زينب توصي الحرم ،، نصبن عزيه ،،، بالغاضريه
،،،،،،،،،،،

الليله زينب گامت توصي الضعن
هايه گاع البيهه ابن امي اندفن
يم اخوتي عالسبي لاتشتكن
عالهواشم ننعى يلله اتحزمن

النه مانشكي الم ،، ننعى الرزيه،، بالغاضريه
،،،،،،،،،،
بگبر ابو اليمه اذا لمنه الشمل
عيونچن لحسين خلنهه تهل
يمه لاطاري تجيبن للحبل
لاتذكرن ضيم عثرات الهزل

يلچم ابگلبه سهم ، شكوى السبيه ،، بالغاضريه
،،،،،،،،،،،

يالرباب ويمه لاتنعي الولد
شلون لو عبدالله من ونچ گعد
صدر ابو تدرين صايرله مهد
يعني راح ايهز ظلع بي ماضمد

بصدره غافي لنفطم ،، بنبلة منيه ،، بالغاضريه
،،،،،،،،،

لا تذكرن لاخرايب لايسر
وبينه كل ديوان حادينه يمر
لاتگولن غير ارسومي الظهر
مشتكانه يعيد بظلوعه الكسر

ظلعه لسه يجري دم،،من خيل اميه،، بالغاضريه
،،،،،،،،،،،،

من ابو اليمه نروح لكافلي
راح اگله خويه ياهيبة علي
خويه مشتاگه تگلي ادللي
حاشه ماگله تفرهد محملي

خويه ياراعي العلم ،،ساترنه فيه،، بالغاضريه
،،،،،،،،،

انعى اريد اچفوف منه تگطعت
بالگبر اشهگ محنته الفوحت
بالضمه ماگله سكنه فرفحت
لا رقيه عنه مچتوفه مشت

مااگله من الخيم ،، ركضت رقيه ،، بالغاضريه
،،،،،،،،،

نادم على تقصيري ،، يافاطمه عذريني
لتبدليني ابغيري ،، ويهل الدمع خليني

*****
ابدي اعترافي ومستحي
عما جنت روحي اعتذر
عن كل نفس متنفسه
من محنتچ خالي الذكر
عن صفنه ماچانت الچ
منها اصحه بس مامنعصر
عن ليلة مسامر گضت
نستني ظلعچ منكسر

دمعة ندم بعتابچ ،، عن كل جرم أجرمته
شغليني بس بمصابچ ،، من غفلتي صحيني

*****
شگد واگف ابابچ لجل
تگضيلي حاجات وگضت
بس مو على بالي من اجي
دارچ بعدها ماطفت
هالمره جيتچ منكسر
وبمحنتچ روحي حضت
يم بابچ شما اقترب
من ناره عيني غمضت

شلون بمحنتچ هايه ،،اطلب قضاء الحاجه
هالمره جاي بغايه،، لمصيبتچ جرحيني

*****

بجروحچ شگد سولفت
من بابچ لسبي الحرم
ألچم واصور بالجرح
ندمه وگلت طاح العلم
لو خايف اكسرلچ گلب
ما اذكر اشسوه السهم
تالي فهمت صب الدمع
مو شرطه الا احرگ خيم

هواي الچمت بجروحچ،، واستسهلت ذكراها
لو مره احس ابنوحچ ،، چان الدمع عاميني

*****
مرضيه الله ملقبچ
وانه بوجاهت هالاسم
طالب سماح ومغفره
جاي اعتذر من كل اثم
عذراً اردد بالدمع
يالزهره مااريد انحرم
ثبتي مكاني بمجلسچ
بسنيني هذا اكبر حلم

تايب والوم افعالي،، مدنگ خجل مولاتي
باقي تظل امالي ،، بتعزيتچ اتثبتيني

*****

بجاهچ صرت بين الخلگ
صاحب مكانه ومنزله
وبخدمتچ من ارتبط
شاني البسيط شگد عله
وي الحسبتيهم دمع
حسبيني باچي لكربله
هذبيني علميني الادب
للمجلس من استقبله

انعمتي من خليتي ،، ثوب المعالي ثوبي
يافاطمه امنيتي ،، خدامچ اتحسبيني

*****

حنيت انه لشوفتك ولبسمتك حنيت
حنيت اشم ريحتك ولمصرعك هلجيت
بيدي شمع زفتك يالبدمه تحنيت
ام انه گلبي احترگ ولحومتك فزيت

،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
جسام ياضنوتي من ايست منك
خفت الشمع ينطفي فزيت ادورنك
بالحومه ادري طحت وسهام صوبنك
وي بينك اتعاندت كون وازفنك

