عيونه ماشافت نهار
السجن صايرله دار ،،، كاظم الغيض

بليل گضه غربته
مات حسره لعمته
*****
الضوه مذبوح لونه ،،عاش بس لون الظلام
للسجن نجمات صارت ،، تلمع ادموع الامام
بلا نهار أسنين حبسه ،، عام يدفع ليل عام
يعني كل ايامه وحشه،، وحسرته تطلع خيام

السجن چن خيمه صار
بيهه ماتطفاله نار ،،،، جمره لدموع

سجنه ليلة وحشته
مات حسره لعمته

*****
الكاظم بصفنت غربته،،تمر على اعيونه صور
خيمه ومناشغ يتيمه ،، وعين اخت صوب النهر
وطفله من ينزل دمعهه،، بخدهه يتوضح اثر
صواب چف جارح جفنهه،، علماهه اعله السهر

تسهر الطفله وتون
من الم جرح الاذن ،،،،، تسهر الليل

شاف ضيم ابصفنته
مات حسره لعمته
*****
راف حسره بحسره طلعت،،صوره وگليبه ألچم
عمته هاي الجاي تنعه ،، ويمهه ملتمه الحرم
باچر اشلون ويباچر ،، يبتدي فجر الالم
ويامن امشي شلون اطلع،، لا كفيل او لاعلم

تنعى والمدمع يسيل
عالنهر غافي الكفيل ،،،، سهمه بالعين

راح اخوهه وفگدته
مات حسره لعمته
*****
ليل وحشة عمته سجنه،،ظَلمِته بنوحه تزيد
هنا سمعهه تصيح عني ،، ياسلف هاشم بعيد
عالخَيال إبحيله كله ،، گام يوصلهه يريد
تعثر وطاح اعله وجهه ،، عَثرهَ گيد الحديد

ناده لا لا يازمان
عمتي ابلايه امان ،،،، ياغريبه

الگيد عثر ركضته
مات حسره لعمته
*****
تالي فتحوا باب سجنه،، لكن بياحاله چان
الحديد الچان بيده ،، من اثر حسراته لآن
شافه طر فجر العقيله،، واليسر مصباحه حان
ماحمل تطلع غريبه ،، شلون ظل عمته يبان

مات وي طرت الفجر
بأولى لحظات اليسر ،،،،، گلبه مذبوح

وي اول شهگته
مات حسره لعمته
*****

دمعه اعله دمعه مانشف جفن الزچيه
يوميه يلچمهه جرح بأسم المنيه
تكف شرها ياهاي الخلگ ماعدهه نيه
بولد الولد ذبحوهه يوم الغاضريه

عن كل ولد للزهره بيت احزان
أم وبدمعها طافت البلدان
يم كل گبر تنعى الگضى عطشان
*****

مافك حزنها ولابرد ساعه گلبهه
غير الهظم هذا الدهر شنطه شوهبهه
كل ما تزور الطف ألم تنشر عتبهه
وتنادي ابني بهالارض جوا تربهه

ياكربله ماانسى بيچ شصار
چم خيمه بيچ اتحاوطت بالنار
كل جمره الچ بگليبي ألها آثار

*****
يا أشبه الناس أبجمال أرسوم جدك
ياخوف ابو اليمه شكثر من اليحسدك
بظهرية الطف انچوت وردات خدك
جيت ارد انشدك ياعلي هم ظامي بعدك

حسنك بعد ما مثله مر العين
شاب وسنينك فرهداهه البين
يمگطع انياط أبگلب الحسين

*****

متخالط ابكل ذره عطر الحنه تشتم
وايگلها ذبحوا زفته رماد المخيم
ابن الحسن بجروحه بالعاشر توسم
واعيونه متكحله لچن كحلتها من دم

ياس الصواني والشموع اتنوح
آيا شباب اعله الرمل مطروح
والزهره تنعى لجاسم المذبوح

*****
بسم الرضيع اتناغي ليليه الحنينه
عبدالله يا سلوة گلب كل الضعينه
تلولي وعليها ايرد صدا نوحه وانينه
يافاطمه حگي من اون ذبحوا ولينه

بالمحسن ايذكرها يوم الباب
تحني الظلع يمه بدمع سچاب
الحارگلي داري رد حرگ الاطناب

*****

عيونك بسمتك منحرك ،، لمصورك سبحانه
يحسين اريد اتصورك ،، بشفاف ما عطشانه

وبخيالي ،، يمته ارسمك… ..
بشفاف ماعطشانه
*****
عيني اعله صوره لحضرتك ،، وأسألها للمره الالف
نسبة جمالك بالصدگ. ،، من وصفك شگد تختلف
صوره وعليها شما اصد ،، الگاها تتفايض عطف
چا من جمالك سيدي. ،، واصلنه من وصفك حرف

أتفكر برسم الصور ،، وأتأمل بقدسيه
بكل نظره يترتب أثر ،، وأتحسس الحنيه

يا حنانك ،، يمته أرسمك……
بشفاف ما عطشانه

*****
بعيوني تطبع صورتك ،، تاخذني دمعه لكربله
وهناك أشوفك وحدك ،، ياسيدي بذاك الفله
فارس والاعجب رحمتك ،، ليذنب سهم تستقبله
جيش وتحزم بالحقد ،، كون النهر ما توصله

لوحه بجروحك والعجب ،، ماغيرت عدوانك
ينزل عذاب الله وجب ،، وأنته التصد بأحسانك

يا رحمتك ،، يمته أرسمك…… .
بشفاف ما عطشانه

*****
هلال أعله عينك حاجبك ،، متوضح بوسطه أثر
بسيف انطبر دمه نزف ،، وأتلون بدمه النحر
ليش بجمالك مختلف ،، ومحير إعجاب البشر
والوصف أرسومك صعب ،، يحبس دموعه بالنظر

