Ivy League — Айви лигаси дегани нима?

Айви лигаси АҚШдаги 8 та энг қадимги ва нуфузли хусусий олий таълим муассасалари уюшмаси. Бу олийгоҳларда таълим бериш даражаси жуда сифатлилиги билан ажралиб туради.
Айви лигаси (Ivy League) қуйидаги нуфузли хусусий университетлардан иборат: Браун университети, Колумбия университети, Корнелл университети, Гарвард университети, Пенсилвания университети, Принстон университети, Дартмут коллежи ва Йель университети.

Айви лигаси университетларининг умумий жиҳатлари ҳақида

1. Академик кўрсаткичлар бўйича юқори нуфузли эканлиги. Айви лигаси университетлари дунёдаги энг нуфузли таълим муассасалари қаторига киради. Улар юқори академик стандартлари ва талабаларни қабул қилишда ўта синчковлиги билан ном қозонган.

2. Бой тарихга эга эканлиги. Айви лигаси қаторига кирувчи университетлар 18-19-асрларга бориб тақаладиган бой тарихга эга. Улар АҚШда олий таълимнинг шаклланиши ва ривожланиш босқичида муҳим рол ўйнаган.

3. Гуманитар фанлар ва тадқиқотларга алоҳида эътибор қаратиши. Айви лигаси университетлари гуманитар, ижтимоий фанлар ва санъатга эътибор қаратишлари билан ажралиб туради. Улар ушбу соҳаларда етакчи тадқиқот марказлари сифатида обрў қозонган.

4. Кампус ҳаётининг муҳим рол ўйнаши. Айви лигаси университетларида талабаларга турли тадбирлар, жумладан, спорт тадбирлари, клублар, маданий тадбирлар учун чиройли ва қулай кампуслар жорий этилган.

5. Талабаларга қўйилган қатъий талаблар. Айви лигаси университетлари ўз талабаларидан юқори академик ва етакчилик кўрсаткичларини талаб қилишади. Талабаларга тезлаштирилган ўқув дастури ва шахсий ва касбий ривожланиш имкониятлари таклиф этилади.

6. Битирувчилари обрўли ишларда ишлаши. Айви лигаси университетлари турли соҳаларда алоқа ўрнатишга ва тез орада яхши иш топишга ҳам имкон беради.

@sayohatchikundaligi

Мотивацион хат нима?

Бу тахминан 500 - 700 сўздан иборат бўлган хат бўлиб, сизни университет ёки бошқа ташкилот учун мақбул номзод эканлигингизни кўрсатиш учун керак. Университетда таълим дастурига ҳужжат топширмоқчи бўлсангиз, бирор ташкилотда кўнгилли бўлмоқчи бўлсангиз, компания ёки нотижорат ташкилотда амалиёт ўтамоқчи бўлсангиз мотивацион хат керак бўлади.

Мотивацион хатни (motivation letter) муқова хати (cover letter) билан адаштириб юборманг. "Cover letter"нинг мақсади резюмеингизда бўш иш ўрнига мос келадиган аниқ маълумотларни келтириш. Аксинча, мотивация хатини сизнинг резюмеингизни, сертификатларингизни ва баҳоларингизни қамраб олган аризангизнинг якуний хулосаси дейиш мумкин.

Ташкилотлар ва университетлар ҳақиқий арзирли номзодни танлаш учун юзлаб аризалар ичидан танлашларига тўғри келади. Уларнинг аслида қай бири энг мақбул номзод эканлигини резюме ёки баҳолари билангина билиш қийин бўлиши мумкин. Мана шундай пайтда мотивацион хат катта аҳамиятга эга бўлади. Хат ёзишда сиз ўзингизнинг қизиқишларингиз, шахсиятингиз ва мотивациянгизга эътибор қаратишингиз керак. Мотивацион хат иккита асосий саволга жавоб беради: нима учун сиз муносиб номзодсиз ва нима учун айнан шу университетни танладингиз. Агар сиз рақобат ўта юқори дастурга ҳужжат топшираётган бўлсангиз, ўртача баҳоингиз кириш талабларидан паст бўлса ёки мутахассислигингизни ўзгартиришни режалаштираётган бўлсангиз, мотивация хати айниқса муҳимдир. Бундай ҳолда, мутахассисликни ўзгартиришга туртки бўлган сабабларни керакли тарзда баён қилиш керак.

@sayohatchikundaligi

Ivy League — Айви лигаси университетларига қабул талаблари хақида.

Университетларда қабул талаблари фарқ қилиши мумкин, лекин биргина ўхшаш жиҳати талаблар юқори эканлиги. Қуйида Айви лигаси таркибига кирувчи университетлар эътибор берадиган асосий омиллар келтирилган:

1. Таълим соҳасидаги ютуқлар: Айви лигаси университетлари талабалардан аъло даражадаги академик натижаларга эга бўлишни, турли хил фанларни ўқиган бўлишини ва юқори GPA ёки аъло баҳоларга эга бўлишларини кутишади.