وينك يجاسم وين عيوني عماهه البين
دلالي يمه انفطر بمصابك اعتليت
بيدي شمع زفتك يالبدمه اتحنيت
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،

گلب امك بلا نظر يوليدي يندلك
لا تفز من نومتك مغمض الجفن خلك
عطرك درب ريتي اشتمه واوصلك
ياسك بديه جبت وشوباش اطشلك

ثوب العرس وياي جبته يلب احشاي
فوگاك دمع النظر شوباش الك طشيت
بيدي شمع زفتك يالبدمه تحنيت
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
ماجني دمك شفت هذا حمار الخد
لن ادري كل الورد من وجنتك ورد
يصفن ييمه الگمر لنه لجبينك صد
جنيت كل الوصف ياحسن مالك حد

لحسنك دليلي اشتاگ جيت بدمع حراگ
الشوگ بيه گصه من امناطرك مليت
بيدي شمع زفتك يالبدمه تحنيت
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
هرش الگلب يرتوي من بسمتك يمه
وانساهه هم دنيتي لو جيدك اشتمه
محلاهه يمه بشفتك يامحله هالجلمه
يبطيحتك هذا العمر من غيرك ايلمه

من گالو ابنج طاح عمري تبده وراح
عالراس يبني الطمت يابلوتي ناديت
بيدي شمع زفتك يالبدمه تحنيت
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،

ماريد جرحك يفز ابهيده من اوصلت
انه ادري من ضربتك اشكثر يمه لجت
وعن لا تشوف الدمع ابشيلتي تشيلت
واعذرني ماسمعك بهداي الك هلهلت

بحسره الهلاهل حيف عرسك يجاسم طيف
بهالحاله ماعاينك شگد يبني اتمنيت
بيدي شمع زفتك يالبدمه تحنيت

ما تنسي ايام ،، وگفتنه بالشام
عيني اعله عمتي
گبل السبي تمنيته
گاضي العمر ياريته ،، عيني اعله عمتي

*****
اهل بيت النبي وألنه ،، مثل جدنه القتل عاده
ومن الله كرامتنه ،، الشهاده وخصنه عباده

امر الله وأتمرنه
هذا الذبح فخرنه
بس شذنب خدرنه ،، صيوانه محروگ

كل خيمه سلبوها
عيلتنه ضيعوها
ليش الحرم خذوها ،، مسبيه عالنوگ

مانشرب الماي ،، هانت گلت هاي
نصبر عليها
بس ليش حرگوا خيمه
وتاه الضعن بالهيمه ،، عيني اعله عمتي

*****

اجيت لكربله بعلتي ،، اطلعت منها بگيود اسري
انه معدي الصبر حده ،،لچن شفت الهدم صبري

گيد البدي حملته
بيه شجره قبلته
بس ياهو مثلي عمته ،، طلعت اسيره

شلون اصبر واشوفن
ديار الحرم يطوفن
وأدموعي ما يروفن ،، جرح الاميره

كتال الصواب ،، من عين الاجناب
نظرة شماته
عمدن يمر حادينه
بديار المعادينه ،، عيني اعله عمتي

*****
الخرايب عالدرب صارن،،سكن للفگدن الوالي
عليهن ابچي دم گلبي ،، وحرمنه يبچن الحالي

ليليه بالخرايب
نعد للمشي مصايب
وشگد بعد نوايب ،، يمرن عليه

بس انا باقي ألهن
الماطبگ جفنهن
الله يا صبرهن ،، بنات الزچيه

صبرن على الصار ،، وايضمن اثار
وضحت بديهن

وايگعدن ابكل ليله
يشدن جروح العيله ،، عيني اعله عمتي

*****
للشام ابدمع واجروح ،، وصلنه وهايه حالتنه
والناس اشبلاها الناس ،، بيا ملگه تلگتنه

كل حرمه هاشميه
نادوها ياسبيه
أتستر ضعنه بيه ،، آحا يضعني

شام وغصب لفيته
بعيد وظفر لگيته
عمري گصر يريته ،، بهلي جمعني

ياهبطة الراس ،، من ملكه هالناس
وشسمعونه
الشام فك بيبانه
بينه اشتفه العادانه ،، عيني اعله عمتي