يا أول وآخر حسن ،، دمعي جره بوصافه
أذكر جمالك والحزن ،، جرح بدمع يتشافه

بلا غربتك ،، يمته أرسمك…… .
بشفاف ما عطشانه

*****
يحسين اجيت لمولدك ،، شايل ورد واعلك شمع
هيچ الفرح ياسيدي ،، ما يكتمل الا بدمع
بسمك أردد وأذكرت ،، من كربله صوت استمع
لمن وحگ جدي گلت ،، ضامي وغريب بهلجمع

دمعه حزينه بمولدك ،، ياسيدي تچويني
مو بيدي گلبي معاهدك ،، لمصابك يوديني

شهالمصيبه ،، يمته أرسمك… ..
بشفاف ما عطشانه

*****

سبحانه لمخلي الدمع ،، مابي طعم الا الك
وشرط الموالي عبرته ،، يجريها من يتذكرك
بس تبقى هايه حيرتي ،، يحسيني من اتأملك
أجمل جميل أنته برغم ،، ذاك العطش لمذبلك

هذا الشعور أبصفنتي. ،، أتخيلك ياغالي
أچوي دليلي ابحسرتي ،، من صورتك لگبالي

وبشعوري ،، يمته أرسمك……
بشفاف ماعطشانه

*****

تمام النعمة والايمان حُبه
علي فصل صفاته فصال ربّه
للجلاله ،، علي هاله

علي فصل صفاته فصال ربه
*****
بين الله وعلي العالي ،، لايوجد فرق واحد
فقط هذا الفرق موجود ،، لسُبحانه علي عابد
أمان الما يأمن بي ،، يقيناً بالنِعم جاحد
ألماعنده علي بدينه ،، چا إلمن بعد ساجد

فرغ معنى السجود إبلا ولايه
ديانه ومختصرها علي غايه
للوحاله ،، علي هاله

علي فصل صفاته فصال ربه

*****
كلمة ربك أو تَمت ،، على لسان النبي المرسل
بَشر حَذر القُرآن ،، وَضح أكد المُنزل
علي بكل السور موصوف ،، علي بعد النبي تخَول
علي من يرتضي الاعمال ،، يردها بكيفه لو يقبل

إمام اوصافه زينة سوره سوره
عباده لليذكره يشمله نوره
ياجماله ،، علي هاله

علي فصل صفاته فصال ربه

*****
إن شاء الوصي يعني ،، شاء إلرغبتة ربه
لِهذا وكل ذنب مغفور ،، الا ليشرك بحُبه
معنى الطاعه والتسليم ،، للعنده علي بگلبه
نتوجه فرض بالدين ،، لنوره الشرف الكعبه

كمال الدين من تنطق شهاده
ولي الله علي وأصل العباده
ياكماله ،، علي هاله

علي فصل صفاته فصال ربه

*****
صفات المرتضى حيدر ،، الله الگدراها أگدار
شما للخالق من أوصاف ،، جِمعها وصارت الكرار
موالاته أمر معبود ،، ما للخالف اي أعذار
وبناءاً للامر حضر ،، جَنات وحطب للنار

صفات الله بعلينه كلها تلتم
وجوب الخالفه يدخل جهنم
للي وآله،، علي هاله

علي فصل صفاته فصال ربه

*****
علامات اليود ابليس ،، خضع لصنامه والاها
حسب رغباته والايات ،، يأول كيفه معناها
على هيئة علي الرحمه ،، هيچ الباري سواها
بثلاث حروفه بس تصعب ،، على الينكرها يقراها

من العالي علي متكون أسمه
على هيئة رحمته سوه رسمه
لهتداله ،، علي هاله

علي فصل صفاته فصال ربه

*****

بنظرتك واضح ،، والدّك طايح
يالحسن احچيها لختك
والدّك طايح ؟؟؟؟
*****
انجرح راس الصميده والحسن بالكلفه راجع
من بعيد تشوفه اخته يمشي وبخطواته ضايع
ياخبر جابت دموعه شما گرب يكشف مواجع
بشفته غير الآه ماكو تجرح لزينب مسامع

تعاين لممشاه ،، تلگته بالاه
شصاير ومفضوحه ونتك
والدّك طايح ؟؟؟

*****
بعين اخوها يامصيبه زينب ابجيته قرتهه
يالحسن گالتله گلي دموعك اشتعني الشفتهه
ما ألك گلب اليعينك تنطق وعينك درتهه
خويه خطوات انكسارك انا فرگه فسرتهه

گلبك الذايب ،، ياخبر جايب
معنى هالمشيه ودمعتك
والدك طايح؟؟؟
*****

هذا دمعك ذكراني بدمع ابونه لفرگت أُمنه
وهايه نظراتك تگلي بحيدر اجدد يتمنه
باب اخذ منه الزچيه شماخذ المحراب منه
شهالمصيبه شلون بلله ينگضي امفارك عمرنه

جدد المحراب ،، ما جناه الباب
من صفگ ايدك فهمتك
والدك طايح ؟؟؟
*****
هامتك تطبرها بيدك المعنى لتريده وصلي
خويه معنى هالاشاره منطبر حيدر تگلي
لگلبي تومي تگلي رايد بالصبر يختي تحلي
نايبه لعدمت كلامك ارتجف خلتني كلي

شصبر وبلواك ،، طفحت بعيناك
جَمرت گلبي عبرتك
والدك طايح ؟؟؟
*****
اليصبرني ويصبرك واليهون كل رزيه
الصبح لوّن طلعته بجرحه ودمومه الجريه
يالحسن للوالي خذني من گبل جيت المنيه
شوفتي هلبت تداوي جرحه ويظل خيمه ليه

ياصبر والروح ،، شافتك مجروح
شصبر وهايه محنتك
والدك طايح ؟؟؟
*****

ساحة الطف داره صار. ركضت كباله الحرم
ناده لمن طفه نار. ياهو طفاها الخيم
بداره تركض عيلته
بهيمه فرت عمته
*

