شحچي يمك
اكتفي بكلمة دخيلك
حچايه مفتاحي لحنانك
وچني من الفظها اشوفن
باعك ايلمني لامانك ،،،

شحچي يمك ،
كلشي يم اعتابك انسى
عالسكوت أَعذر لساني
موجه تاخذني لضريحك
موجه ترسيني اعله بابك
هنا دمعتي ،
تهز كياني ،، ارفع ايدي بعبره اسلم
السلام اعله المهيج
واقره اشعاري لمصابك
انتچي اعله الباب اغمض
وارسم اغروب ابخيالي
مره اشوفن بي عليله
يهلي صاحت شوفو حالي
مره خطوة حيره اشوفن
هنا صرت انثر سؤالي؟؟؟؟
اليمشي مشيت غربه مسلم
هذا مسلم ،،
وحده مسلم ،، دمعه لحسينه يلالي
وهذا وكت اغروب لكن
بلونه مطبوعه الحوافر
وخيمه بيهه النار تفتل
وخيمه اثرهه رماد صاير
هنا نواعي ،،
بتالي الغروب اسمعتهه
آه يمه ،،، آه يمه ،،، آه يمه

لوله اضماك ماروحي تهدك
خفت لايذبل اكثر لون خدك
حسبتك ترتوي واترد لمهدك
شمدريني لوريدك عطشت اسهام

هيه خيمه ،،
بيهه بس نسوان ظلت
منهه شتريد المشاعل
ياهو ليگلهه اعله هونچ
ذن خوات ابلايه كافل
يگلهه كافي ،،، والله كافي
ابكل محرم لازم اتركض العقيله
والشمس ظهريه چفهه والوطيه
چفهه ليعثر حرم ،،،،
كل سنه تمر كربله ،، المشهد تعيده
ترجع وتحرگ خيم
ياهو ليگلهه النهر ،، سچه بعيده
صعبه توصل للكفلهه ... تأمن
ابكتره رقيه
صعبه توصله وجدمهه
رماده من حرگ الثنيه
والشريعه شما تجيهه
تشيل اديهه ،،،
تگلهه زينب ،، مابعد احمل رزيه
يانهر إبعد ولا تگرب عليه
اتگله زينب
مااريد الكافل ايشوف الي بيه
والله حيره ،،،
النار ياهو يگلهه كافي
تحير بيمن اخت اخوهه
تضم جرح عن الكفلهه
لو تلم اطفال اخيه

كل محرم
هايه حالتهه الغريبه
تلزم النار ابخيمهه ،، واليتامه
وياهه تصرخ،،
اخ اديه
اخ اديه ،،
ماتريد النار تسمع
مدري سلوتهه الاذيه ،
حچايه عدهه ،،، طلعي زينب
انه نار وهايه هيمه
احتاري زينب ،، اختاري زينب
الغايه جيت احرگلي خيمه
طلعي زينب ،،،،

حياك ،، حياك
ياشارب علي ياحيل الحسين
ياعباس حياك
*****
بتحياتي انحني تقديس وإجلال
الك ياثمرة ارباي
انه امك واريد أبهاي اناديك
يبني وگمرة اسماي
ياكشخت علي بكل سوح الحروب
يمنته ورايك الراي

فارس يمه الك سلطان عالبين
ياعباس حياك

*****
الك مخلوقه شلتك نبض دلال
هاي اسباب الوجود
ييمه بروحي الك كاروك سباح
فتل كل الوفه ازنود
من اصيارك انه ارسم بالاحلام
شايل عالمتن جود

واصيح ابني الهوا واچفوفه نهرين
ياعباس حياك

*****
صنيعت حيدره متكامل اوصاف
بي كلشي انوجد بيك
ياهي من النسه عدهه ولد هيچ
شارب غيره اسميك
فخر فوگ الفخر من اسمع حسين
ياظهري يناديك

يا معصب ستر ياكحلة العين
ياعباس حياك

*****

فدوه شلون رايه شلون چفين
علم شايل علم بيد
شوف حسين عينه تبسمت زود
حگه تحزم ابحيد
زلم فوگ الزلم تلضمهه بالسيف
باچر رايح اتصيد

باچر كربله تشرگهه نصين
ياعباس حياك

*****

باچر حتى جاري الماي عباس
تلمسه مره ينخاك
موجه اجييب موجه توصل اتريد
ترد للخيمه وياك
من هسه الفرات ادخيلك ايصيح
ياعباس بحماك

ويصيح الجرف منتظرك اسنين
ياعباس حياك

*****

على رموش الدلال ايبين التراب
ولونه من الشمس مگلوب الحجاب

****
گصر عمر النده وذبلت رقيه
طفله من الخيم طلعت سبيه
شكثر غيرت رسمهه الغاضريه
صبغ لون الوجه دخان الاطناب

*****
نَفَسها من البچي والنوح مگطوع
مثل جمر الخيم ألوان الدموع
رجيف اعظامها من الخوف مسموع

نحيله وظل يلاويهه الهوا الهاب

*****
لون الثوب من الضيم مگلوب
ولحر الشمس چن خدهه مطلوب
ترفه اجدامها وجَرحتها الدروب

حتى الشوك منها ماخذ اصواب

*****
كثر ما بالصحاري بيها يحدون
لونه تراب ينزل دمع العيون
حبيبت گلب ابوها الگوم يدرون

وعمداً بيها صاحوا والدچ غاب

*****
طاحت من على الهزله أبسبيهه
وصار السوط يعرض لليجيهه
الدرب للشام خلصته أبمشيهه

تشوف الدللاهه حاسبه حساب

*****
تدور كل خرابه عالابو وين
تريد تگله عاين سطرة العين
گضت آمالها من شافت حسين

بطشت چا ياهو يفزع الها طلاب

*****
اكبر من عمرها اجروحها اوساع
طفله وبالخرايب تغفه عالگاع
حلمها تشوف ابوها والحلم ضاع

ماتت من گبل لا تشكي المصاب
*****

ما بين وبين ،،، شاطي وصيوان سكينه
طاحن چفين ،،، وتيسرت عگب ايمينه

ظلت بس ذكره وياهه،،طيب الچف الرباهه

*****

هذا شاطي وهايه خيمه
والدرب دمعة يتيمه ،، تبدت احچاية وداع
سكنه وي عمهه ودلاله
تطلع الحسره رساله ،، توصل بلهجة ضياع