*****
بديوان اللهو گالو ،، الضعن لازم تجيبونه
حرم وامگيده ابگيدي ،، نوگف اسرى خلونه

بنفس الحبل چتفنه
ذله شكثر وگفنه
والماعرف عرفنه ،، بيت النبوه

بطشت الذهب ولينه
عينه تصد علينه
حتى اسمعت انينه ،، من طشته دوه

يابويه يحسين ،، مابطلت العين
من صب دمعها

يابويه من جابوني
بهذا الوضع ذبحوني ،، عيني اعله عمتي

*****

ناوي وبيدي رايه ،، ماشي وكلي غايه
اتلگه السبايه ،، حسين
أول خطوه عيني ،، صبت من حنيني
تعنيت ومعيني ،، حسين

ياضعن راجع عالهزل و أمترب
ملگانه يم گبر الحبيب اتگرب
نتلاگه وانه ابنيتي الكم انحب

*****
لأرض الغاضريه ،، ترجع ياسبيه
تنعى يارزيه ،، حسين
وايمر أبخيالي ،، يم گبرك يوالي
تشكيلك يغالي ،، حسين

توصلك وتشكي هضم شافته
وبين الخرايب چم طفل دفنته
بالون عليكم هالدرب خلصته

*****
من الشام البعيده ،، بضعونك حميده
وآلدها تريده ،، حسين
طفله وكلها عبره ،، تنشد بيها حسره
مسلم وينه گبره ،، حسين

راحت يتيمه عالهزل مسبيه
تنعى اعله ابوها باليسر ليليه
رادت ابوها اتگله شوف شبيه

*****

جاي وأمنياتي ،، كون افنيها ذاتي
نسيني حياتي ،، حسين
اشغلني ابمصابك ،، بچيني اعله بابك
خليني برحابك ،، حسين

اخلط مصابك سيدي بأنفاسي
مشيني باثار الدمعته اتواسي
للرجعن أبغربتهن ألطم راسي

*****
ممنون اعتنيتك ،، مولاي او نعيتك
گاصد وارتجيتك ،، حسين
أوصلك تعازي ،، برسومي حدادي
من گلبي انادي ،، حسين

جيتك واريد ابچيلك اعله ضعونك
يادمعه صرت ابطبع اليزورونك
ياضامي طايح مارضوا يروونك

*****

ليليه ،، اوگف كسير ابابك
واتزود من اعتابك ،، حنيه
ليليه ،، ياريت اكضي اسنيني
ادعي وتغورگ عيني ،، حنيه

يا ابالجواد اتوسلك
لا ينطفي شوگي الك

*****
شتاگيتك وصرت اشتكي يابالجواد امن البعد
ودخيلك انته ابكل لطفت سامحلي لعتابك ارد
فراشه روحي بالصحن حنيتك اشتمها ورد
يمك صرت كلش ترف واترف كلب گلبي الجَلد

حنيتك ،، يا ابالجواد الضامن
حصني وملاذي الآمن ،، اسوارك
حنيتك ،، يامن عليم ابحالي
خل تحتضن دلالي ،، اسوارك

المايعتصم بسمك هلك
لا ينطفي شوگي الك

*****
ناجيتك بسيل الدمع مسكينك اوأنته التحن
بلا ذكرك الدنيه عدم والجنه من دونك سجن
اهوى انكساري لحضرتك واستطعم دموع الجفن
قربني لجروحك بعد لبسني مولاي الحزن

ياجنه ،، مسكنها يحله بدونك
الجنه عطف اعيونك ،، محلاها
ياجنه ،، انته الرضا وكل غايه
ابابك گعدتي وهايه ،، محلاها

النال الرضا كلشي ملك
لا ينطفي شوگي الك

*****
عالگبه اعاين ابتسم عالعتبه اسجد انكسر
مابين اماني والدمع ياريته ينطش العمر
شباچك شما اقبله بشفافي احس چويت جمر
هنا واذكر الطف والجره ولعمتك انعى ام الخدر

انعاها ،، عمتك غريبه ويلي
صاحت اريد اچفيلي ،، بالوادي
انعاها ،، واذكر مصاب العيله
والوحشه ذيچ الليله ،، بالوادي

عظم المصاب انعى الك
لا ينطفي شوگي الك

*****

لو شوگي ياضامن برد ولساني من ذكرك گطع
معناها ماعندي بعد عالطف گلب دگ وانوجع
حبك طريق لكربله للحسره بوابه انوضع
دمعك اصل كل محترگ كل الحزن منك نبع

دمعاتك ،، بيهن وصف لجروحك
عالدنيه فايض نوحك ،، واحزانك
دمعاتك ،، تجريها طول اسنينك
للضامي هذا ونينك ،، واحزانك