جعفر الصادق يشيعه بداره صارت كربلا
ثاني طف ينعد مصابه كباله حركو منزله
النار ترسمله بجمرهه جدام طفله مدلله
شاف كلشي بداره اله صواب نبلة حرمله

بعيلته نعاد المصاب. فرهدت داره الغرب
والفرق ماكو الرباب لاطفل راد العذب

جانت اهون محنته
بهيمه فرت عمته
*

النار طفاها واثرها رماد باقي بكل كتر
وآه تتبع آه تحرك والدمع سيل الصبر
يعاين لحالة عياله الفيه صارلهم ستر
من لضى النار ولهبهه الخوف عاصرهم عصر

والدمع منهن يسيل دمعته لزينب جرت
لضلت أبلايه كفيل .باليتامه تحيرت

ذكرته مصيبته
بهيمه فرت عمته
*

شاف علوياته كلهن شاف كل طفله بحضن
المنجرح لو امه يمه يهون جرحه وما يون
البيت ماضيعله حرمه ولامره لفكدت ابن
مصاب بس الوالي بعده الهن مسهر الجفن

مومثل طف الغريب. ضيع اطفال بظهر
للحرم يبره النحيب. فاركن والي الامر

راح اخوها وفكدته.
بهيمه فرت عمته
*

من الحرم جمع حليهن بيده اخذهن للعده
من عرف غاية عدوه يجدد البالطف سده
يعني لامعصم تجرح من اثر جر معضده
لاجفن طفله تصوب والزراگ أمحدده

للسلب ماكو جروح لاعيون معصبه
طفله ماضلت تنوح جروح أذنها متربه

والدمع دم سالته
بهيمه فرت عمته
*


جابت الوحشه الليالي. من درت حركو نزل
ظنهه مثل خيام زينب والزلم راحو جتل
رادت تخيم أبرعبهه لحد وكت فجر الهزل
بكل كلب معكوده تبقى عكدة الجف والحبل

مالكت دمعه بخيام. لاغرب تحرس ضعن
لاطفل فاكد عمام. الهيمه صارتله وطن

لهاي ورثت جمرته
بهيمه فرت عمته
***

مضمون الحسن بأبن الرضا انعاد
وردود الكرم سدوهه بيبانه

ذبحو چلمة الحي الله بالجاي
ومضيف الكرم هدموهه عمدانه

مثل طبع الحسن چفينه ماعون
يطعم رحمه كلمن ظاف ديوانه

شباب وعوده من آهاته ذبلان
صوره من الحسن ويشابه احزانه

أثار الدمع بخدوده وديان
وصاير للزجيه النوح اوطانه

ينعى اعتاب بيت الكله الطاف
وجزات الطافه شبو نار بأركانه

چبدمن بالطشت يتسائل الموت. ؟
حِسنمن هذا ذبل طيب ريحانه

لعلي هذا الشبل لو للرضا وآه. ؟
زمانه بجعده يبرد عاد نيبانه

بعشرينه الجواد وراح مسموم
تاه الجود بعده وضاع عنوانه

ثلث تيام غاب أو ماله طلاب
وظهرية غربته غيرت الوانه

گوَم ابكوثره الچانو يشربون
ما نشدوا عللي وشفافه عطشانه

غريب اعله السطح محد سأل وين
ابد ماچنه فاض بجوده واحسانه

حال اولاد فاطم والزمن هاذ
بيهم واضح ومايخفى نيشانه

تجاسر من گبل واستوحد حسين
واخذ بالطف صحبته اوولده واخوانه

وعافه ابين نبله وطعن الارماح
وخلاهه الحرم بالهيمه حيرانه

عليله.....
ذكرت أجروحچ ،، بيه دموعي تسابگن
بدايه......
المحرم عندي ،، من تودعين الضعن

أذكرچ والدمع صوره يراويني
جرح لحظة وداعچ أول ونيني
غربتچ والحنين البيچ يچويني

شبيهه الليله ،، بوداع العيله
أشوف أبدمعچ حرم

*****

خذاني .....
جنح صفناتي ،، يم الباب وعتبته
لگيته.......
أثر للوحشه ،، فوگه ترايب غربته

اشوفن بي مخيم ينتظر رايه
وأمال اليتامه دمعه بالثايه
مشتاگين كلها محضره الحچايه

مثل ماانتي ،، بچيتي وصحتي
الك عمي شگد أحن

*****

غريبه........
ظلام الديره ،، چنها خيمه بلا حمه
وحيده......
ولا مر طارش ،، ينشد عنچ فاطمه

ضعن اهلچ شهور انگطعت اخباره
عليله وماتبعتي دروبه وآثاره
بقيتي ابين غربه وعله محتاره

دليلچ ضيمه ،، مثل كل خيمه
يتاماها بلا ولي

*****
سهرته.......
علذكرچ ليلي ،، أنتي الباب لكربله
محرم........
أعيش ايامه ،، ونار دموعچ أوله

يا أول يتيمه تصوبت بوداع
و يلي شگد دليلچ ذاب حن ولاع
بجروحچ جرح تاه بصحاري وضاع

عليله بدارچ ،، طفوف أثارچ
وأشد نيشان العطش

*****

حرمكم........
گبل لا تفگد. ،، لكبر ومناغه الطفل
فگدتي........
أخوتج كلهم ،، والباقي ذكرى الشمل

بقيتي لذكرياتچ ويل سهرانه
والشوگ أعله ونچ فاك بيبانه
گبل كل فاگده اعله الخوه حزنانه

عذابچ منظر ،، وداع الاكبر
أخذ من عندچ عمر

*****

هيمه واخيام ضمايه وشاطي بعيوني
كربله وشام طفل وي عمتي يسبوني

ذكرياتي بس عطش ومراكض وغاره
*****

ويه كل رمشة جفن
شفت ام ودعت ابن
يعني جانت كربله تذبح زلمنه
احنه ذابحنه الضمه
والصبر مر موسمه
العطش والحر بعد ذبل رسمنه
زغار جنه وبالخيم
ننتظر راعي العلم
يرجع النه وعالمتن شايل حلمنه
الاماني رسمته
راجع النه بجربته
ومن جديد بخيمته يلتم شملنه