بين الشريعه وخيمهه
الحسره ترسل هضمهه
للي بوداعه لچمهه

لون الدمعات ،، سايل وغروب الوانه
شايل آهات ،، الفرگة عمهه وذرعانه

ياما وياما باراهه،،

*****
دمعه راحتله غريبه
ودمعه تشكيله مصيبه ،، تبلغه بحرگ الخيام
وآه يا آه انتظاري
انتهى بركض البراري ،، والدلال ابصحره هام

ذايب كلبهه بنحيبه
كل دمعه شالت مصيبه
كل حسره صرخة غريبه

صرخات ونار ،، هيمه و محتاره الخدر
والحال اندار ،، لايام العز تتحسر

تتحسر وبذكراهه ،،

*****
انفرض كون وتودعه
كل عمرهه ابلايه رجعه،،تمشي كون ابلايه روح
شهالوداع الحان اوانه
بين سكنه وبين امانه ،، وداع نطقته الجروح

راح الامان وگمرهه
لچفوفه چانت خدرهه
عن عمهه راحت بسرهه

عنه بيا حال ،، راحت وشسوه افراگه
هزل وحبال ،، واتلاگي الضيم املاگه

العاشر تترك خلاهه ،،
*****

طايح أعالشاطي منهه
چف لچن اسمه وطنهه،،بين ادي عاشت سنين
چانت اتشم بادينه
هسه تشتاگ لحنينه،،والدرب يخلص ونين

وسادتهه چانت يمينه
ونسمة هواهه حنينه
للدمعه صارت رهينه

ماتغفه الليل ،، الشوگ ايسهرها لعمهه
تتحسر حيل ،،للچف الچان ايضمهه

وتموت وما تنساهه،،
*****
من بعد عاشر محرم
شافت ابعيناهه كل هم،،تعذبت من عمهه طاح
غصبن او گوه عليهه
بالحبل شدوا اديهه ،، حگهه لن حاميهه راح


بلا عمهه شدوا اديهه
من بعده ياهو يحميهه
وچفوفه تنغر عليهه

شافت الالام ،، دروب ومن ديره لديره
وصلت للشام ،، والناظر صوبه اديره

تذكر وتصب عيناهه ،،،
*****

مابقه اي شي عجيب ،، الحبيب اصبح غريب
والحرم لمخدرات ،، ينخن او لا ظل مجيب

شغرب امن الطف يصير،،عالخيم عسكر يغّير
كل طفل بعد الطفوف،، ابن امير وصار اسير

شهلمصيبه الغربتك ،، ياحسين
تنسبي تاليهه اختك ،، ياحسين

*****
آه يادمع الظلام ،، لونه من جمر الخيام
إلي كل حسباته ليش،، جفنه مايگدر ينام

حرمه كل نشدتهه ليش ،، الخيم مطلوبه بيش
فرت او تاليهه وين ،، هايه نار وهذا جيش

حرمه ماتحميهه هيمه يا حسين
تاهت الخدر هضيمه يا حسين

*****
ضيعه من درب لدرب ،، ممشه وي وادم غرب
ذكرى ظل ذاك الدلال ،، عالهزل راحو غصب

صحره وسموم الرياح،،چم طفل من هزله طاح
الضعن مايدري وين ،، بيا خرابه يستراح

راحه صارت كل خرابه ،، ياحسين
كل گلب ينفض عذابه ،، ياحسين

*****
شعدهه اختك من دليل،، صارت العمه وكفيل
وي الفواطم تنعه نوب ،، ونوبه تركض للعليل

حال چان وهذا حال ،، زينب ابلايه الدلال
مو ضعن صاير جروح،، جروح من شد الحبال

ياهو لينشف دمعهه ،، ياحسين
ياهو ليغير وضعهه ،، ياحسين

*****
چف ترف من گيده ذاب كل رمش لونه التراب
والنشد عن اهله وين،، الدمع يرجع جواب

كل نظر للحره دار ،، تفهمه كون ابكلشي صار
يعني زينب كل سؤال ،، تحترگ والماضي نار

زينبك ذكراهه انته ،، ياحسين
ياذبيح الضاعت اخته ،، ياحسين

*****

بي جرح غيره ،، ناظره يديره
گباله عمته يجري دمعه لكن شبيده
يخفي وناته ،، جمره حسراته
گباله عمته يجري دمعه لكن شبيده

*****
العليل الي تيسر عذبه طول الدرب
ناحل وريح الصحاري تلوي عوده من تهب
ماشكه من كل جروحه يشتكي جرح الگلب
شلون عماته سبوهن والحدو بيهن غرب

نظرة الغربه ،، تلچم ابگلبه
يخفي ونته وبعذابه اكثر تزيده
ينهدم حيله ،، الناس توميله
يخفي ونته وبعذابه اكثر تزيده

*****
عالهزيله امگيدينه وعمته بتالي الضعن
الها كل مادار عينه جروح جيده تنازفن
يعاينلها وهيه رادت تخفي لدموع الجرن
لكن اشتمسح واديها عالهزيله اچتفن

گام يتلوه ،، يلتفت گوه
ينسه گيده يدير عينه ويلچم جيده
من الهظم ناحل ،، والدمع سايل
ينسه گيده يدير عينه ويلچم جيده