گلبي على احزانك سلك
لاينطفي شوگي الك


*****

اشتاگ الك يا ثامن النور ،، امامي
يشتد حنيني دمعي معذور ،، امامي

ابعد لكن الگاك ،، مالك گلبي ذكراك
يشتد حنيني دمعي معذور ،، امامي

*****

للعين ،، جفنين ،، وصورة ضريحك بين الجفون
مولاي ،، رجواي ،، انته ورخصلك ماي العيون
انخاك ،، الگاك ،، مؤنس دليلي وانه ممنون
حنيت ،، ظليت ،، بحسرة طواف وي اليطوفون


أنوي الزياره ويملي الاحساس ،، دليلي
وچني عصرته ابزحمت الناس ،، دليلي

افتح عيني بضواك ،، مالك گلبي ذكراك
يشتد حنيني دمعي معذور امامي

*****

سلطان ،، منان ،، اذكر صفاتك انحني اجلال
بعتاب ،، لبواب ،، ساجد ألك يمغير الحال
ويسيل ،، ترتيل ،،قرآن جفني وتسمع شگال
ماريد ،، كل ايد ،، ترفعني الا بأيدك انشال


تحسبني عبدك هايه رجواي ،، يضامن
بلطفك وامانك تزهي دنياي ،، يضامن

عبدك دمعه ناداك ،، مالك گلبي ذكراك
يشتد حنيني دمعي معذور ،، امامي

*****

الفراگ ،، حراگ ،، طبع اليهيم بأسمك ايذوب
للنار ،، آثار ،، برسوم عشاگك يمحبوب
ماگول ،، معلول ،،وبخدي رسمت دمعتي دروب
مولاي ،، دعواي ،، اشواگ وانته اعلم بالگلوب


ما أدعي تذبحني الاشواگ ،، دخيلك
لكني والله لصحنك اشتاگ ،، دخيلك

رحمة ربك الافلاك ،، مالك گلبي ذكراك
يشتد حنيني دمعي معذور ،، امامي

*****

چم ليل ،، مر ويل ،،بين امنيات الشوگ سهران
مجروح ،، والروح،، مألها غيرك سيدي اوطان
ناديت ،، ياريت ،،ساعتها كون املكلي جنحان
وأتراب ،،كل باب ،،من صحنك اشتمه يسلطان

باب الجواد المنه كل جود ،، يقيني
بحر العطايا الما أله احدود ،، يقيني

رحمه ابكل عطاياك ،، مالك گلبي ذكراك
يشتد حنيني دمعي معذور ،، امامي

*****

ايام ،، احلام ،، اگضيها واتخيل زيارات
ناجيت ،، ياريت ،، محسوبه كل احلامي جيات
آمال ،، دلال ،، يكسب رضاك ونبضه حسبات
لهفان ،، حيران ،، لو ردت اشكرك ماكو كلمات