الشمل راح جروف الشاطي ذباحه
العلم طاح. بعد مانحلم براحه
الخدر بعد الگمر متهدمه اسواره
*****

شأنسه وانا الي شفت
روس بارماح وطشت
مو جرح واحد واكولن اي نسيته
سنيني تنعد بس جرح
بيهن انا منذبح
والي شفته مقتل لروحي قريته
ذكرياتي تمر حرم
بيها عطاب الخيم
وبذكر ذاك العطش گلبي جويته
الالم يجري نهر
ليلنه المابي گمر
شلون عايش بالله المفارگ حميته

شأنسه وحسين. شفتهه عيونه حيرانه
لساعة البين. يويلي شفافه ذبلانه
والمخيم ماطفت لسه تشب ناره
*****

كربله بوكت العصر
بيها كلشي يضل جمر
والحوافر اه متلونه بدمانه
نركض من المشرعه
نطوف جدي ومصرعه
وين وجهتنه وغمض عينه حمانه
هيمه والليل اختلف
وحشه مره وما لطف
عيله حيرنه العقيله بمشتكانه
وانكشف فجر الهزل
اسرى شدونه بحبل
ديره ديره نطبها والشامت حدانه

الدرب طال. وشمس الصحره حراگه
صارت امال. الخرابه البيها نتلاگه
كل اسير لعمته يراوي اثاره
*****

الدمع هدل جفن
من التعب مال المتن
والاجدام تجرحت من گد مشينه
اه يا ممشه الظهر
تحول الذاري جمر
والحبل من الشمس يلهب بدينه
والدي الظل بس رسم
ضايع بدمه الهدم
محني من الگيد وعيونه علينه
الشام من طبها الظعن
جددت بينا المحن
كون للديوان ندخل من سبينه

هذا ديوان. مخلص للسبي وغايه
واحنه نسوان. تدخل فرضه واحجايه
وانه ابوي الحرم تلوذ باستاره

*****

ما أنساك،،
گلبي ودگته متولع بطرواك
الك بيه جرح
لو فز توالي الليل
لاهاد بدمع لا بالصبر ينحاك
شفت شمس الظهر
جاست ورد منثور
طش لونه الورد
وتخالط وي ادماك
ماذاب الشمع
مايشتكي من النار
ذابت روح صبره الماحمل فرگاك
وانه ربة سهر وياك صار سنين
عليك تعلمت ماارهم بلياك

ماانساك
بعدني احسب ولد عندي واسولف بي
وبعدني احلم زفافك للگمر احچي
واگول شبي؟
يضم روحه من اذكرنك
منك غار؟
ماواصل تره لحسنك
اعذره،،، واصفن وي الروح
والگه الروح
تنشد يالولد عنك
بتوالي الليل تندهني وادورنك
أثاريها اسمعت ونك
ولا جاز العطش منك
لحد ماغمضت جفنك
تحرگني عليك
الروح وين الگاك
عليك تعلمت ماارهم بلياك

شگل للروح؟
من تطلب ولد مذبوح
بيش اقنعها علمني
يبس بگليبي سباحه
حطب والاه تشعلني
يعذبني الدمع بجفاك
والحسره تباريني
تحن لشوفتك عيني
وين الگاك؟

احسدها الولدها يموت
لكن مندفن يمها
وانه اتلگه الهوا وبلكت
منك ريحه اشتمها
واگولن هذا مذبوحي
وهلبت تقتنع روحي
وهلبت تبرد اجروحي
شيقنع بعد روحي
الدمع ناداك
عليك تعلمت
ماارهم بلياك

تالي رباك
يا ذاك التعب وشظلي من ارباك
بس اضماك
بس ونك اسمعه ودمعي مارواك
انه ربة سهر وياك صار سنين
عليك تعلمت ماارهم بلياك
ماانساك

علي بويه،، ياعلي،، علي بويه

ناديني،، ياعلي ناديني
وين انته ماتشوفك عيني
بمصابك الدمع عاميني
يوليدي لمصرعك دليني

*****

فك عينك،، يالولد فك عينك
عذبني عالوطيه ونينك
شيضره لو يعوفك بينك
بسنيني بويه أفدي سنينك

*****

عطشانه،، چبدتك عطشانه
وأتغير رسمك وألوانه
مجروحه شفتك وذبلانه
آخ الماي نفترگ خلانه
*****

لميتك،، بين أدي لميتك
لگليبي بشوغتي ضميتك
بجروحك يالولد شميتك
لا ترحل ياعلي ترجيتك

*****
عماتك،، بالخيم عماتك
يشتاگن ياعلي لبسماتك
يردنك ماتكف صولاتك
رد بويه عاود لحملاتك

*****

هاي امك،، تنتظر هاي امك
بالخيمه تدعي الله يسلمك
رد ليها وانه اضمد جسمك
بدموعي راح اغسل دمك

*****

ياويلي،، وحدي أرد ياويلي
عالگومه ياهو ليتچيلي
يالاكبر فگدك الهد حيلي
دم جرحك چنه ظل يبچيلي

*****

ذاب گلبي يايمه
رد علّي كلمه ،، رسومك شبيها
ذاب حسنك بدمه
رد علّي كلمه،، رسومك شبيها

*
يمه الگلب ناداك ،، الاكبر چنت محلاك
معقوله هيچ الماي غير حسن محياك

مروتك عاين بعيني
نوحك هذا ياذيني
فدوه كلمه حاچيني

راحت روحي يايمه وكثر نوحي
انعى وما تفك عينك يمذبوحي
هاي وياك اخذها ماردت روحي

شاب بأول ايامك
والطبر هامك،، ياهو يوليدي
شاب ذبحو احلامك
والطبر هامك،، ياهو يوليدي