2. Стандартлаштирилган тестлар: SAT ёки ACT тестлари Айви лигаси университетларига киришнинг муҳим таркибий қисми ҳисобланади. Абитуриентлар ушбу тестларда юқори балл олишлари керак.

3. Тавсияномалар: Талабанинг шахсий фазилатлари ва амалий кўникмаларини баҳолашда ўқитувчилар, маслаҳатчилар ёки бошқа ваколатли шахсларнинг тавсиялари муҳим аҳамиятга эга.

4. Ўқишга кириш ҳақида иншо ва ариза: Иншо абитуриентларга ўз фикрларини таҳлил қилиш ва ифодалаш қобилиятини намойиш этиш, шунингдек, ўзининг бошқалардан қандай фарқли жиҳатлари борлигини ва кучли характер эгаси эканлигини кўрсатиш имконини берувчи муҳим омил ҳисобланади.

5. Дарсдан ташқари машғулотлар: Айви лигаси университетлари талабалар ўз маҳоратлари ва қизиқишларидан дарсдан ташқарида қандай фойдаланганликларига эътибор беришади. Булар спорт соҳасидаги ютуқлари, жамоат ишларида қатнашганлиги, кўнгилли ишлар ёки севимли машғулотлари бўлиши мумкин.

6. Хилма-хиллик ва инклюзивлик тамойили: Университетларда талаба уюшмалари ташкил қилинади. Шунинг учун абитуриентларнинг ижтимоий, маданий хилма-хиллиги ва уларнинг имкониятлари алоҳида эътиборга олинади.

Айви лигаси университетларига кириш талаблари вақт ўтиши билан ўзгариши ва олий таълим муассасалари бўйлаб фарқ қилиши мумкин.
Умуман олганда, Айви лигаси университетлари ўзларининг академик мукаммаллиги, обрўси ва талабаларига тақдим этаётган имкониятлари билан ажралиб туради.

@sayohatchikundaligi

Грин-карта ҳақида кенг тарқалган нотўғри фикр хақида гаплашамиз ва бу “грин-карта эгалари АҚШ фуқаролари билан бир хил ҳуқуқларга эга” деган фикрдир.

Тўғри, грин-карта эгалари АҚШда маълум ҳуқуқлардан фойдаланишади, масалан:

✔️ LPR (доимий резидент) мақоми даврида Америка Қўшма Штатларида яшаш ва ишлаш;

✔️ АҚШда кўчмас мулкка эгалик қилиш;

✔️ Турмуш ўртоқлари ва турмуш қурмаган болалари учун Америка Қўшма Штатларида яшашлари учун махсус визалар сўраб мурожаат этиш;

✔️ Ижтимоий суғурта, Medicare нафақалари ва дастур талабларига мувофиқ федерал имтиёз дастурларидан фойдаланиш;

✔️ Ҳайдовчилик гувоҳномасини олиш;

✔️ Мактаб ва коллежга бориш;

✔️ АҚШда доимий резидент Америка Қўшма Штатлари ва у яшаётган штатнинг барча қонунлари билан ҳимояланган бўлади.

Бироқ, грин-карта эгалари учун маълум бир ҳуқуқий чекловлар ҳам бор. Масалан, улар:

✖️овоз бера олмайди ёки давлат лавозимига номзодини қўя олмайди;

✖️федерал ҳукумат билан ишлаш ҳуқуқига эга эмас;

✖️узоқ вақтга (АҚШ ҳудудига қайта кириш учун олдиндан рухсат олмай туриб) чет элга чиқа олмайди;

✖️ҳакамлар ҳайъатида ишлай олмайди;

✖️ва АҚШ фуқароларидан фарқли равишда, грин-карта эгалари мамлакат ҳудудидан депортация қилиниши мумкин.

@sayohatchikundaligi

Грин-карта ҳақида кенг тарқалган нотўғри фикр: грин-карта эгалари йилига бир ёки икки марта АҚШга келиб туриши мумкин

Грин-картанинг расмий номи АҚШ доимий резиденти (LPR) картасидир. Асосий урғу "резидент" сўзига қаратилади. Яъни грин-карта эгаси АҚШга фақат йилда бир ёки икки марта келиб кетувчи доимий ташриф буюрувчи эмас, балки АҚШда доимий резидент бўлиши керак.