هو العبد ما يوفي سلطان ،، شوافي
لو حتى شكري بطول الازمان ،، شوافي

بس ارد ابقى بحماك ،، مالك گلبي ذكراك
يشتد حنيني دمعي معذور ،، امامي

*****

بنعش الدمع زهرتنه ودعناها
ظلت هوه نشتمها ما شفناها

فاركتنه ازغار ،، ويلاه ويلاه
امنه مو بالدار ،، ويلاه ويلاه
*****

حال الشمس واتغيبت
حال ام حسن من ودعت
بغيم انحجب عنه الضوه

بكل الشعور إتواجدت
حنيه شوگ اتناثرت
دفنوهه بس ظلت هوه

غايب رسمهه ،،،، بالگبر
آثار المهه ،،،، تنذكر
بينه ونشمهه ،،،، كل كتر

نشتاگ اله آ يا حضنها الدافي
نلتم دمع واتگلنه زينب كافي

للعقيله اندار ،، ويلاه ويلاه
امنه مو بالدار ،، ويلاه ويلاه

*****
بعين الحسن كل ما نصد
بينه الزمن چنه يرد
فاطم تلوح ابنظرته

عشناهه لحظه وننسعد
يرجع گلبنه ينمرد
تفز الدموع بصفنته

نلگه المصيبه ،،،، حاضره
دمعة نحيبه ،،،، ليا مره
امنه الغريبه،،،، بناظره

جروح الحسن تطفح تغرگ اعيونه
وكل الجره لُمنه نشوفه بلونه

بالحسن آثار ،، ويلاه ويلاه
امنه مو بالدار،، ويلاه ويلاه

*****
ويانه بس ابلا رسم
واليقضه ماتنعد حلم
الواقع حكم بفراگه

نلگاهه كل ما ننهظم
بعصرة ظلعها ننلچم
شيلزم گلب واشواگه

باب الخفاهه ،،،، بعصرته
شيع ضواهه ،،،، بدفعته
غيم سماهه ،،،، بحرگته

تحضرنه من يشتد حنين البينه
نسمع ورا الباب امنه لتنادينه

من لهيب النار ،، ويلاه ويلاه
امنه مو بالدار ،، ويلاه ويلاه

*****
يوميه بينيه يتضح
ويبين اكثر هالجرح
ويانه كبر يافاطمه

كل ليله كل طلعت صبح
بسامارچ انشوفه رمح
من الظلع يگطر دمه

لهاي الرزيه ،،،، لو رجف
گلبي واديه،،،، يا وسف
دم الزچيه ،،،، مانشف

اخ الظلع صحتي بهجوم الغاره
ثاري الالم چان السبب بسماره

من ورا البسمار ،،، ويلاه ويلاه
امنه مو بالدار ،،، ويلاه ويلاه

*****

ظلع امي هذا بذمتك
ياباب ما أمنته
بسمار بي نبته
حرمه ونختك للستر
ليش الظلع كسرته
ليش الحرگلك عتبتك
يسطر دخيلك عفته
ضميت بسمارك عمر ..
ماندري تنتظر الظلع
روحين ياباب اعصرت
اهات خلفك تنسمع
والدم تخالط وي رماد العتبه
وبعيني طفل امي شفت
من طاح ،،
هم لازم ظلع .. وبأيد لازم گلبه
ياباب هاي امي تره
گصدتك اطالب ستر
شمالك عليها تحترگ
وتصير جواها جمر
وياك ،،
عشرتها عمر
بهيده عليك اچفوفها چانت تمر
ولمن يدفعك چف غرب
اطاوعه ،،
وظلع امي ترضه ينكسر
ياباب صرت وي العدوا
عالزهره مايل شفتك
تحميها ،،
بس تهضمها ماحاسبتك
ظلع امي هذا بذمتك

هاي ام ابوها ،، وليه ولوها
چم مره منزلها احترگ
باب وبديها ،، ادفعه وعليها
مال بدفعته وانطبگ

مو هايه ام الحسين ،، عنها انسأل سؤال
مجروحه منها عين ،، والدمعه دمها سال

ليش العمر أوله
بهذا المصاب ابتله
هاي المصيبه ،، صارت غريبه
ومن الظلم ناحله

*****
دمعة.جفنها ،، نشرت حزنها
عصروها ليش ليا سبب
ليش الدفعها ،، كسر ظلعها
وشب أبثنيتها الحطب

عالزهره كل الي صار ،، بعيلتها لازم يصير
نفس الهجوم ابنهار ،، زينبها باچر تحير

بدمعه الزچيه تصيح
هم.مثلي زينب تطيح
داري الهظمها ،، وباچر خيمها
تجرح گلبها الجريح

*****
بعد المصيبه ،، عاشت غريبه
حالتها چنها ابكربله
رسم الملامح ،، بالزهره واضح
تنعى لمصاب أمدلله

قصد الدفعها يريد ،، يگطع دمعها اليصب
عن كربله تظل بعيد ،، ويبقى ضعنها ابغرب

فاطم حضنها وطن
غيبتها ضيعة ضعن
الصوب نظرها ،، وگصر عمرها
صب اعله زينب محن

*****
گبل الرزيه ،، دمع الزچيه
سايل على العاشر قهر
تدري الليالي ،، صورة يا غالي
بموسط المدمع ظهر

صورة عقيله وحبيب ،،بحروفه مصحف جروح
اسمه الحسين الغريب ،،وأخته لوداعه تنوح

صواب الجفن غايته
يمحي صور دمعته
لا غاضريه ،، تنعى الزچيه
ولا تنذكر محنته

*****

اعظم جنايه ،، أبعد المنايه
بسمار او يطعن بالظلع
يومه توصف ،، بوابة الطف
وأول جساره للفزع