*

عني رحت عطشان ،، وانه ادعي بالصيوان
انطر اليه تعود ثاري انته عالتربان

دعيت اترد يبعد امك
احضنك يبني واشتمك
وارد اردود اگول اسمك

يبني شگد نطرتك توصل اخيامي
واشوفن كل جمالك ذاكه گدامي
ترد متروي مايك ماترد ظامي

غاب عني كل حسنك
ظل ألي منك ،، ذكرى بعيوني
غاب يالولد رسمك
ظل ألي منك ،، ذكرى بعيوني

*

حاچيني ياعيناي ،، گلي شربت الماي
لو غمضت عيناك حاچيني يارجواي

جمالك شاحبه ألوانه
ضماك الهسه نيشانه
شفافك يبني ذبلانه

ضماك اليبس ابدلالي سباحه
اشمك والترب ذراته فواحه
يويلي بموتتك هم ما شفت راحه

صواب غير أحوالي
راسك گبالي ،، ينزف دمومه
صواب فتلي دلالي
راسك گبالي ،، ينزف دمومه

*

يالاكبر أبهالحال ،، متگطع الاوصال
جابوك الي ونيت،، ون گطع الدلال

اشوف مگطعه اوصالك
واثر طعنه اعله دلالك
يعين الله الذي شالك

شلون ولمك من الغبره ابو اليمه
اظن گلبه وگع من شافك او لمه
اسمعه يون يالاكبر منحني بهظمه

عاب گلبي واتفطر
يبني يالاكبر ،، أنعى لمصابك
عاب ظلعي وتكسر
يبني يالاكبر،، أنعى لمصابك

*

تغمضلك انته عيون ،، ماصدگت وشلون
تعوف امك ابهالحال ماظن عليك يهون

ياتعبي وسهر ليلي
ياگمره وتضويلي
يافگدك هدم حيلي

كبرت وخلمي بيك يطرز اسنيني
عجيبه وهسه يبني تمشي عن عيني
لدرب الموت يبني وياك وديني

جواب بس ردت منك
ترضى اعوفنك.، ، يالعفت امك
جواب يمه انشدنك
ترضى اعوفنك ،، يالعفت امك

*

اطوف بذكرك اتغزل
گلب ممهور بسمك شوگ
ينبض بيك ما وشل
ملامح وردت من يوم
عودي بمايك اتبلل
علي انته العلي وعليت
كلمن بايعك أول
أتهجه اعله گد الشوگ
ثلث أحرف بيها أكمَل
علي شگد بيك وصفي يتيه
حگي وبيك ما أندل
أشوفك بالگمر واقراك
تسبيح النبي المرسل
أعاين للشمس خدين
خجلها غروب من ترحل
لان ماتانتك صليت
ندم تسليمها تأول
علي وكافي العلي مسميك
يسالفته الفلا تنمل
يلذة كل فرض مفروض
يغله البيك يتوسل
رخيصه الدنيا بس وياك
معانيها الحياة اجمل

*

اندگت اجراس الحزن يهل العزاء
بين الارض بين السمه هذا النداء
يامن سجيتكم لطم خدمه وبكاء
جمرة محرم ورثت من كربلاء

صوت اليبلغ بهلال الشهر
هوَ اليدون ياگلب انكسر
للغاضريه ،، تنعى الوفيه
دمع المحرم من أم الگمر

دمعات البدويه أم الاقمار
لحسين أتقربنه هنه الاذكار
انطينا وشركينا وي الخدام
وبجاهج رزقينا دمعات الثار

*
طف المصيبه بهالشهر تتخذه دار
تتحسر وتصبغ حزن وجه النهار
مجروحه بجروح الضعن گلبها نار
يافاطمه لكِ الاجر ترفع شعار

بصوت العليله تنعى العايله
لجود الضعينه تنوح وكافله
من المدينه ،، تصرخ ولينه
ياملگه راح يشوف بكربله

للزهره رايتها تنشرها أحزان
وتنوح اعله الفارگ اخته بصيوان
كل آه التلفظها مهجتها تذوب
والآه بمعناها حسين العطشان

*

بسم الگلبها محترگ لابن البتول
أندگت أركان العزاء وماتزول
للدمعه يترجاها من شاء الوصول
حره وأسمها لكربله باب الدخول

باب الحسين الواهبنه النِعم
لوما نعيها كل مجلس عدم
ممنون أگلها ،، كله بفضلها
هي نجاتي من يوم الندم

تتحنن تتلطف وتربي گلوب
دمعتها للخدمه مرسومه دروب
إنخاها وسلمها كل التسليم
إسألها وترشدك الحب ياصوب

*

رايتها آه لكربله والغربه لون
بَچت على حسين الصخر لبلا جفون
شمخلي بيها من ألم جرح الضعون
والعنها ينشد هايه أم گلب الحنون

ياأم مثلها وبگدها تحن
نسأل گلبها يسگينا الحزن
للماله ناصر ،، وبجرحه حاير
وبحبه هيه ضحت اغله أبن

وهبتله الموصوفه چفينه حزام
ألخلاها أعيونه تتصدى أسهام
ألطاح أعالشاطي واجروحه تصيح
هيهات أبلا جودي أوصل لخيام

*

ضاع أثرنه ،،
أحنه دمعه بصحره تاهت من ضعنه
أحنه جرحين بظهاري
ننچوي ونذكر خيمنه
وين ما نتعب غفينه
وين ما نگعد بچينه
وين ما عد الله گاع
أحنه بچاها كسرنه
للغري نوصل حلمنه
ما وصلنه،،،،
احنا ذول ايتامه مسلم
من الحوافر صح سلمنه
وماسلمنه من النياح
بالاسر ما طحنه لكن
الجدم بالممشى طاح
ليلة الوحشه ابد ماندري عنها
عشنه بالهيمه الليالي
بلا عناوين ارتحلنه
ضاع اثرنه ،،