АҚШ ҳудудидан ташқарига тез-тез чиқиш грин-карта эгасининг доимий резидентлик мақомига салбий таъсир қилиши мумкин. Агар сиз қисқа муддат давомида АҚШда бўлмаган бўлсангиз, одатда бу катта муаммо бўлмайди. Бир неча ойдан 1 йилгача АҚШ ҳудудида бўлмаганингиз Америкада доимий яшашдан воз кечиш ниятингиз бор-йўқлигини текширишга олиб келиши мумкин.

АҚШ ҳудудига қайта киришга уринаётганда, доимий резидент иммиграция идоралари томонидан шубҳа уйғотса, айниқса 6 ойдан кўпроқ вақт Америкадан ташқарида бўлган бўлса, грин-карта эгаси доимий резидент мақомидан кечиш нияти йўқлигини тасдиқловчи далилларга эга бўлиши керак. Бундай далилларга кўчмас мулкка эгалик ҳуқуқи, ижарага олинган уй-жой, банк ҳисоблари, қимматли қоғозлар, бошқа активлар ва сармоялар, ҳайдовчилик гувоҳномаси, ижтимоий суғурта картаси, кредит карталари, АҚШда ишлаганлигингизни тасдиқловчи ҳужжат ёки чет элда ўтказган вақтингизни тасдиқловчи ҳужжатлар бўлиши мумкин.

@sayohatchikundaligi

Тошкентда хавонинг PM2.5 тозалиги даражаси 412 US AQI.

@sayohatchikundaligi

Виза мурожаатчисига элчихона ходимининг бериши мумкин бўлган саволлари хақида.

🟩 АҚШга саёҳатга оид саволлар. АҚШ элчихонасида суҳбат кунидаги асосий саволлар одатда аризачининг штатларга саёҳат қилиш режалари ҳақидаги саволлардан иборат бўлади. Сиздан қаерга ва нима учун кетаётганингиз, неча кун ва қаерда бўлишни режалаштирганингиз, қаерда яшашингиз, қайси шаҳарларга боришни режалаштирганингиз, нима учун айнан ўша шаҳарларга ташриф буюришни хоҳлаётганингиз ҳақида сўрашлари мумкин. Бу саволга жавобан сиз музейлар, кўргазмалар, маданий тадбирлар ёки оддийгина диққатга сазовор жойларни санаб ўтишингиз мумкин. Ташриф буюриш режалаштирилаётган диққатга сазовор жойларга чипталарни сотиб олиш ёки уларни олдиндан брон қилишнинг ҳожати йўқ. Асосийси, элчихона ходимининг бўлажак саёҳат ҳақидаги саволларига батафсил жавоб бера олиш. Элчихона ходими учун сиз АҚШга саёҳатга тайёргарлик кўраётганингизни тушуниши ва қаерга ва нима учун кетаётганингиз ҳақида аниқ тасаввурга эга бўлиши жуда муҳимдир.

🟩 Ким билан бирга йўлга отланаётганингиз ҳақидаги саволлар. АҚШ элчихонасида суҳбат пайтида кўпинча АҚШга ким билан саёҳат қилиш режалаштирилаётгани ҳақида сўралади. Агар сиз бир ўзингиз учиб кетмоқчи бўлаётган бўлсангиз, сиздан одатда ким билан саёҳат қилишингизни ва нима учун энди АҚШга бир ўзингиз учиб кетаётганингизни сўрашлари мумкин. Ёлғиз саёҳатга отланувчилардан кўпроқ савол сўрашлари мумкин. Элчихонада ёлғиз саёҳатчиларга нисбатан шубҳалироқ муносабатда бўлишади. Аммо ҳавотирга ўрин йўқ: бу ёлғиз саёҳат қилишни режалаштираётган ҳар бир кишига, албатта, виза бериш рад этилишини англатмайди. Фақат саволга нима деб жавоб беришга тайёр бўлсангиз бас. Агар сиз дўстларингиз билан йўлга отланаётган бўлсангиз, сиздан бу одамларни қаердан билишингиз ёки бундан аввал улар билан бирга чет элга саёҳат қилганмисиз деб сўралиши мумкин. Улар АҚШга неча марта боришган, у ерда қанча вақт ўтказишган ва ҳоказо.

🟩 Кимникига бораётганингиз ҳақидаги саволлар. Ариза берувчидан виза учун суҳбат ўтказилганда, кўпинча мезбон давлат ҳақида саволлар берилади. Элчихона ходимлари сизни таклиф қилаётган одамлар кимлиги, улар билан қанчалик тез-тез кўришиб туришингиз, уларнинг АҚШдаги иммиграция мақоми қандай эканлиги ва улар Америкага қандай қилиб кўчиб ўтгани, нима билан шуғулланаётгани ва қаерда ишлаши билан қизиқади. Агар сиз дўстларингизни кўргани кетаётган бўлсангиз, сиздан танишларингиз ҳақида сўрашлари мумкин. Албатта, сиздан дўстларингиз/қариндошларингиз ҳаётининг барча тафсилотларини билишингиз талаб этилмайди. Аммо бундай саволларга ҳам тайёр тураверганингиз маъқул, чунки элчихона ходимлари сиз шунчаки нотанишларнинг таклифи билан эмас, балки сизни чақираётган одамларни ҳақиқатан ҳам билишингизга амин бўлишлари керак.

