيه طحت
اكلمه ومُنيتي من گلبي بحروفه صحت

مو كلمه وادعيها الخادم
عنواني بأختيارك لازم
انويها نيتي وانته بكيفك
وبگلبي ياحسين العالم

*
أطلب لحد الممات ،، رزقي حسره بالحياة
بيها انچوي عليك

ياحسين اطلب واريد. ،، ليله گلبي مايهيد
خله عبد بديك

دعائي طلبتي ريت احترگلك سيدي
ندائي عبرتي بيها اعله طفك اهتدي

تچويني ياحسين بروحي
وبذكرك كون يّبس لوحي
ياريته ينشغل دلالي
لمصابك ماابطل نوحي

*

بيني المسافه وبين
الملگه دمعة عين
طفله بجفن سهران ،، امنيتي اشوف حسين

*
من الخيم للشام اجري الدمع آمال
طفله ورسومي جروح وين اليغير الحال
غيرني فگد حسين فراگ الابو كتال
ماادري بي مذبوح نتلاگه گلبي الگال

يابويه ليش اتروح
عگبك بقيت اجروح
جيت بسبي للشام ،، بحضنك أامن الروح


*
متحمله مشي الليل غاية دليلي حسين
اعثر واگول تهون باچر تشوفه العين
شمس الظهر نيران شمسويه بالجدمين
والمثلي يمشي شلون ومچتف ابحبلين

بيه الشمس نيشان
وبيه جمر صيوان
امشي واحس الگيد ،، بيدي اشتعل نيران

*

نتلاگه گتلي وجيت وشگد بنيت احلام
اولها اشمك حيل. وانفض تعب الايام
وارد اشتكي من الگال عني بخرابه تنام
وذاك الي شفته يصيح بالطف احرگوا خيام

اكبر حلم ملگاك
تسأل واگلك ذاك
يابويه صاب العين ،، ويزجرني من انعاك

*
أول دخول الشام گرَب أحس ملگاك
چا كون أشد الحيل عالشفته من إعداك
كلمه وحجر لصواب عَجِل عليه أنخاك
كافي الحملته انوب يابويه اريد احماك

وگفتها يالوعات
بوابة الساعات
أوكف واطيح وكون ،، احمل حچي الشمات

*

يتشافه جرح الشوگ وأنسى الحصل وياي
عطاشنه ألك يحسين يابويه طفي ضماي
گالولي روي الشوف كل ظني كلك جاي
جابو طشت والراس شبحت اله عيناي

لا بويه ماظنيت
مايجره لتمنيت
هسه الحلم لا غير.،، يمك اموتن ريت

*

حنه وحبل ،، زفه وهزل
والمشيه للشام
كحلك دمه ،، بعالي السمه
راسك يجسام

ماتت بالعطش فرحتك
بدلوها برمح شمعتك ،، والمشيه للشام

*

تنعلگ للزفه شمعه مو مخيم
مُفترض وردك تنثره تناثر الدم
العطش فطرها شفتك من تحزم
أنذبح بالعشره عرسك من محرم

شمعك طفه ،، عرسك صفه
للوالده ويل
گلب أحترگ ،، ياس انسحگ
إبحافر الخيل

بالعاشر شمس چوتك
بدلوها برمح شمعتك،، والمشيه للشام


*
كل شباب بزفته أهله توَصله داره
وانته راسك ويه ضعنك بالصحاره
من الشمس گلب امك اكثر تدوي ناره
هيه وانته تماشي رمحك بأختياره

مُنيه وحلم ،، عرس الشهم
ظل حسره بالروح
خله الرمح ،، بأمك جرح
مو مثل الجروح

منها كربله خذتك
بدلوها برمح شمعتك ،، والمشيه للشام

*
هذا شوباشك ترايب غطه رسمك
والدرب للشام تنعى عرسك امك
چانت أُمنيتك فرحتي وضاع حلمك
وأنه چانت هيبه داري بهيبة اسمك