*****
يعاين لعمته ودمعته تنطق الحيره جواب
بكربله لا ميت انه جسمي لا من علته طاب
شلون اغير هذا حالچ والحديد ابأيدي ذاب
منين اجيبن رايه عمه فوگچ انشرها حجاب

موتي اتمنى ،، من اشوفنه
ظلچ ابلا رايه عمي يومه شيعيده
بلا علم صرتي ،، عالهزل رحتي
ظلچ ابلا رايه عمي يومه شيجيبه

*****
شتت النوگ وتحير بهاي شيسوي العليل
ينسى ايده چتفوهه يشيلها ودمه يسيل
چم طفل عالناگه يرجف يخفگ بخوف الدليل
هذا اول يسره لوعه والسبي دربه طويل

بحاله مايگدر ،، يجمع الخدر
الهزله تيهته دربها وطرت البيده

بأول ايام ،، شاف گدامه
الهزله تيهته دربها وطرت البيده
*****

الليل يگضي بالخرايب بين دمعه او ونته
ماغفه وتغفه گيوده آ يويلي برگبته
يسمع ونين اليتامه وهاي زادت حرگته
وصوت هد ليل الخرابه هاي ونت عمته

يستمع ونها ،، ماوصل يمها
گلبه ذايب من المها وحاير بگيده
شافته عمته ،، ينتحب سكته
گلبه ذايب من المها وحاير بگيده

*****
الليل گصر كل ظلامه للصبح عمره هدا
لا جرح الامه خلصت لا طفل فض مشتكا
ردود عالهزله خذوهم يزجر الحادي بندا
عادو السجاد هضمه والحرم تبچي ورا

ردود بدموعه ،، تنچوي اظلوعه
محني من هضمه وزمانه نال اليريده
جرحه عماته ،، تنزف اهاته
محني من هضمه وزمانه نال اليريده

*****

ماعدنه غير الدمع ،، بهالخدمه وبهالعزاء
توجهنا بي للسبط ،، وهذا اقل الوفاء
عدنه الجدر معتقد،، ماردنه دين الجفاء
ديني نبع غيرته ،، نبضه خيم كربلاء

دمعي يقيني ،، الخدمه ديني
اندب الهي ،، اختم سنيني
موگدنه ناره ،، تشبه حنيني
وانه برماده ،، اصبغ جبيني


خدم ،، وانته انتقد
خدم ،، هذا المجد
خدم ،، لله الحمد

*****
بمصابه كون انشغل ،، واتعالى عن ماحچو
حسين بخيامه اهتدي،،وغيري بسراب اهتدو
مو مستجد هالامر،، سنة اهلنه المضو
ديني رضه فاطمه ،، شيهمني لو ما رضو

مالي سواهه ،،اطلب رضاهه
ضجت دموعي،، جفني جراهه
بمجلس ابنها ،، گلبي نخاها
تشملني فاطم ،، بهالة سناهه

سجد ،، بكل معرفه
سجد ،، گلبي وفه
سجد ،، بذله احتفه

*****

الماله بدمعته ثقه ،، لا يگرب ال دمعتي
خليني بالا وعي ،، لايدنه يم سكتي
الدور عبر كربله ،، شله بجمر عبرتي
ما محتاج الفلسفه ،، منه وطرق لطمتي

عندي مصيبه ،، مني قريبه
ديني الخيامه ،، وجثته سليبه
واجب دموعي ،، اتظل سچيبه
يا عِبره هايه ،، وزينب غريبه

الدمع ،، لا مو علم
الدمع ،، للبي يتم
الدمع ،، للمنلچم

*****
ما تفهم حرگتي ،،كل لطمي عندك عجيب
حسين انه هوه الابو ،،هو العشگ والحبيب
ونبر ابونه بحزن ،، لبطف ذبيح وغريب
وتعزيتي هايه وفه ،، من يعله بيها النحيب


دمعي جريته ،،حزني هويته
لو اسهى مره ،، يعني جفيته
هذا اختياري ،،لگلبي رضيته
بعطر المجالس،، ديني لگيته

عطر ،، طعمه الحزن
عطر ،، اشتم واحن
عطر ،، خلاني اون
*****

ياعمه شبيدي ،، وي علتي وگيدي
لو ميت ولا اشوف الحرم
مذعوره ومحروگه الخيم

****
تمنيت المنيه او لا ،، اشوفچ عمه محتاره
شبيدي شلون ارد الخيل ،،لشنت عالخيم غاره
يعمه امگيد ابعلتي ،،ماصح بيدي اي چاره
هضيمه شلون بيه انفاس،،واشوف الگاصد بناره

خيل وخياله ،، وانه بهالحاله
وگبالي وهالعسكر هجم
مذعوره ومحروگه الخيم

*****
من غصبآ جرعت الاه ،، وصارت حيلتي الحسره
اطفي النار بلله شلون ،، ما يطفي الدمع جمره
اتبع ياطفل لو شاط ،، من اخيام مستعره
نار وتبعتلها اجدام،، شلون اليعثر اتعذره

آ يا عماتي ،، شتنفع حسراتي
ماتطفي جمرات الجدم
مذعوره ومحروگه الخيم

*****
وَياچن مشيت ادروب ،، ومتني من الحبل هدل
گضيت وما گضت ليام ،، طالت عمه عالهزل
اعاين بس ولا اگدر ،، اشد ابأيدي الچ محمل
عفه گلبي اشوف شلون،،حالچ عمه يتبدل

تبچين اگبالي ،، شيصير ابحالي
تاليها ممشى ابلا علم
مذعوره ومحروگه الخيم

*****
عليل واكثر اعتليت ،، ضعني الغربه تبراله
يعني بكل فجر لازم ،، عدونه ايشدنه بحباله
نمشي وكل طفل ليطيح ،، محد عاين لحاله
وانه اعله الهزل مچتوف،، ولوعه بصدري چتاله