كلشي عفنه بكربله
مابي حياة
والعطش ضيع ضعن
للنهر رحنه بأمل
ردنه الامان
نعرف الكافل وطن
اي وصلنه.
مالگينه چفوف عالشاطي تلمنه
ضاع اثرنه،،،،

بالطف اخر ما شهدنه
تسري نار بكل مكان
بيها چم آه السمعنه
نمشي وبذكرى عثرنه
مدري وين،،،
بينه ترسي الدنيا وين
يامكان بهالوسيعه
نلگه بي راحة جرحنه
ونلگه ليل،،،
ما يطالب سهره دين
ويمته نخلص من سهرنه
ضاع اثرنه

******

حسين ،، غريب ،، تجري الدموع الغربته
مصاب ،، عجيب ،، يامحنه تشبه محنته
مجلسنا ينعى مصيبتك
نطلب يضامن نظرتك

*****

بداية كل عزاء ،، توجهنا بنداء
أحضرنه يا. نبع الحزن خلي بگلبنه نار
توكلنا عليك ،، مجالسنه بإِديك
غذينه بنفاسك. يمن بسمك عزانه صار

رايتنه بسمك رفرفت ،، بسمك بده لطمنه
يا واهب الدمعه الجرة ،، غيرك منو يلمنه
أنته التشد حزمنه

رِثاء ،، بدور ،، شبان طاحوا من هلك
نريد ،، حضور ،، أنفاسك ونتوسلك
كل الحزن من عبرتك
نطلب يضامن نظرتك

*****
توسلنه و نريد ،، گلبنه ما يهيد
كون الدمع. من الگلب يتسابگ ويسيل
مصيبه أولى هاي ،، جرحها يبدي ماي
وأخرها نار. وبالضعن بلوه ابتله العليل

مافرقت هاي الحرب ،، ما أنصف العلنها
حرمت رضيع من العذب،، والأم فرغ حضنها
صاب السهم أبنها

عذاب ،، رضيع ،، من الضمه لحر السهم
عيال ،، تضيع،، شبيد العليل اعله الخيم
يادمعه واسة دمعتك
نطلب يضامن نظرتك

*****
يدمعة الوداع ،، يلوعة الضياع
دمعة أخت دمعة طفل بيها المنايه لون
جرح مامثله صار ،، مصيبة النهار
ظلت عيال ومابقه لبسده يحتمون

صار الظهر والعايله ،، هذا الكلف عليها
شتسوي كل امدلله ،، من فارگت وليها
عالشافته شبديها

دموع ،، رحيل ،، يابلوه هالضعن ابتله
دماء ،، تسيل ،، وتروي بقعة كربله
ريت المدامع عزتك
نطلب يضامن نظرتك

*****

معاني بهالسواد ،، حزن أبا الجواد
يجرح شعور اليفهمه ويلوح أله المصاب
مواسي بينه ناح ،، حسبلك الجراح
يقرالك آهات الضعن وآلامه والعذاب

ألغاضريه مصيبتك ،، لمعذبك مخيم
آ يالرضا ياحَسرِتك ،، سور الضعن تهدم
جود العذب تيتم

خيام ،، تنوح ،، ويلاه ياعمنه الگمر
الأمان ،، جروح ،، باقي على جروف النهر
نقره المصيبه الجرحتك
نطلب يضامن نظرتك

*****
تغرب الحسين ،، زلم هاشمها وين
نار او رمح غربه وضمه منهن دليله ذآب
صحبته ودعوا. ،، بنفسهم افتدوا
وأعيونه تبره. لخوته وأولاده عالترآب

أبن الزچيه الوحده. ،، ماتنوصف محنته
آ يالهضيمه والعده ،،. تتنطر ألوگعته
آخ شكبر غربته

يشوف ،،. رجال،،. متگطعه فوگ الثره
بشفا. ،،. رمال ،،. حَر وعطش لمغيره
نقره المصيبه بنيتك
نطلب يضامن نظرتك

*****

مامثله يومك ،، يبن أمي ويلا
يجرح دليلك ،، ويفطره أضما
وأكلف جروحك ،، مايحصل أدوا
لمن عضيدك ،، عالشاطي تلگا
أخر كلامي،، ويلي يضامي

الحسن نادى بالمنيه
ما مثل يوم الغاضريه
ياحسين شهاي المصيبه
وحدك أتظل يبن الزچيه

*****
أُمنه أذكرلها ،، بساعات الغروب
يطفح دمعها ،، وبذكرك تلوب
انشدها عنك ،، وتگلي مكتوب
يتغرب حسين،، ويصير مسلوب
كل مُغربيه ،، تنعى الزچيه

عن محرم أذكر حچيها
ياحسين وأذكر نعيها
تذكر أمصابك الحنينه
ذكرك امنه شمسوي بيها

*****
ياخويه جرحك ،، من كربله خيام
أنته وخواتك ،، تتشارك آلام
صيوانك يموج ،، من ون الايتام
ياوسفه ويصير ،، الشاطي احلام
بسمك يندبون،، لمن يعطشون

هاي اطفال او دللتهم
والطفوف أشگد ذبلتهم
تمرهم ايام أبمخيم
بالعطش ويلي لوشفتهم

*****
تاليها وحدك ،، يالمالك انصار
وتصير نيشان ،، لسهام وحجار
وخدك يچوّي ،، ذاك الرمل حار
كلشي يعاديك ،، حتى الشمس نار
آآآ يا مصابك،، خويه وعذابك

هذا گلبي ينبض أنينه
ياغريب المحد يعينه
محنه محنت أبن الزچيه
طايح او دم ينزف جبينه

*****
مو من مصابي ،، دمعاتي يحسين
يومك نعيته. ،، وأبتلت العين
چني اشوفك ،، مابين نارين
تعلن رحيلك ،، تضيع الصواوين
ضعنك وداعه ،، يعني ضياعه