Агар саёҳат бизнес мақсадларида режалаштирилган бўлса , элчихона ходими компания нима билан шуғулланиши, у билан қанча вақтдан бери ҳамкорлик қилаётганингиз ва компанияда ким билан ҳамкорлик қилаётганингиз билан қизиқиши мумкин. Улар кўпинча компаниянгизнинг бошқа ходимларига эмас, балки АҚШга нима учун кетаётганингизни сўрашади. Агар сиз АҚШ бизнес визасига мурожаат қилмоқчи бўлсангиз, элчихона ходими инглиз тилини билиш даражангиз ҳақида сўраши мумкин. Агар сизнинг тил билиш даражангиз паст бўлса, улар сиздан АҚШда қандай мулоқот ва музокаралар олиб боришингизни сўрашлари мумкин. Сиз таржимон ёллашингиз мумкинлигини айтсангиз ҳам бўлади. Элчихона учун иккала вариант ҳам мақбул.

@sayohatchikundaligi

Виза мурожаатчисига элчихона ходимининг бериши мумкин бўлган саволлари хақтда давоми.

🟩 Саёҳат ҳомийи ҳақида саволлар. Агар саёҳат учун тўловни аризачининг ўзи молиялаштирмаса, бу маълумот DS-160 онлайн ариза шаклининг махсус бўлимда акс эттирилиши керак. Суҳбат куни ким ва нима учун пул тўлаётгани ҳақидаги саволларга тайёр бўлишингиз керак. Айниқса, бегоналар (қариндош бўлмаганлар) ёки ташкилот томонидан ҳомийлик қилинган тақдирда саволларга тайёр туринг. Харажатлар компания томонидан қопланса, суҳбат давомида улар нафақат савол беришлари, балки тўлов амалга оширилганлигини тасдиқловчи ҳужжатларни тақдим этишни ҳам сўрашлари мумкин. Шунинг учун АҚШ элчихонасида жавобларингизни ҳужжат билан тасдиқлашга тайёр бўлишингиз керак. Ўзингиз билан бирга иш жойингиздан маълумотнома олиб олинг: унда барча молиявий кафолатлар батафсил берилган бўлиши керак. Ёки бу харажатларни қоплаш тасдиқланган АҚШдаги ҳамкорларнинг таклифи бўлиши мумкин.

🟩 АҚШдаги танишлар ҳақида саволлар. АҚШда ҳеч кимни танимасангиз ва аризангизда меҳмонхонада қолишингизни кўрсатган бўлсангиз ҳам, сиздан Америкада дўстларингиз ёки танишларингиз бор-йўқлигини сўраши мумкин. Агар АҚШда яшовчи узоқ танишларингиз бўлса, уларникига бориш саёҳатингизнинг асосий мақсади бўлмаса, одатда суҳбат давомида бу гапни айтиб юрмаслик тавсия этилади. Акс ҳолда, бу гап қўшимча саволлар туғдиради. Уларга қандай жавоб беришни билмай қолишингиз ҳам мумкин. Бундан ташқари, нима учун узоқ танишларингизни анкетага киритмаганлигингиз шубҳали кўриниши мумкин. Агар улар ҳақиқатан ҳам яқин дўстларингиз бўлса ва сиз уларникига келажакда боришни режалаштираётган бўлсангиз, Америкадаги танишларингиз ҳақида гапираверсангиз бўлади. Бундай ҳолда, барча саволларга жавоб бериш қийин бўлмайди.

🟩 Ариза берувчининг иши ҳақида саволлар. Агар сиз ишлаётган бўлсангиз, интервюда ишдаги вазифа ва мажбуриятларингиз ҳақида батафсил гапиришга тайёр туринг. Сиздан умуман компания фаолияти, мижозлар ва ҳамкорлар ҳақида сўрашлари мумкин. Баъзан улар сизнинг ташкилотингиз қаерда жойлашганлиги ва ишга қандай боришингизни сўрашади. Элчихона ходими компаниянинг асосий ходимларининг исмларини айтишни ва ҳатто уларнинг телефон рақамларини ҳам сўраб кўриши мумкин. Суҳбатда ишга оид саволлар турлича бўлиши мумкин, аммо уларнинг барчаси ишхонадан тақдим этилган маълумотноманинг ҳақиқийлигини текширишга қаратилган. Афсуски, кўпинча аризачиларнинг иш фаолиятини тасдиқлашда кўп ёлғон ишлатилади. Шунинг учун элчихона ходимлари иш ҳақида ҳар хил савол бериб кўришади.