ضاعت بالهيمه ،، من عدنه يتيمه
والحادي بيهه مارحم
مذعوره ومحروگه الخيم

*****
عمه منين اجيب الحيل،،وانفض كل هضم بينه
واگلچ لا بعد هيهات ،، بخرابه ايمرنه حادينه
واعيدن ذيچ صولاته ،، اخوچ الچان حامينه
واذكرچ من لكد مهره،،يبعد اختك تشيمينه

چنتي المامونه ،، بنظرات اعيونه
الغمضهه عالشاطي السهم
مذعوره ومحروگه الخيم

*****

هذا ليل وضعني بعده اعله الهزل
عالچفوف شگد غفه ويلي الحبل

وبهذا السفر ،،،، ماعدنه گمر

*****
كربله الچانت وطن
يسروا منها الظعن ،،منها گوه ويالغرب يهلي مشينه
نمشي كل خطوه بألم
بينه ما واحد رحم ،،شلون يرحمنه الذي ذابح ولينه
زينب انه ويا وكت
ديار علهزل طفت ،، من مدينه اجروحنه تزيد لمدينه
من صبح نمشي لصبح
خطوه خطوه ويالرمح،،وراس اخوي ايعاين احبال بأدينه

عالرمح راسه ودمع عينه يهل
عالچفوف شگد غفه ويلي الحبل

ويانه سهر ،، ماعدنه گمر

*****
عجلو ممشى الهزل
مارعوا حرمه وطفل،،لو بطينه بالمشي ينجر حبلنه
راي ما ألنه وحچي
واحنه خانگنه البچي،،حتى من الاه حادينه حرمنه
ليل هذا وكل جرح
نازف ايظل للصبح ،، ياهو نوخ نوگنه ارتاحو يگلنه
محد النه بهالفله
كل اهلنه بكربله ،، يعني محد عن هضيمتنه سألنه

ضعني عن حاله بعد ماينسأل
عالچفوف شگد غفه ويلي الحبل

شما دير النظر ،،، ماعدنه گمر

*****
ياجرح بلله شفه
والحبل بالچف غفه،،تشوغ روحي شما تعثرت هزله بيه
وانه كل خطوه التفت
للضعن چفي شلت ،، حتى اگلهم عمه ممشانه سويه
ظلمه لو ما افگده
ضعني تيهَته العده،، يمضي يومي وماجفن يطبگ اليه
شلون اغفه اعله الهزل
وبرگبتي چم طفل ،، بساعه وحده تيتموا بالغاضريه

بيني بين ايتامي دمعاتي وصل
عالچفوف شگد غفه ويلي الحبل

دلالي انفطر ،،، ماعدنه گمر

*****
من بعد يسر وسهر
الحادي جابلنه الخبر،،ندخل الديوان گالنه يويلي
ضجت ادموع الحرم
تذكرن ذاك العلم ،، وانه وياهن صرت انعى كفيلي
ويه طلعت كل شمس
العبره تخنگلي النفس،،ضيم ليلي وارتجيت ايطول ليلي
گرب للشام الدرب
وانه ماظلي گلب ،، لا اخو الظل عندي حتى يعتنيلي

يعتني وردود ضعني ينكفل
عالچفوف شگد غفه ويلي الخبل

الكافل عالنهر ،،، ماعدنه گمر

*****

يابدر الهواشم ،، ياابا الفضل
يا نهرالفواطم ،، ياابا الفضل

ارويها من اچفوفك ..
يانهر الفواطم،، ياابا الفضل

*****
يبو فاضل جودك ،، زوده من ازنودك
ربته يمناك
عِشره وي متونك،،يامه روى ضعونك
وافيته وافاك
توَصف بأوصافك ،، فاض من الطافك
خليته بحماك
للسگا اتناديله ،، حيل متنك حيله
متخاوي وياك

متوارث صفاتك ،، يااباالفضل
ينغر لخواتك ،، يا ابالفضل

الجود صار اجروفك ..

يتفايض مكارم ،،، يا ابا الفضل
يانهر الفواطم ،، يا ابا الفضل

*****
شاطي لتعنيته،، چان كل امنيته
تسحگله لجروف
عمره تانه يريدك ،، منه تغرف بيدك
ويحبلك اچفوف
،،عالشريعه املاگه،،دار يمها اشواگه
بجروفه ويطوف
موج مايه مسابگ،،راد بس يتشابگ
للجربه ملهوف

الشاطي كَشِخته ،، يا ابا الفضل
لو بيدك غرفته ،، يا ابا الفضل

جاريه من ايطوفك

قدسيه ومراسم ،، يا ابا الفضل
يانهر الفواطم ،، ياا بالفضل

*****
نهر بين امتونك،،جربتك لضعونك
ماي اعلچفين
السقايه وسامك،،نِده فوگ اخيامك
ياگمرة حسين
من نصبت الخيمه،، ضاع ذكر الهيمه
رمشك بساتين
واحه بين ازنودك،،والضعن بوجودك
يجريله نهرين

هيمه وغَيرتهه،، يا ابا الفضل
بسماتك روتهه،، يا ابا الفضل

كل النده بحروفك

سقاي العوالم ،، ي ابا الفضل
يانهر الفواطم ،، يا ابا الفضل

*****

ماي يصعد زوده ،، عَدّه كل احدوده
لو ما وصلته
الماي من تعوفه،، تمرد اعله اجروفه
إيتبعك رَغبته
شوگه يصعد غيمه،، صار فوگ الخيمه
فراگك حسرته
هذا جودك بيته،، منه ذايع صيته
بجالك سمعته