بالمحسن اشگد شبيه ،، عبدالله يوم الضمه
وصوت اليتيم اليتيه ،، يصرخ ييمه فاطمه

باچر رقيه بظهر
يطبع جدمها ابجمر
جيش وتحزم ،، يحرگ مخيم
وسد العقيله الصبر

*****

من اصياره حد الموت لحظات
بنار الباب صارت فتشة العين

اخ الباب صاح المحسن ومات
من دنيا اخذ حفنة نياشين

مصاويبه النعدها هواي كلفات
هذن للشاف دنيه وعايش سنين

شلون بهاي لرسومه نديات
أله يرهم جرح وايقنع البين

ولا ليله تهنه وبالمهد بات
دللو ما سمع من ام الحسين

جنين وصدره بي آثار عصرات
وعلى الحايط رسم بدماه چفين

طاح وظل يصد للباب دفعات
على العتبه جمر چواله خدين

راح ويومه ظل بالبيت تذكار
شما صدوا هله للباب يبچون

يذكرون الحطب والشبوا النار
دمعه بدمعه لو سالت يخلطون

تمر ايام بس ماتمحي اثار
بعين امهم مصابه شلون ينسون

ظلعه زغير مايحمله بسمار
اترف من ترافة رمش العيون

اخو لزينب يصير وحيف ماصار
زمن ماراد خوتها يكثرون

دفع بابي وعرف بالباب
انه ال لايذه ابسده
عصرني وخله هالبسمار
طگ ابظلعي واتعده
عال ونال كل ماراد
ياهو ايمنعه وايرده

حگه اتمرجل ابهاليوم ،،دره شموصى والينه

*

تجاسر شال چفه وصاب
عيني وسگط اجنيني
سنيني ثمنطعش والنار
حرگت داري وسنيني
طحت اتنفس الدخان
اصيحن فضه سنديني

يفضه بطفلي مدري شصار،،من النار طلعينه

*

اصيحن آه بس كل آه
تطلع روحي يايمه
شكلف من ظلع مكسور
شو حتى البچي يلچمه
واتحول مصب العين
بددل دمعته بدمه

يا حيرة ظلع مكسور ،، بيش اخفي نياشينه

**

يمه أوصيچ واغمض عيني
من مخيم كربله و ذكريني

*****
وصيتي يازينب الچ حفظيها
يمه شدي حزامچ لتاليها
جروح بابي وعتبتي الشفتيها

بكلها باچر رايحه تورثيني

*****

رايحه تورثين حزن ايامي
جروحي يايمه ودموع اعوامي
يوم التودعين اخوچ الضامي

للمدينه توجهي وندبيني
*****

توجهي لصوبي بوداع الوالي
وعني شمي بحرگه نحر الغالي
يالغربتچ چنها غربة حالي

سنينچ التگضيها مثل اسنيني
*****

تگضي مثل سنيني يايمه انكتب
من المصايب عينچ تشوف العجب
غاره توصي لغاره لا يطفى الحطب

خيمتچ يحرگها ليعاديني
*****

يحرگ العاداني وايحل الذبح
بكربله افعال الكرهنا تتضح
لمن تشوفين يعله اعله الرمح

ياغريبه هذا راس حسيني

*****

انه ام زينب يخو زينب هل أنخاك
تناديك الحرم عباس بحماك
*

يشبل الليث ياعباس ياحيد
يگمرة ليل ياأول صبح عيد
يسور الماتكرر مثله تشييد

وتد للكون ابو الحسنين خلاك
*

يستر الكعبه يحجاب المداليل
گوم انهض تمرد صاحب الفيل
رد اعصف غضب ياطير ابابيل

بنظر سجيل ذري الي تحداك
*

تحدوك ودنوا من حد الخيام
بعد ما امنوا منك يضرغام
مشاعل نار بيد علوج ظلام

هجموا عالمخيم شني صداك
*

شنهي الحال بينك بين متعود
سهم العين لو من فگد الزنود
يمه انهض ييمه انداسة حدود

على اخيام الفواطم فزعت اعداك
*

فزعوا من بعد ما طاح الحسين
ياحيرة حرمنه تتجه وين
بين النار هاي العايله وبين

صهيل اخيولهم وبعازة ألواك
*

تتذكرك ،، تتشكرك ،، روحي وتحن
گمرة علي ،، يا كافلي ،، وضي الجفن

يا أحلى ما بسنيني ،، ميت عدل حاميني

*****
هاي انه زينب والدمع ،، صاير سجية روحي
وصاير مثل شم الهوى ،،همي وعذابي ونوحي
يا كافلي ومن فرگتك ،،وانا اشكي من جروحي
بگد ما الك ياخويه احن،،اشواگي شبت لوحي

بگد غربتي. ،، بگد محنتي ،، بكثر الدمع
اشتاگ الك ،، وارد اوصلك ،، واحني ظلع

فراگك جمر يچويني ،، ميت عدل حاميني


*****
اشتاگ الك وي كل نفس ،،يالمارحت من عيني
وابچي وأموت من البچي،،وبهلتك تحييني
تطلع گمر واسمع لحن ،، چن صوتك ايناديني
ياخذني صوتك للمضه ،، لصيارك يوديني