Агар ариза берувчи айни пайт ишламаётган бўлса, элчихона ходими аввал ишлаган ишхоналарингиз билан қизиқиши мумкин. Шуни ҳам ҳисобга олиш керакки, суҳбат чоғида сизнинг доимий иш жойингиз бўлмаса ҳам, АҚШ элчихонаси ходимига банд эканлигингизни, қўл қовуштириб ўтирмаётганингизни кўрсатиш тавсия этилади. Масалан, болалар ёки неваралар тарбияси билан шуғулланаётганингиз, уй ишлари билан банд эканлигингиз ва ҳоказо.

@sayohatchikundaligi

Instagram тармоғида учун қилинган ушбу контентимизни дунё бўйлаб 45 миллионга яқин одам кўрди.

Шундай контент беришда давом этишимизни хохлайсизми?

@sayohatchikundaligi

АҚШ коллежларида бир ўқув йили учун тўлов 90 000 доллардан ошди

Бир қатор хусусий коллежлар бу йил биринчи марта таълим нархини 90 000 доллардан оширди. 2024 йилда таълим нархи 90 000 доллардан ошган коллежлар:

Жанубий Калифорния университети (95 000 доллар);
Калифорниядаги Harvey Mudd коллежи (93 000 доллар);
Wеllesley коллежи (92 000 доллар);
Пенсилвания университети (92 000 доллар);
Род-Айленддаги Браун университети (92 000 доллар);
Ню-Хемпширдаги Dartmouth коллежи (91 000 доллар);
Бостон университети (90 000 доллар).
Кембриждаги (Массачусетс штати) Гарвард университети бу йил кузда 1 ўқув йили учун таълим нархини 91 000 долларга баҳоламоқда. Гарвард ўз талабаларига саховатли ёрдам дастурини тақдим эта олади, чунки унинг жамғармаси 50 миллиард доллардан ошади. Бу университетлар орасида энг йирик жамғармали олий таълим муассасасидир.

Баъзи коллежлар тиббий суғурта ва транспорт учун тўлов каби харажатларни ўз ичига олади, бошқалари эса йўқ. Ўтган йили ўқиш нархи 90 000 доллар атрофида бўлган олий таълим муассасалари, жумладан, Ню-Йоркдаги Колумбия университети ва Чикаго университети, бу йил учун кутилаётган харажатларни ҳали маълум қилгани йўқ.

@sayohatchikundaligi

❓АҚШда ўқиётган пайтимда тиббий суғуртага эга бўлишим шартми?

АҚШ соғлиқни сақлаш тизими нафақат дунёдаги энг қимматларидан бири, балки энг яхшиларидан бири ҳамдир. Хорижлик талабалар ўз мамлакатларида тиббий хизматлардан бепул фойдаланиш имкониятига эга бўлганликлари учун, АҚШда ҳам ҳудди шундай бўлса керак деб ўйлашлари мумкин. Хорижлик талабалар "АҚШда ўқиётган пайтимда менда тиббий суғурта бўлиши шартми?" деган савол туғилади.

Жавоб: “Ҳа”. Хорижлик талабалар АҚШда ўқиш вақтида тиббий суғурта сотиб олишлари керак. Аксарият коллеж ва университетлар ўқишга кириш жараёнида ёки ўқишни бошлашдан аввал сиздан тиббий суғуртангизни кўрсатишингизни талаб қилади. Одатда, кўпчилик коллеж ва университетлар талабаларга ўзларининг суғурта пакетларини арзон нархларда таклиф қилишади. Гарчи баъзи коллеж ва университетлар талабалардан тиббий суғурта талаб қилмасалар ҳам, ўзингиз тиббий суғурта олишга ҳаракат қилинг.

АҚШ соғлиқни сақлаш тизими Америка халқи учун жуда қиммат ҳисобланади. Фавқулодда тез ёрдам бўлимига мурожаат этишингизнинг ўзи умумий ҳисобда юз минглаб долларларга тушиши мумкин. Суғуртангиз бўлмаса, сиз шунча пулни ўзингиз тўлашга мажбур бўлишингиз мумкин.

Хорижлик талабалар ўз харажатларини режалаштиришлари керак, шу жумладан АҚШда ўқиш пайтида тиббий суғурта сотиб олиш масаласи ҳам энг асосийларидан биридир. Тиббий суғуртани хусусий компания ёки талаба ўқимоқчи бўлаётган таълим муассасасидан олиши ихтиёрий ҳисобланади.