نوماسه بوصالك ،، يا ابا الفضل
من عفته اعتنالك ،، يا ابا الفضل

ايموت من ايعوفك

ويظل بس علايم ،، يا ابا الفضل
يانهر الفواطم ،، يا ابا الفضل

*****

العطش بالثايه ،، ماله كل حچايه
ماواصل اخيام
كل بنات احسينك ،، يرتون بيمينك
چفك نبع دام
مافرغ من مايه ،، موت عنده بهايه
جودك يضرغام
چلمة العطشانه ،، غيرت الوانه
يتصوب اسهام

جودك ياغلاته ،، يا ابا الفضل
من مايك حياته ،، يا ابا الفضل

يتبدد ابلا شوفك

بگطراته المأتم ،، يا ابا الفضل
يانهر الفواطم،، يا ابا الفضل

*****

بويه اشتكيلك جيت هاي الرزيه
منعوا دمعتي عليك يابو الزچيه

*****
تعنيتك لمثواك بترابك أشتم
يلي غمضت العين من جرعة السم
رحت ودلالي وياك راح وتهدم
من الهظيمه اعليك ونتي شجيه

*****
وني الاونه اعليك يردون اگطعه
لا انحب لفرگاك لا اجري دمعه
ياذينه حزنچ حيل گالو يبضعه
اهل المدينه تصيح دمعچ اذيه

*****
حالي وشگلك صار حال الغريبه
بره المدينه يصير دمعي سچيبه
بانيلي بيت احزان بس للمصيبه
حيدر بنى وانعاك ابكل مسيه
*****
يابويه مو وصيت نكروا وصيتك
يتهاددون بنار كل ما نعيتك
يابوي هاي الگوم تنطر منيتك
من غمضت عيناك هجموا عليه

*****
حسره بدليلي اعليك ماطلعتها
عمري انگطع والعين ما وشلتها
روحي التريدك ريت بويه خذتها
ولا حيدر لبلواي عينه ربيه

حسين مجبوره گطعت الحومه
شوفني شگد باچيه ومهظومه

*****
حسين جيتي لمصرعك شچايه
عدمن امنت الضعن و الثايه
گوم انه اختك الك تچايه
گوم ماهي مناسبه هالنومه

*****
گوم يبن امي و عجيد الساده
تراب ليش مسوي منه وساده
طاح من مهره عدوك ناده
وانه اجيت اركض الك مالومه

*****
يابعد گلب اختك ويحماها
انه ادري جيتي ما ترضاها
حسين يبن امي الخيم عفناها
والضعن لا ما تسر اعلومه

*****
التفت كل خطوه خوف امشيهه
حومه بس اعداك ظلت بيهه
وياي رد لخيمتي انطفيهه
اختك امن الفي صفت محرومه

*****
عالخيام الخيل شنت غاره
مدري اركض مدري لا محتاره
عجه بالوادي وعمانه غباره
وهاي ايتام ونسه مظيومه

*****
بيه عاين راح تعرف حالي
ماگبل هالگد دمع يجرالي
صاير بعين الشمس تمثالي
وانه ما باين خيالي رسومه

*****

زينب ،،، ودعتي وطن
زينب ،،، تنتظرچ محن
زينب ،،، ياصبر الضعن

كل خطوه من تمشيها ،، طف كربله يتانيها

*****
من المدينه ،، طلعت ضعينه
مبخوته تمشي ورايه سماها

خدر العشيره ،، بهاي المسيره
وعين الكفلها تحمي خطاها

آآمن دربهه ،، سالم گلبهه
كافل ضعنها سور وحماها

بس ياخساره ،، طف بنتظاره
يذبح شملهم نيته نواها

كافل ،،، عند ام الخدر
كافل ،،، هاليوم وستر
كافل ،،، والطف ينتظر

يبعدها من حاميها ،، طف كربله يتانيها

*****
هاي الليالي ،، رافگها والي
تغفه بأمان الماتغفه عينه

رهن الاشاره ،، تلگه الغياره
داير مخيم كل الضعينه

هذا ابن اخوها ،، ذاك ابن ابوها
بس گولي صاحو يابت علينه

بعده زمنها ،، ما صب محنها
بعده رزايه ايامه سجينه

خيمه ،، بچفوف الزلم
خيمه ،، يحرسها شهم
خيمه ،، ما مسها هظم

عين الذي تباريها ،، طف كربله يتانيها

*****

طوگ اعله ظلها ،، دارت اهلها
خيوط الشمس ذبحتها العوالي

وي العشيره ،، طلعت اميره
محله المشي واتكفله غالي

تنادي گمرها ،، شمعة عمرها
خويه وجودك معنى دلالي

انته عليه ،، عين الزچيه
هيبه وبمانك شدت رحالي

رايه ،، ظل لمشيتي
رايه ،، بيها هيبتي
رايه ،، كفلت عيلتي

اي هايه چف غاليها ،، طف كربله يتانيها

*****
يوميه يگرب ،، عالحره زينب
ساعة وداع ويوم النوايب

الطف يناطر ،، توصله باچر
ومحضر لجيتها مصايب

چفوف الحمنها ،، تفارگ ضعنها
وكل هاشمي عن محنتها غايب

ياخذ وليهه ،، وتظل بديهه
تلطم وتنعى الفوگ الترايب

باچر ،، تذبح غربته
باچر ،، گربت محنته
باچر ،، آ يا ضيعته

ما يرحم ويسبيها ،، طف كربله يتانيها

*****

العيله كلها ،، زينب املها
هيه ابتسامة هايه رقيه

صبر الفواطم ،، خدر الهواشم
صوره بضعنها لمها الزچيه

درب المشته ،، تنشد گضته
كل طفله همها وكل هاشميه

بيها صبرهن ،، تكفل امرهن
لمن تخيم عالطف منيه

راحت ،، هاي العايله
راحت ،، كل امدلله
راحت ،، گصدت كربله

تلاگي محن تاليها ،، طف كربله يتانيها

*****

مدفونه بتراب اليسر ،، والغربه عنوان
بعد السبي صار الگبر ،، للطفله سجان

صوت الها ظل يتبع ضعن
خولتكم اتريد الوطن

*****
خوله طفله بكربله ،،عد ابوها مدلله
وسهم المثلث گطع منها دلاله
وابتدى وياها الزمن ،، حالها حال الظعن
كل فجر يجمع اديها بشد حباله
تمشي واثار الجدم ،، واضحه زغيرة رسم
بحافر الهزله اثر بنت الرساله
تريد بالممشه ستر ،، من ضوه شمس الظهر
بلله لبلا هودج شيستر خياله