هلالك يهل. ،، يابالفضل ،، چنت انتظر
گالو اخو ،، صار وكفو ،، يم الخدر

بروحك صرت شاريني ،، ميت عدل حاميني

*****
بكل ذكرياتي صوره الك،،وسط الگلب محفوره
وبهيئة إفياي الخدر ،، تظهرلي اجمل صوره
معذوره من اعطش صحت،،رويني چا معذوره
چا شنسه جودك يمنتك،،لو عينك الناطوره

جبت العمر. ،، رمشك ستر ،، ياهيبتي
شنسى سهم ،، ضيع حرم. ،، من خيمتي

من عالنهر تربيني ،، ميت عدل حاميني

*****

ياخويه كل ليلة سبي ،، مرتني ينهد حيلي
بسمك اعوذ من العدا ،، تحضرني واتحاميلي
عن صبري كل ما انسأل ،، صبرني زود اكفيلي
چا لو له اسمك ماگضه ،،ضيم ومصاب ارحيلي

فوگ الهزل ،، بيدي حبل ،، ومكابره
بسم الگمر. ،، من كل خطر ،، متستره

ايدك احس بيميني ،، ميت عدل حاميني

*****
خلص سبينه ومانشف ،، جرح الحنين البيه
اختك واحن لشوفتك ،، لمسامرك ليليه
اتذكرك مره ابتسم ،، وابچي من اصد ليديه
اذكر صباح موادعك ،، يوم الصرت مسبيه

بيدي طبع ،، گيد ودمع ،، ماينمحي
انته طحت ،، وانه رحت. ،، گوه بسبي

راسك بقه يماشيني ،، ميت عدل حاميني

*****

ماتخلص ايام الشام
لا جرحه اليلچمني بره
چنه اعزاز او عدنه خيام
تحرسنا ارباب المفخره
مو عالبال او لا بحلام
من عدنه تتيسر مره

هذا انا العليل العايش اجروح
من عاشر محرم وابتدا النوح
من ضيعة ظعن والوالي مذبوح

يبره ياجرح بيه ،، وانا العمتي مسبيه
آه الشام وادروبه ،، كله آثار علويه

*****
شنسى الهزل لو الحبال
لو دمعه لو عثرة طفل
لو صوت الحداي الگال
مركبكم هزلات الابل
ايام وضعني أبهالحال
ليليه الخرايب نزل

ماانسى الجره عايش عذابات
بآهات ودمع نگضي المسافات
بتراب اليسر ليل السبي انبات

نلتم دمعه للرايه ،، وابن الحامي حمايه
كل صفنة يتيم اتگول ،، وينه الچنه بفيايه

*****
عماتي بكل هدوة ليل
ماجازن من صب الدمع
وحدتهن مسلوبة حيل
وأسلمهن مكسورة ظلع
وانه الهن عانيت الويل
طول الليل آهات استمع

ينطر الفجر وايطر الگلوب
وايفز كل طفل بجروحه مرعوب
يشكون بألمهم تعب الدروب

بين جروح سهرانه ،، بين اطفال ذبلانه
شصبرهم بعيد الشام ،، واكلف منه ديوانه

*****

ويانه تيسر راس حسين
واعيونه تصد اعله الضعن
وانه انزف اكلف جرحين
بطول ادروب النوگ الحدن
للوالد والذبها البين
عمتي الما انصفها الزمن

كل ديره نمر بيها يسألون
ألمن هالضعن البي يطوحون
عرفونه وبعد گاموا يشمتون

دنيه وكلها عادتنه. ،، خوارج دين سمتنه
وابوي العلرمح راسه ،، قره آية مصيبتنه

*****

زينب انتي ،،
يا عذاب الفاتچ ومنه سلمتي ???
ياجرح هودله ليله
وما. تلچمينه وسهرتي
سهمچ من الدنيه باب
ونار خيمه ،، وماعلى البلوه اعترضتي
زينب انتي ،،
ياجرح ينزف خوات
بالظهر عالتل وگفتي
ياگلب صابر شكور
حتى ترضى ،،،، اخذ گلتي
وكلشي شفتي
رايه تنعى چفوف كافل
يمنتك نوماس بختي
سرج عالميمون مايل
ياخبر جايب عرفتي
شباقي عندچ غير شاب
يصيح عمه ،، انهض وتلويني علتي
ليل وحشه
وآآآآآه كل صواب للعيله حسبتي
يالبچيتي بگد خجل جربه حنينه
للكفاله شگد عطشتي
وكلشي شفتي ،،،
الخرايب ،، بالدرب للشام
چم خطوه گطعتي
ياجزات الغربه زينب
بالغرب تالي اندفنتي