@sayohatchikundaligi

Авеню, булвар ёки драйв: АҚШда кўча ва йўллар таснифи

Avenue (проспектлар) кўпинча кўчаларга перпендикуляр тушган бўлиб, иккала томонда бинолар ва дарахтлар билан ажралиб туради. Ҳар бир шаҳар муниципалитети ўз кўча ва хиёбонларини қайси йўналишда жойлаштиришни ҳал қилиш ҳуқуқига эга. Мисол учун, Манхеттенда хиёбонлар шимолдан жанубга, кўчалар шарқдан ғарбга қараб жойлашган бўлади, Денверда эса бунинг акси.

АҚШда кўча ва проспектлардан ташқари, кўпинча номлари таржима қилинмайдиган бошқа йўл турлари ҳам бор:

Boulevard (булвар) анчагина кенг кўча бўлиб, кўпинча транспорт ҳаракати учун бир нечта йўл бўлакларига эга бўлади. Ҳар икки томонда дарахтларга эга, шунингдек, одатда дарахтли кенг бўлиниш чизиғи ҳам бўлади.

Court (корт) - одатда турар-жой кварталида жойлашган, боши берк кўчага етаклайдиган кичик кўча.

Crescent (кресент) - бурама, тор йўл бўлиб, одатда бу йўлнинг икки томони бошқа йўлларга туташган бўлади.

Drive (драйв) - баъзи географик объектлар бўйлаб ёки уларнинг атрофидан ўтган узун йўл: масалан, тоғ ёки дарё.

Lane (лейн): одатда турар-жойларда, хусусий уйлар ёки турар-жой мажмуалари бўлган қишлоқларда жойлашган тор йўл.

Place (плейс): боши берк кўча ёки йўл. Кортдан фарқи, плейснинг берк кўчасининг охирида айлана ёки бурилиш ҳалқаси бўлмайди.

Terrace (террас): тепалик бўйлаб пастга тушган кўча.

Way (уей): кўпинча боши берк кўча билан тугайдиган, асосий йўлдан чиққан кичик йўл.

@sayohatchikundaligi

АҚШга талабалик визасини олиш бўйича батафсил кўрсатмалар

Америка университети ёки коллежида ўқиш учун чет эл фуқаросига АҚШ талабалик визаси керак бўлади.
Америка таълим муассасасига рўйхатдан ўтганингиздан ва ўқишга расмий таклифнома олганингиздан сўнг виза олиш учун ариза топширишни бошлашингиз мумкин. Виза бир неча ҳафта ичида сизнинг мамлакатингиздаги АҚШ элчихонаси ёки консуллиги орқали берилади.

@sayohatchikundaligi

Америкада ўқиш учун энг кенг тарқалган F-1 ва М-1 визалари ҳақида маълумот

F-1 визаси

Бу талабалик визасининг энг кенг тарқалган тури. АҚШда қуйидаги ҳолларда F-1 визаси керак бўлади:
▪️ университетда
▪️ коллежда
▪️ мактабда (1 йил давомида)
▪️ тил курсларида (ҳафтасига 18 соат ўқув юкламаси билан 2 ёки ундан ортиқ ҳафта давомида)
▪️ университетга тайёргарлик курсларида
▪️ қисқа муддатли касбий курсларда
▪️ мактаб ўқувчилари ва талабалар учун ёзги курсларда

М-1 визаси

М-1 визаси касб-ҳунар таълим муассасаларида ўқиётган хорижликларга берилади. АҚШда қуйидаги ҳолларда М-1 визаси керак бўлади:
▪️ техник курсларда
▪️ ўрта махсус таълим дастурлари бўйича (электротехник, чилангар, механик, дурадгор ва бошқалар каби касбларни ўзлаштириш учун)
▪️ ошпазлик мактабларида
▪️ косметология мактабларида ва ҳоказо.

@sayohatchikundaligi

❓ АҚШда талабалик визаси билан ишлаш мумкинми?

F-1 визаси бор хорижлик талабалар АҚШда ўқиш вақтида кампусда ишлаш ҳуқуқига эга. Ўқув семестрида талабанинг иш вақти ҳафтасига 20 соатдан ошмаслиги керак.
2-курсдан бошлаб кампусдан ташқаридаги ишларда ишлаш мумкин.

М-1 визаси эгалари ўқиш пайтида Америкада ишлай олмайди.

АҚШдаги хорижлик талабалар учун қуйидаги қоидалар ҳам бор:

▪️ АҚШга келгандан кейин 30 кундан кечиктирмай талаба ўзининг таълим муассасаси билан боғланиши лозим;
▪️ ҳар семестрда тўлиқ ўқиш курсига рўйхатдан ўтиш;
▪️ барча дарсларга қатнашиш;
▪️ академик кўрсаткичларнинг қониқарли даражасини сақлаб қолиш;
▪️ таътил / таътилдан олдин камида бир тўлиқ ўқув йилини тугатиш.

❓ АҚШ талабалик визаси қанча муддатга берилади?