ممشاها باثار الهزل ،، مدلولة حسين
تخفي اثر بس ماكو ظل ،، هاي الشمس عين

دموع اليتيمه اتفسرن
خولتكم اتريد الوطن

*****
حد صبرها والدمع ،، انگضه واحنت ظلع
بليله من ليل السبي حفروا گبرهه
بالجروح الماشفن ،، بكل مصايبها المضن
ودعت بس ما نهت قصة يسرهه
حتى لو ضمها الگبر ،، تبقى للوحشه بيسر
ديره غربه وللگبر ياهو اليمرهه
لا ظعن ليها يرد ،، لاهي گدرت تستعد
غمضت وللشام ماوصل عمرهه

اكلف جرح چان العطش ،، لوغربة ادروب
لو ضيعه من ليل 11 ،، وموادع اگلوب

منهد الخيام الماطفن
خولتكم اتريد الوطن

*****

عنها ينشد كل طفل ،، خوله ماكو عالهزل
هايه بس عگدت حبل ذكره من اديها
الها باقي هالصده ،، وين حاديهم حده
خطوه خطوه ويلهزل يطلع بچيها
روح.متعلگه بظعن ،، حسره تمشي ويالمشن
ميته لكن ماكو مخلص من سبيها
عمه رحتي ليابلد ،، شينتظر ضعنچ بعد
يا دواوين وخرايب صرتي بيها

عين الها ظلت عالاهل ،، لمفارگه احباب
لكن بعد حكم الاجل ،، چفنها بتراب

مسموعه نبرتها بشجن
خولتكم اتريد الوطن

*****
ياغريبه وبالغرب ،، للوطن ماظل درب
من وداع حسين صبحتي اسيره
عيله منزلها الفله ،، وما بقه اليتكفله
حيره تسري بالعيال اتردها حيره
طالت ايام السفر ،، كل درب الهم اثر
زينب ابكل ليله اي تدفن اميره
المنيه شگد خذت ،، والصحاري شضيعت
ضياع رايح هالضعن محد مجيره

من ودعينه كربله ،، لم الشمل ضاع
للشام اجت لمدلله ،، هذا الخبر شاع

عماتي آآآ يهلي ابتلن
خولتكم تريد الوطن

*****
بلحده محبوس الجسد ،، والظعن عنها ابتعد
من غريبه ونها مرسال لغريبه
تبقه روح معذبه ،، لكل طفل حاله انسبه
خوله حد يوم الحشر دمعه سچيبه
طفله ابوها فگدته ،، ماتت او مازارته
ولاهي من گبر الابو اندفت قريبه
ظلت بهذا الالم ،، تشكي من حرگ الخيم
شگد عمرها حتى تتحمل مصيبه

مشتاگه ظلت للولي ،، مايطفه هالشوگ
من الگبر تصرخ هلي ،، دلالي محروگ

بالغربه وجروحي حچن
خولتكم تريد الوطن

*****

جرح فرگاكم كبر
شيروف الحنين ،، من ينزف سهر
عيني عالدرب وانعاكم
علتي ياهلي بفرگاكم
طفله للدمع ،،،، عفتوتي

#####
وحدي ظليت وظعنكم،،چن شمس سلم ضواها
رحتو عفتوني عليله ،، أوعلتي لمتكم دواها
تحفر أدروب اعلخدي،،دمعتي وشوگي حداها
يالظعنتو الغربه گيدي،، روحي فرگاكم سباها

غرب ليلي او وحشتي
بخوف مگيده،،،دموعي سلوتي
شموسي غربت ياويلي
وحدي والسهر هد حيلي
طفله للدمع،،،،، عفتوني
#####

#####
چن رفيف الرايه اسمع،،اباب داري كل مسيه
انسى علتي بشوگ افزع،، ظني رديتو عليه
افتح الباب واشوفن،، صفنه والديره خليه
ثاري خفگت گلبي هايه،، يخاف وكت المغربيه

حلم من اصفن اشوف
عمي رد الي ،،،، والفززني خوف
غابت الشمس عن بابي
ليلي هذا حل بمصابي
طفله للدمع ،،،،، عفتوني

#####
يخلص إمناطر نهاري،،وحسبه تاخذني وتردني
بروحي لمناشد عليكم،، يسلب الحيل ويهدني
ظهري يحنيه انتظاري،، وارتجي الملگه بعدني
ياگلب صبرگ عليه ،، بطارش حسيني وعدني

حنت ظهري وگفتي
عالباب استند ،،،،، طالت صفنتي
تباري وحدتي حسباتي
گلبي جمره من حسراتي
طفله للدمع ،،،،، عفتوني
#####

اختلطت الامي عليه ،،خوفي والعله وحنيني
ياهو منهن التفتله ،، يريد ابو اليمه يجيني
شوگي وآهاتي وغربتي،، شبن النار بسنيني
وزعت روحي لجروحي،، والدمع ناوب ونيني