*****

عيونه ماشافت نهار
السجن صايرله دار ،،، كاظم الغيض

بليل گضه غربته
مات حسره لعمته
*****
الضوه مذبوح لونه ،،عاش بس لون الظلام
للسجن نجمات صارت ،، تلمع ادموع الامام
بلا نهار أسنين حبسه ،، عام يدفع ليل عام
يعني كل ايامه وحشه،، وحسرته تطلع خيام

السجن چن خيمه صار
بيهه ماتطفاله نار ،،،، جمره لدموع

سجنه ليلة وحشته
مات حسره لعمته

*****
الكاظم بصفنت غربته،،تمر على اعيونه صور
خيمه ومناشغ يتيمه ،، وعين اخت صوب النهر
وطفله من ينزل دمعهه،، بخدهه يتوضح اثر
صواب چف جارح جفنهه،، علماهه اعله السهر

تسهر الطفله وتون
من الم جرح الاذن ،،،،، تسهر الليل

شاف ضيم ابصفنته
مات حسره لعمته
*****
راف حسره بحسره طلعت،،صوره وگليبه ألچم
عمته هاي الجاي تنعه ،، ويمهه ملتمه الحرم
باچر اشلون ويباچر ،، يبتدي فجر الالم
ويامن امشي شلون اطلع،، لا كفيل او لاعلم

تنعى والمدمع يسيل
عالنهر غافي الكفيل ،،،، سهمه بالعين

راح اخوهه وفگدته
مات حسره لعمته
*****
ليل وحشة عمته سجنه،،ظَلمِته بنوحه تزيد
هنا سمعهه تصيح عني ،، ياسلف هاشم بعيد
عالخَيال إبحيله كله ،، گام يوصلهه يريد
تعثر وطاح اعله وجهه ،، عَثرهَ گيد الحديد

ناده لا لا يازمان
عمتي ابلايه امان ،،،، ياغريبه

الگيد عثر ركضته
مات حسره لعمته
*****
تالي فتحوا باب سجنه،، لكن بياحاله چان
الحديد الچان بيده ،، من اثر حسراته لآن
شافه طر فجر العقيله،، واليسر مصباحه حان
ماحمل تطلع غريبه ،، شلون ظل عمته يبان

مات وي طرت الفجر
بأولى لحظات اليسر ،،،،، گلبه مذبوح

وي اول شهگته
مات حسره لعمته
*****

دمعه اعله دمعه مانشف جفن الزچيه
يوميه يلچمهه جرح بأسم المنيه
تكف شرها ياهاي الخلگ ماعدهه نيه
بولد الولد ذبحوهه يوم الغاضريه

عن كل ولد للزهره بيت احزان
أم وبدمعها طافت البلدان
يم كل گبر تنعى الگضى عطشان
*****

مافك حزنها ولابرد ساعه گلبهه
غير الهظم هذا الدهر شنطه شوهبهه
كل ما تزور الطف ألم تنشر عتبهه
وتنادي ابني بهالارض جوا تربهه

ياكربله ماانسى بيچ شصار
چم خيمه بيچ اتحاوطت بالنار
كل جمره الچ بگليبي ألها آثار

*****
يا أشبه الناس أبجمال أرسوم جدك
ياخوف ابو اليمه شكثر من اليحسدك
بظهرية الطف انچوت وردات خدك
جيت ارد انشدك ياعلي هم ظامي بعدك

حسنك بعد ما مثله مر العين
شاب وسنينك فرهداهه البين
يمگطع انياط أبگلب الحسين

*****

متخالط ابكل ذره عطر الحنه تشتم
وايگلها ذبحوا زفته رماد المخيم
ابن الحسن بجروحه بالعاشر توسم
واعيونه متكحله لچن كحلتها من دم

ياس الصواني والشموع اتنوح
آيا شباب اعله الرمل مطروح
والزهره تنعى لجاسم المذبوح

*****
بسم الرضيع اتناغي ليليه الحنينه
عبدالله يا سلوة گلب كل الضعينه
تلولي وعليها ايرد صدا نوحه وانينه
يافاطمه حگي من اون ذبحوا ولينه

بالمحسن ايذكرها يوم الباب
تحني الظلع يمه بدمع سچاب
الحارگلي داري رد حرگ الاطناب

*****