F-1 визасининг амал қилиш муддати алоҳида белгиланади ва АҚШдаги ўқув дастурининг давомийлигига боғлиқ. Визанинг умумий амал қилиш муддати 1 йилдан ошмайди.

Америкада 1 йилдан ортиқ ўқиш ниятида бўлганлар, мамлакатдан чиқганларида албатта талабалик визасини янгилаши керак бўлади.

@sayohatchikundaligi

АҚШга талабалик визасини қўлга киритиш бўйича кўрсатма.

Мазкур жараён бир неча босқичдан иборат:

1. I-20 шаклини олиш

Бу талаба ўқишга қабул қилинган Америка университетидан ўқишга расмий таклифнома. Университетнинг ўзи I-20 шаклини тайёрлайди, тўлдиради ва талабага юборади.

Ҳужжатда талабанинг SEVIS идентификация рақами (N ҳарфи + 9 та рақам, штрих-код устида, шаклнинг юқори ўнг бурчагида), SEVIS I-901 тўловини тўлаш, виза олишга ариза, виза мақомини ўзгартириш ва АҚШга кириш бўйича маълумот келтирилган.

I-20 шаклининг намунасини бу ерда кўришингиз мумкин.

2. Консуллик йиғими ва SEVIS учун тўлов

Талабалик визаси учун талаба иккита тўловни тўлаши керак:

🔹 160 АҚШ доллари миқдоридаги консуллик йиғими банкда, кредит карта ёки почта бўлимида тўланади
🔹 SEVIS тўлови $350 (ёки алмашинув талабалари учун $220) SEVIS веб-сайтида кредит карта орқали тўланади.

Тўланганлик ҳақидаги чекларни сақлаб қўйинг, виза учун ариза беришда улар керак бўлади.

3. Фотосурат

Виза олиш учун сиз қуйидаги талабларга жавоб берадиган рангли фотосуратга тушишингиз керак:

🔹 5х5 см
🔹 оқ ёки оч рангли фон
🔹 бош суратнинг 50-70% ни эгаллаши лозим
🔹 юз ифодаси нейтрал бўлиши керак
🔹 кундалик кийим кийган бўлиш керак.

Фотосуратнинг онлайн нусхаси DS-160 шаклини тўлдиришда юкланиши керак ва визага мурожаат қилишда фотосуратнинг босма нусхаси тақдим этилиши керак.

4. DS-160 шаклини тўлдириш

DS-160 шакли сиз ҳақингиздаги маълумотларни ва АҚШда ўқиш учун талабалик визасини олиш бўйича барча маълумотларни ўз ичига олади. Мазкур шакл расмий веб-сайтда онлайн тўлдириб юборилади. Шаклни тўлдириб, топширгандан сўнг, нусхасини ҳам чоп этишингиз керак.

5. Суҳбатга ёзилиш

АҚШ визасини олиш учун ҳужжатлар АҚШ элчихонаси ёки консуллигида суҳбат пайтида тақдим этилади.
Рўйхатдан ўтиш учун сизга қуйидаги ҳужжатлар керак бўлади:

🔹 паспорт рақами
🔹 тўлов квитанцияси рақами
🔹 аризани тасдиқлаш рақами DS-160 (10 хонали штрих-код).

@sayohatchikundaligi

АҚШга талабалик визасини олиш учун ўтказиладиган суҳбат жараёни ҳақида

Суҳбат куни сиз белгиланган вақтдан 10-20 дақиқа олдин АҚШ элчихонаси ёки консуллигига етиб келишингиз керак.
Шуни эсда тутингки, сим ёки кабел, қувватлантирувчи ускуналар, қулоқчинлар, хотира карталари, флешкалар, парфюмерия, аэрозоллар, рюкзаклар ва катта сумкаларни олиб кириш тақиқланган. Суҳбатдан олдин барча шахсий нарсаларингизни алоҳида махсус хонада қолдиришингизга тўғри келади.

Суҳбат куни ўзингиз билан қуйидагиларни олиб келинг:

🔲 паспорт
🔲 суҳбатга таклифнома
🔲 рангли фотосурат
🔲 I-20 шакли (Америка университетидан таклифнома)
🔲 DS-160 шакли (Талабалик визасига ариза)
🔲 консуллик йиғими тўланганлиги тўғрисидаги квитанция
🔲 Sevis квитанцияси
🔲 мавжуд академик ҳужжатлар (шаҳодатнома, диплом, сертификат ва бошқалар)
🔲 тил ва академик имтиҳонлар бўйича сертификатлар (A-levels, SAT, TOEFL, GMAT, GRE ва бошқалар).
🔲 банк ҳисобварағидан кўчирма (ўқиш муддатида АҚШда ўқиш ва яшаш харажатларига маблағ борлигини тасдиқлаш учун)
🔲 ҳомийнинг банк ҳисобварағидан кўчирма (агар кимдир сизнинг таълимингиз ва АҚШда яшашингиз учун пул тўлаётган бўлса)
🔲 ҳомий билан муносабатни тасдиқловчи ҳужжат (туғилганлик тўғрисидаги гувоҳнома, никоҳ гувоҳномаси ва бошқалар).
🔲 ватан билан алоқалар мавжудлигини тасдиқловчи ҳужжатлар (кўчар ва кўчмас мулк мавжудлиги, оилавий алоқалар, касбий алоқалар ва бошқалар тўғрисида).