حسين جروحي نادتك
بويه رد عللي ،،، روحي اشتاگتك
حسيني ياشفه لجروحي
فرگتك سبب كل نوحي
طفله للدمع ،،،،، عفتوني
#####

يهلي اذكر من مشيتو،،والظعن بأول مسيره
بس ردت اطلع انادي،، شلون اظل ابلا عشيره
خطوة المعلوله تگصر،، وزاد فوگ العله حيره
بس مشيتو الهم چتفني،، للنياحه صرت اسيره

عثر جدمي وما وصل
عالعتبه انذبح،،، مني كل امل
صوتي مختنگ بالعبره
يهلي واعثرت چم عثره
طفله للدمع ،،،،عفتوني
#####

لفانه الليل ،، وانه بلاحيل ،،
گطع النفاس ،،، يهلي ،، هجوم الخيل
#####
عقيله انه غريبه،، بگيت ابلا ولي
اخوتي مذبحه ،، بعد ياهو الي
اصيح أبهيمتي
اصيح أبعبرتي
اصيح ابمحنتي ،، ها ياهلي

گطع سباح ،،، كفيلي الراح
الاگي شلون ،، يهلي،، هجوم الخيل

#####
اجمع باليتامه ،، من العسكر افر
علي ضاگ النفس،، بريتي مايمر
طفل بالهيمه تاه
طفل اركض وراه
طفل ناداني آه ،، عمه الجمر

دليلي احتار ،، بخيمنه النار
يضيع اطفال ،، يهلي ،،،، هجوم الخيل

#####
اعت روحي اكابر ،، واصبر بالحرم
تشب بيه الجروح ،، مثل حرگ الخيم
غريبه بكربله
غريبه العايله
غريبه بالفله ،، يهل الشيم

بعد عباس ،، غرب لنفاس
بحرمنه الام ،،،، يهلي ،، هجوم الخيل

######
لفه ليلي وظلامه،، هلي وهذا صعب
اغمض ياجفن ،،، وانه بولية غرب
جفوني ساهرن
جفوني ذبلن
جفوني عالظعن،،، گامت تصب

جفن سهران ،،، على النسوان
ركضت اگبال ،، يهلي ،،، هحوم الخيل

#####
اباري بالضعينه ،، واشد بيدي الجروح
ومن اسمع نعي ،،، اگابلهن وانوح
حرم فگدت ستر
حرم تنعه الخدر
حرم بيها عطر ،،، خيمه يفوح

لهيب اخيام ،،، نعي الايتام
يظل تذكار ،، يهلي ،،، هجوم الخيل
#####

علي ،،، من بعدك ضعت
علي ،،، ريتك لا رحت

علي ماهان ،، عطشان ،، تشكيلي ضماك
تنادي بصوت،، والموت ،، يالاكبر خذاك
*****
يانبض دليلي ،، عافيتي ويحيلي
ياعلي كلشي خذت لمن رحت

حسرتي بطلعتك ،، بالدمع تبعتك
روحي بيدك يالولد هونك صحت

من درت عليه،، هانت الرزيه
چنه توه فجري طر وصبحت

بيدي جيت المك،، ياعلي واشمك
بيني بينك خطوه يبني وفرفحت

تعال ،، رد جوه الظلع
تعال ،، ياشمسي التشع

شهگتك آه ،، ويلاه ،، جيت اركض وراك
تنادي بصوت ،، والموت ،، يالاكبر خذاك
*****
محنتي بغيابك ،، ضايع ومصابك
حتى تيهت الخيم وين الدرب

رايي من فگدته ،، النفس گطعته
عاليشمون الهوا ما انحسب

جدمي هم تحير،،بغيبتك يالاكبر
بكيفه ياخذني الهوا لمن يهب

بدمعتي ذكرته،،، مني الي طلبته
ضامي اجيت وگتلي يابويه العذب

مشيت ،، تاهت خطوتي
مشيت ،، صوتك عثرتي

رسمك صار ،، تذكار ،، متفطره شفاك
تنادي بصوت ،، والموت ،، يالاكبر خذاك
*****
عني انته غايب ،، وهرشه گلبي ذايب
شما تطول اغياب احس عمري گصر

ظني چن وصلته،، ترويت وشربته
مرتوي شفافك ترد تنگط نهر

يمته ترد عليه ،، اصفگ راح اديه
وبكثر ما چفي اصفگنه انحفر

بحسرته تصبر ،، دلالي وتفطر
گلبي من عصراته ينفت چن حجر

عذاب ،، عشته بغيبتك
عذاب ،، گلبي لغربتك

شگول بهاي ،، والماي ،، ماحن ورواك
تنادي بصوت ،، والموت ،، يالاكبر خذاك
*****
تنادي هالسمعتك،، لمصرعك حضرتك
انته لو مو انته شفتك وشلكيت

وليدي هذا انته ،، گلبك من لمسته
عرفتك من اظماك من يمك دنيت

انا حسين اجيتك،، بويه و اعتنيتك
مو جسد بس روح يوليد اجيت

من وصلني صوتك ،، ياعظم بلوتك
شتت الروح ابمصابك مادريت

اجيت ،، روح ابلا جسد
اجيت ،، ميت يالولد

نحتلك نوح ،، والروح ،، جايبهه فداك
تنادي بصوت ،، والموت ،، يالاكبر خذاك
*****
شفتك حركتها ،، روحي املتهه
انحييت واملتني همستك

حاچيتك واتاني ،، يانبع حنانني
وادعي ياريت المنيه فاتتك

حچيلي وانه اسمعك ،، لا لتهله دمعك
لا تغمض وانا يبني بعازتك

لاتنطق وداعك ،، افتح بويه باعك
گوم خلينه نرد لخيمتك

بديك ،، لمني من الترب
بديك ،، تطفيني من اشب

نور العين،، لحسين ،، بالدمعه ارتجاك
تنادي بصوت ،، والموت ،، يالاكبر خذاك
*****
جروحك الي تنزف ،، روحي بيدك اترف
بويه للدمعه عفتني والعذاب

