Bugungi kunim Kitoblar Olamida yakun topdi. Alisher Sadullayev bilan Ibrat Farzandlari loyihasini muhokama qilib, yillik rejalarni aniqlashtirib oldik.

Aytgancha, bugun bayram, Ibrat Academy mobil ilovasi foydalanuvchilari soni 1 milliondan oshdi.

Bu hali boshlanishi, oldinda sizni ajoyib yangiliklar kutmoqda.

Kuzatib boring.

MohirAI jamoamiz ham 10 kishidan oshibdi, qoil. Bir yilda juda koʻp ishlar qilindi. Oʻzbek tili modelimiz raqobatchilar orasida aniqligi eng baland boʻlib qolmoqda.

Yil davomida bozorga bir nechta Rossiya va Yevropa kompaniyalari kirishga harakat qilishdi, hozircha hammasi muvaffaqiyatsizlik bilan tugadi.

Biz esa B2C sektordan B2B ga fokusni qaratganimiz uchun onlaynda koʻrinmay qoldik. MohirAI asosiy mijozlari qoʻngʻiroq markazlari boʻlib qolmoqda. Sunʼiy intellektimiz Oʻzbek tilida soʻzlashib, bemalol savollarga ham javob bera oladi. Bundan tashqari katta media kompaniya bilan kino va seriallarni AI yordamida dublyaj qilish ustida ishlayapmiz, natijalar zoʻr. Ovozlarni hissiyotlar bilan chiqardik, haqiqiy aktyor ovozidan ajratish juda qiyin.

B2C bozori uchun mohir.ai studio mahsulotini chiqarganmiz, Oʻzbek tilidagi videolarga bir zumda subtitr yaratish mumkin. Katta mijozlardan Abdukarim Mirzayev, har bir videolariga Oʻzbek tilida subtitr qoʻshayaptilar. Yaqinda studioga boshqa tillarga avtomat tarjima ham qoʻshish arafasidamiz.

Darvoqe, tarjima modeli ham oʻzimizniki. Bu borada Asaxiy.uz va 1000Kitob loyihasi bilan hamkorlik olib borayapmiz.

1 yil avval MohirAI ni taqdimot qilganimizda baʼzi dasturchilar ustimizdan kulib, "buni biz ham qila olamiz" mazmunida gaplar qilishgan edi. 1 yil oʻtdi, negadir raqobatchilar koʻrinmayapti.

Yana yangiliklar koʻp, tez kunda Ibrat Farzandlari bilan hamkorlikda katta bir loyihani taqdim qilamiz, ungacha esa kuzatib boring.