Суҳбатдан олдин ушбу ҳужжатларнинг барчасини элчихона ходимига топширишингиз керак. Суҳбат инглиз тилида бўлиб ўтади ва бир неча дақиқа давом этади.

@sayohatchikundaligi

Кўпинча хорижлик талабаларга элчихона ходимлари қуйидаги саволларни беради:

❓Нима учун АҚШда ўқишга қарор қилдингиз?
❓Нима учун айнан ушбу дастурни/университетни танладингиз?
❓АҚШда ўқишни тугатгандан кейин режаларингиз нималардан иборат?

Суҳбат давомида ўзингизга ишончингиз баланд ва хайрихоҳ бўлишингиз муҳим. Саволларга жавоб бераётганда, сиз танлаган дастур/университет ҳақида иложи борича кўпроқ маълумотга эга бўлишингиз ва виза бўйича мутахассисни Америкада ўқишни тугатганингиздан сўнг ватанингизга қайтишингизга ишонтира олишингиз керак.

Элчихона ходими талабалик визасини бериш ёки бермаслик тўғрисидаги қарорни сизнинг ҳузурингиздаёқ қабул қилади. Агар сизнинг аризангиз рад этилса, у бу қарорнинг сабабини тушунтириб, паспортингизни сизга қайтаради.

Шундан сўнг сиз яна визага ариза топширишингиз мумкин. Элчихона ходими сизга виза беришга қарор қабул қилса, у виза қўйиш учун паспортингизни олади. Талабалик визаси илова қилинган паспорт тахминан 2 ҳафтада қўлингизга берилади.

АҚШ талабалик визаси эгаси бутун ўқув дастури давомида АҚШда яшаши керак. Бу турдаги визани олганингиздан сўнг, сиз АҚШга ўқишингиз бошланишидан 30 кун олдин келишингиз мумкин.

Ўқишни тугатгандан сўнг, сиз АҚШда қуйидаги муддатларда қолишингиз мумкин:

▪️30 кун (М-1 визаси билан)
▪️60 кун (F-1 визаси билан).

Хорижлик талабалар ҳам Америкага турмуш ўртоғи ёки фарзандларини олиб келишлари мумкин. Бироқ, оила аъзолари мос равишда F-2 ёки М-2 визаси учун алоҳида ариза топширишлари керак.

@sayohatchikundaligi

Талабалик визаси нима сабабдан рад этилиши мумкин?

Талабалар учун АҚШ талабалик визаси рад этилиши ҳолатлари жуда кам учрайди. Бироқ, Америкада ўқиш учун виза берилмаслигининг бир қанча сабаблари ҳам бор:

🔵 Америкада қолиб кетишга уринишда шубҳа
Агар сизнинг ҳужжатларингиз ва суҳбатингизда АҚШда ўқишни тугатгандан сўнг ватанингизга қайтиш ниятингиз борлигини кўрсатмаса, элчихона ходими сизни талабалик визаси орқали иммиграцияга ҳаракат қилаётганингизда гумон қилиши мумкин.
Қонун сизга ўқишни тугатгандан сўнг Америкада яшаш ва ишлашга рухсат беришига қарамай, визага ариза беришда бундай ният ҳақида гапирмаслик керак.

🔵 Молиявий етишмовчилик
Сиз тақдим этаётган ҳужжатлар ва банк кўчирмалари АҚШда яшаш ва ўқиш харажатларини қоплаш учун молиявий имкониятингиз борлигини кўрсатиши керак.

🔵 Муваффақиятсиз интервю
Суҳбат давомида сизнинг гапларингиз ёки хатти-ҳаракатларингиз шубҳали туюлса, виза рад қилиниши мумкин.

🔵 Ҳужжатлар билан боғлиқ муаммолар
Эсда тутингки, виза олиш учун сиз барча талабларга жавоб берадиган ҳужжатларнинг тўлиқ тўпламини топширишингиз керак. Агар бирон бир ҳужжатни топширишни унутиб қўйсангиз ёки ҳужжатлар нотўғри тўлдирилган бўлса, бу виза рад этилишига олиб келиши мумкин.

@sayohatchikundaligi