الموت ليش اجالك ،، بهمه واعتنالك
الموت ماگبلك ابد ماخذله شاب

رحت انته من اديه،، بعروگي المنيه
تجري مثل الدم يبويه وعيي غاب

موت بيه ساري،، حسيته احتظاري
توسدت يمك يالاكبر عالتراب

عليك،، گلبي ينعصر
عليك ،، چم مره احتضر

من امشيت ،، ونيت ،، يالمالي سواك
تنادي بصوت ،، والموت ،، يالاكبر خذاك
*****

خيمه ودموع وجفوف ... طاحت بارض الطفوف
.. ...
ياجروح الغاضريه
دمه لون المغربيه
،،،،،،،
كربله بيج المصايب ،،، غيرت لون التراب
خالطت ذراته صارت ،،، تنثر بسوحه الخضاب
كل الم الوانه ترسم ،،، عالارض لوحة عذاب
والدموع تسيل غربه ،،، والسهر ودع شباب

الهوا المر عالجروح ،،نسمته يعللهه نوح
من يهب بكل مسيه
دمه لون المغربيه
،،،،،،،،
ضامي سباح المخيم ،،، ينتضر يرجعله جود
جانت اماله يورد ،،،، لو شهك عطر الزنود
تالي نبلة فركه لاحت ،،،غمضت عين العهود
والنهر ناده الضمايه ،،،، راح عمكم مايعود
رايه ظلت عالنهر
چم طفل گلبه انكسر
وانكسر ياظهر اخيه
دمه لون المغربيه
********
دمعه طاحت عالوطيه ،، من جفن فاگد ولد
بين ادي شو چنه غافي،، وامه تنشد ماگعد
لهفة المرضع لبنها ،، فراگ لحظه وشوگه هد
وليدي رده دمعي مايه،، يرتوي وصدري مهد

ساكت شماله الطفل،، غافي لو صابه النبل
بيده جابه شهالرزيه
دمه لون المغربيه
***********
طشت الفرحه هلاهل، شابگ الياس البخور
والنده البخدود معرس ،چن صبح شعشع ينور
چلمة مهنه ييمه ،، بالخيم ظلت تدور
الفرح بس ليله باچر ، الدمه ايحني النحور

يمه من باچر اخاف ، ينذبح هذا الزفاف
ترحل وحنتك بديه
دمه لون المغربيه
**********
النار من لهمة مخيم ،، مرادها كشف الستر
والشمس عللخيمه وگفت ،،الغايه چنها تنتظر
العفاف اتشوفه رادت،،لحظه تانتها عمر
عطلت غيبتها حتى،،اطوّل ساعات الظهر

ياظهر تطلبها بيش ،، هايه نار وهذا جيش
جرح گلب الهاشميه
دمه لون المغربيه
************

دخيل ام البنين ،، دخيل ام البنين

دخيل،، وگفت ابابچ ادخيل
شلت چفي تواسيل
فدوه ام الگمر هذا الاسم بلساني ترتيل

فاح ،،، اشم عطر الوفه فاح
دليلي بعتبچ طاح
شهگت اسمچ لگيته مخضر بدلالي سباح

انتي تسبيحي ودعائي والذكر
انتي قرآني وحفظ وانتي الستر
بنعمة اسمچ اقره والطم عالصدر
للمحرم انتي سر ليلة قدر

دخيل ام البنين ،، دخيل ام البنين

************
رباي ،،، اريدن بيدچ ارباي
نخيتچ لزمي يمناي
بدرب تربيتچ امشي ماازل علميني ممشاي

تاه ،،، تره الماحشمچ تاه
وبعد ماتنفعه الاه
مثل معلول اظل ابعتبتچ ماحصل ادواه

لولا ترتيبچ فلا اندل درب
عن نظر عينج فلا اريد انحجب
ريح عطفچ روحي تاخذ من تهب
گلبي عد اظلوعه عاشگ ينحسب


دخيل ام البنين ،،، دخيل ام البنين
************
طاف ،،، حنيني بكعبتچ طاف
شدهني الشوگ من شاف
عن الطافچ نشدته محترگ مالاگي اوصاف

روح ،،، حنانچ غرگ الروح
يفيض امنين ماروح
يراويني صور طف ونهر وحسين مذبوح

بعيني خليتي صور ياس وشمع
والمهد هزته مرضع بالدمع
رحمتچ خلتني اصرخ وانفجع
لمن يذكرون كسرات الظلع

دخيل ام البنين ،،، دخيل ام البني
************
خيام ،،، نعيتي مصاب الخيام
يهضمچ حال الايتام
بچيتي والزمن ضنچ اسيره رحتي للشام

سال ،،، كثر ما مدمعچ سال
شريكه صرتي بالحال
يمه حسين صحتي بيوم رحتي لملگه لعيال

انتي يام العزا وام الضعن
بان برسومچ حزن لتغربن
حرگه منچ ردنه عالگوه مشن
بجاهچ انطالب نواسي لنسبن

دخيل ام البنين ،،،، دخيل ام البني

************
ذاب،،، دليلي بندبتچ ذاب
فزعت ابدمعي طلاب
دخيل مروتچ خلي الدمع لعيوني جلباب

كون ،،، دخيلچ ارتجي كون
الي ماتنشف عيون
عبد واتوسلچ ماانسه لحظه يوم الضعون

ريت بس عطر الحزن مولاتي اشم
الناعي لو صاح العطش كون الچم
روحي بحبال المخيم تلظم
كون احس بآهات صراخات اليتم

دخيل ام البنين ،،، دخيل ام البنين
************