ياحسين الحيره بمصابك
شحاله ضعنك ساعة غيابك
لو هويت وضعنك ينادي
ياحسين شيطلع جوابك

*****

هاي الليالي ،، بخيمة دلالي
لمتنه رايه ،، يحرسني غالي
*****
يهنيالي على أخواني ،، عليه محله لمتهم
شوصف من يجن ليلي ،، تصير إخيامي كعبتهم
گبل ما بالكلام اطلب. ،، جواب الگاها نظرتهم
بخوتي مطرزه سنيني ،، هواشم محلى نخوتهم

مابين أخوتي ،، الگه سلوتي
اكرم وانعم ،، تاجي ونخوتي

*****

غريبه الديره بس گلبي ،، ما ليله اختلف نبضه
كافل عندي وچفوفه. ،، من حد السيوف أمضه
طهرها الگمر طهرت ،، بحد أمخيمي توضه
جدامه الباركت هيمه ،،. خَضار تحولت أرضه

بالطف نزلنه ،، بصاية زلمنه
والگمر چفه ،، سور لحرمنه

*****

گبل عشرة هلالك چان،، ضعني تظلله الرايه
متبسم طفلنا ينام. ،، يصحه بأترف حچايه
ضعن ما مال حمله ولو،، يميل اخواني تچايه
عين وبالدلال تفيض. ،، جود وما فرغ مايه

جود الكفاله ،، يجري دلاله
عم الضعينه. ،، محلى خصاله

*****

عرش بعيوني صيواني ،، جفون أخواني حدينه
اصبّح كل فجر ألگه ،، فجر هيبة محامينه
شمس من تطلع العباس،، ضواها يعكسه بجبينه
ابو فاضل وهبني چفوف،، وقف للخدمه چفينه

جبينه ضوانه ،، منه هوانه
بأسمه ونخوته ،، رفرف لوانه

*****
اي هذا الدلال وهاذ ،، حالي بهيبة أخواني
شبه ما ألهم بهالناس ،، ولا يحصل خدر ثاني
يليلي هم گبل سامع ،، گبل ما تبتدي أحزاني
سهرتك لو شكيت الحال،، گلتلك دهري لاواني

بيهم يليلي ،، سالم دليلي
ما اشكي وانه ،،، عندي كفيلي
*****

يالعليله حسينچ أشگال
وأقتنعتي بغربة الحال
رضيتي،، ودمعتچ جريه
رضيتي،، والصبر منيه
*****

چم عذر أنشد سمعتي ،، من سألتي ضعونچ
يالعليله وما قنعتي ،، وحدچ إيخلونچ
بالسفر يا ما حلمتي ،، وياهم يحسبونچ
حملوا وأنتي طلعتي ،،. والعتب بعيونچ

دمعتچ دمعهم ،، يتفسر إغياب
نحيله ودربهم ،، لفراگچ اسباب

الضعن قدملچ أعذار
وَدعوا وبگلبچ إشصار
نعيتي ،، ونبرتچ شجيه
رضيتي ،، والصبر منيه

*****
گوه جدمچ يخطي خطوه ،، بس وصلتي الغايه
توسطيتي بين الاخوه. ،، جوه ظل الرايه
أضعن بحيل الله أگوه. ،، أخذوا مني حچايه
ليش أرد شباقي يسوه ،، من هجرتو الثايه

عليله ومنيتي ،، لو عني تمشون
حچيتي وهويتي،، ما بين الضعون

گلبچ براگ العلم طاح
شلون أرد وشوگي ذباح
خطّيتي ،، بخطوتچ عزيه
رضيتي ،، والصبر منيه

*****

وآلدچ خانگته عبره. ،، وأنتي آه گباله
بادلچ باللحظه نظره ،، منكسر دلاله
ضمچ حسين اعله صدره ،، تغيريتي بجاله
شگال وانتي صرتي بأمره،، ورتضيتي الگاله

همسلچ كلمته ،، غيرلچ اللون
انشغلتي ابسمته ،، لو حسن العيون

عاوديتي والابو وين
للطفوف توجه حسين
بقيتي ،، بدارچ الخليه
رضيتي ،، والصبر منيه

*****

ياصبر فَرَغ دليله ،، وانتي بين احضانه
ودع ويمسح دخيله ،، دمعتچ بردانه
بويه گلچ يالعليله ،، ما تجين ويانه
وانتي سلمتي لرحيله ،، وبالدمع غرگانه

رضيتي عجيبه ،، ماگلتي وياك
بقيتي غريبه. ،، واترجى ملگاك

گلتي يمته وي هلي تعود
وأغفه بويه بحضنك ردود
بچيتي ،، من مشت رقيه
رضيتي ،، والصبر منيه

*****

للسهر يبقى رضيتي ،، الجفن كل ليله
من اول وداعچ بديتي ،، والدچ تبچيله
الظعن سار اشتكيتي. ،، الالم برحيله
بالدمع آخ انحنيتي ،، والجفن دم سيله

نزلكم يهلنه. ،، وحشه عليه
نعيت المحنه ،، وعيني جريه

وَحدچ كل ما يمر ليل
والسهر ما خله الچ حيل
صفيتي ،، للسهر سبيه
رضيتي ،، والصبر منيه

*****

جمرة حنين الدموع اجريها
دونك حياتي حسين افنيها
بالدمع ام البنين
شيدة عالم حزين،، ينعى الحسين

*****

يا أغله غالي ،، هاي أنا حالي. ،، وأنته بعيد
سلوة دليلي ،، صارت عويلي. ،، هيهات أهيد
بيه الاماني ،، أنطر وأتاني. ،، ملگاك اريد
شاغلني نوحي ،، بعدك يروحي ،، ميته أكيد

دمعتها بعد حسين محد وصفها
دمعه وسواد العين لون إبطرفها

ذبِلت،، هَلت،، عيني ودمعها مهجة أگليبي

شاغلها عن الوجود أفراگه
بكثر الدموع التصب تشتاگه
مابرد ذاك الحنين
شيدة عالم حزين،، ينعى الحسين