ذخر العمر ،، فيّ وستر
مامثله شُبان
طاح ورحت ،، ابچي شفت
بخدوده تربان

يايمه بيسر تبعتك
بدلوها برمح شمتك،،. والمشيه للشام

*

كلمة أمبارك مأتم كل خرابه
والصواني وياس عرسك عالترابه
عالهزيله امك گلبها ياعذابه
تصدلك ودمعتها تصرخ ياشبابه

بلون الترب ،، ريح التهب
جاستك أسموم
ألمن تصد ،، خد الورد
مو ذيچ الرسوم

من فوگ الهزل نعتك
بدلوها برمح شمعتك ،، والمشيه للشام


*

يارمح هونك تگله وي دلالي
ميلتك طشت تعب سهر الليالي
چم ظلع گد ما أصدلك إنحنالي
من سنين أرباي كلشي ما بقالي

تشوف الضنه ،، بعالي القنه
يوميه ويلاه
چا يا گلب ،، حگك تشب
وأتذوبك آه

ظني لكبرتي ذخرتك
بدلوها برمح شمعتك. ،، والمشيه للشام

*

آنه دمعة إنتظار
علتي شوگ وسجني دار
يمضي ليلي والحنين
يهلي الكم بيه نار

يمته تفتح بابي كلمه بصوت أبوي
يمته عيني يرد ضواها بشوف أخوي

والله مشتاگه بكثر مابيه آه
حالي حال اليبست عروگه بضماه
يمته عالدار الضعن يطلع ضواه
*

هم دريتو شگد أنوح
أنشغ او تطلعلي روح
يهلي حتى الامنيات
بيه تتحول جروح

يهلي ياريت أبضعنكم هسه كون
وبيده يمسح راسي وآلدنا الحنون

بيكم أصفن صفنه ياخذني الخيال
چني يمكم بين أحضان الدَلال
أنتبه وألگه الجرح مابي وصال


*
بالهظم يطلع نداي
يهلي دلوني اعله راي
لاخبر منكم وأگول
هانت الفارگني جاي

گبلي ياعين الجرت هلگد دموع
أو يا گلب فاگد مثل گلبي يلوع

دمعتي بلون الشمس وكت الغروب
صفنتي عيون انتظار اعله الدروب
بحسرتي يذوب الصخر والمايذوب

*

أنشد او سكته الجواب
ألچم إبروحي عتاب
ماتبعت أضعوني ليش
أرتضيت احمل غياب

أدري ما ينفع بعد عتبي يروح
لكن إبجرح انتظاري وين اروح

ياجنح طاير أنشدگ لا تكول
بيني مابين اهلي ماتصلح رسول
مُرهم وشوف أشجره لأبن البتول

*

داري تتفطر حنين
چنها مهجوره سنين
بيتي حاله وحالي صار
يمسي وإيصبح آنين

كلشي صار بهالنزل مابي حياة
حتى گلبي نبضه ماضي الذكريات

بالحزن متقيد إحساسي اسير
والصبر من نار شوگي مايجير
آنه حسرة وحشه والخاطر كسير

*

علئ كد جرحي احلم
اذا احضرلي مأتم
ادك لزهرة باب ،، واتاني اسمع جواب

سألتها دمعي يرهم
يطفيلج مخيم
واعينج ع مصاب ،، اتاني اسمع جواب

حلمي هذا ياريت اعين الزهرة
عالمصاب واتبده الها بحسره
منها راح غالي وتفرهد عمره

يازهره الخيم ،، محروكه الخيم
كلبج ويلي نار

*****

بدموعي مو بديه.
ادك باب الزجيه
وأطالب بالدموع ،، تخليني جزوع

وكلها خلي بيه
جرح للغاضريه
صدك كون والوع ،، تخليني جزوع

اه اريد يافاطمه لسنيني
شكد اعيش تلازمني دمعة عيني
ياحسين بهذه الاسم هيمني

هيميني بجرح ،،. لوعيني بجرح
لدمعي فتحي باب
*****

الج يالزهره خييمه
حرم بيها ويتيمه
. غرب وألطف نهار ،، بخيالي هذه دار

صحت لو شيبي غيمه
يفيض مايه هيمه
مطر ويطفي نار.،،. بخيالي هذه دار

شعندي غير. حركه والج احجيه
كطره كون عالخيمه روحي اجفيها
تضل خيال أحلامي عايش بيها