*****
دارك أگصده ،، عنك أنشده ،، ألگه الجواب
يشكي بغيابك ،، ومغطي بابك،، ذاري التراب
فاگد مضيفك ،، ريحة رغيفك،، ياكرم غاب
كل اليودك ،، برسومه بعدك ،، لون المصاب

عمداً أدگ الباب والبيت أنشده
وين المحنه البيك وين الأوده

أبره،، وأقره،، آ يا غريب الهاجر أدياره

صفنه وأنين أو حنين أبابه
دارك گصدته وأشم أترابه
ناحت أيام وسنين
شيدة عالم حزين ،، ينعى الحسين

*****
لا گلبي يبرد ،، لا جرحي ينشَد ،، لا أنته جاي
غير أنتظاري. ،، ليوم إحتضاري ،، ماعندي راي
يبن الزچيه ،، نار الي بيه ،، ذوبة أحشاي
حتى البوادي ،، تسمع شنادي ،، يبني وغلاي

لمصوب من أفراگ شيداوي علته
بس شوفة المحبوب هيه التسكته

جروحي،، بروحي،، غيرك يايمه من يداويها

شوگ وعذاب أنتظار الوالي
حگها وتضيع أبوداع الغالي
من كثر ذاك الانين
شيدة عالم حزين،، ينعى الحسين

*****
يجرح شعوري ،، يهدملي سوري. ،، كل حيلي مال
يوصلني منك ،، ياضامي ونك ،، مثل الخيال
بالون لمحتك ،، متفطره شفتك،، وادماهه سال
تكبر بلوتي ،، واندب نخوتي ،، أربع رجال

وين المدينه او وين يالغاضريه
بس كل جرح بحسين جرح الوفيه

چني،، أبوني،، شفتك َوحيد او ضامي بالحومه

بيه يبان اختلاف ألوانك
يبني أحس أبوداع أخوانك
من گلب بالهم رهين
شيدة عالم حزين ،، ينعى الحسين

*****
أنعى وأراقب ،، منتظره غايب ،، ما لمني دار
بالهيمه داري ،، وشمس الظهاري ،، تتبده نار
يحرم عليه ،، فيّ الثنيه ،، طول النهار
وجداني يدري،، السميته عمري ،، بجروحه حار

أتنعم أبفي بيت ما أقبل بهاي
وأبن الزچيه أسهام صارتله لفياي

نارين،، يحسين،، ضماك وغربتك تستعر بيه

نار وسهام او رماح أتلوحه
يروي الرمال أبنزيف أجروحه
للگضه أبلايه مُعين
شيدة عالم حزين،، ينعى الحسين

*****

من ذَالذي گلبه أستعد ،، يتسمى خَدآم
ينوي الدمع غيمة بَرَد ،، بحدود ألخيام
نيه برسومه تبان
لو ذكروا العطشان ،، بحدود الخيام

*****
المحرم والخدم......
چنهم مثل قوس وسهم
نيشانه يوصله بضباب

هذا المحرم واليحب ،، ماعنده بس هالغايه
يعدم مطالب دنيته ،، ويشيل دمعه الرايه
لايبقى ريشه بالهوا ،، وتميله كل أحچايه
وجدانه كون إيحركه ،، ويصير صوت قرآيه

كل الجوارح تمتثل ،، للمدمع الراي
يتلگه عاشور اليهل ،، ويعاتب الماي
يا أول الاحزان
لو ذكروا العطشان ،، بحدود الخيام

*****
المحرم لليحب......
دمعة صدگ ترسم درب
آه الجرح تفتحله باب

وجّه شعورك كربله ،، توصلها لمن تنعى
الحسره ترفع دمعتك ،، أنويها غيمه الدمعه
هلبت تظلل من شمس ،، لو حرها لحظه تمنعه
وأتمنى لو ظهر العطش ،، عن الخيام ادفعه

هاي أُمنيات المحترگ ،، دلاله لحسين
يتمنى يحسبها صدگ ،، وإيمطر العين
جفنه يفك بيبان
لو ذكروا العطشان،، بحدود الخيام
*****

المحرم ياخلگ........
ماعايش المنه افترگ
مات ويظن ماي السراب

عَشرة ليالي يالمحب ،، خدمه ودموع إحييها
عيش اعله گد ما محترگ،، والجمره لا تطفيها
فرصة وجودك خدمتك ،،حس بالخيام شبيها
يا ليتنا المو من صدگ ،، ما تچوي لا تحچيها

بين المخيم والعلم ،، متگطعه زنود
صفنة طفل ومتاني عم،، مايرجع بجود
وين اليشب نيران
لوذكروا العطشان ،، بحدود الخيام

*****

المحرم عالمك......
مفتاحه دمعه توصلك
شيل العلم حَل المصاب

حضر دِليلك واستعد ،، للمغترب بضعونه
الدمعه تنعد نصرته. ،، قله الذي ينصرونه
باچر على حدود الخيم ،، وآلد تهل عيونه
يذبل دلاله بالمهد. ،، بالاكبر ايذبحونه

من صاح الا من ناصرٍ ،، حتى أنته مشمول
ضحالك بأجمل ابن ،، عمره دللول
يوم العزا قد حان
لوذكروا العطشان ،، بحدود الخيام

*****

المحرم والطفل......
فطرة گلب حلقة وصل
مادور الحب بكتاب

رد اعله فطرة مولدك ،، عالمفترض لا تكبر
الواجب يظل واجبك ،، خاين اذا تتعذر
چان ادعِائك عاهدت ،، عالدمعه ما تتغير
حان العزاء وفاطمه ،، نشرت سواد المنبر

وينه اليعاهد فاطمه ،، المذبوح ابنها
نشرة قميصه بالسمه ،، راية حزنها
وينه العلي ماهان
لو ذكروا العطشان ،، بحدود الخيام

*****