يانار الضعن ،،، اه أعالضعن
اه حسينه راح
*****

سواد اليل اجلبه
وكله بروحي رغبه
بزمن ذيج الخيام ،، ياريت انه الظلام

نهار الحره رهبه.
الجفن فرگه تخضبه
الضوه فراگ السلام ،،. ياريت انه الظلام

ليل اصير وابلا نهار العاشر
والخيام ماتحترك ياباجر
امنيات جفني عليها مساهر


زينب والنهار. ،، يذبحها النهار
غريبه وهيمه هاي
*****

يافاطم لمن اصفن
ضعنكم شفته يضعن
لجن وين الكفيل.،، ال على الهزله عليل

اخو الهن يودعن
سلام وهنه يمشن
غصب صار الرحيل. ،،. ال على الهزله عليل

ياوداع وبيا دمع ودعنه
وعالتراب شلون الولي شافنه
ضل سليب ياهو الرضا يدفننه

هذه اسمه وداع ،، مو هيج الوداع
هاي جروح اسير

*****

نعي شهادة الامام الحسن المجتبى

هذا حسين ماهو حسين
يضيعه ال بالوجه صده
حگه وشاف شوف العين
أخيه وبالطشت چبده
عالمسموم ماراضين
يدفنه يم گبر جده

بعد فوگ الچتل يردون
يبعدون الذي يشيعون
نعش وصار مرمه سهام. گلب حسين شيبرده

*

نَحب لحسين عالمسموم
يوم النزله الگبره
وگف متخوصر ومالوم
ينشغ والدمع جمره
آحا يالحسن مظلوم
رايح لأمك الزهره

لمك گلها ظل حسين
والدنيه غرب صوبين
گلها والتريده الناس من حسين دم نحره

*

ردينه من اليسر ردينه
لا واحد أتلگاني ،، چاوينهم خواني

*****
رديت وضعوني تحمل أحزاني
بدموعي اشكي يهلي مو بلساني
لوعني درب الشام ياولياني
اسكن خرايب باليسر خلاني

دمعاتي يشتكن دمعاتي
ويسولفن بجروحي ،، يبن امي يامذبوحي

*****
چم ديره عالنوگ الهزل مرونه
ولا شامت الغضت بصرها عيونه
أحفر لحد كل ليله لو نزلونه
چم طفله بدروب اليسر مدفونه

أيامي عالهزل أيامي
من ديره ادخل ديره ،، محنه محنتي چبيره

*****
يالشام حادينه هتف ناداها
هاي الضعينه عالهزل جبناها
چلمة سبيه ياهلي شينساها
راح ابقى عمري عايشه وياها

مسبيه ياهلي مسبيه
ماچان ابد بحسابي ،، بسمي يصير أصوابي

*****
كل موقف بگلبي اثر نيشانه
شفت العذاب آنه بجميع ألوانه
شلون الذبحكم نوگف بديوانه
يذبحني لو اسمي جره اعله لسانه

دلالي ينفطر دلالي
بمجلس غرب وگفوني،، انه وبقايه ضعوني

*****
بيه جرح دمعاتي ما واصفته
موقف دهاني يهلي لمن شفته
شلون الرجس يضرب اخوي بشفته
ولمجلسي يگله خدركم جبته

گدامي ينضرب گدامي
طشت الذهب ياويلي ،، شفته وأخذ كل حيلي

*****
يبن امي من ديرة غرب ردينه
دمعه اعله گبرك فضنه وتبدينه
ماتت رقيه وچانت توصينه
ياعمه نوحي لوالدي توصلينه

توصيني ماتت توصيني
ذكريني يم الوالي ،، ياعمه واحچي شحالي

*****
وصتني گالت عمه لو رحتيله
بهاي العبايه عالگبر فَييله
عني البلايه وداع صار رحيله
مشتاگه ماتت طفلتك گليله

يابويه دمعتي يابويه
گد ما بچت مشتاگه ،، ماتت حزن بملاگه

*****